Кондак 1
Избранней от рода человеческого в Матерь воплотившегося от Отца Единородного Сына Христа Бога нашего, взявшего на Себя грехи людския и избавльшего нас от злых, похвальная восписуем Ти раби Твои, Богородице. Ты же, напоившая всех росою Того благодати, от всяких нас бед свободи и благодати причастник соделай, да зовем Ти:
Радуйся, Матерь Божия, Благодати Источник Неисчерпаемый!

Икос 1
Ангел предстатель с небесе послан бысть рещи Богородице Гавриил:
Радуйся, и со бесплотным гласом воплощаемя Тя зря, Господи, видя Отроковицу Матерь Господа и благодати Источник неисчерпаемый, ужасашеся и зовый к Ней таковая:
Радуйся, падшего рода воззвание;
Радуйся, благодати исполнение;
Радуйся, от вечныя смерти избавление;
Радуйся, человеков с Богом соединение.
Радуйся, ожесточенных покаяние!
Радуйся, отчаянных спасение!
Радуйся, Матерь Божия, Благодати Источник Неисчерпаемый!

Кондак 2
Видя Святая себя в чистоте, яко голубицу непорочну, смутися о Архангела словеси и глаголет Гавриилу: из девственныя утробы како Сыну воплотитися мощно, рцы Ми, вопия: Аллилуйя!

Икос 2
Разум недоразумеваемый разумети Дева ищущи, возопи благодати вестнику: како будет благодати сия исполнение, идеже мужа не знаю? Он же отвеща со страхом: Дух Святый найдет на Тя, и Сила Вышнего осенит Тя, и родиши Сына, яко обрела еси благодать у Бога, и зовый к Отроковице сице:
Радуйся, Премудрости Божия исполнение.
Радуйся, кающихся грешников спасение.
Радуйся, Духа Святого нашествием осененная!
Радуйся, от века утаенныя тайны Бога воплощение.
Радуйся, сокровищ будущего века познание!
Радуйся, всем благодати Божия жаждущим подаяние!
Радуйся, Матерь Божия, Благодати Источник Неисчерпаемый!

Кондак 3
Сила Вышнего осени тогда к зачатию браконеискусную и благодати Источник показа всем хотящим жати спасение, подвизая всегда пети сице: Аллилуйя!

Икос 3
Имуще Богоприятную Дева утробу, из нея же воплотися всех Решитель долгов и благодати Податель к отшедшим Того благодати, подвизая нас радовашеся вопияти к Богородице:
Радуйся, всех отпавших благодати воззвание!
Радуйся, независтное всех благ подаяние!
Радуйся, Всех благодати причастников Радостей Радосте!
Радуйся, причастников Плоти Сына Твоего молитвенная Сладосте!
Радуйся, море благодати неистощимое!
Радуйся, Источниче милости Божия бесконечныя!
Радуйся, Матерь Божия, Благодати Источник Неисчерпаемый!

Кондак 4
Бурю внутрь имея помышлений сумнительных, сыны суетного маловерного века сего, недоумевая, како девичья утроба явися воистину Источник благодати Неисчерпаемый, послужив Тайне Воплощения Единого из Пресвятыя Троицы, не ведущии Божия благодати, иже подвизает нас от всея души рещи: Аллилуйя!

Икос 4
Слыша Тя, о Всемилостивая Владычице, яко воистину Источник милости Божией неисчерпаемый, все вернии к заступлению Твоему всегда прибегают, ведуща, яко болящим исцеление, скорбящим утешение и всех скорбей на радость преложение, самым отчаянным — надежды и милости Божией обретение, погибающим — спасение даруеши, поюще Ти реша:
Радуйся, благодатью Божию исцеляющая!
Радуйся, надеждою на милость Божию ободряющая!
Радуйся, всех падающих воздвизающая!
Радуйся, надеждою на милость Божию несомненно утверждающая!
Радуйся, скорбящих нечаянною радостью утешающая!
Радуйся, самых отчаянных и погибающих спасающая!
Радуйся, Матерь Божия, Благодати Источник Неисчерпаемый!

Кондак 5
Боготечной звезде явися подобна икона Твоя, о Владычице, яко благодати Источник Неисчерпаемый и светильник всем ищущим милости Божией, иже по Твоему ходатайству стяжавше, вси вернии возрадовашася, вопиюще: Аллилуйя!

Икос 5
Видеша Тя все жаждущия милости Божия яко Благодати Источник Неисчерпаемый отпавшим Того благодати, аще и рабий прият зрак, Сыном Божиим быв, Сыном Твоим Себя соделав, потщашася послужити Ему, Матери честь воздав и возопити Благословенней:
Радуйся, Звездо благодати Божия!
Радуйся, Заре таинственная будущего дне!
Радуйся, тайны будущего века верным открывающая!
Радуйся, ум к познанию тайн Божиих отверзающая!
Радуйся, Свиток Божия Откровения!
Радуйся, таинственная Книга, Самим Богом запечатанная и отверстая!
Радуйся, Матерь Божия, Благодати Источник Неисчерпаемый!

Кондак 6
Проповедницы богоноснии бывши вси приятели Твоея благодати, иже прияв благодать на благодать, позна Тя яко Благодати Источник Неисчерпаемый, воспев Подателю благ: Аллилуйя!

Икос 6
Возсия нам образ Твой, Пренепорочная, яко Неисчерпаемый Источник благодати и светлое просвещение Истины, иже есть Сын Твой Господь наш Иисус Христос, Его же познавше, вопием к Богородице:
Радуйся, светлое благодати познание!
Радуйся, державы смерти попрание!
Радуйся, Мати Света, души наши просвещающего!
Радуйся, духа уныния от нас изгоняющая!
Радуйся, Рождеством Своим державу ада разорившая!
Радуйся, Плодом Чрева Своего породителя смерти поправшая!
Радуйся, Матерь Божия, Благодати Источник Неисчерпаемый!

Кондак 7
Хотя дати благодати Источник Неисчерпаемый благодати Податель нам Мати Свою Тя дарова, да будут нам святыя иконы Твои источник Того благодати. Темже дивяся Твоей неизреченной премудрости, зовем: Аллилуйя!

Икос 7
Новый Тя показав Источник милости Своея и благодати, воистину бо из Чрева Твоего потекли реки воды живы Того благодати, из утробы бо Твоея явлься Зиждитель нам от Него бывшим, и сохранив Ю, якоже бе, нетленну и нерушиму, да чудо видяще, воспоем Ю, вопиюще:
Радуйся, светлое благодати познание!
Радуйся, Премудрости Божия неукорное всем подаяние!
Радуйся, утробо Божия милосердия!
Радуйся, любы Божия и сострадания океане неисчерпаемый!
Радуйся, море мысленное, все печали века сего потопляющее!
Радуйся, Башне высокая, землю с небом соединяющая!
Радуйся, Матерь Божия, Благодати Источник Неисчерпаемый!

Кондак 8
Странно сынам суетного и самонадеянного века сего явися Рождество Твое, Мати Дево, в нем бо Невместимый Бог в Твоей девственной утробе явися приступный всем Человек, хотяй привлещи к благодати Своея всех отпавших Того благодати, вопиющия: Аллилуйя!

Икос 8
Весь бо в нижних и вышних никакоже отступи неописанное Слово: снизхождение бо Божественное яко благодати излияние нам земногродным бысть, и Рождество от Богородицы Девы, явившейся Источник Неисчерпаемыя благодати, сего ради слышащи сия:
Радуйся, всемилостивое милости Божией на нас излияние!
Радуйся, отчаяния, злобы и смерти державы попрание!
Радуйся, обреченных на смерть с источником Жизни соединившая!
Радуйся, Плодом Чрева Своего ад разорившая!
Радуйся, радость нас в Сыне Твоем находить научившая!
Радуйся, Всех радостей радость, Радость всему миру родившая!
Радуйся, Матерь Божия, Благодати Источник Неисчерпаемый!

Кондак 9
Всякое естество ангельское и человеческое удивися великому Твоего вочеловечения делу: како всех Создатель и благодати Податель, неприступный Бог явися на земли Человек, даруя всем реки воды живой отшедшим Того благодати, сего ради и слышит от нас: Аллилуйя!

Икос 9
Ветия многовещанныя суетного безблагодатного века сего яко рыбы безгласныя зрим о Тебе Богородице, недоумевают бо глаголати, како Дева родити возмогла еси, Невместимого Бога явив Вместимого в утробе Своей Человека, Блаженное Чрево Свое воистину Благодатным Небом соделав. Мы же, таинству великому дивящеся, верно вопием:
Радуйся, Невместимого Бога Вместилище!
Радуйся, Премудрости Божией Приятилище!
Радуйся, Доме, явивший Вселенной Создателя!
Радуйся, родившая всех благодати Подателя!
Радуйся, Плодом Чрева Своего начальника ада сразившая!
Радуйся, Рождеством Своим Ангельский мир удивившая!
Радуйся, Матерь Божия, Благодати Источник Неисчерпаемый!

Кондак 10
Спасти хотя мир всех Спаситель и благодати Податель нам Тебя Матерь Свою дарова яко Благодати Источник Неисчерпаемый, да черпают из него вси отпавшия Того благодати, да от них яко Бог слышит: Аллилуйя!

Икос 10
Стена еси девам, Богородице Дево, и всем к Тебе прибегающим и помощи Твоея просящим, темже и икону Твою чудотворную, от безбожныя власти из России увезенную и в стране Финской сохраненную, по сем же из Успенского собра украденную чудесно вернула еси, вора к покаянию подвигнув, преложение скорби на радость верным тем даровав. Те же, радостью исполняясь, вся приглашати Тебе научи:
Радуйся, от отчаяния спасающая!
Радуйся, к покаянию и татей подвигающая!
Радуйся, неисцельных недугов исцеление!
Радуйся, доброе жития устроение!
Радуйся, к исполнению Божией воли вразумление!
Радуйся, во благих желаний наших исполнение!
Радуйся, Матерь Божия, Благодати Источник Неисчерпаемый!

Кондак 11
Пение всякое побеждается, спростретится тщашеся множеству многих щедрот Твоих, о Всеблагого Сына Мати Всеблагая, равночисленныя бо песка морского, звезд небесных и лествий земных песни аще потщимся принести Тебе, Богомати, ничтоже совершим достойно, яже дал еси нам Сын Твой, Христос Бог наш, о Тебе Ему вопиющим: Аллилуйя!

Икос 11
Светоприемную свещу, во мраке земного жития явльшуюся, зрим икону Твою, Богородице, невещественный бо вжигающи огнь, являет собой благодати кладезь неисчерпаемый, да тьма не обымет его, наставляет к разуму Божественному вся, благодатью ум просвещающая, званиими же почитаемая сими:
Радуйся, мрак страстей разгоняющая!
Радуйся, ожесточенныя сердца умягчающая!
Радуйся, души заблудшии Светом Истины просвещающая!
Радуйся, покаянием скорбь на радость прелагающая!
Радуйся, души наша к Царствию Небесному устрояющия!
Радуйся, и в земном скорбном житии нас Своим заступлением не оставляющая!
Радуйся, Матерь Божия, Благодати Источник Неисчерпаемый!

Кондак 12
Благодати Источник дати восхотев Христос Бог наш прииде Собою к отшедшим Того благодати, Тя Мати Свою яко благодати Источник Неисчерпаемый нам дарова, да от всех из него черплющих слышит сице: Аллилуйя!

Икос 12
Поюще твое Рождество, хвалим Тя вси, яко одушевленный храм и благодати источник неисчерпаемый, Богородице: во Твоей бо вселився утробе вся устрояй и содержай рукою Господь, нам Тя показа благодати источник, да освяти, прослави и научи вопити Тебе всех:
Радуйся, Доме, жилище благодати и Премудрости Божия!
Радуйся, кладезю сокровищ духовных неисчерпаемый!
Радуйся, лечебнице, недуги духовные и телесные исцеляющая!
Радуйся, гостинице земная, к Небесному Царствию уготовляющая!
Радуйся, по закону евангельскому в сем мире, прелюбодейном и грешном жити нас научающая!
Радуйся, через земныя временныя скорби житие Небесное нам устрояющая!
Радуйся, Матерь Божия, Благодати Источник Неисчерпаемый!

Кондак 13
О, Всепетая Мати, Неисчерпаемая Благодать Божия, рождшая всех святых Святейшее Слово! Прими нынешнее моление наше, от скорби нашея в многотрудном сем земном житии нашем Тебе приносимое, от всякия беды и напасти временныя и вечныя нас избави и благодати причастник Сына Твоего Христа Бога нашего нас соделай, да непрестанно вопием о Тебе Богу: Аллилуйя!
Сей Кондак глаголи трижды, по сем Икос 1 «Ангел предстатель» и Кондак 1 «Избранней от рода»

Молитва перед иконой Божией Матери «Неисчерпаемая Благодать», или Козельщанская
О, Всеблагого Сына Мати Всеблагая, Всех скорбящих Радосте, Всемилостивая наша Утешительнице, от всех бед Избавительнице, всех молений и прошений наших Милостивая Услышательнице и во благих Исполнительнице, во всех бедах нам Сострадательнице, Всещедрая земных даров и небесныя благодати Христа Бога нашего верным Подательнице!
Прими сие малое моление наше, в сем многотрудном житии нашем от скорби сердец наших Тебе приносимое, и от всякой скорби избавление и на радость ее преложение нам даруй.
Наипаче благодати причастниками Сына Твоего Христа Бога нашего нас соделай, да не лишимся никакоже Того благодати и в час Страшного Суда Его одесную станем, славя Его неизреченное милосердие и Твое Всемилостивое о нас грешных предстательство со всеми небесными Силами и Святыми во веки веков. Аминь.

Составитель сего текста просит молитв о себе и своих близких

О здравии р.Б.
Игоря
Валентины (ж)
Елены
Ольги
и всех благотворящих
и молящихся за нас

Об упокоении
Анны
Василия
Михаила
Михаила
Пелагии
Кирилла
Григория
Ивана
Марии
Николая
Владимира
Нины