Акафист Пресвятой Богородице в честь иконы Ее ОКОВЕЦКОЙ, именуемой ПРОЗРЕНИЕ ОЧЕС Акафист Пресвятой Богородице в честь иконы Ее ОКОВЕЦКОЙ, именуемой ПРОЗРЕНИЕ ОЧЕС
Празднование: 24 июля (н. ст.)

Кондак 1
Взбранной Воеводе, небесе и земли Царице, милостивно икону Свою пречудную нам даровавшей благодарственное приносим пение. Ты же, Преблагословенная, Сына Твоего о нас умоли и от всяких бед избави, да со умилением поем Ти:
Радуйся, Владычице, душевныя и телесныя очи наша исцеляющая.

Икос 1
Архангел и Ангел множество Тя, честнейшую Херувим и славнейшую без сравнения Серафим, небесными гласы непрестанно величают. Мы же, ангельстей песни подражати дерзающе, умиляемся о Твоих благодеяниих, на нас бывших, и зовем Ти сице:
Радуйся, от Архангел и Ангел восхваляемая.
Радуйся, от всех Небесных Сил ублажаемая.
Радуйся, Богоизбранная Отроковице.
Радуйся, Троическаго Совета Таиннице.
Радуйся, крине благовонный девства и чистоты.
Радуйся, образе несказанный небесныя славы.
Радуйся, Владычице, душевныя и телесныя очи наша исцеляющая.

Кондак 2
Видящи икону Пресвятаго лика Твоего и Крест, иже на древесах обретени быша, людие зело удивишася: возсия бо свет неизреченный от святыни Твоея и мнози болящии исцелишася от недугов своих. Мы же, преклоняяся пред образом Твоим честным, во умилении сердечнем поем Богу: Аллилуиа.

Икос 2
Разум подаждь нам, Всесвятая Владычице, да к Тебе прибегаем в находящих на нас лютых скорбех, Ты бо крепость наша, и утверждение, и от врагов защищение, и, яко Благая, не остави нас во обстоянии сущих, но помози нам, взывающим сице:
Радуйся, обидимых Покровительнице.
Радуйся, изнемогающим скорая Помощнице.
Радуйся, бедствующих покрывающая.
Радуйся, страждущих утешающая.
Радуйся, обуреваемых тихое пристанище.
Радуйся, погибающих чудное спасение.
Радуйся, Владычице, душевныя и телесныя очи наша исцеляющая.

Кондак 3
Силою свыше укрепи нас, Пресвятая Дево Богородице, приклонися к мольбам нашим, избави нас от всех бед и скорбей, и видимыя и невидимыя враги отжени от нас, да спасаеми Тобою, Сыну Твоему и Богу вопием: Аллилуиа.

Икос 3
Имущи непостижимую любовь к роду человеческому, Богородительнице, призри на нас милостивным Твоим оком и печали наша на радость преложи: Ты бо еси всесильная христианом Помощница, просвещение и избавление, слава и похвала; сего ради поем Тебе таковая:
Радуйся, дивная о нас пред Богом Заступнице.
Радуйся, теплая о нас пред Ним Молитвеннице.
Радуйся, раю сладости небесныя.
Радуйся, вертограде Христов благоуханный.
Радуйся, милосердие нам являющая.
Радуйся, явлением честныя иконы Твоея тьму лютых обстояний от нас отгоняющая.
Радуйся, Владычице, душевныя и телесныя очи наша исцеляющая.

Кондак 4
Бурею страстей потопляемых спасаеши, Преблагословенная, и победу на враги видимыя и невидимыя даруеши с верою и любовию притекающим ко святей иконе Твоей, да уведят вси, яко Ты еси воистину Заступница рода христианскаго, и восхвалят матерния щедроты Твоя, воспевая Богу: Аллилуиа.

Икос 4
Слышаще о чудесех Твоих предивных, Пресвятая Дево, и сия воочию зряще, воздвигоша людие храмы Божия на месте явления Креста Господня и иконы Твоея чудныя, да вси приходящии на место сие, Тобою избранное, обрящут зде тихое пристанище и скорую помощь от Христа Спаса нашего Твоим ходатайством и заступленим. Сего ради зовем Ти сицевая:
Радуйся, звездо незаходимая.
Радуйся, свеще неугасимая.
Радуйся, иночествующих утешение и отрадо.
Радуйся, жен похвало и девствующих славо.
Радуйся, рая краснейшая.
Радуйся, утра светлейшая.
Радуйся, Владычице, душевныя и телесныя очи наша исцеляющая.

Кондак 5
Боготечней звезде подобна святая икона Твоя Оковецкая, благоволением Твоим, Владычице, христоименитым людем явленная; сего ради вси притекающии к Тебе со усердием моления о нуждах своих и скорбех пред нею приносят и, скорую помощь от Тебе приемлюще, с радостию велиею вопиют Сыну Твоему и Богу: Аллилуиа.

Икос 5
Видевше вернии людие, яко недалече от места явления чудотворнаго образа Твоего благоволила еси, Владычице, открыти благодатный источник воды целебныя, идеже дары милости Твоея неоскудно подаеши всем с верою приходящим, подвизая благодарственно пети Тебе сице:
Радуйся, икону Твою в помощь нам даровавшая.
Радуйся, знаменьми и чудесы сию прославившая.
Радуйся, живоносный источник явити благоволившая.
Радуйся, водою от него истекающею верных исцеляющая.
Радуйся, пред Господем и Сыном Твоим наша Молитвеннице.
Радуйся, всего рода человеческаго всемощная Заступнице.
Радуйся, Владычице, душевныя и телесныя очи наша исцеляющая.

Кондак 6
Проповедует Святая Церковь милости и чудеса Твоя, Богородительнице, от святыя иконы Твоея Оковецкия бываемая, на ней же зрим Тя, на руку Твоею держащую Богомладенца Христа, и святителя и чудотворца Николая, Тебе предстоящаго, егоже молитвами спасай нас от всяких бед и скорбей, вопиющих Сыну Твоему и Богу: Аллилуиа.

Икос 6
Возсия благодать неизреченная от цельбоноснаго образа Твоего, Пресвятая Дево, сердца наша радости и веселия исполняя. Сего ради, притекающе с верою к чудному образу Твоему, со упованием взываем Ти таковая:
Радуйся, яко скорбь нашу в радость претворяеши.
Радуйся, яко сладость неизреченную в души наша изливаеши.
Радуйся, мира душевнаго Подательнице.
Радуйся, в печалех сущих Утешительнице.
Радуйся, всех верных утверждение.
Радуйся, заблуждающихся доброе вразумление.
Радуйся, Владычице, душевныя и телесныя очи наша исцеляющая.

Кондак 7
Хотящи явити токи чудес от святыя иконы Твоея Оковецкия, повелела еси, Пречистая, в нуждах и в печали сущим молебная пения пред тою совершати, и получившим исцеление – проповедати милости и щедроты Твоя, ради тоя иконы явленныя, да благодарственно вопиют Богу: Аллилуиа.

Икос 7
Дивна и преславна дела Твоя, Богородице Дево: всем бо с прилежною молитвою пред цельбоносною иконою Твоею припадающим вся благая по коегождо потребе и в меру веры и любве подаеши. Сего ради, пред образом Твоим святым припадающе, со умилением поем Ти:
Радуйся, душ наших освящение.
Радуйся, ран душевных и телесных исцеление.
Радуйся, чаше, черплющая всему миру радость.
Радуйся, источниче, изливающий вечную сладость.
Радуйся, храмов наших первейшее украшение.
Радуйся, домов христианских благословение.
Радуйся, Владычице, душевныя и телесныя очи наша исцеляющая.

Кондак 8
Дивно икону Твою Оковецкую явила еси, Владычице, чрез сию людем немощным исцеления подавати благоволивши, обаче не токмо телесныя врачевания, но и скорбящим утешение, падающим востание, заблуждшим духовное прозрение и иныя тмочисленныя благодеяния милостивно подаеши всем с верою и упованием к Тебе притекающим и Сыну Твоему поющим: Аллилуиа.

Икос 8
Всеми вышними и нижними владычествуя Господь, Тебе, Матерь Свою, дарова нам во отраду и утешение, в защиту и укрепление и в вере утверждение, да под благим водительством Твоим непреткновенно житие сие земное прейдем и Царствия Небеснаго достигнем, поюще Ти таковая:
Радуйся, небесе и земли Царице.
Радуйся, мира горняго и дольняго Владычице.
Радуйся, православных верная Хранительнице.
Радуйся, душ святых мудрая Украсительнице.
Радуйся, в Горнее Царство благая Путеводительнице.
Радуйся, о спасении душ наших неустанная Попечительнице.
Радуйся, Владычице, душевныя и телесныя очи наша исцеляющая.

Кондак 9
Все естество Ангельское похвальная приносит Тебе, Пресвятая Дево, прославляя Твое милосердие ко грешному роду человеческому, егоже Ты Своим всемощным покровом осеняеши, от бед и искушений избавляеши, и молишися о всех верных, зовущих Сыну Твоему и Богу: Аллилуиа.

Икос 9
Ветия славы Твоея явишася Владычице, слепии и хромии, разслабленнии и немощнии исцеление от Твоея иконы приявшии. Сего ради, восхваляя вся милости Твоя, роду человеческому Тобою присно изливаемыя, со умилением воспеваем Тебе сице:
Радуйся, телес наших безмездное врачевание.
Радуйся, душ наших спасение.
Радуйся, сосуде благоуханный Духа Святаго.
Радуйся, доброплодная ветве вертограда Христова.
Радуйся, Ангелов всехвальная Царице.
Радуйся, земнородных милостивая Покровительнице.
Радуйся, Владычице, душевныя и телесныя очи наша исцеляющая.

Кондак 10
Спасти хотящи многия недужныя, чудную икону Твою, Владычице, явила еси в пределех Оковецких, и чрез сию множество исцелений даровала еси, наипаче же страждущим слепотою душевною и телесною. Сего ради «Прозрение очес» сия чудотворная икона Твоя наименовася, да вси притекающии к ней и помощи у Тебе просящии памятуют выну о Твоих неисчетных благодеяниих, и Подателю всех благ Богу да вопиют: Аллилуиа.

Икос 10
Стена еси похваляющим чудеса Твоя, Пресвятая Дево, всем к помощи Твоей прибегающим. Сего ради во всех тяжких обстояниих и во всякое время жития нашего помощь Твою и заступление обретающе, со благодарением зовем Ти сицевая:
Радуйся, суетную мудрость века сего посрамляющая.
Радуйся, ослепленных ею на путь правый наставляющая.
Радуйся, греховныя помыслы отгоняющая.
Радуйся, сердца ожесточенная умягчающая.
Радуйся, обуреваемых страстьми тихое пристанище.
Радуйся, смущаемых искушениями надежное прибежище.
Радуйся, Владычице, душевныя и телесныя очи наша исцеляющая.

Кондак 11
Пение всеумиленное приносим Ти, Всеблагая Владычице, пред пречистым Твоим образом; Ты же милостивно услыши ны, и помози нам покаянием очиститися от скверны греховныя и преуспети в богоугоднем житии, да поем о Тебе Создателю нашему: Аллилуиа.

Икос 11
Светозарную икону Твою, Богородительнице, со благоговением зрим и, лобызая ю, радуемся, имуще таковый залог Твоего к нам благоволения, вопиюще Ти хвалебныя песни таковыя:
Радуйся, Богом возлюбленная Царице.
Радуйся, Бога возлюбившая Владычице.
Радуйся, иноков Покровительнице.
Радуйся, инокинь Наставнице.
Радуйся, страны нашея православныя Защитнице.
Радуйся, всех христиан Благая Заступнице.
Радуйся, Владычице, душевныя и телесныя очи наша исцеляющая.

Кондак 12
Благодать Божественную испроси нам у Сына Твоего и Бога, о Всеблагая, подай нам руку помощи, да не погибнем люте без покаяния, просвети сердечныя очи наша к зрению спасения и сподоби нас в жизни сей и в Царствии Небеснем воспевати Творцу и Создателю нашему: Аллилуиа.

Икос 12
Поюще неисчетная Твоя чудеса, являемая нам от святыя иконы Твоея Оковецкия, Пресвятая Владычице, и припадающе к ней, молим Тя: защити нас в жизни сей и в день кончины нашея, егда имамы предстати на суд пред Престолом Сына Твоего и Бога нашего, да благодарно вопием Ти:
Радуйся, Царя Небеснаго умоление.
Радуйся, многих согрешений прощение.
Радуйся, болящих исцеление.
Радуйся, унывающих ободрение.
Радуйся, сердца нашего умиление.
Радуйся, ума нашего просвещение.
Радуйся, Владычице, душевныя и телесныя очи наша исцеляющая.

Кондак 13
О Всепетая Мати Христа Бога нашего, Благая Одигитрие! Приими милостивно сие моление наше, пред чудотворною иконою Твоею приносимое, буди нам в мире сем от враг видимых и невидимых покров и защищение, и в час смертный явися нам Сама, простирая руку помощи, и на Страшнем Суде Сына Твоего о нас умоли, да, спасаеми Тобою, с Небесными Силами и всеми святыми в радости неизреченней вопием Богу: Аллилуиа.
Этот кондак читается трижды, затем икос 1 и кондак 1

Молитва
О Пречудная и Превышшая всех тварей Царице Богородице, Небеснаго Царя Христа Бога нашего Мати, Пресвятая Одигитрие Марие! Услыши ны, грешныя и недостойныя, в час сей молящихся и к Тебе со воздыханием и слезами пред пречистым Твоим образом припадающия, и сице умильно глаголющия: изведи нас от рова страстей, Одигитрие Благая, избави нас от всякия скорби и печали, огради от всякия напасти, и злых клевет, и от неправеднаго навета вражия.
Можеши бо, о Благодатная Мати наша, не точию от всякаго зла сохранити люди Твоя, но и всяким благодеянием снабдити и спасти: разве бо Тебе иныя Предстательницы в бедах и обстояниях и теплыя Ходатаицы о нас, грешных, к Сыну Твоему не имамы, Егоже умоли, Владычице, спасти нас и Царствия Небеснаго сподобити, да, спасеннии Тобою, славим Тя и в будущем веце, якоже спасения нашего Виновницу, и превозносим святое и великолепое имя Отца и Сына и Святаго Духа, в Троице славимаго и покланяемаго Бога, во веки веков. Аминь.

Тропарь, глас 4
Возсия нам на древе, яко солнце светозарное, чудотворная икона Твоя, Владычице Богородице, озаряющи преславно чудес сиянием всех с верою и любовию к ней притекающих. Небесныя Силы сему радуются и души праведных духовно торжествуют, мы же взываем к Тебе, Пречистая: моли за ны рождшагося от Тебе Христа Бога нашего, и матерним к Нему предстательством избави нас от всякаго зла, недуги наша исцели, душевныя и телесныя очи просвети, печали наша утоли и наследники нас Небеснаго Царствия яви, яко любвеобильная Мати.

Кондак, глас 4
Чудотворней Твоей иконе, Владычице Богородице, всеблагоговейно покланяемся и лобызаем ю: подаеши бо тою исцеления, здравие же и крепость душам и телесем, избавляеши грады и веси от всякаго зла и спасаеши люди к Тебе притекающия, Дево Мати Всепетая.

Оковецкая (Ржевская) икона Божией Матери
Оковецкая (Ржевская) икона Божией Матери явилась в 1539 году в Тверской епархии недалеко от города Ржева. Два разбойника на Пырышенском городище, находившемся среди дремучего леса на берегу речки Пырошни в Оковецкой волости, нашли прибитый к сосне большой железный крест и на другом дереве - небольшую, старого письма икону, изображавшую Божию Матерь с Богомладенцем и с предстоящим святителем Николаем Мирликийским. Они сообщили об этом односельчанам, и в день Сошествия Святого Духа инок Селижарова монастыря Стефан при стечении народа из четырех окрестных деревень обрел эти святыни. При явлении святого креста и иконы воссиял необычный свет и совершились исцеления.
Одна слепая, не видевшая в продолжение 8 лет, получила прозрение; боярыня Сурменева получила исцеление от болезни глаз; глухая женщина, по имени Ульяна, стала слышать; некто Борис, по прозванию Хрусталь, получил исцеление от расслабления и от глазной болезни. В продолжение одной недели — от Духова дня до заговенья перед Петровым постом совершилось и было записано 27 случаев чудесных исцелений, произведенных через новоявленную икону.
Инок Стефан и священник из Ржева Григорий Онисифоров поехали в столицу с описаниями явления святынь и исцелений от них. Митрополит Иоасаф, после освидетельствования чудотворений на месте, благословил воздвигнуть там два храма - во славу Происхождения Честных Древ Креста Господня и в честь Богоматери Одигитрии, с приделом во имя святителя Николая Чудотворца. Причем в качестве престолов были использованы пни вековых деревьев, на которых висели чудотворная икона и крест.
В январе 1541 года по указу царя Иоанна Васильевича Оковецкий образ был торжественно принесен в столицу для освящения воздвигнутого здесь храма в честь Ржевской иконы Божией Матери. После освящения церкви икона и крест были перенесены в Успенский собор, где находились до 11 июля. В этот день ржевские святыни были возвращены к месту их чудесного обретения. Митрополит со всем собором столичного духовенства, молодой царь Иоанн Васильевич и весь народ провожали икону. В память этого торжества было установлено празднование Ржевской иконе Божией Матери 11 (24) июля.
Со временем неподалеку от места обретения Ржевских святынь из земли забил целебный источник, названный в народе Оковецким. Возле этого источника в 1870 году была построена часовня в честь Преображения Господня.
В 1930 году из опечатанного властями Оковецкого храма чудесным образом бесследно исчезли оковецкие святыни. В 1934 году с закрытием храма в с. Оковцы разрушили часовню, а источник был засыпан строительным мусором и камнями.
В 1991 году земля Оковецкого источника была передана Нило-Столобенской пустыни. В 2002 году, по сохранившимся фотографиям, восстановлена Преображенская церковь. В деревне Оковцы (Селижаровского района, Тверской обл.) восстановлен храм в честь Смоленской иконы Божией Матери.
Ежегодно 24 июля (н. ст.) в храме на святом источнике совершается архиерейская Божественная литургия, после которой верующие окунаются в живительные воды Оковецкого ключа. Из огромного родника-колодца мощным потоком льется исцеляющая вода, которая поступает в специально оборудованные купальни, расположенные одна ниже другой. Поток желающих омыться святой водой обычно не иссякает до позднего вечера.
Оковецкую (Ржевскую) икону Божией Матери называют также «Прозрение очес», так как по молитве пред этим образом совершилось множество исцелений от слепоты и глазных болезней.

По благословению митрополита Херсонского и Таврического Иоанна

Взято с сайта Православная Херсонщина"