Кондак 1
Избранный чудотворче и предивный угодниче Христов, преподобне отче наш Антоние, любовию прославляем тя, яко теплаго заступника и молитвенника нашего, ты же яко великий предстатель о нас пред Богом, приими смиренное сие пение наше, от всяких нас без свободи, зовущих тебе радостно:
Радуйся, отче наш Антоние, Черноезерский чудотворче.

Икос 1
Ангел земный и небесный человек явился еси, егда по гласу Христову вся красная мира сего оставил еси и, взем крест свой, в пустыню Черноезерскую вселился еси: Ныне же, предстоя Престолу Божию, молися о чадех твоих, зовущих тебе сице:
Радуйся, Евангелия Христова верный исполнителю;
радуйся, двема господинома Богу и миру работати не восхотевый, но точию единому Богу.
Радуйся, Христа Единого всем сердцем пламенне возлюбивый и Того единаго взыскавый;
радуйся, вся красная мира сего любве ради Христовы презревый.
Радуйся, во объятия Отча и во Отеческий дом возвративыйся;
радуйся, Христа ради яко вторый Павел от всего отказавыйся и вся в уметы вменивый.
Радуйся, забывый задняя и простираяйся вперед к почести вышняго звания во Христе Иисусе;
радуйся, возжелавый облечься во Христа не со своею праведностию от закона, но якоже от Бога чрез веру во Христа.
Радуйся, познания ради Христова участие в страданиях Его имевый;
радуйся, язвы Господа твоего на теле своем носивый.
Радуйся, всего себе распявый, противу мира, плоти и диавола крепкоо вооруживыйся.
Радуйся, отче наш Антоние, Черноезерский чудотворче.

Кондак 2
Видев, яко в мире сем господствуют похоть плоти, похоть очес и гордость житейская, и помятуя, яже возлюбленный ученик Христов Иоанн поучает: не любите мира и вся яже в мире, кто бо любит мир, в том несть любви Отчей, ты, преподобне отче наш Антоние, отвергся еси всех сует мира сего и земных попечений и в пустыню вселился еси, да нескверным помыслом и чистым сердцем единому Богу поработаеши поя Ему: Аллилуиа.

Икос 2
Разум чист и свободен от страстей сотворил еси, пречудне отче наш Антоние, егда плоть твою духу покорил еси и якоже елень желает на источники водныя, сице и душа твоя возжажда к Богу Крепкому Живому и вселися в пустыню непроходимую на Черное езеро и тамо был еси яко древо насажденное при исходищах вод, еже плод свой даст во время свое и лист его не отпадет. Сего ради воспеваем тебе сице:
Радуйся, пустынножителей светлое украшение;
радуйся, бесплотныя пустыни дивное прозябение.
Радуйся, райския жизни насадителю;
радуйся, пустыннаго безмолвия любителю.
Радуйся, чистоту души и тела непорочно соблюдый;
радуйся, покров небо, одр же землю стяжавый.
Радуйся, подобно Господу твоему не имевый крова где главу подклонити;
радуйся, яко птицы небесныя не имевый во что одетися и чем питатися.
Радуйся, яко Илия Фесвитянин обретый Бога в пустыни и с Ним незримо беседовавый;
радуйся, первому пустынножителю Иоанну Крестителю подражавый.
Радуйся, всю сладость пустыннаго жития вкусивый;
радуйся подвиги своими пустыню Черноезерскую благодатию освятивый.
Радуйся, отче наш Антоние, Черноезерский чудотворче.

Кондак 3
Силою Божественнаго промышления приведен был еси, богомудре Антоние, из мира сего в пустыню Черноезерскую и тамо принесл еси всего себе в жертву чистую и непорочную Богу и был еси монах и облеклся еси во всеоружия Божия, во еже возмощи стати противу козней диавольских, препоясав чресла своя истиною и облекшеся в броню правды, обувше нозе своя во уготование благовествования мира и восприимше щит веры и шлем спасения и меч духовный, да выну поеши Богу: Аллилуиа.

Икос 3
Имеяй в сердце своем огнь любве Божественныя, преподобне отче, весь к Богу прилепился еси. Сего ради кто разлучит тя от любве Божия, скорбь, или теснота, или гонение, или глад, или нагота, или беда, или меч, якоже есть писано: яко Тебе ради умерщвляеми есмы весь день. Все сие преодолел еси силою Возлюбившаго тя, яко ни смерть, ни жизнь, ни Начала, ни Силы, ни настоящее, ни будущее, ни высота, ни глубина, ни ина кая тварь возможет отлучити тя от любве Божия. Сего ради с любовию зовем ти таковая:
Радуйся, любве Божия столпе непоколебимый;
радуйся, возлюбивый Бога всем сердцем, всею душею, всею крепостию и всем разумением своим.
Радуйся, яко любве ради Божия не обязавыйся браком и заботами житейскими;
радуйся, яко душу свою уневестил еси Христу, Безсмертному Жениху нашему.
Радуйся, девственниче духом и телом;
радуйся, блаженный рабе, егоже Господин твой всегда обрящет бдяща.
Радуйся, на сретение Христу Безсмертному Жениху всегда изыти готовый;
радуйся, имеяй светильник в душе своей выну горяяй и никогдаже угасаяй.
Радуйся, яко чистотою сердца своего пламенную любовь к Богу стяжал еси;
радуйся, яко любовию к Богу ум твой чист сотворил еси.
Радуйся, яко возлюбил еси Бога не словом или языком, но делы и подвиги своими;
радуйся, яко от земли к небесней любви возвысился еси.
Радуйся, отче наш Антоние, Черноезерский чудотворче.

Кондак 4
Бурю искушений вражиих прошел еси, угодниче Божий, дондеже постом и молитвами многими низложил еси вся козни врага спасения нашего и, шествуя от силы в силу по лествице восхождения духовного, стяжал еси совершенную тишину помыслов и преизрядную чистоту сердечную. Сего ради сем искушен быв, можеши и нам искушаемым в бедах и напастях помощи, поющим о тебе Богу: Аллилуиа.

Икос 4
Слышавше, богомудре Антоние, ближнии и дальнии о преславном житии твоем, яко можеши всем сущим в напастях и искушениях молитвами твоими подавати великую помощь и спасение, тепле и со умилением взывающи тебе таковая:
Радуйся, теплый молитвенниче о душах наших;
радуйся, благодатный утешителю всех в бедах сущих.
Радуйся, обуреваемых тихое пристанище;
радуйся, падшим скорое воздвижение.
Радуйся, яко тобою отгонится всякое рыдание;
радуйся, яко тобою подается всякое утешение.
Радуйся, болезней наших врачевание;
радуйся, печалей наших утешение.
Радуйся, яко тобою от греховных страстей свобождаемся;
радуйся, яко тобою душевныя тишины сподобляемся.
Радуйся, пучино милостей Богом излиянная;
радуйся, горо благодати Богом приосененная.
Радуйся, отче наш Антоние, Черноезерский чудотворче.

Кондак 5
Боготечная звезда явился еси всем в девстве и иночестве проводящим житие свое, преподобне отче наш Антоние. Якоже бо та чудная звезда показа волхвом вертеп рождшагося Христа, такожде и ты являеши Христа в души всем подвизающимся и подаеши свет всем во мраке и грехах живущим, наставляя непрестанно воспевати Богу: Аллилуиа.

Икос 5
Видевше, яко в мире сем вся причастна тлению и суете, потщался еси, преподобне отче, подражати древним отцем в пустынех просиявшим, наипаче тезоименитому тебе великому Антонию, сей бо свыше наставлен бе иноческому пустынному житию, егда явися ему Ангел Господень и показуя, како проводити иноку житие свое, ста на молитву, потом же нача работати и трудитися рукама своима. Сему божественному наставлению внемлюще, преподобне отче наш Антоние, предался еси неустанным молитвам и трудам, научая и братию твою молитися и трудитися. Сего ради вопием тебе сице:
Радуйся, монашескаго жития наставниче израднейший;
радуйся, подвижническаго восхождения учителю известнейший.
Радуйся, лествице всем идущим на небо;
радуйся, мосте всем преходящим море жизни сея.
Радуйся, яко можеши понести немощи безсильных;
радуйся, яко можеши исправляти согрешающих духом кротости.
Радуйся, друг друга тяготы носити научивый;
радуйся, тако исполнивый закон любве Христовой.
Радуйся, яко сорадовался еси с радующимися;
радуйся, яко сопечаловался еси с плачущими.
Радуйся, попечения о плоти не превративый в похоти;
радуйся, отвергнувый дела тьмы и облекийся во оружия света.
Радуйся, отче наш Антоние, Черноезерский чудотворче.

Кондак 6
Проповедует пустыня Черноезерская подвиги и чудеса твоя, преподобне отче наш Антоние, яко на ней исполнися Исаино проречение: радуйся, пустыня жаждущая, да веселится пустыня и да цветет, яко крин. Твоими бо труды процвете пустыня сия и возвеселися слава Ливанова и честь Кармилова дадеся ей. И бысть безводная во езера и на жаждущей земли источник водный будет. И открыся в пустыни путь чист для жаждущих иноческия жизни, путь свят наречеся. И не прейдет тамо нечистый, ниже будет там путь нечист. Разсеянний пойдут по нему и не заблудят. И радость вечная будет над главою их, хвала и веселие, отбеже болезнь, печаль и воздыхание, да вси вопиим тамо: Аллилуиа.

Икос 6
Возсия всей окрестней земли просвещение благовестия твоего, великий угодниче Божий Антоние. Ты собрал еси братию твою, вселил сих во обитель сию. Всех утешил еси, ободрил, наставил, глаголя: укрепитеся руце ослабленная и колена разслабленная. Утешитеся, малодушнии умом, укрепитеся, не бойтеся. Се Бог наш приидет и спасет нас. Егда же Промыслом Божиим обитель твоя в нашествие иноплеменников прииде в запустение, ты по прошествии времен возставил еси на месте подвигов твоих обитель дев, да с радостию и любовию тепле во умилении сердца вопиют чада покровителю своему сицевая похвалы:
Радуйся, не точию иноков, но и инокинь наставниче изрядный;
радуйся, невестоводителю дев чистых.
Радуйся, яко собираеши от мира птенцы своя;
радуйся, яко печешися о пропитании сирот своих.
Радуйся, хранителю их девства и чистоты;
радуйся, свидетелю их обетований Царю Христу.
Радуйся, отверзаяй сестрам обители твоея врата Небеснаго Чертога;
радуйся, подаваяй им елей доброделания, да светильники их не угаснут.
Радуйся, страже обителей райских, подаваях достойным победныя венцы;
радуйся, друже Жениха Небеснаго, облекаяй невесты Его в одеяния брачныя.
Радуйся, оставльшим домы своя, братию и сестры подаваяй во время сие во обители во сто крат более домов, братий и сестер;
радуйся, обители твоея бодрый и неусыпный хранителю.
Радуйся, отче наш Антоние, Черноезерский чудотворче.

Кондак 7
Хотящу ти, досточудне отче Антоние, от нынешняго века преставитися прелЕстнаго, и в райския обители преселитися от земныя обители тобою созданныя, яко вторый Павел глаголал еси: желание имам разрешитися и со Христом быти. Вемы бо, яко аще земная наша храмина тела разорится, создание от Бога имамы храмину нерукотворенну, вечну на небесех. О сем воздыхающе облещися желающе, пел еси Богу: Аллилуиа.

Икос 7
Дивнаго совершенства достигл еси, отче наш Антоние, егда время твоего отшествия наста. Подвигом добрым подвизался еси, течение скончал еси, веру соблюл еси. Чрез все житие твое верою ходил еси, а не ведением, дерзая отъити от тела и внити ко Господу. Темже мирное твое от земных отшествие славяще, воззовем к тебе таковая:
Радуйся, течение жизни твоея благочестно скончавый;
радуйся, веру соблюдый всецелу.
Радуйся, земную храмину тела оставивый;
радуйся, храмину нерукотворенну, вечну на небесех стяжавый.
Радуйся, яко клас зрелый пшеничный, тело твое земле предал еси;
радуйся, яко путник в странствии сущий море жизни преплыл еси.
Радуйся, угодниче Христов, душу твою кротко от тела разрешивый;
радуйся, избранниче Божий, дух твой в руце Господа радостно предавый.
Радуйся, преподобне, яко смерть твоя честна пред Господем бысть;
радуйся, яко память твоя с похвалами почитается во обители твоей.
Радуйся, яко успение твое со всеми святыми прославляется;
радуйся, яко по успении твоем от земли на небо возшел еси.
Радуйся, отче наш Антоние, Черноезерский чудотворче.

Кондак 8
Странно и неизреченно бысть пречудное прославление твое, преподобне отче наш Антоние, егда по трудех и подвизех земнаго странствия твоего прешел еси от временнаго жития сего к вечному и водворился еси в райския обители. Тамо поклонился еси Престолу Вседержителеву и сподобился еси узрети славу Его, не яко в зерцале, в гадании, но лицем к лицу. Тамо смерти уже не будет ктому, ни плача, ни вопля, ни воздыхания. Тамо ты причастился есибезсмертнаго плода Древа Животнаго посреде рая насажденнаго и со всеми святыми воспел еси Богу: Аллилуиа.

Икос 8
Весь исполнился еси пламенныя любве Божия, егда вступил еси в лики святых апостол и пророк, мучеников, святителей и преподобных и к блаженству безплотных сил приобщился еси, отче наш Антоние. Ктому уже не можем нарещи тебе раба Христова, зане ты яко друг Божий предстоиши ныне Престолу Небеснаго Царя и приемлеши сицевая благохваления наша:
Радуйся, звезда новая на тверди небесней возсиявшая;
радуйся, луче Божественнаго Света, во тьме века сего нас озаряющая.
Радуйся, заре небесная, явление Христово предваряющая;
радуйся, сияние райскаго блаженства, надежду нам подавающее.
Радуйся, избранниче Чертога Христова, брачную одежду стяжавый;
радуйся, наперсниче Божественныя вечери, райския пищи приобщивыйся.
Радуйся, в сонм святых в раи сладости водворивыйся;
радуйся, с лики безплотных в райския обители вселивыйся.
Радуйся, новый слуго Царицы Небесныя преизрядный;
радуйся, новый друже всех святых прелюбезный.
Радуйся, молитвенниче, кадило фимиама целебнаго пред Богом приявый;
радуйся, целебниче, сосуд врачевания райскаго от Христа получивый.
Радуйся, отче наш Антоние, Черноезерский чудотворче.

Кондак 9
Всякия избави нас скорби и болезни, великий наш заступниче, преподобне отче Антоние, ты бо восшед на небо, духом любве своея не отступил еси от нас и выну врачуеши вся скорбныя и плачущия, спасаеши впадших в искушения различныя и в отчаянии сущия, открываеши в душе каждаго прибегающаго к тебе, яко близ Бог всем призывающим Всесвятое и великое Имя Его, Иже имать сохранити нас и не дати впасти во искушения паче сил наших, и научаеши всех взывати Богу: Аллилуиа.

Икос 9
Ветия многовещанная недоумеют, како достойно восхвалити великое твое предстательство о нас пред Богом, преподобне отче наш Антоние. Ты бо купно с Пречистою Богородицею и с лики святых со дерзновением выну молишися о всех с верою тебе притекающих и просящих твоего заступления, наипаче о всех в честной твоей обители благочествно подвизающихся. Сего ради вопием тебе сице:
Радуйся, яко крепкое дерзновение имаши пред Господом;
радуйся, яко обитель твоя великаго предстателя пред Богом тя стяжа.
Радуйся, стране нашей стено крепкая и утверждение;
радуйся, обители твоея покрове державный и ограждение.
Радуйся, яко вси притекающии к тебе утешаются и радуются;
радуйся, яко вси молящиися тебе от печалей свобождаются и веселятся.
Радуйся, помощниче благодатный всем труждающимся;
радуйся, заступниче благонадежный всем люте страждущим.
Радуйся, страже неусыпный, стрегий нас от всех враг видимых и невидимых;
радуйся, хранителю наш, соблюдаяй нас от всех козней вражиих.
Радуйся, пастырю наш, стадо твое добре упасый;
радуйся, путеводителю наш, всех ко Христу приводяй.
Радуйся, отче наш Антоние, Черноезерский чудотворче.

Кондак 10
Спасти хотя благочестно живущия в мире люди и видев, яко многия девы о едином на потребу, како угодити Господу, не обретают места во еже собратися вкупе вдали от соблазнов житейских уневестити себе Небесному Жениху Христу, ты, преподобне отче наш Антоние, возстановил еси в пустыне сей обитель твою и призвал еси лицы дев, да обретут в ней тихое и небурное пристанище к провождению чистаго и непорочнаго жития, идеже укрепленнии тобою в подвизех поста, молитвы и труда будут выну хранити святую раку твою и воспевати Богу ангельскую песнь: Аллилуиа.

Икос 10
Стена необоримая и прибежище спасительное буди всем во обители твоей, отче наш Антоние, к раке мощей твоих молитвенно прибегающим и просящим твоего заступления в годину бед и напастей. Буди стена крепкая и покров надежный, ограждая нас от всяких злоключений и козней вражиих, вопиющих тебе сице:
Радуйся, яко сохранил еси честную раку на месте погребения святых мощей твоих;
радуйся, яко мощи твоя от лицезрения сокрыл еси.
Радуйся, яко мощи твоя исцеляют от всякия скорби и болезни;
радуйся, яко в печали сущим мощи твоя приносят утешение.
Радуйся, яко обитель твою запустению до конца не предал еси;
радуйся, яко во время благопотребно паки ю возставил еси.
Радуйся, малый храм Рождества Пречистыя Богородицы на месте погребения твоего сохранивый;
радуйся, в священной церкви твоей духом твоим выну с нами невидимо пребываяй.
Радуйся, открывый в пустыне твоей свет незримый всем ищущим света;
радуйся, привлекаяй в пустынь твою всех чающих спасения.
Радуйся, яко продолжаеши устрояти и украшати обитель святую твою;
радуйся, яко собираеши в ней стадо иноков прославляти неусыпно Страшное и Святое Имя Господне.
Радуйся, отче наш Антоние, Черноезерский чудотворче.

Кондак 11
Пение похвальное у раки мощей твоих совершающе, отче наш Антоние, представляем тя, яко жива суща на молитве с нами стояща, ленивыя возбуждая, бодрыя и трезвящияся духовно утешая свыше. Ты — наш Ангеле-Хранителю, всегда сый с нами присно назираяй души наша со всеми страстьми и похотьми, да проникаяся духом любве твоея, представиши ны Владыке Христу не имущих скверны или порока, но да будем чисти и непорочни, и да чистыми устами вопием с тобою Богу: Аллилуиа.

Икос 11
Светозарное светило был еси стране нашей и обители твоей, преподобне отче наш Антоние, и всем нам среди облежащия нас тьмы века сего блуждающим, да ходим во свете, яко чада света, не приобщаяся к делом неплодным тьмы. И тако свято водими тобою, с радостию оставим вся суетныя утехи мира сего и якоже Божественный Павел, вменим вся сия во уметы, да Христа приобрящем, нашу Сладчайшую Радость паче всех радостей имея и обрящемся в Нем и уподобимся купцу, ищущему добраго бисера Христова, иже обрет его и радостно продаде вся елика имяше. Сего ради вся с любовию зовем тебе:
Радуйся, незримою стопою чрез лесныя дебри и езера к нам шествуяй;
радуйся, недреманым оком твоим присно назираяй души наша.
Радуйся, отверстым сердцем вмещаяй всех в любовь свою, да не тесно нам будет в тебе;
радуйся, чистыма рукама твоима привлекаяй к себе нас всех по духу чад твоих.
Радуйся, блаженною душею своею с нами присно пребываяй;
радуйся, духом своим никогдаже отлучаяйся от врученнаго тебе стада твоего.
Радуйся, кадило благовонное, молитвы наши к Богу возносящее;
радуйся, зерцало кристаловидное, лучи любве Божия нам отображающее.
Радуйся, светильниче на свещнице небеснем, нас ко Христу путеводящий;
радуйся, венче воздержания и чистоты, знамение победы над плотию и миром нам являющее.
Радуйся, чаше райскаго блаженства, нас увеселяющая;
радуйся, хлебе небеснаго нетления, нас от духовного глада избавляяй.
Радуйся, отче наш Антоние, Черноезерский чудотворче.

Кондак 12
Благодать Божию с небеси ниспосли нам окрест твоея святыя раки предстоящим и во обители твоей живущим, отче наш Антоние, да осеняемии твоим предстательством, получим незримо благословение твое и будем крепко блюсти, яко завещание от тебе самое преподанное, да вси пустыннаго жития сего уставы хранити будем с радостию и любовию, а не воздыхающе, в трудех и подвизех не прельщаяся никоими же утехами и соблазны мира сего, к гибели души ведущими, наипаче же непрестанно имети будем в сердцах и устнех своих сладчайшее Имя Господа Иисуса, Емуже купно с тобою присно в утешении и в скорби взывати будем: Аллилуиа.

Икос 12
Поюще святую память твою и прославляюще труды и подвиги равноангельнаго жития твоего, отче наш Антоние, молим ся ти, храни обитель, тобою устроенную, яко зеницу ока, да вси живущия в ней причнутся к лику мудрых дев и получат неувядаемыя венцы чистоты, да ни единая же от них преткнется в искушении и не впадет в соблазн, и да не оставит честную ограду твою. Утверди и украсИ храмы на месте подвигов твоих сооруженныя, да хвалится Имя Божие в них до скончания века и возносятся молитвы наши о спасении всего мира в годины скорби и отступления. Мы же чада твоя простирая молебныя руки к святей раце твоей, тепле от души взываем ти:
Радуйся, отче наш любвеобильный, собери яко кокош от мира чада твоя;
радуйся, пастырь наш предобрый, упаси овча стада твоего, да не единая из них погибнет.
Радуйся, старче духоносный и благодатный, научи нас послушанию и отсечению воли своея;
радуйся, молитвенниче пламенный и неусыпающий, научи нас молитися и плакатися о гресей своих.
Радуйся, невестоводителю Христов, сохрани нас в девстве, целомудрии и чистоте;
радуйся, проповедниче любви Божия, соблюди нас в любве Его.
Радуйся, Ангеле Хранителю обители твоея, огради ю от соблазнов мира сего;
радуйся, воине Царя Небеснаго, пошли нам победу противу плоти, мира и дивола.
Радуйся, безмездный врачу, исцели наша болезни душевныя и телесныя;
радуйся, учителю Евангельской Правды, согрей словом Божиим храдныя души наша.
Радуйся, рабе Божий благий и верный, посли нам силу и здравие трудитися на пользу обители твоея;
радуйся, таинниче Божественныя благодати, даждь нам зрети и ощущати сладость и красоту служения церковнаго.
Радуйся, отче наш Антоние, черноезерский чудотворче.

Кондак 13
В великий и пречудный иноков и инокинь наставниче, преподобне и богоносне отче наш Антоние! Приими от нас, слабых духом и обремененных грехи многими убогое сие обаче от всея души возносимое тебе пение наше и сохрани Церковь Православную и святую обитель твою от враг видимых и невидимых, избави нас от всякия болезни душевныя и телесныя и от всякия непосильныя скорби, лютаго уныния и от наветов и козней злых человек, да вси благодарственно со умилением вопием с тобою дивному во святых Богу: Аллилуиа.
Сей кондак читается трижды и паки икос 1-й «Ангел земный…» и кондак 1-й «Избранный чудотворче…».

24 августа 1920 г.
БОГОРОДИЦКАЯ ЧЕРНОЕЗЕРСКАЯ АНТОНИЕВА МУЖСКАЯ ПУСТЫНЬ

Взято с http://alexandrtrofimov.ru