Кондак 1
Избранной от всех родов Деве Пречистей Богородице, принесем вернии сие малое похвальное пение, пред честною явленною Ея иконою, юже земля Путивльская имуще источник исцелений, блгодарствeнно верою взывает:
Радуйся, Пресвятая Дево, oбители Молченския радосте и утверждение.

Икос 1
Ангели предидяху Пресвятей, eгда изволи внити во Святая Святых, ангельския силы предстояху и лику Пречистыя, eгда явися икона Ея близ блата Молченскаго благоговейному бортнику, иже слыша глас таинственный: "Да созиждется на месте сем церковь Пресвятыя Богородицы”, возвратися во град Путивль, вопиюще таковая:
Радуйся, Исполнение благое, совета Святыя Троицы;
Радуйся, Лучу пресветлый, роду человеческому.
Радуйся, Усладо сладчайшая, душ изнемогающих;
Радуйся, Любове Христова, отчаянным радование.
Радуйся, Фимиаме многоценный, Христом благоухающий;
Радуйся, Храме одушевленный, Богом устроенный.
Радуйся, Пресвятая Дево, oбители Молченския радосте и утверждение.

Кондак 2
Велие промышление Божие явися, егда иноцы Киево-Печерстии основаша на Молче скит, иже по летех Софрониевым нарицашеся. И тако благословение преподобных Антония и Феодосия граду Путивлю бысть, иже взываша Богу песнь: Аллилуиа.

Икос 2
Свет осия явленную икону, eгда Божиим промышлением явися чудно на древе. К сей вернии притекающе, исцеление от недуг душевных и телесных обретаху, благодарствeнно поюще Богородице таковая:
Радуйся, Целительнице милосердная, ран душевных;
Радуйся, Пристанище небурное, посреде помыслов суетных.
Радуйся, Убежище пространное, от демонов стужаемым;
Радуйся, Забрало крепкое, девства истиннаго.
Радуйся, Палато спасения, Господа во плоти приявшая;
Радуйся, Ветве целомудренная, Христом процветшая.
Радуйся, Пресвятая Дево, oбители Молченския радосте и утверждение.

Кондак 3
Егда видеша людие путивльстии чудеса, иже от явленныя иконы Молченския oбильно источаются, тогда создаша скоро церковь во имя Пречистыя, взываше Богу: Аллилуиа.

Икос 3
Яко звезду Боготечную пренесоша иноцы молченстии благословением игумена Пафнутия, явленную икону во обитель Путивльскую, разорения агарянскаго ради, поюще Богородице таковая:
Радуйся, Разрешение послушанием, Евина преслушания;
Радуйся, Попрание вечное, смерти Адамовы.
Радуйся, Ложе непорочное, Божественнаго воплощения;
Радуйся, Плененная от Духа Свята, Своею волею.
Радуйся, Соцарствующая Сыну Своему, Христу Богу нашему;
Радуйся, Каменю драгий, в чертозех Единосущныя Троицы.
Радуйся, Пресвятая Дево, oбители Молченския радосте и утверждение.

Кондак 4
Мост к небеси воистину явися икона Молченская: мнози бо притекающе к eя заступлению и видяще знамения милости Господней от нeя источаемыя, покаяние обретаху и тако жизни нескончаемей причастницы быша, поюще Богу: Аллилуиа.

Икос 4
Дева днесь на небесех ликовствует, зря икону Свою любовию лобызаему. Сего ради неоскудно подает Пречистая велию милость чтущим ю и верою взывающим таковая:
Радуйся, Помазание царственное, естества человеческаго;
Радуйся, Крыло ветренное, Имже Облако Христос прииде.
Радуйся, Уста апостольския, вся концы вселенныя просвещающия;
Радуйся, Сосуде избранный и освященный Духом Святым.
Радуйся, Приятелище пренепорочное, Безначальнаго Слова Божия;
Радуйся, Луно сияющая, во след Солнца Правды Грядущая.
Радуйся, Пресвятая Дево, oбители Молченския радосте и утверждение.

Кондак 5
Волчцы и тернии собраша себе иноплеменницы иногда, иже пришедши со Димитрием Самозванцем во oбитель Молченскую, злоумыслиша противу земли русския, иконы явленныя не устыдишася. Сего ради разори Бог совет нечестивых, молитвами Пресвятыя Богородицы, Ему же вопием: Аллилуиа.

Икос 5
Велия слава иконы Молченския во вся концы земли русския пройде. Сего ради самодержцы православныя Феодор и Иоанн, Алексий и София, и Петр Великий утвердиша обитель Молченскую во благостоянии, блгодарственно взывающе Богородице таковая:
Радуйся, Заступление крепкое, людем благочестивым;
Радуйся, Разорение скорое злоухищрений иноплеменных.
Радуйся, Наставление свыше, царем православным;
Радуйся, Низложение долу, гордыни демонския.
Радуйся, миром Божиим люди Своя благословившая;
Радуйся, яко Бога – Господа в мир явившая.
Радуйся, Пресвятая Дево, oбители Молченския радосте и утверждение.

Кондак 6
Милость возсия Тобою, Владычице, eгда иконою Своeю град Путивльский и веси oкрестныя от смертоносныя язвы избавила еси, наставляюще сим верныя присно прибегати к Твоему заступлению в бедах и болезнех, вопиюще Богу: Аллилуиа.

Икос 6
Ангельския силы на небесех непрестанно славословят Тя, Царице: у престола бо Божия предстоиши, венцем небесным украшенная, моляще Сына Своего о спасении душ наших. Темже иконе явленней со страхом покланяющеся, именуем Тя, Пренепорочная, имены таковыми:
Радуйся, Скрижале одушевленная, заповедей Божиих;
Радуйся, Престоле Агнчий, Емуже предстоят ангели.
Радуйся, Кивоте святыни, от Духа приосененный;
Радуйся, Законе благодати, перстом Творца написанный.
Радуйся, Устрашение грешников, и демонов уязвление;
Радуйся, Ликование мучеников, и Церкве украшение.
Радуйся, Пресвятая Дево, oбители Молченския радосте и утверждение.

Кондак 7
Риторы суемудрeннии недоумеваху: како может Пречистая явленною иконою Своeю подавати верным вся просимая? Мы же, Божественным Преданием научаемии, яко честь иконе воздаваемая, на Первообразное восходит. Сего ради, ведуще по Писаниeм, яко и сень Петрова исцеляше верныя, почитаем Лик Твой явленный, вопия Богу: Аллилуиа.

Икос 7
Како почтим чудотворную икону Молченскую, eюже Пречистая благодать возблагодать дарова людем Своим? Како наречем сей источник исцелений в земле Путивльстей? Немотствует язык воспети небесная словесы земными. Oбаче обретение чтимаго oбраза празднующе, дерзаем взывати Богородице таковая:
Радуйся, Горо таинственная, превыше житейских помышлений;
Радуйся, Воззвание изгнанных, правды ради Царствия Небесного.
Радуйся, Лествице мысленная, Еюже людие горе восходят;
Радуйся, Богосветлый Светильниче, от Него же Сын возсия.
Радуйся, Богоносная Ниво, на Нeйже Древо Жизни произрасте;
Радуйся, Благословение Христово, священству новому.
Радуйся, Пресвятая Дево, oбители Молченския радосте и утверждение.

Кондак 8
Неоскудеваемый источник благодати явися чтимый образ Богоматере Молченския, от пресвитера путивльскаго многи леты хранимаго безбожных ради, иже паки разориша люто обитель Молченскую. Ныне же новомученицы земли Российския и исповедницы oбители Молченския поминающе, со умилением лобызают иноцы икону сию, вопиюще Богу: Аллилуиа.

Икос 8
О, торжество новое! О, празднество светлое: се собрашася во второе обретение чтимаго oбраза архиереи и священницы, иноцы и простии, иже с пением перенесоша икону явленную из Соборныя церкви путивльския во oбитель Молченскую, вопия Богородице таковая:
Радуйся, Руно Давидово, на него же Слава Отча сниде;
Радуйся, Стамно златая, из Нeя же Христос произыде.
Радуйся, Тобою бо изгнася во вселенней тьма идольская;
Радуйся, Тобою бо возсия верным Свет Разума.
Радуйся, херувимов и серафимов Воеводо честнейшая;
Радуйся, вознесением Своим на небо, Илию превзошедшая.
Радуйся, Пресвятая Дево, oбители Молченския радосте и утверждение.

Кондак 9
Притецем, людие, к Богоневесте Владычице: Мати бо истинная воплощеннаго Сына Божия явилася eси: се, неизреченно в лоне Ея, аки в горниле небеснем, неслитно и нераздельно соединишася два eстества Христовы, от Него же Церковь, питием новым в жизнь вечную напаяема, вопиет Богу: Аллилуиа.

Икос 9
Воистину, спасительна есть обитель Молченская, имуще заступлением икону явленную Твою, Богородице. В ней же иноцы, мир суетный оставиша, Царствия ради Христова, подвигом веры, поста и молитвы подвизашеся, присно приносят Непорочней похвальная. С ними же и мы возопиим Богородице таковая:
Радуйся, Ключу Христов, Имже врата Рая открышася;
Радуйся, Венче Святый, Троицы eдиносущныя.
Радуйся, Звездо утренняя, Свет Невечерний родившая;
Радуйся, Лампадо теплая, во тьме мира сего сияющая.
Радуйся, Правило веры, благочестию наставляющая;
Радуйся, Игумение пречудная, воинства небеснаго.
Радуйся, Пресвятая Дево, oбители Молченския радосте и утверждение.

Кондак 10
Воспевают Тя, Пресвятая Дево, патриарси и пророцы, мученицы и безсребреницы, священницы и бельцы. Аще бо не Ты, Владычице, то коликих бед избегли бы тогда? Коликих слез более пролияху людие в горести своей? Сих удалишася, ублажает Тя род человеческий, поюще Богу песнь: Аллилуиа.

Икос 10
Тайно eсть Рождество Твое Дево, от неплодных Иоакима и Анны. Тайно явление Лика Твоего на древе близ блата Молченскаго. Тамо неплодныя детородители содеваются, зде же пустынныя души к плодоношению духовному уготовляются, во eже звати Ти таковая:
Радуйся, Ево новая, новаго Адама родившая;
Радуйся, Реко благодати, в раю Божием текущая.
Радуйся, Тишино смущенных и Пристанище обуреваемых;
Радуйся, Росо Божия, душевныя пустыни орошающая.
Радуйся, Неусыпная Ходатаице, взыскующих спасения;
Радуйся, Оградо несокрушимая, Церквe православныя.
Радуйся, Пресвятая Дево, oбители Молченския радосте и утверждение.

Кондак 11
О, Божественнаго снисхождения! О, чудесе любве Божия! Рабу бо Свою Бог Материю Света содела, о Нeй же Дух Святый глаголет: «Красуйся и веселися Дщи Сионова, яко к Тебе Аз гряду». Темже верою покланяющеся изображению Лика Твоего, Пречистая, вопием вси Богу песнь: Аллилуиа.

Икос 11
Дугу новую устави Тя Господь, Пречистая: Мати бо милостивая на небеси и на земли явися Пренепорочная вочеловечением Сына Божия. Сего ради, поюще воплощение Христа Бога нашего, вопием Богородице таковая:
Радуйся, Елеоне истинный, из Нея же Христос вознесеся;
Радуйся, Ризо златовидная, от Духа сотканная.
Радуйся, Заступнице неложная, пред Судией Праведным;
Радуйся, Надеждо светлая, воскресения вечного.
Радуйся, Дуго живоносная, Слова воплощеннаго;
Радуйся, Мирохранительнице новая, Мира неистощимаго.
Радуйся, Пресвятая Дево, oбители Молченския радосте и утверждение.

Кондак 12
Дивное чудо! Благоволила Богородица в лице иконы Своeя в Путивль град приидти из пустыннаго блата Молче. Темже и души наша воззови, Пречистая, из блата греховнаго, да принесем вси песнь о Тебе Богу: Аллилуиа.

Икос 12
Велие торжество есть второе обретение чтимаго образа Богоматере Молченския: имже, яко омофором, покрывает Богородица град Путивльский и страну Северскую, и всю землю Русскую, о Ней же вопием со умилением таковая:
Радуйся, Лозо живая, Божественнаго вертограда;
Радуйся, Розо цветущая, девством благоухающая.
Радуйся, Избавление конечное, лести идольския;
Радуйся, Начаток истинный, Божественнаго возсоздания.
Радуйся, Ликование вечное, ангельскаго воинства;
Радуйся, Ублажение присное, рода человеческаго.
Радуйся, Пресвятая Дево, oбители Молченския радосте и утверждение.

Кондак 13
О, Всемилостивая Госпоже, Мати Господа и Бога нашего Иисуса Христа и Всесвятая Игумение oбители Молченския! Покрове града Путивльскаго и страны Северския и всeя земли Российския! Нынешнее наше малое сие моление пред святою иконою Твоeю приемше, от всяких бед и напастей свободи рабы Твоя, Богородице. Души наша скоро изведи из блата греховнаго и делами милосердия и любовию Твоeю оживотвори, да всегда благодарно воспоем о Тебе песнь Всещедрому Богу: Аллилуиа.
Сей Кондак глаголи трижды, и паки чтется 1-й Икос и Кондак 1-й.

МОЛИТВА
О, Мати Света, Преблагословенная Богородице Дево, взываю к Тебе в окаянстве моем: не имам бо слез покаянных, ниже сокрушения сердечнаго, ниже вопля душевного о своих беззакониях. Токмо Тебе в надежде предстою, явленней на блате Молченстем иконою Твоeю честною, и смиренно молю: вниди и во блато греховное моея души и во источник чистыя веры претвори, взыди на ветхое древо моего мудрования, и новой порослью добрых дел соделай, слепоту мою душевную светом благодати осияй, сокруши камень сердца моего, и во благоуханный воск свещи горящия любовию премени, да яко добрый бортник услышу ушесами отверстыми моея души повеление сотворити в себе храм Твой, Всечистая, совершая хвалу Тебе, Досточудная, во веки веков. Аминь .

Величание:
Величаем Тя, Пресвятая Мати Христа Бога нашего, от блата Молче иконою Своeю возсиявшая и люди, чтущия oбраз Твой святый от бед избавляющая.

Празднование 18 сентября/1 октября и 24 апреля/7 мая

Существует иной акафист Молченской иконе Пресвятой Богородицы, который читается в московском храме преп.Сергия Радонежского в Бусиново (там есть чудотворная Молченская икона).
Сей акафист тойже Молченской иконе, читается в Путивльском Молченском Печерском монастыре и в Молченской Софрониевой пустыни - месте, где 18 сентября 1405 г. эта икона первоначально явилась. Акафист составлен современным церковным гимнографом архиепископом Ионофаном (Елецких) в 1995 г. в память второго обретения Молченской иконы, во в то время, когда владыка Ионофан занимал Глуховскую кафедру.