Кондак 1
Избранной Небесным Царем, превысшей и умных чинов, всеблагой Царице,* рода христианскаго Заступнице* и от всех зол и напастей скорому вспоможению,* вси мы, грешнии и в безмерных бедах сущии раби Ея,* со слезами и умилением сердца, принесем покаянная пения:* Ты же, яко премилосердная Мати наша сама духоносному молению настави нас* и прияти сия воздыхания души нашея удостой:
О, Благодатная, помилуй нас и спаси,* и пачесолнечною теплотою любве Твоея* грехми умерщвленный наш дух оживи.

Икос 1
Тма неверия и в сне глубоце запустение жизни богоподобныя обяша до конца предавшийся тлению род человеческий, и в неисходных пленицах падений греховных оковал все ны светоненавистник и древний убийца-диавол, князь мира сего. Но и врагами соделавшихся, не престала любити людей Своих благость Творца, нас спасающаго, и Тобою, о Пренепорочная Дщерь Давидова, обетовал Он изначала даровати погибшим Семя жены — Христа Еммануила. Се и мы ныне, аще и ослепихом очеса наша маловерием и ужасаемся глубины неотмытных беззаконий своих, но от Тебе, о Мати Света, чаем спасения, и не ищуще самооправдания во гресех неисчетных, Тебе надеждою непозыблемою к себе зовем:
О, Благодатная, на помощь к нам поспеши, — Царице Небесная, из бездны падений нас исхити.
О, Благодатная, лучами света горняго всеобдержащий мрак жития нашего озари, — Дево Пречистая, сиянием чистоты Твоея грехми потемневшия наша сердца освети.
О, Благодатная, бежати льщений лжи и греха Ты нас научи — Матерь Святейшая, любовь и верность правде в души наша вложи.
О, Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи
Примечание: Можно петь: «
О, Благодатная, Ты нас спаси и любовию Твоей утоли нашу печаль»

Кондак 2
Оставивше двор Отчий и, яко блудный сын, на страну далече отышедше, во мрак язычества, тину страстей и сень смертную впадоша вси сыны Сифовы, и ни царь и ни пророк, ни ангел и ни мудрец, но точию Божественный Сын Твой, о Благодатная Марие, возможе их к свету боговедения привести и вся силы, яже к животу и благочестию, даровати, да умиленне, спасение обретше, Творцу и Избавителю своему поем: Аллилуия.

Икос 2
Шаташася всуе языцы и людие заблудшии поучахуся тщетным, понеже забвено бысть чистое предание сынов Божиих, и сеть многобожия привлече осуетившиеся народы в кумирослужение лжи и истаявание вредоносных похотей и скверны угождения грехолюбивой плоти. Егда же предста Тебе, вещати дивная, воинств ангельских вождь — Гавриил, разгнася Светом Востока идольской лести нощная тма, и начаток явися во Христе Иисусе всякия плоти конечнаго исцеления. Темже и мы умиленным сердцем, главизну спасения нашего видяще, со архангелом в благоговении Тебе взываем:
О, Благодатная, всегда с Тобою Бог и Господь, — Дево Богородице, спасение Той и нам в Тебе содела.
О, Благодатная, коль благословен во истину пречистаго чрева Твоего Божественный Плод, — святая святых Святейшая, в Тебе вместися Невместимый и небом, не точию бренною землей.
О, Благодатная, колицее величие сотвори Тебе Царь и Господь, — Матерь Безневестная, любве безконечной и нам осияй животворящий свет.
О, Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.
Или ин припев:
О, Благодатная, Ты нас спаси и любовию Твоей утоли нашу печаль.

Кондак 3
Новую тварь созидати и людей Своих во еже не земная, но горняя мудрствовати привести, сниде с небесе во юдоль земную Человеколюбец Господь, от Негоже и поднесь устрояется царствие Божие на земли и претворяет собою, якоже квас добрый, да вскисает все многоразличное смешение человеческое.
Мы же, единое стадо Христово возлюбивше и крепце во дворе Его присно сердцем утверждающеся, единодушно, и в падениях наших вся побеждающему Владыце жизни нашея поем: Аллилуия.

Икос 3
Горний Иерусалим всегда осияя и всеоживляющею Благодатию Святаго Духа утешая прославленных Своих, яви Господь и в мире земном жизнь и силу царствия Своего, и уже не юдолию плача и слез, но мира всеутоляющаго и радости нескончаемыя, ея же никтоже может отъяти, предстоит всем верным небошественный путь странствия нашего во временном сем бытии. На него же взирающе, и мы недостойнии и ленивии, к сему блаженству призваннии, но изменою безверия и пустотою миролюбления себе из него извергшии, от Тебе, о Богомати, помощи и спасения себе чаем и слезами раскаяния и сердечнаго обращения от гибели сея вопием:
О, Благодатная, Ты нас исцели, — Мати милосердная, прощение Божие нам испроси.
О, Благодатная, к жизни в Сыне Твоем возврати, — небесный Покрове наш, током благодати, сущей в Тебе, изсохшее сердце в нас ороси.
О, Благодатная, не любити мира и злых, яже в мире, нас научи, — Дево Пречистая, влечения сердца нашего к чистой любви Христовой устреми.
О, Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.
Или ин припев:
О, Благодатная, Ты нас спаси и любовию Твоей утоли нашу печаль.

Кондак 4
Небошественнаго пути златыя правила имуще и мало избранных, в сих подвизающихся, повсюду присно видяще, в Тебе, на высшую степень богоподобия восшедшей, образ небесной мудрости и в Бозе вечнаго созидания обретаем и Тобою преизлиха утешаемся, ибо наипаче пред всеми слагала еси в чистейшем сердце Твоем вся словеса деяний и учений Воплотившейся Премудрости — Сына Твоего: отнюдуже приискренне о всех сих умиляющеся и дивная духа в Тебе созерцающе, Богу, толико прославльшемуся во святых Своих, похвальне вси воспеваем: Аллилуия.

Икос 4
Внутрь нас, якоже рече Господь, — в сердце человека, его просветлении, новой жизни и горе устремлениях, есть Царствие Божие, еже именуется правда и мир и радость о Дусе Святе, и красотою благоустроения души во избранных Божиих огнезрачне сияет нам. И сие совестию ведуще и духом ищуще, делы же студными и окаянством беззаконий своих вспять — во страну самоистуканных страстей — отторгающеся, Тебе, во избранных избранную, восполнити и утолити наше обнищание просим и скорбными воздыханиями сердца сыновне умоляем сице:
О, Благодатная, приблизитися к Тебе помози, — сил Повелительнице, о Бозе возмогати нас укрепи.
О, Благодатная, сею благодатию, в Тебе преизбыточествующею, оскудевающая сердца наша напой, — во блазе Помощнице цветы доброделания в пустынныя наши души всади.
О, Благодатная, достигати Царствия Сына Твоего подвигни нас и усоверши, — непорочности Венче, духовныя блага ценити и искати нас научи.
О, Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.
Или ин припев:
О, Благодатная, Ты нас спаси и любовию Твоей утоли нашу печаль.

Кондак 5
Яко пшеница добрая на ниве, вырастает и класы плодит и зреет незримо в сердце человека Царствие Божие, и сторицею выращает Отец щедрот семя словес Его, аще почвою доброю, углубленною и потом усердия возделанною приемлет сие сердце наше. И сия вся добре ведуще и радостне созерцающе во святых Божиих, вси мы благодарне прославляем Единаго Виновника всяческаго доброделания — Тебе, Отца светов, от Негоже исходит всякое даяние благо и всяк дар совершен: Аллилуия.

Икос 5
«Блаженни слышащии слово Божие и хранящии его», — ибо ни в сем веце, ни в будущем не отъимется от них сия благая часть, и соблюдше ю в добром и чистом сердце своем, всегда приносят они в терпении обильный плод свой, радуяся. Ибо и братом, и сестрой, и даже материею Своею удостоил наименовать их Господь, аще исполнят они волю Отца Его, Иже на небесех. Воистину, сице еще и духом и всею жизнию соделалася Ты, о Пресвятая Дево, Материю Господа Твоего, Егоже Пречистая плоть исткася от Твоих честных кровей: ибо паче всех соблюла еси Божественное слово Его и к небесем со славою восшла еси, сотворши волю Отца Небеснаго. Мы же вси, умом и сердцем сведуще сия солнцем блистающия доброты Твоя, и радостию прославляюще во Успении Твоем к небеси возвышение рода человеческаго, благоговейными усты согласно поем божественныя величия Твоя:
О, Благодатная, яко Мати Владыки, воцарившаяся на небеси, — Венче, превысший всякаго создания, и нас, скорбных и убогих, не оставляющая на земли.
О, Благодатная, на камени исполнения заповедей нас утверди, — Возлюбленная Богом и лики ангельскими, и наша замкнувшияся и в могилу себялюбия погребльшияся сердца отверзи к любви.
О, Благодатная, из душной темницы гордыни, уныния и плотских похотей вся ны изведи, — Царице Небесная, к Божию роду и нас, страстьми оземляневших, сопричти и подними.
О, Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.
Или ин припев:
О, Благодатная, Ты нас спаси и любовию Твоей утоли нашу печаль.

Кондак 6
«Иже несть со Мною, на Мя есть, и иже не со Мною собирает, — расточает», — рече Своим верным ипостасная Премудрость, Христос Господь, прозирая в глубине веков всепроницающим Оком Своим и сего дне, обюродевших без Христа мудрецов, на песце зиждемая строения. Ихже шатания видяще и в познании правды христианскаго благочестия паче утверждающеся, проникновенным сердцем и усты воспеваем мы Единому краеугольному Каменю небесных и земных созиданий, Владыце Христу: Аллилуия.

Икос 6
Путь и истину и жизнь прият род человеческий во Христе, и победа, еюже Он победи мир, соделася достоянием всех верных Его добрых делателей зде виноградника Божия. Ибо не точию залог блаженства века грядущаго Владыка дарует им, но в доброй совести каждаго во благо устрояется всяческое и земное делание их, и в правде созидается взаимное служение братий, любовию и миром побеждающее вражду и разделения в людех; наипаче же от рабства и тмы заблуждений свободит сей верный раб земное житие свое. Обаче — увы нам, в лености и небрежении и слепоте безумно иждивающим, неисчетною ценою дарованное, премирное сокровище светозарныя веры Христовой! Ибо и плен и узы, и ослепление свои в — свободы — место возлюбили самопрельщенне все мы, свет заповедей Царя своего забыв до конца и самохотне предавшеся соблазнам и обманам многим в сии лукавые дни, яко и вся добрая, отцы преданная, правила паче и паче расточати, в небрежении своем без Христа и света веры устрояя свою жизнь. Сего ради Тебе, яко стену веры и жизни христианския, никиими же злыми рушиму, добре ведующии и единую Надежду себе имущии, из бездны отчаяния умоляем и вопием:
О, Благодатная, Сама сущи во истине, ко истине и нас приведи, — Милостивая изнемогшим Помощнице, победителями греха молящихся Тебе сотвори.
О, Благодатная, еже видети и ненавидети злой плен свой наш ум озари, — мудрости горней сокровище, красная жизни вечныя очесам сердца яви.
О, Благодатная, соблазнов прельщение от нас отжени, — правды Христовой Свет немерцающий, развевати, яко пыль плевельную, лукавыя ухищрения вся ны умудри.
О, Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.
Или ин припев:
О, Благодатная, Ты нас спаси и любовию Твоей утоли нашу печаль.

Кондак 7
Дево Пренепорочная, Жизнь миру родившая, приобщитися и нас, недостойных, сея истинныя Жизни в Сыне Твоем призови и лику избранных Его сопричти. И, якоже Сама от дольных земли к горним восшедшая, и наши одебелевшие взоры горе устреми и духовная зрети научи; во глубинах души нашея всецелую преданность Богу, яко Отцу любви, возбуди, да приискренне славословим Его, вкупе, во имя Его, сошедшеся: Аллилуия.

Икос 7
Коль светла и благоотишна, коль сладка и радостна жизнь богоизбранных во Христе, коль дивныя знамения силы и любви являет в покое их сердца Сладчайший Спаситель наш, Господь Иисус! Тако и во всех тяготах и обременении и скорби душевной к Себе зовет нас Его безконечная Любовь, — да возьмем иго Его на себя и да образ кротости и смирения Спаса своего в сердце свое восприимем мы. И благо Его иго, и бремя Его по истине легко, всякую тугу сердечную облегчая во утешение нам и отрадой мира неотемлемаго преобразуя сию скорбную жизнь. Обаче всех сих благих в развращенных и стропотных греха лишившиися, тлю же похотей и зависти, и злобы, и уныния, и иная вся плевельная в сердце стяжавшии, прегорце во всех сих осуждаем себе и стеняше, в покаянии нелицемернем к Тебе единей очи свои возводим и сыновне зовем:
О, Благодатная, прости нас, прости, — дверь милосердия нам отверзше, люди Своя воззови.
О, Благодатная, благое иго Христово желати нас научи, — небесный Образе смирения, сие с кротостию и в наше сердце вложи.
О, Благодатная, мир в наши души, мир и с ближними нам ниспосли, — мира и любви Владычице, все житие страждущаго народа Твоего умири и в покаяние возраждающее приведи.
О, Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.
Или ин припев:
О, Благодатная, Ты нас спаси и любовию Твоей утоли нашу печаль.

Кондак 8
Бисер многоценный и почесть наивысшаго в мире сем знания даровася нам Отцем светов и Источником щедрот, яко сынам святыя Его, единыя Православныя Церкве, яже есть столп и утверждение истины. Мы же, аще по достоянию ценити сего не навыкше и деяньми сквернаго грехолюбия всечасно сим изменяюще, — обаче о таковом царском звании своем умиленным благодарением Призвавшему нас — Владыце неба и земли — поем: Аллилуия.

Икос 8
«О, роде неверный и развращенный! Доколе Аз с вами, доколе терплю вас?» — возгласил в долготерпении Своем Господь — о тех, иже в безверии и притворстве, еще же в лености и пустоте сердца и в сквернах греховных, приступали к Нему, и тма суще, к Свету Чистейшему приобщали себя. Но се и мы, аще и христиане именуемии, такожде мучим и распинаем Спасшаго нас, ибо злобою многою и ожесточением, и изменами неверия, и язвами всесожигающих страстей по вся дни уязвляем Его, и не могуще от хладности и небрежения, и от лени своея, в покаяние и исправление приити, паче и паче движем на себя праведный гнев Судии. Ты же, единое Упование наше, благодатию вся могущи, — можеши и сия неисцельные недуги уврачевати нам и праведне на ны движимый гнев Божий Твоим предстательством и молитвами утолити и отвести.
Сего ради всем усердием, всею любовию своею и из глубины сердца воздыханьми к Тебе припадаем и вопием:
О, Благодатная, помози нам, о помози, — Матерь милосердная, из мерзкой тины грехов изыми.
О, Благодатная, елеем любве Твоей одеревеневшее сердце наше смягчи, — всех нас возлюбившая, лучами доброт Твоих оледянение лености нашей и самохотных вожделений в нашей душе растопи.
О, Благодатная, в веру, в жизнь духа призови нас и введи, — Дево Пречистая, сердцем коснутися святости и любви Христовой нас подыми.
О, Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.
Или ин припев:
О, Благодатная, Ты нас спаси и любовию Твоей утоли нашу печаль.

Кондак 9
Сотвори Тебе величие Сильный, яко возлюбленной Матери Божественнаго Сына Своего, яко Святейшей из святых, Честнейшей херувим и Славнейшей без сравнения серафим. Обаче и Тебе путем крестным идти к сей славе указала Отчая Любовь, егда устами Симеона предрече, како оружие пройдет сквозе матерински — скорбящее сердце Твое. Мы же, яко во спасение наше все сие будет, ведущии, и безмерности Божественной благости к нам грешным постигнути не могущии, благодарне песнь хваления возносим Ему: Аллилуия.

Икос 9
Огненную цепь лютых мучений, и наипаче позорнаго пригвождения ко кресту, претерпе пред очима Твоима Божественный Сын, до конца покорною Отцу волею испив чашу, все грехи мира омывающих, страданий Своих. И то зряще и сердцем с Сыном распинающися, до конца испила и Ты чашу сию, изболевшим сердцем Своим усыновив Себе во Христе всех страждущих и озлобляемых, кои изнемогают под бременем жизненнаго креста своего. Сего ради и мы во всех печалех и тесных обстояниих своих, к Тебе, яко Матери состраждущей всем скорбным и угнетенным, прибегаем и в горестях и напастях дней сих Тебе с надеждою крепкою зовем:
О, Благодатная, Ты нас заступи, — Любовию пламенеющая, болезни лютыя многовоздыхающия души моея утоли.
О, Благодатная, терпением в скорбех наших усоверши, — Благословенная Богородице, силу поборати искушения в нас утверди.
О, Благодатная, от злых обстояний нас свободи, — Матерь Всеблагая, Твою силу — всепобеждающую и врагов правды разящую — народу маловерному ныне яви.
О, Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.
Или ин припев:
О, Благодатная, Ты нас спаси и любовию Твоей утоли нашу печаль.

Кондак 10
Искони видеша народи христианстии Твое, о крепкая Охрано бедствующих и погубляемых, неусыпное о них попечение, ея же ради вины и прославиша Тя вси и из рода в род свидетельствоваша о дивных чудесех, всюду поборающей о верных и на всякую усердную мольбу поспешающей, всесильной помощи Твоей, и тако благодарственне пели и поют из края в край о Тебе песнь хвалебную Богу: Аллилуия.

Икос 10
Велие чудо сотвори Господь Твоего ради, о Матерь Божия, всемощнаго об отцех наших ходатайства. Егда бо великий ненавистник рода христианскаго и лютый мучитель Темираксак хваляшеся всю Русскую землю положити в запустение и искоренити христианскую веру, к Тебе возопиша людие Твои о спасении и в покаянии и слезах многих притекоша к святей Владимирстей иконе Твоей. И бежа тогда нечестивый, ибо в сонме святых узре той Тебе, яко Царицу, во славе неизреченной, молниезрачными лучами паче солнца осияваемую и ему отъити от предел нашея страны грозно претящу, о верных же Своих, рукама простертыма, к Сыну Своему молящуюся. Мы же, верою несомненною великое море чудес Твоих вспоминающе, и все чаяние свое на Тя возложше, от моря злых устремлений, и в нас самех и окрест нас ополчившихся, и ныне оградити народ наш умоляем и в рыданиях многих поем:
О, Благодатная, на ны належащую грозу отжени, — Мати Благая, покрывши любовию, разслабление наше удали и прости.
О, Благодатная, силу и лепоту Православия миру яви, — веры Хранительнице, и нас убогих достойными ея сотвори.
О, Благодатная, солнца превысшую славу Твою нашему сердцу открый, — Ты, Матерь Света, тму належащую с наших очес разжени.
О, Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.
Или ин припев:
О, Благодатная, Ты нас спаси и любовию Твоей утоли нашу печаль.

Кондак 11
Многажды и отцы наши ослабеваху в добром христианстем житии своем, и темнотою и невежеством, пороки и неправдами, такожде и братоненавидением и обидами слабому, в тину студодеяния себе погружаху. Обаче, и падающе глубоце, не к инем кумирам, но к Единому Богу — Спасителю своему прибегаху, и горняя возлюбив, покаянием же слезным к Тебе, Заступнице Усердной, очи свои возводяще, не преставаху пред святыми Твоими иконами пети: Аллилуия.

Икос 11
Разоряшеся некогда страна Русская лихолетием, егда смуты и безначалие, татьбы и обманы, убийства и кровопролития, и злоба многая обуяша люди православные, и измалодушествовалися вси, себе погубляюще; еще же и тяжкому врагов иноверных и жестоких нашествию предаде я Господь. И кто же бы спас тогда изнемогших и яко листвия разсыпавшихся, и уже в бездну отчаяния пришедших отцев наших, аще не Ты, о Всеблагая, умилосердилась о них, Еяже предстательством, якоже поведа святый угодник Божий и молитвенник за ны, Сергий, суд об отечестве нашем на милость преложил Владыка Христос. Та вся вспоминающе и большия сих зол во дни наша видяще, и яко в волнах морских погибающии, и мы Тебе громце зовем:
О, Благодатная, злобе врагов лютых одолеть нас немощных не попусти, — мира Владычице, вспять козни губительныя их обрати.
О, Благодатная, Судию Праведнаго о нас умоли, — кротости величие, тишину мира и любви в народе Твоем утверди.
О, Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.
Или ин припев:
О, Благодатная, Ты нас спаси и любовию Твоей утоли нашу печаль.

Кондак 12
Излияся благодать, во апостоле языков сущая, на вся верующия, яко и на недужныя наносиша от пота тела его главотяжи и убрусцы, и тии исцеляхуся от недуг своих, такожде гонимии силою Божиею, бежаху и духи нечистии из них. Изливаеши и Ты, Преизбыточествующая благодатию, сию от полноты Твоея во святыя иконы Твоя, яже избираеши в знамения от Твоея любве помощи верным, надеющимся на Тя, да поем, радостию торжествующе о сих явлениях силы Твоей, вси Прославльшему яко Царицу, Тебе: Аллилуия.

Икос 12
Многое множество милости Своея явила еси, Богородице, православным людем Твоим, наипаче же во святых написаниях Пречистаго Лика Твоего. Ибо и сия дивная знамения во множестве явишася в наши дни, ихже не знаша отцы наши и ни единый народ на земли, яко единою точию благодатною силою Твоею, яве же и совершенне ничем иным, обновишася и светло сияют святыя иконы Твои. И то зряще и по достоянию воспети сия величия недоумеюще, благоговейно преклоняются и умиляются сердцем вси верные люди Твои. Сего ради и мы ныне, у Тебе единыя утешения ищуще, и благодарным сердцем дивныя дела любве Твоея свидетельствующе, аще и хладно есть в вере житие наше и пусто от разленения греховнаго сердце наше, прилежно у Тебе просити благаго пришествия Твоего подвизаемся, и в вышняя Твоя сердце подъемляюще, едиными усты и единым сердцем Тебе вопием:
О, Благодатная, к доброму житию по вере Христовой наш дух пробуди, — жизнь нам Родившая, от закоснения нас сохрани.
О, Благодатная, в надежде незыблемой Ты нас утверди, — Дево Владычице, Твоими верными вся ны соблюди.
О, Благодатная, сия страны дальния покровом Твоим осени, — о всех болезнующи, во благо устроити нашу горькую жизнь научи.
О, Благодатная, помилуй нас и спаси, и пачесолнечною теплотою любве Твоея грехми умерщвленный наш дух оживи.
Или ин припев:
О, Благодатная, Ты нас спаси и любовию Твоей утоли нашу печаль.

Кондак 13
О, Преблагословенная Мати, пред Еяже любовию точию льна курение и самое сильное желание наше. Умилосердися на ны, Твоя многогрешныя рабы, прости и помилуй вся ны Твоею любовию молим Тя; помози, даруй избавление от отяготевших толико лет лютых зол и бед верному народу Твоему, сынами неверия порабощенному и растлеваемому. Твое избавление пошли — врачующее и наши недуги душевные, да на благое и верное житие по благому закону Сына Твоего приидем мы и да сердцем исцельшиися, и о свете веры нашея святыя радующеся, сыновне из рода в род благодарною любовию и умилением воспеваем Всеблагому Отцу своему: Аллилуия.
Сей Кондак глаголется трижды. Таже Икос 1-й: Тма неверия... И Кондак 1-й: Избранной Небесным Царем...

Молитва ко Пресвятой Богородице
Богородице Дево, надеждо всем концем земли, Заступнице рода христианскаго! Пред честною иконою Твоею припадающе и неисчетная Твоя благодеяния отцем нашим воспоминающе, вси мы к Тебе прибегаем и из глубины сердца усердно вопием: град наш и во удалении сущия люди Твоя милостию Твоею посети и от всякаго зла соблюди.
Даруй мирови мир, земле плодов изобилие, державе Русской крепость и единение, в мирном житии христианстем преспеяние и мудрое строение, на враги же одоление... < br>О, Премилосердная Царице Небесная, паче материнския любве нас, недостойных чад Твоих, возлюбившая! Ты видиши, яко плача и рыданий достойно есть нынешнее житие наше, и до конца от невидимых и видимых врагов в путь погибели преходит. Ибо вси мы от твердыни закона Бога нашего отвергохомся и в лености и маловерии изнемогаем; яко сын блудный, на страну далече от пути правды Его заблудихом и о спасении нашем нерадим. Несть мира, несть любве в сердцах наших, и тмою грехов многих ослепили мы духовныя очи свои. О, Пренепорочная и Пречистая Владычице, благая Мати издревле вернаго народа Твоего, ныне безмерными падении низу поверженнаго! Вси мы, грешнии и непотребнии раби Твои, в стенании сердца нашего воздыханиях горьких и покаянии нелицемернем к Тебе, яко последней помощи и отраде нашей, прибегаем и неотступно Тебе зовем: воспомяни веру и молитвы отец наших, не отвергнись от нас, но воздвигни из глубины греховныя и от тяжкой пленицы беззаконий свободи; всеисцельную силу Твою ниспосли, стеною покрова Твоего нас, в беде и отчаянии сущих, огради и во правой вере и делании заповедей Христовых утверди; облецы ревностию и святынею пастырей наших, дух их, во еже прилежати доброму деланию в винограде сем, возбуди, и общение веры и братскаго друг о друге попечения в стаде Христовом насади и возрасти; разсеянныя собери, унывающее сердце наше любовию и умилением согрей, и всех нас в единомыслие и истину приведи; заблудших же и от православной веры отступльших братий наших вразуми и во единение святыя Церкве, яко спасительнаго для нас ковчега, возврати; скорбящия и во искушениях сущия умудри и подкрепи, озлобленныя умири, юныя направи; сирыя, убогия и вся бедствующия ризою Твоею честною защити. О, Всесильная Владычице, Радосте всех скорбящих и страждущих, дивная Помощнице люте обуреваемых! Услыши нас, услыши, молим Тя, — вонми стенаниям и рыданиям многим несчастных чад Твоих, зле ныне погибающих. Посети милостию Твоею братий, наших, во гладе и болезнех смертных сущих, лютыя нужды их утоли и от всяких злых обстояний избави. Буди всем, притекающим к Тебе, верная помощь, утешение и благоотишное пристанище от всяких бурь и напастей многомятежныя нашея жизни: Ты бо еси больных исцеление, скорбящих терпение и отрада, заблудших и соблазняемых вразумление и на пути правды утверждение. Приими зде приносимая моления наша и вознеси их к престолу Всевышняго, яко да Твоим предстательством ограждаеми и всемощным покровом Твоим милостиво осеняеми и соблюдаеми, в благодарении сердца нашего прославим, всегда победители нас творящаго — Бога, и Тебе, о наше по Бозе благодатное Упование, ныне и присно, и во веки веков. Аминь.

Источник: Покаянный акафист Пресвятой Владычице нашей Богородице. — San Francisko: Напечатано в Богородице-Владимирском женском монастыре, 1980. — 22 с.

Об акафисте
Сей Акафист составлен родителем Первоиерарха РПЦЗ [свт. Филарета, митр. Нью-иоркскаго], в Бозе почившим архиепископом Димитрием Хайларским (бывш. протоиереем Николаем Вознесенским) в 1925 г. в честь и память великих чудес Обновления честных изображений, в то время совершавшихся на Дальнем Востоке, наиболее же в память Обновления в обители св. образа Владычицы Владимирской.
Перепечатано ко дню Пятидесятилетия в священном сане (1931 — 4 января — 1981) Его Высокопреосвященства Высокопреосвященнейшаго Первоиерарха Русския Зарубежныя Церкви Митрополита Филарета. (Прим. издателей.) «К кому возопию, Владычице? К кому прибегну в горести моей? Кто плач мой и воздыхание мое услышит? Кто помощь и заступление скорое подаст? К кому возопию, аще не к Тебе Пренепорочной Заступнице нашей и Ходатаице неусыпной...»

Источник: http://osanna.russportal.ru