Кондак 1
Возбранный чудотворче и изрядный недугов целебниче, по данней ти от Господа благодати, яко имеяй дерзновение к Подателю здравия, от всяких нас бед и недугов свободи, да зовем ти:
радуйся, Антипо, скорый помощниче в болезнех наших.

Икос 1
Ангелов и всея твари Содетель, явивый тя Церкве Святей всесветлаго светильника веры и за веру твердейшаго адаманта священномученика, научает нас восхваляти подвиги твоя и воспевати тя, священномучениче Антипо, сице:
Радуйся, богомудрый наставниче православныя веры;
радуйся, яко источил еси peки учения, верных напаяющия.
Радуйся, яко мутныя воды многобожия потребил еси;
радуйся, яко демоном служащия чествовати Бога Истиннаго научил еси.
Радуйся, чрез чтение Божественных книг ум просвещен имевый;*
радуйся, пред лицем мучения от исповедания веры Христовой не отступивый.*
Радуйся, яко из глубины безбожия извлекл еси заблуждшия человеки и наставил еси их на путь спасения;
радуйся, яко дреманием нечестия одержимыя возбудил еси к разуму истиннаго Боговедения.
Радуйся, Антипо, скорый помощниче в болезнех наших.

Кондак 2
Видя лютое гонение неправедных на благочестивыя христианы, не убоялся еси прещения их и мучительства, богоизбранне но дерзновенно пред лицем их истиннаго Бога исповедал еси, вразумляя тех обратитися от суетных идол ко Христу Спасителю и выну пети Ему: Аллилуиа.

Икос 2
Среди язык, сидящих во тьме и сени смертней, сохранив непорочность жития твоего, святе Антипо, Ангелом сожитель быти сподобился еси и с ними воспевати Троическую песнь Богу на Небеси. Услыши нас, поющих ти на земли похвальная пения сия:
Радуйся, житию безплотных поревновавый;
радуйся, чистотою Ангелом уподобивыйся.
Радуйся, во плоти явивыйся аки бесплотен;
радуйся, в теле поживый духовно, на земли небесно.
Радуйся, небесный человече;
радуйся, земный Ангеле.
Радуйся, среди тьмы нечестия светлый луче;*
радуйся, Христом освященный мучениче.*
Радуйся, Антипо, скорый помощниче в болезнех наших.

Кондак 3
Силою благодати Божией, еще сый в телеси возсиял еси яко солнце, всех просвещая и разгоняя глубокую нощь безбожия. Сего ради почитая тя яко сопрестольника Апостолов и целеб подателя воспеваем Богу: Аллилуиа.

Икос 3
Имея неусыпное попечение о спасении душ во тьме идолослужения погибающих, богомудре Антипо, не преставал еси призывати тех к Богоугодней жизни, подавая собою пример совершеннаго благочестия христианскаго; сего ради усердно приносим ти похвалы сия:
Радуйся, образе жития праведнаго;
радуйся, указателю неверным стези, ведущей к Небеси.
Радуйся, верным ко спасению путеводителю;
радуйся, заблуждших прилежный вразумителю.
Радуйся, во обращении идолопоклонников к вере во Христа явивый самоотвержение всецелое;
радуйся, архиерею Божий, добре упасший словесное стадо твое.
Радуйся, страждущих в немощех утешение;*
радуйся, Церкве Православныя украшение.*
Радуйся, Антипо, скорый помощниче в болезнех наших.

Кондак 4
Велия буря ярости Дометиана, дышущаго убийством, восшуме на храм души твоея, святе Антипо, но того не возможе поколебати, основан бо бе на твердом веры Христовы камени, на немже ты, богоизбранне, неподвижно пребывая, укрепляющему тя Господу Иисусу воспевал еси: Аллилуиа.

Икос 4
Слышавше от тебе нечестивый игемон и жрецы идольстии словеса премудрости, распыхахуся на тя злобою, паче же егда рекл еси: «Едино то веждь, о игемоне, яко христианин аз есмь, царскому же велению безумному и нечестивому повинутися отнюдь не изволяю». Сие убо воспоминая, взываем ти сице:
Радуйся, веру во Христа до смерти добре сохранивый;
радуйся, пред преданием духа о мире всем молитву сотворивый.*
Радуйся, победоносною славою от Христа Победителя облеченный;
радуйся, Самим Христом свидетелем верным быти нареченный.*
радуйся, силою свыше на брань противу мучителей препоясанный.
радуйся, Апостолов во исповедании Христа подражателю.
Радуйся, страстем Христовым сопричастниче;
радуйся, кровию своею утвердивый правоверие.
Радуйся, Антипо, скорый помощниче в болезнех наших.

Кондак 5
Боготочный источник дивных чудес явился еси, достославне Антипо: приял еси от Господа дар недуги врачевати, да познают неверующие Бога, яве тобою чудодействующа, и воспоют Ему: Аллилуиа.

Икос 5
Видевше людие града Пергама, яко дадеся ти благодать немощных исцеляти, и от всяких телесных и душевных скорбей избавляти, удивишася. Мы же за многая исцеления тобою на ны изливаемая, ублажаем тя похвалами сими:
Радуйся, болящих исцеление;
радуйся, расслабленных укрепление.
Радуйся, недугующих врачу благодатный;
радуйся, скорбящим непостыдное прибежище.
Радуйся, яко тобою от многих ран грешнии исцеляются;
радуйся, яко тобою от всяких болезней с верою призывающии тя избавляются.
Радуйся, из Царства вечнаго Царя Славы молитвами твоими нас укрепляющий;*
Радуйся, целителю миром благодатным от твоих мощей.*
Радуйся, Антипо, скорый помощниче в болезнех наших.

Кондак 6
Проповедником истины, Христовым Апостолом поревновав, не убоялся еси зверонравных мучителей, не ужаснулся еси прещения, но со дерзновением проповедал еси им Христа Бога, Его же ради в разжен сосуд медян ввержен был еси, да прославится тебе ради дивный во святых Господь, Емуже ты и в огни взывал еси: Аллилуиа.

Икос 6
Имея велию ревность о людех Божиих, ты болезновал еси о погрязших в бездне идолопоклонства, и ради спасения неверных готов был еси, якоже божественный Павел, сам отлучен быти от Христа, возлюбленнаго тобою. Сего ради со умилением взываем ти сице:
Радуйся, отцу верующих Аврааму в ходатайстве о грешницех подражавый;
радуйся, Боговидцу Моисею в пламенней молитве о спасении неверующих поревновавый.
Радуйся, новый Самуиле, в молитве о беззаконницех глаголавый: «Не буди мне, еже не вопити о вас с молением ко Господу»;
радуйся, подражателю архидиакона Стефана, во время страдания в медяном воле о мучителех сотворивый сицевую молитву: «Господи! не постави им греха сего».
Радуйся, яко незлобив сый, за убивающих тя молился еси, яко за благотворцев;
радуйся, пастырю любвеобильный, положивый душу за словесныя твоя овцы.
Радуйся, угрозы мучителей твердо пренебрегший;*
Радуйся, верностию Христу вечное жизни пристанище приобретший.*
Радуйся, Антипо, скорый помощниче в болезнех наших.

Кондак 7
Хотящу беззаконному мучителю лестными словесы отвратити тя, Антипо, от Истиннаго Бога ко идолом бездушным, ты, богомудре, отвещал еси: пришед в последнюю старость и к смерти приближився, не изменю веры моея в Иисуса Христа, Бога моего, Емуже со Отцем и Святым Духом присно пою и во веки веков имам пети: Аллилуиа.

Икос 7
Новое чудо показа Господь тобою, егда ты по велению злочестиваго мучителя ввержен был еси в разжен медян коноб, в немже яко хлеб сладкий испеклся еси и в воню благоухания Святей Троице принеслся еси. Благоговейне убо воспоминая сие превелие терпение твое, блажим тя похвалами сими:
Радуйся, позорищным ввержением в разженный сосуд гордыню мучителя низложивый;
радуйся, яко огнь любве к Богу в сердце твоем до конца жизни сохранивый.
Радуйся, нечестивыя повеления царя земнаго презревый;*
радуйся, благочестивыя заповеди Царя Небеснаго даже до смерти возлюбивый.*
Радуйся, яко Христа ради огнем кончину приявый;
радуйся, терпение твердее камене явивый.**
Радуйся, преславно жизнь на земли скончал еси Христом Богом укрепляемый;**
радуйся, пресветлому мученическому лику сопричтенный.
Радуйся, Антипо, скорый помощниче в болезнех наших.

Кондак 8
Странно бе видети языком, неведущим Божией силы, како в слабом старческом теле возмогл еси, святителю Антипо, претерпети за Христа лютейшия муки. Мы же, благодаря о сем Бога, даровавшаго ти таковую крепость, с любовию взываем: Аллилуиа.

Икос 8
Весь предан был еси Иисусу Пресладкому, святителю Антипо, и сладце Его ради горькия муки в огни претерпел еси, глаголал бо еси: «Чашу страданий, юже даде ми Господь, не имам ли пити»; темже и сам показался еси аки чаша, сладость чудесных исцелений изливающая всем вопиющим к тебе таковая:
Радуйся, всею душею Иисуса Пресладкаго возлюбивый; **
радуйся, в медном котле мучимь, за благодеяния Господа благодаривый.*
Радуйся, небоязненно и твердо супротив врагов стоявый;*
радуйся, пастырю, словесным овцам во Святая святых путь показавый.
Радуйся, реко, орошающая мир водами благодати Божией;
радуйся, неисчерпаемый источниче чудесных исцелений.
Радуйся, сосуде, на вся недуги неоскудно изливающий врачевания;**
радуйся, яко Господь сил на тебе явил есть дивная.**
Радуйся, Антипо, скорый помощниче в болезнех наших.

Кондак 9
Всякую стяжал еси чудодействия силу благодатию дивнаго во святых Своих Бога, святителю Антипо: не токмо бо молитвами твоими устрашил еси бесы, но и совершенно из града Пергама изгнал еси я. Воспоминая сию победу твою над злыми духи, благодарне вопием Богу: Аллилуиа.

Икос 9
Витийство человеческое не довлеет изрещи, коликую приял еси, святе Антипо, от Господа власть изгоняти от людей диавола с лукавыми демоны, за еже мы восхваляем тя сице:
Радуйся, светом чистой и правой веры тьмы идольской прогонителю;*
Радуйся, всяческих козней диавола разрушителю;
радуйся, сатаны посрамителю.
Радуйся, стужаемых от бесов свободителю;
радуйся, демонов отгнателю.
Радуйся, темных адских сил устрашителю;
радуйся, яко света луча Христова насельники тьмы тя убегают;*
радуйся, духи злобы от тебе, якоже дым, исчезают.**
Радуйся, Антипо, скорый помощниче в болезнех наших.

Кондак 10
Спасти хотя душу твою, презрел еси плоть и не убоялся еси от убивающих тело, святе Антипо, егда бо услышал еси осуждение на сожжение в медяном воле, ты радостно приял еси оное, воспевая Господеви: Аллилуиа.

Икос 10
Стена еси ограждающая от всяких зол усердно тя в помощь призывающих, святе Антипо, не токмо бо во Асии живущим, но и во всех местех сущим христианом твоею действенною молитвою подаеши духовная дарования; ихже ради и мы, отче святый, ублажаем тя сице:
радуйся, ангельским чином чрез мучение приобщившийся;*
Радуйся, на небо с мученическим венцем восшедый.*
Радуйся, сосуде, источаяй елей Божия милосердия;
радуйся, живоносный источниче, изливающий нам струи исцелений.**
Радуйся, в немощи лежащих скорый здравия возставителю;
радуйся, всех лютых болезней, паче же зубныя болезни лютыя целителю.
радуйся, всем, притекающим к тебе с верою врачеваний подателю.**
Радуйся, безмездный врачу болезни душевныя и телесныя;
Радуйся, Антипо, скорый помощниче в болезнех наших.

Кондак 11
Пение благоприятное Пресвятей Троице принесл еси, достойный преемниче Апостолов, Антипо, не точию умом, словом и духом, но живым всего себя в жертву принесением. Тем же, аще и не довольны есмы к похвалению таковых твоих подвигов, обаче благодарни сущи, поем дивному во святых Богу: Аллилуиа.

Икос 11
Светозарный светильник, от Истиннаго Света озаряемый, сущим на земли являешися, равноапостольный Антипо, просвещаеши бо сердца верных и к разуму Божественному вся наставляеши, поучая и нас со умилением взывати:
Радуйся, яко злато в огненной пещи очищенный;*
радуйся, заре Божия света.
Радуйся, деннице Солнца Правды;
радуйся, яко роза среди терния красотой благоухаяй.
Радуйся, сияние Евангельскаго учения;
радуйся, светило небеснаго блистания.
Радуйся, души верных просвещаяй;**
радуйся, сердца ищущих правды озаряяй.**
Радуйся, Антипо, скорый помощниче в болезнех наших.

Кондак 12
Благодать, данную ти от Бога ведуще, радостно имя твое воспоминаем, святителю Антипо, и с теплым молением к всечестному образу твоему притекающе, прилежно молим тя: подаждь цельбу страждущим лютою зубною болезнию и избави всех нас от всякия нужды и печали, да поем Богу: Аллилуиа.

Икос 12
Славную кончину твою поюще, архиерею Божий, и теплую молитву твою к Богу о христианах воспоминающе, восхваляем Господа Сил, дивная на тебе сотворшаго; ты же услыши нас, умильно вопиющих ти:
Радуйся, пред лицем мучения от исповедания веры Христовой не отступивший;*
радуйся, яко сладким сном успения на небо восшедший.*
Радуйся, теплый пред Господем о нас молитвенниче;
радуйся, присный пред Богом наш заступниче.
радуйся, всех благочестно совершающих память твою благосердый помощниче.**
Радуйся, добрый наш наставниче;
радуйся, о спасении нас грешных сильный ходатаю.
Радуйся, Царя Небеснаго скорый умилостивителю;
Радуйся, Антипо, скорый помощниче в болезнех наших.

Кондак 13
О, преславный и всехвальный священномучениче Антипо! Приими сие похвальное пение от нас недостойных во умилении тебе приносимое, и богоприятным твоим ходатайством умоли Господа даровати болящим здравие душевное и телесное, избавити всех нас от бед и напастей в жизни сей, по смертном же успении нашем, в день Страшнаго Суда одесную Праведнаго Судии стати и в Царствии Славы Ему воспевати: Аллилуиа.
Сей кондак читается трижды, затем икос 1 и кондак 1

Молитвы священномученику Антипе, епископу Пергамскому

Молитва первая
О, преславный священномучениче Антипо, скорый помощниче христианом в болезнех! Верую от всея души и помышления, яко дадеся тебе от Господа дар болящия исцеляти, недугующия врачевати и разслабленныя укрепляти. Сего ради к тебе, яко благодатному врачу болезней, аз немощный [немощная] прибегаю и твой досточтимый образ с благоговением лобызая, молюся: твоим предстательством у Царя Небеснаго испроси мне болящему [болящей] исцеление от удручающия мя зубныя болезни, аще бо и недостоин [недостойна] есмь тебе, благостнейшаго отца и приснаго заступника моего, но ты, быв подражатель человеколюбия Божия, сотвори мя достойна [достойну] твоего заступления чрез мое обращение от злых дел к благому житию, уврачуй обильно дарованною тебе благодатию язвы и струпы души и тела моего, даруй ми здравие и спасение и во всем благое поспешение, да тако тихое и безмолвное житие пожив во всяком благочестии и чистоте, сподоблюся со всеми святыми славити всесвятое имя Отца и Сына и Святаго Духа. Аминь.

Молитва вторая
Архиерею Божий, священномучениче Христов, Антипо преблаженне, иже апостолом сопрестольник, и святителем слава, ты еси, архиерею, церковное светило и утверждение веры, пред противными богоборцы дерзновенно Христа исповедал еси, и принеслся еси яко кадило благовонно, и яко агнец незлобив и мученик праведен, в вол медян разжжен ввержен, святителю, и молитвы благодарственныя в нем Богу и Отцу возсылая, яко солнце возсиял еси, и мучением своим томителя велиара до конца сокруши. Сего ради Христос тя прослави на небеси, и на земли всю вселенную осияваеши данною ти благодатию, страждущим от неутешимыя зубныя болезни цельбы подаеши, непрестанно призывающим тя с верою. И ныне, усльши мя, грешнаго и недостойнаго раба Твоего (имя), в час сей с верою призывающаго тя, яко и молебное пение приносити ходатая и молебника к Богу тя предлагаю.

Молитва третья
Архиерею Божий, священномучениче Антипо, услыши мя, грешнаго раба твоего (имя), в час сей, в оньже тебе моление приношу, и помолися о мне грешнем ко Господу Богу об отпущении грехов моих, и нестерпимыя и неутешимая зубныя болезни избави мя молитвами, святе, твоими.

Тропарь священномученику Антипе Пергамскому, глас 4
Идольския лести упразднил еси, Антипо, и диавольскую поправ силу, пред богоборцы дерзновенно Христа исповедал еси. Темже с ангельскими чины в вышних водворился, Владыце всех славословие принося, и о нас молебное благодарение предлагаеши, благодать цельбы даруя. Сего ради тя чтим, священномучениче Антипо, моли Христа Бога, да спасет души наша.