Акафист Пресвятей Владычице нашей Богородице, явления ради чудныя Ея иконы в веси Турковицтей 

ТРОПАРЬ, глас 1:
О Вселюбящая Мати наша! Ты Икону Твою в сиянии чудном православным предкам нашим, в веси Турковицстей явила еси, и слезы над нами грешными, из Пречистаго лика Твоего горце источила еси. Озари ожесточенная сердца наша сиянием любве, да, проливая слезы покаяния, достойни будем Царствия Небеснаго.

КОНДАК, глас 3:
Под покровом Богоматере Церковь Православная празднует Ризы Богородичныя Положение, и пречуднаго Ея образа явление, и радостно вопиет: Се бо Мати наша с нами есть!

ВЕЛИЧАНИЕ
Величаем Тя, Пресвятая Дево, и чтим образ Твой святый, его же в сиянии чудном православным предкам нашим на утешение даровала еси.

КОНДАК 1
Избранней от всех родов Заступнице рода христианскаго, покровом Своея благости покрывающей православных страны нашея, благодарственная пения приносим Ти, Владычице, о явлении нам чудныя Иконы Твоея в веси Турковицстей. Ты же яко Всемилостивая Заступнице всех с верою к Тебе притекающих, от всяких нас бед свободи, да зовем Ти: Радуйся, Мати Божия, православных страны нашея Похвало, Покрове и Утверждение.

ИКОС 1
Ангел предстатель с небесе послан бысть на место чуднаго сияния, идеже стояше Икона Твоя, яже в Ченстохове граде, рещи о милосердии Пречистыя к избранному Твоему народу русскому. Собраннии же людие ужасахуся и воспеша к Богородице таковая: 
Радуйся, Еюже радость возсияет: радуйся, Еюже клятва исчезнет. 
Радуйся, падшаго Адама воззвание: радуйся, слез Евиных избавление. 
Радуйся, высото, неудобовосходимая человеческими помыслы: радуйся, глубино, неудобозримая и ангельскима очима. 
Радуйся, яко еси Царево седалище: радуйся, яко носиши Носящаго вся.
Радуйся, звездо, являющая солнце: радуйся, утробо Божественнаго воплощения. 
Радуйся, Еюже обновляется тварь: радуйся, Еюже покланяемся Творцу. Радуйся, Мати Божия, православных страны нашея Похвало, Покрове и Утверждение.

КОНДАК 2
Видеша людие божественное сияние являемое, начаша прославляти Бога и Пречистую Матерь Его, в день и нощь немолчными усты, и вопияху: Аллилуиа!

ИКОС 2
Разум недоразумевает, зря величие Твое, Богородице, како проявляеши велию силу и любовь Твою к нам грешным. Мы же, прославляя велия знамения Твоя, зовем сице:
Радуйся, совета неизреченнаго таиннице: радуйся, молчания просящих веро.
Радуйся, чудес Христовых начало: радуйся, велений Его главизно.
Радуйся, лествице небесная, Еюже сниде Бог: радуйся, мосте, преводяй сущих от земли на небо.
Радуйся, Ангелов многословущее чудо: радуйся, бесов многоплачевное поражение.
Радуйся, свет неизреченно родившая: радуйся, еже како ни единаго же научившая. 
Радуйся, премудрых превосходящая разум: радуйся, верных озаряющая смыслы. 
Радуйся, Мати Божия, православных страны нашея Похвало, Покрове и Утверждение.

КОНДАК 3
Сила Вышняго и благодать Преблагословенныя осени место, Тобою избранное, идеже людие восхотеша соорудити церковь. Тамо же бысть непрестанное сияние, нощию же появишася цветы белыя, указующия величину храма Божия. Заутра же собраннии воспеша: Аллилуиа!

ИКОС З
Имущи помощь Преблагословенныя, благовернии людие, сопровождаемии силою свыше, неутомимо сооружаша храм Пресвятыя Богородицы. Егда вся совершиша, явися пречудная Икона Твоя, Владычице. Тогда вси людие возрадовахуся и немолчными песньми вопияше к Богородице таковая: 
Радуйся, отрасли неувядаемыя розго: радуйся, плода безсмертнаго стяжание.
Радуйся, делателя делающая человеколюбца: радуйся, садителя жизни нашея рождшая.
Радуйся, ниво, растящая гобзование щедрот: радуйся, трапезо, носящая обилие очищений. 
Радуйся, яко рай пищный процветаеши: радуйся, яко пристанище душам готовиши. 
Радуйся, приятное молитвы кадило: радуйся, всего мира очищение. 
Радуйся, Божие к смертным благоволение: радуйся, смертных к Богу дерзновение. 
Радуйся, Мати Божия, православных страны нашея Похвало, Покрове и Утверждение.

КОНДАК 4
Бурю разгоняя неверия многими чудесы Твоими, Пречистая, яко по молитве пред Иконою Твоею и причащении воды от источника старие и младии, богатии и убозии, православнии и иновернии здравие получаша, хромии же, яко юноши скачуще, вопияху: Аллилуиа!

ИКОС 4
Слышаша от людей, воспевающих предивная, боголюбивыя матери моляху Тебе о спасении чад своих. Ты же, приклоняясь к мольбам их, подаеши просимое, да зовут Ти сице:
Радуйся, Агнца и Пастыря Мати: радуйся, дворе словесных овец. 
Радуйся, невидимых врагов мучение: радуйся, райских дверей отверзение. 
Радуйся, яко небесная срадуются земным: радуйся, яко земная сликовствуют небесным. 
Радуйся, Апостолов немолчная уста: радуйся, страстотерпцев непобедимая дерзосте. 
Радуйся, твердое веры утверждение: радуйся, светлое благодати познание.
Радуйся, Еюже обнажися ад: радуйся, Еюже облекохомся славою.
Радуйся, Мати Божия, православных страны нашея Похвало, Покрове и Утверждение.

КОНДАК 5
Боготечную реку исцелений, неисчерпаемый источник и море благодати видящи, вопием ти, Богородице, яко всякому просящему подаеши исцеление и посылаеши благодать Свою, мы же, достигше просимаго, вопием: Аллилуиа!

ИКОС 5
Видеша иноцы и инокини предивная, у Иконы Твоея бываемая, собрашася и создаху обитель, идеже усты своими и сердцем послужиша Богу и вопияху Благословенней: 
Радуйся, звезды незаходимыя Мати: радуйся, заре таинственнаго дне. 
Радуйся, прелести пещь угасившая: радуйся, Троицы таинники просвещающая. 
Радуйся, мучителя безчеловечнаго изметающая от начальства: радуйся, Господа человеколюбца показавшая Христа.
Радуйся, варварскаго избавляющая служения: радуйся, тимения изымающая дел.
Радуйся, огня поклонение угасившая: радуйся, пламене страстей изменяющая. 
Радуйся, верных наставнице целомудрия: радуйся, всех родов веселие. 
Радуйся, Мати Божия, православных страны нашея Похвало, Покрове и Утверждение.

КОНДАК 6
Проповедницы богоноснии бывше Земли Холмския простии людие, егда стекахуся на праздник Положения Честныя Ризы Богородицы во Влахерне и в день Твоего Покрова, тогда своими усты и чистым сердцем воспеваху Богу: Аллилуиа!

ИКОС 6
Возсия свет божественнаго сияния на месте, в древния лета прославленнаго и при рассвете нашего века, егда народ Земли Холмския устами, исполненными благодати, взывал из глубины простаго сердца: нам в Турковичах, яко на небесе бысть. Земных же пристрастий избавльшеся, вопияху к Богородице таковая:
Радуйся, исправление человеков: радуйся, низпадение бесов.
Радуйся, прелести державу поправшая: радуйся, идольскую лесть обличившая. 
Радуйся, море, потопившее фараона мысленнаго: радуйся, каменю, напоивший жаждущия жизни.
Радуйся, огненный столпе, наставляяй сущия во тьме: радуйся, покрове миру, ширший облака. 
Радуйся, пище, манны преемнице: радуйся, сладости святыя служительнице. 
Радуйся, земле обетования: радуйся, из неяже течет мед и млеко.
Радуйся, Мати Божия, православных страны нашея Похвало, Покрове и Утверждение.

КОНДАК 7
Хотящии узрети лице Твое, Богомати, прибегаху к Иконе Твоей, Пречистая. Ты же, Милостивая, простираеши руку помощи и покров Свой всем к Тебе притекающим и благословляеши всех, с радостию вопиющих Ти: Аллилуиа!

ИКОС 7
Новое и дивное лице Твое показуеши нам, Богородице, с любовию взирая на нас, грешных, десница же Твоя показующи Сына Твоего, Господа и Бога нашего, побуждает нас прославляти Бога и, лобызая десницу Твою, взывати: 
Радуйся, цвете нетления: радуйся, венче воздержания. 
Радуйся, воскресения образ облистающая: радуйся, ангельское житие являющая.
Радуйся, древо светлоплодовитое, от негоже питаются вернии: радуйся, древо благосеннолиственное, имже покрываются мнози. 
Радуйся, во чреве носящая Избавителя плененным: радуйся, рождшая Наставника заблуждшим.
Радуйся, Судии праведнаго умоление: радуйся, многих согрешений прощение.
Радуйся, одеждо нагих дерзновения: радуйся, любы, всякое желание побеждающая. 
Радуйся, Мати Божия, православных страны нашея Похвало, Покрове и Утверждение.

КОНДАК 8
Странное и дивное чудо видим, Богородице, егда иновернии христиане начаша оскверняти место сие святое: храм Твой разориша, источник целебный гноем засыпаху, а веру нашу святую православную своими грешными устами хулиша. Мы же со скорбию велиею вопием Богу: Аллилуиа!

ИКОС 8
Богохульство страшное претерпеша отцы наши, егда нечестивии людие не токмо храм Твой, Владычице, в день Праздника Твоего разориша, но и многия храмы древния земли нашея оскверниша, а гробы предков наших раскопаша и народ православный Руси Холмския хитростию и силою в латинство влекоша, да страданьми многими и слезами безмерными очистившеся, взываше к Богородице:
Радуйся, Бога невместимаго вместилище: радуйся, честнаго таинства двери.
Радуйся, неверных сумнительное слышание: радуйся, верных известная похвало.
Радуйся, колеснице пресвятая Сущаго на херувимех: радуйся, селение преславное Сущаго на серафимех. 
Радуйся, противная в тожде собравшая: радуйся, девство и рождество сочетавшая. 
Радуйся, Еюже разрешися преступление: радуйся, Еюже отверзеся рай. 
Радуйся, ключу царствия Христова: радуйся, надеждо благ вечных.
Радуйся, Мати Божия, православных страны нашея Похвало, Покрове и Утверждение.

КОНДАК 9
Витийствовати всякая уста не могут, созерцая неисповедимая судьбы Божия; недоумеваем бо, како, Владычице, милостию Своею посещаеши нас грешных и единым путем покаяния ведеши избранныя Своя в царство небесное, мы же, таинству дивляшеся, верно вопием: Аллилуиа!

ИКОС 9
Всякое естество ангельское удивися, взирая на нас земных, лишенных за грехи храмов Божиих и обителей святых, не имущих убежища для утешения молитвеннаго. Бысть время, егда земля наша - Червенная Русь, омывшись кровию и слезами верующих, бысть Престолом Божиим, а небеса - покровом. Вси же оставшиися, якоже ангели земнии, прославляху Всемилостиваго Бога и Его Матерь, устами своими взывая: 
Радуйся, премудрости Божия приятелище: радуйся, промышления Его сокровище. 
Радуйся, любомудрыя немудрыя являющая: радуйся, хитрословесныя безсловесныя обличающая. 
Радуйся, яко обуяша лютии взыскателие: радуйся, яко увядоша баснотворцы. 
Радуйся, афинейская плетения растерзающая: радуйся, рыбарския мрежи исполняющая.
Радуйся, из глубины неведения извлачающая: радуйся, многи в разуме просвещающая.
Радуйся, кораблю хотящих спастися: радуйся, пристанище житейских плаваний. 
Радуйся, Мати Божия, православных страны нашея Похвало, Покрове и Утверждение.

КОНДАК 10
Спасти хотя мир и всем в разум истины прийти, яко Добрый Пастырь показуеши скорбный путь Святаго Православия, да отпадшии сродницы и знаемии наши, оставльше заблуждения, неверие и безбожие взывают: Аллилуиа!

ИКОС 10
Стена еси всем с верою к Тебе притекающим, Богородице Дево, ибо по многих летех нечестия услышан бысть вопль и стенание людей Твоих и тогда архиереи и пастыри Церкви нашея обретоша Икону Твою святую, ибо Господь и Пречистая Матерь Его поруганы не бывают, а вси приходящии, лобызающе честную Икону, взывают:
Радуйся, столпе девства: радуйся, дверь спасения.
Радуйся, начальнице мысленнаго наздания: радуйся, подательнице божественныя благости.
Радуйся, Ты бо обновила еси зачатыя студно: радуйся, Ты бо наказала еси окраденныя умом. 
Радуйся, тлителя смыслов упраждняющая: радуйся, Сеятеля чистоты рождшая. 
Радуйся, чертоже безсеменнаго уневещения: радуйся, верных Господеви сочетавшая. 
Радуйся, добрая младопитательнице девам: радуйся, невестокрасительнице душ святых. 
Радуйся, Мати Божия, православных страны нашея Похвало, Покрове и Утверждение.

КОНДАК 11
Пение всякое уст наших побеждается, тщащееся прославить обновленный лик Твой, Богомати; равночисленная бо песка морскаго песни, аще приносим Ти, ничтоже совершаем достойно. Сего ради со смирением зовем: Аллилуиа!

ИКОС 11
Светоприемную свещу, сущим во тьме явльшуюся, зрим принесенную Икону Твою во Обители Яблочинстей, древней. Ты, о Богомати, вжигаеши невещественный огнь, наставляеши к разуму божественному вся, зарею ум просвещающая, званиями же почитаемая сими:
Радуйся, луче умнаго солнца: радуйся, светило незаходимаго света. 
Радуйся, молние, души просвещающая: радуйся, яко гром, враги устрашающая. 
Радуйся, яко многосветлое возсияваеши просвещение: радуйся, яко многотекущую источаеши реку. 
Радуйся, купели живописующая образ: радуйся, греховную отъемлющая скверну. 
Радуйся, бане, омывающая совесть: радуйся, чаше, черплющая радость. 
Радуйся, обоняние Христова благоухания: радуйся, животе тайнаго веселия.
Радуйся, Мати Божия, православных страны нашея Похвало, Покрове и Утверждение.

КОНДАК 12
Благодать дати восхотела еси, Богородице, изливая из Пречистаго Твоего лика горце слезы над нами грешными. Озаряеши бо ожесточенная сердца наша сиянием любве и, раздрав рукописание грех наших, слышиши от всех: Аллилуиа!

ИКОС 12
Поюще покров Твой, Владычице, и хваляще посещение милостию Твоею церкви преподобнаго Онуфрия Великаго, якоже древнии отцы наша, радостно вопием: се бо Мати наша с нами есть! Имамы бо Тя Заступницу необоримую, освящающую нас и научающую, темже благодарно воспеваем Ти сице: 
Радуйся, селение Бога и Слова: радуйся, святая святых большая. 
Радуйся, ковчеже, позлащенный духом: радуйся, сокровище живота неистощимое. 
Радуйся, честный венче царей благочестивых: радуйся, честная похвало иереев благоговейных.
Радуйся, Церкве непоколебимый столпе: радуйся, царствия нерушимая стено.
Радуйся, Еюже воздвижутся победы: радуйся, Еюже низпадают врази. 
Радуйся, тела моего врачевание: радуйся, души моея спасение. 
Радуйся, Мати Божия, православных страны нашея Похвало, Покрове и Утверждение.

КОНДАК 13
О Вселюбящая Мати наша, рождшая всех святых Святейшее Слово! Приими скорбное моление сие наше, возносимое ныне пред преславным образом Твоим. Икона бо Твоя поруганная, яко корабль, носимый бурею треволнений житейских, притекла к тихому пристанищу древния, Богом избранныя обители преподобнаго Аввы Онуфрия. От сего часа на месте сем сугубо прославляется предстательство Твое, о Богомати! Сего ради вопием Ти: обитель сию древнюю, насельников ея и всех людей Твоих от всякия избави напасти и будущия изми муки, со слезами Тебе вопиющих: Аллилуиа!
Сей кондак глаголи трижды. Посем икос 1: Ангел предстатель… и кондак 1: Избранней от всех родов…

МОЛИТВА
О Вселюбящая Мати наша! К Тебе, пред чудным Твоим образом, приносят умиленный глас сердец пастырие и вси людие: старии и младии, вдовы и сироты, богатии и убозии, здравии и болящии, радующиися и печальнии, православнии и иновернии, от всех стран земли нашея собравшеся: Простри, о Крепкая Заступнице мира всего, Твои пречистии руце к Сыну Твоему и Богу, и умоли Его о нас, страдающих за грехи наша. Страждем, о Утешительнице наша: не имамы бо утешения в чадех наших: оскорбляеми и угнетаеми есмы от сынов и дщерей наших, соблазны мира сего возлюбивших и веру во Христа Бога оставивших. Страждем, о Наставнице заблуждших, понеже сродницы и знаемии наши, оставивше веру православную, истинную и спасительную, во ереси многоразличныя и иноверие уклонишася, и враждою ко Святому Православию преисполнени суть. Страждем, о Умягчительнице злых сердец, ибо несть мира во градех и весях наших, и умножися в них ложь, зависть и злоба ко ближнему своему. Страждем, о Подательнице благ земных, ибо тяжци повседневнии труды наши, и не довольни суть к пропитанию нашему. Страждем, о Пристанище наше, ибо лишени есмы за грехи храмов Божиих и обителей святых, и не имамы убежища для утешения молитвеннаго. Страждем, о Покровительнице наша, ибо умножишася враги Господа, хулящии Его в ожесточении нераскаянных сердец, и проклинающии, и гонящии верных Христу Богу. Люте страждем, о Мати Божественныя Любве, и молим Тя: по данной Тебе от Сына Твоего и Бога нашего благодати мир Церкви Православной испроси, посли чадом Ея единомыслие и любовь, умудри пастырей, вразуми и уцеломудри сынов и дщерей наших, настави на путь Святаго Православия отпадших сродников и знаемых наших, взыщи погибающих во тьме неверия, безбожия и богохульства, и умири ожесточение их нераскаянных сердец. Сущим в темницах и изгнании братиям нашим даруй небесную отраду. О усопших, иже не имут сродников, еже молитися о них, Сама буди Молитвенница и Предстательница. В час же грозный смерти, егда душа от тела разлучается, защити от нападения духов злобы, и Святых Тайн причаститися сподоби. На страшном суде Сына Твоего не престай умоляти Его о помиловании нас, и введи нас в Небесныя Обители, идеже радость и блаженство неизреченное и жизнь безконечная. Аминь.
История чудотворной Турковицкой Иконы Божией Матери
На протяжении многих столетий на землях нынешней восточной Польши устами наших предков прославлялось имя Господне и Его Пресвятой Матери, покровительство которой особо ощущает православный народ Холмщины и Подлясья.
Божия Матерь, желая укрепить веру своего народа, в истории прославилась многими чудесами. Особая же любовь Ее к нам проявилась в чудотворных иконах. Всем нам и доныне известна святыня наша - Холмская Чудотворная Икона Божией Матери, Люблинская, Лесненская и другие.
Царица Небесная, предвидя грядущие испытания, накануне тяжелых дней всегда проявляла великое свое попечение. Так было перед татарскими набегами, в период лихолетья Брестской Унии и в нашем столетии накануне Октябрьской революции. Безконечная любовь Божией Матери "к нам грешным" проявилась также и в Ее Чудотворной Иконе, именуемой ТУРКОВИЦКАЯ. Совершившихся чудес перед этой Иконой на протяжении истории перечислить невозможно. Как звезды ночью украшают небо, так и Божия Матерь украсила свою Икону многими чудесами. И как утренняя заря наполняет душу человека радостью и веселием, так и все прибегающие с верою и молитвою и припадающие к Иконе Ея, ощущают тишину, мир и радость духовную, укрепляющую нашу веру в этой и открывающую дверь для будущей жизни.
В XIV веке польский князь Владислав Опольский, увозя из города Белза все драгоценности, увез с собой также величайшую святыню этого города - Икону Божией Матери, по преданию, написанную самим св. Евангелистом Лукою. По пути остановились для отдыха на развалинах старого города Червеня, вблизи которого теперь находится город Томашув Люблинский и неподалеку - деревня Турковичи. После остановки шесть пар коней не могло сдвинуть карету с Иконою, из которой стало происходить сияние. Князь Владислав, несмотря на явное чудо Божией Матери к этому месту, еще более захотел поскорее увезти эту Икону в Ченстохову, где и поныне она почитается польским народом. Сразу после отъезда на месте, где стояла Икона, появилось великое сияние. Местные жители, видя великое чудо, стали возносить свои молитвы и захотели построить здесь церковь. На следующий день утром место это поросло ромашкой, указывая, таким образом, величину дома Божия, а строительство церкви сопровождалось чудесным сиянием, в котором наконец появилась икона Божией Матери, написанная на холсте.
Вначале на этом месте основали мужской монастырь. В 1789 году монастырь закрыл униатский епископ Максимильян Рылло. 5/18 декабря 1902 года был основан женский монастырь, а в 1906 году 2/15 июля на праздник Положения Честныя Ризы Божией Матери во Влахерне - прибыл епископ Люблинский и Холмский Евлогий.
Достойного гостя игумения Афанасия встречала копией чудотворной Иконы, обложенной серебряной, позолоченной ризой - тоже особо почитаемой верующим народом. В начале I мировой войны весь монастырь с чудотворной Иконой эвакуировали в Москву. В 1919 году монастырские постройки были переданы властями католическим монахиням. Десять лет спустя одну из церквей разобрали. С этого времени усилилось притеснение православных жителей. 2/15 июля 1937 года, сразу после праздника, с помощью полиции наемники разобрали главную церковь. Весной же 1945 года всех православных жителей вывезли на Украину.
На этом святом месте в 1950 году основали сельскохозяйственную школу. В начале восьмидесятых годов оставшаяся, обезчещенная молодежью часовня, руками Блаженнейшего Предстоятеля нашей Церкви - Митрополита Василия - обрела чудесным образом сохранившуюся копию чудотворной Иконы Божией Матери.
После реставрации икона вернулась в день Праздника 2/15 июля 1982 года в приходскую церковь в Томашове Люблинском, а в 1990 г., по благословению Преосвященнейшего Епископа Люблинского и Холмского Авеля, Икону перевезли в Яблочинскую Свято-Онуфриевскую Обитель, где в первое воскресенье после 2/15 июля вновь прославляется эта Икона.
Турковичи, как живое место, перестали существовать. Но у верующего православного народа память об этом месте и вера сохранились. Они живут в народе и жить будут во веки веков.