Кондак 1
Избранней от всех родов Божией Матери и Царице, Всемилостивей Споручнице грешных, яко избавляемии Тоя предстательством за ны ко Господу от вечныя смерти, благодарственное воспоем пение. Ты же, Пречистая Дево, яко имущая милосердие неизреченное, от всяких нас зол свободи, любовию Тебе зовущих:
Радуйся, Богородице, руце Твои в поручение о нас Богу приносящая.

Икос 1
Ангельским ликом подражающе, Пречистая Богородице, гласы хвалебными дерзаем воспевати и блажити Твое Всемилостивое о грешных к Богу Споручение:
Радуйся, рода Христианскаго не оставляющая промышлением по отшествии Твоем в Горняя.
Радуйся, всем верным помоще, покрове и заступление.
Радуйся, дарующая нам скорое избавление от всех злых обстояний.
Радуйся, заступление верным пред Сыном Твоим, Господем нашим.
Радуйся, грешным и заблуждшим пути ко спасению показующая.
Радуйся, Богородице, руце Твои в поручение о нас Богу приносящая.

Кондак 2
Видяще Твое христианом скорое поможение, знамения и чудеса, яже источаеши, Владычице, от святыя иконы Твоея, юже даровала еси обители Пронстей в похвалу пречистаго имене Твоего, благодарно поем Богу: Аллилуиа.

Икос 2
Разума всякаго превыше бысть тайна Богорождения Твоего, Пресвятая Дево: непостижна есть и бездна милосердия Твоего к людям грешным, о них же Богу пречестнеи руце Твои в споручение приносиши, еже воспевающе глаголем:
Радуйся, грешным лествице к небеси, Богом данная.
Радуйся, мосте, приводяй ны от погибели в живот вечный.
Радуйся, столпе облачный, защищаяй ны от знойнаго греху служения.
Радуйся, двере, еюже внидем в селения райская.
Радуйся, о грешных к Богу теплая молитвеннице.
Радуйся, Богородице, руце Твои в поручение о нас Богу приносящая.

Кондак 3
Силою Божиею действующа зрится святая и чудотворная икона Твоя, Богомати, юже в залог благости Твоея даровала еси обители Пронстей: Тою бо содеваеши многая чудеса достойно чтущим Тя и вопиющим о Тебе Богу: Аллилуиа.

Икос 3
Имуще Твое пред Господем за ны, грешныя, споручение, козней вселукаваго безбедно избегнем и к покаянию возвизаемся, зовуще Ти, о Госпоже, благодарственная сия:
Радуйся, виновнице спасения нашего.
Радуйся, изъимающая ны работнаго грехослужения.
Радуйся, содевающая ны Сыны Царствия Небеснаго.
Радуйся, устрояющая ны наследники живота вечнаго.
Радуйся, грешных к Богу дерзновение.
Радуйся, Богородице, руце Твои в поручение о нас Богу приносящая.

Кондак 4
Бурею грехов и озлобления одержимым пристанице тихое явися нам святая икона Твоя, Богородице, благодатию бо, от ней источаемою, недуги врачуеши и скорби утоляеши всех, верно о Тебе Богу вопиющих: Аллилуиа.

Икос 4
Слышаще иноков собор обители Пронския о преславных чудесех, бываемых от святыя иконы Твоея, Владычице, сущия во обители их, гласы радования и благодарения в похвалу Ти вознесоша:
Радуйся, Всеблагая, благодатию посетившая страну Рязанскую.
Радуйся, Премилосердая, источник неоскуден чудес и милостей явившая во обители Пронстей.
Радуйся, освящение градом и весем страны нашея.
Радуйся, благословение домом и селом нашим.
Радуйся, грешныя во спасению всяко приводящая.
Радуйся, Богородице, руце Твои в поручение о нас Богу приносящая. Коднак 5
Боготечная звезда явися нам, прегрешающим, святая и чудотворная икона Твоя, Богомати: тою бо путеводимии во мраце суетнаго и скорбнаго жития нашего спасения достигаем, зовуще Богови: Аллилуиа.

Икос 5
Видяще неизреченное благоволение Твое, Пресвятая Дево, к христианом прегрешающим, яко Всеблагим споручением Твоим милосердно о них Бога умоляеши, да не погубит я безпокаянны, гласы благодарения дерзаем вознести Тебе:
Радуйся, Бездно щедрот и милостей к грешным и заблудшим.
Радуйся, милостивно взяскующая во глубину зол впадшия.
Радуйся, озлобленным сердцем дарующая умиление.
Радуйся, нерадивым о спасении душам ниспосылающая благодатное возбуждение.
Радуйся, в человецех отверженных не гнушающаяся.
Радуйся, Богородице, руце Твои в поручение о нас Богу приносящая.

Кондак 6
Проповедники Твоей благости соделай ны, Всеблагая Споручнице грешных, источая нам от святыя иконы Твоея чудес множество, недуги врачуя, скорби утоляя, грады и веси от огня спасая и вся наша прошения исполняя во благо, да вопием о Тебе Богу: Аллилуиа.

Икос 6
Возсия Свет Спасения всем грешным во всеблазе споручении за ны Богоматере. Притецем убо, вернии к милосердию Пречистыя Девы, благочестно зовуще похвальная сия:
Радуйся, споручением за грешныя ангельския лики возвеселяющая.
Радуйся, непрестанным молением за ны к Богу верных соборы в радость приводящая.
Радуйся, помрачение духовное в людех просвещающая.
Радуйся, совесть спящую в человецех пробуждающая.
Радуйся, яко гласа молений Твоих подземных силы страшатся и трепещут.
Радуйся, Богородице, руце Твои в поручение о нас Богу приносящая.

Кондак 7
Хотя явити безмерное благоутробия Своего роду христианскому, Человеколюбец Господь дарова нам крепкое Заступление в премилостивем споручении Пречистыя Матере Своея за вся, кающаяся во гресех и вопиющия Богови:Аллилуиа.

Икос 7
Новое и преславное знамение благости Твоея к людем страны Рязанския явила еси, Богомати, прославляюще чудесы святый образ Твой во обители Пронстей, ему же благоговейно покланяющеся, радостно возглашаем Ти:
Радуйся, славо и похвало Церкве Разанския.
Радуйся, сокровище безценное обители Пронския.
Радуйся, от всякаго губительства нас спасающая.
Радуйся, от междоусобныя брани нас охраняющая.
Радуйся, избранному наследию Сына Твоего мир и благословение дарующая.
Радуйся, Богородице, руце Твои в поручение о нас Богу приносящая.

Кондак 8
Странну и предивну тайну споручения Твоего пред Богом за грешныя и заблудшия разумети не могуще, недоумеем достойно величати и воспевати Твое, о Богомати, к христианом благоволение, обаче благодарением подвизаеми, вопием о Тебе Богови: Аллилуиа.

Икос 8
Вся суетная мира отложше, сердца и умы горе возведем, похваляюще Божие о нас грешных промышление: приемлет бо милостивно Господь всеблагое споручение за ны Пречистыя Матере Своея, яко залог покаяния нашего. Воззовем убо милосердно предстательствующей за ны Богородице:
Радуйся, пение немолчное спасаемых Тобою от вечныя смерти.
Радуйся, величание присное свобождаемых Тобою от козней вселукаваго.
Радуйся, незлобивая грешным наказательнице.
Радуйся, благая заблудшим наставнице.
Радуйся, Вечнаго Судию, Сына Твоего о милости к грешным присно умоляющая.
Радуйся, Богородице, руце Твои в поручение о нас Богу приносящая.

Кондак 9
Всякия утоли болезни, раздоры, соблазны и нестроения в земли нашей, о Госпоже Владычице, яко Начальника тишины рождшая, Христа Спаса нашего, Ему же пение ангельское дерзаем приносити о Тебе: Аллилуиа.

Икос 9
Витийство всяко человеческое превосходит дивная знамения и чудеса, источаемыя верным от святыя иконы Твоея, Владычице, юже яко некий дар Божественный, имать обитель Пронская. Приидите убо вернии, душами чистыми и устами нескверными возвеличим Всеблагую Споручницу грешных, глаголюще Ей:
Радуйся, милостивно взыскующая нас, во гресех погибающих.
Радуйся, любвеобильно наказующая нас, в окаменении сердечнем пребывающих.
Радуйся, пламень греховный страстей угашающая.
Радуйся, огнь любве к Богу в сердцах наших возгнетающая.
Радуйся, всех наветов злых, яже от мира, плоти и диавола попрание.
Радуйся, Богородице, руце Твои в поручение о нас Богу приносящая.

Кондак 10
Спастися хотящим нам от горькаго греху работания и от вечныя смерти являешися, Пресвятая Дево, оплот и утверждение наше, икону же Твою святую даровала еси нам во свидетельство неизреченнаго милосердия Твоего, сего ради вопием Богу о Тебе: Аллилуиа.

Икос 10
Стена нерушимая, о Богомати, явися верным всеблагое споручение Твое пред Господем за люди прегрешающия: тем бо ограждаеми врагу противляемся, не боящеся того ловительства и весело зовуще Тебе, Споручнице грешных:
Радуйся, Небесная помоще нам во бранех противу козней льстиваго.
Радуйся, страже неусыпный рода христианскаго.
Радуйся, воинствующим на диавола присная споспешнице.
Радуйся, двери райския верным отверзающая.
Радуйся, недоведомое грешным исправление.
Радуйся, Богородице, руце Твои в поручение о нас Богу приносящая.

Кондак 11
Песнословяще неизсчетная благодеяния Твоя, Всеблагая Споручнице грешных, прославляем дивная и ужасная, яже являеши нам от святыя и чудотворныя иконы Твоея, не отврати, Госпоже, щедроты Твоя от нас и во вся дни живота нашего, да вопием возвеличившему Тя Господу: Аллилуиа.

Икос 11
Свет Богоразумия подаеши, Пресвятая Богородице, душевныма очима ослепленным и дивно спасаеши грешныя всеблагим споручением Твоим за ны ко Господу, научающе я вопити Тебе благодарственная сия:
Радуйся, яко из Тебе возсия Солнце Правды, Христос Бог наш.
Радуйся, Имже мы, земнороднии к Светоначальнику Отцу нашему приведение имамы.
Радуйся, свет подающая слепым.
Радуйся, тьму грехослужения расторгающая.
Радуйся, безнадежным надеждо, отчаянным упование, скорбящим отрадо.
Радуйся, Богородице, руце Твои в поручение о нас Богу приносящая.

Кондак 12
Благодать всеблагаго сопручения Твоего за ны, грешныя, присно подавая нам, Всепетая Госпоже Богородице, сохраняя ны молением Твоим от смерти внезапныя и безпокаянныя, яко да предстательствуемии Тобою, покаяние принесем всех Владыке Господу и Того милостива Судию обрящем по кончине нашей, взывая Ему с благоугодившими: Аллилуиа.

Икос 12
Поюще всеблагое споручение Твое, Богородице, о людех грешных, умиленно поклоняемся святей иконе Твоея, еюже новотвориши верным чудеса и исцеления и спасаеши нас от всякаго прилога вражия и приносим Ти в похвалу сицевая:
Радуйся, верно песнословящих имя Твое Пресвятое миром благословляющая.
Радуйся, верою покланяющихся пречистому образу Твоему благоденствием снабдевающая.
Радуйся, Милосердая Мати нам, христианом, во вся дни жизни нашея.
Радуйся, предстательствующая за ны пред Богом и в час кончины нашея.
Радуйся, единое заступлением нам и на страшнем Судилище Христовом.
Радуйся, Богородице, руце Твои в поручение о нас Богу приносящая.

Кондак 13
О всепетая Мати, Всеблагая Споручнице грешных! Малое сие приимши похваление наше, предстательствуй за ны молением ко Господу, да не погубит ны безпокаянны в праведнем прещении гнева Своего, грех ради наших, но да сподобимся христианския кончины живота нашего, во еже наследити жизнь вечную и воспевати Царю Славы: Аллилуиа.
Сей Кондак чтется трижды, затем Икос 1 и Кондак 1

Тропарь, глас 1-й
Честное жилище бывшее неизреченнаго естества Божественнаго, выше слова и паче ума и грешных еси Споручница! Подаваеши благодать и исцеление яко Мати всех Царствующаго, моли Сына Твоего, получити нам милость в день судный.

Кондак, глас 2-й
Всеблагое споручение Твое к Богу о грешных и заблудших приносящи, не отвержи и нас Твоея благости, Пречистая Дево: да спасаемии Тобою, умиленно вопием Ти:
Радуйся, Всеблагая Споручнице наша, в Бозе ко спасению от грехов нас возводящая.

Молитва первая
Царице наша, преблагая! Надеждо наша, Богородице, Споручнице грешных! Приятелище сирым, скорбящим Радосте; обидимым Покровительнице! Зриши наша беды; зриши наша скорби: помози нам, яко немощным, управи нас, яко странных. Недуги наша веси: разреши их, яко же волиши. Яко не имамы иныя помощи, ни иныя предстательницы, ни благия утешительницы, токмо Тебе, о Богомати. Яко да сохраниши нас и покрыеши во веки веков. Аминь.

Молитва вторая
Высшая небес и чистшая светлостей солнечных, Дивная и Премилостивая Споручнице грешных, Богородице Владычице мира! Услыши умиленное моление наше в час сей пред пречистым Твоим образом и приими е, аки кадило благовонное: отврати от нас молением Твоим гнев Божий, праведно движимый на ны, беззаконий ради наших.
Сотвори милость Твою явлену в нас и буди Споручницей за ны ко Христу Богу нашему, молящи Его ниспослати нам Благодать, укрепляющую ны на всякое делание благо во спасение наше. Подаждь нам, Пречистая дево, помилование от всякаго злаго обстояния: грады, веси и обители наша избави от глада, губительства, труса, потопа, огня, меча, нашествия иноплеменник и междоусобныя брани и вся страны христианския свободи от бед, скорбей и болезней, даруя нам мирное и благоденственное житие в веце сем и спасение в жизни будущей, Церковь же нашу Святую незыблему сохрани от козней вражиих и утверди на вся веки. Ты бо еси наша надежда, заступница, молитвенница теплая и Споручница наша пред Господем, и Тобою устрояется всяко спасение наше, ныне и присно и во веки веков. Аминь.