Кондак 1
Превысшая всякаго создания, Царица неба и земли, рождеством Твоим мiр освятившая, благодарственное и хвалебное пение приносим Тебе, Владычице, раби Твои, и умиленно вопием:
Радуйся, Марие, рождшаяся мiру спасение.
Икос 1
Ангел с небесе послан бысть ко святой Анне благовестити о Тебе, Пресвятая Дево плоде благословенном, Святейшей Святых, от всего создания прославляемой сице:
Радуйся, скиние от херувимов осеняемая;
Радуйся, Святая Святых от Серафимов почитаемая;
Радуйся, всех пророков слава;
Радуйся, непобедимая держава;
Радуйся, человеческий род Богу примирившая;
Радуйся, Вседетельнаго Бога приобщение;
Радуйся, от Престолов покланяемая;
Радуйся, от Началов ублажаемая;
Радуйся, света незаходимаго сияние;
Радуйся, щедрот Божиих блистание;
Радуйся, от сил небесных хвалимая;
Радуйся, от Господствий вышних превозносимая.
Радуйся Марие, рождшаяся мiру спасение.
Кондак 2
Виде иногда Пророк купину огнем не опаляемую, Твое великое таинство образующую, сотвори бо Тя Творец едину среди сего мiра Пречистую: сего ради Сотворшему Тебе величие сильному поем: Аллилуия.
Икос 2
Разум всяк недоумеет благохвалити Тя достойно, изумевает же всяк ум, видя Тя едину паче естества избранную ко обновлению естества; радуется небо и земля и вопием Тебе:
Радуйся, Вышняго освященное божественное селение;
Радуйся, яко Тобою дадеся человеком спасение;
Радуйся, едина Богоизбранная;
Радуйся, ближняя Богу вожделенная;
Радуйся, всех человеков хранение;
Радуйся, всей вселенной защищение;
Радуйся, безконечнаго царствия начальнице;
Радуйся, вертоград Божий заключенный;
Радуйся, источник пресвятый запечатленный;
Радуйся, клятвы истребление;
Радуйся, ада и тмы пленение.
Радуйся Марие, рождшаяся мiру спасение.
Кондак 3
Сила Вышняго оросила древле руно Гедеоново, егда вся земля сушею одержима бе, да сим явится рожество Твое, Богоневесто; весь мiр сух и наг благодати обретался, токмо Ты, Богоотроковице, одожденная росою Духа явилася еси; сего ради Сотворшему дивная поем: Аллилуия.
Икос 3
Облагодатствованная паче всех небесных Духов, преблагословенная Дево, всея твари честнейшая, и Богу Слову плоть заимодавшая, приими от нас хвалебныя песни сии:
Радуйся, корене Иессеова прозябение;
Радуйся, праведных родителей благословение;
Радуйся, яко солнце всеосвящающая;
Радуйся, яко луна сияющая;
Радуйся, мiр просветившая рождеством Своим;
Радуйся, небеса озарившая явлением Своим;
Радуйся, Святейшая дщерь Давидова;
Радуйся, надежда Израилева;
Радуйся, Пророков преславное проповедание;
Радуйся, Апостолов всемирное оглашение;
Радуйся, Херувимов чистейшая;
Радуйся, Серафимов славнейшая.
Радуйся Марие, рождшаяся мiру спасение.
Кондак 4
Тьму идольскую разгнала еси светом исполнися вся тварь славы Твоея, освятишася вся миром благоухания Твоего, потребися Тобою грех, преложися на радость клятва праматере Евы, и вси поют: Аллилуия.
Икос 4
Слышаще и видяще Тя яко солнце сияющую во мраке мiра, и всех просвещающую божественными лучами, молимся Тебе: просвети Владычице, и освяти всех вопиющих Ти:
Радуйся, яко облеченная в солнце сияющая;
Радуйся, луну под ногами имеющая;
Радуйся, закона и благодати ходатаица;
Радуйся, Ветхаго и Новаго завета печать;
Радуйся, сиянием землю просветившая;
Радуйся, чистотою небо возвеселившая;
Радуйся, чистотою вселенныя хранительнице;
Радуйся, благодати ходатаица;
Радуйся, рясны златыми преиспещренная;
Радуйся, венцом от звезд украшенная;
Радуйся, солнца вышняго селение;
Радуйся, всего мiра спасение.
Радуйся Марие, рождшаяся мiру спасение.
Кондак 5
Боготочная звезда Вышняго Востока явилася еси, Владычице, вошла еси в незаходимая, пищу небесную приемлющи от служащих Ти Ангелов, покланяемая чинми небесными прославляемая песньми Пророк поющих: Аллилуия.
Икос 5
Видевше Тя чины небесные славою Божества украшенную, удивишася, поюще: кто сия проницающая аки утро добра яко луна избранна, яко солнце? И мы радуяся взываем:
Радуйся, всемiрную славу прозябльшая;
Радуйся, всех Владыку рождшая;
Радуйся, в небеса святейшая дверь;
Радуйся, безплотных песнь честнейшая;
Радуйся, верных удобрение;
Радуйся, вражды преграждение;
Радуйся, всех Святых святейшая;
Радуйся, всякия чистоты чистейшая;
Радуйся, во святая Святых обитавшая;
Радуйся, пищу от рук Ангельских приявшая;
Радуйся, Спаса всех носившая;
Радуйся, тлителя душ упразднившая.
Радуйся Марие, рождшаяся мiру спасение.
Кондак 6
Проповедует весь мiр, горний и дольний, Тя едину Пречистую, яко крин в тернии, среди мiра рождшуюся, чистейшую голубицу Божию: сего ради Сотворшему дивная Единому сильному поем: Аллилуия.
Икос 6
Возсияла еси от истиннаго Солнца правды заря Дево Богоотроковице, всех в познание истины приводящая, озари убо нас верою к Тебе зовущих:
Радуйся, радости истинныя изображение;
Радуйся, клятвы всей разрушение;
Радуйся, Пророками предреченная;
Радуйся, лествица высоко утвержденная;
Радуйся, Вышняго света приятелище;
Радуйся, истинныя жизни пристанище;
Радуйся, Господа явление;
Радуйся, святыя веры утверждение;
Радуйся, огнеобразная Божия колеснице;
Радуйся, небесная чистейшая голубице;
Радуйся, крастотою небесною украшенная;
Радуйся, паче всех небесных умов превознесенная.
Радуйся Марие, рождшаяся мiру спасение.
Кондак 7
Хотя снити Тобою, Богоневесто, к роду человеческому, Вышний, назнамена Тя иногда вратами: рекий чрез Пророка: врата сия затворенна будут, и не отверзутся: яко Господь Бог пройдет ими, темже поют Ему Силы небесныя: Аллилуия.
Икос 7
Вышний обновляет мiр, Пречистая, рождеством Твоим, исполнися вся тварь славы Твоея, освятишася вся миром благоухания Твоего, и вси поют: слава на небеси, и мир на земли, темже и мы вопием:
Радуйся, премудрости Божией благоволение;
Радуйся, неприступнаго света селение;
Радуйся, зерцало, Бога являющее;
Радуйся, облако, нас осеняющее;
Радуйся, яко Тебе служат Херувимы.
Радуйся, яко Тебе окружают Серафимы;
Радуйся, Духа Святаго приятелище;
Радуйся, Сына превечнаго вместилище;
Радуйся, Божиею благодатию украшенная.
Радуйся, святыня превознесенная;
Радуйся, от скорбей мiр утешающая.
Радуйся, всех от болезней свобождающая.
Радуйся Марие, рождшаяся мiру спасение.
Кондак 8
Странно бе вочеловечение Божие, странно и Твое рождество, чистая, Ты новый славы ковчег, в нем манна и жезл Ааронов прозябший и скрыжали завета новаго. Ты совершение завета Ветхаго, о Ней же Пророческие лики возопиша:Аллиуия.
Икос 8
Ты еси очистилище, еже во святых святое херувимы приосененное в кивоте завета Божия, Божественныя тайны сокровенныя открывающее, ныне с верою поющим Тебе:
Радуйся, Отца небеснаго благоволение.
Радуйся, человеков спасение.
Радуйся, Святаго Духа селение.
Радуйся, исполнившая Праотцев желание.
Радуйся, солнце пресветлое.
Радуйся, луна тму прогоняющая.
Радуйся, яко Тобою мiр осветися.
Радуйся, стихии осветившая Своим рождеством.
Радуйся, небесная возвеселившая Своим явлением.
Радуйся, Ветхаго завета печати разрешение.
Радуйся, Новаго завета таин откровение.
Радуйся Марие, рождшаяся мiру спасение.
Кондак 9
Все естество Ангельское хвалы приносит Тебе, Богоотроковице, Еюже непостижимое таинство смотрения Божия совершается, Ты еси прекрасное жилище нисходящаго Бога, Ты святейшая, спасение грешников, заступаеши и молишися о всех зовущих: Аллилуия.
Икос 9
Витийству и гаданию непостижимо, Богоневесто, рождество Твое, Ты Божественнаго таинства прежде век еси сокровище, Ты еси воистинну книга животная, в нейже несказанно вписася неописуемое Слово Отчее, животворящим перстом Святаго Духа сотвори Тебе величие Сильный, и ублажают Тя вси роди, взывающе:
Радуйся, пророчеств исполнение.
Радуйся, всех человеков обожение.
Радуйся, гора Божия усыренная.
Радуйся, земля Божия вожделенная.
Радуйся, купино неопалимая.
Радуйся, высота неудобовосходимая.
Радуйся, яко лучь Божия света сияющая.
Радуйся, верных просвещающая.
Радуйся, звезда незаходимая.
Радуйся, заре неугасимая.
Радуйся, единая Богом избранная.
Радуйся, избавителя мiру чревоносившая.
Радуйся Марие, рождшаяся мiру спасение.
Кондак 10
Спасти хотяй род человеческий, Создатель человека, и возвести от земли на горняя, Тебе созда лествицу, по нейже Ангелы Божии восхождаху и нисхождаху, якоже Иаков виде; Ты убо еси восхождения нашего к небу дверь, Ты дом Божий и врата небесная: и сего ради слышиши от всех: Аллилуия.
Икос 10
Вышний Сион торжествует: тамо царствуеши Владычице. Тамо вселилася еси в радости неизреченной, в неприступном свете, идеже истинное житие, всесветлое {житие} царство, непрестаемое Ангелов ликование, тамо поют:
Радуйся, от племени Давидова возсиявшая;
Радуйся, венец царствия небес восприявшая.
Радуйся, Дщерь небеснаго Отца блаженнаго;
Радуйся, Матерь Сына единаго, благословеннаго.
Радуйся, невесто Святаго Духа совершенная.
Радуйся, Божественною славою озаренная;
Радуйся, всего мiра хранение.
Радуйся, всея вселенныя утверждение.
Радуйся, Давидом Дщерь Вышняго преднареченная.
Радуйся, Соломоном ближняя Божия усмотренная.
Радуйся, Праотцам обетованная;
Радуйся, Пророками предуведенная.
Радуйся Марие, рождшаяся мiру спасение.
Кондак 11
Пение Пророческое приношу Тебе, Богоотроковице: Ты еси гора Сионя тучная и усыренная; гора, в нейже изволи Бог жити: о Тебе бо Бог Слово в плоть огусте и усырися, бысть человек и вселися в ны, и видехом славу Его. О, храме одушевленный и Божественный, облаче всесветлый, просвещающий своими сияньми всех поющих: Аллилуия.
Икос 11
Славим Твое рождество, Богоневесто Владычице: Ты еси Богоизбранная леторасль, цвет нетления. прозябшая от корене Иессеева. Возлюби Царь доброты Твоя, вожделе красоты девства Твоего; поживе в Тебе и вселися в ны, и примири нас Тобою Богу и Отцу. Темже и поим Тебе вси:
Радуйся, яко Ты едина Богом избранная.
Радуйся, яко венцем царствия увенчанная.
Радуйся, скипетр в деснице Вышняго.
Радуйся, чистая небесная голубице.
Радуйся, облако светлое, нас осеняющее.
Радуйся, молния тихо облистающая.
Радуйся, Мати света благословенная.
Радуйся, от родов древних преднареченная.
Радуйся, Адамово обновление.
Радуйся, Евино свобождение.
Радуйся, скорбящих утешение.
Радуйся, обидимых защищение.
Радуйся Марие, рождшаяся мiру спасение.
Кондак 12
Благодать, данную Тебе, Богоотроковице, в рождестве Твоем, нам в святыню, яко от источника приснотекущее миро приемлюще, вси купно лицы отеческие с Патриархи, Апостольские сонмы, Мучеников полки, праведных души преподобных чины, и сан всякий и возраст, восхвалите Господа и пойте: Аллилуия.
Икос 12
Поюще святое Твое рождество, чтим и непорочное зачатие Твое, избранная Богоневесто, о Владычице, истинное Славы вместилище! О животе живота, и живота дательнице! Приими от нас, истинный живот Тобою получити сподобившихся, таковая:
Радуйся, Бога невместимаго вместившая.
Радуйся, радость всему мiру родившая.
Радуйся, предреченная Пророки Софрониею и Наумом.
Радуйся, изъявленная Варухом и Аввакумом.
Радуйся, все красоты лепотою превозшедшая.
Радуйся, небеса небес красотою прешедшая.
Радуйся, усмотренная Михеем и Иоилем;
Радуйся, прославляемая Иеремиею и Иезекиилем.
Радуйся, источающая всем спасение.
Радуйся, верных дарующая грехов оставление.
Радуйся, похваляемая Авдием и Осиею.
Радуйся, покланяемая Захариею и Малахиею.
Радуйся Марие, рождшаяся мiру спасение.
Кондак 13
О! Святейшая Святых Дево, Богоотроковице, Мати Бога Вышняго! Приими настоящую нашу хвалу всечестнаго рождества Твоего, и избави нас от всякия напасти и бед, и небеснаго царствия сподоби Тебе вопиющих: Аллилуия.
Трижды.
Икос 1
Ангел с небесе послан бысть ко святой Анне благовестити о Тебе, Пресвятая Дево плоде благословенном, Святейшей Святых, от всего создания прославляемой сице:
Радуйся, скиние от херувимов осеняемая;
Радуйся, Святая Святых от Серафимов почитаемая;
Радуйся, всех пророков слава;
Радуйся, непобедимая держава;
Радуйся, человеческий род Богу примирившая;
Радуйся, Вседетельнаго Бога приобщение;
Радуйся, от Престолов покланяемая;
Радуйся, от Началов ублажаемая;
Радуйся, света незаходимаго сияние;
Радуйся, щедрот Божиих блистание;
Радуйся, от сил небесных хвалимая;
Радуйся, от Господствий вышних превозносимая.
Радуйся Марие, рождшаяся мiру спасение.
Кондак 1
Превысшая всякаго создания, Царица неба и земли, рождеством Твоим мiр освятившая, благодарственное и хвалебное пение приносим Тебе, Владычице, раби Твои, и умиленно вопием:
Радуйся, Марие, рождшаяся мiру спасение.
Молитва Пресвятей Владычице Богородице
О Пресвятая Госпоже Владычице Богородице, святейшая святых Богоотроковице, небесе и земли Царице!
Приими недостойное мое хваление и моление, Владычице, и обычным Твоим милосердием молися к благосердому Сыну Твоему и Богу нашему, даровати прощение всем согрешениям моим; житию моему подати исправление, и на кончине царствия божественнаго вход отверсти ми исходатайствуй, славы и радости сопричастника мя праведным сотворити: вся бо можеши яко Матерь Бога Царя всемогущаго.
И ныне надеяся на божественное милосердие Твое, дерзновенно прибегаю к Тебе, и припадая со слезами молюся, яко да и на мне грешнем и недостойнем покажеши величество милосердия Твоего: яко благословена еси от всех родов, и славится о Тебе пресвятое и великолепое имя Отца и Сына и Святаго Духа, ныне и присно, и во веки веков. Аминь.