Акафист Пресвятой Богородице на явление Ея во граде Архангельске Акафист Пресвятой Богородице на явление Ея во граде Архангельске

Кондак 1
Взбранная Воеводо являешися всем ищущим Твоея помощи на брань к духовом злобы поднебесныя, утешая и укрепляя в напастех и венчая победою. Тем же и мы, помощи Твоея чающе, из глубины сердца взываем Ти:
Преблагословенна еси, Богородице Дево, от всех родов во веки.

Икос 1
Архистратиг Михаил ублажи Тя на небесех, еда явила еси ко граду земному, именем его украшенну, Твое благоволение. Мы же, недостойно живущи во онем, обрадованнии обетованием покрова Твоего, поем Ти:
Преблагословенна еси, любовию ко Господу несравненно превзошедшая пламенных Серафимов.
Преблагословенна еси, к Ней же взирают, како исполнити Ея волю, очи многоочитих Херувимов.
Преблагословенна еси, Юже с благоговением обстоят ангельствии чинов Престоли.
Преблагословенна еси, Юже ублажают, яко Рождшую Безначальнаго, ангельстии начала.
Преблагословенна еси, Юже господствия ангельстии Госпожею своею величают.
Преблагословенна еси, Юже власти ангельстии единою Владычицею именуют.
Преблагословенна еси, пред Нею же силы ангельстии благоговейно трепещут.
Преблагословенна еси, Ей же Архангели с радостию служат.
Преблагословенна еси, Ей же ангели-хранители о вверенных им душах человеческих молитвы приносят.
Преблагословенна еси, Богородице Дево, от всех родов во веки.

Кондак 2
Видеша отроковицы на небесех явльшуюся Приснодеву с Богомладенцем, руце Свои над градом Архангельском простирающую, - со трепетом взираху: егда же Сын Ея, подъят десницу Свою, благослови град, - видение облацы сокрыся. Отроковицы же в той час, поспесшеся, бежаша к родителем своим возвестити радость явления. Тии же во умилении сердца воспеша: Аллилуйя.

Икос 2
Разумеша родители отроковиц, яко не точию онем, но и всем христианом подобает ведети о явлении Матери Божией, - поидоша ко духовному отцу совему протопресвитеру храма Воскресения Христова Михаилу и поведаша ему о дивном благоволении Приснодевы. Он же возрадовася духом и восхоте письменне известити по всей епархии о сем чудном явлении, да вси вернии с радостию воспевают Пречистей:
Преблагословенна еси, всех христиан под кров Твой приемлющая.
Преблагословенна еси, Церковь Христову пред гонением на ню обещанием покрова Своего укрепляющая.
Преблагословенна еси, во дни напастей сугубая Попечительница.
Преблагословенна еси, от врагов видимых и невидимых хранительнице.
Преблагословенна еси, врагам веры Христовой погубити нас не попущающая.
Преблагословенна еси, защищение Твое от них нам обещающая.
Преблагословенна еси, Ея же милосердием, ащи и гоними, благополучны обретаемся.
Преблагословенна еси, Ея же молитвами для вечной жизни спасаемся.
Преблагословенна еси, о помиловании людей, прегрешивших Бога, умилостивляющая.
Преблагословенна еси, Богородице Дево, от всех родов во веки.

Кондак 3
Сила Духа Святаго укрепи отроковиц глаголати небоязненно правду, егда безбожнии людие ласкательством, дарами и угрозами принуждаху их отрещися виденнаго явления Божия Матере, дабы осудити заключеннаго в темницу ими протопресвитера Михаила, аки во лжи: сим отроковицы проповедаша милость Матере Божия к верным, сами укрепишася во исповедании и заключенному оправдание устроиша, воспевшему благодарственное Богу: Аллилуйя.

Икос 3
Имеяше страна Российская, издревле святою верою просвещенная, Тя, Матерь Света умнаго, благую Помощницу и Покровительницу, никогдаже прошения верных отвергающую, но смиренныя и покаянныя молитвы приемлющую и к Создателю нашему о помиловании возносящую. Поминая сие благоволение к рабом Твоим, воспеваем таковая:
Преблагословенна еси, многажды врагов Руси, подступающих о еже разорити страну нашу и избити люди, устрашая видениями, отгоняла еси.
Преблагословенна еси, всегда образом Своим нам на поле брани сопутствующая.
Преблагословенна еси, также и во время брани, егда враг одолеваше христианы, являлася еси, и покрываемо быша войско православных мантиею Твоею.
Преблагословенна еси, явлением сим врагам воинов наших невидимыми соделала еси.
Преблагословенна еси, взором гневным очес Своих устрашала еси врагов нападающих.
Преблагословенна еси, победы правому воинству ходатаице.
Преблагословенна еси, единая за весь мир христианский Молитвеннице.
Преблагословенна еси, горделивым и стяжательным молитвам не внемлющая.
Преблагословенна еси, во едино время ко всем прошениям верных, на различных наречиях произносимым, ухо преклоняющая.
Преблагословенна еси, Богородице Дево, от всех родов во веки.

Кондак 4
Бурею сомнений и страстей одержимым кроткая еси Наставнице, ведущая к покаянию и исправлению жизни: многочисленнии бо Тобою ко Христу приидоша, оставив прежнее неспасительное житие, и научишася со избранными едиными усты пети: Аллилуйя.

Икос 4
Слышаша апостоли обещание Твое прибыти во храм, созданный имени Твоему в Лидде, поспесшеся в путь, и зашедше во храм, узреша на стене самонаписавшийся образ Твой, уясниша, яко обещание Твое исполнися. Мы же, усмотряя в сем, яко всякое изображение Твое есть пребывание Божия Матере с нами, благоговейно поем:
Преблагословенна еси, святых апостолов Петра и Иоанна присутствием образа самонаписавшагося обрадовавшая.
Преблагословенна еси, в последующие времена уничтожить сие изображение старание безбожное безуспешным соделавшая.
Преблагословенна еси, почитати образ Твой, яко Самую Тебе, пребывающую с нами, вразумляющая.
Преблагословенна еси, воздавати честь на всякое время иконам Твоим нас научающая.
Преблагословенна еси, почитание икон на земле утвердившая.
Преблагословенна еси, имеющим в жилищах своих образы Твоя, благоволение являющая.
Преблагословенна еси, молящихся Тебе пред иконами Твоими и помышляющих, яко Самей Тебе предстоящих, прошения милостивно исполняющая.
Преблагословенна еси, иконами Твоими устроителей иноческих обителей на Руси преподобных благословляющая.
Преблагословенна еси, многия иконы на места, Тобою избранныя для построения храмов, на воздусе пославшая.
Преблагословенна еси, Богородице Дево, от всех родов во веки.

Кондак 5
Божественную силу образы Твоя, Богородице, являют: трясения земли и наводнения усмиряют, болезни и смертоносныя раны прекращают, нашествия иноплеменных отгоняют, страждущих и ищущих от Тебе помощи охраняют, огнь поядающий угашают, аще с верою и надеждою к Тебе прибегнем, молящеся пред иконами Твоими о помиловании, и улучивше милость избавления от Тебе, восхваляют благодетеля Бога, поя Ему: Аллилуйя.

Икос 5
Видевше людие Российстии славу Твою многими храмами, обителями иноков и инокинь во имя Твое освященными, прославляемую и в них же Твоя изображения взывают, зряще Пречистый лик Твой, Приснодево, воспевая:
Преблагословенна еси, родителями Твоими в дар Богу принесенная.
Преблагословенна еси, яко дар сей зело угоден бысть Всевышнему.
Преблагословенна еси, яко Отец Небесный в дщерь Себе прият Тя.
Преблагословенна еси, яко в Святая Святых храма, идеже никомуже входно бысть, с Богом беседовала еси.
Преблагословенна еси, Вседержителем воспитанная.
Преблагословенна еси, яко с Богом мысль Свою сочетала еси.
Преблагословенна еси, в сосуд честен и благовонен девства украсилася еси.
Преблагословенна еси, дух Свой с духом Божиим совокупила еси.
Преблагословенна еси, Промыслом Божиим о спасении людей во едино проникшаяся.
Преблагословенна еси, Богородице Дево, от всех родов во веки.

Кондак 6
Пророчества о пришествии Христа в мир с трепетом и желанием сердечным восприяла еси, и о пришествии Мессии помышляя смиренно, послужити Матери Спасителя мира восхотела еси. Егда же Архангел Гаврии радость Тебе принес о высшем избрании Товем, возвеличи Господь дух Твой и возрадовася сердце Твое о грядущем спасении Израиля. С благоговением и благодарением о сем Богу поем и мы: Аллилуйя.

Икос 6
Возсия свет Христов из Тебе, просвещая мир, от малаго жилища тектонова до окраин земли возблиставая, сердца очищая, умы осиявая, озаряя мысли, научая горняя мудрствовати и побуждая людей христоименитых благодарно пети Тебе:
Преблагословенна еси, аки первозданный раю Древо Жизни в Себе возрастившая.
Преблагословенна еси, Агнца Божия Новаго Завета воспитавшая.
Преблагословенна еси, смерти Победителя нам даровавшая.
Преблагословенна еси, неизменную истину миру открывшая.
Преблагословенна еси, путь к жизни нескончаемой осветившая.
Преблагословенна еси, жизни Начальника нам подавшая.
Преблагословенна еси, следующих истине тления избавльшая.
Преблагословенна еси, прощение падшему человеку рождеством Своим устроившая.
Преблагословенна еси, князя мира, обольстившаго прародителей, низвергнувшая.
Преблагословенна еси, Богородице Дево, от всех родов во веки.

Кондак 7
Хотя Промыслитель Господь разрешити человечество от клятвы адамовой, избра Тя от рода земнаго, отдели Тя от житейских нестроений и в храме воспита Тя, да храм нерукотворенный будеши, идеже полнотою Сама Святая Троица пребывает: ум непрестанно со Отцем сочетавается, сердце Слова БОжия вместилище является, и Дух Святый дух Твой украшает и во единении воспламеняет. В таковом святом храме Бог-Слово воплотитися благоизволи и научи пети Тя благодарственное пение: Аллилуйя.

Икос 7
Новый Завет утверждая в церкви земней Сын Твой и Бог, чрез Тебе прошед, земным явися, яко человек, да подобным воззовет отшедшия от благодати Его и воздвигнет спасенных воспевати Тя, виновницу спасения нашего:
Преблагословенна еси, воле Божией о спасении людей добровольно послужившая.
Преблагословенна еси, вся в воле Божией бывшая.
Преблагословенна еси, послушание всегда смиренно Богу являвшая.
Преблагословенна еси, Богочеловека Материю явившаяся.
Преблагословенна еси, моление к Отцу Небесному и Богу Сыну Твоему благоговейно всегда приносившая.
Преблагословенна еси, в жребии земнем на благо Сына Своего потрудившаяся.
Преблагословенна еси, пронзения души Своея оружием от греховнаго мира не отвратившая.
Преблагословенна еси, Сына Своего в Жертву за мир согрешивший покорно по воле Божией отдавшая.
Преблагословенна еси, распенших Его не осудившая.
Преблагословенна еси, Богородице Дево, от всех родов во веки.

Кондак 8
Странна была еси в житии земнем по смирению Твоему, аще и Царицею небесе и земли содела Тя Бог, якоже и Сын Твой, обладая вселенною и живущими в ней, не име на земли, где главу подклонити, да мы, взирая на образ жития Мужа совершенна и Жены совершенныя, научимся не о временных благах помышляти, но к горнему устремлятися, поя сердцем умиленным во всяком обстоянии: Аллилуйя.

Икос 8
Всю страну нашу Российскую, издревле православную, аки потоп страшный, наводниша безбожие: иноков разгнаша, храмы оскверниша и разрушиша, служителей Божиих и верных многих погубиша на горьких работах и в заточениях, невинных осудиша и убиша. В таковом гонении христиане едино упование и отраду в Тебе, Мати человечества, имеша, взывающе:
Преблагословенна еси, в тяжких испытаниях знамениями милости Твоея нас укрепляющая.
Преблагословенна еси, в заточении и изгнании сущих упованием на будущия блага небесныя утешающая.
Преблагословенна еси, от глада и мора невидимо верных питающая.
Преблагословенна еси, изгнанным в дальние места в час смертный чудесно напутствием Святых Таин посылающая.
Преблагословенна еси, немощным и старым, аще и в чуждих местах бывшим, пищу и кров от жен милостивых подававшая.
Преблагословенна еси, христиан сущих в трудах тяжких, во хладе и мразе любовию к Богу согревавшая.
Преблагословенна еси, изгнанным, размышлением о Твоей земней жизни, в уныние впасти не попускавшая.
Преблагословенна еси, до конца уничижити верных не давшая.
Преблагословенна еси, чад, от отцев духовных безбожниками отъятых, от безбожия сохранившая.
Преблагословенна еси, Богородице Дево, от всех родов во веки.

Кондак 9
Все человеческое множество от Воскресения Христова непрестанно величает Тя, Дево, рождшую Спасение миру: патриархи и архиереи, иерейский чин и диаконский, девствующие и миряне прославляют. Ты же приемля хваления, коемуждо по усердию его воздаеши и ходатайствуеши о всех жизнь вечную улучити, да воспевают Богу на небеси: Аллилуйя.

Икос 9
Ветии благоглаголивыя Церкви Христовыя от лет древних прославляюще Тя, Богородице, вся сказаша, елико изрещи человеческому глаголу возможно, кое ли слово в похвале Тебе принесем мы грешнии от скудости своея духовныя: обаче дерзаем приступити ко славословию:
Преблагословенна еси, архангелово в житии земнем приявшая служение.
Преблагословенна еси, яко от Бога Архангел Гавриил дан бысть Тебе в земней жизни во охранение.
Преблагословенна еси, Гавриилово благоговейное приявшая поклонение.
Преблагословенна еси, яко Архангел Гавриил принесе людем хвалебную песнь о Тебе архангельскаго прославления.
Преблагословенна еси, песнию сиею воистину достойно ублажаемая.
Преблагословенна еси, на небеси и на земли присноблаженная.
Преблагословенна еси, Пренепорочная Мати Бога архангелов и человеков, нескончаемо величаемая.
Преблагословенна еси, от языков земных на различных наречиях восхваляемая.
Преблагословенна еси, всех восхваляющих Тя милующая.
Преблагословенна еси, Богородице Дево, от всех родов во веки.

Кондак 10
Смотрения Божия о спасении земных и низложения царства тьмы чрез Тя устроенному и устрояемому, разум человеческий, суетными помыслами помраченный и отягченный, не может постигнути, та же и достойную песнь Тебе воспети, токмо с благодарением поет Богу: Аллилуйя.

Икос 10
Инокам и инокиням всегда скоропослушливая Помощнице, основание нерушимое на земли для девства положила еси, Приснодево, таже и в Российстей стране Покров и защищение от греховнаго мира иночествующим и девствующим являешися. Многим ищущим уединения, сопутствовала еси в обретении безмолвия, от них же и хвалы немолчныя идоша ко Величеству Твоему:
Преблагословенна еси, девство на земли, аки сад благоуханный кринами насадившая.
Преблагословенна еси, в нем же росою молитв Твоих цветы добродетели напоившая.
Преблагословенна еси, яко аромат их вселенную облагоухает.
Преблагословенна еси, яко благоуханием сим в мире жительствующия в добродетели укрепляются.
Преблагословенна еси, иноком нестяжательным икона Твоя единое есть сокровище драгое.
Преблагословенна еси, на дальнем Севере преподобному Трифону Кольскому, в пустыне жительствующему, иконою Твоею житие благоукрасившая.
Преблагословенна еси, Елеазара Анзерскаго явлением ему иконы Твоея Смоленския и гласом, от нея бывшим, возвеселившая.
Преблагословенна еси, преподобному Никодиму Кожеезерскому путеводительницею иконою Твоею бывшая.
Преблагословенна еси, святителя Филиппа Московскаго, егда бысть на послушании в пекарне острова Соловецкаго, запечною иконою одарившая.
Преблагословенна еси, от страны Иверския на Красную гору иноком Грузинскую икону пославшая и чудесами прославившая.
Преблагословенна еси, яко явленных икон Твоих несть мощно исчислити нам.
Преблагословенна еси, Богородице Дево, от всех родов во веки.

Кондак 11
Пение устнами чистыми возносят Ти святии Божии, лицы же девственнии на небеси воспевают Создателя и Искупителя песнию, юже никтоже возможе пети от прочих святых, дана бо бысть сия девственному лику. Мы же хваление Спасителю приносим на земли древнею песнию: Аллилуйя.

Икос 11
Света жилище бывшую, Свет Истинный людем рождшую, Имже просвещается всяк человек, вошедший в мир, и люди Божии по узкому пути к свету Ведущую с благодареним восхвалим:
Преблагословенна еси, яко невещественным светом души озаряеши.
Преблагословенна еси, яко сердца хладные любовию просвещаеши.
Преблагословенна еси, умы, яко молниею, благими помыслы озаряеши.
Преблагословенна еси, яко помыслы от диавола молитвою к Тебе отгоняются.
Преблагословенна еси, людей себялюбивых жизнь устрояющая и любви к ближним научающая.
Преблагословенна еси, невещественный свет нам от храма души Твоея ниспосылающая.
Преблагословенна еси, светом сим всему миру освящение даруеши.
Преблагословенна еси, светом Твоим архангелов радуеши.
Преблагословенна еси, светом Твоим наша сердца согревающая и просвещающая.
Преблагословенна еси, Богородице Дево, от всех родов во веки.

Кондак 12
Благодатною нареченная в приветствии Архангела Гавриила при благовестии о рождении Спасителя, благодать изображениям Ея на земли сообщает, да усердно молящиися пред образом Твоим просимое во благо получают, благодарственно поя Богу: Аллилуйя.

Икос 12
Воспевают Тя, Дево, на небесех со святыми архангелы и службу Ти приносят угодную, аки фимиам кадильный, на земли же человецы во всякое время Ти молитвы приносят, свечи возжженныя в дар пред иконы Твои поставляют, воспевая:
Преблагословенна еси, яко благоугодно Тебе служение архангелов.
Преблагословенна еси, яко благоуханно Тебе похваление святых.
Преблагословенна еси, яко и на земли души и сердца в молении пред образом Твоим, подобно воску, умягчаются.
Преблагословенна еси, яко в молитве к Тебе сердца, аки пламень свещи, возгораются.
Преблагословенна еси, яко сиянием лампад пред образом Твоим души молящихся озаряются.
Преблагословенна еси, яко труд пастырей Церкви Твоею любовию согреваеши.
Преблагословенна еси, яко подвиг иноческий Твоею благодатию осияваеши.
Преблагословенна еси, яко девствующим светильники душ наполняти елеем помогаеши.
Преблагословенна еси, яко страдальцев за имя Христово терпением и любовию укрепляеши.
Преблагословенна еси, Богородице Дево, от всех родов во веки.

Кондак 13
О Мати Великаго Бога и Спаса нашего Иисуса Христа, защити нас от ищущих души наша погубити, и егда приидет время отшествия нашего от земли, сподоби Твоими молитвами со Христом в Пречистых Тайнах соединитися, да приидем в Царствие Отца и Сына и Святаго Духа и узрим славу Твою, дарованную Тебе Сыном Твоим, Спасителем нашим, Ему же со святыми воспоем: Аллилуйя.
Кондак сей глаголи трижды, таже Икос 1 и Кондак 1

Молитва
Пресвятая Дево чистая, мысленно предстоя Кресту Сына Твоего и Бога моего, зрю Тя, стоящую у Креста и сердцем сраспинающуюся Возлюбленному Чаду Твоему: зрю и ужасаюся обличающей мя совести. Мое безрассудство, мое нерадение, мои грехи пронзили оружием Твою непорочную душу. Болезную о содеянных мною, принесших муки Сыну Твоему и Тебе нетленней и непорочней. Мне подлежали муки за моя беззакония, но Спаситель избави мя от них, Сам пострадав, и Ты, Всечистая, Своею волею дала согласие Отцу Небесному исполнити превечный совет Святыя Троицы о избавлении человека от смерти. Непостижимо человеческому разуму величие сие! И созерцая сие мысленным взором, стою, и безмолствую, и благоговею пред таинством Распятия. Христос Господь простил, и Ты прости, Пренепорочная, и приими моление мое, и сподоби мя благочестно житие земное совершити и Небесное Царствие наследити матерним ходатайством Твоим к Рождшемуся из Тебе Христу Богу нашему, Емуже со Безначальным Его Отцем и Пресвятым Духом подобает всякая слава, честь и поклонение ныне и присно, и во веки веков. Аминь.

В июле 1919 года, во время гражданской войны на архангельском севере, накануне вывода войск союзников, в нашем городе произошло поистине знаменательное событие. Двое детей Перешневых и двое — Зелениных из двора своего дома на углу улицы Кирочной (ныне к. маркса) и Петроградского проспекта(пр. ломоносова) наблюдали невысоко над горизонтом Пресвятую Богородицу. Царица небесная явилась им сидящей с Предвечным Младенцем на коленях. И простирала руки ладонями вниз, покрывая город, как бы благословляя его. Божественное дитя было в движении. Затем Богомладенец сделал жест правой рукой, крестообразно осенив вотчину архангела Михаила и народ, которому предстояло вынести тяжкие и долговременные испытания... Видение божией матери с младенцем продолжалось около получаса, потом начало бледнеть, пока не исчезло из глаз. Потрясенные дети рассказали об увиденном родителям, вместе с ними пошли к своему духовнику — протоиерею Воскресенского храма (впоследствии уничтоженного) о. Михаилу Попову, и поведали ему о происшедшем. Отец Михаил засвидетельствовал их рассказ епископу пинежскому, викарию архангельской епархии Павлу (Павловскому, † 1937 г.), будущему новомученику.