Кондак 1
Вышним Царем Превышней всякаго создания Избранная, Царица небеси и земли, святой и чудотворный образ Свой даровала еси нам, Богородице, на вспоможение всем и утешение, яко избавльшеся от злых явлением его и к нему взирающе, благодарственное пение приносим Ти, раби Твои, Ты же, яко имущи милосердие неизреченное, от всяких нас бед, грехов и скорбных обстояний свободи, да зовем Ти:
Радуйся, Богородительнице, всю благодать Материнства миру Собою явившая.

Икос 1
Ангел предстатель послан был с небеси рещи Богородице: радуйся, Благодатная Дево, предъизбранная для великой тайны воплощения Сына Божия. Тем же и мы, грешнии, припадающе ко святому образу Твоему, взывая о материнском Твоем о нас промышлении, с верою и любовию воспеваем Ти:
Радуйся, начало обетования Божия о спасении рода христианскаго;
Радуйся, Отца Безначальнаго благоволение;
Радуйся, Сына Превечнаго вместилище;
Радуйся, Духа Святаго жилище.
Радуйся, ангелов славо и похвало;
Радуйся, демонов попрание.
Радуйся, всея вселенныя веселие;
Радуйся, праведных восхищение и удивление.
Радуйся, грешным укор и наставление;
Радуйся, старцев окормление;
Радуйся, малых чад вразумление;
Радуйся, всех правосланвных христиан прибежище и заступление.
Радуйся, Богородительнице, всю благодать Материнства миру Собою явившая.

Кондак 2
Множество чудных Своих икон даровала еси, Владычице, роду христианскому, являя тем знание чаяний наших и нужд и указуя Свое неотступное о нас попечение. Мы же, грешнии, уповая на милость Твою, припадаем к чудотворному образу Твоему, во граде Серпухове явленному, и вопием о Тебе Богу: Аллилуиа.

Икос 2
Чудно и благотворно исполняется на земли заступление Твое пред милосердием Господа, о, Царице Небесная, каждую бо пречестную икону Твою благочестно вси почитаем, с верою к ней припадаем и взирая на ню, яко на Самую Истинную, Сыну сцарствующую на небесех, Богородицу, взываем Ти сице:
Радуйся, живоносный источниче;
Радуйся, цвете неувядаемый.
Радуйся, неопалимая купино;
Радуйся, пресветлая звездо.
Радуйся, скорбящих всех радосте;
Радуйся, грешных всех споручнице.
Радуйся, кающихся скоропослушнице;
Радуйся, недужных врачевание.
Радуйся, благих умиление;
Радуйся, злых умирение.
Радуйся, нечаянная радосте;
Радуйся, покров наш и спасение.
Радуйся, Богородительнице, всю благодать Материнства миру Собою явившая.

Кондак 3
Явила Себя всему миру сосуд избран, Госпоже Богородице, исполнив в Себе все Отеческое смотрение, пророками в Писании глаголанное, расцветшая яко прозябший Ааронов жезл, яко дверь, Еюже вниде Царь Славы Христос. Мы же спасение наше в Тебе улучивше, вопием Богу: Аллилуиа.

Икос 3
Ветхозаветный храм прообразован Тобой, Приснодево, ибо во чрево благое Твое Невместимый вместитися изволил еси. Мы же, дети Твои, не могуще постигнути тайну сию, воспеваем Тебе таковая:
Радуйся, первозданную чистоту в Себе соблюдшая;
Радуйся, рождением Своим слезы Евины осушившая.
Радуйся, любовию Своею падший Адамов род восставившая;
Радуйся, мир от потопа греховнаго спасшая.
Радуйся, скиние освященная;
Радуйся, скрижаль Богописанная.
Радуйся, ковчеже позлащенный;
Радуйся, одушевленный храм.
Радуйся, море, потопившее фараона мысленнаго;
Радуйся, Божественнаго угля златая кадильнице.
Радуйся, трапезо Слова Жизни;
Радуйся, Святая святых большая.
Радуйся, Богородительнице, всю благодать Материнства миру Собою явившая.

Кондак 4
Праведно жившие, но в бесплодстве укоряемые, благочестивые родители Твои, Пресвятая Владычице, возраста древняго достигшие, но надежду на милость Божию не оставившие, вновь возведя очи и сердца в молитве Единому Отцу, возопили Ему: Аллилуиа.

Икос 4
"Многи скорби праведным, но от всех избавит их Господь", - так и в праведных родителях Твоих исполнилось пророка восклицание, и Тебе, Божественную Отроковицу, даровал им Всемогущий Бог. Мы же, видя непреложность обетования Святаго Писания, восхищенно взываем Ти:
Радуйся, светом Божественным нашу жизнь освещающая;
Радуйся, чувства наша вси просвещающая.
Радуйся, по неустанным молитвам родителей рожденная;
Радуйся, и нас молитвами Своими не оставляющая.
Радуйся, во младенчестве защищение;
Радуйся, в юности пример и подражание.
Радуйся, в зрелом возрасте укрепление;
Радуйся, в старости защито и окормление.
Радуйся, безплодства разрешение;
Радуйся, в родах поможение.
Радуйся, отцов утверждение;
Радуйся, матерей ликование.
Радуйся, Богородительнице, всю благодать Материнства миру Собою явившая.

Кондак 5
Младенчествуя плотию и многолетствуя духом, в трепетное недоумение ввергла, Пречистая дево, вся Небесныя силы, кои вхождение Твое во Святая святых во изумлении зряще, со всеми земными вопиют Богу: Аллилуиа.

Икос 5
Таинственно и сокровенно запечатлено посвящение Твое, Дево Марие, на служение Богу, яко по обету святых родителей Твоих в храм введена еси, приготовляя храму тому и всему миру спасительное обновление. Тем со умилением восхваляем Тя сице:
Радуйся, Едина Богу избранная;
Радуйся, Бога с человеки соединившая.
Радуйся, чистотою Твоею небо возвеселившая,
Радуйся, сиянием Твоим землю осветившая.
Радуйся, во святем храме воспитанная;
Радуйся, всеми добродетельми приукрашенная.
Радуйся, всю славу внутрь имевшая;
Радуйся, плода безсмертнаго стяжание.
Радуйся, мира красоту Собою затмившая;
Радуйся, оковы ада низложившая.
Радуйся, от тьмы греховныя нас избавившая;
Радуйся, всем женам благословение даровавшая.
Радуйся, Богородительнице, всю благодать Материнства миру Собою явившая.

Кондак 6
Памятуя поношение за безчадие праведных родителей Твоих, Пресвятая Мати и Дево, услышала молитвы возносимые к Тебе пред святою Твоею иконою во храме Влахернском некоей Анной, просящей даровати ей сына: "Будешь иметь сына по прошению твоему", - в неизреченной милости объявила Ты ей, Владычице. Тем же и мы, милостей Твоих ожидающе, вопием о Тебе Богу: Аллилуиа.

Икос 6
Видя силу чудесную, являемую всем, с верою молящимся Тебе пред святыми Твоими иконами, припадаем ко святому образу Твоему "Поможение родам" именуемому, с любовию, надеждой и верой взывая Ти сице:
Радуйся, молитвы всех христиан приемлющая;
Радуйся, юзы безчадных родителей разрешающая.
Радуйся, матерям детородящим помогающая;
Радуйся, надеющихся на Тебя радующая.
Радуйся, милующая припадающих к Тебе;
Радуйся, вся благая подающая просящим у Тебе.
Радуйся, наказующая отвергающих Тебе;
Радуйся, прославляющая прославляющих Тебе.
Радуйся, скорбящих утешающая;
Радуйся, безпечно живущих предупреждающая.
Радуйся, страсти сильных угашающая;
Радуйся, в немощи слабых и убогих укрепляющая.
Радуйся, Богородительнице, всю благодать Материнства миру Собою явившая.

Кондак 7
Возвещая радость всему миру, возсия Вифлеемская звезда, преславным рождением Пречистаго Младенца зажженная. Ты же, дивно безсеменно зачав и нетленно родив, вознесла Богу песнь сердца Своего: Аллилуиа.

Икос 7
Во гресех зачатые и в болезнех рожденные тщимся и не возможем поняти преславное таинство, яко нетленно рождаешь Сына всех Бога. Но, улучивше, яко велением Божиим побеждается всякаго естества чин, со страхом и любовию пред святою иконою Твоею восписуем Ти таковая:
Радуйся, миру явившая Сокрушителя главы змиевой;
Радуйся, богатство всего мира безценное.
Радуйся, глаголанное пророками исполнившая;
Радуйся, начало спасению нашему положившая.
Радуйся, безсеменно зачавшая;
Радуйся, нетленно рождшая.
Радуйся, Судии Праведнаго умоление;
Радуйся, дверей райских отверзение.
Радуйся, ангельское житие являющая;
Радуйся, пламень страстей изменяющая.
Радуйся, сокровище неизреченное;
Радуйся, Богородительнице, всю благодать Материнства миру Собою явившая.

Кондак 8
В Кане Галлилейской явити до срока силу Божественную Сына Своего умолившая, о, Пречистая Мати, показуя благоволение к благочестивым бракам христианским, не остави молитвами Своими и нас, ныне припадающих пред дивною иконою Твоею и вопиющих Богу: Аллилуиа.

Икос 8
Восшедши превыше херувимов, превознесена над серафимами, предстоиши, Пречистая Дево, престолу Небеснаго Отца, славу сию любовию, кротостию и смирением стяжавшая. Не престани и ныне молити Сына Своего и Бога о чадех земных - много бо может моление Матери ко Благосердию Владыки. Мы же, дети Твои, теплотою любви Твоей согреваемые, воспеваем Ти радостно:
Радуйся, яко мысли наша освящаеши;
Радуйся, яко прибегающим к Тебе руку помощи простираеши.
Радуйся, яко просящих у Тебе не отвергаеши;
Радуйся, яко праведным награду и утешение даруеши.
Радуйся, яко грешным путь ко спасению указуеши;
Радуйся, яко кающимся прощение обещаеши.
Радуйся, яко недужных врачуеши;
Радуйся, яко изнемогающих укрепляеши.
Радуйся, яко бедствующих спасаеши;
Радуйся, яко падших возставляеши.
Радуйся, яко слезы обидимых утираеши;
Радуйся, яко весь мир Свобою обнимаеши.
Радуйся, Богородительнице, всю благодать Материнства миру Собою явившая.

Кондак 9
Ликуют Небесные силы, видя Тя у престола Бога Вышняго стоящую, вси роди земнии хвалят и почитают Тя, Богородице. Ты же, видя таковое наше пред ликом Твоим благоговение, сподоби нас выну воспевати Богу: Аллилуиа.

Икос 9
Многовещающии ветии в суесловии своем тщатся отвратить людей христианских от почитания святых икон. Мы же, поклоняясь святому образу Твоему, веруем яко честь приносимая нами иконам и святым, возносится к Первообразу, и с веселием восхваляем Тя:
Радуйся, образ Твой честный в залог спасения нам даровавшая;
Радуйся, щедрая раздательнице духовных благодеяний.
Радуйся, яко Ты еси поистинне Мать живых;
Радуйся, Пречистая Дево, Мати русскаго краю.
Радуйся, в житейских нуждах попечительнице;
Радуйся, премудрых превосходящая разум.
Радуйся, верных озаряющая смыслы;
Радуйся, бесов многоплачевное поражение.
Радуйся, чувств благочестивых услаждение;
Радуйся, венче воздержания.
Радуйся, дверь спасения;
Радуйся, опасно болящих от врат смертных отвращающая.
Радуйся, Богородительнице, всю благодать Материнства миру Собою явившая.

Кондак 10
Многи муки терпя, Человеколюбец Господь, к древу на угождение беснующейся толпе пригвожденный, и в час страшный сей совершая дело нашего спасения, указуя, яко Божие Царство смирением, кротостию и тяжкими муками нудится. Мы же, видя таковыя нас ради Сыном Твоим принятые муки, вопием Ему: Аллилуиа.

Икос 10
Кто возможет понять боль сердца Материнскаго, зрящего муки и смерть Сына Своего. Но любовию к Матери превозмогая страдания, Сын Твой и Бог, видя Тя, Матерь земную Свою сердцем, скорбию раздираемым, вверил Тебя любимому ученику, обявив его Твоим сыном, а Тебя его Материю. Мы же, Тобою у Креста Спасителя вместе со апостолом Иоанном усыновленные, воспеваем Тебе сицевая:
Радуйся, смирением возвышенная;
Радуйся, кротостию возвеличенная.
Радуйся, вместе с Сыном Твоим путь крестный прошедшая;
Радуйся, и на Голгофе Его не оставившая.
Радуйся, глубже всех скорбию пораженная, зряще смерть Сына Твоего;
Радуйся, по слову Спасителя нас усыновившая.
Радуйся, всех земных Небесная Мати;
Радуйся, воскресшим Сыном Твоим прославленная.
Радуйся, всеми родами христианскими воспеваемая;
Радуйся, всех земных матерей от скорбных обстояний избавляющая.
Радуйся, в бедах утешающая;
Радуйся, потери и утраты наша восполняющая.
Радуйся, Богородительнице, всю благодать Материнства миру Собою явившая.

Кондак 11
Все беды и скорби людские зриши, Царице Небесная, услыши же и моления наша, пред святою Твоею иконою Тебе приносимыя, и, яко Всемилосердная Мати, избави нас ходатайством Твоим пред Богом Всевышним от всякой немощи, нужды и одиночества в старости, да поем Ти: Аллилуиа.

Икос 11
Преславный и светлый лик даровала еси нам, Богородице, святой и чудотворной иконой Твоею, "Поможение родам" именуемою, пред нею не токмо безплодные супруги или страшащиеся часа деторождения жены со умилением молятся, но и многие иноки, путь девства для служения Сыну Твоему и Богу нашему избравшие, во святых обителях возносят Тебе, Благодатной Деве, чистые и смиренные молитвы свои за мир грешный сей и воспевают Тебе таковая:
Радуйся, почитание святых икон освятившая;
Радуйся, явлением образа Твоего нас радующая.
Радуйся, яко пред иконою Твоею иноки и людие благоговейно молятся;
Радуйся, светом иконы Твоея демоны прогоняющая.
Радуйся, благословение христианским домам дарующая;
Радуйся, ложе благочестивых супругов нескверно соблюдающая.
Радуйся, неплодных матерей ложесна разрешающая;
Радуйся, от нечаянныя смерти младенцев спасающая.
Радуйся, от греховных соблазнов нас отвращающая;
Радуйся, к покаянию нас приводящая.
Радуйся, скорбныя сердца наша услаждающая;
Радуйся, недужныя телеса наша врачующая.
Радуйся, Богородительнице, всю благодать Материнства миру Собою явившая.

Кондак 12
Пощади и помилуй, Царю Мой и Сыне Мой, людей сиих, славящих Мя, имени Твоего ради, - тако выну просиши о нас, Пресвятая Владычице, дабы было принято Богом всякое моление наше. Мы же, прославляя святое имя Твое, поем о Тебе Богу: Аллилуиа.

Икос 12 Поем и хвалим милости и чудеса, явленные нам Тебе ради Спасителем нашим и Сыном Твоим, Пречистая Дево. Веруем, яко и ныне испросиши прощение нам, грешным, пред святою иконою Твоею, воспевающим Тебе сицевая:
Радуйся, благодать Твою иконам Твоим даровавшая;
Радуйся, рода нашего заступнице.
Радуйся, окормительнице дев и безматерних сирот;
Радуйся, юных наставнице целомудрия и воздержания.
Радуйся, невест споручнице и благая украсительнице;
Радуйся, матерей детородящих скорое разрешение.
Радуйся, безчадных супругов плодами веры и духа веселящая;
Радуйся, неразумных разумление.
Радуйся, многих пороков избавление;
Радуйся, вдов и сирот благосострадательно призревающая.
Радуйся, желания наша во благое исполняющая;
Радуйся, покой душам нашим дарующая.
Радуйся, Богородительнице, всю благодать Материнства миру Собою явившая.

Кондак 13
О, Всемилосердая, Благая и Истинная Защитнице наша, Госпоже Богородице, счастье Материнства познавшая, в коем волнения, надежды, тревоги и скорби всех матерей зенмых приявшая, не остави молитвами Твоими припадающих к святей и чудотворней иконе Твоей раб сих (имена) и испроси у Сына Твоего и всех Бога безплодства разрешение, в родах поможение и благочадие, младенцем же их и всем нам надежный покров и защищение, да непрестанно взываем Тебе: Аллилуиа, Аллилуиа, Аллилуиа.

Поможение родам
О, Всемилосердная, Благая и Истинная Защитнице наша, Госпоже Богородице, счастье Материнства познавшая, в коем волнения, надежды, тревоги и скорби всех матерей земных приявшая, не остави молитвами Твоими припадающих к святей и чудотворней иконе Твоей раб сих (имена) и испроси у Сына Твоего и всех Бога безплодства разрешение, в родах поможение и благодачие, младенцем же их надежный покров и защищение. Призри, Пречистая Мати, на рабов Твоих сих, союзом супружеским соединенных и умоляющих о Твоей помощи, да будет на них милость Твоя, да будут плодовиты и да увидят они сыны сынов своих до третьего и четвертаго рода и до желаемой старости доживут и войдут в Царство Небесное Сына Твоего и Господа нашего Иисуса Христа, Которому всякая слава, честь и поклонение подобает со Святым Духом во веки. Аминь.

Моление христианской супруги во время беременности
О, Преславная Матерь Божия! Помилуй меня бедную рабу Твою, и прииди ко мне на помощь во время моих болезней и опасностей, с которыми рождают чад все бедные дщери Евы! Воспомни, о, Благословенная в женах, с какою радостию и любовию Ты шла поспешно в горнюю страну посетить сродницу Твою Елисавету во время ее беременности, и какое чудное действие произвело благодатное посещение Твое и в матери, и в младенце; и по неисчерпаемому благосердию Твоему даруй и мне, униженнейшей рабе Твоей, разрешиться от бремени благополучно; даруй мне сию благодать, чтобы дитя, покоящееся теперь под моим сердцем, пришедши в чувство, с радостным взыгранием, подобно святому младенцу Иоанну, поклонялось Божественному Господу Спасителю, Который из любви к нам, грешным, не возгнушался и Сам быть Младенцем! Неизглаголанная радость, которою преисполялось девственное сердце Твое при воззрении на новорожденного Твоего Сына и Господа, да усладит скорбь, предстоящую мне среди болезней рождения! Жизнь мира, мой Спаситель, рожденный Тобою, да спасет меня от смерти, пресекающей жизнь многих матерей в час разрешения, и да причтет плод чрева моего к числу избранных Божиих!
Услышь, Преславная Царица Небесная, смиренную мольбу мою и призри на меня, бедную грешницу, оком Твоея благости; не постыди моего упования на Твое великое милосердие, и осени меня, Помощница христиан, Исцелительница больных, Твоим Материнским покровом в час моих мук и болезней, да сподоблюся и я испытать на себе, что Ты Матерь милосердия, и да прославляю всегда Твою благость, не отвергающую никогда молитвы бедных и избавляющую всех, призывающих Тебя во время скорби. Аминь.

Молитва о семье
Владычице Преблагословенная, возьми под Свой покров семью мою. Всели в сердца супруга моего и чад наших мир, любовь и непрекословие всему доброму; не допусти никого из семьи моей до разлуки и тяжкаго расставания, до неизцельных болезней и немощей, до преждевременныя и внезапныя смерти без покаяния. А дом наш и всех нас, живущих в нем, сохрани от огненнаго запаления, воровского нападения, всякаго злаго обстояния, разного страхования и диавольскаго наваждения.
Да и мы купно и раздельно, явно и сокровенно будем прославлять имя Твое Святое всегда, ныне и присно, и во веки веков. Аминь.

По благословению Высокопреосвященнейшего Ювеналия, Митрополита Крутицкого и Коломенского

Составил протоиререй Владимир Андреев

Издательство "Возрождение"
по заказу Кафедрального собора Николы Белого в Серпухове.
Тираж 10000 экз. Издание второе, исправленное. Серпухов, 2013 год.