Кондак 1
Избранней от всех родов Царице Небесе и земли, Пречудней Деве Богородице, яко помощь и отраду от Ея честныя иконы в скорбех и болезнех получивши, приносим благодарственное пение: спасай нас всемощным Твоим заступлением, Прибежище всех нас и Ограждение, да вси во умилении сердца вопием Ти:
Радуйся, Владычице Милостивая, Тамбовския страны Покровительнице!

Икос 1
Ангел предстатель с Небесе послан бысть рещи Богородице:
Радуйся, и со безплотным гласом воплощаема Тя зря, Господи, ужасашеся трепетне: возрадовахуся же людие тамбовския, видяще икону Твою, Пречистая Дево, рукама святителя Питирима на вратех града поставленную, святитель же Христов, пророчески поучая их чудесем и милостем Божия Матери, взываше к Ней таковая:
Радуйся, вечную радость людям от Бога принесшая;
Радуйся, Благодатная Радосте всего мира.
Радуйся, в Тамбовской иконе Своей обильную благодать людем явившая;
Радуйся, Утешительница наша в болезнех и скорбех.
Радуйся, икону Свою, яко щит и утверждение нам показавшая;
Радуйся, тихое пристанище многомятежныя жизни людей.
Радуйся, в честней иконе Своей, яко живая сущи, среди нас пребывающая;
Радуйся, Руководительнице Благая всей Тамбовстей стране.
Радуйся, Свет и Утешение людем града Тамбова;
Радуйся, многообразным явлением благодатныя помощи от иконы Твоея увеселяющая наша сердца.
Радуйся, мрак уныния и отчаяния от наших душ отгоняющая;
Радуйся, светлая Надеждо вечнаго спасения нашего.
Радуйся, Владычице Милостивая, Тамбовския страны Покровительнице!

Кондак 2
Видяще Святая Дево смятенны и отвержены люди страны Тамбовския, яко овцы, не имущия пастыря, милосердова о них и благоизволи явити нам образ Свой, да вси на оный взирающее, благодарно вопиют Богу: Аллилуия.

Икос 2
Разум неразуменный разумети людие ищуще, вопрошаху святителя Божия, како может честная икона Богоматери, на вратех града поставленная, спасти страну их от находящих бед и напастей; он же, вразумляя их, взываше к Тебе, Богородице:
Радуйся, от всех родов избранная на спасение людей;
Радуйся, твердое ограждение наше от всех бед.
Радуйся, градов и весей Хранилище непобедимое;
Радуйся, на враги Побеждение.
Радуйся, Всепетая православных Надеждо;
Радуйся, яко Тобою нерушимым наш град сохраняется.
Радуйся, Заре Пресветлая вечнаго Солнца – Христа;
Радуйся, лучами истиннаго боговедения осиявшая нашу страну.
Радуйся, готовое всех скорбящих Утешение;
Радуйся, скорое в бедах Избавление.
Радуйся, Граде Одушевленный;
Радуйся, во всем житии Своем благое вместилище Таин Божиих.
Радуйся, Владычице Милостивая, Тамбовския страны Покровительнице!

Кондак 3
Силою Вышняго Совет Предвечнаго Бога о спасении людей исполняющи, родителем Твоим Иоакиму и Анне в старосте и безчадии сущим, неизреченную радость явила еси рождеством Твоим, подвизающи купно с ними и нас благодарственно Пети Богу: Аллилуия.

Икос 3
Благоприятное слышавшее рождество Твое, вси сродницы и знаемии страхом и радостию исполняхуся о явлении милости Божия не токмо родителем Твоим, но и всем людем. Мы же внимающее дивному Совету Божию о рождении Преславныя Матери Христа Бога нашего, со благоговением взываем Ти таковая:
Радуйся, Превечнаго Совета Божия о спасении людей пречудное Исполнение;
Радуйся, явления Таин Божиих людем Посреднице.
Радуйся, праведных родителей Своих рождеством Твоим чудно возвеселившая;
Радуйся, преславным званием Богоотец в Церкви Христовой их украсившая.
Радуйся, яко рождество Твое радость возвести всей вселенней;
Радуйся, Пресветлый Источниче всех благих радостей земных и небесных.
Радуйся, яко из Тебе возсия Солнце Правды Христос Бог наш;
Радуйся, Начало нашего духовнаго просвещения в господе Иисусе.
Радуйся, разрушение клятвы людем открывшая;
Радуйся, вместо оныя клятвы Божие благословение миру принесшая.
Радуйся, рождеством Твоим упразднение смерти провозвестившая;
Радуйся, чрез Сына Своего и бога жизнь вечную нам даровавшая.
Радуйся, Владычице Милостивая, Тамбовския страны Покровительнице!

Кондак 4
Бурю в безчадстве своем внутрь имеющи помышлений сумнительных, родители Твои, Пречистая, обет молитвеннее изрекоша Господеви, аще им дано будет чадо, посвятити Е на служение Богу: рожденной Дщери зело возвеселишася и в умилении сердца воспеша Господеви: Аллилуия.

Икос 4
Слышавши Святая неложный обет Богомудрых родителей, трилетна сущи Отроковица востекла еси в честный храм, уготовляющи Себе на служение Господеви: в веселии же и радости срете Тя, богородице Дево, великий архиерей святилища Божия, предуказуя в Тебе пророчески Матерь Бога Вышняго, и не возбрани Тебе внити во Святая Святых, камо един точию архиерей и единою в лето вхождаше приносити жертву о себе и о людских невежествиих. Дивящееся убо таковому о Тебе Божественному смотрению, вопием ти сицевая:
Радуйся, чадо Богоизбранное, молитвою и благим обетом у Господа испрошенное;
Радуйся, обет благочестивых родителей о служении Господеви от младенчества добре исполнившая.
Радуйся, при введении во храм святый таинственне, яко Матерь Господа, предуказанная;
Радуйся, во Храме Божии от девства Своего благодатию Вышняго приосененная.
Радуйся, благоволения Божия к людем Предображение;
Радуйся, человеков спасения проповедание.
Радуйся, яко Ты еси воистину, о Ней же гласит священная песнь: «В храме Божии ясно Дева является и Христа всем предвозвещает»;
Радуйся, смотрения Зиждителева Исполнение.
Радуйся, в рукотворенном храме, ветхия благодати смиренно пожившая;
Радуйся, истинный Храм Бога Вечнаго тамо Себе явившая.
Радуйся, многоченный Чертог и Дево;
Радуйся, Священное Сокровище славы Божия.
Радуйся, Владычице Милостивая, Тамбовския страны покровительнице!

Кондак 5
Боготечная Звезда явилася еси ко спасению всем людем: трудами бо, молитвою и Богомыслием на высоту добродетелей востекла еси, знаменующи Себе Мати Господа быти: во храме невозбранно ходила еси во Святая Святых и тамо со ангелы беседовала еси, поучающися с горними силами Пети Богу: Аллилуия.

Икос 5
Видяще чудное во храме житие Твое, священницы и вси людие дивляхуся рвению души Твоея, Богородице, к поучению в законе Господнем: яко голубица чистая, непорочная явилася еси в церкви Божией: темже недоумеющи вопрошаху вси в сердце своем: «Что убо Дитя сие будет?» Видяще же руку на Тебе Господню, умильно во вся роды и века доброту жизни Твоея восхвалиша звании сими:
Радуйся, светлое Зерцало закона Господня;
Радуйся, Божественнаго Света Чертоже.
Радуйся, Книга Слова Животнаго;
Радуйся, к чтению Книги Сия разум открывающая.
Радуйся, благочестивый труд от юности возлюбившая;
Радуйся, Богомыслие со трудом сочетавшая.
Радуйся, образе неусыпныя молитвы ко Господу;
Радуйся, красотою души Твоея на молитву и нас снабдевающая.
Радуйся, непорочных дев и жен благочестивых многоценное украшение;
Радуйся, благих детских навыков посвящение.
Радуйся, хитон Сыну Своему пречистыма рукама Своима при храме соткавшая;
Радуйся, и нас чрез Сына Своего хитоном жизни благодатныя украсившая.
Радуйся, Владычице Милостивая, Тамбовския страны Покровительнице!

Кондак 6
Проповедницы Богоноснии бывши священницы и знаемии, егда совершися время Твоего, Богомати, служения храму Господню: обычаю бо таковому сущу тщание имеяху браку вдати Тебе, уведевше обет Твой в девстве пребывати до конца жизни твоея, со удивлением воспеша Господеви: Аллилуия.

Икос 6
Возсия в Тебе просвещение истины всему миру; священницы же иудейстии о благом обете Твоем, Пречистая Дево, мняху, яко странно есть обычаю иудеев до конца своея жизни девственне пребывати: обаче видящее непреклонное совета Твоего, избраша сродника старца Иосифа древоделя, да будет хранитель девства Твоего и да возмет попечение о благоустроении жизни Твоея: обрученней убо бывшей Тебе Иосифови, град Назарет явися в жилище Тебе. В доме Иосифове вселилася еси тогда, поучающися тамо жизни праведней, воздержанию и всякой добродетели: тем же внемлющее Твоему благочестию взываем Ти сице:
Радуйся, рукою ангельскою во храме Божием воспитанная;
Радуйся, в непорочности Своего духа горних сил чистоту восприявшая.
Радуйся, превысшая серафимов, в доме Иосифа – древоделя смиренно вселившаяся;
Радуйся, и нас недостойных кротости и смирению тем поучающая.
Радуйся, безценное Богатство Иосифова жилища;
Радуйся, неисчетное сокровище всего мира.
Радуйся, от убожества град Назарет именем своим возвеличившая;
Радуйся, старца Иосифа, яко обручника и мужа праведна в конец веков прославившая.
Радуйся, яко из Тебе возсия свет велий во тьме и сени смертней сидящим;
Радуйся, Заре Христова благовестия людем о покаянии.
Радуйся, яко тобою приближися к нам Царствие Божие;
Радуйся, Начало духовнаго обновления людей.
Радуйся, Владычице Милостивая, Тамбовския страны Покровительнице!

Кондак 7
Хотящу Господеви спасти человеческий род, и времени сему наставшу Совет Превечный открыся о Тебе в Назарете, Богородице, да послужиши великому делу Божественнаго воплощения; внимающее убо таковей тайне Божия к людем благоволения, вси трепетно вопием Богу: Аллилуия.

Икос 7
Новую тварь показа нам Зиждитель безсеменным рождением из утробы твоея, Пречистая. В месяц бо шестый послан бысть с Небес архангел, благовестити Тебе от Бога: «Радуйся, Благодатная, Господь с Тобою, обрела бое си благодать у Бога: зачнеши во чреве и родиши сына и наречеши имя Ему Иисус, Сей будет велий и Сын вышняго наречется». Умилением и радостию объятии бывшее слышанием сицеваго благовестия благодарственно вопием Ти:
Радуйся, Мати Христа Бога;
Радуйся, Благословенная в женах.
Радуйся, тайне спасения нашего послужившая;
Радуйся, Благословенный плод Духа Святаго во чрево Свое восприявшая.
Радуйся, благодатное Освящение верных;
Радуйся, Возстание падших.
Радуйся, еже от века таинства явление;
Радуйся, Начало нашего спасения.
Радуйся, яко с Тобою Сын Божий, Сын Девы бывает;
Радуйся, яко и Гавриил благодать благовествует.
Радуйся, смиренно, яко раба Господня, тайну Превечнаго Бога приявшая;
Радуйся, тайны Божии и нас во смирении созерцати поучающая.
Радуйся, Владычице Милостивая, Тамбовския страны Покровительнице!

Кондак 8
Странное Рождество видевше от Тебе во граде Давидове, ангели Божии в сиянии славы господни возвестиша людем радость велию и воспеша согласно: «Слава в вышних Богу и на земли мир, в человецех благоволение». И мы, видивше Божие к людем милосердие, тепле в просвещении душ наших вопием Богу: Аллилуия.

Икос 8
Се в вышних и в нижних явишася великия чудеса: Христос в Вифлееме родися, небо лучезарную звезду показа, Ирод смятеся, волсви подвигошася, пастырие дивное знамение узреша. Ты же, Пречистая Дево, соблюла еси вся глаголы сия; слагающи в сердце Своем. Внимающи убо и мы таковым знамением, восхваляем Тя величании сими:
Радуйся, и трепет, и изумление, и благодарение, и веру в созерцании дел Божиих совместившая;
Радуйся, дела Божия, яже о спасении людей миру всему открывшая.
Радуйся, звездо невечерняя мысленнаго Солнца Христа;
Радуйся, Небо отверстое славы Божия.
Радуйся, посмеяние Иродову безумию;
Радуйся, осуждение иродова нечестия.
Радуйся, с праматерью Рахилью плач испустившая о избиении детей за богомладенца Христа;
Радуйся, мучительства их безценными венцы украсившая от Сына Своего и Господа.
Радуйся, Богом хранимая от Иродова коварства;
Радуйся, от руки его во Египет избегшая.
Радуйся, во храме старцем Симеоном яко Матерь Божия ясно пред всеми исповеданная;
Радуйся, о страданиях Сына пророчение от того же приемшая.
Радуйся, Владычице Милостивая, Тамбовския страны покровительнице!

Кондак 9
Всякое естество ангельское удивися великому твоему, Богомати, терпению: печали, бо, скорби и болезни сокрыла еси в сердце Своем, видящее поругание Сына твоего от беззаконных людей, обаче милости Твоя к роду человеческому и по успении Своем не оставила еси, поучающи всех пети Богу: Аллилуия.

Икос 9
Вития многовещанныя, яко рыбы безгласныя видим о Тебе Богородице: недоумеют бо глаголати еже како споследствующи страданиям Сына Твоего со святыми апостолы всему миру благовестила еси смерть и воскресение Его: по успении же Своем невидимо с Небесных кругов благосердно назираеши мир паче же в честных иконах Твоих простираеши любовь Свою к людем, знамения и чудеса содевающи всем с верою к Тебе притекающим: темже мир весь от умиления сердца взывает Тебе:
Радуйся, Мати распятаго на кресте Господа;
Радуйся, скорбь, печаль, болезни и страдания Сына Твоего к матернему сердцу приблизившая.
Радуйся, исполнения Симеонова проречения, яко Тебе Самей душу пройдет оружие от неправеднаго поругания Сына Твоего;
Радуйся, вместилище скорби всех матерей, зельне плачущих о детех своих.
Радуйся, усыновлением Тебе возлюбленнаго ученика Иоанна при кресте Сына Твоего всех людей в матернюю любовь свою восприявшая;
Радуйся, Мати всего мира, наипаче же людей православных.
Радуйся, согретое матернею любовию Благовестие миру о Сыне и Господе;
Радуйся, непреложное Свидетельство истины сего благовестия.
Радуйся, честными иконами Твоими мысленный взор наш к Тебе Самей возводящая;
Радуйся, чрез них подающая освящение всему миру христианскому.
Радуйся, яко в иконах Твоих сила и благодать Твоя открываются;
Радуйся, яко дивная знамения и чудеса спасительная людем оным содеваются.
Радуйся, Владычице Милостивая, Тамбовския страны Покровительнице!

Кондак 10
Спасти хотя мир, Господь к назиданию верных многоразличныя иконы в Церкве Святей. Почитающее убо таковыя иконы, яко живое свидетельство истины веры Христовой, людие Тамбовския страны наипаче славити обыкоша, икону Богоматери, юже святитель Питирим из града Москвы принесе: тем же мы славим честную икону Твою Пречистая дерзающи взывати Богу: Аллилуия.

Икос 10
Стена еси девам, Богородице Дево, и всем к Тебе прибегающим: ибо небесе и земли Творец устрои образ Твой, Пречистая, защищение граду Тамбову и всей Тамбовстей стране, иже многими чудесы прославляется, сего ради вопием Ти Преблагословенная:
Радуйся, святою иконою Твоею помощь нам подающая;
Радуйся, тщанием святителя Питирима безценную святыню граду Тамбову на вся времена уготовившая.
Радуйся, луч благодати Божия возжегшая;
Радуйся, образ Твой честный яко щит и ограждение, граду Тамбову поставившая.
Радуйся, от градов отгоняющая супостаты;
Радуйся, слезы обильная о жестокосердии людей испустившая.
Радуйся, и наших врагов видимых и невидимых молитвою веры отгоняющая;
Радуйся, и наши слезы о грехах наших в свою любовь и милость приемлющая.
Радуйся, Госпоже и Владычице града Тамбова;
Радуйся, яко честная икона Твоя явися и всея Тамбовския страны священное украшение.
Радуйся, подательнице чудес многоразличных;
Радуйся, веры Православныя необоримое утверждение.
Радуйся, Владычице Милостивая, Тамбовския страны Покровительнице!

Кондак 11
Пение всякое побеждается величием и множеством щедрот Твоих: равночисленныя песка песни, аще приносим Ти, Пречистая, ничтоже совершаем достойно обилию чудес Твоих, вопиюще о Тебе Богу: Аллилуия.

Икос 11
Светлоприемную свещу, Владычице, явила еси Тамбовскую икону Твою некоему иерею града Калуги, страждущему разслаблением ног: обаче тщетно и многа лета искаше служитель Божий в соседних градех и весех явившеюся ему во сне святую икону. Егда же обреете ю во граде Тамбове в церкви святаго первомученика и архидиакона Стефана и помолися пред нею, внезапу здрава бысть, прослави Бога и благодарне рече: «Отныне прославлена будет сия святая икона». Видящее во очию исполнение сего, умильно взываем Ти:
Радуйся, Пречудная Заступнице наша;
Радуйся, благодатию матернею икону Тамбовскую осенившая.
Радуйся, среди нас недостойных избравшая благосердно жилище Себе;
Радуйся, служителей Сына Твоего изрядное Прибежище.
Радуйся, неусыпное о нас Попечение;
Радуйся, по молитве пред иконою Твоею подавшая помощь в разслаблении сущему.
Радуйся, и наше греховное разслабление силою благодати Божия чрез икону Твою исцеляющая;
Радуйся, церковная Красото.
Радуйся, всея Тамбовския страны незримое Освящение;
Радуйся, Путеводительница жизни нашея во спасение.
Радуйся, ищущим Тебе живая Предстательнице.
Радуйся, Владычице Милостивая, Тамбовския страны Покровительнице!

Кондак 12
Благодать дати всем хотящим, явися икона Твоя, Богородице, яко пресветлый луч, освещающий мглу греховнаго жития нашего. Отжени убо невидимым Твоим предстательством злобу, зависть, коварство от наших сердец и превозношение ума нашего, да вси гордость отложивши, в покаянии сердца вопием Богу: Аллилуия.

Икос 12
Поющее древняя и новая чудеса Твоя, явленная чрез дивную икону Твою, изрядно благодарим Тя, Пресвятая Дево, Госпоже и Владычице наша, памятующее спасение жилищ наших многажды от огня, отведения от напрасныя клеветы, тяжбы и раздоры, таинственное возвращение Тобою, наших утрат, исцеления слепоты, разслабления и иных наших недугов и болезней, смиренно преклоняем колена сердец наших пред Тобою: недоумеюще же, что принесем Ти благодеяний ради таковых, молим не возгнушатися приятии сия воздыхания сердца нашего:
Радуйся, от огненнаго запаления многажды град Тамбов избавльшая;
Радуйся, и наша сердца от запаления гневом и яростию сохраняющая.
Радуйся, от тяжбы и насилия злых людей нас соблюдающая;
Радуйся, злыя диавольския обольщения от добрых супружеств невидимо отгоняющая.
Радуйся, нечаемое нахождение земных наших утрат;
Радуйся, обретение грешному миру вечнаго Царствия.
Радуйся, исцеление наших телесных недугов;
Радуйся, утоление неутешных скорбей.
Радуйся, дух мужества внедряющая в наша сердца;
Радуйся, Утешительница наша в смерти.
Радуйся, Заступница наша и по смерти.
Радуйся, Владычице Милостивая, Тамбовския страны Покровительнице!

Кондак 13
О, Всепетая Мати! Рождшая мирови Радость неизреченную, возвесели наша сердца радостию благою, яже о Христе Иисусе. В скорбех подаждь утешение: мир и тишину даруй всей нашей стране. Умоли Сына Твоего простити нам прегрешения наша и ввести ны в Царство свое, да вси вопием тамо Триединому Богу: Аллилуия.
(Этот Кондак читается трижды, затем читается Икос 1 и Кондак 1)

Молитва
О, Пресвятая Дево, Мати Христа Бога нашего! Приими моление наше с верою и любовию из глубины сердец наших Тебе возносимое. Обрела бо еси благодать у Бога: се бо и икона Твоя пред нами, яко залог Твоего матерняго благопопечения от лет древних вселяет надежду в наша сердца. Со благосердием радости наша приемлеши, печали и скорби утоляеши, болезни наша врачуеши. Буди Благая Заступница во всех наших бедах: жилища наша сохрани от огня и меча, от нашествия злых человек, от убожества и внезапнаго разорения.
Грады и вся страны наша соблюди от тлетворных ветр и смертоносныя язвы, от сухости земли, зноя и глада и от всяких грозных стихийных наваждений. Старость поддержи, младенцы воспитай, юныя вразуми и страху Божию научи, вдовицам предстани, супружества наша уцеломудри, неразрывно сочетай и огради Честным Твоим Покровом от всякаго искушения. Благослови благое намерение сердца нашего во всех благопотребных нам начинаниях. Неверие, малодушие, уныние и всякое растление греховное от нас отжени. Укрепи нас в вере и благочестии, наипаче же испроси всем нам прощение грехов у Сына Твоего и Бога нашего Иисуса Христа, да вси сподобимся Царствия Его со всеми святыми во веки. Аминь.

Тропарь, глас 4:
Днесь светло красуется град Тамбов, и святитель Христов Питирим радуется. Сияет бо ныне чудесы икона Твоя, Владычице, юже из первопрестольнаго града Москвы святитель принесе, и дивное людем являет Твое заступление, подающи исцеление всем с верою к Тебе притекающим. Тем же умильно вопием Ти: спасай нас иконою Твоею, Дево Всепетая.

Кондак 3:
Ангели Божии и вси святи на Небеси ныне радуются, видяще славу Твою, Пречистая Дево. Верни бо людие пред иконою Твоею приносят Тебе благодарственныя молитвы, ради милости и щедрот явленных всем нам, наипаче же граду нашему. Потщися, Богородице Дево, и в предняя дни спасати нас Твоим заступлением.