Празднование: 5-я Неделя Великого поста

Кондак 1
Взбранной Воеводе, Царице небесе и земли, Пречистей Владычице Богородице похвальная восписуем днесь недостойнии раби Твои, яко видеста множество дивных чудес, молитвами Твоими нам явленных, не престаем уповати на милость Твою и во умилении сердца непрестанно взываем Ти:
Радуйся, Пресвятая Владычице, ко спасению нас путеводящая.

Икос 1
Архангельский глас услышав, Пречистая Дево, не сумнящеся Богу все житие Свое посвятила еси. Мы же, видя таковое непостижимое для нас смиренномудрие, взирая на дивный образ Твой, «Путеводительницею» именуемый, бренными усты и трепетным сердцем вопием Ти таковая:
Радуйся, рождеством Твоим праведных родителей возвеселившая.
Радуйся, и самим рождением Своим чудо явившая.
Радуйся, чистым житием Твоим от рождения Богу угодившая.
Радуйся, сосудом Богоизбранным соделавшаяся.
Радуйся, предречению Архангела со смирением внимавшая.
Радуйся, непостижимых словес его не убоявшаяся.
Радуйся, чистая Голубице, Материю Божиею стати сподобившаяся.
Радуйся, Богу Слову плоть взаимодавшая.
Радуйся, Пресвятая Владычице, ко спасению нас путеводящая.

Кондак 2
Видящи, Пресвятая Дево, како тихим и кротким нравом Твоим, молитвенными словесы и пощением Господеви угодила еси, и возвела еси Себе к восприятию воли Божией, преклоняем пред чудным образом Твоим колена душ и сердец наших, взывая Сыну Твоему и Богу нашему: Аллилуиа.

Икос 2
Разумом недоразумеваемым тщимся, Владычице, постигнути велию милость Твою, юже явила еси нам, недостойным, егда во граде Вифлееме чудесно обретена бысть сия икона Твоя. Мы же, видяще таковое милостивое Твое о нас произволение, усердно взываем Ти сице:
Радуйся, яко Господь Тобою в мир прииде.
Радуйся, яко Дух Святый Тя освяти.
Радуйся, огнь Божества в Себе вместившая.
Радуйся, чудо Боговоплощения миру явившая.
Радуйся, Бога плотию рождшая, миру Спасителя.
Радуйся, в рождестве девство нетленно сохраньшая.
Радуйся, на земли ангельски пожившая.
Радуйся, Невестою Неневестною нами выну величаемая.
Радуйся, Пресвятая Владычице, ко спасению нас путеводящая.

Кондак 3
Сила Вышняго содела Тя, Благодатная, источник неоскудевающ утешения, дары бедствующим являющий. Сего ради, призирая на вся немощи и беззакония наша, благоволила еси, Владычице, явити нам дивную икону Твою, со Ангелом Хранителем и священномучеником Григорием, просветителем Армении, Тебе предстоящими. Темже, взирая на пречистый лик Твой, взываем Богу: Аллилуиа.

Икос 3
Имуще теплое о нас, грешных, промышление, просветила еси лик Твой во время дивнаго обретения иконы Твоея, «Путеводительницею» нами именуемыя, возрадовавши сердца всех видящих чудо сие и слышащих о нем. Мы же, все упование о спасении своем возложивше на Тя, Пресвятая Дево, с надеждою взываем Ти:
Радуйся, дивная о нас пред Богом Заступнице.
Радуйся, непрестанная о нас пред Ним Молитвеннице.
Радуйся, яко милость Твоя о людех Твоих не оскудевает.
Радуйся, яко любовь ко всему миру в сердце Твоем вместила еси.
Радуйся, яко непостижный образ Богоугождения нам явила еси.
Радуйся, мосте, приводяй нас от земли на Небо.
Радуйся, подражати Тебе нас призывающая.
Радуйся, с верою молитвенно взывающих к Тебе не посрамляющая.
Радуйся, Пресвятая Владычице, ко спасению нас путеводящая.

Кондак 4
Бури житейския избежавши, в тихое пристанище под осенение иконы Твоея, о Пресвятая, притекают вси в скорбех и печалех пребывающии, и утешение благодатное от Тебе получивши, восхваляют матерния щедроты Твоя песнию: Аллилуиа.

Икос 4
Слышаще людие о многих чудесех, от икон Твоих бываемых, и Твое всемощное заступление во всяких находящих на ны лютых, со умилением притекают ко образу Твоему, помощи у Тебе просяще. Сего ради, видяще таковое Твое о нас попечение, в радости сердечней благодарственно восписуем Ти сице:
Радуйся, верная Рабо Господня.
Радуйся, яко Тя блажат вси роди.
Радуйся, Благословенная в женах.
Радуйся, просвещающая благодатию души верных.
Радуйся, к Сыну Твоему путь нам указующая.
Радуйся, кающихся от Себе не отревающая.
Радуйся, Ходатаице Божия к людем благоволения.
Радуйся, яко о Тебе радуется всякая тварь.
Радуйся, Пресвятая Владычице, ко спасению нас путеводящая.

Кондак 5
Яко боготечная звезда явися икона Твоя «Путеводительница», благоволением Твоим от града Вифлеема в землю Таврическую принесенная; сего ради, притекающии к Тебе нужды своя и скорби пред нею приносят, и скорую помощь от Тебе приемлюще, радостно вопиют Сыну Твоему и Богу: Аллилуиа.

Икос 5
Видяще христоименитии людие Тобою подаваемое им внезапное от многообразных бед избавление, познают величие Твое на Небеси и с любовию вопиют Ти сице:
Радуйся, Заступнице усердная рода христианскаго.
Радуйся, яко за всех молиши Сына Твоего Христа Бога нашего.
Радуйся, яко пречестною Твоею иконою с рабы Твоими пребываеши.
Радуйся, яко под кров Твой державный с верою вси прибегаем.
Радуйся, ризою златою одеяная.
Радуйся, избавляющая нас от тьмы искушений и бед.
Радуйся, молящихся Тебе умиленною душею и чистым сердцем не посрамляющая.
Радуйся, обильныя дары целебныя неоскудно нам источающая источающая.
Радуйся, Пресвятая Владычице, ко спасению нас путеводящая.

Кондак 6
Проповедуют помощь Твою и любовь вси исцеленнии, утешеннии и спасеннии Тобою, Мати Божия, благодаряще Тя о всех благодеяниих, на всех изливаемых. Мы же, взирающе на пречистый образ Твой, Пресвятая Дево, имамы Тя Заступницею нашею на всех путех земнаго странствия нашего, и, вручая себе в руце Сына Твоего и Бога нашего, со упованием и верою поем Ему: Аллилуиа.

Икос 6
Возсия многими чудесы дивная икона Твоя в пределех земли Таврическия, Пречистая Дево, в благолепнем храме Твоем. Сего ради, людие, притекающе с верою к чудному образу Твоему, со упованием взывают Ти таковая:
Радуйся, рождшая нам Бога воплощенна.
Радуйся, приводящая нас к нетленней жизни благостию Рождшагося от Тебе.
Радуйся, у Креста Христова сердечную страсть претерпевшая.
Радуйся, обрадованная востанием из мертвых Сына Твоего.
Радуйся, Мати низложившаго Своею смертию державу смертную.
Радуйся, яко Сын Твой вся концы земли озари божественным сиянием Своего воскресения.
Радуйся, от юдоли плача к духовней радости возводящая.
Радуйся, надеждою вечных благ верных возвеселяющая.
Радуйся, Пресвятая Владычице, ко спасению нас путеводящая.

Кондак 7
Хотящи явити токи чудес от святыя иконы Твоея «Путеводительницы», повелела еси, Преблагословенная, в погибели и в печали сущим молебная пения пред тою совершати, и получившим исцеление – проповедати милости, ради иконы тоя явленныя, да благодарственне вопиют Богу: Аллилуиа.

Икос 7
Новую явила еси милость, Богородице Дево, иконою Твоею, чудесы от нея источая. Сего ради пред образом Твоим святым припадающе, умиленно молим Тя: испроси нам у Сына Твоего Христа Бога нашего, да сподобит нас отрещися земных приражений и плотских сладострастий, паче же всего бдети о наследии Царствия Небеснаго, да зовем Ти тако:
Радуйся, лествице, ведущая к нетленней и присносущней жизни.
Радуйся, Спаса мира нам рождшая.
Радуйся, яко Сыном Твоим вечный живот всем смертным даровася.
Радуйся, Мати Воскресшаго боголепно, совозставляющая нас к жизни нестареющей.
Радуйся, подающая велие радование.
Радуйся, двере Господня.
Радуйся, граде одушевленный.
Радуйся, путешествующим всемощное укрепление.
Радуйся, Пресвятая Владычице, ко спасению нас путеводящая.

Кондак 8
Странно и непостижно есть неверным разумети, како чрез изображение пречистаго лика Твоего чудеса являеши, Пресвятая Дево. Мы же, слышаще и видяще, яко непреложна и многообразна есть помощь Твоя, чрез иконы Твоя нам подаваемая, в радости вопием Богу: Аллилуиа.

Икос 8
Вся присно в вышних еси, но и нас сирых не оставляеши, Пресвятая Богородице: во всяких нуждах и печалех к Тебе прибегаем, Преблагословенней, и никогдаже тщетни отходим. Сего ради приими от нас благодарения сицевая:
Радуйся, Божественная двере Света.
Радуйся, печальных утешение.
Радуйся, отчаянных воззвание.
Радуйся, яко вся прошения наша приемлеши.
Радуйся, яко Тебе ради жизнь вечная нам возсия.
Радуйся, на молитвенное делание нас подвизающая.
Радуйся, злых бесов далече от нас отгоняющая.
Радуйся, подвизатися на ниве Божией нас наставляющая.
Радуйся, Пресвятая Владычице, ко спасению нас путеводящая.

Кондак 9
Всякое естество Ангельское удивляется Твоему милосердию ко грешному роду человеческому, Пресвятая Дево: Ты бо присно на небесех пребывающая, о нас, земнородных, болезнуеши и души наша спасаеши. Сего ради на Небеси и на земли прославльшему Тя Богу поем: Аллилуиа.

Икос 9
Витии многовещаннии не возмогут воспети по достоянию величия чудес Твоих, Владычице: непостижен бо есть образ рождения, непостижно и приснодевство Твое, таинственно и успение, и на Небо восхищение Твое. Мы же, дивящеся сим и веру несумненну имуще, от полноты сердечныя воспеваем Ти тако:
Радуйся, девство и материнство преестественно сочетавшая.
Радуйся, яко чудеса любве от Тебе не оскудевают.
Радуйся, матерей укрепление.
Радуйся, малых детей вразумление.
Радуйся, юных Наставнице.
Радуйся, старости Хранительнице.
Радуйся, по Бозе наше упование.
Радуйся, душ наших спасение.
Радуйся, Пресвятая Владычице, ко спасению нас путеводящая.

Кондак 10
Спасти хотяй род человеческий от вечнаго мучения и дати ему Царство Небесное, человеколюбивый Господь дарова нам, грешным, Матерь Свою в помощь, покров и защищение. Буди же нам, о Всеблагая, Помощница, Заступница и Руководительница во всем житии нашем и во исходе, и по кончине нашей не остави нас милостию Своею, вопиющих о Тебе Богу: Аллилуиа.

Икос 10
Стена еси воистину необоримая, Пречистая Дево, всем к Тебе прибегающим; темже молимся Тебе: сохрани чад наших в целомудрии и страсе Божием, наставников укрепи, власти умудри, нас же в терпении, смирении и любви утверди, да зовем Ти:
Радуйся, сердца наша очищающая от всякия скверны греховныя.
Радуйся, души верных украшающая целомудрием и чистотою.
Радуйся, православным на враги укрепление.
Радуйся, падшим всемилостивое заступление.
Радуйся, в пути бедствующим Помощнице.
Радуйся, призывающим Тя скорая Услышительнице.
Радуйся, воинов Христовых крепкое забрало.
Радуйся, всех страждущих Утешительнице.
Радуйся, Пресвятая Владычице, ко спасению нас путеводящая.

Кондак 11
Пению нашему всеумиленному благоутробно внемлеши, Пресвятая Мати Дево, егда со благоговением сретаем дивный образ Твой и, лобызающе его, прошения наша Ти приносим, да не оставиши нас милостию Твоею и научиши исполнению заповедей Сына Твоего и Бога нашего, воспевая Ему: Аллилуиа.

Икос 11
Светоприемную свещу зрим Тя, Владычице, из тьмы суеверий и невежествия нас возводящую и на путь спасения наставляющую: да не угаснут светильники наша и сердца наша да не охладеют к часу пришествия Небеснаго Жениха, да сподобимся внити в Царствие Божие, неустанно возглашая Ти сице:
Радуйся, Мати незаходимаго Света.
Радуйся, Ангелов и человеков удивление.
Радуйся, матерей, вдов и сирот Заступнице.
Радуйся, благодать Твою чрез иконы Твоя нам подающая.
Радуйся, всех христиан во благих наставляющая.
Радуйся, врагов Православныя веры посрамляющая.
Радуйся, верный путь нам от земли на Небо указующая.
Радуйся, всем, путем спасительным шествующим, помогающая.
Радуйся, Пресвятая Владычице, ко спасению нас путеводящая.

Кондак 12
Благодать Божия на ны излияся от дивныя иконы Твоея «Путеводительницы», в землю Таврийскую из Вифлеема принесенныя, Преблагословенная Дево, еюже наша души просвети, мрак греховный отжени и на путь спасения направи, да помощию Твоею избегнем пучины страстей бесовских и искушений, находящих на ны, и житие сие временное поживем во всяком благочестии и чистоте, и сподобимся Царствие Небесное наследовати, и со избранными воспевати Богу: Аллилуиа.

Икос 12
Поюще Твое о нас, грешных, заступление, молим Тя, Всемилостивая пред Богом Ходатаице наша: не отврати лика Твоего святаго от страны нашея и народа ея, сохраняющи нас в мире и любви друг ко другу, буди нам Путеводительницею благою ко светлому граду – Иерусалиму Небесному, да вкупе со святыми воспоем Ти сице:
Радуйся, скорая Заступнице на Тя уповающим.
Радуйся, в день судный наша надеждо и защищение.
Радуйся, от козней диавольских нас ограждающая.
Радуйся, истинному боголюбию нас научающая.
Радуйся, мглу прегрешений наших разрешающая.
Радуйся, исцелений богатство верою Тя поющим изливающая.
Радуйся, из нездравия во здравие претворяющая.
Радуйся, предстательство и покров к Тебе прибегающим.
Радуйся, Пресвятая Владычице, ко спасению нас путеводящая.

Кондак 13
О Всепетая Мати, Пресвятая Госпоже Дево Богородице, Благая Путеводительнице! Приими милостивно сие малое моление наше, пред чудотворным образом Твоим приносимое, и буди нам в мире сем от враг видимых и невидимых покров и защищение, и в будущей жизни, на Страшнем Суде Сына Твоего и Бога нашего - Заступницею и Ходатаицею, да со всеми Небесными силами в радости вопием Ти: Аллилуиа.
Этот кондак читается трижды, затем икос 1 и кондак 1

Молитва
О Пресвятая Дево, Мати Господа Вышних сил, Небесе и земли Царице, града и страны нашея Всемощная Заступнице. Приими хвалебно-благодарственное пение сие от нас, недостойных раб Твоих, и вознеси молитвы наша ко Престолу Бога Сына Твоего, да милостив будет неправдам нашим и пробавит благость Свою чтущим всечестное имя Твое и с верою и любовию покланяющимся чудотворному образу Твоему. Несмы бо достойни от Него помиловани быти, аще не Ты умилостививши Его о нас, Владычице, яко вся Тебе от Него возможна суть. Сего ради к Тебе прибегаем, яко к несомненней и скорой Заступнице нашей: услыши нас, молящихся Тебе, осени нас вседержавным покровом Твоим и испроси у Бога Сына Твоего пастырем нашим ревность и бдение о душах, градоправителем мудрость и силу, судиям правду и нелицеприятие, наставником разум и смиреномудрие, супругам любовь и согласие, чадам послушание, обидимым терпение, обидящим страх Божий, скорбящим благодушие, радующимся воздержание, всем же нам дух разума и благочестия, дух милосердия и кротости, дух чистоты и правды. Ей, Госпоже Пресвятая, умилосердися на немощныя люди Твоя: разсеянныя собери, заблуждшия на путь правый настави, старость поддержи, юныя уцеломудри, младенцы воспитай, и призри на всех нас призрением милостиваго Твоего заступления, воздвигни нас из глубины греховныя и просвети сердечныя очи наша к зрению спасения, милостива нам буди зде и тамо, в стране земнаго пришельствия и на Страшнем Суде Сына Твоего; преставльшияся же в вере и покаянии от жития сего отцы и братию нашу в вечней жизни со Ангелы и со всеми святыми жити сотвори. Ты бо еси, Госпоже, слава Небесных и упование земных. Ты по Бозе наша надежда и Заступница всех притекающих к Тебе с верою. К Тебе убо молимся, и Тебе, яко Всемогущей Помощнице, сами себе, и друг друга, и весь живот наш предаем, ныне и присно, и во веки веков. Аминь.

Молитва перед путешествием
О Пресвятая Владычице моя, Дево Богородице, Путеводительнице Преблагая, Покровительнице и упование спасения моего! Се в путь, мне предлежащий, ныне хощу отлучитися, и на время сие вручаю Тебе, Премилосердой Матери моей, душу и тело мое, вся умныя моя и вещественныя силы, всего себе вверяя в крепкое Твое смотрение и всесильную Твою помощь. О Всеблагая Спутнице и Защитнице моя! Усердно молю Тя: да не ползок путь мой сей будет, руководствуй мя на нем, и направи его, Всесвятая Путеводительнице, яко же Сама веси, ко славе Сына Твоего, Господа нашего Иисуса Христа. Буди мне во всем Помощница, наипаче же в сем дальнем и многотруднем путешествии соблюди мя под державным покровом Твоим от всяких находящих бед и скорбей, от враг видимых и невидимых. Моли о мне, Госпоже моя, Сына Твоего Христа Бога нашего, да послет в помощь мне Ангела Своего мирна, верна наставника и хранителя: да якоже древле даровал есть рабу Своему Товии Рафаила, на всяком месте и во всякое время хранивша его в пути от всякаго зла, тако и мой путь благополучно управив, и сохранив мя небесною силою, здрава да возвратит мя, мирна и всецела к жилищу моему, во славу имени Своего святаго, славяща и благословяща Его во вся дни живота моего, и Тебе величающа ныне и присно, и во веки веков. Аминь.

Тропарь, глас 4
Взбранной Воеводе хвалебную песнь воспоим, / поминая милости Ея на ны богатыя. / О Госпоже Царице Богородице, / не остави нас, грешных, предстательством Твоим, / земный наш путь Светом Сына Твоего просвети, / стопы наша к деланию заповедей Его исправи, / и молитвами Твоими ко спасению нас приведи.

Кондак, глас 3
Дево Владычице, / Матерь невечерняго Света! / Призри на ны любящим сердцем Твоим, / избавление от злых рабом Твоим даруй, / и на путь покаяния настави нас, / да сподобимся Тобою жизни вечныя, / со умилением зовущия Ти: /
Радуйся, Невесто Неневестная.

Величания
Достойно есть / величати Тя, Богородице, / честнейшую Херувим / и славнейшую без сравнения Серафим. Величаем Тя, / Пресвятая Дево, / Богоизбранная Отроковице, / и чтим образ Твой святый, / имже точиши исцеления \ всем с верою притекающим.

Икона Божией Матери, именуемая «Путеводительница Тихвинская», в начале 2011 года была выкуплена у местных арабов города Вифлеема и чудесным образом обновилась во время праздничного Рождественского богослужения в Вифлееме, на месте рождения Господа нашего Иисуса Христа.
16 января икона была торжественно встречена духовенством и мирянами в Аскании-Нова у храма в честь иконы Божией Матери «Спорительница хлебов».
Известно немало случаев благодатной помощи Пресвятой Богородицы молящимся пред этой иконой, о чем свидетельствуют многие приношения на ней.
Икона Божией Матери «Путеводительница Тихвинская» почитается не только верующими Херсонской епархии, но и всеми паломниками, посещающими храмовый комплекс в Аскании-Нова, молящимися перед нею и испрашивающими молитв Пресвятой Девы пред Престолом Ее Божественного Сына, Ее благословения и покровительства на жизненном пути. Перед этой иконой особо молятся о путешествующих и о ходатайстве Богородицы перед Сыном Своим о наставлении на путь, ведущий ко спасению и наследию Царствия Небесного.
Местное празднование иконе «Путеводительница Тихвинская», по благословению Архиепископа Херсонского и Таврического Иоанна, совершается в Неделю 5-ю Великого поста.

По благословению Архиепископа Херсонского и Таврического Иоанна