Акафист святому преподобному Антонию, игумену Дымскому, чудотворцу

Кондак 1
Избраннаго воина Христа Бога нашего преподобнаго Антониа песнми почтим, яко победителя мирских соблазнов и плотских похотей и ухищрений диавольских, во стране нашей дивно явльшагося, зовуще ему: Радуйся, Антоние, подвижниче Христов всечестне.

Икос 1
Ангел нравом явился еси, преподобне отче Антоние, во днех жития своего на земли: темже ныне блаженствуеши на небесех с лики ангельскими, от бренных же уст наших премлеши песнь хвалебную:
Радуйся, ангелов ревностный подражателю.
Радуйся, ангельский достойно носивый образ.
Радуйся, ангелов сомолитвенниче неусыпаемый.
Радуйся, со ангелы непрестанно Господа славословивый.
Радуйся, ангельский нрав стяжавый.
Радуйся, на земли ангельски поживый.
Радуйся, чистотою ангельскою облекийся.
Радуйся, ангельскую кротость ко всем показавый.
Радуйся, ангелов собеседниче.
Радуйся, монахов наставниче ангельскаго жития.
Радуйся, гражданине небесный.
Радуйся, Антоние, подвижниче Христов всечестне.

Кондак 2
Видяще дивное житие твое сожившии тебе братия прославляху о тебе Господа, и мы, слышаще подвиги твоя, видяще же чудеса, имиже прослави Бог нетленно тело твое, воспеваем дивному во святых Богови: Аллилуиа.

Икос 2
Разум вещей божественных стяжал еси труды многими, преподобне отче Антоние, в сладость души твоея и во спасение вечное твоего стада, с нимже вопием ти:
Радуйся, воине Христов, многи труды подъявый.
Радуйся, в подвизе тяжцем потрудивыйся.
Радуйся, в бдении и посте искусивыйся.
Радуйся, в подвизе молитвы преуспевый.
Радуйся, труды рук своих тело укрепивый на служение Богу.
Радуйся, нозе свои освятивый путешествием долгим по спасительному послушанию.
Радуйся, главе твоей подвигом венец славы исходатайствовавый.
Радуйся, очи свои к лицезрению Божию слезами чистыми омывый.
Радуйся, душу твою страхом Божиим украсивый.
Радуйся, ум твой в небесная вперивый.
Радуйся, сердце твое от всякаго злаго помышления очистивый.
Радуйся, Антоние, подвижниче Христов всечестне.

Кондак 3
Силою благодати Божия облекаемь, терпеливо подъял еси благое иго Христово и очистив себе в сосуд Божий благоизбранен, неуклонно взирал еси к обителем небесным и горняя мудрствовал еси, вопия в веселии сердца Богу: Аллилуиа.

Икос 3
Имея неусыпное попечение о спасении ввереннаго тебе от Бога стада, преподобне отче Антоние, непрестанно учил еси е пути спасительному, подавая собою пример благочестия; сего ради вопием ти:
Радуйся, вместилище добродетелей, путь спасения многим показавый.
Радуйся, святыни жилище, многи ко Господу приведый.
Радуйся, мечу Божий грехи посекий, погубляющыя душы.
Радуйся, светилниче, путь правый стаду твоему предуказавый.
Радуйся, кормчию, многи к пристанищу вечнаго блаженства управивый.
Радуйся, споборниче благодати Божия, многи из уст адовых исхитивый.
Радуйся, наставниче монахов, спасительным добродетелем их научивый.
Радуйся, незлобию их наставивый.
Радуйся, воздержания учителю.
Радуйся, незлобия наставниче.
Радуйся, смирения показавый образ.
Радуйся, Антоние, подвижниче Христов всечестне.

Кондак 4
Буря помышлений лукавых не смути тебе, преподобне Антоние, волны мирских соблазнов не поколебаша храмины твоея, противу же козней диавольских устоял еси, утвержден на незыблемом камени, всегда поя в сердцы твоем Богу: Аллилуиа.

Икос 4
Слышавше иноцы обители преподобнаго Варлаама внезапное изшествие твое, преподобне отче, зело печалию объяти быша, но и их ради любве не оставил еси твоего намерения, образ ревности Божия и пустыннолюбия во спасение всем показуя: темже вопием ти:
Радуйся, ревнителю жития богоугоднаго.
Радуйся, истинный поклонниче Господень, вся ради Христа тщету вменивый.
Радуйся, верный служителю Господа всяческих, Ему Единому послуживый.
Радуйся, блаженнейший последователю Господа Иисуса, Его Единаго возлюбивый.
Радуйся, пустынных жителю, пустыню паче всего предъизбравый.
Радуйся, блаженство пустынножития уразумевый.
Радуйся, яко в пустыни весь разум твой к Единому Богу вперил еси.
Радуйся, яко навыкл еси богоприятной молитве, непрестанно в ней Богу собеседовав.
Радуйся, пустыни украшение доброе.
Радуйся, древних пустынников верный подражателю.
Радуйся, истиннаго духа пустынножительства наставниче всем.
Радуйся, Антоние, подвижниче Христов всечестне.

Кондак 5
Боготечная звезда явился еси преподобне отче, протекши путь жития твоего, приведший тя к Богу, Егоже заповедем верно последовал еси, руководя купно с собою стадо твое к обителем небесным, идеже песнь воспеваеши Богу: Аллилуиа.

Икос 5
Видевше тя отходяща в путь дальний по послушанию старчу, собрати твои тебе дивляхуся: мы же воспоминающе твое послушание, благословением Божиим осененное, воспеваем ти:
Радуйся, истинный трудниче Божий, вся обеты твоя всецело совершивый.
Радуйся, совершенства подвижническаго достигнувый благодатию Божиею.
Радуйся, волю свою смиривый до конца.
Радуйся, в истинную свободу чад Божиих послушанием твоим предъуспевый.
Радуйся, совершенную власть над помыслы своими стяжавый.
Радуйся, всякое сомнение от души твоея отгнавый.
Радуйся, ради послушания Божия труда великаго не устрашивыйся.
Радуйся, радостно в путь твой дальний потекий.
Радуйся, терпение твое до конца соблюдый.
Радуйся, вся скорби долгаго путешествия благодушно подъявый.
Радуйся, послушниче истинный, волю настоятеля своего верно совершивый.
Радуйся, Антоние, подвижниче Христов всечестне.

Кондак 6
Проповедник явился еси добродетелей жития христианскаго, благоподражательным примером твоим, во еже всем ведущым Бога и подвизающымся во всем житии, достойно возсылати Ему честь и хвалу: Аллилуиа.

Икос 6
Возсия в души твоей свет истиннаго боговедения, озаряя душы твоих, преподобне отче, почитателей и возбуждая пети тебе:
Радуйся, Единаго Истиннаго Бога верный поклонниче.
Радуйся, Троицы Безначалныя почитателю.
Радуйся, Отца нашего, Иже на небесех, в житии твоем прославивый.
Радуйся, Единороднаго Сына Божия, нас ради воплощеннаго, верно исповедавый.
Радуйся, Святому Духу верно покланявыйся.
Радуйся, к истинной Лозе прилепивыйся верою.
Радуйся, божественнаго смирения и терпения подражателю.
Радуйся, язв и болезней Искупителевых причастниче.
Радуйся, крестнаго подвига Христова последователю.
Радуйся, обитель дарований благодати Духа Святаго явивыйся.
Радуйся, живый храм Духа Божия бывый.
Радуйся, Антоние, подвижниче Христов всечестне.

Кондак 7
Хотя принести себе жертву живу, святу, благоугодну Господеви, всего себе закону Божию повинул еси и от всякия скверны плоти и духа постом и молитвою очистил еси, от чистых устен и сердца воспевая Богу: Аллилуиа.

Икос 7
Новаго, достойне древних подвизавшагося, подражателя видим тя преподобне отче, Пречистыя Девы: темже, чтя подвиг девства твоего, воспеваем ти:
Радуйся, Пренепорочныя Девы последователю.
Радуйся, подвижниче совершеннаго целомудрия.
Радуйся, друже Христов, Ему единому прилепивыйся.
Радуйся, подобниче Павлу, чистоту души и тела паче всего возлюбивый.
Радуйся, от юности победивый страсти.
Радуйся, неосквернены прочее соблюдый чувства душевная же и телесная.
Радуйся, во плоти яко безплотный поживый.
Радуйся, плоть твою смиривый.
Радуйся, трудом богомыслия непрестающаго уцеломудривый душу.
Радуйся, телесным изнурением обуздавый вожделения.
Радуйся, сотрудниче и сонаследниче возлюбленнаго ученика Христова.
Радуйся, Антоние, подвижниче Христов всечестне.

Кондак 8
Странное неверующым трудническое житие твое, преподобне Антоние, чудно является во очию нашею: зрим бо в тебе истиннаго раба страдавшаго Владыки твари, Емуже с тобою вопием: Аллилуиа.

Икос 8
Всего себе предав Богу, всякое попечение житейское отложил еси в житии твоем, преподобне отче Антоние: темже Господь, на Негоже всю печаль свою возвергл еси, препита тя, мы же нищету твою чтуще, зовем ти:
Радуйся, нищеты спасительныя ревнителю.
Радуйся, нестяжания образе.
Радуйся, человече Божий, ради любве Божия всякое земное пристрастие отсекнувый.
Радуйся, обители мудрости христианския, тщету благ мирских рано уразумевый.
Радуйся, подвижниче истинный, всякаго любовещнаго желания уклонивыйся.
Радуйся, от лести богатства ограждей себе нищетою вольною.
Радуйся, от благ мирских ни единым же насаждейся в житии твоем.
Радуйся, вместо земных сокровищ нищетою собравый себе на небеси вечное сокровище.
Радуйся, и в богатстве добрых дел соблюдый себе нища духом.
Радуйся, нищеты Христовы подражателю.
Радуйся, нищеты Предтечевой и Павловой и Антониевой соучастниче.
Радуйся, Антоние, подвижниче Христов всечестне.

Кондак 9
Всеми добродетельми иноческими украсился еси, преподобне отче Антоние, усердно послужив в житии Христу Богу, Емуже ныне с лики небесными радостно вопием: Аллилуиа.

Икос 9
Ветия богомудрый явился еси, преподобне отче Антоние, не словесы красноглаголивыми, но беседою кроткою, паче же своим преподобным житием поучил еси стадо твое житию постинческому, темже вопием ти:
Радуйся, подвижниче Божий, постничество возлюбивый.
Радуйся, от юности труд жития постническаго подъемый.
Радуйся, в постничестве всегда твердо подвизавыйся.
Радуйся, Предтечеву постничеству истинно поревновавый.
Радуйся, всякую земную сладость ради небесных презревый.
Радуйся, истинным воздержанием плоть к служению духу приучивый.
Радуйся, духовным воздержанием обуздавый своевольная чувства.
Радуйся, постоянным бодрствованием смиривый воображение.
Радуйся, всегдашним попечением ослабивый кичения разума.
Радуйся, поучением в заповедех Господних в Господе утвердивый весь свой помысл.
Радуйся, спасительнаго постничества верный тружниче и наставниче.
Радуйся, Антоние, подвижниче Христов всечестне.

Кондак 10
Спасти хотя душу твою, презрел еси суетное попечение о плотстем покои, но умерщвляя тело свое и порабощая, духом выну работал еси Господеви, в молитве не изнемогая и всегда вопия Ему: Аллилуиа.

Икос 10
Стена был еси крепкая стаду твоему, еже упасл еси, богомудре, преподобне отче Антоние; темже воспеваем ти, глаголюще:
Радуйся, угодниче Божий, к себе и своему стаду привлекий благодать Божию.
Радуйся, молитвенниче теплый к Богу.
Радуйся, смирения учителю.
Радуйся, самоотвержения наставниче.
Радуйся, бдения и молитвы образе.
Радуйся, воине Христов, к миру и духовом поднебесным брань благоуспешно совершивый и других наставивый.
Радуйся, смиренномудрия обителе.
Радуйся, незлобия жилище.
Радуйся, мудрости христианския вместилище.
Радуйся, кротости пастырския правило.
Радуйся, верный слуго Божий, ревностию Божиею распаливыйся.
Радуйся, Антоние, подвижниче Христов всечестне.

Кондак 11
Пение неумолкаемое приносил еси Троице в земнем житии твоем, темже сподобился еси по успении твоем счислитися лику ангельскому, выну вопиющему Богу: Аллилуиа.

Икос 11
Светозарно житие твое, преподобне отче, блаженно успение и светла память твоя, юже ублажающе, вопием ти:
Рaдуйся, во всeм житии твоeм Бога прослaвивый.

Радуйся, подвигом добрым славу вечную себе исходатайствовавый.
Радуйся, со Апостолом смерть себе приобретение вменивый.
Радуйся, ради Христа по вся дни умиравый.
Радуйся, кончину мирную молитвами себе испросивый.
Радуйся, к преселению в обители небесныя всецело себе уготовивый.
Радуйся, и успением твоим мирным Бога прославивый.
Радуйся, до конца верно претерпевый и конец достоин получивый.
Радуйся, вечную память себе стяжавый.
Радуйся, на небеси прославляемый.
Радуйся, на земли достойно ублажаемый.
Радуйся, Антоние, подвижниче Христов всечестне.

Кондак 12
Благодать дадеся тебе, преподобне отче, недуги исцеляти и от скорбей свобождати: темже ублажающе память твою, вопием Богу: Аллилуиа.

Икос 12
Поюще твоя чудеса, ублажаем память твою, преподобне отче Антоние, воспевающе ти:
Радуйся, яко Богу совершенно угодил еси.
Радуйся, яко венец безсмертия и нетления стяжал еси.
Радуйся, наслаждения райския жизни сподобивыйся.
Радуйся, сонаследниче Христов по Апостолу, светлых обителей в дому Отца Небеснаго достигнувый.
Радуйся, дарование чудес приемый.
Радуйся, верных заступник верный явивыйся.
Радуйся, больных целителю.
Радуйся, скорбных утешителю.
Радуйся, немощных помощниче.
Радуйся, страждущих защитниче.
Радуйся, о всех нас ходатаю теплый.
Радуйся, Антоние, подвижниче Христов всечестне.

Кондак 13
О великий чудотворче, подвижниче Христов всечестне, преподобне отче Антоние, приими убогое пение от нас недостойных, чтущих память твою, и избави нас молитвами твоими от бед настоящих, паче же от вечныя смерти, да достигнув обителей небесных и мы с тобою и всеми святыми воспевати будем Богу вечно: Аллилуиа.
Кондак сей глаголи трижды, таже икос 1-й и кондак 1-й.

Молитва
О пастырю добрый, наставниче наш и святыя сея обители Дымския начальниче, преподобне отче Антоние! Яко имеяй дерзновение ко Владыце Христу и ко Пречистей Его Матери, буди о нас недостойных, во святей твоей обители живущих и о всех с верю к раце мощей твоих отвсюду притекающих молитвенник теплый, заступая нас от всяких бед и напастей, да твоими молитвами невредими от враг видимых и невидимых пребудем. Моли милосердие Божие, да спасет нас от прегрешений наших, Имиже весть судьбами. Моли благость Его, Еже милостивно обители сей и всему миру потребная подавати. Молися Дающему всем, яко страждущую страну Российскую от лютых безбожник и власти их да свободит, и да возставит престол православных царей: верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш. И моли всякому верному в доме и на пути и повсюду дни благи и безмятежны даровати: жизнь нашу умирити; и вся люди помиловати, якоже зде предстоящыя, тако и благословною виною отшедыя отцы и братию нашу, и спасти душы нашя, да непрестанно славим, хвалим, поем и величаем пречестное и великолепое имя Отца и Сына и Святаго Духа, ныне и присно, и во веки веков. Аминь.

Источник: http://akafistnik.narod.ru/rus.htm#А
"Акафисты русским святым", 
издательство "Титул", 1995 г.