Акафист преподобной матери нашей Алипии

Кондак 1
Избранной от многоликого полка святых новомученик, во времена новые явившейся для утешения и вразумления людей заблудших, града Киева непрестанное заступление, похвалы смиренные, яко имущей любовь неизреченную дерзаем принести тебе, зовуща:
Радуйся, мати наша Алипие, любовь велию в сердце своем стяжавшая.

Икос 1
Ангели удивишася, како немощная жена образу отец древних во времена сия новыя достойно подражала еси, сочетая в себе дары Духа Святаго, явленные для служения Церкве Христовой, мы же радостно возопиша о тебе:
Радуйся, словом мудрости просвещенная;
Радуйся, слово знания показующая.
Радуйся, силой веры укрепленная;
Радуйся, даром исцелений прославленная.
Радуйся, чудотворице великая;
Радуйся, пророчице изрядная.
Радуйся, Христа в свое сердце вселившая;
Радуйся, в смирении жизнь свою проводившая.
Радуйся, постом плоть свою веселившая;
Радуйся, молитвою душу свою укреплявшая.
Радуйся, милостыню в правило себе вменившая;
Радуйся, любовию прегрешения немощных покрывавшая.
Радуйся, мати наша Алипие, любовь велию в сердце своем стяжавшая.

Кондак 2
Видящи пред собою образ Христа Бога нашего, потщалася еси всем житием Ему Единому последовати и Ему Единому, послужити, восприя слова апостола, яко не имамы зде пребывающего града. Темже вся земная нивочтоже вменила еси, Небесному отечеству последуя, воспевала еси: Аллилуиа.

Икос 2
Разумом Божественным просвещаема, от юности сердце свое в престол Господа Бога уготовала еси, не убоялася еси оставити отечество и род свой, терпя недостатки и оскорбления, странствуя от храма к храму, тишины Божественныя напитаваясь и подражая всем святым, угодившим Богу, коих весь мир не бе достоин, в пустынях скитающихся и пропастях земных. Мы же суетнии, вопием:
Радуйся, Церкве Торжествующей прославление;
Радуйся, Церкве земныя предстательство и похвало.
Радуйся, благодати Божественныя тихое проявление.
Радуйся, людей немощных непрестающее удивление;
Радуйся, от юности Духа Святаго стяжавшая;
Радуйся, душу человеческую прозревавшая.
Радуйся, за смирение Господом Богом почтенная;
Радуйся, на подвиг юродства им благословенная.
Радуйся, града Пензы чадо богоизбранное;
Радуйся, родителей благочестивых отрасль святая.
Радуйся, молитися за родителей своих заповедавшая;
Радуйся, молитвою родителей крест свой понесшая.
Радуйся, мати наша Алипие, любовь велию в сердце своем стяжавшая.

Кондак 3
Силою Вышняго чудодействующей, никтоже притекающий к тебе, преподобная мати, неутешен отыде: недугующим являеши исцеление, скорбящим твое материнское утешение, грешным и отчаявшимся в своем спасении – исправление и скорое у Господа Бога прощение. Кому, как не к тебе притецем ми в покаянии взывая Богу: Аллилуиа.

Икос 3
Имущи сердце, Духом Святым любовь Господню познавшее, в годину тяжкую и испытания час Церкве Российския, егда призва Господь архипастыри и пастыри, монаси и мирстии принести себе, яко непорочное заколение, тогда и ты, преподобная мати, рекла еси со всем собором святых новых мучеников, яко ни скорбь, ни теснота, ни смерть от любве Божия разлучити тебе не возмогоша. Темже чаем недостойными похвалы нашими ублажити тя:
Радуйся, верное чадо Церкви Христовы;
Радуйся, Христа ради в темницу заточенная.
Радуйся, подвиг новомучеников возлюбившая;
Радуйся, чести христианския не посрамившая.
Радуйся, в темнице кротко молившаяся;
Радуйся, гонителям ответа не дававшая.
Радуйся, злобу добром побеждавшая;
Радуйся, терпением врага посрамившая.
Радуйся, к лику новомученик сопричтенная;
Радуйся, от страданий твоих чудесно спасенная.
Радуйся, в час испытания нам помогающая;
Радуйся, в отчаянии утешение дарующая.
Радуйся, мати наша Алипие, любовь велию в сердце своем стяжавшая.

Кондак 4
Буря злобы врага рода человеческаго не поколеба тя, преподобная мати наша Алипие, во все житие твое посрамити тя хотящего. Чрез все искушения неврежденно прешла еси. Ныне же тихое пристанище и райское наслаждение обрела еси по слову: «Побеждающему дам вкушать от древа жизни». Темже руководи и духовныя чада твоя, научив нас едиными усты и единем сердцем пети Богу: Аллилуиа.

Икос 4
Слышавше вси народи о велицей любви твоей к страждущим, притекают к тебе и умолкает уныние и отчаяние исчезает, грешницы в скорбех сердца обретают утешение, благодаряще Бога о таковей молитвеннице. Дивны дела твои, Господи, темже, веселящеся зовем:
Радуйся, скорбящаго утешение;
Радуйся, заблудшаго печальнице.
Радуйся, страждущаго сострастие;
Радуйся, алчущаго насыщение.
Радуйся, всех в сердце свое вместилище;
Радуйся, любве ко всем пламенение.
Радуйся, молитвеннице теплейшая;
Радуйся, веры православныя ревнительнице,
Радуйся, имущая сердце милующее;
Радуйся, мати наша многоскорбная.
Радуйся, всеми осужденнаго милование;
Радуйся, предстательнице за ны пред Богом.
Радуйся, мати наша Алипие, любовь велию в сердце своем стяжавшая.

Кондак 5
Чудо преславное сотвори с тобою Господь, преподобная мати Алипие, егда в темнице ти сущу явися апостол Петр и тя изведе, милосердствуя о тебе, яко и сам апостол подобно спасен быв ангелом Господним. Сего ради во все житие твое почитала еси святаго апостола, благодарно вопия: Аллилуиа

Икос 5
Видевше святая милосердие Господне на себе, восприя спасение из темницы яко знамение - отныне житие свое милосердием ознаменовати и людем немощным послужити. Сего ради смиренно мольбы Богу принесе о воскресении умершия отроковицы и избавлении от глада бедствующих, исцелив скот их. Несть тыя болезни, о коей сердце твое не поболезновало и тыя скорби о коей не поскорбело. Сего ради от всея души нашея ублажаем тя:
Радуйся, яко чудо воскресения показала еси;
Радуйся, яко в сем преподобному Сергию уподобилася еси.
Радуйся, яко раны твоими молитвами исцелеваху;
Радуйся, яко опухоли твоим благословением исчезоша.
Радуйся, яко врачевание благодатное сокрывала еси;
Радуйся, яко от славы людския бегала еси.
Радуйся, пищею исцеление содевавшая;
Радуйся, ризам твоим ныне исцеление подающая.
Радуйся, яко не дар сей получити, а угодити Богу тщалася еси;
Радуйся, яко дар сей Господом Богом тебе подадеся.
Радуйся, совершительнице многих дивных чудес;
Радуйся, яко молитвы твоя по любви к тебе слыша Господь.
Радуйся, мати наша Алипие, любовь велию в сердце своем стяжавшая.

Кондак 6
Словес евангельских, еже возлюбити ближняго, яко самаго себе и еже больше сея любве никтоже имать, да кто душу положит за други своя – верною исполнительницею показалася еси, преподобная мати, денно и нощно труждаяся на благо ближняго, сокрушенно моляся Господу Богу о помощи заблудшим чадом своим, питая и исцеляя, наставляя и утешая. Благодарными усты взываем: Аллилуиа.

Икос 6
Возсия стране нашей благотворный свет великих добродетелей твоих, яко граду Петербургу – блаженная Ксения, яко граду Москве – блаженная Матрона, тако и наш град Киев не остави Господь и яви нам подражательницу дел преподобных отец Печерских. Возлюби бо святая Лавру Печерскую, идеже великие подвиги совершила еси. Мы же вернии радуемся сему:
Радуйся, яко образ юродивый до конца жития приняла еси;
Радуйся, яко Ксении Петербургской подражала еси.
Радуйся, яко приходящаго чадом своим именовала еси;
Радуйся, яко во все житие на ложе не возлегла еси.
Радуйся, веригами тяжкими плоть свою отягчившая;
Радуйся, ключем на выи своей чадо новое знаменовавшая.
Радуйся, яко ключем тем душу человечу отверзала еси;
Радуйся, возлюбити Господа Бога ублажала еси.
Радуйся, яко благодатию Божиею души грешныя ко врачевству пакаяния препроводила еси;
Радуйся, яко со ангелы беседовала еси.
Радуйся, пищею малою питавшаяся;
Радуйся, никогдаже в среду и пятницу пищи не вкушавшая.
Радуйся, мати наша Алипие, любовь велию в сердце своем стяжавшая.

Кондак 7
Хотящу волю Господню творити, предала еси себе в послушание старцем Крониду и Дамиану, волю свою отсекающи, темже в дупло древесное вселилася еси и тамо себе ко благу устрояла еси. Мы же чудяся о таковем подвизе паче разумения, хвалебно поем: Аллилуиа

Икос 7
Новую тя во столпницех ревнительницу показа Господь в Лавре Печерстей, идеже телом страдая и болезнуя, Духом Святым исполнилася еси, постом и холодом плоть свою смиряя, духом возносилася еси к собору преподобных отец, помощию их укрепляема, высоты духовной достигла еси. Поминая таковую ревность, вопием:
Радуйся, в ангельский чин старцем Кронидом облеченная;
Радуйся, плотское мудрование отложившая.
Радуйся, молитвою искушения побеждавшая;
Радуйся, терпением волю свою отсекавшая.
Радуйся, нощию к Богу молившаяся;
Радуйся, молитву непрестанну возлюбившая.
Радуйся, яко прах в человецех себе вменившая
Радуйся, во смирении преуспевшая;
Радуйся, в тесноте древесной житие свое проводившая;
Радуйся, во стоянии присно пребывающая;
Радуйся, никогда же телу своему успокоения не дающая.
Радуйся, истиннаго самоотвержения совершенный образе.
Радуйся, мати наша Алипие, любовь велию в сердце своем стяжавшая.

Кондак 8
Странное и преславное чудо является ныне во очию всех верных – Долготерпеливый и Многомилостивый Господь не прогневася на ны до конца за беззакония наша и помянув милость Свою, якоже во времена древние тако и ныне, дарова нам тебе, досточудная мати, заступницу и утешительницу, пожившую с нами и немощи наши ведающую. И тако исполни сердца наша надежды и веселия, вопиющия: Аллилуиа.

Икос 8
Вся любовию к Богу пламенеющи, преподобная Алипие, егда новое гонение воздвижеся на Церковь Христову, пребыла еси на место, идеже служение отец голосеевских продолжила еси, светя всему миру светом веры и благочестия. Людие мнози стекахуся, да приимут благословение твое. Ты же, аки в пустыне, пребыла еси тамо до скончания жития твоего и ныне приходящим неоскудную помощь подаеши, зовущим:
Радуйся, оврази и холми местом молитвы избравшая;
Радуйся, тамо с нечистыми духи состязавшаяся.
Радуйся, пустыннаго безмолвия любительнице;
Радуйся, места святаго хранительнице.
Радуйся, источник целебный у Бога испросившая;
Радуйся, воду сию молитвою освятившая.
Радуйся, водою твоею подающая исцеление;
Радуйся, подвизавшаяся во спасение.
Радуйся, разрушенные храмы охраняющая;
Радуйся, ангела Престола чтити наставляющая.
Радуйся, пустыни Голосеевския великая похвало;
Радуйся, обители сея воссиявшая славо.
Радуйся, мати наша Алипие, любовь велию в сердце своем стяжавшая.

Кондак 9
Всем приходившим к тебе, преподобная мати, молитв и благословения ради, различными мирскими делы, напастьми и скорбьми отягченных и утисненных, тако утешала, якоже родитель чада своя во обстоянии скорбей и болезней утешает, отраду им своим попечением подавая и матернею любовию тяжесть печалей облегчая. Тобою бо и невернии и безбожнии к Богу притекали суть. Смиренно молим тя: и нам во дни напасти, искушения, недоумения и сомнений притекающим к тебе, возглаголи слово утешения, наставления и ободрения, да поем облагодетельствованнии тобою благодарно Богу: Аллилуиа.

Икос 9
Витий человеческих уста не возмогут описати величие тайны Божией, егда прошедшая и будущая, яко настоящая провидела еси, яко мысли человеческия, аки в книзе написаннии, читала еси, яко от лукаваго стужаемым исцеление скорое подавала еси, яко молитвою твоею страждущии облегчение от болезней получали суть, яко гласу твоему повиновалися стихии земнии, посему недоумением объяти бывше, глаголем:
Радуйся, двухнедельным постом дождь земле испросившая;
Радуйся, дождю не быти повелевавшая.
Радуйся, беду чернобыльскую прозорливо предрекла еси;
Радуйся, яко молитвами твоими от беды сия Господь ослабу подаде.
Радуйся, страданиям земли нашей и тварей бессловесных вельми сострадала еси;
Радуйся, на Страстной седмице быти страданиям сим предостерегала еси.
Радуйся, учинению раскола быти показала еси;
Радуйся, яко нечестивых обличала еси.
Радуйся, яко введение новаго стиля образно осудила еси;
Радуйся, яко юродством и образным словом тайны Божии являла еси.
Радуйся, яко безумием мнимым безумие мира открывала еси;
Радуйся, слуго Господня верная, благая и истинная.
Радуйся, мати наша Алипие, любовь велию в сердце своем стяжавшая.

Кондак 10
Спасительнаго подвига плодами наполняема, наипаче во смирение облечена была еси, преподобная мати Алипие, чуждаяся всякаго превозношения, служению людем всю себе предая. Дивно бысть видети тя в ветсей и многошвенней одежде ходяща, очами светлыми всех – богатых и убогих, начальников и простых, равно с любовию принимала еси и коемуждо слово на пользу душевную изрекала еси. Темже ныне велиим гласом от всея души нашея вопием: Аллилуиа.

Икос 10
Стена необоримая и заступление граду Киеву явися, всеблагая мати Алипие. Не тщетну сотвори молитву нашу, да живем благословением твоим. Яко не имамы таковыя милостивыя молитвенницы, якоже ты ко Господу Богу. Мы убо чада твои, буди нам мати сострадательная, аще и судом праведным Божиим наказания достойни явимся, веруем бо, яко можеши умолити Господа о нас, да от избытка сердца радостно глаголем:
Радуйся, любящим и чтущим тя ходатаице спасения;
Радуйся, подающая душам и телесем здравие.
Радуйся, евангелия Христова смиренная проповеднице;
Радуйся, апостольских преданий ревностная хранительнице.
Радуйся, яко обличение грешником кротко подавала еси;
Радуйся, яко непричастна лицеприятию была еси.
Радуйся, яко в келии своей явления святых удостоилася еси;
Радуйся, яко за любовь к людем от врага напасти претерпевала еси.
Радуйся, подвига своего николиже не оставлявшая;
Радуйся, храму Демиевскому усердно прилежавшая.
Радуйся, яко в храме сем икону святых апостолов Петра и Павла почитавшая;
Радуйся, храм сей молитвами своими соблюдавшая.
Радуйся, яко по слову твоему в храме сем прописана еси.
Радуйся, яко радость храму сему собою принесла еси.
Радуйся, мати наша Алипие, любовь велию в сердце своем стяжавшая.

Кондак 11
Пение всеумиленное Пресвятей Троице принесла еси при исходе твоем и яко пшеница зрелая рекла еси со апостолом: «яко время моего отшествия наста. Подвигом добрым подвизахся, течение скончах, веру соблюдох». И ныне уготоваста тебе венец правды, яже дал есть тебе Господь, праведный Судия. Мы же грешнии радуемся прославлению твоему на небеси: Аллилуиа.

Икос 11
Светозарным светильником была еси, Алипие всеславная, яже не ставят под спудом, но на свещнице и светит всем. Тако да просветися свет твой пред человеки, яко все видехом добрая дела твоя и прославляем Отца нашего, иже на небесех. Тебе же, любовию понуждаеми, зовем:
Радуйся, яко по кончине твоей с нами неразлучена еси;
Радуйся, яко крестом чада твоя при кончине благословила еси.
Радуйся, яко благословение сие хранити поручила еси;
Радуйся, яко сирот не оставляти обещалася еси.
Радуйся, предстательнице ко Господу непостыдная;
Радуйся, к Богородице молитвеннице неусыпная.
Радуйся, любве и сострадания явление обильное;
Радуйся, о душах наших благоприятное предстательство.
Радуйся, яко по имени твоем пребываеши беспечальна;
Радуйся, яко пожинаеши плоды вечнаго радования.
Радуйся, с ликом отец печерских хвалу, честь и славу Богови приносящая;
Радуйся, яко воспеваеши песнь нову во Царствии Небеснем.
Радуйся, мати наша Алипие, любовь велию в сердце своем стяжавшая.

Кондак 12
Благодать от Бога восприяла еси наставляти нас на путь истины и не дати душам нашим погибнути и умоляеши Господа, да спасет нас имиже весть судьбами и сподобит нас в вечней жизни радостного свидания с тобою, да и мы молитвами твоими достигнем Царствия Царя царствующих и Ему вопием: Аллилуиа.

Икос 12
Поюще кончину твою славную и успение со святыми, провождаше тебе духовнии чада твоя, сердце имеяше многовоздыханно и многоскорбно, но помятуя слова твоя, яко ты не умираеши, заповедь твою соблюдают, приходяще к святым мощам твоим, вопия сердцем и усты тебе:
Радуйся, от мощей твоих многи чудесы являющая;
Радуйся, новыя чада со всех концов собирающая.
Радуйся, благоухание дивное подающая;
Радуйся, свещи над мощами чудесно возжигающая.
Радуйся, светом небесным место сие озаряющая;
Радуйся, яко чада новые молитвы о скорбех своих сердечно тебе воздают.
Радуйся, яко слезы образ твой источает;
Радуйся, яко миро благоуханное из него истекает.
Радуйся, яко бесныя многочисленнии тамо исцелевают;
Радуйся, яко помощь твоя скоро им подадеся.
Радуйся, из погибельныя пучины легко извлачающая;
Радуйся, яко сердца безбожних чудесы твоими верою озаряются.
Радуйся, мати наша Алипие, любовь велию в сердце своем стяжавшая.

Кондак 13
О пречудная мати Алипие! Приими сия песнопения в похвалу твою воспеваемыя сердцами, любовию к тебе распаленными. И якоже прежде, тако и ныне подавай помощь твою матернюю всем нам требующим твоего ходатайства пред Богом. И якоже скорби наша ты сама ведаеши, тако и избавление веси. Нам же достойно есть воспевати Бога нашего: Аллилуиа.
Глаголи трижды, затем Икос 1, также Кондак 1

Молитва
О, преподобная мати наша Алипие! Излей на нас бедных, немощных и уничиженных по неизменному состраданию и милосердию твоему хоть малую каплю щедрот от Владыки Господа, прими ны в свое ходатайство и заступление, от всех бед и лютых болезней свободи, согрешениям нашим прощения испроси и воздвигни нас, расслабленных, твоими молитвами, не допусти до конца погибнуть нам, недостойным рабам (имена), буди нам прибежищем помощи, не остави нас неутешенными, да вси мы прославляем всесвятое имя Отца и Сына и Святаго Духа, ныне и присно и во веки веков. Аминь.

Молитва
О, великая Церкви Христовой похвало, града Киева стено и утешение, преподобная мати Алипие! К тебе припадаем и тебе молимся – буди предстательница наша ко Христу Богу неусыпная, яко веруем, аще будеши умолять Человеколюбца Бога, все будет даровано тебе из моря Его благости. И яко Бог человеколюбив есть, тако и ты, умоляемая нами грешными, не презришь прошения нашего, ибо сами мы по множеству грехов своих не имеем дерзновения.
Твое дело, святая, ходатайствовати о грешных, дело Божие – миловать отчаянных. Испроси, преподобная, коемуждо по его потребе: В болезнех сущих скоро утеши и исцели, яко ныне во множестве исцеление соделоваеши - яко немыя глаголати, слепыя видети, костьми поврежденныя от одра болезни восставляеши. Все можеши испросити у Господа, преподобная, аще помолишися к Нему за ны.
Опухоли лютыя не быти соделай. Страждущим ожогами исцеление скорое подавай, якоже отроку болящему нощию явилася еси, молитве матери его внемлюще. Темже великое чудо исцеления всему миру показала еси.
В тяжции дни сии торжества беззакония и неправды, обиженным и неправедно осужденным, в темницех заключненным, зависти, лжи и корысти ради гонимым исходатайствуй избавление от клеветы и напасти, яко благодать ходатайствовати за онех сугубо подадеся тебе от Господа.
Супружества благие благослови и соедини. Матерем детородящим подавай благополучное разрешение, сохраняя их и чады от всякаго вреда. Услыши теплую молитву родителей, скорбию о чадех истомленных, да чада их в сознание истины прейдут, избегнув сетей лукаваго, вечное спасение обрящут. Приими молитвы о родителех скорбящих чад их, да молитвами твоими свет Христова Евангелия познают. Такожде утеши безчадных и даруй им плод чрева, да новыя истинныя христианы Господу представят твоим благословением и воспитанием материнским. Требующим твоея помощи в совершении христианскаго брака посли благословеннаго от Господа спутника жития их, да попечением твоим Христу Богу принесут служение малыя церкви в союзе семейном. Наипаче же подавай мир, тишину и нелицемерную любовь, да будем истинныя ученики Христовы.
Предавшимся недугам пиянства и наркомании и неимущим силы духа оставити сие душегубительное беззаконие подай силу духа и просвещение ума, якоже явилася еси человеку, от пиянства смерть прияти имущему и благословением твоим исцелившемуся от недуга сего.
Одиноким и безпомощным низпосли твоими молитвами незримое от Господа утешение и познание истинной любви Христовой, да уведят, яко друзи наши - святии и ангели, невидимо соблюдают ны.
Прошения неимущих и страждущих приими и подай им своими молитвами нежданное попечение, яко да имут тя благодетельницу в земнем житии своем.
Малодушним, отчаявшимся в житии своем, буди утешительница скорая, якоже спасла еси жену, в скорби погубити себе умыслившую и отроковицу, в падении с высоты сохраненную от вреда. Темже души их от погибельныя пучины избавила еси.
Такожде, молим тя, преподобная, от внезапныя смерти сохрани, якоже отрока невредимо соблюла еси, удар страшный на дорозе приявшаго.
В учении пребывающим излей материнскую помощь и подай прибавление ума, да в нелегком течении учения своего пребывают безпечальны.
В многоразличных житейских делех, бедах и трудностех подавай скорое устройство и благое сих завершение.
Услыши молитвы скорбящих о заблуждающих, кои пребывают вне спасительнаго ковчега Церкве Православныя, да Господь Всеблагий имиже весть судьбами спасет их и приведет в познание истины Своея.
Воинам низпосли крепость и силу духа в совершении богоугоднаго служения своего, да сохранит их Господь от всякого зла.
Монашествующих настави право шествовати путем Господним, укрепляя в подвизех и смиренном несении креста своего, якоже и ты подвизалася во спасение в любви ко Господу и людем Его.
Архиереом и священником подавай истинное стояние в вере православной, да стадо Христово пасут верно и нелицемерно, право правяще и непреткновенно пред Господом ходяще.
Начальником и властем мудрое народа нашего управление, да в союзе с Церковью страна наша пребывает в мире и тишине.
Отверзи нам молитвами своими двери милосердия Божия и избави нас от всякаго зла. Даруй нам избежати сетей лукаваго. Моли, преподобная, Милосерднаго Господа о нас, кающихся, да простит нам вины наши по множеству благости Своей. И даже до конца молитвами твоими сохрани нас неосужденными, да спасенные твоим ходатайством и помощию, всегда будем возсылать славу, хвалу, благодарение и поклонение Единому в Троице Богу, Создателю всех. Аминь.
О, преподобная мати наша Алипие!
Буди предстательницею за усопших рабов Божиих, отшедших от сего берега временныя жизни и не достигших тихаго пристанища, яко возлюбила ты еси о них молитву, труждаяся во время святаго твоего жития, на всяк день - подвигом приношения милостыни о них. Принесеся жертва твоя, яко благовонный фимиам пред Господем, и милостыне твоей призре Господь, и изведе от ада многия умершия, твоими добрыми делы и молитвою избавленныя. Веруем бо, яко любовь твоя ко умершим не угасла и ныне, посему припадаем тебе и просим: помози усопшим нашим, подаждь им руку помощи твоея, виждь слезы наши и моления, и веру, яко ты предстоиши ныне пред престолом Бога Вседержителя, и молишися о усопших рабех Его, отпавших от любве Отеческия, но сердцем сокрушенных и не могущих приближитися ко свету Его. Изведи души их, тьмою содержимых, и согрей светом славы Божией, коей сияешь ты, якоже солнце пресветлое, да не погибнут во век, но молитвами твоими прейдут от смерти в живот и достигнут тихаго пристанища в Небесном Иерусалиме, непостыдно предстанут на Страшнем пришествии Небесного Царя, яко добро есть и угодно Богу молитися о душах отшедших, имена их не забыты Господом, слышит Он угодников Своих, вопиющих к Нему. Посему посла тебе, мати Алипие, усердную молитвенницу. Темже молим тя: подаждь и нам во время отшествия нашего, а такожде и душам усопших рабов Божиих от великого богатства добродетелей твоих, да вси купно прославляем Бога нашего, Отца и Сына и Святага Духа, дивного во святых Своих. Аминь.

Сайт создан в системе uCoz