Кондак 1
Взбранной Воеводе, Пречистей Владычице нашей Богородице, / Заступнице христиан скорой, / избавльшей землю Сканову от смертоносныя язвы ходатайством Своим ко Всемилостивому Богу, / благодарственное пение из глубины верующих сердец приносим недостойнии раби Твои, / Ты же яко имущая Державу Непобедимую / от всяких зол и скорбей спасай нас молитвами Твоими, да зовем Ти: /
Радуйся, Всемилостивая Владычице, от гнева Божия нас избавляющая.

Икос 1
Архангелов и Ангелов превысшую, вся Силы Небесныя немолчно воспевают Тя, Всемилостивую Владычицу, и мы, грешнии, на земли дивящеся скорому заступничеству Твоему чрез явленный чудотворный образ Твой "Трубческий" избавляемся бед и зол. Темже в радости сердечней с любовию припадающе к Пречистому Твоем образу со умилением приносим Ти благохваления сицевая:
Радуйся, иконою Своею знамения верным являющая.
Радуйся, от смертоносныя язвы град Наровчатский избавившая.
Радуйся, от неминуемыя погибели христиан спасающая.
Радуйся, на стези покаяния премудро наставляющая.
Радуйся, изнесением честнаго образа Твоего в земли нашей свирепеющую холеру прекратившая.
Радуйся, плач и сетование в радость претворившая.
Радуйся, ко исправлению греховнаго жития нас побуждающая.
Радуйся, на молящихся усердно очи Свои обращающая.
Радуйся, Всемилостивая Владычице, от гнева Божия нас избавляющая.

Кондак 2
Видящи, Пресвятая Дево, усердие братии Скановой пустыни, егда возношаху прилежныя молитвы с верою и упованием Ти. Тако благоволи образ Свой написати во граде Трубчевске иереем Евфимием и в дар обители принестися. Да вси взирающе на образ Твой честный из глубины души благодарим Тя, нашу дивную Заступницу, вопиюще Богу: Аллилуиа.

Икос 2
Разум человеческий не может постигнути силу благодатнаго заступничества честною иконою Твоею, о, Милосердая Мати, чудесно являемаго во дни гневнаго посещения Божия за лютыя беззакония наша, егда бо изнесением из обители чудотворнаго образа Твоего с молебным пением на стогны града Наровчата прекратися в земли нашей смертоносная пагуба, и множайшая скорбь рабов Твоих в радость велию претворися. Сего ради видевши Твое неизреченное благоволение к падшему роду человеческому в песнех возглашаем Ти сице:
Радуйся, скорбящих Радосте и Покровительнице.
Радуйся, всем верным ограждение и священное прибежище.
Радуйся, Ходатаице пред Богом за нас усердная.
Радуйся, покровом милости Твоея обитель Сканову осеняющая.
Радуйся, призывающия и чтущия Тя от гибели греховныя избавляющая.
Радуйся, милосердие Сына Своего к нам преклонившая.
Радуйся, всякую беду и скорбь от обители отвращающая.
Радуйся, кающихся грешников присно с Богом примиряющая.
Радуйся, Всемилостивая Владычице, от гнева Божия нас избавляющая.

Кондак 3
Силою Божию чудеса предивныя совершахуся от святыя иконы Твоея, Преблагословенная Владычице, егда бо во обитель во множестве стецахуся народ от мала до велика просити исцеления и заступления и всяк просящий по вере от всех недугов душевных и телесных врачевашеся Благодатию Твоею, Богородице. Темже и мы, недостойнии, прибегаем под Твой Покров, чающи богатыя милости изливаемыя от чудотворныя иконы Твоея, с верою и любовию воспевающе хвалебную песнь Создателю Богу: Аллилуиа.

Икос 3
Имеяше тщание прилежное и любовь велию к Тебе, Всемилостивая Госпоже, строитель святыя обители сия Филарет, за великую милость и покровительство земли Скановы принесе в дар Ти и устрои на чудотворный образ Твой ризы посребрянны верху с венцем позлащенным и драгоценными камениями украсиша Тя, Благую Заступницу нашу, радостно воспеваху Тебе песнь. Темже и мы величающе, со благоговением поклояемся дивному образу Твоему, умильно зовем:
Радуйся, рясны златыми украшенная и всю славу внутрь имущая.
Радуйся, двери райския верным отверзающая.
Радуйся, благодать исцелений от иконы Твоея являющая.
Радуйся, яко икону Твою все множество верующих достолепно чествуют.
Радуйся, богомудрых иноков и инокинь скорая Помощнице во спасение.
Радуйся, обители Скановы крепкое заступление.
Радуйся, исполнение всех благих желания.
Радуйся, призывающих имя Твое Святое с верою от горькия работы вражия спасающая.
Радуйся, Всемилостивая Владычице, от гнева Божия нас избавляющая.

Кондак 4
Буря недоумений смущает ми ум, како возмогу воспети недостойными усты величие славы Твоея. О, Преблагословенная Царице, Яже во иконе Твоей святей множество чудес нам явила еси, изрядно подающи помощь и защиту роду христианскому от враг видимых и невидимых. Сего ради со умилением взирающе на икону Твою святую, почерпнем от источника неоскудеваемаго в скорбех наших отраду, в печалех утешение, в недузех тяжких врачевство обильное и воззовем благодарственными гласы на ней Изображенному вкупе с Тобою Сыну Твоему и Богу нашему: Аллилуиа.

Икос 4
Слышавше о великих чудесех, являемыя от иконы Твоея в земли Скановой возрадовася зело преосвященнейший Амвросий и благослови создати храм в честь чудотворнаго образа Твоего и паки потщися пребыти во обитель, и освятити храм, и тако прослави образ Твой святый со братиею и множеством народа. Мы же, ведуще любовь Твою к нам неизреченную в радости сердечней из глубины души воспеваем Ти сицевая:
Радуйся, пустыни сокровище благодатных исцелений неоскудное.
Радуйся, во обители иночествующим Подательнице блаженнаго упокоения.
Радуйся, христиан боголюбивых утешение.
Радуйся, в мире благочестно живущия не лишающая Твоего заступления.
Радуйся, в честь иконы Твоея храм возсоздати архиерея вразумившая.
Радуйся, в вере колеблющихся знаменьми чудес от иконы Твоея наставившая.
Радуйся, архиерей с братиею и со множества народа образ Твой чудотворный прославиша.
Радуйся, уныние и отчаяние от душ наших отгоняющая.
Радуйся, Всемилостивая Владычице, от гнева Божия нас избавляющая.

Кондак 5
Яко Богосветлая звезда, икона Твоя, Богородице Дево, пустыню Сканову сиянием многих чудес духовно просвети, неоскудно источая исцеления благодатныя всем христианом со усердием к Ней притекающим. Темже благодарим Тя, о, Госпоже Всемилостивая, и поклоняемся чудотворному образу Твоему, прилежно просяще: Владычице, приими моление раб Твоих и скоро избави ны от всякия беды, напасти и печали, прославляющих Тя и Богу воспевающих верно: Аллилуиа.

Икос 5
Видеша иноцы обители Скановы преславныя чудеса от иконы Твоея бывающия, Владычице Преблагая, направляше стопы своя к Тебе день и нощь и в молитве усердней пред образом Твоим колена своя преклоняше, испрашивая благословения на подвиг ратный и щедро дивную руку помощи Твоея получаше. Тако и нас, Богородице, утеши Твоею милостию во мнозех печалех и недузех сущих, да с трепетом душевным и слезами благодарности взываем Ти сице:
Радуйся, явлением иконы Твоея обитель дивно прославившая.
Радуйся, утешение благодатное и помощь всем притекающим к образу Твоему дарующая.
Радуйся, печалию немощи наши врачующая.
Радуйся, скорбми грехи тяжкия наша очищающая.
Радуйся, от соблазнов мира сего нас ограждающая.
Радуйся, к Царству Небесному нам путь указующая.
Радуйся, праведный гнев Божий на ны движимый утоляющая.
Радуйся, на милость к нам, грешным, Господа преклоняющая.
Радуйся, Всемилостивая Владычице, от гнева Божия нас избавляющая.

Кондак 6
Проповедует земля Наровчатская ботатыя милости Твоя и скорое предстательство пред Сыном Твоим и Богом, Пресвятая Владычице, во еже избавила верныя люди от смертоносныя язвы, к образу Твоему честному притекавшия и просящия помощи. Тако и нас, призывающих имя Твое святое милостивно уврачуй от всякаго недуга и от всякия язвы душевныя и телесныя в нас таящияся. Темже не таим Твоих к нам благодеяний, но благодарственне прославляюще Бога, вопием Ему: Аллилуиа.

Икос 6
Возсия нам радость велия, чудотворная икона Твоя, Богомати, егда же бысть гонения на Церковь Христову в годину тяжкую, безбожныя подвергоша обитель святую поруганию и осквернению, и паки образ Твой святый исхитиша и скры его от христиан. И по мале лет милость даровала еси обители возсиявшей чудно, явив икону Свою честную для поклонения и прославления. Сего ради избранную из всех родов Матерь Божию благодарственно и хвалебно величаем:
Радуйся, в возродившуюся обитель икону Свою даровавшая.
Радуйся, иконою чудотворною Своею обитель Сканову возвеличившая.
Радуйся, молящихся пред иконою Твоею глад душевный утоляющая.
Радуйся, поклонение и славословие от иночествующих милостивно приемлющая.
Радуйся, иноков Покровительнице и инокинь Наставшице милостивая.
Радуйся, крест жизненный верным нести без ропота помогающая.
Радуйся, любовь Твою к обители нашей показавшая.
Радуйся, благое о ней промышление являющая.
Радуйся, Всемилостивая Владычице, от гнева Божия нас избавляющая.

Кондак 7
Хотящим всем верным с верою в обитель Сканову входити и пред иконою Твоею чудотворною в молитве усердной колена своя преклоняя, просяще не помянути множество грехов, всех присно спасаеши, Богородице, и от всяких бед и напастей славящих имя Твое святое свобождаеши. Тако и нас, грешных, не лиши матерняго Твоего милосердия и попечения, осени нас благословением Твоим благоутробным, избави от работы вражия и научи благоугодно пети Триединому Богу: Аллилуиа.

Икос 7
Дивно прославилася еси святая икона Твоя во обители Святыя Троицы пустыни Скановы, Пресвятая Дево, в защищении людей православных от свирепствовашея смертоносныя язвы, тако верою познаша, коль сильна есть молитва Божией Матери, благодарне воспеваху пред образом Твоим молебное пение. Мы же о Твоем всемощном заступлении, помощи и утешении добре ведуще, сице к Тебе со умилением взываем:
Радуйся, Тобою бо от земли Скановы смерть отогнася.
Радуйся, Тобою бо вера несумненная в малодушных укрепися.
Радуйся, обитель нашу во дни скорби знаменьми от иконы Твоея утешившая.
Радуйся, помощь Твою Святую молящейся душе христианстей верно подающая.
Радуйся, светлостию иконы Твоея мрак грехов прогоняющая.
Радуйся, попущением земных скорбей путь радостям райским открывающая.
Радуйся, слезами горести и лишений нечистоту греховную омывающая.
Радуйся, мир вечный и радость неизреченную нам грешным подающая.
Радуйся, Всемилостивая Владычице, от гнева Божия нас избавляющая.

Кондак 8
Страннии и пришельцы есмы на земли сей, житие бо наше суетно и кратковременно есть, к Тебе, Владычице, очи свои выну возводим и прилежно молим: сохрани нас от падений греховных и от злых человек, да сподобимся Твоим ходатайством беззакониям нашим получити прощение и во гласе радования воспевати Христу Богу: Аллилуиа.

Икос 8
Все упование наше на Тя возлагаем, Царице Небесная, в скорбех и болезнех ко чудотвоному образу Твоем "Трубчевскому " усердно притекаем, чающе получити от Тебе благодатное утешение и вспоможение во оскудении веры нашей, Милосердая Мати, не возгнушайся наших недовлеющих и недостойных похвал и милостивно приклони ухо Твое, к вопиющим Тебе верно:
Радуйся, в земней юдоли скорбней несумненная наша Надеждо и Утешительнице благая.
Радуйся, нас сирых и обремененных грехами Твоею Матернию любовию не оставляющая.
Радуйся, скорбныя воздыхания страждущих незримо утоляющая.
Радуйся, образ Твой чудотворный во утешение и освящение обители даровашая.
Радуйся, граду Наровчатскому милосердие Твое явлением иконы запечатлевшая.
Радуйся, в память заступления Твоего земли Скановой храм святый устроити благословившая.
Радуйся, в иноческих трудех присно помогающая.
Радуйся, в келлиях монашеских на молитву усердную вразумляющая.
Радуйся, Всемилостивая Владычице, от гнева Божия нас избавляющая.

Кондак 9
Вси вернии, входяще во обитель Сканову с радостию и утешением зрят икону Твою чудотворную, и паки молящеся со благоговением, смиреннии люди колена своя преклоняют пред дивным образом Твоим и умильно просят: уврачуй, Милосердая Мати, греховныя язвы душ наших, защити от вражиих наветов, покрый от бед и скорбей. Вемы яко выну ходатайствуеши за нас грешних у престола Пресвятыя Троицы, идеже лицы святых радостно возглашают: Аллилуиа.

Икос 9
Ветия многовещанныя не довлеют по достоянию благохвалити Тя, Пренепорочная Мати Дево, како иконою Твоею именуемыя "Трубчевская" знамения дивныя в земли Скановы сотворша и верныя люди Своя от пагубы и смерти сохраниша. Темже за премногую любовь Твою к нам, благочестно икону Твою почитаем и со умиленным сердцем, радующеся благодатному заступлению благодарственную песнь воспеваем Тебе сице:
Радуйся, в бедах и напастех нас не оставившая.
Радуйся, на смиренныя люди призревшая.
Радуйся, во благочестии и чистоте обитель сохранившая.
Радуйся, Сканову пустынь возлюбившая и образ Свой честный явившая.
Радуйся, маловерныя в истине божественней утвердившая.
Радуйся, всех в чистоте и целомудрии живущих зело возлюбившая.
Радуйся, души наша от врагов невидимых избавляющая.
Радуйся, иночествующим несумненною надеждою благ вечных скудость благ временных восполняющая.
Радуйся, Всемилостивая Владычице, от гнева Божия нас избавляющая.

Кондак 10
Спасения усердно ищуще, к Тебе прибегаем, Заступнице Преблагая, ныне обстояще икону Твою чудотворную с любовию воспоминаем вся милости Твоя и щедроты, обители и граду нашему явленныя. Разумеваем Божественную любовь Твою и непрестанное о мире пред престолом Господним ходатайство, да паки никтоже от Тебе неутешен отыде. Вемы, о, Предивная Мати, яко Тебе дадеся благодать всемирнаго заступления пред Владыкою всех, Егоже воинства Небесныя славят и мы, земнороднии, поклоняемся, поюще Ему: Аллилуиа.

Икос 10
Стена еси крепкая девам и ликом иноческим присное ограждение от бед и зол, Богоневестная Дево, яко являеши помощь скорую от Твоея иконы всем с любовию чтущим ю во обители. Сего ради и мы, осеняемии Твоим, Богомати, заступлением, на Твой взирающе пречистый образ, усердно молим: очисти наша сердца от всякия скверны и украси души наша целомудрием и чистотою, да невредими пребудем от всех икушений мира, плоти и диавола, да сподобимся благодарне воспевати Тебе, Преблагословенней Матери Божией:
Радуйся, обители Скановой стено нерушимая.
Радуйся, Взбранная Воеводо непобедимая.
Радуйся, дев богомудрых величание.
Радуйся, иночествующих присное радование.
Радуйся, хладность душевную благодатно согревающая.
Радуйся, сердечное окаменение умягчающая.
Радуйся, зной страстей наших прохлаждающая.
Радуйся, изнемогающих силою свыше укрепляющая.
Радуйся, Всемилостивая Владычице, от гнева Божия нас избавляющая.

Кондак 11
Пение хвалебно благодарственное всеумиленно приносит Тебе, Всепетая Мати, вся земля Сканова, благоговейно поклоняясь и почитая образ Твой за дивное избавление верных людей града Наровчата от смертоносныя язвы. Величаем и мы, недостойнии, Тя, лобзая икону Твою, Всемилостивая Избавительнице наша, и молим прилежно: приими веру и усердие наше, яко жертву благоприятну, приносимую Тебе с сердцем сокрушенным от недостойных раб Твоих, вопиющих Богу: Аллилуиа.

Икос 11
Светоносная лампада, елеем милости к роду человеческому преисполненная, явилася еси в Церкви Христовой, Госпоже Богородице, даровав обители Скановой изображение честныя иконы Твоея, да вси, видящи являемую Тобою к нам милость, со слезами молятся: помози, Преблагая, наполни сосуды душ наших благими делами, паче же милосердием и смирением, да радостно вопием Ти сице:
Радуйся, икону Твою во обители чудесы многими прославившая.
Радуйся, Покровительнице наша, многократы от бед и напастей люди Твоя избавившая.
Радуйся, оскудение душ наших елеем милости восполняющая.
Радуйся, недостойныя молитвы наша приемлющая.
Радуйся, любити мир и яже в мире нам воспрещающая.
Радуйся, на кийждо день, аки уже на последний жития нашего взирати нас научающая.
Радуйся, очесем нашим страшный час смертный представляющая.
Радуйся, беззакония наша слезами покаяния омывати на кийждо день вразумляющая.
Радуйся, Всемилостивая Владычице, от гнева Божия нас избавляющая.

Кондак 12
Благодатную помощь многократы являла еси, Владычице Богородице, чрез чудотворный образ Твой, егда вскоре людем земли нашей смерть предстояла еси. Тако и нас, недостойных, просящих милости Твоея, не лиши покрова, но защити и избави от сетей вражиих и греховныя смерти. Умоли, Всеблагая, Господа, да спасет ны имиже весть судьбами, да не погибнем в нераскаянии грехопадений наших, и приими нас в вечныя кровы, да радующеся поем Богу, Тобою нас спасающему: Аллилуиа.

Икос 12
Поюще чудеса, от иконы Твоея совершаемые, Мати Христа Бога нашего, припадаем Ти и молим Ти ся пред образом Твоим чудотворным, не отврати пречистаго лика Твоего от обители нашея и от всех верных рабов Твоих. Буди, Владычице, нам защищение в день кончины нашея, егда имамы предстати на Судище Страшнем пред Господем и Сыном Твоим. Спаси, Госпоже Богородице, от вечнаго осуждения и мучения адскаго, да со умилением и трепетом душевным воспоем Ти таковая:
Радуйся, праведный гнев Божий от рода православнаго отвращающая.
Радуйся, славящих Тя на мытарствах воздушных заступающая.
Радуйся, Сына Своего и Бога нашего за нас, грешных, умоляющая.
Радуйся, ублажающим Тя, кончину христианскую подающая.
Радуйся, с приражениями страстей плотских в борьбе тяжкой нам вскоре помогающая.
Радуйся, обителей иноческих Блюстительнице неусыпающая.
Радуйся, сосуды смертныя, на нас уготованныя, сокрушающая.
Радуйся, ходатайством Твоим честным от всякия нас скорби изымающая.
Радуйся, Всемилостивая Владычице, от гнева Божия нас избавляющая.

Кондак 13
О, Премилосердая Заступнице рода христианскаго, честнейшая Херувим и славнейшая без сравнения Серафим, Дево Богородице!
Приими милостивно молебное пение с верою и благоговением Тебе возносимое пред чудотворным Твоим образом. Защити от врагов видимых и невидимых, сохрани от искушений и грехопадений, и грядущаго праведнаго гнева Божия за лютыя беззакония наша милостию Твоею избави, умоли Господа славы избавити нас вечнаго мучения и смерти, да спасеннии Тобою, с лики ангельскими воспеваем Богу: Аллилуиа.
Этот Кондак читается трижды, затем 1-й Икос и 1-й Кондак.

Молитва
О, Пречистая Госпоже, мира Заступнице, Матерь Всепетая! Воззри милостивно на предстоящия со страхом люди Твоя, верою и любовию припадающих пред чудотворною иконою Твоею. Вонми многоболезненному воздыханию душ наших, призри с высоты святыя Твоея на нас. Се бо грехми погружаемии и скорбми обуреваемии, взирающе на образ Твой честный, яко живей Ти сущей с нами, смиренныя моления из глубины верующих сердец приносим Тебе, Владычице. Молим Тя коленопреклоненно: не отврати лица Твоего от прибегающих к Тебе, буди Ходатаице и Покровительнице за нас, грешных, пред Богом и гнев Его праведный за беззакония наша движимый на ны, скоро умягчи и отврати. Якоже некогда помиловала еси прибегавших к покрову Твоему людей земли Скановой и избавила еси их от смертоносныя язвы. Тако и нас всех, с верою молящихся Тебе, избави от падений греховных, от навета злых человек, от соблазнов мира и искушений, скорбей и бед, и от внезапныя смерти. Вразуми и научи ходити без порока по пути земнаго сего жития, вложи в сердца наша дух страха Божия, дух благочестия, дух кротости, смирения, терпения, непамятозлобия, умягчи злая сердца наша, ниспосли ревность о душах наших и о спасении блажних. Даруй всем нам, молящимся Тебе христианскую кончину жития нашего и добрый ответ на Страшнем Судище Христове. Вручаем бо живот свой Твоему покрову и промышлению, да радостно, всегда поем Тебе со всеми святыми: Радуйся, Благодатная, Радуйся, Обрадованная, Радуйся, Преблагословенная, Радуйся Препрославленная во веки. Аминь.

Кондак , глас 8
Веселится днесь обитель Сканова / и ликует множество верных / видяще Владычице чудотворную икону Твою / и с верою приемлюще от нея врачество безмездное. / Темже убо прилежно Тя Благая Мати просим / помилуй смиренныя рабы Твоя / и избави от всякия беды и печали / да во умилении зовем ти: /
Радуйся, Милостивая Заступнице рода христианскаго.

Тропарь, глас 4
Всемилостивая Владычице, / усердная пред Богом Предстательнице, / в земли Скановой явилася еси / и избавила люди тоя от смертоносныя пагубы. / Тако и нас с любовию Тебе поющих / защити от враг видимых и невидимых. / Буди нам благая Утешительнице / и до конца живота нашего милосердная Заступнице / и спаси души наша.

Кондак, глас 8
Веселится днесь обитель Сканова / и ликует множество верных / видяще Владычице чудотворную икону Твою / и с верою приемлюще от нея врачество безмездное. / Темже убо прилежно Тя Благая Мати просим / помилуй смиренныя рабы Твоя / и избави от всякия беды и печали / да во умилении зовем ти: /
Радуйся, Милостивая Заступнице рода христианскаго.

Величание
Величаем Тя, Пресвятая Дево, и чтем Образ Твой Святый, имже избавихомся от смертоносныя пагубы.

Акафист составлен протодиаконом Александром Горшенёвым (г. Пенза)