Кондак 1
Избранней от всех родов Божией Матери,/ Царице и Владычице нашей,/ похвальное пение приносим, яко Заступнице рода христианскаго./ Ты же, яко всеблагая Предстательнице наша пред Господом,/ умоли Сына Твоего и Бога нашего/ даровати нам наследие благ вечных/ да зовем Ти:
Радуйся, Владычице мира, образом Твоим Самарским благодать и милость нам являющая.

Икос 1
Ангели на небесех непрестанно воспевают славу Тебе, Пречистая Богородице. Мы же, еще на земли пребывая, с любовию величаем Тя, Всенепорочная Дево Марие, ради всех милостей Твоих, от века всему роду христианскому Тобою дарованных. И просим Тебя, молитвами Твоими приведи нас в светлыя чертоги Отца Небеснаго, дабы и мы со всеми ангелами и святыми славословили Всемилосерднаго Бога нашего. Сего ради к Тебе, Заступнице нашей и Путеводительнице ко Отечеству Небесному, взываем:
Радуйся, небес и земли Царице, венцем звезд немеркнущих сияющая.
Радуйся, огнь любви ко Христу в сердцах наших воспламеняющая.
Радуйся, паче всего земнаго любити Сына Твоего нас научающая.
Радуйся, с радостию исполняти заповеди Его наставляющая.
Радуйся, ко исправлению жития неправеднаго взоры духа нашего направляющая.
Радуйся, в благочестии, целомудрии и правде Божией нас утверждающая.
Радуйся, Звездо незаходимая, к Солнцу спасения нас путеводящая.
Радуйся, лучезарная Вратарнице, двери райския верным отверзающая.
Радуйся, Владычице мира, образом Твоим Самарским благодать и милость нам являющая.

Кондак 2
Видяще, Премилостивая Матерь Христова, многоскорбное земное житие наше, немощи и болезни наша, благоволила еси дати нам в благословение и утешение, в радость и спасение и от всяких бед и напастей в избавление образ Твой Самарский, да вси молящиися пред ним отраду и утешение от Тебя, Всесвятая Богородице, получают и Сыну Твоему радостно воспевают: Аллилуия.

Икос 2
Разум человеческий не может постигнути всей полноты величия Твоего, Пресвятая Богородице, ибо Божественный Сын Твой, Творец и Спаситель мира, превознесе Тя превыше всего, на небесех и земли сущего. Мы же, очами веры созерцая славу Твою, просим Тебя, Всенепорочная Матерь Божия, удостоити и нас вместе со всеми праведными славити на небесех Иисуса Христа, Сына Твоего и Бога нашего. Сего ради приими сердечно приносимые Тебе величания сия:
Радуйся, от Архангелов поклонение принимающая.
Радуйся, от всех ангельских чинов превозносимая.
Радуйся, Серафимами и Херувимами величаемая.
Радуйся, от всех святых Божиих воспеваемая.
Радуйся, Церковью Христовою прославляемая.
Радуйся, от заблуждений духовных нас исцеляющая.
Радуйся, печали наши в радость претворяющая.
Радуйся, милосердием Твоим нас укрепляющая.
Радуйся, Владычице мира, образом Твоим Самарским благодать и милость нам являющая.

Кондак 3
Силу Божественныя благодати даруй нам, Всенепорочная Дево Марие, дабы возмогли всегда неукоснительно шествовати спасительным путем заповедей Христовых, чистым сердцем и нескверными устнами воспевая о Тебе Всемогущему Богу: Аллилуия.

Икос 3
Имущи промышление о всем роде людском, Богомати Пречистая, даровала еси ему велию надежду на всеблагомощное предстательство Твое. И доныне благоверныя христиане воспевают о Тебе псаломски Всемудрому Отцу Небесному: приведутся Царю девы в след Ея, искренния Ея приведутся Тебе. И грядуще во след Тебе, своей Царице и Путеводительнице ко Отечеству Небесному, держатся Твоея руководящия десницы и веруют, яко Тобою введены будут в предвечный и нетленный храм Царев (Иерусалим Небесный), идеже со Ангелы и праведными воспоют Тебе хваления сия:
Радуйся, Бога Отца Дщи благословенная.
Радуйся, плоти Христовы неизреченное составление.
Радуйся, Духа Святаго прекрасное селение.
Радуйся, Богоносный Престоле Вседержителя.
Радуйся, нашествием Духа Святаго Бога Слова заченшая.
Радуйся, пророки прореченнаго в девственней утробе Твоей неизреченно понесшая.
Радуйся, во спасение и радость всему миру Христа Господа безсеменно зачавшая.
Радуйся, молитвами твоими бездну Милосердия Божиего христианом отверзающая.
Радуйся, Владычице мира, образом Твоим Самарским благодать и милость нам являющая.

Кондак 4
Бури греховныя избежати и в тихое пристанище покаяния приити помози нам, Пречистая Дево, Искупителя и Спасителя душ наших рождшая. Сего ради, просим Тебя: простирай непрестанно к Сыну Твоему и Богу Нашему Богоносныя руци Твои и умоли Его всех нас помиловати и спасти, да благодарно воспоем Ему: Аллилуия.

Икос 4
Слышавше, Пречистая Дево Марие, проречение Симеоново, яко «Тебе же Самой душу пройдет оружие», все упование Твое на Отца Небеснаго возложила еси, волю свою в послушание Господеви предавши. Сего ради просим Тя, Царице Небесная, всеблагомощным предстательством Твоим укрепи слабую веру нашу, оживотвори угасающую надежду нашу и в любви к Богу и ближним утверди нас, с умилением и радостию взывающих Ти сице :
Радуйся, о прощении грехов наших Сына Твоего умоляющая.
Радуйся, в добродетельном житии нас утверждающая.
Радуйся, хладность душевную благодатно согревающая.
Радуйся, богатых к благотворению пречудно подвизающая.
Радуйся, миром и кротостию души наша наполняющая.
Радуйся, от мрака ненависти нас освобождающая.
Радуйся, дух милосердия в сердцах наших воскрешающая.
Радуйся, во дни уныния надеждою вечных благ воодушевляющая.
Радуйся, Владычице мира, образом Твоим Самарским благодать и милость нам являющая.

Кондак 5
Божественнаго Света Светильниче златозарный, Пренепорочная Госпоже Владычице, души наша омраченныя мглою страстей, безстрастия светлостию озари, молимся, и окаянное сердце наше омый слезами покаяния, да смиренно вопием Богу: Аллилуиа.

Икос 5
Видевше Возлюбленаго Сына Твоего на кресте между двома разбойникома распятаго, Пречистая Дево, великую скорбь боголюбиваго и материнскаго сердца Твоего слезами надежды растворяла еси, об искуплении всего рода человеческаго помышляя. Мы же, вся сия ныне воспоминая, смиренне просим Тя, Мати Искупителя нашего, паки простри к Нему молитвы Твоя. Он же, яко милостив Сый и спасения нашего ради распятие и смерть лютую притерпевый, да помилует ны. Сего ради, мы, грешнии, благоговейно глаголем Ти:
Радуйся, скорбь о страстех Сына Твоего верою в Воскресение Его утолившая.
Радуйся, при Кресте Сына Твоего весь мир Себе усыновившая.
Радуйся, по Воскресении Христовом паче ученик Его о победе над смертию возвеселившая.
Радуйся, благодать и силу Свою первописанней иконе Своей излившая.
Радуйся, чрез иконы Твоя проливающая на землю токи благодати.
Радуйся, подобиям лика Твоего животворную силу чудес даровавшая.
Радуйся, силою Твоею демонские полки попирающая.
Радуйся, силою Божию козни дьявольския разрушающая.
Радуйся, Владычице мира, образом Твоим Самарским благодать и милость нам являющая.

Кондак 6
Проповедник неоскудеваемыя благодати и милостей Твоих явися град Cамара, в нем же Ты пребывати милостиво изволила еси иконою Своею чудотворною. Слышавше о дивном чудесе явления иконы Твоея, Владычице, многия верныя со всея земли войска Донскаго на поклонение сия Святыни притекоша, веры и упования исполненныя, яко Ты, Царице Небесная, грады и веси наша от всякия напасти ограждаеши, благочестивыя казаки на поле брани от внезапныя смерти исхищаеши, обители иноческия и жилища православных христиан защищаеши и вся благая и душеполезная нам посылаеши. Мы же, за вся сия благодаряще Тя, воспеваем Христу Богу нашему песнь славы: Аллилуиа.

Икос 6
Воссия благодать от пречудныя иконы Твоея, Пресвятая Богородице, в землех украинских, пред нею же и мы ныне со слезами припадающе молим Тя, Всененепорочная Владычице наша, не ввери нас человеческому предстательству, Мати Божия, но приими моления наша, скорбь бо обдержит нас, терпети не можем демонскаго стреляния, покрова не имамы, токмо на Твое милосердие уповаем и тако Тебе взываем:
Радуйся, кающихся милосердием Божиим ободряющая.
Радуйся, на покаяние время нам от праведнаго Судии испрошающая.
Радуйся, яко Тобою мы Творца величати научаемся.
Радуйся, яко Тобою от бед и скорбей избавляемся.
Радуйся, от беды и глада страждущих свобождающая.
Радуйся, вредоносное естество от растительнаго мира отгоняющая.
Радуйся, посевы и леса и все растущее на земли от гибели спасающая.
Радуйся, труд землевладельцев с небес благословляющая.
Радуйся, Владычице мира, образом Твоим Самарским благодать и милость нам являющая.

Кондак 7
Хотя Всещедрый Господь даровати милости Своя людем, благоволи явити икону Твою Самарскую, Пречистая Богородице, поражая сим Образом, яко незримыми стрелами духовными, всякое плотское мудрование в человецех и показуя единую истинную веру, научающую всех спасительно пети Богу: Аллилуиа.

Икос 7
Дивным и неисследимым промыслом Сына Твоего, Владычице Богородице, храниши вся православныя люди милостивою рукою Своею. И весь мир христианский восхваляет Тя, Пречистая Дево Марие, многократно от бед, болезней, нашествия иноплеменников и междоусобныя брани избавлявшую страну Российскую и народы ея. Мы же, воспоминая, яко людие русския любящими сердцами своими благодарни Тебе быша, Царице Небесная, за великое милосердие и любовь Твою к ним, молим Тебя: паки воспламени пламень веры Христовой в России и настави всех, в ней живущих, славити Тебя:
Радуйся, под Покровом Твоим землю Российскую и ныне сохраняющая.
Радуйся, во дни древния велии чудеса в ней сотворившая.
Радуйся, и в наше время благоволение Твое нам явившая.
Радуйся, дух истины Христовой в сердцах обновляющая.
Радуйся, выну уповати на Сына Твоего нас наставляющая.
Радуйся, ревность о Славе Божией в души наша вселяющая.
Радуйся, из глубины греховныя к высоте духовной нас возводящая.
Радуйся, гнев Божий молитвами Твоими умягчающая.
Радуйся, Владычице мира, образом Твоим Самарским благодать и милость нам являющая.

Кондак 8
Все упование на Тебя возлагаем, Матерь Божия, и в скорбех и болезнех ко святому образу Твоему Самарскому с благоговением и верою притекаем, в надежде скорое утешение и исцеление от Тебе получити. О, Пресвятая Царице Богородице, воззри милостиво на нас, смиренных слуг Твоих, и ниспошли вся, на пользу нам потребная, в сей жизни и в будущей, да прославляя милосердие Твое к нам, во вся веки Господеви воспеваем: Аллилуия.

Икос 8
Все упование наше возлагаем на Твое милосердие, Мати Божия, сохрани нас под кровом Твоим, да просвещенныя от Тебе свыше, узрим путь ведущий в живот вечный и последуем ним, окормляемые под Твоим всемогущим Покровом. Дево Пречистая, услыши зовущих нас сице:
Радуйся, облаки сомнений и раздоров разгоняющая.
Радуйся, бури распрей в тишину прелагающая.
Радуйся, служащих Тебе во единомыслии сохраняющая.
Радуйся, с верою молящихся Тебе прошения исполняющая.
Радуйся, лепотою Пречистаго Лика Твоего вся люди возвеселяющая.
Радуйся, боголюбием Твоим вся христианы наставляющая.
Радуйся, вдов и сирот многомилостивая Покровительнице.
Радуйся, бедных и нищих людей всещедрая Питательнице.
Радуйся, Владычице мира, образом Твоим Самарским благодать и милость нам являющая.

Кондак 9
Всех славословий и похвал, во всем мире христианстем благодарными людьми Тебе, Царице ангелов и святых, приносимых, несть довольно, дабы достойно и праведно возблагодарити Тя, Заступницу и Утешительницу нашу, всех Твоих милостей, нам ниспосланных ради. Мы же, недостоинство свое поминая, о Тебе, Любящей Матери Нашей, тако возвеличевшему Тебя Предвечному Богу Отцу поем: Аллилуия.

Икос 9
Вития многовещанные не довлеют по достоянию воспети и восхвалити вся милости Твоя, Пресвятая Владычице, чрез образ Твой Самарский нам дарованныя. Мы же, зная о Любви и милосердии Твоем к грешному роду человеческому, в смирении сердечнем и благоговении духовнем к Тебе взываем:
Радуйся, чистотою Твоею чистому житию нас научающая.
Радуйся, прежде всего о Боге помышляти нас наставляющая.
Радуйся, волю Его любити и творити нас подвигающая.
Радуйся, всем любящим Тебя отраду и утешение посылающая.
Радуйся, скорбящих супругов от уз бесплодия разрешающая.
Радуйся, отчаянным радость и надежду возвращающая.
Радуйся, от клеветы и злословия нас оберегающая.
Радуйся, материнскою любовию нас согревающая.
Радуйся, Владычице мира, образом Твоим Самарским благодать и милость нам являющая.

Кондак 10
Спасти желая весь род человеческий от беззаконий и вечныя муки, Человеколюбец Господь Тя, Матерь Свою, дарова в помощь, покров и защиту верующим в Него. Сего ради прославляя таковое милосердие о нас, грешных, благодарным сердцем и устами вопием Ему: Аллилуия.

Икос 10
Стена нерушимая и твердое упование наше, пристанище необуреваемое, утешение скорбящих, очищение согрешающих Ты еси, Мати Дево Владычице. Человеком Господа во спасение рождшая, ниспосли нам мир Твой и велию милость, да выну зовем Тебе хвалебно таковая:
Радуйся, росою Твоея благости всех нас освежающая.
Радуйся, источником Премудрости Христовой всех нас напояющая.
Радуйся, во младости и юности нашей благая Питательнице.
Радуйся, во зрелости и старости нашей пречудная Хранительнице.
Радуйся, иноков кротких образе богоуднаго воздержания.
Радуйся, архиереев Православных крепкое упование.
Радуйся, яко Тобою мы с Господом сочетаемся.
Радуйся, яко Тобою мы от искушений вражиих избавляемся.
Радуйся, Владычице мира, образом Твоим Самарским благодать и милость нам являющая.

Кондак 11
Пение благодарственное Тебе приносим, Боголюбивая Царице, Ты бо одесную Бога стоиши и о спасении нашем присно молишися к возлюбленному Сыну Твоему и Богу нашему, да причастницы Его блаженного наследия будем и выну воспеваем Ему усердно: Аллилуиа.

Икос 11
Божественным светом пречистыя души Твоея всю вселенную просвещаеши и пречудною и чудотворною иконою Твоею сердца всех веселия и радости исполняеши, благодать от нея всюду ниспосылая. Сего ради и старии и младии, и юницы и дети, с глубочайшим благоговением согласно Тебе зовут:
Радуйся, прародительнаго преступления разрешение.
Радуйся, Еюже сподобихомся прияти Творцу усыновление.
Радуйся, страну нашу и вся языки славянския усердно заступающая.
Радуйся, видети славу Божию нас сподобляющая.
Радуйся, правосудие с милостию благодатно сочетающая.
Радуйся, страхом Божиим нас пречудно вразумляющая.
Радуйся, от обычаев душевредных сердца наша отвращающая.
Радуйся, нравы добрыя в нас насаждающая.
Радуйся, Владычице мира, образом Твоим Самарским благодать и милость нам являющая.

Кондак 12
Благодатию и щедротами Твоими, Премилосердная Владычице, не оставляеши христиан, имя Твое свято чтущих, даруя скорбящим утешение, обидимым заступление, болящим и всем сущим в бедах многоразличных избавление. Сего ради, прославляюще всеблагомощное предстательство Твое, благодарственне вопием Богу: Аллилуия.

Икос 12
Воспевая глубину Твоего Милосердия, Матерь Божия, веруем, яко молитвами Твоими восхищаеши и избавляеши нас от ада кромешнаго, и слезами Твоими отверзаеши нам, многогрешным, двери райския. Сего ради просим Тебя, Любвеобильная Матерь наша, помяни во святых Твоих молитвах всех нас и милостивно приими величания сия:
Радуйся, недуги телесныя и язвы душевныя исцеляющая.
Радуйся, слепым – зрение, глухим – слух возвращающая.
Радуйся, хромым радость хождения дарующая.
Радуйся, в час смертный тьму бесовскую от нас отгоняющая.
Радуйся, безболезненную и мирную кончину нам устрояющая.
Радуйся, супругам любовь и согласие дарующая.
Радуйся, священников и диаконов благодатно укрепляющая.
Радуйся, со всеми в мире жити нас научающая.
Радуйся, Владычице мира, образом Твоим Самарским благодать и милость нам являющая.

Кондак 13
О, Всепетая Мати Сладчайшего Господа нашего Иисуса Христа, милостиво приими сие малое моление наше, избави нас от всякия напасти, болезни и внезапныя смерти, сподоби всех нас наследниками Царствия Небесного быти и со всеми святыми во веки воспевати Сыну Твоему и Богу нашему: Аллилуия.
Сей Кондак читается трижды, Затем Икос 1 и Кондак 1.

Молитва первая
О, Преблагословенная Владычице Богородице, милости и благосердия неисчерпаемая бездно и любве Божия присноживотный Источниче!
Предстояще пред святою Твоею иконою Cамарскою, юже в земли нашей чудно явити благоволила еси, и созерцающе очами веры и смирения слезы милости Твоея, от чудотворнаго образа Твоего обильно источаемыя, яко чада неразумныя со умилением молим Тя: отверзи покаянием ко Господу помраченныя сердца наша и сокрушенный дух наш паки созижди целомудрием; оживотвори любовию Божественнаго Сына Твоего вся наша помыслы, чувствия и начинания; страхом Господним укрепи расслабленную страстьми волю нашу; помози в терпении принести благословенныя плоды милосердия и братолюбия; да чистым сердцем и искреннею душею в любви Божией возрастающе, прочее время живота нашего в мире и благоденствии поживем, прославляюще в Троице Единаго Бога Отца и Сына и Святаго Духа, и Твое всемилостивое предстательство, ныне и присно и во веки веков. Аминь.

Молитва вторая
Преблагословенная Владычице, Приснодево Богородице, всеми даровании Святаго Духа облагодатствованная; паче всякаго создания превысочайшая Святыня!
Пред чудною иконою Твоею умильно припадающе, молим Тя: приклони матерний слух Твой к сердечному воплю нашему. Ты едина веси вся потребы наши. Зриши скорби и беды обуревающия нас и искушения отвсюду облежащия достояние Твое. Тебе единой возможно сие преложити на радость и даровати вся потребная ко временной жизни и к вечному спасению. Всяка бо надежда на смертных тща и несть помогающаго: Ты же вся можеши, аще токмо восхощеши ущедрити нас, просящих Твоего Матерняго покрова в сем житии и в преставлении в страну Горняго Отечества, идеже Ты в неизреченной славе прославляешися от всех святых предстоящих Престолу Святыя Троицы Отца и Сына и Святаго Духа. Аминь.

Молитва третья
О, Пресвятая Дево, Богомати Пречистая, града Одессы и всея земли Черноморския покрове и заступление!
Тебе припадаем и покланяемся пред Святою и Пречестною иконою Твоею Cамарскою, Еюже дивныя и преславныя чудеса совершашася. Ты едина еси радости нашей Ходатаице и яко Мати Божия можеши всем нам помощи. Тебе убо единей дадеся Матернее дерзновение умилостивити Сына Твоего Христа Бога нашего о спасении нас грешных.
Темже смиренно молим Тя, Всемилостивую Владычицу нашу, не презри и не возгнушайся воздыханий наших, но помози нам немощным скверным и неисправленным, скорбящим и озлобленным, больным и заблудшим, в сокрушении сердец наших к Тебе прибегающих.
Избави нас, Преблагословенная Госпоже, Мати Господа Вышнего, от всяких бед и скорбей, от всяких недугов и болезней, от внезапныя смерти, от напастей демонских и наветов злых человек, яко Тобою и демоны попираются и вси врази наша посрамляются. Умоли, Госпоже Пречистая, Господа и о еже сохранитеся Отечеству нашему и Православной Церкви нашей в мире и тишине.
Вышним Своим Благословением, да укрепит Господь Архиереи наша Православныя и пастыри, христолюбивое воинство со всеми православными христианы.
Всех же нас огради от всякаго зла благостию Твоею, и утеши милостивым Твоим посещением вся благодеющия нам. Еще же, о, Владычице, молим Тя, еретическое востание низложи, рассеянныя собери, заблудшия во едино Христово стадо возврати, старость поддержи, юныя вразуми, вдовицы сирыя защити, болящия исцели и скорбящия утеши.
Прежде отшедшия отцы и чада, и братию нашу во светлостех райских и селениях праведных упокой, с ними же и нас всех в покаянии и исповедании приими, да и мы со всеми Святыми прославим Пречестное и Пресвятое имя Отца и Сына и Святаго Духа, ныне и присно, и во веки веков. Аминь.

Автор сего акафиста Евгений Владимирович Храповицкий