Кондак 1
Избранней от рода человеческого на спасение наше в Матерь воплотившегося от Духа Свята Иже от Отца Рожденного прежде всех век Премудрости Божией - Царя Славы Христа Бога нашего, похвальная восписуем Ти, Владычице нашей, раби Твои, Богородице. Ты же, Мати Премудрости Божия, Плотию Родившая Неописанное Божие Слово на спасение наше, от всяких нас бед свободи и ко спасению вразуми, да зовем Ти:
Радуйся, Всемилостивая Подательнице ума, наша Добрая Вразумительнице!
Икос 1
Ангел предстатель с небесе послан бысть рещи Богородице: радуйся, и от Духа Свята воплощаема Тя разумевая, Господи, ужасашеся и стояше, зовый к Ней таковая:
Радуйся, Премудрости Божией вместилище!
Радуйся, благодати Духа Святаго приятелище!
Радуйся, Бога Слова Плоти всемилостивое созидание!
Радуйся, Премудрости Божией отпавшим тоя подаяние!
Радуйся, преданным смерти Жизни Подателя рождшая!
Радуйся, в ад осужденным Своим Рождеством Путь на небо открывшая!
Радуйся, в злых обстояниях Всесильная наша Спасительнице!
Радуйся, в неудобопонимаемых обстояниях Всемилостивая Вразумительнице!
Радуйся, суетной мудрости века сего, иже буйство есть перед Богом, Премудрая Обличительнице!
Радуйся, демонами прельщенных от козней их злых Свободительнице!
Радуйся, против плоти, мира и дьявола брань ведущим Милостивая Защитительнице!
Радуйся, разума Христова просящим независтная его от Бога Подательнице!
Радуйся, Всемилостивая Подательнице ума, наша Добрая Вразумительнице!
Кондак 2
Видящи благочествыя люди земли Италийския дом Богородичен, идеже Пресвятая Дева родися, потщася принести дом той в страну свою во град Лорето, да покров Ея всемилостивый обрящут, радостно Богу зовя:
Аллилуйя!
Икос 2
Разум недоразумеваемый разумети ищущи, Премудрости Богомати, благочестивыя люди града Лорето потщася соорудити Ти икону, от древа сотворену, иже буде всем верным в образ Твой и Рожденной Тобой Премудрости и Силы Божией – Христа Бога нашего, превосходящей всякий разум человеческий. Мы же им подражая, Премудрости Твоея просим и сего ради зовем Ти сице:
Радуйся, Премудрости Божьей Родительнице!
Радуйся, Тоя земнородным Подательнице!
Радуйся, разума Христова ищущих усердная Взыскательнице!
Радуйся, требующим ума Христова Добрая Вразумительнице!
Радуйся, ослепленных учениями суетного века сего ко Христу приведение!
Радуйся, нищим духом даров Духа Святого всемилостивое излияние!
Радуйся, вселукавые ухищрения врага простотою Своей обличающая!
Радуйся, врагов рода человеческого Силою Рожденного Тобой Тобой запинающая!
Радуйся, плотския недоразумения Премудростью Сына Твоего обличающая!
Радуйся, всех верных в Истине Рождества Твоего просвещающая!
Радуйся, милости Божией отпавших с Создателем всех примирение!
Радуйся, Премудрости Божией обуянным страстями последних времен подаяние!
Радуйся, Всемилостивая Подательнице ума, наша Добрая Вразумительнице!
Кондак 3
Сила Вышнего осени к зачатию Браконеискусную и Дух Святый найде на Тя, Всенепорочная, да зачнеши по плоти Премудрость и Силу Божию, Христа Бога нашего, Ему же о Тебе всегда поем сице:
Аллилуйя!
Икос 3
Имуще Богоприятную Дева утробу, Премудростию Своею превосходящая премудрость небес, в ней же изволи воплотитися на спасение наше премудрости и смыслов Податель, да всех Премудрости Божией ищущих Тобою Себе приобрящет. Сего ради вопием к Богородице:
Радуйся, Премудростию Своею превосходящая Премудрость небес!
Радуйся, Бога Слово на спасение наше плотью родившая!
Радуйся, нам на освящение Его даровавшая!
Радуйся, Премудрости Божией нас приобщившая!
Радуйся, Рождеством Своим мир освятившая!
Радуйся, клеще огнезрачная, угль Божества неопально в Себе воплотившая!
Радуйся, в снедь верным Сына Своего подарившая!
Радуйся, к тайнам грядущего века дверь верным открывшая!
Радуйся, в уповании на Бога всех верных Своим Рождеством утвердившая!
Радуйся, в ад осужденных Своим Рождеством к небесам устремившая!
Радуйся, в служение Богу полагати нас жизнь научившая!
Радуйся, верных дар жизни в дар Богу и ближним давати Своим Рождеством вразумившая!
Радуйся, Всемилостивая Подательнице ума, наша Добрая Вразумительнице!
Кондак 4
Бурю внутрь имеют помышлений сумнительных гордые и самонадеянные сыны века сего, не желающие покорити разум свой воли Божией, во всем благой и совершенной, Его же любящим вся бывает ко благу, Иже подвизает верных вопияти: Аллилуйя!
Икос 4
Слышаша Тя, Пренепорочная Мати Дево, яко Премудрости Божией Родительницу, Иже Премудростию Своею несравненно превосходит разум человеческий, в Ея же утробе воплотися изволи на спасение наше
Премудрости и смыслов Податель, все вернии радостию исполняются и к Тебе прибегают, чая источник жизни и смыслов в Тебе обрести, сего ради Ти поюще реша:
Радуйся, в утробе Своей воплотившая всея вселенной Создателя!
Радуйся, на спасение наше родившая Премудрости Божией Подателя!
Радуйся, из плоти Своея Плоть Богу Слову соткавшая!
Радуйся, нам, земнородным, на освящение Его даровавшая!
Радуйся, Мати Света, души всех просвещающего!
Радуйся, на пути Христовом всемилостиво нас укрепляющая!
Радуйся, разум Христов, иже буйство есть в мире сем прелюбодейном и грешном, нам обрести помогающая!
Радуйся, разум свой ненадежный и суетный нас распинати Христу научающая!
Радуйся, дьявольской плотской премудрости ум отвратившая!
Радуйся, верных всех разум Своим Рождеством к небесам устремившая!
Радуйся, ужас тлителя смыслов Своим Рождеством истребившая!
Радуйся, новый смысл жизни Своим Рождеством утвердившая!
Радуйся, Всемилостивая Подательнице ума, наша Добрая Вразумительнице!
Кондак 5
Боготечней звезде подобна явися икона Твоя, Богомати, всем во мраце жития сего сущим и ума Христова просящим, иже во всяком недоумении с верою к Тебе прибегая, в недоразумеваемых обстоятельствах вразумление, веры, ума, всяческих добродетелей и нового смысла жития обретение от Тебя улучивши, Сыну Твоему о Тебе вопиют:
Аллилуйя!
Икос 5
Видяще Милостивая художника, разумом помрачена и в горести болезни своей от земных врачей, аще и все имение свое раздав, никакой же пользы улучивша, сжалишася зело и явися болящему, заповеда икону Свою написати. Исполнив сия, художник от часа того избавися от недуга своего, вопия Благословенней:
Радуйся, породившая жизни Создателя!
Радуйся, Богородительнице - Мати всех смыслов Подателя!
Радуйся, всех земнородных чаяний и надежд воплощение!
Радуйся, древних ветхозаветных пророчеств Израиля совершение!
Радуйся, неисцельных недугов Целительнице!
Радуйся, душевных и телесных язв Врачевательнице!
Радуйся, оставленных врачами во Свои объятия приемлющая!
Радуйся, ум от недуга иждившим новый смысл жития подающая!
Радуйся, самых отверженных помощью не оставляющая!
Радуйся, радостью светлой надежды нам души и ум возрождающая!
Радуйся, самым отчаянным смысл жития обновляющая!
Радуйся, к новому светлому смыслу наш ум утверждающая!
Радуйся, Всемилостивая Подательнице ума, наша Добрая Вразумительнице!
Кондак 6
Проповедницы бывшия вси улучившии от иконы Твоея милости, о Владычице, иже к ходатайству Твоему прибегая, неудобопонимаемых обстояниях вразумление, неисцельных недугов исцеление и новый смысл жития улучивши, Тя яко всех благ Подательницу ведуще, Богу вопиют:
Аллилуйя!
Икос 6
Возсия икона Твоя, Богородице, яко светлое просвещение истины, иже «Подательница ума» наречеся, да вси вернии в недоуменных обстояниях и помрачении ума к ней прибегая и сих с помощью Твоея избавльшеся, вопиют Богородице:
Радуйся, разума лишенных страдальцев Всемилостивая Сострадательнице!
Радуйся, разума Христова просящим Всемилостивая тем от Бога Подательнице!
Радуйся, разумом помраченных всемилостивое просвещение!
Радуйся, земного утешения лишенных всерадостное посещение!
Радуйся, скорбящим умом воздаяние!
Радуйся, радости умной лишенным тоя подаяние!
Радуйся, в недоуменных обстоятельствах премудрое и скорое вразумление!
Радуйся, недугов душевных и телесных всемилостивое избавление!
Радуйся, из глубины неведения извлачающая!
Радуйся, премудрости Божьей просящим ум просвещающая!
Радуйся, в Истине верных Своим Рождеством утверждающая!
Радуйся, к жизни небесней нам смысл жития обрести помогающая!
Радуйся, Всемилостивая Подательнице ума, наша Добрая Вразумительнице!
Кондак 7
Хотяще люди земли Российския Премудрость Божию стяжати, храмы и домы своя украсиша иконами Твоими, Мати Дево, иже «Подательница ума» наречеся, Богу о Тебе зовуще: Аллилуйя!
Икос 7
Новую Тя показа Спасительницу, Всех скорбящих Радость и от бед Избавительницу, Добрую Вразумительницу и во благих к светлому небесному смыслу всех дел Устроительницу Сын Твой, Христос Бог наш, да вси обращающиеся к Тебе и помощь от Тебя улучающии воспоют Тя, вопиюще:
Радуйся, рождшая Небесного Царства Создателя!
Радуйся, во утробе Своей воплотившая вечныя жизни Подателя!
Радуйся, ко спасению нас вразумляющая и направляющая!
Радуйся, в Царствие Сына Твоего двери всем верным Своим Рождеством отверзающая!
Радуйся, во всякой скорби волю Сына Твоего, всеблагую и всесовершенную, видети нас вразумляющая!
Радуйся, дней тленных скорбями двери райские нам отверзающая!
Радуйся, скорби земные на вечную радость небесную нам обращающая!
Радуйся, не земных, а вечных Подателя радостей искати Собой научающая!
Радуйся, все надежды Своим Рождеством воплощающая!
Радуйся, верной надеждой на вечную радость Своим Рождеством утверждающая!
Радуйся, злобного тлителя смыслов Своим Рождеством попирающая!
Радуйся, все ухищрения его Премудростью Твоей обличающая!
Радуйся, Всемилостивая Подательнице ума, наша Добрая Вразумительнице!
Кондак 8
Странно есть своевольным маловерным сынам суетного века сего видети, како вернии, устранившись излишних житейских попечений, разум и волю свои в волю Божию предают, всеблагую и совершенную, вся во благо устраяющую, хотящую привлещи к высоте небесней Тому вопиющия:
Аллилуйя!
Икос 8
Вся бо в вышних, но и нижних никако же отступи Всесвятавя Дево, Премудрость Божию Рождеством Своим даровав нам, Премудрости и благодати Божия отпавшим, сего ради слышаши сия:
Радуйся, жилище премудрое Бога и Слова Создателя!
Радуйся, рождшая всех благодати и смыслов Подателя!
Радуйся, Рождеством Своим мир освятившая!
Радуйся, нам, милости Божьей отпавшим, Того подарившая!
Радуйся, вечную умную Радость всем нам даровавшая!
Радуйся, хитрые сети прелестника злого Своим Рождеством растерзавшая!
Радуйся, Рождеством Своим скорби державу поправшая!
Радуйся, свобождение осужденным смерти Своим Рождеством даровавшая!
Радуйся, Жизни Создателя в радость нам всем породившая!
Радуйся, начальника смерти державы Своим Рождеством поразившая!
Радуйся, Умный Хлеб Жизни в Утробе Своей возрастившая!
Радуйся, вечныя Жизни Причастием верных возвеселившая!
Радуйся, Всемилостивая Подательнице ума, наша Добрая Вразумительнице!
Кондак 9
Всякое естество ангельское и человеческое дивится великому Твоему, Богомати, вочеловечения делу: Премудрости Божия Подателя Сына Божия зрим Тобою воплощена преступного всем человека, нашего ради спасения нам убо всем спребывающа, слашаща же о Тебе от всех:
Аллилуйя!
Икос 9
Ветия премудрыя многовещнныя, яко рыбы безгласныя, не могущия ничесоже проглаголати, видим о Тебе, Богородице, недоумевают бо, како возможно сие: Дева Чистая рождает всех жизни, смыслов и Премудрости Божией Подателя. Мы же, разум свой неблагонадежный Христу распявше и твердое упование на Сына Твоего и Бога нашего возложив, верно вопием:
Радуйся, Бога Слово Создателя на спасение наше родившая!
Радуйся, Рождеством Своим мир просветившая!
Радуйся, Рождеством Своим ненавистника всех победившая!
Радуйся, злобную тлителя смыслов работу Своим Рождеством упразднившая!
Радуйся, Рождеством Своим в истине нас утверждающая!
Радуйся, ко спасению нас просвещающая и направляющая!
Радуйся, Истины торжество несумненно Собою являющая!
Радуйся, немудрыя паче совопросников века сего в Премудрости Своея просвещающая!
Радуйся, земной, причастный скорби разум, иже буйство есть пред Богом, отвергати нас научающая!
Радуйся, разум всесветлый Христов к радости в мире сем скорбном Своим Рождеством обрести помогающая!
Радуйся, вселукавые исказителя смыслов учения Благой Вестью Рожденного Тобой обличающая!
Радуйся, в просвещении смыслов учителей христианских благословляющая!
Радуйся, Всемилостивая Подательнице ума, наша Добрая Вразумительнице!
Кондак 10
Спасти хотя мир от безумия и прелести вражия премудрости всех Податель Сын Твой Христос Господь наш нам образ Твой дарова, Богомати, Подательницу ума премудро его нарече, яко Бог слышит:
Аллилуйя!
Икос 10
Стена еси всем к заступлению Твоему притекающим и помощи и вразумления Твоих просящим, Богородице Дево, ибо небеси и земли Творец и Премудрости всех Податель Тебя из всех родов избра, непреложно вселься во утробе Твоей, и вся приглашати Тебе научи:
Радуйся, Начальнице мысленного наздания!
Радуйся, Подательнице Божественного вразумления!
Радуйся, всем неудобь учащимся Божественное вразумление подающая!
Радуйся, всем о вразумлении ближних пекущихся усердно споспешествующая!
Радуйся, Ты бо воистину утешила еси окраденныя умом!
Радуйся, Ты бо воистину обновила еси ум ищущим Истины!
Радуйся, злобного тлителя смыслов работу Своим Рождеством упраздняющая!
Радуйся, державу Подателя Истины светло Собой утверждающая!
Радуйся, исказителей смыслов лукавого века сего обличающая!
Радуйся, труждающихся к просвещению Истиной ближних благословляющая!
Радуйся, глад слышания Слова Божия Своим Рождеством утоляющая!
Радуйся, вечныя алчбы и жажды Своим Рождеством избаляющая!
Радуйся, Всемилостивая Подательнице ума, наша Добрая Вразумительнице!
Кондак 11
Пение всякий православный христианин непрестанно Тебе приносит, Всенепорочная, но аще и равночисленне песка морского, звезд небесных и лествий земных песни принесем Ти, Владычице, ничтоже Ти совершаем достойно, рождающей нам Премудрость и Истину Божию, Сына Твоего Христа Бога нашего, Ему же о Тебе вопиющим: Аллилуйя!
Икос 11
Светоприемную свещу, во мраке сего жития сущую, зрим икону Твою, Пресвятая Дева, иже возсия всем взыскующим Истины, наставляет к разуму Божественному вся, зарею ум просвещающая, званиими же почитаемая сими:
Радуйся, Светлосте Светлая, луч умного Солнца всем нам возвестившая!
Радуйся, крине небесная чистая, просвещение нам подарившая!
Радуйся, молние, Рождеством Своим мир просветившая!
Радуйся, в ад осужденным небесную весть известившая!
Радуйся, Весть Рождества Твоего в сердце принявших от неведения тьмы свободившая!
Радуйся, злобного адского ига навеки всех верных избывшая!
Радуйся, Рождеством Своим ад покорившая!
Радуйся, в Истине нас утверждающая!
Радуйся, ко спасению нас вразумляющая!
Радуйся, к стоянию в Истине верных молитвой Своей укрепляющая!
Радуйся, исказителя смыслов ученья всесветло Собой помрачающая!
Радуйся, Всемилостивая Подательнице ума, наша Добрая Вразумительнице!
Кондак 12
Благодать и Премудрость Божию дати восхотев всех благодати и Премудрости Божией Податель нам Тя Мати Свою дарова, прииде Тобою к нам, отшедшим Того благодати, и раздрав рукописание грехов наших и Тобою источник премудрости Божией подав, слышит от всех:
Аллилуйя!
Икос 12
Поюще Твое Рождество, хвалим Тя вси, яко одушевленный храм и неиссякаемый источник премудрости Божия, Богородительнице, во Твоей бо вселився утробе вся Создавый и содержай Своею рукою Господь, Иже освяти, прослави и научи вопити Тебе всех:
Радуйся, доме Премудрости Божия и Слова!
Радуйся, яко Чрево Твое соделалося превыше небес!
Радуйся, яко утробо Твоя святая святых большая!
Радуйся, честное жилище Пресвятыя Троицы!
Радуйся, молитвы верных ко престолу Божию приносящая!
Радуйся, во благих желания наша исполняющая!
Радуйся, начальника ада державы от дел отстраняющая!
Радуйся, благая Вратарнице, двери райския нам отверзающая!
Радуйся, к исканию спасения Пути верных Собой вразумляющая!
Радуйся, о просвещении разума ближних пекущихся благословляющая!
Радуйся, чуждые вселукавые учения врага отвергати повелевающая!
Радуйся, светлый разум Христов ко спасению взыскати Своим Рождеством наставляющая!
Радуйся, Всемилостивая Подательнице ума, наша Добрая Вразумительнице!
Кондак 13
О, Всепетая Мати, рождшая Премудрость Божию - всех святых Святейшее Слово! Нынешнее приемши малое моление наше, от всякия скорби, бед и напасти, а наипаче от заблуждения и отпадения от Истины, иже есть Сын Твой – Христос Бог наш, нас избави, и милостивое вразумление, в Истине утверждение и во всем премудрое благое поспешение нам подаждь, о Тебе вопиющих Сыну Твоему и Богу: Аллилуйя!
Молитва о вразумлении Богоматери
О, Всемилостивая наша Владычице, Премудрость и Силу Божию плотью родившая и наш грешный безумный в растленной похоти воли своея падший мир благодати Того приобщившая!
Прими сие малое моление наше, от нищеты духовной Тебе творимое и к Престолу Премудрости Божия – Рожденного Тобой Бога Слова – премудрости и смыслов Подателя милостиво принеси! Вразуми нас, в чем воля Распявшегося за нас Сына Твоего Христа Бога нашего, благая, угодная и совершенная, да познав Премудрость Того, всеми делами и помыслами нашими творити сию да потщимся и верными сынами Рожденной Тобой Премудрости Божией да станем! И тако, лукавого тлителя смыслов века сего сетей избежав, премудро достигнем тихой гавани спасения – жилища Премудрости Божия – Сына Твоего и Бога нашего, славя Его премудрое о нас промышление и Твое всемилостивое о нас заступление во веки веков! Аминь.
Молитва перед иконой Божией Матери «Подательница ума»
О, Всемилостивая Владычице наша, во Блаженном Чреве Твоем носившая и рождшая на спасение наше Премудрость Божию – непреложно в Тебе воплотившагося от Духа Свята Сына Твоего Христа Бога нашего!
Нынешнее наше прими приношение, от скверны нашей Тебе творимое, и ко Владыке и Творцу всех – премудрости и смыслов Подателю милостивно принеси! Подаждь нам, в нищете нашей, угасающим светильникам сердец наших от елея милости Твоея - неиссякаемого Источника Премудрости – сокровища благих и жизни Подателя! Укрепи нас в вере, надежде и любви, иже есть соуз совершенства и верными сынами Премудрости Божией соделай!
Неведущих вразуми, малодушных укрепи, колеблящихся в вере утверди, от малодушия избави и на тернистом пути Христовом терпение нам подай!
Отроков и младенцев учащихся милостиво вразуми, вкорени в сердцах их дух разума и страха Божия, да будет премудрость их не ради праздного любопытства и тщеславия, а во укрепление и утверждение веры, иже есть премудрый поводырь разума, ибо, по премудрому слову Божию, колеблющийся в помыслах нетверд во всех путях своих!
Ибо всем оскудевшим в вере и потерявшим спасительный страх Божий враг всеивает злые плевелы страха своего, иже, по премудрому слову мудрейшего из людей - царя Соломона, есть не что иное, как лишение помощи от разума. Поистине, чем менее надежды и упования на Бога внутрь душ наших, тем более враг представляет злые безумныя измышления своя, производящие страх и мучения, иже есть преддверие мук геенских, ибо, по слову пророка, боязливая бо злоба, своим свидетельством осуждаема, выну приемлет во ум лютая, содержима совестью (Премудр 17 – 10-12).
Да минует нас чаша сия, да не приобщимся духу губителя душ наших, но да от чар и суетных мечтаний его отбежим и духом смиренным и сокрушенным в простоте сердец наших Сыном Твоим приняты да будем, Иже по всемилостивому ходатайству Твоему да изольет в души наша Духа Премудрости Своея.
Всем учащим и трудящимся ради просвещения братий своих милостивно вразумление Свое подай, да несут служение свое с любовью и страхом Божиим, ради блага ближних своих, яко призванные дати нелицеприятный ответ за делание свое на Страшнем Суде Сына Твоего.
Вразуми нас, в чем воля Распявшегося за нас Сына Твоего, Христа Бога нашего, всеблагая, всеугодная и всесовершенная, да познав милость Его о нас, недостойных и грешных, возблагодарим Его во всем житии нашем и всеми делами и помыслами нашими творити сию да потщимся, да тако, бурное море жития сего без порока прейдем и сетей лукавого тлителя смыслов избежав, достигнем вечного дома своего – Небесного Царствия Сына Твоего Христа Бога нашего и тамо прославим Его и Твое всемилостивое о нас грешных предстательство со всеми святыми во веки веков. Аминь!
Конец и Богу слава!
Составитель сего текста Игорь Храмов (Тесёлкин) крайне нуждается в помощи Божией и просит молитв о себе и своих близких:
О здравии
Игоря
Валентины (ж)
Елены
Ольги
и всех благотворящих
и молящихся за нас
Об упокоении
Анны
Василия
Михаила
Михаила
Пелагии
Кирилла
Григория
Ивана
Марии
Николая
Владимира
Нины
Спаси Вас Господи!
http://www.stihi.ru/2015/12/06/9623
hramov-teselkin@mail.ru