Кондак 1
Взбранной Воеводе, Царице неба и земли, / в веси Сухо-Калигорской чудесами просиявшей, / благодарственное приносим пение: / не презри молений раб Твоих, Твоего Покрова и заступления ищущих, / но, яко имущая державу непобедимую, / от всяких нас болезней душевных и телесных исцели, / от враг видимых и невидимых защити, / да во умилении зовем Ти:
Радуйся, Всеблагая Владычице, / Твоим предстательством нас милующая!

Икос 1
Ангельстии чины Тя славословят, Богородице Дево, Честнейшую Херувим и Славнейшую без сравнения Серафим, величающе, землю черкасскую Своею святою иконою просветившую и чрез нея исцеления всем, пред нею усердно Тебе молящимся, дарующая. Тем же и мы, зряше на Твой умиленный лик, радостно взываем:
Радуйся, Бога Слова плотию нам рождшая,
Радуйся, сосцами Его вскормившая.
Радуйся, пеленами Его повившая,
Радуйся, любовию Своею Его покрывавшая.
Радуйся, любовь Его на Себе познавшая,
Радуйся, душу Свою в руце Его предавшая.
Радуйся, нас Себе усыновившая,
Радуйся, никогдаже нас оставляющая.
Радуйся, Всеблагая Владычице, Твоим предстательством нас милующая!

Кондак 2
Видяще Тя, Царице Небесная, во сне некий воин раненый, усердно моливший Тя об исцелении от тяжкаго недуга, вынувшей осколок из-под сердца его, и восстав от ложа здравым, воспеша славу Тебе, Целительнице своей. Темже и мы, воспоминая Твоя чудеса, со умилением зовем Богу: Аллилуия.

Икос 2
Разумея чудо исцеления некоей инославной отроковицы, ея сродники, воспылаху любовию к Тебе, Владичице, ежегодно посещая храм Иоанна Богослова, в коем Ты прославиша Свою икону, пред нею усердно воссылая хвалы Тебе, Богоотроковице. Тем же и мы, видяше любовь Твою даже и к заблудшим, с радостию зовем Ти:
Радуйся, верных ко спасению ведущая,
Радуйся, заблуждающих вразумляющая.
Радуйся, сирых Своим Покровом осеняющая,
Радуйся, всех в Царствие Небесное зовущая.
Радуйся, призывающих Тя милующая,
Радуйся, болящих исцеляющая.
Радуйся, скорбящих утешающая,
Радуйся, обидимых и гонимых защищающая.
Радуйся, Всеблагая Владычице, Твоим предстательством нас милующая!

Кондак 3
Сила Вышняго осени некую жену, в умопомешательстве зело страдающую, и сестру ея, расслаблением болящую, и усердно Тя, Заступницу Усердную, пред Твоим чудотворным образом о помощи зовущую. Сын Божий, Иисус Христос, Твоим предстательством, прости им тяжкии греси немилосердия и отчаяния злаго, и дарова им исцеление. Видяще Твое милосердие неизглаголанное к кающимся грешником и мы выну зовем Богу: Аллилуия.

Икос 3
Имея Твою икону, аки Боготечную звезду, некая жена усердно моляше Тя о помощи, призвав честных иереев Божиих со святою иконою, кои, помолившись, освятиша воду. И, егда крест святый прикоснуся к иссякшему источнику, той внезапу исполнися вод. Мы же ведая Тя, Пречистая Дево, источника благодати, с любовию зовем Ти:
Радуйся, воду благодати источающая,
Радуйся, ею же нас утешающая.
Радуйся, помощию Своею не оставляющая,
Радуйся, от недугов тяжких исцеляющая.
Радуйся, звездо, к Небеси путеводящая,
Радуйся, от грехопадений лютых отводящая.
Радуйся, покаяние кающихся принимающая,
Радуйся, от праведнаго гнева Божия избавляющая.
Радуйся, Всеблагая Владычице, Твоим предстательством нас милующая!

Кондак 4
Бурею недоумения объята бысть владелица Сухой Калигорки, егда хотяше перевезти чудотворную икону из веси сей в свою домовую церковь, в граде Шполе находящуюся, но кони, воспротивившись сему, не восхотели убо тронуться с места. Тогда сия жена, познав неугодность Богу и Тебе, Владычице, делания сего, испросиша список с чудотворной иконы во умилении воспела еси Богу: Аллилуия.

Икос 4
Услыша Мати Божия стенания народа страждущаго и, аки на Силоам, к Твоей чудотворной иконе притекающаго, воспротивилась убо желанию сей жены, хотящей запретити доступ к Сухо-Калигорскому образу народа Божьяго, да воссияет убо чудесами сия икона всем, ищущим пред нею от Тебе, Благодатная, помощи, вопиющим Ти таковая:
Радуйся, всех молящих Ти ся слышащая.
Радуйся, прошения их исполняющая.
Радуйся, в скорбех утешающая,
Радуйся, от недугов исцеляющая.
Радуйся, смиренным сугубую благодать подающая,
Радуйся, гордых зело смиряющая.
Радуйся, кротких заступающая,
Радуйся, милосердным любовь дарующая.
Радуйся, Всеблагая Владычице, Твоим предстательством нас милующая!

Кондак 5
Боготечная звезда, икона Твоя честная, Царице Небесная, землю черкасскую сиянием великих чудес просвети, болящим даруяй исцеления, страждущим - утешение, заключенным - заступление и от уз скорое избавление, всем же нам велию милость, вопиющим Спасителю нашему: Аллилуия.

Икос 5
Видяще чудеса от иконы Сухо-Калигорской являемии, людие градов и весей спешили убо поклонитися Тебе и на руку Твоею держимому Богомладенцу, призывая Тя на помощь. И никогда же неуслышани отыдоша от нея, извествуя сим истину, яко кланящиеся иконе Твоей, честь сию Тебе воздают, Владычице, а не доске, закрывая уста еретиков нечестивых, не ведущих Ти пети тако:
Радуйся, Мати милосердия,
Радуйся, чистоты Хранительница.
Радуйся, ангельским чином Начальница,
Радуйся, бесов Воительница.
Радуйся, во аде страждущих утешающая,
Радуйся, молениями к Сыну Своему им помогающая.
Радуйся, всех призывающих Тя присно слышащая.
Радуйся, покаяние искудевшее в нас слезами Своими восполняющая.
Радуйся, Всеблагая Владычице, Твоим предстательством нас милующая!

Кондак 6
Проповедницы чудес Богоматери явишася жителие Елисаветграда, егда во время моровой язвы призывавшии в помощь Приснодеву Марию пред списками с чудотворной иконы Ея, исцеление скорое получаху, сим же познавая милосердие неизреченное Божией Матери, к Сыну Ея вопия выну: Аллилуия.

Икос 6
Возсия свет лампады пред чудотворною иконою Твоею, Преблагословенная, невидимою рукою в храме возжыгаемый. Егда причетник открыл еси храм и в нем узреша лампаду теплящуюся, познав, яко Ты еси Свет омраченных и выну молишися о нас грешных. Тем же мы, имея в сердце своем любовь к Тебе, аки лампаду неугасимую, выну восхваляем Тя сице:
Радуйся, свеще неугасимая пред Престолом Всевышняго,
Радуйся, огнь любве к Богу присногорящий.
Радуйся, выну молящаяся о всем роде человеческом,
Радуйся, восхваляющим Тя Заступница усердная.
Радуйся, на Тя - все наше упование.
Радуйся, яко Тобою чаем спастися.
Радуйся, ангелов посылающая для вразумления,
Радуйся, от бед надежное охранение.
Радуйся, Всеблагая Владычице, Твоим предстательством нас милующая!

Кондак 7
Хотяй даровати и граду Смиле милости Свои неизреченнии, Приснодево, благоволила еси список с чудотворной Сухо-Калигорской иконы принести во град оный, да тамо сей пребывая, такожде прославится чудесами. Чрез него же Пресвятая Богородица болящия исцеляет, бесы - прогоняет, благодатную помощь подает всем, с верою к нему притекающим, вопиющим Богу: Аллилуия.

Икос 7
Новое чудо милости Божией показует смилянский список с чудотворной иконы, егда некий раб Божий, одержим бысть беснованием, пред сим образом молящийся с верою и твердым упованием на Твою помощь, о Благословенная, получив оную и абие исцеле, прославиша Бога и Тебе, песньми сими:
Радуйся, икону Свою во утешение даровавшая,
Радуйся, чтущим даже списки с нея - помогающая.
Радуйся, чтити святыя иконы научающая,
Радуйся, иконоборцев злых посрамляющая.
Радуйся, Честнейшая Херувим,
Радуйся, Славнейшая без сравнения Серафим.
Радуйся, Бога плотию рождшая,
Радуйся, девство и чистоту сохранившая.
Радуйся, Всеблагая Владычице, Твоим предстательством нас милующая!

Кондак 8
Странно бе неверующим зрети, како список с чудотворной Сухо-Калигорской иконы, в веси Мошнах находящийся, обновися и лик Богоматери просия аки в блистании злата. Мы же, укрепляемии сим чудом, прогоняя маловерие и сомнение от сердец своих от врага спасения рода человеческаго всеваемое, речем: "Веруем, Владычице, яко Ты с нами присно пребываеши и выну помогаеши, помози нам и зде и в тамошнем житии прославляти выну Бога: Аллилуия.

Икос 8
Вси мы, недостойнии и грехами отягченнии, мирской суете предавшиися и о спасении своем вознерадившии, взирая на икону Твою, Владычице, слезами омываем свое окаянство и со скорбию зовем Ти:
Радуйся, Небесная наша Мати,
Радуйся, яко пристанища иного не имамы, разве Тебе, Владычице.
Радуйся, скорбящая о нашем маловерии,
Радуйся, плачущая о нашем окаянстве.
Радуйся, Сына Своего на иконе обнимающая,
Радуйся, от Его гнева праведнаго заступающая.
Радуйся, лице Свое от нераскаянных отвращающая,
Радуйся, покаяния их выну ожидающая.
Радуйся, Всеблагая Владычице, Твоим предстательством нас милующая!

Кондак 9
Вся страна наша, Богородице, Твоими милостынями, аки покровом, покрыта, немолчно славит имя Твое и почитает святыя иконы Твоя, между коими Сухо-Калигорская, аки адамант безценный на Небеси сияет, Ангельскии лики удивляя и людие наша в Православии укрепляя, вопиющии Богу: Аллилуия.

Икос 9
Ветия милосердия Твоего явишася, Всеблагословенная, иерей некий, егда моляшеся пред списком с чудотворной иконы, в веси Мошнах обретающимся, исцеление от тяжкаго недуга получи и научи всех пети Тебе тако:
Радуйся, яко рождеством Твоим мир освятися,
Радуйся, приснодевством Твоим он обогатися.
Радуйся, послушанием воли Божией окрылившая,
Радуйся, надеянием во всем на Бога возвысившая.
Радуйся, во успении Твоем нас не оставившая,
Радуйся, Звездо неугасимая.
Радуйся, о гресех наших Молитвенница,
Радуйся, за грехи наши Умилостивительница.
Радуйся, Всеблагая Владычице, Твоим предстательством нас милующая!

Кондак 10
Спасти хотяще, Пресвятая Богородица, некую девицу от головной болезни внезапу ослепшую, трижды явишася ей во сне, повелевая идти в Сухую Калигорку. И зде, в храме Иоанна Богослова, по окончании Божественной Литургии и Молебствия, егда священник помаза очи болящей святым елеем от лампады, пред чудотворным образом горящей, девица внезапу узреша лик Твой, Богомати, и в радости сердечной Богу себе уневестившая, подражая в сем Тебе, Владычице, воспела еси Богу красную песнь: Аллилуия.

Икос 10
Стена еси девам и иноком, Богоневесто, похвало иереев честных и благоговейных являешися. Ибо под Твоим водительством первии - в непрестанной молитве Бога созерцаше, втории же - Безкровную Жертву за весь мир, живых и мертвых, приношаху. Мы же купно с ними Тебе воспеваем песнопения сия:
Радуйся, молитве непрестанной и сердечной научающая,
Радуйся, послушанию Церкви навыкающая.
Радуйся, слезами Своими огрубелые сердца умягчающая,
Радуйся, обидимыя и гонимыя заступающая.
Радуйся, хулителей имени Божия карающая,
Радуйся, кающихся посещающая.
Радуйся, в неведении сущих вразумляющая,
Радуйся, в болезнех страждущих исцеляющая.
Радуйся, Всеблагая Владычице, Твоим предстательством нас милующая!

Кондак 11
Пение всеумиленное возношаху Тебе, о Богомати, пред чудотворным образом, некий священник, о сыне своем, ибо той внезапу в расслабление впаде. Зряше лучи от Богомладенца исходящии укрепишася в вере и во уповании на Твою помощь, Богородице. Отрок же вскоре исцеление получи. Мы же, видяще таковое твое чудо, Богомладенцу славу воссылаем: Аллилуия.

Икос 11
Светоприемную свещу зрим чудотворную икону Твою, Богообрадованная, во стране черкасстей силою Божиею вознесенную, землю нашу обильными благодатными дарами посещающую и Покровом Своим осеняющую. Темже вопием Ти таковая:
Радуйся, зревше страдания Сына Своего зело страдавшая,
Радуйся, о гресех наших скорбящая.
Радуйся, праведный гнев Божий от нас отводящая,
Радуйся, славу Воскресшаго первая созерцавшая.
Радуйся, на мытарствах бесовских заступающая,
Радуйся, любовию Своею многия ко Христу приведшая.
Радуйся, помощию Своею скорою многих исцеляющая,
Радуйся, из ада души там страждущих изводящая.
Радуйся, Всеблагая Владычице, Твоим предстательством нас милующая!

Кондак 12
Благодатную помощь от Тебе получают вси, исповедающии Тя истинною Богоматерию и Приснодевою, и возносящии мольбы свои к Тебе пред святыми Твоими иконами, никогда же неутешени отыдоша, но в вере укреляшеся, надеждою покрывашеся, любовию истинною исполняющиеся, вопиюще Подателю всех благ: Аллилуия.

Икос 12
Поюще Твоя чудеса от Сухо-Калигорской иконы являемии, Владычице, молим Тя, не отвратися от нас за греси наша, но посети миром землю сию, ереси и расколы в ней потреби, а заблуждающих к свету истины приведи, да воспоют Ти сице:
Радуйся, Святыя Православныя Церкви славо,
Радуйся, православным христианом отрадо.
Радуйся, земли нашей защищение необоримое,
Радуйся, томящихся во аде надеждо единая.
Радуйся, иереев честных наградо и утешение,
Радуйся, иноков и инокинь благо подвизающихся заступление.
Радуйся, любящих храмы Божии путеводительница,
Радуйся, сирых и бездомных призрительница.
Радуйся, Всеблагая Владычице, Твоим предстательством нас милующая!

Кондак 13
О Всепетая Мати, Всеблагая Владычице, Дево Богородице! Приими моление наше, пред Твоею чудотворною иконою Сухо-Калигорскою возносимое и не презри прошений наших, Благодатная: недугующия - исцели, заблудшия - вразуми, в темнице заключенным буди свободою и утешением, во аде страдущим - прохладою и милованием, да вси мы купно во умилении сердец воспоем триипостасному Богу: Аллилуия.
Сей Кондак чтется трижды, по сем Икос 1 и Кондак 1

Молитва
О Пресвятая Дево Богородице, Честнейшая Херувим и Славнейшая без сравнения Серафим, от Тебе бо родися Сын Божий Господь наш Иисус Христос, Его же мы зрим на святей иконе на руку Твоею держимаго, и веруем, яко Он всякое Твое прошение исполнит. Тем же, припадая телом и душею пред Ликом Твоим Святым, Заступница Усердная, усердно молим Тя: призри на нас, скорбьми и страстьми лютыми обуреваемых, и не воспомяни беззаконий наших, имиже Сына Твоего и Бога нашего зело прогневляем и Тя оскорбляем. Но буди нам Материю Милосердия и сотвори милость Твою на нас, подай каждому по прошению его: болящия - исцели, скорбящия - утеши, заблудшия - вразуми, в темнице заключенныя - утеши и на свободу изведи, маловерныя - укрепи, неверныя - к Свету Истины приведи, нас же всех в вере православной утверди.
О Премилосердная! Отпавшия от веры истинныя, паки с Церковью покаянием воссоедини, ересьми ослепленным даруй зрение духовное, дабы узрели пагубность лжеучений и познали убо Бога Духом Святым. Мир стране нашей даруй. Сохрани нас, Мати, от принятия печати Антихриста и не дай поколебатися в вере православной, но всех спаси, а на мытарствах от злых истязателей свободи. Да Твоим Покровом сохраняемии и Твоими молитвами препровождаемии, достигнем вожделеннаго Царствия Сына Твоего и Бога нашего Иисуса Христа, Емуже слава подобает со Отцем и Святым Духом во веки веков. Аминь.

Автор акафиста иерей Николай Розбицкий просит Ваших святых молитв, и о р.Б. Александре с семейством (комп. набор и верстка)

Тропарь, глас 4
Святою иконою Твоею, Владычице, / землю нашу посетившая, / исцеляеши всякую болезнь и всякую язю / всем с верою к ней притекающим, / темже посети, Благая, нашу немощь / и покрый от всяких бед и скорбей, / Твоею благодатиею, Пресвятая Дево.

Кондак, глас 8
Притецем, вернии людие, ко всемилостивой Владычице, / и поклонимся честной иконе Ея, в веси Сухо-Калигорской явленней, / принесем Ей в дар наше покаяние / и исправление от злых дел, / неизреченныя милости у Нея просяще, / и во умилении сердец вопиюще: / Ты бо милуеши нас присно, Всеблагая Владычице.