Акафист Пресвятой Богородице 16 века Акафист Пресвятой Богородице
Взято из Постной Триоди 16 в. собрания рукописных книг Синодальной библиотеки (л.340-350)
НИОР РГБ, ф. 272

Кондак 1
Возбранной воеводе победителная, яко избавльшеся от злых, благодарственая восписуем ти раби твои Богородице, но яко имущи державу непобедимую, от всякых мя бед свободи, да зовем ти:
радуйся, Невесто Неневестная.

Икос 1
Ангел предстатель с небесе послан бысть рещи Богородицы радуйся, и со бесплотным гласом воплощаема зря Господи, ужасашеся и стояше, зовый к Ней таковая:
радуйся, Еяже ради радость восияет;
радуйся, Ееже ради клятва изчезнет;
радуйся, падшаго Адама возвание;
радуйся, слез Евжин избавление;
радуйся, высото неудобь восходима человеческым помыслом;
радуйся, глубино неудобь зрима ангельскима очима;
радуйся, яко еси царево седалище;
радуйся, яко носиши носящаго вся;
радуйся, звездо являющи солнце;
радуйся, утробо Божественаго воплощения;
радуйся, Еяже ради обнавляется тварь;
радуйся, Еяже ради покланяемся Творцу;
радуйся, Невесто Неневестная.

Кондак 2
Видящи Святая себе в чистоте, рече Гавриилу дерзостне, преславное ти гласа, неудобь приятно души Моей является, безсеменная бо зачатия, рожество предглаголеши зовый: Аллилуия.

Икос 2
Разум нерузумен Дева я разумети ищущи, возопи к служащему из боку чисту Сыну како есть родити мощно рци Ми. К нейже он рече со страхом, обаче зовый сице:
радуйся, света неизреченнаго таино;
радуйся, молчяние молящихся верно;
радуйся, чюдес Христове начяло;
радуйся, повелением Его главо;
радуйся, лествице небесная по нейже Бог сниде;
радуйся, мосте преводяй от земли на небо;
радуйся, ангелом многословящее чюдо;
радуйся, бесом многоплачевный струпе;
радуйся, иже свет неизреченный рожьдши;
радуйся, иже како ниединого научивши;
радуйся, премудрых преходящи разум;
радуйся, верных озаряющи смысл;
радуйся, Невесто Неневестная.

Кондак 3
Сила Вышяго осени тогда к зачятию неискусобрачне и благоплодная Тоя ложесна, яко село показа сладко, всем хотящи жати спасение, внегда пети сице: Аллилуия.

Икос 3
Имущи богоприятну Девая утробу, востече к Елисавефи, младенець же оноя абие познав целование, радовашеся, и игранми яко песньми вопияше к Богородици:
радуйся, отрасли неувядаемя лозо;
радуйся, плода нетленнаго стяжание;
радуйся, делателя делающи Человеколюбца;
радуйся, садителя жизни нашея порождьши;
радуйся, браздо растящия гобзования щедрот;
радуйся, трапезо носящия обилие оцыщения;
радуйся, яко раи пищный процветаеши;
радуйся, яко пристанище душам готовиши;
радуйся, приятное молитвы кадило;
радуйся, всего мира оцыщение;
радуйся, Божие к мертвым благоволение;
радуйся, смертных к Богу дерзновение;
радуйся, Невесто Неневестная.

Кондак 4
Буру внутрь имея помышлений неверных целомудреный Иосиф смутися, к небрачней Тебе зря, и браку окрадованну помышляше непорочная, уведеже Твое зачятие от Духа Свята рече: Аллилуия.

Икос 4
Слышашя пастырие ангелом поющих иже во плоти Христово пришествие, и текше яко к пастырю, видеша Сего яко агньца непорочна, во чреве Мариине пасшася, юже поюще реша:
радуйся, агньца и пастыря Мати;
радуйся, дворе словесных овец;
радуйся, невидимых зверей мучение;
радуйся, дверем райскых отверзение;
радуйся, яко небесная радуются земными;
радуйся, яко земная ликоствуют небесными;
радуйся, апостолом немолчна уста;
радуйся, страстотерпцем непобедимая дерзости;
радуйся, твердое вере основание;
радуйся, Еяже ради обнажися ад;
радуйся, Еяже ради облекхомся славою;
радуйся, Невесто Неневестная.

Кондак 5
Боготочную звезду видеша волсви, сея последовашя зари, и яко светилника держаще я, тоя пытаху крепкаго царя. И достигше непостижимаго, порадовашася ему вопиюще: Аллилуия.

Икос 5
Видешя отроци халдейстии на руку девичю создавшаго своима рукама человекы и владыку разумеющее Его, аще и рабий прият зрак, потщашася дарми угодити Ему и вопити благословенней:
радуйся, звезды незаходимыя мати;
радуйся, заре таинственнаго дне;
радуйся, прелести пещь угасивши;
радуйся, Троица ученики хранящи;
радуйся, мучителя немилостива изменяющи от начялства;
радуйся, Господа человеколюбца показавши Христа;
радуйся, варварския избавляющы службы;
радуйся, скверны избавляющы дел;
радуйся, огне поклонение уставльши;
радуйся, пламене страстей изменяющи;
радуйся, персом наставнице целомудрия;
радуйся, всех родов веселие;
радуйся, Невесто Неневестная.

Кондак 6
Проповедници богоноснии волсви бывше, возвратишася в Вавилон, скончавше Твое пророчество, и проповедавше Тя Христа всем, оставльше Ирода яко блядива, не ведуща пети: Аллилуия.

Икос 6
Восия во Египте просвещение истине, отгнал еси лжи тму, идоли бо его Спасе, не терпяще крепости Твоея падошя, сих же избавльшеся вопияху к Богородици:
радуйся, исправление человеком;
радуйся, падение бесом;
радуйся, яже прелести державу поправши;
радуйся, идольскую лесть обличивши;
радуйся, море потопившее фараона мысленаго;
радуйся, каменю напоивши жажущу живота;
радуйся, огненый столпе наставляа сущих во тме;
радуйся, покрове миру ширший облака;
радуйся, пище манне приемнице;
радуйся, пищя святыя служителю;
радуйся, земле обетованная;
радуйся, из неяже течет мед и млеко;
радуйся, Невесто Неневестная.

Кондак 7
Хотящу Симиону от нынешняго века преставитися прелестнаго, вьдался еси яко младенець тому, но познася ему и Бог совершен, тем же удивлься твоей неизреченней мудрости зовый: Аллилуия.

Икос 7
Новую показа тварь, явлься зиждитель нам иже от Него бывшем. Из безсеменныя прозябе ютробы и сохрань сия якоже бе нетленная, да чюдо видяще воспоем Ей вопиюще:
радуйся, цвете нетления;
радуйся, венче воздержания;
радуйся, воскресения образ восиявши;
радуйся, ангельское житие являющи;
радуйся, древо благоплодовитое, от него же питаются вернии;
радуйся, древо благосеннолиствено, под нем же покрываются мнозии;
радуйся, рождьшия наставника заблуждьшим;
радуйся, порождьшия избавителя плененым;
радуйся, судия праведнаго умоление;
радуйся, многым согрешением прощение;
радуйся, одежде нагы дерзновения; (ударение "нАгы")
радуйся, любы всякоя желание побеждающи;
радуйся, Невесто Неневестная.

Кондак 8
Странно рождество видевше устранимся мира, ум на небо преложше. Сего бо ради высокый на земли явися смирен человек, хотя привлещи к высоте вопиющих Ему: Аллилуия.

Икос 8
Весь бе в нижних и вышних никако же отступль, неописанное слово, схождение бо Божественно не местно прехождение бысть, и рождество от Девы богоприятны слышаще сия:
радуйся, Бога невместимаго вместилище;
радуйся, честнаго таинства двери;
радуйся, неверных верное слышание;
радуйся, верных известная похвало;
радуйся, колеснице пресвятая сущаго на херувимех;
радуйся, селение преславно сущаго на серафимех;
радуйся, противныя в тожде собравши;
радуйся, яже девство и рождество сочтавши;
радуйся, Еяже ради разрешися преступление;
радуйся, Еяже ради отверзеся рай;
радуйся, ключю царствия Христова;
радуйся, надеже благ вечных;
радуйся, Невесто Неневестная.

Кондак 9
Всяко естество ангельское удивися великому твоего вочеловечения делу, неприступнаго бо яко Бога зряху всем приступна человека, нам убо спребывающя и слышаща от всех: Аллилуия.

Икос 9
Ветиям многовещанныи яко рыбы безгласны видим о Тебе Богородце, недоумеют бо глаголати, как и Девою пребываеши, и родити возможе, мы же таинству дивящеся верно вопием:
радуйся, премудрости Божия приятелище;
радуйся, промышление Его скровище;
радуйся, любомудреца немудры являющи;
радуйся, хытрословесникы безсловесны обличивши;
радуйся, обуяше лютии взыскателе;
радуйся, яко увядоша баснотворци;
радуйся, афинейския плениця растерзавши;
радуйся, рыбарьския мрежа исполняющи;
радуйся, из глубины неведения извлачящи;
радуйся, многых в разуме обогащши;
радуйся, кораблю хотящим спастися;
радуйся, пристанище житейсых плаваний;
радуйся, Невесто Неневестная.

Кондак 10
Спасти хотя мир всех украситель к сему самообещянно прииде и пастырь сый, и Бог нас ради явися по нас подобен, подобным подобное призва, яко Бог слышит: Аллилуия.

Икос 10
Стена еси девам Богородице Дево, и всем к тебе прибегающим, ибо небу и земли устрои Тя Творец, Пречистая, вселся во утробу Твою и всех ю приглашяти научив:
радуйся, пело девства;
радуйся, двери спасения;
радуйся, началнице разумнаго создания;
радуйся, дателю божественныя благодати;
радуйся, Ты бо обновила еси зачяти студно;
радуйся, Ты бо наказала еси окраденыя ума;
радуйся, тлителя смыслом упраздниши;
радуйся, сеятеля чистоте рождьши;
радуйся, чертоже безсеменнаго уневещения;
радуйся, верныя Господеви сочтавши;
радуйся, добрая младопитателнице девам;
радуйся, душам чертоже святых;
радуйся, Невесто Неневестная.

Кондак 11
Пение всяко побеждаеся прострети тщящися множеству многих щедрот твоих, равночислении бо псалми и песни аще приносим ти Царю Святый, ничтоже творим достойно Тебе вопиющым: Аллилуия.

Икос 11
Светоприемну свещу, сущиим во тме явльшуся, видим святую Деву, невещественый бо вжегши огнь, наставляет к разуму божественому всех, зарею ум просвещяющи, званием же почитаема сим:
радуйся, луче разумнаго солнца;
радуйся, сияние незаходимаго света;
радуйся, молчяние душя просвещающи;
радуйся, яко гром врагы устрашающи;
радуйся, яко много светлое возсияваеши просвещение;
радуйся, яко многотекущую истачяеши реку;
радуйся, купели живописующы образ;
радуйся, греха отемлющи скверну;
радуйся, бане омывающий совесть;
радуйся, чаше черплящия радость;
радуйся, воне Христова благоухания;
радуйся, жизни таинныя благою наслаждение;
радуйся, Невесто Неневестная.

Кондак 12
Благодати восхотев долгом древним всех долгу разрешитель человеком Господь прииде Собою ко ошелником благодати и раздрав рукописание, слышит от всех сице: Аллилуиа.

Икос 12
Поюще Твое рождество, восхваляем Тя вси, яко одушевленную церковь Богородице. Во Твою бо вселися утробу, содержай вся рукою Господь. Освяти и прослави, и научи вопити Тебя всех:
радуйся, селение Бога и Слова;
радуйся, Святая святых болши;
радуйся, ковчеже позлащенный Духом;
радуйся, скровище животу неистощимое;
радуйся, честный венче царем благочестивым;
радуйся, честная похвало иереом благоговейным;
радуйся, церкви непоколебимый столпе;
радуйся, царствиа нерушимая стено;
радуйся, Еяже ради воздвижутся победы;
радуйся, Еяже низпадают врази;
радуйся, тела моего врачевание;
радуйся, душа моея предстателнице;
радуйся, Невесто Неневестная.

Кондак 13
О всепетая Мати, рождьшия всех святых святейшее Слово, приемши нинешняя приношения, от всякия избави напасти всех, и грядущая изми мукы. Тебе вопиющих: Аллилуия.
Таже Икос Ангел предста, таже Возбранной

Для удобочитаемости в текст вставлены пробелы, поставлены дополнительные знаки препинания и некоторые буквы изменены на заглавные