Празднование совершается в Пятницу Светлой Седмицы (переходящий)

Как читать акафист

Читать акафист можно дома, добавляя его в конце к утренним или вечерним молитвам, если у Вас есть время и силы. Можно читать его и в свободное время отдельно. В этом случае порядок таков:
Начало обычное: Господи Иисусе Христе, Сыне Божий, молитв ради Пречистыя Твоея Матере и всех святых, помилуй нас. Аминь.
Слава Тебе, Боже наш, слава Тебе.
Царю небесный... Трисвятое по Отче наш...
"Господи помилуй" - 12 раз
"Слава... и ныне..."
Приидите, поклонимся Цареви нашему Богу (поклон).
Приидите, поклонимся и припадем Христу, Цареви нашему Богу (поклон).
Приидите, поклонимся и припаедм Самому Христу, Цареви и Богу нашему (поклон).
Псалом 50-й: "Помилуй мя, Боже..."
И чтем Акафист.

Кондак 1
Избранная от всех родов Дево, Мати Господа Бога нашего Иисуса Христа, в лучезарной Славе Небесней превыше Херувимов и Серафимов сияющая, Царица и Владычице! Приклони ухо Твое к нам грешным и утоли печаль сердец наших. Простри над нами Покров Твой честный. Посети многобедственную жизнь нашу: в стране бо чуждей сущи, не имамы иныя помощи, не имамы иныя надежды, разве Тебе, Мати рода нашего. В страсе и трепете пред величием неисповедимых судеб Божиих колена преклоньше, ходатайства Твоего пред безсмертным Сыном Твоим просим, со умилением зовуще:
Радуйся, Светлая Обитель странников бездомных, прозрение очес телесных и духовных.

Икос 1
Архангел Благовестник с Небесе послан бысть праведному Иоакиму на радость Рождества Твоего возвестити. И возрадовася старец святый, величие Твое в мире Божием провидя. Тем же и мы с ним радостно Тебе, Богородице, вопием:
Радуйся, Царице Ангелов и спасение людей;
радуйся, всех дев святейшая, сиянием Чистоты Твоея вся Небеса обвеселившая.
Радуйся, Пречистая, всех цветов благоуханнейшая;
радуйся, кроткаго Милосердия двери нам отверзающая.
Радуйся, Целительнице всех скорбей и немощей;
радуйся, от пророков предвозвещенная.
Радуйся, Адама и Еву от древняго проклятия свободившая;
радуйся, Тебе вси Ангели, Архангели, вси превышния Силы смиренно служат.
Радуйся, Тебе с благоговением славят многоочитии Херувими;
радуйся, Тебе непрестанно величают шестокрилатии Серафими.
Радуйся, Тайно тайн непостижимая, Высото невосходимая и Ангельскими умами;
радуйся, яко Тебе вся Подсолнечная, радости исполняясь, Матерь Божию исповедует.
Радуйся, любвеобильная, Любовь Божию в оледеневших сердцах наших возгревающая;
радуйся, Дево Светозарная, наша терния опаляющая.
Радуйся, светлость лица Твоего да осияет душу мою;
радуйся, на икону Твою взирающе, Самой Тебе, истинней Богородице, Богомладенцу Христу - поклоняемся.
Радуйся, Светлая Обитель странников бездомных, прозрение очес телесных и духовных.

Кондак 2
Видяще Тя на облацех честный Покров простирающую и тем нас соблюдающую, благодарственно вопием Богу: Аллилуиа.

Икос 2
Разум наш, обуреваемый помышлениями плотскими, вотще оковы земныя сокрушити тщится: немощныя и ленивыя во гресех наших валяемся, но слезно к Твоему Милосердию взываем: воздвигни из бездны греховныя, настави нас на путь спасения, да со Ангелы Тебе, Дево Пречистая, прославляем:
Радуйся, Мати Милосердия;
радуйся, на руках носила еси - носящаго весь мир дланию.
Радуйся, притекающих к Покрову Твоему, светлое успокоение;
радуйся, тяжкий грех нашей формальной молитвы - нашей совести открываеши.
Радуйся, грешников Молитвеннице, долгожданныя слезы скудной молитве подающая;
радуйся, Ты Едина способная развеять огустевший над землею мрак безбожия и нечестия.
Радуйся, увидеть воочию грехи наша и возненавидеть их дарующая;
радуйся, вся сокровища вселенной пред стоимостию души ни во что вменять учащая.
Радуйся, из любящаго Тя сердца - любовь к падшему миру изгоняеши;
радуйся, предваряющая на помощь, источающая нам неоскудныя Милости.
Радуйся, делиться с нищими и бедствующими - святое наставление;
радуйся, Покрове и ограждение девства.
Радуйся, живоносный Источниче, жаждущих Правды напояющий;
радуйся, слова Апостола: Мы сор, выметенный с Неба, - на ум нам приводящая.
Радуйся, во изгнании нас не оставляющая;
радуйся, Светлая Обитель странников бездомных, прозрение очес телесных и духовных.

Кондак 3
Сила Вышняго охраняша Тя, егда младенческими стопами творила еси восхождение лествицы храма Господня. И мы грешнии, странники бездомныя, держащеся за святыя ризы Твоя, горестно молим: возведи нас по лествице спасения, да приблизимся к Престолу Славы Божия, благодарственно зовуще: Аллилуиа.

Икос 3
Имуще сердце всех дев чистейшее и разум в горнее устремленный, Дево Марие, в храме Божием пребывающе, о земном не помышляя, все существо Свое к восприятию Царя царей приготовила еси. Силы Небесныя пред Чистотою Твоею преклоняются и весь род человеческий радостную песнь Тебе возсылает:
Радуйся, Пренепорочная Дево, всех дев чистейшая;
радуйся, кроткая лампадо святости, всему миру сияющая.
Радуйся, наставляющая, яко грехи разврата слезным покаянием или - огнем на земли уничтожаются;
радуйся, о пожаре, им же пылали Содом и Гоморра - всем напоминающая.
Радуйся, разум плотским грехом не повредившая;
радуйся, сердце, всех чистейшее, ненавидеть и истреблять блудные грехи и помыслы призываеши.
Радуйся, целомудрию всех научающая;
радуйся, Нескверная, Неблазная, Нетленная - от всей скверны плоти и духа нас очищающая.
Радуйся, наше хладное и безплодное благочестие воскрешающая;
радуйся, Купино Неопалимая, боговидцем Моисеем предзримая.
Радуйся, от заслуженных бедствий, мора, огня и глада - народным покаянием и молитвами - спасаеши;
радуйся, Свет несомненной Веры в окамененных сердцах воспламеняеши.
Радуйся, по слову Господню: Проси, Мати Моя - вся прошения Твоя исполню, - взыщи нас всех, погибающих;
радуйся, Райское видение - наших духовных очей умиление.
Радуйся, Красото неизреченная и неописанная;
радуйся, Светлая Обитель странников бездомных, прозрение очес телесных и духовных.

Кондак 4
Бурю отчаяния в сердцах наших претерпевая, в скорби - за грехи наша - жизнь изгнанников во стране чуждей скончавая, к Тебе, Богородице, прибегаем и смиренно молим: подай нам силу духа, подай нам мужество и благодарение к достойному перенесению всех горестей наших, да воспоим Богу: Аллилуиа.

Икос 4
Слышаще благую весть Архангелом Гавриилом принесенную, Ты, смиренномудренно святыню часа сего разумевая, рекла еси: Се раба Господня, буди Мне по глаголу твоему. Пресвятая Дево, научи и нас хранити покорность воле Божией и безропотно перенести Богом ниспосылаемыя нам испытания, да очистятся огнем страданий души наша, да изметутся из сердец наших вся скверны мерзких грехов наших, да возстанем бодры и чисты сердцем, благодарственное хваление сице Богу возсылая: благодарим Тя, Боже, Царю Небесе и земли, вся премудростию Твоею строя и сокровенная человеков яве предведый, се достойная по делом нашим приемлем - да будет над нами воля Святая Твоя. Тебе же, Преблагословенная Дево, Бога всех рождшая, умиленно прославляем:
Радуйся, Едина на земли не согрешившая ни единым помыслом;
радуйся, смиренная раба Господня, нас примером Своим ободряющая.
Радуйся, Дево Пресвятая, юность Свою Богу посвятившая;
радуйся, любовь к молчанию и Кротосте неизглаголанная.
Радуйся, столпе Веры и Чистоты непоколебимый;
радуйся, в молитвах Тебе ликовствует все множество Православных.
Радуйся, Твоей Святости ужасается и рыдает демонское полчище;
радуйся, мрачный хаос душ наших озаряющая.
Радуйся, Святыя слезы проливаеши, да не до конца утратит Русский народ в наркомании и пианстве - заповеданный Богом облик;
радуйся, без молитвы и поста не мыслить наше спасение наставляеши.
Радуйся, еретическаго зловерия - обличение;
радуйся, суровыми скорбями к всенародному покаянию призываеши.
Радуйся, вся нестроения, Святая Мати, Тебе приносим и молим: управи жизнь нашу!
радуйся, источник наших покаянных слез.
Радуйся, да будем благодарить за каждое наказание - ибо это наказ Бога нам грешным;
радуйся, Любве море неизмеримое.
Радуйся, Светлая Обитель странников бездомных, прозрение очес телесных и духовных.

Кондак 5
Боготечная Звезда волхвом на небеси явльшеся и дивный вертеп озарившая, показа Царя Славы в яслех лежаща и с Ним Матерь Его, Деву Чистую и Святую, в сердце Своем песни Ангелов слагавшую. О, Дево кротости и смирения! Вознеси Господу и наше славословие: Аллилуиа.

Икос 5
Видяще волхвы Славу Предвечнаго Младенца Христа, нас ради плотию рождшагося, воздаша Ему Божеское поклонение. Ангел же Господень старцу Иосифу явися, повеле Безсмертное Отроча и Матерь Его во Египет от ярости Иродовой спасати. Со умилением помышляя о пути Твоем, Богородице, многотруднем, мы грешнии смиренно к Тебе прибегаем: облегчи и нам путь, терний исполненный, подыми падающих духом, поддержи слабых и болящих, простри руку спасения унывающим, отри слезы плачущим. Соедини растоящаяся сердца скорбящих: возврати матери ея сына, возврати брата брату. Возврати нам Отчизну нашу, как никогда мерзостию растления оскверняемую. Возврати нам мужество первых христиан. Верни нам Веру Православную, любовию к Богу пламенеющую, без страха душу и жизнь за Правду Христову полагающую. Возврати нам храмы благодатныя, поля засеянныя, села родныя, возврати нам Русь Православную, тысячами свечей и лампад к Богу свои молитвы, яко фимиам, возносящую. О, Преславная Всепетая Дево Богородице, во вся дни горестей наших милостиво на нас призиравшая, всех врагов наших во все времена побеждавшая - буди Милостива и ныне к нам грешным, по земле родной, по Руси Святой плачущим. Умоли Сына Твоего возвратить нам Свою Милость, а Отчизне нашей ушедшую ея Славу, да радостно во умилении сердце наших Тебе вопием:
Радуйся, Солнце селения Христова, псалмопевцем возвещенное;
радуйся, омраченныя суемудрием века сего - просвящаеши.
Радуйся, избавляющая от пагубы душевредных учений;
радуйся, за молитвы народа орды всех врагов Святой Руси всегда побеждавшая.
Радуйся, и сегодня от нас ожидаеши пламенной молитвы о нашем спасении;
радуйся, хулителей Православныя Веры невидимо и зримо наказуеши.
Радуйся, благоговейных иереев - похвало;
радуйся, Православныя Веры - возрастание и утверждение.
Радуйся, есть еще на земли превыше всего возлюбившия Имя Твое;
радуйся, Богородице, материнския слезы собирающая.
Радуйся, вдовиц и сирот покрывающая;
радуйся, старцев утешение, юности ободрение.
Радуйся, всех безпомощных, отверженных миром - на Свои всемощныя руце приемлеши;
радуйся, Спасителя нам, падшим, рождшая - беззакония наша туне очищающаго.
Радуйся, угасшую в нас жизнь Духовную - оживляеши;
радуйся, избавление в лютых содержимых, души моея Божественное утешение.
Радуйся, всякую добродетель, терпеливо молящим о ней - даруеши;
радуйся, всех скорбящих Радосте.
Радуйся, всему миру веселие;
радуйся, Светлая Обитель странников бездомных, прозрение очес телесных и духовных.

Кондак 6
Проповедь Любви и крестоношения мирови возвещая со Христом Сыном Твоим, вся горести земныя претерпевшая, Апостола Иоанна и с ним весь род христианский Своему Материнскому сердцу усыновившая, Приснодево Пренепорочная, не отвратись от нас, во тьме изгнания, во тьме бездуховности сущих, немощствует бо тело, изнемогает и дух наш. Утешения Материнскаго требуя, со благодарением Господу зовем: Аллилуиа.

Икос 6
Возсиявшая всей вселенней, яко дивный храм Божий, исполненный Божественныя Славы и Благодати, о Дево, Мати Пречистая, Царица Неба и земли, Царица человеков и Ангелов, Апостолов и мучеников! Возсияй и нам немеркнущею Звездою во мраке скорбных дней наших. Возвесели сердца наша, во уныние поверженныя, просвети умы наша, люто помраченныя, возстави силы наша на чужбине изсякающия, умножи веру нашу, укрепи надежду и согрей огнем пламенныя Любве ожесточенныя и озлобленныя души наша, да зряще Тя на Небесех, нам, недостойным, внемлющую, молитвенно Тебе зовем:
Радуйся, Мати рода христианскаго;
радуйся, чудесами паче всех светил сияющая.
Радуйся, оставленных врачами и неизменно славящих Тя - от смерти избавляющая;
радуйся, наших детей из рова погибели извлекающая.
Радуйся, лесть иноверных отгоняеши, от нашествия иноплеменных спасаеши;
радуйся, нашей совести оживление.
Радуйся, скорбьми грехи очищающая, печалию наша немощи душевныя врачуеши;
радуйся, сострадать чужому горю научаеши.
Радуйся, от врагов нас защищаеши - склоняя нас за них молитися;
радуйся, да славим Господа за каждый кусок хлеба, глоток воды, каждый вздох.
Радуйся, в неколебимом благодарении Творцу - нашей жизни устроение;
радуйся, нашу недостойную, рассеянную молитву Своею Благодатию обновляющая.
Радуйся, от земли горе наша помыслы возводящая;
радуйся, яко всем твориши спастися в державный Твой Покров прибегающим.
Радуйся, падший мир в скорбех и грехах на молитвенный наш зов посещаеши;
радуйся, тихая прохладо труждающихся и обремененных.
Радуйся, всех добродетелей златой венче;
радуйся, Светлая Обитель странников бездомных, прозрение очес телесных и духовных.

Кондак 7
Хотяще с Сыном Твоим Единородным до смерти крестной неразлучно быти, Ты воспоследовала еси невинному Страдальцу до самыя Голгофы, и у подножия Креста, слышаще вопли сонмища разъяреннаго, в молчании страдала еси. И Тебе Самой душу пройде оружие. Темже удивляяся Твоему неизреченному Материнскому мужеству, зовем: Аллилуиа.

Икос 7
Новую весть Тебе, Богородице, Архангел Господень возвести, Воскресшаго Сына Твоего радостно прославляя. С Ним и вся Воинства Небесная велегласно славят безсмертнаго Христа. Сподоби и нас, Христе Боже, ад сокрушивый и Живот Вечный мирови даровавый, срадоватися днесь Матери Твоей, умиленно восклицая:
Радуйся, Благодатная, Господь с Тобою;
радуйся, Чистая Дево, всю жизнь припадавшая к подножию Креста Христова.
Радуйся, всем сердцем и душой поклоняться Страстем Господа нас зовущая;
радуйся, воспоминанием мук Спасителя - блюстись нам от греха помогаеши.
Радуйся, да утолит сие воспоминание - самую горькую нашу скорбь;
радуйся, в час страданий Сына Своего нас усыновившая.
Радуйся, в радости и в бедах - Материнскую Любовь к нам являющая;
радуйся, Владычице, слава Господня на Тебе возсия.
Радуйся, Богородице, о возстании Рождества Твоего;
радуйся, незаходимая Заре Истины, нам тернистый путь освящающая.
Радуйся, обличающая козни врагов;
радуйся, вечно колеблемую во благом волю нашу - укрепляеши.
Радуйся, за грехи сребролюбия, любостяжания, богохульства и сквернословия народу беды - да опомнится - посылаются;
радуйся, в согрешениях и падениях наших - всю нашу слабость и ничтожество являеши.
Радуйся, Вода Живая, среди зноя страстей прохлаждение;
радуйся, путеводная Звездо, сквозь дебри лжи нас к Правде Божией ведущая.
Радуйся, лучу Райский, наших душ умиротворение;
Радуйся, Светлая Обитель странников бездомных, прозрение очес телесных и духовных.

Кондак 8
Странное таинство и преславное, Вознесением Твоим, Христе Боже, миру явивый и одесную Бога Отца седяй. И нам, странникам земли, о селениях Райских скорбящим, Утешителя Духа Истины ниспосли и всели в ны, Жизнодавче, молитвами Матери Твоея, да зовем: Аллилуиа.

Икос 8
Весь наш путь страннический слезами горести орошая, камней и терний исполненный, к Тебе, Богородице Дево, вопием: умилосердись над нами, Божественная наша Покровительнице, и приюти под сенью Святаго Покрова Твоего нас, странников, от пути непосильнаго изнемогающих и успокоения в тихой пристани чающих. Укрепи старцев немощных, уврачуй стариц болящих, насыти нас алчущих, напой нас жаждущих. Воодушеви юношей, к светлым подвигам стремящихся, вразуми родителей к воспитанию детей своих, сохрани младенцев от всякия беды и утверди в духовной Правде мужей и воинов. Осени Благодатию Твоею наших пастырей духовных, всели в них истинную ревность о спасении душ. Даруй видеть, сколь ненавидят нас бесы, ежечасно замечать и благодарить Милосердие Бога. Вознеси молитвы наша ко Престолу Всемогущаго, да славословим Тя, Матерь Божию, зовуще:
Радуйся, слепых, глухих, тяжко страждущих - исцеление;
радуйся, чудеса Твоя числом, яко звезды небесныя.
Радуйся, измученных путников светлое пристанище;
радуйся, душевное расслабление, бездушие и окамененное нечуствие - врачующая.
Радуйся, всем нужнейший страх Божий даруеши;
радуйся, на путь истинныя мудрости наставляеши.
Радуйся, от бесовских зрелищ отвращающая;
радуйся, наше равнодушие ко злу и примирение с ним - неизбежно наказуеши.
Радуйся, временныя страдания на земли облегчают нашу участь в Вечности;
радуйся, Споручнице кающихся - пребыстрая.
Радуйся, в час недоумений мысль благу на сердце полагаеши;
радуйся, всем, молящимся сокрушенным сердцем, ум просвещающая.
Радуйся, радостью и покоем очищенную совесть утешаеши;
радуйся, скорбящим о потере образа Божия - его возвращение.
Радуйся, от безумия мира и прелести вражией - спасение;
радуйся, сердца, как в первые века, горящия Любовию ко Христу - ищущая.
Радуйся, милосердная наша Мати, даруй нам радовати Тя и Сына Твоего своими делы, словесы и помыслы;
радуйся, Надеждо, Прибежище, Утешение мое.
Радуйся, Светлая Обитель странников бездомных, прозрение очес телесных и духовных.

Кондак 9
Всяк, иже призовет Имя Господне, спасется, и на всякую плоть излию от духа Моего, рече Господь. На Тебе же, Мати Божия - Благодать Святаго Духа излияся превыше всякия меры, зане Творца и Зиждителя нашего вместила еси. Излей же и на наши страждущия души Милость Сына Твоего, да облегченным сердцем вопием: Аллилуиа.

Икос 9
Святии Апостоли, ничто же земное в себе помышляюще, с благоговейным трепетом преславное Успение Твое славят. Царь бо царствующих и Господь господствующих сошед на землю, восприя душу святую Твою и в велицей славе вознесе ю на Небо, идеже уготова одесную Престола Своего Обитель Тебе. И мы, яко овцы разсеяннии, к Твоему Милосердию, Богородице, взываем: подаждь пристанице нам бездомным, собери воедино Отечество наше, посли нам мир и благословение, да молитвенно Тебе поем:
Радуйся, иконою Своею нас утешающая;
радуйся, к глубокому покаянию - всем сердцем призывающая.
Радуйся, наши слезы, боли и погибающей России Богомладенца пеленою утираеши;
радуйся, уныние отгоняеши, умы и сердца наша протрезвляеши.
Радуйся, напоминающая: лишь в сердечной тишине и внимании советы Ангела-Хранителя слышим;
радуйся, к Вере твердой, несомненной, Любви нелицемерной - приводиши.
Радуйся, да испросиши нам у Господа силы ко исполнению святых Его Заповедей;
радуйся, с лики святых за нас Сына умоляеши.
Радуйся, с сонмы Ангелов ко Всемогущему припадаеши;
радуйся, в самый страшный час Едина во вселенной можеши умягчити Праведный гнев Божий.
Радуйся, Любовь и Долготерпение Бога к нам всегрешным, колена преклоньше, прославляем;
радуйся, нетленное богатство нищеты Духовной верным открываеши.
Радуйся, из сетей виртуальнаго мира изымаеши;
радуйся, возрождаеши постоянное стремление к Богу в сердцах наших.
Радуйся, горюющим о неимении истинной молитвы - постоянную молитву даруеши;
радуйся, светлый Лик Свой от нас не отвращающая.
Радуйся, во Успении Своем мир не оставляющая;
радуйся, сквозь скорби - веяние Вечныя Радости.
Радуйся, Светлая Обитель странников бездомных, прозрение очес телесных и духовных.

Кондак 10
Спасти хотя мир, Пастырь Добрый, всех ко спасению зовущий и вся к Себе привлекающий, праведныя любяй и грешныя милуяй, спаси и ны никчемныя молитвами Богородицы. Благоволил бо, от грехов и скорбей изнемогающим, даровать на утешение, радость и спасение икону святую сию, да поем Тебе: Аллилуиа.

Икос 10
Стена и предстательство всех грешников кающихся, приими и наше покаяние, Всеблагая Дево Марие. Умягчи жестокосердныя души наша, исцели болезненное блуждание умов наших, низвергни гордые в пучину смирения, подыми горе очеса наша, землею окованныя. Разомкни уста в горечи сомкнувшияся, подари покаяние, жизнь нашу всецело меняющее, да воспоим Ти славословие:
Радуйся, живоносный Источниче, нас росою живительною окропляющий;
радуйся, да угаснет в нас огнь нечестия пламенем огня Божественнаго.
Радуйся, Всеблагая, о злобе людствей страждущая;
радуйся, молние - неверных устрашающая.
Радуйся, изменить наша языческия нравы на христианския - помогаеши;
радуйся, не отвергаеши молитвы и самых отчаянных грешников.
Радуйся, обрести страх Божий и благоговение - нам преискренне желаеши;
радуйся, согбенных под тяжестью креста - главная Сопутнице.
Радуйся, яко враги наша ведаша, коль крепка есть помощь Божия Матери;
радуйся, да любим Господа не на одних словах - а истинным делом и подвигом всея жизни.
Радуйся, Стамно златая в ней же алчущим Правды соблюдается Хлеб Жизни Вечныя;
радуйся, духовно слепых - прозрение.
Радуйся, да не отврати от нас Твои очи - Анегльских очес чистейшия;
радуйся, даруй нам ниц упасть пред живою нашею Царицею.
Радуйся, яко с Тобою всюду Небесное Царствие;
радуйся, Цвете Райский.
Радуйся, Двере спасения;
радуйся, Светлая Обитель странников бездомных, прозрение очес телесных и духовных.

Кондак 11
Пение Ангельское провождает праведных по смерти. Где убо мы грешнии обрящем спасение, егда без единаго благаго дела пред Судиею Праведным предстанем? На Тя, Богородице, наша надежда. Спаси Твоим предстательством души наша, да поем: Аллилуиа.

Икос 11
Светоприеная Свеща во тьме изгнания нам светящая, веди нас к Сыну Твоему, Господу и Спасителю нашему. И якоже на браке в Кане Галилейской заступилася за бедных людей, глаголюще Сыну Твоему: вина не имут, такожде и ныне буди Заступницей за нас отверженных. Рцы Сыну Твоему: "Господи, отчизны и пристанища не имут. Исполни сердца их радости и утешения". Мы же благодарнии Тебе, Владычице, восклицаем:
Радуйся, Свете Небесный неугасимый;
радуйся, искреннее кающимся - дерзновение в молитве дарующая.
Радуйся, Светлая Собеседнице оклеветанных и гонимых - всех страждущих за Правду Христову;
радуйся, аще и всего лишимся на земли - имамы наследие неувядаемо на Небеси.
Радуйся, ведущим брань противу плоти, мира и диавола - крепкая Поборнице;
радуйся, отступление и лжемудрования Запада посрамляеши.
Радуйся, едину Православную Веру - яко истинную и спасительную - утверждаеши;
радуйся, о реальности близкаго загробнаго бытия нам напоминающая.
Радуйся, отвращаеши от раскола, ересей и безбожия;
радуйся, подлинному покаянию научаеши - да отдалятся тем грядущие на мир скорби.
Радуйся, восстание от падения нашего;
радуйся, на иконе Твоей святей на Богомладенца Христа указуеши, ибо Господь - прозрение очес наших.
Радуйся, души окрылаяющая - да не погибнет Любовь наша за преумножение беззаконий;
радуйся, Сил Небесных превысшая.
Радуйся, Всесильная, наших молитв, поста и смирения просиши - да изымеши наших ближних из ада;
радуйся, слово Христа напоминаеши: Без вас не могу спасти вас!
Радуйся, простых умов утешение;
радуйся, Нерушимая Стено, от врагов видимых и невидимых ограждение.
Радуйся, о причастии Святых Христовых Таин в час смертный - Ходатаице;
радуйся, о кончине нашей непостыдной, с чистой совестию Сына Своего умоляеши.
Радуйся, и на Страшном Суде за всех нас Единая к Нему Предстательнице;
радуйся, возводящая грешников на Небо.
Радуйся, Светлая Обитель странников бездомных, прозрение очес телесных и духовных.

Кондак 12
Благодать Сына Твоего мирови явила еси Приснодево Пренепорочная, спаси и нас под девятым валом греха утопающих, зовущих о Тебе: Аллилуиа.

Икос 12
Во вся дни воспеваем Тя, Благодатная - между женами Едина благословенная. "Без Твоего заступления, - по слову Силуана Афонскаго, - не спаслась бы на земле ни единая душа". Спасителя миру даровавшая и тем вечную Славу и поклонение стяжавшая, в ликовании и благодарении Ти Божией Матери славословие приносим:
Радуйся, славою чудес Твоих верных смыслы озаряеши;
радуйся, наша неизменная путеводная Звездо.
Радуйся, последнее наше упование, егда утратятся все надежды;
радуйся, да услышим: "Предстательством Богоматери Суд об отечестве нашем пременен на Милость".
Радуйся, из Тебе бо возсия Солнце Правды Христос Бог наш;
радуйся, да будут вся грехи наша - горсть песка, брошенная в море Божия Милосердия.
Радуйся, ищуще нашего спасения - нерукотворенную Обитель на Небесех нам строиши;
радуйся, святая наша Надеждо причаститься на Небе Вечныя Красоты и Радости.
Радуйся, увидеть нам Пресветлаго Господа посреди избранных Своих - всем сердцем желающая;
радуйся, в Рай нетленныя сладости вселяющая.
Радуйся, радости грядущаго Царствия еще на земли приоткрывающая;
радуйся, глубино Любве и Премудрости Божия - неизреченная.
Радуйся, непостижимая тайна Боговоплощения;
радуйся, Невместимаго вместившая.
Радуйся, Мати Слова, Иже бе Бог;
радуйся, Мати Света, во тьме светящаго, и тьма Его не объяша.
Радуйся, Светлая Обитель странников бездомных, прозрение очес телесных и духовных.

Кондак 13
О всепетая Мати. О Мати, Благодати исполненная! Приими наше слезное к Тебе моление, еже нищету и слепоту свою духовную познавшии, на Милосердие Твое дерзающе, из глубины душевныя Тебе приносим, поюще: Аллилуиа, аллилуиа, аллилуиа.
Сей Кондак глаголется трижды. Таже Икос 1 и Кондак 1.

Молитва
Что Ти речем, Царице наша и Владычице, помышления наша проницающая и всю нашу жизнь во мгновение ока каждый день озирающая? Что можем мы грешнии и нечестивии поведати своими скверными устами Тебе Пречистей и Пренепорочней? Не имамы словес по достоянию воспети Твое Величие у Престола Творца всея вселенныя. Не имамы силы исчести вся дела Твоя Милосердная, человеков ради соделанная. Предстоим Тебе трепещущии и плачущии о всей греховней жизни нашей помышляюще, Милосерднаго Господа грехами своими безпрестанно прогневляющии.
Вемы яко по делом кару Божию приемлем. Укроти гнев Божий, праведно на ны движимый - грех ради наши, избави нас от заслуженнаого наказания, от всякия лютыя скорби и погибели.
Грехи бо наша мнози и тяжки суть, врази наша люты зело, смерть - близ. Совесть наша нас обличает, геенна огненная устрашает, червь неусыпаемый, скрежет зубный, тартар, тьма кромешная в трепет нас приводят, ибо ожидают нас прияти - злых дел наших ради. Странники и пришельцы есмы на земли и, по глаголу Апостола, не имамы зде пребывающаго града. И к кому прибегнем, Владычице, в скорбех жития нашего, аще не к Тебе, Всеблагая, услаждающая на тя уповающим горесть смерти и избавляющая взывающих к Тебе от лютыя геенны.
Вемы яко недостойни есмы под святую сень Покрова Твоего внити, но яко мытарь, яко разбойник, яко слепцы и прокаженнии и мы сокрушенным сердцем горестно Господу взываем: Боже, Милостив буди нам грешным. И Тебе, Пречистая Дево, молим: приими вопль и стоны сердец наших и вознеси их к Престолу Всесвятаго Бога. Поведай Сыну Твоему слезное покаяние и печаль сердец наших, да воззрит Он на Церковь Милосердным оком Своим и соблюдет ю невредиму и необориму от ересей и нестроений, и миром Своим оградит - примирит разделения среди народа Православнаго и силою Святаго Духа обратит всех на путь покаяния и твердаго стояния в Истине. Да не убоимся страха диавольскаго паче страха Божия и да не отступим от Христа и Церкви Его Святей, но неотступно блюсти Чистоту Веры Православной даруй даже до смерти.
Собери нас, якоже матерь собирает птенцов под крыле своя и настави нас на путь спасения. Умири и благослови страну нашу. Сохрани и утверди вся священнослужители и верныя слуги Церкви Христовой. Вразуми всех, да исполнят должную пред Богом и человеки Правду, соблюдая добрая и сокрушая злая. Не даждь нам ослабеть в преданности Истине во дни гонения и поругания Веры. Помоги отцам и матерям наставить чада свои. Вразуми чад, да чтут родителей своих и всем сердцем любят Господа своего. Избави нас всех от смерти Духовныя. Воздвигни руце к Сыну Твоему, да в сей жизни и по смерти Милосердие Его неотступно будет от нас. Отврати сердца наша от греха, да возненавидим зло, да узрим бездну падения нашего и возлюбим ближняго своего. Да помилует Бог, Твоими молитвами, всех не пришедших к Тебе - заблудившихся в дебрях многоразличной лжи - всех, кого еще можно хоть как-то помиловать... Испроси у Господа прозрения духовных очес наших. Да отвержемся себе - возьмем крест свой и пойдем ко Свету Истины, просвещающей мир. Укрепи русское христолюбивое воинство, даруй помнить, что каждый из нас призван быть воином Бога. Сокруши силу зла на земле и пролей в умы наша луч разума Христова. Возврати нам Отчизну Святую - наш "Дом Пресвятыя Богородицы". Да, Тобою спасаемыя, зде - отечество, а по смерти Рай обрящем и Триединому Богу хвалу, благодарение и поклонение возсылаем всегда, ныне и присно и во веки веков. Аминь.

Молитва пред иконою Божией Матери Державная
О мира Заступнице, Матерь Всепетая! Со страхом, верою и любовию припадающе пред честною иконою Твоею Державною, усердно молим Тя: не отврати лица Твоего от прибегающих к Тебе. Умоли, Милосердная Матерь Света, Сына Твоего и Бога нашего, Сладчайшаго Господа Иисуса Христа: да сохранит в мире страну нашу, да утвердит державу нашу в благоденствии и избавит нас от междоусобныя брани: да укрепит святую Церковь нашу Православную, и непозыблему соблюдет ю от вражескаго обстояния, от неверия, раскола и ересей. Не имамы бо иныя помощи, разве Тебе, Пречистая Дево: Ты еси всесильная храстиан Заступнице пред Богом, праведный гнев Его на Милость меняющая. Избави всех, с верою Тебе молящихся, от падений греховных, от навета злых человек, от мора, огня, меча и глада. Подай нам дух сокрушения, смирение сердца, чистоту помышлений. Удостой нас молиться со страхом Божиим и благоговением.
Непостыдное упование на Милость и Помощь Божию всели в нас. Даруй сохранить верность и преданность Христу до последняго вздоха. Колена преклоньше, молим о исправлении греховныя жизни и оставлении согрешений наших: да вси, благодарне воспевающе величия Твоя, сподобимся Небеснаго Царствия и Тамо со всеми святыми прославим Пречестное и великолепое Имя в Троице славимаго Бога: Отца и Сына и Святаго Духа. Аминь.
Дай же, Господи, молитвами Царицы Небесной, в утешение страждущей Родине Царя Православнаго! Пресвятая Богородице, ими же веси судьбами, не дай погибнуть Святой Руси (3 раза).

Молитва Божией Матери "Прозрение очес"
О Пресвятая Госпоже Владычице Богородице! Приими недостойную молитву нашу, и сохрани всех нас, с верою и любовию поклоняющихся пречистому образу Твоему, от навета врагов наших видимых и невидимых, от внезапныя смерти. И даруй народу русскому прежде конца подлинное покаяние, изглаждающее дотла все его грехи.
На моление наше умилосердися, подай мужество в бранех со страстями и демонами, и радость вместо печалей даруй нам. Се бо на Твой Светозарный образ взирающе, яко живущей Ти рядом с нами, молим Тя усердно: избави нас, о Мати всех скорбящих и обремененных, от всякия беды и напасти, неведения и забвения грехов, великих бедствий, болезни и печали, и от всякаго зла. Даруй нам благодарить Тебя неустанно - яко Единую Тебя, после Бога, молим: спаси нас! Сохрани землю нашу от засилия иноплеменных, от растления, от лжеучений и смертоносныя язвы. Умягчи ожесточенныя сердца наша, и злыя - благи сотвори, ниспосли нам ревность о спасении ближних. Дай нам покаяние, способное преобразить порочную жизнь нашу.
О всех усопших, иже не имут о себе молитвенников, Сама буди непрестанная и теплая Молитвеннице и Ходатаице. Преставльшихся наших удостой, Твоими молитвами, вселитися в Обителей Небесных, идеже непрестанныя гласы празднующих и славящих Пресвятую Троицу. Нас же, грешних, избави от власти бесовския, воздушниых горьких мытарств и лютаго огня геенскаго. И сподоби ны, недостойныя рабы Твоя, одесную стати Сына Твоего, Христа Бога нашего, во Втором и славнем Его пришествии. Даруй наследники быти Вечно блаженнаго Царствия и Жизни немеркнущия, безсмертныя со всеми Ангелы и святыми. Да всегда поем, величаем и славим Тя, Пресвятую Богородицу, яко благую и дивную Заступницу нашу во веки веков. Аминь.

По окончании чтения акафиста:
"Достойно есть яко воистину блажити Тя Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем".
"Слава... и ныне..."
Господи, помилуй (трижды). Господи, благослови.
Господи Иисусе Христе, Сыне Божий, молитв ради Пречистыя Твоея Матере, преподобных и богоносных отец наших и всех святых помилуй нас. Аминь.