Кондак 1
Взбранной воеводе победительная, яко избавльшеся от бед, благодарьственая всписую ти раб твой Богородице. Но яко имущи державу непобедимую, от всех мя бед свободи, да зову Ти:
радуйся, Невесто Неневестная.

Икос 1
Ангел предстатель с небесе послан бысть речи Богородици радуйся, и с бесплотным гласом воплощьшася зря Господи, ужасашеся и стояше зовый к Ней таковая:
радуйся, Еяже ради радость восияет;
радуйся, Еяже ради клятва ищезнет;
радуйся, падшаго Адама возвание;
радуйся, слез Евжин избавление;
радуйся, высото неудобь всходима человеческим помыслом;
радуйся, глубино неудобь зримая и ангельскима очима;
радуйся, яко еси царево седалище;
радуйся, яко носиши носящаго вся;
радуйся, звездо являющи солнце;
радуйся, утробо божественаго воплощенья;
радуйся, Еяже ради обнавляется тварь;
радуйся, Еяже ради покланяемся Творцю;
радуйся, Невесто Неневестная.

Кондак 2
Видящи Святая Себе в чистоте, рече Гаврилу дерзостне, преславное ти гласа неудобь приятно души Моей является, бесеменнаго бо зачатия рождества предглаголаши зовый: Аллилуия.

Икос 2
Разум неразумен разумевати Дева ищющи возпи к служащему из боку чисту Сына како есть родити мощна рци ми. К Ней же он рече с страхом обаче зовый сице:
радуйся, молчаньем молящихся верою;
радуйся, чюдес христовых начале;
радуйся, повеленьем Его глава;
радуйся, лествице небесная по нейже сниде Бог;
радуйся, мосте преводяй от земля на небо;
радуйся, ангелом многословущее чюдо;
радуйся, бесом многоплачевный струпе;
радуйся, яже свет неизреченно рождши;
радуйся, еже како ни единого научивши;
радуйся, премудрых преходящи разум;
радуйся, верных озаряющи смыслы;
радуйся, Невесто Неневестная.
(11 хейретизмов)

Кондак 3
Сила вышняго осени тогда к зачатию неискусобрачне и благоплодовита Тоя ложесна, яко село показа сладко, всем хотящим жати спасенье, внегда пети сице: Аллилуия.

Икос 3
Имущи благоприятну Дева утробу встече к Иелисавефи, младенець же оноя абие познав сея целование радовашеся, и играньми яко песнми вопияше к Богородици:
радуйся, отрасли неувядаемыя лозо;
радуйся, плода нетленнаго стяжанье;
радуйся, делателя делающи человеколюбца;
радуйся, садителя жизни нашей рожши;
радуйся, браздо растящия гобзованье щедрот;
радуйся, трапеза носящия обилье оцещения;
радуйся, яко рай пищный процветаеши;
радуйся, яко пристанище душам готовиши;
радуйся, приятное молитвы кадило;
радуйся, всего мира оцещенье;
радуйся, Божье к мертым благоволенье;
радуйся, мертвых к Богу дерзновенье;
радуйся, Невесто Неневестная.

Кондак 4
Бурю внутрь имея помышлений неверных, целомудреный Иосиф смутися к небрачней Тобе зря и бракоокрадованну помышляше непорочная. Уведев же Твое зачатье от Духа Свята рече: Аллилуия.

Икос 4
Слышаша пастуси ангелом поющим еже в плоти Христово пришествие и текше яко к пастырю, видевше Его яко агньца непорочна в чреве Марьине пасшася, Ейже поюще реша:
радуйся, агньца и пастыря Мати;
радуйся, дворе словесных овець;
радуйся, невидимых зверей мученье;
радуйся, дверий райских отверзенье;
радуйся, яко небесная радуются земльными;
радуйся, земльная ликуют с небесными;
радуйся, апостолов немолчьная уста;
радуйся, страстотерпцем непобедимая дерзость;
радуйся, твердое вере основанье;
радуйся, светлое благодати познанье;
радуйся, еюже ради облекохомся славою;
радуйся, Невесто Неневестная.
(11 хейретизмов)

Кондак 5
Богочную звезду видевше волсви сея последоваша зари и яко светилника держащею тою пытаху крепкаго царя, и достигше непостижимаго радовахуся Ему поюще: Аллилуия.

Икос 5
Видеша отроци халдейстии на руку девичу создавшаго рукама человека, и владыку разумеюще Его, аще и рабий прият зрак потщашася дарми угодити и впити благословеней:
радуйся, звезды незаходящея мати;
радуйся, заре таинаго дне;
радуйся, прелестную пещь угасивши;
радуйся, Троице ученики просвещающи;
радуйся, мучителя безчеловечнаго изгоняющи от начальства;
радуйся, Господа человеколюбца приимши Христа;
радуйся, варварьска избавляющи служенья;
радуйся, скверньных избавляющи дел;
радуйся, огня покланянье уставльши;
радуйся, пламене страстий изменяющи;
радуйся, верным наставнице целомудрия;
радуйся, всех родов веселие;
радуйся, Невесто Неневестная.

Кондак 6
Проповедници богоносни бывше волсви, взвратишася в ввавилон, скончавше Ти пророчьство и проповедавше Тя Христа всех, оставльше Ирода яко блядива неведяща пети: Аллилуия.

Икос 6 Восия в Егупте просвещенье благочестья, отгнал еси лжи тму, идоли бо его Спасе не терпящи Твоея крепости падоша, от них же избавльшеся ныне вопияху к Богородици:
радуйся, исправленье человекам;
радуйся, паденье бесом;
радуйся, Яже прелсти державу поправши;
радуйся, идольскую лесть обличивши;
радуйся, море потопивши фараона мысленаго;
радуйся, камене напоивший жажущая жизни;
радуйся, огньный столпе наставляя сущих во тме;
радуйся, покрове миру ширший облака;
радуйся, пище манне приятилище;
радуйся, пище святыя служителю;
радуйся, земле обетованая;
радуйся, из неяже течет мед и млеко;
радуйся, Невесто Неневестная.

Кондак 7
Хотящю Симеону от нынешняго века преставитися от прелестнаго, вдался еси яко младенець тому, но познался еси ему и Бог свершен, темже убо удивися Твоей низреченней премудрости, зовый: Аллилуия.

Икос 7
Новую показа тварь явлься Творець нам еже от Него бывшем, от бесеменныя прозяб утробы и съхрань сию якоже бе нетленна, да чюдо видяще вспоим ю вопьюще:
радуйся, цвете нетленья;
радуйся, венче вздержанья;
радуйся, воскресенья образ восиявши;
радуйся, ангелское житие являющи;
радуйся, древо благоплодно от него же питаются вернии;
радуйся, древо благосеннолиствено, под ним же покрываются мнози;
радуйся, плодоносящи наставника заблуждшим;
радуйся, порождшия избавителя плененным;
радуйся, судии праведнаго умоленье;
радуйся, многим согрешеньем прощенье;
радуйся, одеже нагим дерзновенья;
радуйся, любы всякое желанье побежающи;
радуйся, Невесто Неневестная.

Кондак 8
Странно рождество видевше устранимся мира, ум на небо преложивше, сего бо ради высокый и на земли явися смерен человек, хотя привлещи к высоте вопьющих Ему: Аллилуия.

Икос 8
Весь бе в нижних и вывших, никакоже отступль неописанное слово, схоженье бо божествено не преложенье бо местно бысть и рождество от Девы богоприятны, слышаще сия:
радуйся, Бога невместимаго вместилище;
радуйся, честнаго таиньства двери;
радуйся, верным известная похвало;
радуйся, верных верно слышанье;
радуйся, колеснице пресвятая сущаго на херовимех;
радуйся, селенье преславно сущаго на серафимех;
радуйся, противныя в тоже собравши;
радуйся, Яже девство и рождество сочетавши;
радуйся, Еяже ради разрешися преступленье;
радуйся, Еяже ради отверзеся рай;
радуйся, ключе Христова царства;
радуйся, надеже вечных благ;
радуйся, Невесто Неневестная.

Кондак 9
Всяко естьство ангелско удивися великому Твоему вчеловеченья делу, неприступнаго бо яко Бога зряху всем приступна человека с нами убо пребывающа и слышаща от всех: Аллилуия.

Икос 9
Ветия многовещанны, яко рыбы безгласны видим о Тебе Богородице, недоумеют бо глаголати, како Девою пребываещи и родити взможе. Мы же таиньству дивящеся верно вопьем:
радуйся, премудрости Божия приятилище;
радуйся, промышленьем Его скровище;
радуйся, философи немудры являющи;
радуйся, хитрословесники бесловесны обличивши;
радуйся, яко обуяша лютии взискателе;
радуйся, яко увядоша баснотворци;
радуйся, афинейския пленица растерзавши;
радуйся, рыбарьския мрежа исполняющи;
радуйся, из глубины неведенья вьзвлачающи;
радуйся, многих в разуме оболщьши;
радуйся, кораблю хотящим спастися;
радуйся, пристанище житийских плаваний;
радуйся, Невесто Неневестная.

Кондак 10
Спасти хотя мир всех украситель к сему самообещанно приде и пастырь сый яко Бог нас ради явися по нам овча, подобному бо подобное призвав яко Бог слышит: Аллилуия.

Икос 10
Стена еси девам Богородице Дево, и всем к Тобе прибегающим, ибо небу и земли Творець устрои Тя пречистая, вселися в утробу Твою и всех приглашати научив:
радуйся, столпе девьства;
радуйся, двери спасенья;
радуйся, началнице разумнаго созданья;
радуйся, дателю божественыя благостыня;
радуйся, Ты бо обновила еси зачатых студно;
радуйся, Ты бо наказала еси окраденыя умом;
радуйся, губителя смылом упразднивши;
радуйся, сеятеля чистоты рождши;
радуйся, чертоже бесеменнаго невестителя;
радуйся, верныя Господеви сочетавши;
радуйся, добрая младопитателница девам;
радуйся, душам чертоже святых;
радуйся, Невесто Неневестная.

Кондак 11
Пение всяко побежается прострети тщащися к множеству многих щедрот Твоих, равночислены бо псалмы и песни аще приносим Ти царю святый, ничтоже творим достойно, ихже дал еси Тобе вопьющим: Аллилуия.

Икос 11
Светоприимну свещю сущим во тме явльшюся видим святую Деву, невещественый бо вжегши огнь, наставляет к разуму божественому всех, зарею ум просвещающи, званьем же почитаему сим:
радуйся, заре мысленаго солнца;
радуйся, сиянье незаходимаго света;
радуйся, молонье душа просвещающи;
радуйся, яко гром врагы устрашающи;
радуйся, яко многоветлое восияеши просвещенье;
радуйся, яко много текущюю истачаеши реку;
радуйся, купели живописующи образ;
радуйся, греха отъемлющи скверну;
радуйся, бане омывающи свесть;
радуйся, чаше чреплющия радость;
радуйся, воне Христова благоуханья;
радуйся, жизни таиныя благое наслажденье;
радуйся, Невесто Неневестная.

Кондак 12
Благодать дати всхотев долгом древним всех долгом разрешитель человеком прииде собою к отшедшим того благодати и раздрав рукописанье, слышит от всех: Аллилуия.

Икос 12
Поюще Твое рождество всхваляем Тя вси яко одушевленную церковь Богородице, в Твою бо вселися утробу сдержай вся рукою Господь. Освяти и прослави, научи впити Тобе всех:
радуйся, селенье Бога и Слова;
радуйся, святая святых болши;
радуйся, ковчеже позлащеный Духом;
радуйся, скровище животу неистъщимое;
радуйся, честный венче царем благочестивым;
радуйся, похвало честная иереем благоговейным;
радуйся, церкви непоколеблемый столпе;
радуйся, царствия нерушимая стено;
радуйся, Еяже ради встают победы;
радуйся, Еяже ради врази падают;
радуйся, света моего служителю;
радуйся, души моей спасенье;
радуйся, Невесто Неневестная.

Кондак 13
О всепетая Мати, рожьшия всех святых пресвятое Слово. Приимши нынешняя приношенья от всякоя избави скорби всех, и будущая изми муки, Тобе вопьющих: Аллилуия.

Для удобочитаемости в текст вставлены пробелы, поставлены дополнительные знаки препинания и некоторые буквы изменены на заглавные