Кондак 1
Взбранная Воеводо Победительная, от всяких бед нас избавляющая и скорбь на радость прелагающая, яко избавльшеся от злых, благодарственная восписуем Ти раби Твои, Богородице. Ты же, яко имущая державу непобедимую, возбрани врагом нашим озлобляти нас и от Господа отлучати конечне и нас, страждущих, всяких бед избави, да зовем Ти:
Радуйся, Милостивая Владычице, Избавление от бед страждущих!
Радуйся, Мати милосердия, Избавление от бед страждущих!

Икос 1
Ангелов Творец и человеков Создатель, видя благого сердца Твоего изволение и сострадание к бедами обремененному роду человеческому, избра Тя яко Милостивую за всех грешных к Богу Ходатаицу и Добрую Избавительницу от бед страждущих, да вси избавльшиеся Тобою от бед зовут Ти таковая:
Радуйся, страждущих Избавление!
Радуйся, кающихся с Богом примирение!
Радуйся, самых отверженных спасение!
Радуйся, отчаянных непреложное Упование!
Радуйся, неразрешимых обстоятельств быстрое и милостивое разрешение!
Радуйся, Нечаянная Радость всех благ исполнения!
Радуйся, Милостивая Владычице, Избавление от бед страждущих!
Радуйся, Мати милосердия, Избавление от бед страждущих!

Кондак 2
Видящии все бедствующии Твое многощное заступление и милостивое избавление всех от бед страждущих, радостью исполняются, непрестанно поя Сыну Твоему: Аллилуйя!

Икос 2
Разум недоразумеваемый разумети ищущи вси в скорбях и злых обстояниях пребывающии, разумея Тя яко Всемилостивую Заступницу и Избавительницу от бед страждущих, к Твоему всесильному заступлению прибегают, и скорое от всех бед избавление и скорбей на радость преложение в Тебе обретая, зовут Ти сице:
Радуйся, Избавительнице, от горя, бед и гибели спасающая!
Радуйся, несомненною надеждою на помощь Божию нас в бедах утешающая!
Радуйся, ко спасению вразумляющая и направляющая!
Радуйся, скорбящим скорбь на радость претворяющая!
Радуйся, всех в скорби вопиющих к Сыну Твоему молитвы приносящая!
Радуйся, все беды, скорби и печали к славе Божией обращающая!
Радуйся, Милостивая Владычице, Избавление от бед страждущих!
Радуйся, Мати милосердия, Избавление от бед страждущих!

Кондак 3
Силою Вышнего дана Тебе благодать избавляти от бед страждущих, Мати Дево, да все спасение и совершенное от бед избавление Тобой улучившии всегда поют сице: Аллилуйя!

Икос 3
Имуще воистину державу непобедимую и милосердие неизреченное, восприяла еси благодать избавляти всех от бед страждущих и в скорби Тебе вопиющих, о Всемилостивая наша Владычице, да вси спасение и совершенное от скорбей своих избавление восприявшии радостию исполняются и вопиют Богородице:
Радуйся, вечныя смерти Избавление!
Радуйся, жизни нашея умирение!
Радуйся, от страстей погибельных спасающая!
Радуйся, покой тем душам нашим приносящая!
Радуйся, надеждою на милость Божию укрепляющая!
Радуйся, всех верных в Боге утверждающая!
Радуйся, Милостивая Владычице, Избавление от бед страждущих!
Радуйся, Мати милосердия, Избавление от бед страждущих!

Кондак 4
Бурею бед, находящих на ны в многоскорбном плавании жития сего одержими, воистину Ковчег спасения и совершенное от бед избавление в Тебе обретаем, о Владычице, Богу же о Тебе вопием: Аллилуйя!

Икос 4
Слышаша все человеческие роди Твою ко христианом дивную любовь, яко избавляеши их всегда от находящих на них лютых, по глаголу Твоему воистину ублажают Тя, Богомати, научишася пети Тебе:
Радуйся, всякой скорби избавление!
Радуйся, милости Божией исполнение!
Радуйся, благодати на нас, грешных, излияние!
Радуйся, воли Божией совершенное познание!
Радуйся, на пути Христовом укрепление!
Радуйся, вечныя печали истребление!
Радуйся, Милостивая Владычице, Избавление от бед страждущих!
Радуйся, Мати милосердия, Избавление от бед страждущих!

Кондак 5
Боготечней звезде подобна явися икона Твоя, Владычице, воистину всем быв Избавление от бед страждущим, и в радости Богу вопиющим: Аллилуйя!

Икос 5
Видеша люди земли российския и все в злых обстояниях к Тебе прибегающии, о Владычице, Твое нечаянное Избавление от бед страждущих, радостно поют Тебе сице:
Радуйся, всяческих печалей избавление!
Радуйся, во благих желаний наших исполнение!
Радуйся, Отраду и Утешение приносящая!
Радуйся, самым отчаянным надежду подающая!
Радуйся, плененных Свободительнице!
Радуйся, всякой скорби Избавительнице!
Радуйся, Милостивая Владычице, Избавление от бед страждущих!
Радуйся, Мати милосердия, Избавление от бед страждущих!

Кондак 6
Проповедуют помощь Твою и любовь, Мати, вси утешеннии, исцелении и избавлении Тобою от бед, сего ради Сыну же Твоему поющии: Аллилуйя!

Икос 6
Возсия нам многосветлая икона Твоя, Богомати, яко светлое просвещение Истины, иже есть Господь наш Иисус Христос, иже образ Твой Избавление от бед страждущих милостивно нам дарова, сих же избавльшиися вопияху к Богородице:
Радуйся, от мглы погибели спасающая!
Радуйся, мрак душ наших просвещающая!
Радуйся, лукавство суетного сего века потребляющая!
Радуйся, приводящая к Свету Истины!
Радуйся, всех страждущих в сем мире грешном надеждою благ вечных ободряющая!
Радуйся, по воле Божией жити в веке сем лукавом нас усердно наставляющая!
Радуйся, Милостивая Владычице, Избавление от бед страждущих!
Радуйся, Мати милосердия, Избавление от бед страждущих!

Кондак 7
Хотя избавление всем от бед страждущим даровати Христос Истинный Бог наш в Твоей девственой вселься утробе, Чудную Избавительницу нам Тебя дарова. Темже дивяся Его неизреченной премудрости, зовем: Аллилуйя!

Икос 7
Новую нам Тя дарова Спасительницу и Избавительницу от бед страждущих Сын Твой, да видя Твое всемилостивое заступление и всех в скорби тебе вопиющих от бед спасение, скорбей и печалей избавление и на радость их скорое и милостивое преложение, воспоем Тя, вопиюще:
Радуйся, от самых страшных бед спасение!
Радуйся, всех скорбных обстоятельств разрешение!
Радуйся, молитв всех в скорби вопиющих к Богу приношение!
Радуйся, всем скорби Христа ради претерпевшим бед на радость преложение!
Радуйся, милосердия Божия всемилостивое исполнение!
Радуйся, всем достойно Христа ради претерпевшим милостивое воздаяние!
Радуйся, Милостивая Владычице, Избавление от бед страждущих!
Радуйся, Мати милосердия, Избавление от бед страждущих!

Кондак 8
Странно есть неверующим сынам суетного и лукавого века сего видети, како все вернии, к заступлению Всемилостивой Владычицы Матери милосердия прибегая, совершенное от бед спасение, от всякой скорби избавление и нечаянную радость обретают, вопиюще Сыну Ея: Аллилуйя!

Икос 8
Вси сущии во мраце скорбей суетного и многомятежного века сего, вси обуреваемии несчастий бурею, приидем к доброму пристанищу и надежному покрову Девы Избавительницы, да от всех бед избавление и скорбей на радость скорое преложение улучивше, от всея души вопием Ей:
Радуйся, всякой скорби Избавительнице!
Радуйся, от вечныя погибели Спасительнице!
Радуйся, в печалях Сострадательнице!
Радуйся, надежду потерявшим всяких благ Подательнице!
Радуйся, надежд на Тя уповающих никако никогда же посрамляющая!
Радуйся, конец жизни непостыдный всем надеющимся на Тя дарующая!
Радуйся, Милостивая Владычице, Избавление от бед страждущих!
Радуйся, Мати милосердия, Избавление от бед страждущих!

Кондак 9
Всякая душа христианская знает Тя яко добрую Избавительницу от бед страждущих и твердое упование на Твое предстательство возложив, поет Сыну Твоему и Богу: Аллилуйя!

Икос 9
Ветия многовещанныя маловерного и многосуетного века сего недоумевают о Тебе Богородице, како все вернии, в злых обстояниях жизни своея к Тебе прибегая, в скорбях утешение, в болезнех исцеление, в бедах избавление и скорбей на радость преложение по ходатайству к Тебе обретая, верно вопиют:
Радуйся, суетную мудрость века сего посрамляющая!
Радуйся, в Боге разум утверждающая!
Радуйся, злые начинания разрушающая!
Радуйся, скорбями к Богу обращающая!
Радуйся, пекущимся о благе ближних Добрая Сотруднице!
Радуйся, всем в бедах помогающим Усердная Споспешнице!
Радуйся, Милостивая Владычице, Избавление от бед страждущих!
Радуйся, Мати милосердия, Избавление от бед страждущих!

Кондак 10
Спасти хотя мир и всяку душу страждущу человечу всех Спаситель нам Тя Мати Свою яко доброе Избавление от бед страждущих дарова, сего ради яко Бог слышит от нас: Аллилуйя!

Икос 10
Стена еси всем, Богородице, явися святыя иконы Твои, среди них и сей образ Твой Избавление от бед страждущих светло сияет, радость спасения всем принося, им же от всех злых избавление и скорбей на радость преложение по ходатайству к Тебе обретая, от души вопиют Ти:
Радуйся, отчаянных спасение!
Радуйся, печалей утоление!
Радуйся, скорбящих утешение!
Радуйся, скорбей на радость обращение!
Радуйся, Радость, Радость всему миру родившая!
Радуйся, Сладость, Рождеством Своим весь мир возвеселившая!
Радуйся, Милостивая Владычице, Избавление от бед страждущих!
Радуйся, Мати милосердия, Избавление от бед страждущих!

Кондак 11
Пение непрестанное приносим Ти, Владычице, Тобою бо обретаем от всех бед и скорбей избавление, и на радость их преложение, того ради Сыну Твоему вопиим: Аллилуйя!

Икос 11
Светоприимная Свеща, во тьме бед страждущим явися икона Твоя, Мати Дево, вси бо от бед страждущии и пред ней молящиися к помощи Твоея прибегают, скорби и печали свои пред Тобой, Утешительницей скорбящих изливая, от бед избавление, печалей утоление, в скорбях утешение и нечаянную радость обретая, поют Ти, почитая званиими сими:
Радуйся, от отчаяния спасающая!
Радуйся, всех унывающих надеждою на милость Божию утверждающая!
Радуйся, всем радости лишенным скорбь на радость обращающая!
Радуйся, всем отчаянным надежду подающая!
Радуйся, погибших душ взыскание!
Радуйся, кающихся грешников пред Богом оправдание!
Радуйся, Милостивая Владычице, Избавление от бед страждущих!
Радуйся, Мати милосердия, Избавление от бед страждущих!

Кондак 12
Благодати Источник Неисчерпаемый дати восхотев благодати Податель нам Тебя Матерь Свою дарова, Ю же иконы познавших источник Того благодати, побуждает пети всех: Аллилуйя!

Икос 12
Поюще Твое Рождество и от Него бываемое всем избавление от бед страждущим, хвалим Тя вси, яко одушевленный храм, Богородительнице, почитаем же и иконы Твои, яко источник Того благодати, во Твоей бо утробе вселився содержай вся рукою Господь, освяти, прослави и научи вопити Тебе всех:
Радуйся, от вечныя погибели спасение!
Радуйся, и мертвых воскрешение!
Радуйся, омертвевшая сердца росою благодати оживляющая!
Радуйся, от бед в отчаяние пришедших к новой жизни воскрешающая!
Радуйся, во мрак отчаяния впавших от пагубныя скверны Отвратительнице!
Радуйся, нового смысла жития всем Христа ради страждущим Подательнице!
Радуйся, Милостивая Владычице, Избавление от бед страждущих!
Радуйся, Мати милосердия, Избавление от бед страждущих!

Кондак 13
О, Всепетая и Вселюбимая наша Мати, Избавление от бед страждущих! Умилосердися ныне и помилуй нас, в лютых скорбях жития сего сущих и от всех бед и скорбей избави всех, вопиющих Избавителю страждущих о Тебе: Аллилуйя!
Сей кондак глаголи трижды, по сем 1-й икос Ангелов Творец и 1-й кондак Взбранной Воеводо Победительная…

Молитва перед иконой Богородицы «Избавление от бед страждущих»
О, Всемилостивая наша Владычице, рождшая Творца и Спасителя всяческих, Всемощная наша Покровительнице и Избавительнице от бед страждущих! Нынешнее моление наше, в скорби Тебе приносимое, милостивно прими и к Престолу Сына Твоего Христа Бога нашего принеси. От всякой беды и скорби нас избави и на радость ее обращение даруй, да восславим Сына Твоего и Бога и Твое Всемилостивое к Нему о нас грешных предстательство во веки веков. Аминь.

Составитель сего текста Игорь Храмов (Тесёлкин), как и все обременен многочисленными скорбями, в том числе и от людей, подавляющих истину неправдою, и просит молитв о себе и своих близких:
О здравии р.Б.
Игоря
Валентины (ж)
Елены
Ольги
и всех благотворящих и молящихся за нас
Об упокоении
Анны
Василия
Михаила
Михаила
Пелагии
Кирилла
Григория
Ивана
Марии
Николая
Владимира
Нины
Спаси Вас Господи!
hramov-teselkin@mail.ru