Кондак 1
Избранней от всех родов, небеси и земли Царице,яко избавльшеся от вечныя смерти благодатию от Тебе рождшагося Христа Бога нашего и Твоим матерним пред Ним ходатайством, благодарственное пение приносим Ти, раби Твои. Ты же, Всемилостивая наша Заступнице, от всяких нас бед и скорбных обстояний свобождай и к царствию горнему путеводствуй, да зовем Ти:
Радуйся, Богородице Одигитрие, христиан упование.

Икос 1
Архангельский глас вопием Ти, Чистая: радуйся, Благодатная Одигитрие Марие, и радости духовныя исполни нас, да благоговейною душею и чистым сердцем принесем Ти, рождшей миру Спасителя Христа Бога нашего, глаголы сия:
Радуйся, Бога Отца благоволением осененная.
Радуйся, Бога Сына Мати еискусобрачная.
Радуйся, Бога Духа Святаго обитель священная.
Радуйся, Троическия тайны проявление.
Радуйся, ангельских умов удивление.
Радуйся, человеческаго рода украшение.
Радуйся, горняя с дольними совокупившая.
Радуйся, врата райския земнородным отверзшая.
Радуйся, лествице небесная.
Радуйся, стамно Богоприимная.
Радуйся, Купино Неопалимая.
Радуйся, трапезо пресвятая.
Радуйся, Богородице Одигитрие, христиан упование.

Кондак 2
Видев икону Пресвятаго Твоего лика, Богородице Дево, юже всехвальный евангелист Лука написа, рекла еси о ней пречистыми усты Твоими: «С сею иконою благодать Моя и сила». Таковое обетование Твое уведевше, благоговейно почитаем пресвятый образ Твой, Владычице, и воспеваем Сыну Твоему и Богу: Аллилуиа.

Икос 2
Уразумев благоволение Твое, Богородице, к сей иконе Твоей, славный Апостол Лука дарова ю в благословение и освящение Христовой Церкви Антиохийстей, в нейже Путеводительницей она наименовася и чудесы божественными прославися. О сем благодаряще Тя, Госпоже Всеблагая, яко подобие пречистаго лика Твоего во утешение нам оставила еси, усердно Тебе вопием:
Радуйся, Царице горних и дольних.
Радуйся, Владычице Ангелов и человеков.
Радуйся, мира умирение.
Радуйся, древния вражды разрушение.
Радуйся, девства столпе.
Радуйся, смирения глубино.
Радуйся, облеченная в солнце.
Радуйся, сияющая Божественною славою.
Радуйся, Мати Света Невечерняго.
Радуйся, раю сладости небесныя.
Радуйся, вертограде Христов благоуханный.
Радуйся, одре Царя Великаго.
Радуйся, Богородице Одигитрие, христиан упование.

Кондак 3
Силою Божиею чудеса предивныя совершаеши от иконы Твоея, Богомати Владычице: слепыя просвещаеши, всяк недуг в людех врачуеши благодатию Твоею, Богородице, да вси зовем прославльшему Тя Богу: Аллилуиа.

Икос 3
Имеяше Тя страна Русская Заступницу Державную, Богородице Дево, и во дни нападения врагов сильных и бранеискусных, помощь Твою многочудную от святыя иконы Твоея Одигитрии получаше. Темже молимся Тебе, Всеблагая: якоже древле землю нашу многажды от погибели спасла еси, тако и нас, смиренных, спаси от погибели вечныя матерним предстательством Твоим ко Христу Богу, да благодарно зовем Ти:
Радуйся, земли Русския крепкое ограждение.
Радуйся, храмов святых благодатное сокровище.
Радуйся, нечестивых ратей одоление.
Радуйся, врагов Православия посрамление.
Радуйся, чад Христовых Предводительнице к победам.
Радуйся, Помощнице скорая в бедах к Тебе притекающих.
Радуйся, Заступнице усердная молитвенно Тя призывающих.
Радуйся, богомудрых святителей Споспешнице во благовестии Христовом.
Радуйся, похвало жен и дев славо.
Радуйся, столпе огненный, зной страстей умеряющий.
Радуйся, столпе облачный, мрак грехов разгоняющий.
Радуйся, Марие, Мати Христа Бога нашего.
Радуйся, Богородице Одигитрие, христиан упование.

Кондак 4
Бурею страстей потопляемых спасаеши, Владычице, и победу над врагами видимыми и невидимыми людем христоименитым даруеши от святыя иконы Твоея Одигитрии, лучи света небеснаго испуская и ими светло просвещая, да вси уведят, яко Ты еси воистину Воевода державная и прославят милости Твоя и чудеса, воспевая Спасителю Богу: Аллилуиа.

Икос 4
Слышавше о чудесех Твоих преславных, Богородице Дево, яже от иконы Твоея являла еси, просим Тя: направи убо, Владычице, наша стопы на путь исполнения заповедей Христовых, и научи нас верно исполняти святую волю Сына Твоего и Бога, да Тебе вопием сице:
Радуйся, свеще неугасимая.
Радуйся, звездо незаходимая.
Радуйся, сияющая светом Божественным.
Радуйся, просвещающая благодатию души верных.
Радуйся, мира Христова благоухание.
Радуйся, земли освящение.
Радуйся, чаше, черплющая радость всему миру.
Радуйся, источниче, изливающий вечную сладость.
Радуйся, чертоже благоукрашенный Царя царей.
Радуйся, рая краснейшая.
Радуйся, утра светлейшая.
Радуйся, ручко всезлатая.
Радуйся, Богородице Одигитрие, христиан упование.

Кондак 5
Яко Боготечная звезда, икона Твоя, Богомати Владычице, благоволением Твоим в страну Русскую принесеся, и обители Полоцкой в наследие благодатное даровася, темже благодарим Тя, о Госпоже Всемилостивая, яко таковый дар святый Отечеству нашему даровала еси, и поем в Троице славимому Богу: Аллилуиа.

Икос 5
Видевше преславное заступление Твое, во дни брани бывшее, Пречистая Владычице, прославляем великую Твою милость, еюже грады наша от разорения вражия чудесно спасала еси. Сего ради, благодаряще Тя, сице:
Радуйся, от нашествия иноплеменных нас ограждающая.
Радуйся, от междоусобныя брани охраняющая.
Радуйся, пленных свобождение.
Радуйся, градов наших защищение.
Радуйся, во бранех скорая Помощнице.
Радуйся, от нечаянныя смерти Избавительнице.
Радуйся, страны Русския благодатное утешение.
Радуйся, Церкви Христовой боголепное украшение.
Радуйся, любящих Тя присное радование.
Радуйся, Утолительнице печалей.
Радуйся, болящих исцеление.
Радуйся, унывающих в скорбех ободрение.
Радуйся, Богородице Одигитрие, христиан упование.

Кондак 6
Проповедует страна Русская милости и чудеса Твоя, Пречистая Дево Богородице, имея множество чудотворных икон Твоих, посреде коих Ефесская икона славою небесною немерцаемо сияет. Сего ради со благоговением почитаем многоцелебный образ Твой, Госпоже Всеблагая, и покланяющеся ему, яко залогу Твоего к нам благоволения, вопием Богу: Аллилуиа.

Икос 6
Возсияла еси в стране Русстей лучами Божественных чудес от святыя иконы Твоея исходящими, Пречистая Владычице, к нейже от лет древних отцы наши прихождаше в скорбех и болезнех и нетщетны отхождаше. Имже вслед и мы к Тебе приходяще и, с любовию благоговейно лобызая образ Твой чудотворный, молимся Тебе: утоли печали наша, уврачуй недуги наша, да зовем Ти:
Радуйся, жезле старости.
Радуйся, вдовиц заступление.
Радуйся, сирот призрение.
Радуйся, младенцев воспитание.
Радуйся, нищих снабдение.
Радуйся, пленных свобождение.
Радуйся, скорбящих утешение.
Радуйся, столпе и утверждение девства.
Радуйся, иноков Покровительнице.
Радуйся, инокинь Наставнице.
Радуйся, постников укрепление.
Радуйся, в подвиге девства подвизающихся вспоможение.
Радуйся, Богородице Одигитрие, христиан упование.

Кондак 7
Хотящи явити людем страждущим Твоея матерния любве неисчерпаемую щедрот бездну, благоволила еси, Владычице, даровати стране нашей образ Твой святый, егоже преподобная мати наша Евфросиния во град Полоцк со славою принесе и во обители своей постави, да вси вернии, молящеся пред ним, взывают непрестанно Богу: Аллилуиа.

Икос 7
Дивную и неизреченную милость дарова нам Господь в явлении чудотворнаго образа Твоего, Богородице, милости неизреченныя источающаго верным, егоже осенением люди православныя благодатно утешаеши и в подвигах поста и молитвы утверждаеши, подвизая их немолчно воспевати матерния Твоя щедроты и благодарно взывати Тебе:
Радуйся, Богом возлюбленная Царице.
Радуйся, Бога возлюбившая Владычице.
Радуйся, едина благословенная в женах.
Радуйся, небесных радование.
Радуйся, земных заступление.
Радуйся, демонов посрамление.
Радуйся, ада попрание.
Радуйся, укрепленная силою Господа сил.
Радуйся, облеченная властию Царицы неба и земли.
Радуйся, воинствующих на плоть целомудрием благая Помощнице.
Радуйся, подвизающихся в посте и безмолвии милостивая Утешительнице.
Радуйся, избавляющая скорбей всяческих.
Радуйся, Богородице Одигитрие, христиан упование.

Кондак 8
Странствие земное многоскорбное и многомятежное услаждаеши нам матерним Твоим о нас попечением, Богородице, и во дни скорбных обстояний помощь святую являеши нам во спасение, вопиющим Богу: Аллилуиа.

Икос 8
Все упование наше на Тя возлагаем, Всеблагая Мати Божия, и в скорбех наших ко святей иконе Твоей усердно притекаем, чающе от нея утешение благодатное получити. Сего ради, не лиши нас, смиренных, Твоего заступления, да не постыдимся во уповании нашем, еже по Бозе на Тя возлагаем, да зовем Ти похвальныя сия:
Радуйся, о всякой души христианстей моления ко Господу возносящая.
Радуйся, во благих желания наша дивно исполняющая.
Радуйся, покровом Твоим род христианский покрывающая.
Радуйся, благодать и милость Твою на всех простирающая.
Радуйся, Взбранная Воеводо, враги наша побеждающая.
Радуйся, чудотворным образом Твоим, яко стеною нерушимою, люди Твоя ограждающая.
Радуйся, изнемогающих силою свыше укрепляющая.
Радуйся, безпомощным помощь Твою святую подающая.
Радуйся, обидимых правосудная Заступнице.
Радуйся, ненадежных надеждо.
Радуйся, печальных отрадо.
Радуйся, Богородице Одигитрие, христиан упование.

Кондак 9
Вси вернии с радостию и утешением видят образ Твой святый, на немже умиленно взираеши на Богомладенца Христа, сего ради молим Тя, Всеблагая, яко Матерь вся содержащаго в деснице Своей Владыки: воззри и на нас милостивно, и умоли Господа, да помилует нас недостойных. Научи нас, Владычице, молитися Ему благоприятно, и неосужденно пети Ему нескверными усты и чистым сердцем ангельскую песнь: Аллилуиа.

Икос 9
Витийство наше песненное не довлеет к прославлению многих Твоих чудес, Богородице, ихже от святыя иконы Твоея явила еси и присно являеши верным: обаче Ты, яко воистину Благая Мати, веру и усердие наше приими, веси бо и любовь к Тебе нашу, еюже сердца наша пламенеют, и милостивно услыши сия в простоте составленныя похвалы:
Радуйся, обрадованная Приснодево.
Радуйся, Невесто Неневестная.
Радуйся, селение Бога Слова.
Радуйся, обитель Святейшаго святых.
Радуйся, с Сыном Царем небес вечно царствующая.
Радуйся, матернее дерзновение к Нему имущая.
Радуйся, молитвам верных милостивно внемлющая.
Радуйся, любящим Тя любовию Твоею Божественною воздающая.
Радуйся, Сиона горняго украшение.
Радуйся, мира дольняго защищение.
Радуйся, граде спасения нашего.
Радуйся, горо святая, сошествием Божиим прославленная.
Радуйся, Богородице Одигитрие, христиан упование.

Кондак 10
Спаси нас, Владычице, от погибели вечныя матерним предстательством Твоим ко Христу Богу, и сподоби нас узрети Тя в час кончины нашея, от руки лютаго миродержителя душу нашу соблюдающую, да помощию Твоею святою избегнем его сетей и сподобимся Царствие Небесное получити и в радости вечней воспевати Человеколюбцу Богу: Аллилуиа.

Икос 10
Стена еси девам, Богородице Дево, и всем ревнителем девства и чистоты усердная Помощнице. Молим Тя, Пречистая: очисти наша сердца от всякия скверны греховныя, и украси души наша целомудрием и чистотою, да невредимы пребудем от всех искушений мира, плоти и диавола находящих, и сподобимся достойно возглашати Тебе песни таковыя:
Радуйся, добрая Младопитательнице девам.
Радуйся, благосердая Попечительнице сирот.
Радуйся, тихое прибежище обуреваемых страстями.
Радуйся, надежное пристанище смущаемых искушениями.
Радуйся, Мздовоздаятельнице подвижников целомудрия.
Радуйся, Споборнице борющихся со враги невидимыми.
Радуйся, милостивая Посетительнице неповинно осужденных.
Радуйся, благая Утешительнице напрасно оклеветанных.
Радуйся, Божественная Свободительнице сущих в плену и изгнании.
Радуйся, всемощная Покровительнице труждающихся и обремененных.
Радуйся, Судии Праведнаго умоление.
Радуйся, грешных с Богом примирение.
Радуйся, Богородице Одигитрие, христиан упование.

Кондак 11
Пение всеумиленное слышаще от верных рабов Твоих возносимое, Ты, Пречистая Мати Дево, яко имущая милосердие неизреченное, насыти нас пищею нетленною Слова Божия и научи нас всегда исполняти животворныя заповеди Господа нашего, Егоже умоли, Предстательнице наша Всеблагая, да ниспослет милость Свою нам, недостойным, и сподобит нас унаследовати Его всесветлое и всеблаженное Царствие, идеже от всех святых поется Ему хвалебная песнь: Аллилуиа.

Икос 11
Светлыми лучами чудес Твоих, Богородице Дево, просвещаеши нас благодатно, и от святыя иконы Твоея утешение духовное низпосылаеши угодником Божиим; нам же, грешным, дары целебныя подаеши от нея неоскудно, да зовем Ти благодарственно и хвалебно:
Радуйся, Агнца и Пастыря Нетленнаго рождшая.
Радуйся, девство и рождество в Себе сочетавшая.
Радуйся, крине девства, к чистому и девственному житию приводящая.
Радуйся, избранником Божиим любовь Твою святую являющая.
Радуйся, угодником Господним веления небесныя открывающая.
Радуйся, о блаженных обителех небесных наша Ходатаице.
Радуйся, скорая человеком Помощнице.
Радуйся, милости Своя чрез чудотворныя иконы Твоя подающая.
Радуйся, радость духовную в сердца наша изливающая.
Радуйся, обителей Христовых покров и снабдение.
Радуйся, рабов Божиих среди мира тайное вразумление.
Радуйся, Богородице Одигитрие, христиан упование.

Кондак 12
Благодать Божия действует в чудесех, преславно являемых от святаго образа Твоего, Преблагословенная Богородице Дево, еюже и наши души просвети, мрак греховный разгоняя сиянием Солнца Правды Христа, да во свете повелений Его богоугодно житие сие временное поживем во всяком благочестии и чистоте, и сподобимся блаженство вечное получити и со избранными пети Богу: Аллилуиа.

Икос 12
Поюще Твоя чудеса, Богородице, проповедуем милости Твоя, прославляем щедроты Твоя неисчетныя и, припадая к чудотворней иконе Твоей, молим Ти ся с верою и любовию: буди нам Путеводительница Благая к светлому граду Иерусалиму Небесному, да узрим Тя с высоты славы Твоея Божественныя на нас милостивно взирающую и вкупе со святыми воспоем Ти сице:
Радуйся, радосте наша пресвятая.
Радуйся, Царице наша преблагая.
Радуйся, усыновившая нас при Кресте Сына Твоего и Бога.
Радуйся, матернюю любовь к нам являющая.
Радуйся, во благих желания наша дивно исполняющая.
Радуйся, скоропослушливая к смиренным молитвам.
Радуйся, покровом Твоим святым нас покрывающая.
Радуйся, ризою Твоею честною благонадежно нас защищающая.
Радуйся, в час кончины нашея всесильная нам Помощнице.
Радуйся, в мытарствах воздушных державная нам Заступнице.
Радуйся, телес наших безмездное врачевание.
Радуйся, душ наших спасение.
Радуйся, Богородице Одигитрие, христиан упование.

Кондак 13
О Всепетая Мати, Царице Всемилостивая Дево Богородице Одигитрие! Приими малое сие моление наше и принеси е Сыну Твоему и Богу нашему, матерне умоляя Его благость, да помилует нас, грешных и недостойных, и Твоего ради всесильнаго ходатайства избавит нас мучения вечнаго, сподобит Царствие Небесное получити и тамо со Ангелы воспевати Богу: Аллилуиа.
Этот кондак читается трижды, затем икос 1 и кондак 1

Молитва
О Пречудная и Превышшая всех тварей Царице Богородице, Небеснаго Царя Христа Бога нашего Мати, Пресвятая Одигитрие Марие! Услыши нас грешных и недостойных, в час сей молящихся и к Тебе со воздыханием и слезами пред пречистым Твоим образом припадающих и сице умильно глаголющих: изведи нас от рова страстей, Одигитрие благая, избави нас от всякия скорби и печали, огради от всякия напасти и злыя клеветы, и от неправеднаго навета вражия: можеши бо, о Благодатная Мати наша, от всякаго зла сохранити люди Твоя, и всяким благодеянием снабдити и спасти, разве бо Тебе иныя Предстательницы в бедах и обстояниях и теплыя Ходатаицы о нас, грешных, к Сыну Твоему, Христу Богу нашему, не имамы, Егоже умоли, Владычице, спасти нас и Царствия Небеснаго сподобити, да спасеннии Тобою славим Тя и в будущем веце, якоже спасения нашего Виновницу, и превозносим всесвятое и великолепое имя Отца и Сына и Святаго Духа, в Троице славимаго и покланяемаго Бога во веки веков. Аминь.