Акафист святым праотцем Адаму и Еве, прародителем рода человеческаго
Кондак 1
Избранному творению Божию, Адаму первому, прародителю нашему, со Евою, яже плоть от плоти и кость от костей его есть, воспоим, вернии, похвальная словеса. Вы же, аще и падшии иногда и рая лишеннии, обаче подвигом Новаго Адама, Евою второю в мир
пришедшаго, спасеннии и на небеса возведеннии, молитеся о нас, чадех ваших, взывающих вам:
Радуйтеся, Адаме и Ево, венче твари и красото вселенныя.
Икос 1
Ангели Божии прославиша Зиждителя, шестию деньми вся сотворшаго и напоследок дний тех человека создавшаго, поселившаго же сего во Эдеме на востоце и да-ровавшаго ему жену помощницу, и глаголаша Адаму с женою:
Радуйтеся, творение Божие совершенное;
радуйтеся украшение поднебесныя.
Радуйтеся, по образу Божию созданнии;
радуйтеся, по подобию Его сотвореннии.
Радуйтеся, владыки твари;
радуйтеся, повелители земли.
Радуйтеся, плоть перстную носящии;
радуйтеся, ум небесный имущии.
Радуйтеся, во Эдеме пребывающии;
радуйтеся, от древа жизни питающиися.
Радуйтеся, заповеди Божии приявшии;
радуйтеся, яко заповеди Его тяжки не суть.
Радуйтеся, Адаме и Ево, венче твари и красото вселенныя.
Кондак 2
Видя Творец творение Свое, яко вся добра зело, почи в день седмый от дел Своих, не престает обаче и в оный день промышляти о вселенней, приимает же поклоне-ние от ангел небесных и рода человеча, поющих Ему: Аллилуия.
Икос 2
Разум недоразумеваемый еже человеков творения разумети Денница иский, соблазнися о толицей славе перстнаго Адама и помрачися умом. Глаголяй прежде: лНа небо взыду, выше звезд небесных поставлю престол мой, сяду на горе высоце, на горах высоких, яже к северу, взыду выше облак, буду подобен Вышнему╗, ныне дух злобы бысть, и падеся с небесе, бысть же падение его великое. Тварь же вся, Премудрость Отчую прославляющи, ко Адаму и Еве взываху:
Радуйтеся, Света истиннаго причастницы;
радуйтеся, тьмы в себе никакоже имущии.
Радуйтеся, во дни с Богом беседующии;
радуйтеся, и в нощи дела руку Его созерцающии.
Радуйся, Адаме, светило великое;
радуйся, Ево, светило малое.
Радуйтеся, Творцом возлюбленнии;
радуйтеся, друг друга зело любящии.
Радуйтеся, по земли ходящии;
радуйтеся, духом к небу возносящиися.
Радуйтеся, царие всякаго дыхания;
радуйтеся, попечение о вселенней имущии.
Радуйтеся, Адаме и Ево, венче твари и красото вселенныя.
Кондак 3
Сила Вышняго всемощна есть, не хотяше обаче Творец творения Своего разумнаго свободную волю утеснити, сего ради попусти врагу рода человеча, зрак змия приявшему, искусити Еву, еже не пети ей: Аллилуия.
Икос 3
Имый мысль лукавую, рече змий жене: лЧто яко рече Бог, да не ясте от всякаго древа райскаго?╗ И рече жена змию: лОт всякаго древа райскаго ясти будем, от плода же древа, еже есть посреде рая, рече Бог, да не ясте от него, ниже прикоснетеся к нему, да не умрете╗. И рече змий жене: лНе смертию умрете, обаче весть Бог, яко воньже аще день снесте от него, отверзутся очи ваши, и будете, яко бози, ведяще доброе и лукавое╗. Сия вся льстивыя глаголы глаголаше змий жене, вместо еже пети ей и мужеви ея:
Радуйтеся, душу словесную имущии;
радуйтеся, волею свободною почтеннии.
Радуйтеся, ведущии волю Божию благо быти;
радуйтеся, воли своей не ищущии.
Радуйтеся, от древесных плодов питающиися;
радуйтеся, заповедь Зиждителя хранящии.
Радуйтеся, назии и не стыдящиися;
радуйтеся, ничесоже лишеннии.
Радуйтеся, утомления не знающии;
радуйтеся, смерти не причастнии.
Радуйтеся, безсмертнаго Владыки чада;
радуйтеся, веру Сему имущии.
Радуйтеся, Адаме и Ево, венче твари и красото вселенныя.
Кондак 4
Бурю помышлений сумнительных имяше внутрь жена, не ведящи, каково есть слово сие. Видящи же, яко добро древо в снедь и яко угодно очима видети и красно есть, еже разумети, Ц вземши от плода его яде, и даде мужу своему, и ядоста. И отверзошася очи обема, и разумеша, яко нази беша, и сшиста листвие смоковное, и сотвориста себе препоясания, Богу же забыша пети: Аллилуия.
Икос 4
Слышаста Адам со Евою глас Господа Бога, ходяща в раи по полудни, и скрыстася Адам и жена его от лица Господа Бога посреде древ райских. И призва Господь Бог Адама и рече ему: лАдаме, где еси?╗ И рече Адам: лГлас слышах Тебе, ходяща в раи, и убояхся, яко наг есмь, и скрыхся╗. И рече ему Бог: лКто возвести тебе, яко наг еси? Не ял ли еси от древа, от негоже единаго заповедах тебе не ясти?╗ И рече Адам: лЖена, юже дал ми еси, та ми даде от плодов древа, и ядох╗. И рече Господь Бог жене: лЧто сие сотворила еси?╗ И рече жена: лЗмий прельсти мя, и ядох╗. И проклят Господь Бог змия и рече ему: лВражду положу между тобою и между женою, и между семенем твоим и Семенем тоя: Той сотрет главу твою, и ты блюсти будеши Его пяту╗. Жене же рече: лУмножая умножу печали твоя: в болезнех родиши чада, и к мужу твоему влечение твое, и той тобою обладати будет╗. И Адаму рече: лПроклята земля в делех твоих: терния и волчцы произрастит тебе, в поте лица твоего снеси хлеб твой, дондеже возвратишися в землю, от неяже взят еси, яко земля еси, и в землю отыдеши. И не имаши слышати ктому ты, ниже жена твоя, дондеже Избавитель приидет, глаголов сих:
Радуйтеся, в раи с Богом беседующии;
радуйтеся, любве Его наслаждающиися.
Радуйтеся, при истоце четырех рек живущии;
радуйтеся, четырьми концы обладающии.
Радуйся, Адаме, нарекий зверем имена;
радуйся, Ево, мужеви помощница и жена.
Радуйся, рода человеча начальниче;
радуйся, мати всех живущих.
Радуйтеся, землю наполнити имущии;
радуйтеся, траву в снедь приявшии.
Радуйтеся, смерти николиже видевшии;
радуйтеся, к животу безсмертному предуставленнии.
Радуйтеся, Адаме и Ево, венче твари и красото вселенныя╗.
Кондак 5
Богопоставленный херувим, держай оружие пламенное обращаемое, храняше древо жизни райское, еже како не быша пришли человецы согрешившии и яли от древа того и жили быша во веки: изгна бо Бог из рая сладости Адама со Евою и даде им ризы кожаны, сим, иже воспеваху иногда со ангелы: Аллилуия.
Икос 5
Виде Адам ангела изринувша и затворивша божественнаго сада дверь, воздохну вельми, седе же прямо рая и свою наготу рыдая плакаше: лУвы мне, прелестию лукавою увещанну бывшу и окрадену и славы удалену! увы мне, простотою нагу, ныне же недоуменну! Но, о раю, ктому твоея сладости не наслаждуся, ктому не узрю Господа моего и Создателя и не услышу званий сих:
Радуйся, Адаме, жизни райския наслаждаяйся;
радуйся, Адаме, попечения не имущий.
Радуйся, Ево, от ребра мужня взятая;
радуйся, Ево, мужем твоим любимая.
Радуйтеся, зверей не боящиися;
радуйтеся, имже зверие повинуются.
Радуйтеся, красотою древ райских услаждающиися;
радуйтеся, птиц эдемских послушающии.
Радуйтеся, к Богу, яко к другу, беседующии;
радуйтеся, от Творца ничесоже таящии.
Радуйтеся, возрастающии во благодати;
радуйтеся, укрепевшии в добре.
Радуйтеся, Адаме и Ево, венче твари и красото вселенныя╗.
Кондак 6
Проповедницы быша Адам со Евою детем своим о имущем приити Спасителе их и Избавителе, Иже сотрет главу змиеву и свободит род человечь от власти тления; Каин же обаче не умилися, но завистию и злобою побеждаем, умножи грех в мире, убив брата своего Авеля, зверонравен сый и не ведый пети: Аллилуия.
Икос 6
Возсия свет Еве, егда роди третияго сына своего Сифа, от негоже род благочестив произыде: Енох, на небо пресельник, и Мафусал старец, и ковчегоплаватель Ной. И рече жена: лВоскреси мне Бог семя другое, вместо Авеля, егоже уби Каин. Обаче имам ли ублажаема быти пении сими:
Радуйся, Ево, Богу послушная;
радуйся, жено, мужу повинующаяся.
Радуйтеся, в поте лица своего труждающиися;
радуйтеся, чада своя воспитующии.
Радуйтеся, яко Избавитель от вас произыдет;
радуйтеся, яко Семя жены сотрет главу змиеву.
Радуйтеся, надежду имущии;
адуйтеся, на Бога упование возложившии.
Радуйся, Адаме, аще и скорбен еси;
радуйся, Адаме, о Потребители тли.
Радуйся, Адаме, присно Богу молящийся;
радуйся, Ево, к Сему выну взывающая.
Радуйтеся, Адаме и Ево, венче твари и красото вселенныя╗?
Кондак 7
Хотящу Создателю помиловати создание свое, посла человеком Авраама, Моисея же и Давида, последи же восхоте сам воплотитися от избранныя Девы народа избранного, да воспоют людие: Аллилуия.
Икос 7
Новую показа тварь, явлься Зиждитель нам от Него бывшим, из безсеменныя прозяб утробы и сохранив Ю, якоже бе, нетленну. Мы же, Новаго Адама от вторыя Евы пришедшаго зряще, ветхаго поминаем и глаголем к прародителем:
Радуйтеся, яко спасение ваше приближися;
радуйтеся, се бо Слово воплощается.
Радуйтеся, обетование приявшии;
радуйтеся, сего сбытие созерцающии.
Радуйся, Адаме, зря Адама небеснаго;
радуйся, Адаме, Богу же и Человеку.
Радуйся, Ево, послушанию Дщере твоея;
радуйся, Ево, смирению Ея.
Радуйтеся, Радость бо прииде;
радуйтеся, яко милостив Господь.
Радуйтеся, рая взыскующии;
радуйтеся, ищущии сладости его.
Радуйтеся, Адаме и Ево, венче твари и красото вселенныя.
Кондак 8
Странное рождество видевше, устранимся мира, ум на небеса преложше: сего бо ради высокий Бог является смиренный человек, хотяй привлещи к высоте Тому вопиющия: Аллилуия.
Икос 8
Весь любовию к творению своему объят, посла Божественное Слово прародителем в страну печали проповедника Своего к ним пришествия, Иоанна Предтечу, во еже взывати тому:
Радуйтеся, Богу возлюбленнии;
радуйтеся, Им не отверженнии.
Радуйтеся, Избавитель бо прииде;
радуйтеся, Спас бо миру возсия.
Радуйтеся, Внука Сифова ожидающии;
радуйтеся, о Чаде Ноеве веселящиися.
Радуйтеся, яко Семя Авраамле безсеменно раждается;
радуйтеся, яко Лев от Иуды приходит.
Радуйтеся от Девы Воплощенному;
радуйтеся Сохраншему Ю нетленну.
Радуйтеся всех долгов Решителю;
радуйтеся грех ваших Искупителю.
Радуйтеся, Адаме и Ево, венче твари и красото вселенныя.
Кондак 9
Всякое естество ангельское удивися великому Твоего вочеловечения делу: непреступнаго бо яко Бога, зряще всем приступнаго Человека, нам убо спребывающа, слышаща же от всех: Аллилуия.
Икос 9
Ветии суемудреннии глаголют дерзостне человеки от безсловесных произведены быти; мы же, Адама и Еву прародители наша быти добре ведуще, к сим глаголем:
Радуйтеся, отче наш и наша мати;
радуйтеся, от вас бо всяк человек произыде.
Радуйтеся, афинейская плетения растерзающии;
радуйтеся, истину нам являющии.
Радуйся, Адаме, в день шестый созданный;
радуйся, Ево, от ребра мужняго сотворенная.
Радуйтеся, во Эдеме жившии;
радуйтеся, ныне во Царствии Небеснем водворяющиися.
Радуйтеся, светлостию лика Божественнаго паки наслаждающиися;
радуйтеся, радости сея никогдаже лишитися имущии.
Радуйтеся, о нас молящиися;
радуйтеся, чад своих не оставляющии.
Радуйтеся, Адаме и Ево, венче твари и красото вселенныя.
Кондак 10
Спасти хотя мир, сниде на землю Слово Божие, сый в лоне Отчи, от Девы плоть прияв, по нам бысть человек, и смертию Своею всему роду человечу живот вечный дарова; днесь Адам ликует и радуется Ева, и Спасителю согласно вопиют: Аллилуия.
Икос 10
Стена есте верным чадом вашим, догматы церковныя любовию облобызающим, Адаме и Ево; всем же во мраце века сего блуждающим и мнящим миру же и человеку самосотворенным быти, живое обличение есте и вразумление присное. Сего ради к вам взываем:
Радуйтеся, творение Зиждителя любимое;
радуйтеся, от греха Им спасеннии.
Радуйтеся, во свете живущии;
радуйтеся, тьмы удалившиися.
Радуйтеся, зрения таин Божиих сподобившиися;
радуйтеся, сим нас научающии.
Радуйтеся, созерцати тварь наставляющии;
радуйтеся, от твари ко Творцу ум наш возводящии.
Радуйтеся, к Промыслителю сердцем прилепившиися;
радуйтеся, о Спасители своем красующиися.
Радуйтеся, родителие наши попечительнии;
радуйтеся, дети своя вразумляющии.
Радуйтеся, Адаме и Ево, венче твари и красото вселенныя.
Кондак 11
Пение наше немощное не довольно есть воспети чудная дела Господня, Иже Адама и Еву тли смертныя избави, и на небеса возведе, и содела я уды тела Своего, еже есть Церковь, и нас, чада их, в сию призва, и научи вопити немолчными гласы: Аллилуия.
Икос 11
Светосиятельная светила, от единаго истиннаго Света свет приемлющая, зрим вас, Адаме и Ево, верная чада ваша, светлостьми духовными независтно от вас освещаемии, и в веселии вам светле поем:
Радуйтеся, скорби претерпевшии;
радуйтеся, в терпении преуспевшии.
Радуйтеся, проповедницы покаяния;
радуйтеся, учителие упования.
Радуйтеся, надежду имевшии;
радуйтеся, Обетованнаго чаявшии.
Радуйтеся, Словом спасеннии;
радуйтеся, от Него освященнии.
Радуйтеся, благодатию сияющии;
радуйтеся, Света невечерняго причастницы.
Радуйтеся, во мраце пресветлем живущии;
радуйтеся, Святую Троицу созерцающии.
Радуйтеся, Адаме и Ево, венче твари и красото вселенныя.
Кондак 12
Благодать дати восхотев долгов древних всех долгов Решитель человеком, прииде Собою ко отшедшим Того благодати, и раздрав рукописание, слышит от всех иже от Адама: Аллилуия.
Икос 12
Поюще неизчетныя милости Господни, роду человеческому явленныя, зрим прародители наша, престолу Божию в раи сладости предстоящия, и сим с несумненною надеждою и радостию духовною глаголем:
Радуйтеся, Спасу собеседующии;
радуйтеся, о нас ходатайствующии.
Радуйтеся, в тишине живущии;
радуйтеся, за мир молящиися.
Радуйтеся, послушания наставницы;
радуйтеся, трезвения учителие.
Радуйтеся, лести змиевы обличители;
радуйтеся козней вражиих разрушители.
Радуйтеся, нас к небеси направляющии;
радуйтеся горняя мудрствовати научающии.
Радуйтеся, упование наше;
радуйтеся, наше дерзновение.
Радуйтеся, Адаме и Ево, венче твари и красото вселенныя.
Кондак 13
О, святии прародителие наши Адаме и Ево! Приимите малое сие похваление наше и умолите Творца и Искупителя, еже быти нам с вами во Царствии Его и со всеми святыми воспевати Ему: Аллилуия.
Сей кондак глаголи трижды, посем паки 1 икос и 1 кондак.
Молитва
К вам, прародителем нашим, о Адаме и Ево, прибегаем мы, немощная чада ваша. Воззрите милостивно на нас с высоты небесныя вашея славы и будите нам помощницы во искушениях и соблазнах, от врага рода человеческаго нам прибывающих. Аще и соблазнилися есте древле льстивными глаголы змиевыми и лишилися рая сладости, пребысте обаче остаток земныя жизни вашея в покаянии и сокрушении о неразумии своем, и тако снидосте во обители печали. В последок же дний прииде Обетованный, еже сокрушити державу князя мира сего. Пред спасительными же страданьми Своими предпосла ко отшедшим живота сего проповедника покаяния, иже бысть предтеча Его на земли и в преисподних земли. Вы же с радостию послушасте словес сего, разумевающе, яко о Семени вашем глаголет. По мале же времене потрясеся ад и огорчися, сниде бо Разрушитель ада. Огорчися ад, ибо упразднися, огорчися, ибо поруган бысть, огорчися, ибо умертвися, огорчися, ибо связася. Вы же возвеселистеся и взыграсте духом, зряще Искупителя вашего, по плоти от вас происшедшаго, Бога же суща безначальна и Отцу соприсносущна. Сице убо и нас сподобите земное сие и многоскорбное житие в покаянии преити, в будущей же жизни зрети выну Спасителя душ наших Ц Господа нашего Иисуса Христа, Емуже со Отцем и Духом подобает честь и поклонение ныне и присно и во веки веков. Аминь.