Кондак 1
Избранный от юности угодниче Христов, славу мира нивочтоже вменивый и Господу последствовати возжелевый, темже поношения и гонения паче хвалы вменил еси, и даже до смерти о Церкви Святей болезновал еси, сего ради зовем ти умильно:
Радуйся, многоскорбный святителю Афанасие, радости небесныя причастниче.

Икос 1
Истины служителя безсмертию соименнаго похвалим Афанасия, сей бо есть скорый помощник и услышатель всякому, тако его поющему:
Радуйся, помощниче наш верный;
Радуйся, молитвенниче о нас усердный.
Радуйся, в беде сущих покровителю;
Радуйся, скорбящих возвеселителю.
Радуйся, согреяние душ хладных;
Радуйся, радосте душ праведных.
Радуйся, многоскорбный святителю Афанасие, радости небесныя причастниче.

Кондак 2
Крестился еси во Христа, отче блаженне, темже и во Христа облеклся еси, и на всяк день имя Христово призываяй, выну воспевал еси Тому: Аллилуиа.

Икос 2
Книжник явился еси, от сокровища церковнаго людем износяй богатство учения словеснаго. Сего ради похваляем от паствы твоея тако:
Радуйся, златословесный учителю;
Радуйся, истины Божественныя хранителю.
Радуйся, преданий отеческих ревнителю;
Радуйся, правоверия насадителю.
Радуйся, ересей искоренителю;
Радуйся, зловерия сокрушителю.
Радуйся, многоскорбный святителю Афанасие, радости небесныя причастниче.

Кондак 3
Славы земныя никакоже взыскав, всяко небесная мудрствовал еси, отче Афанасие, и тако скоро земная оставив, прешел еси к вожделенному отечеству небесному, идеже со ангелы выну поеши Богови: Аллилуиа.

Икос 3
Языки вси ко Единому Богу привести желаяй, всяко и единстве церковнем ревновал еси. Темже слышиши от нас:
Радуйся, поборниче единства церковнаго;
Радуйся, образе совршенства духовнаго.
Радуйся, Единаго Бога проповедниче;
Радуйся, за имя Христово исповедниче.
Радуйся, зараженный ересию целителю;
Радуйся, младенцев духовных кормителю.
Радуйся, многоскорбный святителю Афанасие, радости небесныя причастниче.

Кондак 4
Животворящий крест всегда пред лицем имеяй и всегда крест Христов радостно в житии несый; темже ныне во обители возлежиши честными мощами твоими в соборнем храме во имя Креста, и всех на рамена своя крест вземший, подвизаеши пети Господу: Аллилуиа.

Икос 4
Солнцу правды Христу во вся дни жизни поработав, ныне зрения вечнаго солнца наслаждаешися, от нас же приемлеши милостивно дары похвальныя:
Радуйся, истинным светом просветителю;
Радуйся, Солнца правды служителю.
Радуйся, к свету истинному зовый;
Радуйся, из области темныя исторгаяй.
Радуйся, светильниче на свещнице церковнем;
Радуйся, сияяй светом духовным.
Радуйся, многоскорбный святителю Афанасие, радости небесныя причастниче.

Кондак 5
Исцеляяй всяк недуг и всяку язю Христос дарова тебе силы недуги препобедити и победная улучити, Господеви воспевая: Аллилуиа.

Икос 5
Священник Бога Вышняго был еси непорочен, и инок изряден, Слова Божия возвеститель и о пастве усердный молитвенник, темных просветитель и исповедник имени Божия. Сего ради приими от нас сицевыя тебе похвалы:
Радуйся, апостолам равный;
Радуйся, с мученики славимый.
Радуйся, Слова Божия проповедниче;
Радуйся, терпеливодушный исповедниче.
Радуйся, преподобных сомолитвенниче;
Радуйся, святых всех сомолитвенниче.
Радуйся, многоскорбный святителю Афанасие, радости небесныя причастниче.

Кондак 6
Сердце твое, исполнь благодати и истины, плод воистину Богови принесеся чистый, на немже, яко на олтари, на всяк день жертва словесная приносися Богови, песнь же красная воспевашеся: Аллилуиа.

Икос 6
Слово твое в силе духа дивная сотвори, яко неправовернии к благочестию возвратишася, неблагонравнии же изрядни в добрых делех явишася. Вси же воспеша ти благодарственно:
Радуйся, учителю правоверия;
Радуйся, обличителю зловерия.
Радуйся, нравов благих насадителю;
Радуйся, злонравия искоренителю.
Радуйся, образе верным благий;
Радуйся, ко Господу многих приведый.
Радуйся, многоскорбный святителю Афанасие, радости небесныя причастниче.

Кондак 7
Пчелою трудолюбною паству твою питал еси медом чистаго учения Православнаго, обаче о инаковерных болезнуяй, и тех любових твоею объемлюще, многи к познанию истины привел еси, да вси единеми усты и единем сердцем Господеви поют: Аллилуиа.

Икос 7
Новый разум дарова ти Христос, смысл же лучший и ветхаго изряднейший. Сие видяще, восхваляем Господа, и тя поем сице:
Радуйся, разума Божия восприятелю;
Радуйся, смысла просящим подателю.
Радуйся, имеяй разум Богом просвещенный;
Радуйся, скорый помощниче оскорбленным.
Радуйся, небесная умом созерцаяй;
Радуйся, скорбящим скоро помогаяй.
Радуйся, многоскорбный святителю Афанасие, радости небесныя причастниче.

Кондак 8
Мечем слова Божия всяко терние посекл еси, да вси правым смыслом и чистым сердцем притекут ко Святей, Соборней и Апостольстей Церкви, Богу поя: Аллилуиа.

Икос 8
Имя Божие прославити хотяй, никакоже убоялся еси поношений и клеветы. Темже, даже и до смерти пострадав, на небеси ныне покоишися, от нас же слышиши воспевания:
Радуйся, яко о славе церковней возревновал еси;
Радуйся, яко в уничижении никогдаже возроптал еси.
Радуйся, земных презрителю мудрый;
Радуйся, небесных искателю верный.
Радуйся, Господу последователю верный;
Радуйся, делателю Заповедей примерный.
Радуйся, многоскорбный святителю Афанасие, радости небесныя причастниче.

Кондак 9
Чашу страданий Христовых прияти возжелев, иго благое на рамена своя восприим, и чрез все житие твое верный раб был еси, выну поя Господеви: Аллилуиа.

Икос 9
Корень смирения твоего израсти добродетели твоя, всеблаженне отче Афанасие, яже ныне зряще, дерзаем хвалити тя сице:
Радуйся, в кротости и милосердии древним святым равный;
Радуйся, радости духовныя сосуде избранный.
Радуйся, мир Божий в сердце выну имеяй;
Радуйся, благостию пламенеяй.
Радуйся, долготерпение и воздержание стяжавый;
Радуйся, любовию твоею добродетели твоя увенчавый.
Радуйся, многоскорбный святителю Афанасие, радости небесныя причастниче.

Кондак 10
Спасения паствы ищай и о Церкви болезнуяй, отче Афанасие, вольным хотением сокрыл еси светильник свой, яко да возсияет в Царствии Небеснем огнь смирения твоего, да сподобишися по скорби и поношении пети с небожители радостно: Аллилуиа.

Икос 10
Честь от людей не приял еси в житии твоем, отче, обаче от Бога почтен и чудесами от мощей твоих прославлен, ходатайствуеши о чтущих тя и поющих сице:
Радуйся, честь небесную паче земныя возлюбивый;
Радуйся, славу от Господа паче человеческия возжелевый.
Радуйся, похваления от Творца приимый;
Радуйся, благодарения от людей выну слышай.
Радуйся, почести горняго звания восприявый;
Радуйся, величия небеснаго вкусивый.
Радуйся, многоскорбный святителю Афанасие, радости небесныя причастниче.

Кондак 11
Вышняго царствия взыскавшу ти, к нижним никакоже прилепися сердце твое. Темже и доднесь лицы инокинь, собраннии во обители Полтавстей, прибегают к покрову твоему, научения и вразумления ищущи. Тобою же наученнии, во умиление сердца поют подвигоположнику Христу: Аллилуиа.

Икос 11
Яви мощи твоя благий Господь во утешение пастве твоей, яко сокровище некое, яко утешение и знамение благоволение Своего к нам, земнородным. Мы же, любовию честныя останки твоя лобызающе, верно воспеваем:
Радуйся, долготерпение Господне к нам подвигаяй;
Радуйся, милосердие Божие на нас обращяяй.
Радуйся, завидящим грозное прещение;
Радуйся, превозносящимся явное вразумление.
Радуйся, гордым смирение подаваяй;
Радуйся, не искати своего си всех научаяй.
Радуйся, многоскорбный святителю Афанасие, радости небесныя причастниче.

Кондак 12
Радости небесныя причащаяся, о Афанасие, даруй и нам тоя причастие, да вси по исходе из жития сего скорбнаго и многотруднаго сподобимся вселитися во обители горния, идеже ты со ангельскими лики поеши песнь Богови: Аллилуиа.

Икос 12
Душа твоя ныне Богови предстоит, обаче и нас земных никакоже забываеши, отче святителю Афанасие, темже и мы, аще и недостойнии, дерзаем пети тя похвалами сицевыми:
Радуйся, на нас несмысленных не раздражаяйся;
Радуйся, на обидящих тебе зла не мысляй.
Радуйся, об истине радуяйся верно;
Радуйся, всех любяй нелицемерно.
Радуйся, вся терпети нас наставляяй;
Радуйся, николиже отпадати от веры силы нам даруяй.
Радуйся, многоскорбный святителю Афанасие, радости небесныя причастниче.

Кондак 13
О, многоскорбный святителю Афанасие, в житии крест тяжкий неправедных гонений и клеветы понесый! Испроси нам у Господа всякия скорби претерпети, токмо да Его, Сладчайшаго, не отвратитися, и путем спасения верно шествуем, с тобою же и всеми святыми поя Христу всерадостное пение: Аллилуиа.
Сей Кондак читается трижды, после же снова Икос 1 и Кондак 1

Молитва на прославление святителя
Днесь, в празднственный день, предстояще пред святыми мощами новопрославленнаго угодника Божия, святителя и чудотворца Афанасия, и в молитвы того призывающе, прославим тепле Подателя всех благ, Господа, даровавшаго нам таковое утешение! Возвеличим Отца Безначальнаго, превознесем Сына превечно Рожденнаго, восхвали Духа Утешительнаго, Бога в Триех Лицех Единаго; Той бо яви нам от лет многих сокрытое в земли сокровище, святыя мощи угодника Своего Афанасия!
Ко святителю же Афанасию умильно возопием: о, святителю и страдальче, чрез горнило скорбей прошедый и в радости безконечней пребываяй! Не забуди нас твоим милостивым предстательством, помолися ко Господу, да утвердит в земли нашей веру Православную, Церковь же Свою Святую Соборную и Апостольскую непоколебиму от ересей и расколов соблюдет, обители же и храмы Полтавския да укрепит, монашествующих в подвизех совершенны сотворит, всех же нас в правей вере, несумненней надежде и теплей любви сподобит с покаянием земное поприще преити, и в жизни вечней со всеми святыми радостно славити и величати Всесильнаго и Всемилостиваго Бога во веки веков. Аминь.

Молитва чтомая пред честными мощами угодника Божия
Святителю Христов, отче наш Афанасие! Предстояще на месте подвигов твоих пред ракою святых и многоцелебных твоих мощей, молимтися, верный послушателю прошений наших: молитвами твоими спаси и помилуй всякаго, к тебе о помощи взывающаго, даруй от Господа грехов прощение и на страсти победу; покрый предстательством твоим от всякаго зла землю Полтавскую и обители ея, и храмы; пастырем ревность о спасении паствыдаруй; монашествующих подвигом добрым подвизатися удостой; правителем мудрость и любовь к Церкви Святей низпосли; всем же нам твердое стояние в вере истинней даруй. Да тако поживше, прейдем поприще жития сего и в вечный покой достигнем, идеже ты со Ангелы и всеми святыми славословиши непрестанно Бога в Троице Единаго — Отца и Сына и Святаго Духа. Аминь.

МОЛИТВА
О, славный угодниче Христов, великоимените отче наш Афанасие! О, многоскорбный святителю Божий, в житии крест тяжкий понесый и в верности Христу даже до смерти пребывый! О, смиреннейший на земли, на небеси же прославленный! Помолися о нас ко Господу, имаши бо дерзновение к Нему молитися! Помяни всех, с верою приходящих к тебе и мощем твоим кланяющихся [икону твою святую лобзающих]! Воззри на скорби и клевету, нас облегающия, расторгни узы грехов и мрежи страстей, связующия души наша. Даждь нам помощь молитвами твоими, да укрепит Господь наши силы и наш ум, умерщвляемые грехами. Яко да твоим предстательством пособствуеми, ограждаеми крестным знамением и помогаеми Пресвятою Госпожею Девою и Богородицею, поживем в благочестии и чистоте и, тако достигнув вечера жизни нашея, отыдем к незаходимому Свету — Христу, Емуже со Отцем и Духом слава подобает, ныне и присно и во веки веков. Аминь

Тропарь, глас глас 4:
Многоскорбный угодниче Христов, святителю отче наш Афанасие, в житии своем крест тяжкий понесый и многия гонения и клеветы претерпевый, не остави нас, чад твоих, твоим предстательством, имаши бо дерзновение ко Господу молитися, о еже всякия скорби нам претерпети достойно, ко спасению душ наших

Кондак, глас 8
Избранный от юности угодниче Христов,* славу мира нивочтоже вменивый и Господу последствовати возжелевый,* темже поношения и гонения паче хвалы вменил еси,* и даже до смерти о Церкви Святей болезновал еси,* сего ради зовем ти умильно:*
Радуйся, многоскорбный святителю Афанасие,* радости небесныя причастниче.

Величание святителю:
Величаем тя,* святителю отче наш Афанасие,* и чтем святую память твою,* ты бо молиши о нас** Христа Бога нашего

Во обителех же:
Величаем тя,* святителю отче наш Афанасие,* и почитаем скорби и болезни твоя,** о обители твоей теплый предстателю

Или:
Ублажаем тя,* многоскорбный святителю Афанасие,* и почитаем многотрудное житие твое,* ты бо дерзновение имаши молитися** о душах наших

Взято с http://pravoslavie.poltava.ua