Кондак 1
Избранней от Святыя Троицы, превысшей Небесе и земли, Царице Богородице благодарственная песнопения воспеваем. Ты же, Пречистая, яко имущия державу непобедимую, от всяких нас бед свободи и на всякое разумение настави и к деланию заповедей Сына Твоего приведи, да зовем Ти:
Радуйся, Царице Богородице, упование и прибежище наша.
Икос 1
Во дни оны Пречистая Божия Мати милость Свою граду Чернигову дати восхоте. И се, чудная икона Ея на древе ели явися; тем же и нарицается Черниговская Елецкая. И вернии православнии людие с великою радостию ту икону взяша и Матерь Божию прославиша, глаголюще:
Радуйся, Заступнице усердная рода христианскаго;
Радуйся, Поборнице верных.
Радуйся, яко Тобою радость воссияет;
Радуйся, бесов поражение.
Радуйся, благочестивых озаряющая смыслы;
Радуйся, мудрых века сего посрамление.
Радуйся, море чудес многоводное;
Радуйся, Споручнице грешных усердная.
Радуйся, к Сыну Твоему ходатайство немолчное;
Радуйся, благ вечных Подательнице.
Радуйся, Сокровище многих щедрот;
Радуйся, верных спасение чудное.
Радуйся, Царице Богородице, упование и прибежище наша.
Кондак 2
По времени, грех наших ради, сия икона чудотворная утрачена бе; но не до конца прогневася Пресвятая Богородица и милость Свою граду Чернигову паки возврати. И се, иная чудотворная икона во граде Чернигове явися, во обители пророка Божия Илии; тем же и наречена бе Черниговская Ильинская. Мы же, грешнии, милость Пресвятыя Богородицы прославляем, вопиюще: Аллилуйя.
Икос 2
Многажды прегрешили есмы и каемся трепеща: неужели гнев Господень поразит нас? И паки таяжде творим. И во дни оны святая обитель пророка Илии разорена бе и икона чудная Пресвятыя Богородицы исчезе. Но и списки ея чтимии мнози по земли Русстей распространишася. Мы же, грешнии и смиреннии, яко видехом милость Пресвятыя Богородицы, вопием:
Радуйся, Агнца и Пастыря Мати;
Радуйся, многих зол избавление.
Радуйся, Царице Небесе и земли;
Радуйся, Упование верных.
Радуйся, Столпе веры непоколебимый;
Радуйся, скорбящих Отрадо и Утешение.
Радуйся, Главизно пророческих словес;
Радуйся, мученик светлая Славо.
Радуйся, в терпении помощь всесильная;
Радуйся, падших восстание.
Радуйся, заблуждших вразумление;
Радуйся, Сокровище благих неоскудное.
Радуйся, Царице Богородице, упование и прибежище наша.
Кондак 3
Имущи упование на Тя, всех христиан Надеждо, благочестивая девица Александра, получивши в дар икону сию честную, во граде Чернигове явлену, пред нею же излиющи всю скорбь души своея, вопиющи: Аллилуйя.
Икос 3
Имущи ум в Бозе утвержден и Господу Иисусу и Пречистей Матери Его послужити хотящи, девица Александра икону сию во обитель Гефсиманскую, иже при лавре Сергия преподобного, в рукотвореныя пещеры пожертвовати восхоте, да молятся иноци пред нею, глаголюще:
Радуйся, Христа Бога нашего Пречистая Мати;
Радуйся, Утробо Божественнаго воплощения.
Радуйся, превысшая Небесных воинств;
Радуйся, бесов поражение.
Радуйся, человек упование и утверждение;
Радуйся, наше спасение вечное.
Радуйся, мира неустанная Хранительнице;
Радуйся, земли Русския Предстательнице и Защитнице.
Радуйся, в бурех и напастех пристанище;
Радуйся, просвещение во тьме сущих.
Радуйся, в нуждах скорая Помощнице;
Радуйся, иноцев Наставнице.
Радуйся, Царице Богородице, упование и прибежище наша.
Кондак 4
По прошествии лет Пречистая Дева Богородица сию Свою икону чудесы многими прославити восхоте, да славят людие Московстии благодать Божию, непрестанно зовуще: Аллилуйя.
Икос 4
Во дни оны благочестивая жена Фекла, тяжцем недугом обдержима сущи и николи же исцеление получити сподобльшися, в пещеры Гефсиманстии принесена бе. И абие недуг расслабления остави ю пред лицем людий многих. Тем же и мы благодарно вопием:
Радуйся, всея Вселенныя Мати;
Радуйся, скорбей и печалей наших Утоление.
Радуйся, в бедах и напастех Заступление;
Радуйся, Щите всем чистым сердцем.
Радуйся, просвещение во тьме сущих;
Радуйся, Надеждо благочестивых неизменная.
Радуйся, Взыскание нас погибающих;
Радуйся, христианом ходатайство благоприятное.
Радуйся, Ниво щедрот многоплодная;
Радуйся, Разума свет воссиявшия.
Радуйся, Живот, Истину и Путь нам показавшия;
Радуйся, яко в Рождестве и по Рождестве Дева пребываеши.
Радуйся, Царице Богородице, упование и прибежище наша.
Кондак 5
Вси людие Московстии дивящеся, како в пещерах новозданных таковое чудо явися. И абие святитель Иннокентий, стольнаго града Москвы пастырь, сие чудо испытати восхоте. И в беседе с женою Феклою истину уведый, прослави благодать Божию и милость Царицы Богородицы, вопиюще: Аллилуйя.
Икос 5
От того дне и часа прослави Царица Небесная сию икону Свою чудесы многими; не токмо в земли Московстей, но и паче из многих мест земли Русской людие притекаху и благодати исцелений сподобляхуся. Тем же и мы благодарно вопием:
Радуйся, благословенная в женах;
Радуйся, благая Вратарнице, Небеса открывающая.
Радуйся, Руно орошенное;
Радуйся, Стено необоримая.
Радуйся, Свеще неугасимая;
Радуйся, чудес Подательнице.
Радуйся, ширшия небес;
Радуйся, Скиние святая, в ней же прославися Господь.
Радуйся, Земле обетования;
Радуйся, Кивоте святыни.
Радуйся, человек естество обожившая;
Радуйся, Хлеб животный нам даровавшия.
Радуйся, Царице Богородице, упование и прибежище наша.
Кондак 6
Яко иногда от иконы тоя чудеса течаху обильно и людие православнии милости Господни прославляху; сице и ныне мы, недостойнии, Твоя, Владычице, благодеяния согласно славим, вопиюще: Аллилуйя.
Икос 6
Людие Русскии, благодать Божию славяще и сию икону новоявлену, многими чудесы прославлену, благоговейно лобызающе, вопияху:
Радуйся, Сына Твоего и Бога за нас умоляющия;
Радуйся, ходатайство ко Господу благоприятное.
Радуйся, оружие на врази многовидное;
Радуйся, Покрове овцам Христовым.
Радуйся, духу сокрушенному Отрадо и Утешение;
Радуйся, от напастей вражиих защищение.
Радуйся, Заре света Христова;
Радуйся, возвестившия пленным спасение.
Радуйся, высото несравненная;
Радуйся, горних воинств честнейшия.
Радуйся, Утро, принесшее День;
Радуйся, рождшая Солнце правды.
Радуйся, Царице Богородице, упование и прибежище наша.
Кондак 7
Егда бури и напасти землю Русскую посетиша, грех наших ради; тогда и обитель Пещерная разорению подвержена бысть. Токмо храм Черниговския Божия Матере, разорения избегнувый, многия люди привлекох, да вопиют пред образом Ея чудотворным: Аллилуйя.
Икос 7
Егда жидобожнии человеци рассверипеша и храм святый и икону чудотворную уничтожити восхотеша; тогда благочестивии работници Московстии, ихже имена Ты, Господи, веси, сию икону у жидобожных испросиша; и тии повелеша, икону чудотворную да возьмут и в стольный град Москву да принесут. Яко невозможная человеком Богови возможно есть. И ныне мы, грешнии, взываем:
Радуйся, Радосте нечаянная;
Радуйся, в бедах и напастех скорая Заступнице.
Радуйся, победившия фараона мысленнаго;
Радуйся, благ духовных Подательнице.
Радуйся, к мiру горнему Восхождение;
Радуйся, благочестивых человек укрепление.
Радуйся, благаго Промысла сослужительнице;
Радуйся, Церкве Божия укрепительнице.
Радуйся, православных христиан Отрадо и Утешение;
Радуйся, милости неиссякаемый Источниче.
Радуйся, яко к Тебе руце воздеваем;
Радуйся, яко нозе Твои лобызаем.
Радуйся, Царице Богородице, упование и прибежище наша.
Кондак 8
Егда тии благочестивии работници честную Твою икону взяша и в стольный град Москву принесоша; тогда Ты, Пречистая Богородице, сию икону в храм преподобного Сергия, иже на Рогожках, поместити благоволила еси. И вси людие Московстии со умилением ю лобызаху и милость Сына Твоего прославляху, вопиюще: Аллилуйя.
Икос 8
Егда Твоя, Владычице, чудная икона в стольный град Москву принесена бе; тогда людие Московстии ко святыни Твоей стекахуся и со умилением вопияху:
Радуйся, Радосте наша, яко нас покрываеши честны́м Твоим омофором;
Радуйся, обилие чудес источающая.
Радуйся, за нас грешных Ходатаице неустанная;
Радуйся, праведных утверждение.
Радуйся, похвало иереев благоговейных;
Радуйся, Покрове, ширьший облака.
Радуйся, скорбящих Утешение;
Радуйся, юных вразумление и напутствие.
Радуйся, Свете, во тьме светящий;
Радуйся, уязвлений греховных Целительнице.
Радуйся, райския врата отверзающия;
Радуйся, к Сыну Твоему и Богу благая Путеводительнице.
Радуйся, Царице Богородице, упование и прибежище наша.
Кондак 9
Во дни оны фиал гнева Господня на землю Русскую, грех наших ради, пролился бе; и мнози храми Божии разорени беша, и мнози иереи Божии убиени беша. Такожде и храм преподобнаго Сергия на Рогожках разорен бе и икона Твоя чудная, Богородице, изъята бе и где ныне – не вемы. И рыдаху людие Московстии, но и плач свой во упование претворяху, вопиюще: Аллилуйя.
Икос 9
Во дни оны мнози вернии аки бы приговорени к смерти ся мысляху; но в непобедимем смирении Богородице взываху:
Радуйся, от горя и бед страждущих нас избавляющия;
Радуйся, скорбь и печаль потребляющия.
Радуйся, Хранительнице верных;
Радуйся, заблуждших исправление.
Радуйся, тьму греховную разгоняющия;
Радуйся, мрак душ наших просвещающия.
Радуйся, врага спасения нашего поражение;
Радуйся, благая Покровительнице всех с верою к Тебе прибегающих.
Радуйся, радостей Источниче;
Радуйся, всемилостивая Скоропослушнице, преклоняющия слух к молению нашему.
Радуйся, в терпении помощь всесильная;
Радуйся, Купино Неопалимая, сохраняющия нас от огненных стрел лукаваго.
Радуйся, Царице Богородице, упование и прибежище наша.
Кондак 10
По слову святаго Апостола Твоего, Господи, тамо подаеши неизреченную благодать, идеже множайший процвете грех. И во дни оны огненным испытанием Отечественныя войны землю Русскую Ты, Господи, посетил еси. Но во огненнем испытании святая Церковь Твоя возродися и чада ея от уныния воспряша, радостно зовуще: Аллилуйя.
Икос 10
Яко и́ногда при Константине Велицем, тако и по прошествии испытания огненнаго войны Отечественныя храми Божии вновь открышася и благочестием просияша; и святая Лавра Сергиева вновь из запустения восста. И Твоя, Пречистая Дево, икона Черниговская, список тоя чудотворныя иконы, в соборе Святыя Троицы помещена бе для почитания верным. И к Тебе, Пречистая, православный народ притекох припадаяй и вопияй:
Радуйся, Радосте наша;
Радуйся, Покрове святый, ширьший облака.
Радуйся, грешных воззвание;
Радуйся, праведных утешение и укрепление.
Радуйся, потопившия фараона мысленнаго;
Радуйся, верным наставление.
Радуйся, мiра Обновительнице;
Радуйся, Книго живота вечнаго.
Радуйся, о Тебе бо ликует всякая тварь;
Радуйся, Главизно пророческих словес.
Радуйся, пред Сыном Твоим неусыпная Ходатаице;
Радуйся, пастырей назидание.
Радуйся, Царице Богородице, упование и прибежище наша.
Кондак 11
Аще и послабление гонением посла Господь, но и мнози обители в разорении и запустении лежаху. Такожде и обитель Гефсиманская, Дом Пресвятыя Богородицы, в разорении бе и людие благочестивии плакаху, но ничесо же сотворити можаху. Но не ведяху, яко близ есть избавление, яко рекл есть Господь: се Аз отворяю и никто же затворит. И ныне мы, грешнии и смиреннии, со страхом и верою взываем: Аллилуйя.
Икос 11
Яко и́ногда вернии пояху: Яко по суху пешешествовав Израиль по бездне стопами, сице и ныне вернии вси препоны проидоша и обитель Гефсиманскую возродиша. Такожде православнии с любовию и радостию взываху:
Радуйся, нам грешным благосердая Споручнице;
Радуйся, яко на Тебе по Бозе все упование наше.
Радуйся, Радосте несказанная;
Радуйся, адовых врат поругание.
Радуйся, Цвете неувядаемый;
Радуйся, веры и слез воздаяние.
Радуйся, Архангельский глас приемшия;
Радуйся, яко Тебе ублажат вси роди.
Радуйся, о Тебе же ликует всякая тварь;
Радуйся, Тебе же превозносит ангельский лик.
Радуйся, верных Державо;
Радуйся, Надеждо христиан неизменная.
Радуйся, Царице Богородице, упование и прибежище наша.
Кондак 12
Яко иногда в веце девятомнадесяте, такожде и в веце двадесятом Пресвятая Богородица братство иноцев собра; и во утешение и во укрепление им мощи преподобного Варнавы, старца утешителя Гефсиманского, обрести и прославити благоволила есть. И ныне мы, недостойнии, к его многоцелебным мощам припадающе, благодарно вопием: Аллилуйя.
Икос 12
По времени иное благодеяние Пречистая Божия Мати обители Своей дати восхоте; и Свою честную икону, чтимый список тоя чудотворныя иконы Черниговския Гефсиманския, из обители преподобнаго Сергия в Свою обитель Гефсиманскую пренести повеле. И братие и вси вернии возрадовашася и ко Пречистей Богородице вопияша:
Радуйся, Пречистая Мати;
Радуйся, яко в нас маловерных веру в Сына Твоего и Господа укрепляющия.
Радуйся, яко нас немощны́х любити и славити Господа научающия;
Радуйся, Преблагословенная во веки.
Радуйся, о Тебе же ликуют силы небесныя;
Радуйся, Главизно спасения нашего.
Радуйся, Тебе же возносит Апостольский лик;
Радуйся, яко вседержавному Покрову Твоему себе вручаем.
Радуйся, верных нерушимая Державо;
Радуйся, яко с высоты Небесныя на смиренныя рабы Твоя призирающая.
Радуйся, юных научение и укрепление;
Радуйся, благочестивых утешение.
Радуйся, Царице Богородице, упование и прибежище наша.
Кондак 13
О, всепетая Мати, рождшая всех святых святейшее Слово! Нынешнее приемши приношение, от всякия избави напасти всех и будущия изми муки, о Тебе вопиющих: Аллилуйя.
Этот кондак читается трижды. Затем читается икос 1-й и кондак 1-ый
Молитва
К кому возопию, Владычице наша, Пресвятая Богородице, к кому прибегну в печали моей, аще не к Тебе, Заступнице всех труждающихся и обремененных? Кто плач мой и воздыхание мое приимет, аще не Ты, Помощнице и Покровительнице рода нашего? Услыши и ныне моления наша, Тебе приносимыя, буди нам отрада и утешение, всех благ подательница. Управи житие наше, якоже веси. Буди покров милости Твоея на нас, грешных. И ныне мы, смиреннии, благодарно вопием:
Радуйся, Радосте наша, покрый нас от всякого зла честным Твоим омофором. Аминь.
Молитва Божией Матери пред иконой Ее Черниговской-Гефсиманской
О Пресвятая Дево, Мати Христа Бога нашего, Царице Небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию покланяющихся пречистому образу Твоему: се бо, грехми погружаеми и скорбьми обуреваеми, взирающе на Твой образ, яко живущей Ти с нами, приносим смиренная моления наша, не имамы бо иныя помощи, ни инаго предстательства и утешения, токмо Тебе, о Мати всех скорбящих и обремененных.
Помози нам, немощным, утоли скорбь нашу, настави на путь правый нас, заблуждших, уврачуй болезненная сердца наша и спаси безнадежныя. Даруй нам прочее время живота нашего в мире и покаянии проводити, подаждь христианскую кончину и на Страшнем Суде Сына Твоего явися нам милосердая Предстательница, да всегда поем, величаем и славим Тя, яко Благую Заступницу рода христианскаго, со всеми угодившими Богу. Аминь.
Тропарь Божией Матери пред иконой Ее Черниговской-Гефсиманской, глас 5
Пречистая Владычице Богородице, упование всех христиан,/ понеже инаго упования не имамы разве Тебе,/ Всенепорочная Владычице моя, Госпоже Богородице,/ Мати Христа Бога моего./ Темже помилуй и избави мя от всех зол моих/ и умоли Милостиваго Сына Своего и Бога моего,/ да помилует окаянную душу мою,/ и да избавит мя от вечныя муки, и сподобит мя Царствия Своего.
Кондак, глас 6-й
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти; ускори на молитву и потщися на умоление, предстательствующи присно, Богородице, чтущих Тя.
Величания
Достойно есть / величати Тя, Богородице, / честнейшую Херувим / и славнейшую без сравнения Серафим.
Величаем Тя, / Пресвятая Дево, / Богоизбранная Отроковице, / и чтим образ Твой святый, / имже точиши исцеления \ всем с верою притекающим.
Празднование 1/14 сентября
Источник: опубликовано на сайте Веры Михайловны Ереминой с помощью Романа Дидорчука, руководителя официального интернет-представительства Троице-Сергиевой Лавры в интернете: http://vmeremina.narod.ru/ http://vk.com/stslavra Вера Михайловна Еремина родилась в 1949 г. В 1980-х гг. под фамилией мужа "В.М. Козлова" публиковалась в "Журнале Московской Патриархии". Многие годы исполняет служение секретаря Свято-Троицкой Сергиевой Лавры. Преподает историю Церкви и историю литературы в Российском Православном Университете во имя святого Иоанна Богослова при Отделе религиозного образования и катехизации Московского Патриархата.