Кондак 1
Избраннаго носителя Духа Божественнаго, Церкви Православныя подвижника преизряднаго, на ниве просвещения духовнаго всеусердне подвизавшегося, богоноснаго отца нашего Александра восславим днесь пением духовным. Ты же, яко великих дарований сподобивыйся, приими молитвы и моления чад твоих, любовию ти присно взывающих:
Радуйся, праведный отче Александре, премудрый учителю и духовного просвещения наставниче!

Икос 1
Ангел земный и человек небесный воистину был еси, праведне Александре, от начала жития твоего чистоту души и тела возлюбив и Христу любовию усердно последовав, премудростию от Всесвятаго Духа преизрядно одаренный, многих бо во истине Христовой утвердил еси, многих к святоотеческому наследию приобщил, усердно трудяся во всеучилище Свято-Троицком, в учениех богословских и делании молитвенном плод преизряден собрал еси и тако совершенства духовнаго достигл еси. Твоему добродетельному и богоугодному житю нас следовати настави, да зовем ти сице:
Радуйся, цевнице и гусли Троичную песнь сладостно возглашающая;
Радуйся, фимиаме, огнем Святаго Духа возженный.
Радуйся, величие и славу Отца Небеснаго проповедавый;
Радуйся, Христов пастырю преизрядный.
Радуйся, сокровищнице, богословскими учениями преисполненная;
Радуйся, чистоты и целомудрия предивный хранителю.
Радуйся, безмолвнаго жития истинный любителю;
Радуйся, всех призывающих тя, скорый защитителю.
Радуйся, праведный отче Александре, премудрый учителю и духовного просвещения наставниче!

Кондак 2
Видя Промыслитель о всех Господь доброту души твоея, возжела поставити тя не токмо пастыря словесных овец Своих, но и наставника всем, к премудрости стремящимся, яко от младости твоея навыкл еси деланию молитвенному и в научении книжном ум твой взрастил еси, Просветившему тя Христу Богу поя: Аллилуйя.

Икос 2
Разум озаренный благодатию Божиею от юности имея, прехвальне отче наш Александре, от родителей благочестивых твоих приял еси наставление благое, послеже в обители учений духовных пребывая, возлюбил еси учения отцев святых, и в нем же возрастая, Христа, Истины подателя, подвигом сим прославил еси. Темже, творяще честную память твою, величаем тебя тако:
Радуйся, отрасле благоухающая корене духовнаго;
Радуйся, девственную чистоту от юности возлюбивый.
Радуйся, иерея Божия и благочестия родительскаго наследниче преизрядный;
Радуйся, душу свою всецело Господу посвятивый.
Радуйся, учением благочестия издетска напоенный;
Радуйся, доброе семя в сердце своем возрастивый.
Радуйся, Богоначертанный свиток правыя веры;
Радуйся, добрый учениче небеснаго Учителя Христа.
Радуйся, праведный отче Александре, премудрый учителю и духовного просвещения наставниче!

Кондак 3
Сила Вышняго укрепи тя к исполнению словес апостольских, хотяще воистину сыном Премудрости явитися и Учителя Божественнаго последователем быти. Благодатию же Божиею в подвизе сем добре преуспевающе, Господу, присно тя укреплявшему, воспевал еси: Аллилуия.

Икос 3
Имуще в сердце светоносную благодать Святыя, Единосущныя и Нераздельныя Троицы, отче наш Александре, заветом равноапостольных Мефодия и Кирилла последовал еси, сокровища премудрости не себе собирая, паче же сими в Бога богатея, молитвою же и пощением во служение Христу себе уготовляя. И всим богословам и ученым путь жития благочестиваго и благоуспешнаго показал еси. Мы же твоим добродетелем следовати желаем, вопием ти сице:
Радуйся, отринувый, якоже сор, мира сего душетленныя сладости;
Радуйся, омывый душу твою слезами чистыми младости.
Радуйся, девство твое нерастленно Господеви сохранивый;
Радуйся, прельщения возраста юнаго победивый.
Радуйся, весно, лучами благодати осиянная;
Радуйся, утро, добродетельми облагоуханное.
Радуйся, в сердце твоем образ Христа носивый;
Радуйся, Спасителя твоего до конца возлюбивый.
Радуйся, праведный отче Александре, премудрый учителю и духовного просвещения наставниче!

Кондак 4
Бурею искушений волнуемое и соблазнов море жития мирскаго не прельстиша тя, отче святый Александре, ты, оставивше бо ризы кожанныя тли века сего, равноангельскаго жития возжелав, в миру надмирне жительствовал еси. Отцем преподобным в делании внутреннем подражая, и ангельски пожив на земли, на высоту бестрастия возшел еси, угодниче Христов, да с лики небесными песнь Творцу всяческих воспоеши: Аллилуйя.

Икос 4
Слышаще богодухновенная словеса твоя, жаждущии глаголов Жизни Вечныя, многия людие приходиша к тебе, и нетленную пищу от тя приимавше и Божественнаго пития почерпавше. Ты бо в познании научном истину вечную обретал еси и ученики своя велиими дарами веры и познания обогощал еси, к свету Христову всех привлекая. Тем же ныне Свету великому предстоя, поминай нас, усердно чтущих тя и воспевающих тако:
Радуйся, глубины Слова Божия добре испытавший;
Радуйся, непрестанным усердием Бога взыскавший.
Радуйся, от юности твоея добродетели христианския стяжавый;
Радуйся, верою, надеждою и любовию измлада украшенный.
Радуйся, на ниве просвещения духовнаго Господеви угодивый;
Радуйся, училищ благочестия покровителю.
Радуйся, имже семена правды Христовы посеяваются;
Радуйся, ищущым научения отверстая врата.
Радуйся, праведный отче Александре, премудрый учителю и духовного просвещения наставниче!

Кондак 5
Боготечней звезде лучами благодати люди российския озаряющей подобен явился еси, угодниче Божий, отче святый Александре, егда священства от отца своего духовнаго, архипастыря Московского, святителя Филарета, сподобился еси. И от того часа многих к Солнцу Правды Христу привел еси словом благодатным и примером жития твоего, еже все посвящено бысть служению Богу и ближним. И якоже видеша тя людие у престола храма Божия за всех и за вся Спасителю мира молящася, сице и ныне возноси молитвы твоя о Церкви Святей, Отечестве нашем и о всех чтущих тя и поющих Богу: Аллилуия.

Икос 5
Видевше вси тя, угодниче Божий, яко отца чадолюбива, в напастех и скорбех от тебе помощи усердно искаху: ты же о всех милосердовал еси, образ веры истинныя в себе сим показуя. Ты бо познание мудрости естественней и божественней с деланием молитвенным умело сопрягал еси. Буди, преблагий отче, скорый помощник и нам, грехми и скорбьми обуреваемым, с любовию ти вопиющим:
Радуйся, слова Божия богодухновенный изъяснителю;
Радуйся, Евангельския Истины ревнительный научителю.
Радуйся, спасеннаго пути верный и известный предводителю;
Радуйся, таланты, Богом врученныя тебе, усовершивый.
Радуйся, от земныя мудрости вся ко спасению полезная собравый;
Радуйся, яко верныя в боговедении утвердаеши.
Радуйся, яко тайны премудрости Божия во всем мире видети научал еси;
Радуйся, яко и в малых вещех величие Божие зрети наставлял еси.
Радуйся, праведный отче Александре, премудрый учителю и духовного просвещения наставниче!

Кондак 6
Проповедник истины Христовой явился еси, благословенне отче Александре, силою благодатною слова твоего, яко острием меча, греховная сердца проницаяй и к покаянию возбуждаяй, огненными бо твоими словесы, ревностию по Бозе Вседержители распаленными, возжегл еси пламя любви и веры в сердцах паствы твоея, да вси чистым сердцем Троице Святей поют: Аллилуия.

Икос 6
Возсиял еси яко светило многосветлое богатством дарований, излиянных на тя обильно от щедрот Господних, отче досточудне Александре, ты бо преумножил еси богоданныя таланты, да явишися неленостный и всеусердный делатель Вертограда Божия. Ты бо не токмо словесы своими, но и поучениями печатными многия в истине Христовей и любви к Спасителю утвердил еси. Сего ради, прославляюще тя, премудрости сокровище неисчерпаемое, вопием ти сице:
Радуйся, на светозарную добродетелей колесницу возшедший и Небеснаго Царствия достигший;
Радуйся, скорби жития сего добре претерпевый и данный ти талант приумноживый.
Радуйся, и нам, грешным, образ добродетелей словом и житием явивый;
Радуйся, Иосифа целомудрием и чистотою украшенный.
Радуйся, Петрово исповедание и Иоанново богословие показавый;
Радуйся, кротость Моисееву и ревность Илиину в подвизех своих воплотивый.
Радуйся, яко подаеши христианом в вере правей утверждение;
Радуйся, от искушении и напастей молитвами твоими охраняющий.
Радуйся, праведный отче Александре, премудрый учителю и духовного просвещения наставниче!

Кондак 7
Хотяще всем житием твоим Иисусу Сладчайшему угодити, досточудне отче Александре, всем житием твоим исповедал еси истину Его; многия бо к учению святых отец приобщил еси, многия бо премудростию книжною просветил еси, и книги твоя нам в назидание оставил еси, да твоим заветом последующе, воспоим Христу: Аллилуйя.

Икос 7
Новый Василий Великий богодарованною мудростию преизрядно украшенный воистину явился еси, преславный отче Александре, егда по благословению святителя Филарета возглавил еси всеучилище именитое в лавре Сергия Преподобнаго. Ты бо, праведниче прехвальне, труды многия положил еси, наставляя юношей, истины взыскующих к возрастанию в премудрости естественней и божественней. Сие же убо воспоминающе, просим тя прилежно: умоли Всеблаго Духа Утешителя и нас дарами мудрости и разумения обогатити, да зовем ти:
Радуйся, Христу, апостолы учившему, всеурседне последовавый;
Радуйся, сынов обители духовных учений милостино опекавый.
Радуйся, Духом ревности по Христу нас просвещаяй;
Радуйся, к низложению лжеименитого разума нас укрепляй.
Радуйся, в истине Христовей выну утверждатися нам помогаяй;
Радуйся, пищею словес Божиих верныя изобильно насытивый.
Радуйся, струями благодати сердца пасомых напоивый;
Радуйся, скрижали велений Христовых твердо содержати увещевавый.
Радуйся, праведный отче Александре, премудрый учителю и духовного просвещения наставниче!

Кондак 8
Странника и пришельца на земли сей себе помышляя, ревностно пасл еси стадо словесных овец Христовых, досточудне отче Александре, да обрящеши вся пасомыя на нетленных пажитех небесных, вкупе с ними вопия Богу: Аллилуия.

Икос 8
Весь исполнен любви нелицемерныя к пастве твоей, святый отче Александре, спасение убо всякой душе христианстей устрояя, в себе же имея смирение великое, пользы многих ради, яко явленна бысть премудрость воистину небесная, зане всем житием твоим Премудрости Ипостастной служити восхотел еси и Тоя стезям невозвратно последовал еси. Сего ради, почитающе святую память твою, усердно взываем ти таковая:
Радуйся, палато мудрости преукрашенная;
Радуйся, сокровищница богословия преизобильная.
Радуйся, пищею словес Божиих верныя изобильно насытивый;
Радуйся, струями благодати сердца напоивый.
Радуйся, словесное стадо Христово мудре упасший;
Радуйся, скрижали велений Христовых твердо содержати увещевавый.
Радуйся, яко тобою вера святая прославляется;
Радуйся, яко тобою Церковь Христова дивно красуется.
Радуйся, праведный отче Александре, премудрый учителю и духовного просвещения наставниче!

Кондак 9
Видяще всяческих смут и брожений еретических и крамольных во дни земнаго жития твоего, отче Александре, ты стихиям века сего не подвластен явися, яко на вечную истину Божию взор души твоея устремил еси. Христа, цари земные славою и честию венчающего, всячески прославлял еси, Ему, апостолы наставлявшему, уподобился еси во всем житии твоем. Его же умоли и наш разум в евангельской правде непоколебимым быти, да купно с тобою Ему воззовем: Аллилуйя.

Икос 9
Витийство всякое не может изрещи любовь твою; многим бо, притекающим к тебе в недоумении, благий совет подал еси, заблуждающаяся кротко вразумил еси, многим безвозмедне помогал еси, за вся молитвы горячие творил еси, и по смерти прибегающих к твоему ходатайству не оставляеши. Память же твою чтуще верно, с упованием зовем ти:
Радуйся, смирением твоим на высоту добродетельнаго жития возшедший;
Радуйся, Отца Небеснаго благоутробие познавший.
Радуйся, объятий чадолюбиваго отца сподобльшийся;
Радуйся, к Миру Горнему умный твой взор вперивый.
Радуйся, яко тобою от напастей избавляемся;
Радуйся, яко тобою благодати сподобляемся.
Радуйся, яко предстательством твоим жизнь вечная обретается;
Радуйся, яко молитвами твоими вера истинная познавается.
Радуйся, праведный отче Александре, премудрый учителю и духовного просвещения наставниче!

Кондак 10
Спастися хотящим путь истинный примером твоим явивый; отрешатися суеты мира сего и нас сподоби. Обуреваемым же искушениями бесовскими помози и к Горним Обителем возведи. Идеже со всеми святыми Христу предстояще, воспеваеши хвалебную песнь: Аллилуия.

Икос 10
Стена тверда бысть вера и любы твоя ко Господу и людем, богоносне отче наш Александре, в ней же утвердися сердце твое. Ты бо радея о духовней пользе учеников твоих храм во всеучилище духовнем Христу Богу воздигл еси, дабы вси в делании молитвеннем преуспевали. Такожде и народу болгарскому сопережевал еси сердцем, в святых молитвах ко Христу Спасителю взывая о мире и единстве церковнем. И ныне на Небесех, у Престола Божия, в сонме святых о нас присно ходатайствуеши. Мы же вопием ти сице:
Радуйся, в добродетели древним отцам подражавый;
Радуйся, яко горлица птенцы своя верныя крылома веры согревавый.
Радуйся, духом премудрости Христовой их укреплявый;
Радуйся, паству православную от шатаний богохульных оградивый.
Радуйся, жертву слезную всеусердно за славян Богу приносивый;
Радуйся, Христу распяту жертвенной любовью последовавый.
Радуйся, терпения и кротости духовныя преизрядный учителю;
Радуйся, догматов веры православныя достойный блюстителю.
Радуйся, праведный отче Александре, премудрый учителю и духовного просвещения наставниче!

Кондак 11
Пение похвальное и мольбы наша прими, отче наш Александре, от любви наше тебе возносимыя и всемощным предстательством твоим от всякия напасти, греха и искушения огради нас, о тебе Богу зовущих: Аллилуия.

Икос 11
Светозарным светом бысть житие твое, зарею благодати Божия сияющее и путь доброделания всем освещающее, отче праведне. Да и нам грешным путь ко спасению указуя, маловерныя уверяя, верныя подкрепляя, отче всеблаженне. Мы же, видим тя в Троическом Свете пребывающего и Отечеству и всем народом славянским мира и благоденствия просящего, с упованием веры зовем Ти:
Радуйся, крине благоуханный, райскаго прозябения;
Радуйся, усердный помощниче нашего земнаго крестоношения.
Радуйся, мечем молитвы пламенной нас охраняющий;
Радуйся, огнем Духа Святаго плевелы зловерия пожигающий.
Радуйся, суеверий и учений ложных пламенный искоренителю;
Радуйся, омраченныя умом к Свету Истины приводяй.
Радуйся, отроки несведущий из тьмы лжеверия изымаяй;
Радуйся, унывающих всежеланный посетителю.
Радуйся, праведный отче Александре, премудрый учителю и духовного просвещения наставниче!

Кондак 12
Благодати Божия от юности преисполнен был еси, всехвальный Александре, и во вси дни живота своего Богови угождая, сию не расточил еси, обаче преумножил зело. Темже и ныне, аще бо и честных мощей твоих не имамы, иконе твоей святей припадающе, просимое получаем, прославльшему тя Господеви вопия: Аллилуия.

Икос 12
Поюще твое прославление от Господа, ублажаем тя, прехвальне отче, со умилением взирающе, како обретохом тя многомощна молитвенника и ходатая о нас недостойных. Славяще милость Всесвятаго Бога, к нам явленную, приносим ти таковая:
Радуйся, праведниче, народом любимый.
Радуйся, сыновне Богу сердце свое открывый;
Радуйся, Христа в храм сердечный приявый.
Радуйся, ангелом собеседниче и святым сопричастниче;
Радуйся, в невечернем дне Райския славы соучастниче.
Радуйся, древо плода священного, вертограда Христова;
Радуйся, езеро веры, в нем же потопляется всякая злоба.
Радуйся, во христоугодном истинном человеколюбии утверждающий;
Радуйся, от пристрастий суетных и человекоугодничества удаляющий.
Радуйся, праведный отче Александре, премудрый учителю и духовного просвещения наставниче!

Кондак 13
О святый праведный отче наш Александре, веры и благочестия светоче боговозженный, преславный наш покровителю и милостивый заступниче, богословия светило и верных ограждение! Призри с Небесе на сие хваление и молитвами твоими от страстей и бед нас огради, в правей вере соблюди и Царствия Небеснаго сподоби, да купно с тобою и всеми святыми Троице Святей во веки веков поем: Аллилуия.
Этот Кондак читается трижды, затем Икос 1 и Кондак 1.