Акафист Валаамской иконе Божией Матери Акафист Валаамской иконе Божией Матери

Кондак 1 – Глас 8
Приидите, вернии, Богородицу Чистую любовию прославим, яко радугу прекрасную между небом и землею мир Христов всем возвещающую, и Землю Русскую светлым облаком покрывающую. Осеняет бо и хранит и северный Свой удел, Гору Святую Валаамскую, Лика Своего зарею монашеския соборы на подвиг крестный укрепляющи, присно поющия Ей:
Радуйся, Марие Дево чистая, обители Твоей светлый покрове.

Икос 1
Ангели на небеси немолчно воспевают тайну любве Твоея, Владычице (сие глаголи трижды, и лик сладкопесненно да припевает трижды сице: «Богородице, Дево, упование христианом, покрый, соблюди и спаси на Тя уповающих»), и нас на земли сподоби чистым сердцем узрети Свет сострадания Твоего, Мати, души присно наставляющий ко Спасу Всемилостивому, яко да исполнившеся вдохновения нетленнаго зовем Ти таковая:
Радуйся, Еюже Бог вочеловечися,
Радуйся, Еюже Адам обожися.
Радуйся, лучы Голгофския славы облиставаемая луно.
Радуйся, Плача Гефсиманскаго неприступная глубино,
Радуйся, Покрове многосветлый, покрываяй всю Землю,
Радуйся, Источниче многотекущй, напояяй всяку душу.
Радуйся, яко возсияваеши новую надежду.
Радуйся, яко точиши сладость живоносную.
Радуйся, благоволения Божия прекрасное знамение,
Радуйся, Духа Святаго предивный храме,
Радуйся, Еюже Земля Русская благолепием украшается,
Радуйся, Еюже сынове Ея на высоту богоразумия возвышаются.
Радуйся, Марие Дево чистая, обители Твоей светлый покрове.

Кондак 2
Видящи Пречистая Дом Свой Святый, Землю Русскую поруганную и грехми и скорбьми многими терзаемую плакашеся горце, обаче безчисленными Образы Лика Своего Богомагерняго, яко цвети сельнии благоуханными, утешаше люди Своя да возрадуются сердца сокрушенная воспети Христу: Аллилуия!

Икос 2
Явила еси нам Образ Твой Валаамский, Пречистая, яко купину огнем любве Божия неопальне горящую, и хладная сердца наша согревающую, темже к Свету Сладчайшему Лика Твоего от нощи утренююще, умильно поем Ти сице:
Радуйся, Земли Русския кротчайшая тишино,
Радуйся, святых обителей Ея многоименная похвало,
Радуйся, чудес всечудное слышание,
Радуйся, песней всех прекрасное венчание.
Радуйся, совершенныя Жертвы Голгофская высото.
Радуйся, печали любве крестныя всеобъемлющая широто,
Радуйся, яко предваряеши тепле Тя призывающия,
Радуйся, яко покрываеши верно Тя воспеваюшия,
Радуйся, скорбей мира вместилище пространное,
Радуйся, обидимых всех непостыдное прибежище,
Радуйся, клятвы законныя разрешение.
Радуйся, радости небесныя излияние,
Радуйся, Марие Дево чистая, обители Твоей светлый покрове.

Кондак 3
Силу небесную и душам спасение и всякаго сокрушения исцеление всегда подает, Богородице, Твой Образ всемилостивый, темже к живым водам благодати Твоея, яко елени присно жаждуще, во дни и в нощи стояще во дворех Бога нашего взываем: Аллилуия!

Икос 3
Како не дивимся любви Твоей, Мати, яко Ты небесе и земли сущи Царица, со слезами умоляеши о заблуждших и погибших, даруй и нам сердце всемилующее, заповедию Божиею разширенное, и плачем очищенное да сподобимся Духом и Истиною жительствовати, во умилении сице Тя ублажающе:
Радуйся, светозарное селение крестныя славы.
Радуйся, даре слез милости неизреченный,
Радуйся, еже от века таинства явление.
Радуйся, растлевшаго естества нашего обновление.
Радуйся, немолчная песне неба и земли.
Радуйся, падение и сокрушение всякия напасти,
Радуйся, яко приносиши жертву спасения.
Радуйся, яко даруеши богатство прощения,
Радуйся, верныя люди российския от бед изьимающая.
Радуйся, полки вражия Образом Твоим отвращающая,
Радуйся, струе божественнаго милосердия,
Радуйся, чаше безсмертнаго упоения.
Радуйся, Марие Дево чистая, обители Твоей светлый покрове.

Кондак 4
Горяще к Тебе любовию, и мы, людие Твои, Дево, всеношными хвалим Тя пении на горах святых Валаама. Се что добро воистину или что красно, но еже жити нам вкупе, под кровом крилу Твоею в мире почивающе и поюще Христу: Аллилуия!

Икос 4
Странны и непостижимы тайны Твоя, Богородице, на небесех живеши, Присноблаженная, но и весь мир всенежно обьемлющи в плачи неизреченнем, скорбным детем Адамовым радость познания Христова даруеши, темже и Землю Твою Святорусскую от бед многих изнемогающую не престай покрывати Покровом Твоим, Чистая, да зовет Ти таковая:
Радуйся, плавый - голубо-золотистый цвет Покрове всего мира.
Радуйся, детем Земли Мати милосердия,
Радуйся, Духа пречистая мироположнице.
Радуйся, вечнаго упокоения злачный бреже.
Радуйся, горо преславная сению крестною приосененная.
Радуйся, огнезрачная купино состраданием опаляемая,
Радуйся, яко утешаеши люди Твоя матернею любовию,
Радуйся, яко источаеши благость милующую,
Радуйся, свеще благодати, тьму мою озаряющая,
Радуйся, клеще горящаго углия скверну очищающая,
Радуйся, цветниче, облагоухаяй мир нетлением.
Радуйся, непорочныя души облистающая боголепием.
Радуйся, Марие Дево чистая, обители Твоей светлый покрове.

Кондак 5
Дивен красотою Лик Твой, Мати, имже жизнь нашу многотрудную озаряеши, освящаеши же и утешаеши. Коль сладко пети нам имени Твоему пречистому и всеблагоуханному, Марие Дево Чистая, в нощех воздевающе руки наша во Святая и благословяще Господа: Аллилуия!

Икос 5
В нощи мира сего сияеши, Пречистая, яко Свет, егоже тьма не объят. Чем больше любовь - тем больше печаль, сице безмолвно глаголет нам всекроткий Твой Лик, тихости и сострадания безмернаго исполнь, егоже сподоби и нас, жестокосердных да взываем Ти со слезами:
Радуйся, страждущим исцеление,
Радуйся, плачущим радование.
Радуйся, скорбящих благое утешение,
Радуйся, заблуждших скорое воззвание.
Радуйся, цельбо спасительная сокрушенных сердцем,
Радуйся, котвокотво — якорь неколеблемая обуреваемым неверием,
Радуйся, яко возвещается Покров Твой во всю Землю,
Радуйся, яко возсияваеши богосветлую зарю.
Радуйся, стадо твое непрестанно покрывающая.
Радуйся, борительныя враги расточающая.
Радуйся, весненное дыхание, веселящее души.
Радуйся, пение сладчайшее, пленяющее умы
Радуйся, Марие Дево чистая, обители Твоей светлый покрове.

Кондак 6
Избавляеши мир от печали греховныя и радость о Духе Святем совершенную являеши Ликом Твоим пречудным, всех радостей Радосте, Богородице, темже и Обитель Твою о матернем красующуюся Покрове Твоем всегда возвесели и вдохнови, Сергия и Германа преподобных молитвами, тепле к Богу взывати: Аллилуия!

Икос 6
Пресветлую красоту чистоты Твоея и мироспасительную силу смирения Твоего, егоже ради призре на Тя Господь, воспеваем, Благодатная, нищету и нам даруй присно духовную, девственность плоти и духа слезами обновляющи и жертвенное послушание смирением утверждающи, яко да путь заповедей Христовых непорочно и радостно течем, зовуще Ти таковая:
Радуйся, всемирная славо,
Радуйся, догматов церковных главизно,
Радуйся, Еюже исполняемся сладости умиления,
Радуйся, Еюже созерцаем красоту Лица Божия,
Радуйся, бездно бесконечная дивных чудес.
Радуйся, море безбрежное милостивых слез,
Радуйся, реко райская, напоившая жаждущия благодати,
Радуйся, каменю, сокрушивший сопротивныя помыслы.
Радуйся, род человеческий спасающая.
Радуйся, и ныне мир покрывающая.
Радуйся, Еюже избегаем похотныя тли,
Радуйся, Еюже водворяемся в небесныя обители.
Радуйся, Марие Дево чистая, обители Твоей светлый покрове.

Кондак 7
Девственная еси похвала всея твари, Отроковице, и Русская Земля яко в тихих водах отражает богородичную Твою красоту, кроткую и целомудренную, в полях и лесах и реках ея, златоглавых же и белостенных храмех и обителех безчисленных, наипаче же в очесех нищих и блаженных чад ея, и пречистым Покровом Твоим от бед хранима благодарно воспевает она Христу: Аллилуия!

Икос 7
Ныне же яко древле, Дево, не престаеши величия творити Образы Твоими честными, яже рассеяла еси яко лучи божественнаго света по всей бескрайней и печальней Родине нашей в утешение людем Твоим. Темже и Обитель Твоя Валаамская, стяжавши икону Твою яко светлый облак во дни защищающий от зноя страстей, и в нощи греха яко столп огненный, указующий путь в Землю живых, любовью взывает Ти:
Радуйся, удивление бесплотных сил,
Радуйся, тайное ликование небесных светил.
Радуйся, Царице, представшая одесную Царя Христа,
Радуйся, в ризах позлащенных одеяна и преукрашена.
Радуйся, красото пречудная всевожделеннаго девства,
Радуйся, доброто преславная истиннаго благородия,
Радуйся, яко тьму отчаяния озаряет Твой белый Покров,
Радуйся, яко милостивно взыщеши погибающих сынов,
Радуйся, кроткая и тихая светлосте, победившая мрак,
Радуйся, пречистое зерцало, являющее богочеловечный зрак.
Радуйся, дворе святый, идеже вернии кланяются Господеви,
Радуйся, крове тайный, спасаяй от малодушия и от бури.
Радуйся, Марие Дево чистая, обители Твоей светлый покрове.

Кондак 8
Странное чудо видим о Тебе, Богородице, како икона Твоя источает слезы благовонныя, плачет о нас матернее сердце Твое мечем любве крестныя прободенное, плачет о велицей скорби Земли Русския. Омый нас слезами сими от всякия нечистоты и яко миром пречистым помажи раны душ и телес наших да светлым гласом воспоем Христу: Аллилуия!

Икос 8
Вся слава Твоя внутрь, Дшере Царева, сего ради и внутренняго человека соделываеши, светом сокровенным наставляющи всяку душу на гору Преображения. Сподоби и нас на горе Валаамстей узрети славу Господню, да покаянием, послушанием же и плачем всецело преобразимся в непостижимый Образ Сына Твоего, кроткаго и смиреннаго сердцем и в разуме божественнем воспоем Ти сице:
Радуйся, живоноснаго благоухания тайная Розо,
Радуйся, нетленных слез милосердия прекрасная Ризо,
Радуйся, чудное предстательство рабов Твоих,
Радуйся, спасительное руководство чад Твоих,
Радуйся, Покрове неизреченный и заступление нищим.
Радуйся, сило непобедимая и крепосте изнемогающим.
Радуйся, любовию пламенеющая паче ангельских чин.
Радуйся, чистотою светлеющая паче удольных крин.
Радуйся, воды живыя веселое течение.
Радуйся, печали греховныя утоление,
Радуйся, благоутишное пристанище обуреваемым.
Радуйся, красная, прохладная росо обремененным.
Радуйся, Марие Дево чистая, обители Твоей светлый покрове.

Кондак 9
Исполнь Фаворския славы святая Твоя Обитель является мысленне, внегда неизреченно в ней, Дево Богородице, распростираеши Твой всесветлый Покров и милосердно покрываеши Богу вопиющия: Аллилуия!

Икос 9
Валаамскую Обитель Твою, яко избранный Твой удел, чудно прославила еси, Отроковице, явлением пречистаго Образа Твоего, сподоби нас убо во свете Лица Твоего непорочно присно ходити и крепко покрый возлюбенныя люди Твоя, во всем мире, Пренепорочная, на Покров Твой надеющияся и на всяк день зовущия Ти;
Радуйся, ластовице весну Воскресения нам возвещающая,
Радуйся, благовестнице велия радости спасения,
Радуйся, яко ум мой озаряеши Светом Христовым,
Радуйся, яко молитву вперяеши желанием небесным,
Радуйся, Еюже исполняемся обоняния Плоти Христовы,
Радуйся, Еюже наслаждаемся плодом животочныя Лозы
Радуйся, ниво неоранная, растящая Хлеб жизни.
Радуйся, светозарное стеблие, точащее умиления капли.
Радуйся, Еюже источника безсмертнаго вкусим.
Радуйся, Еюже видим, коль благ Господь людем Своим,
Радуйся, бездно сокровенная сострадательныя любве.
Радуйся, небесных тайн молчаливое откровение.
Радуйся, Марие Дево чистая, обители Твоей светлый покрове.

Кондак 10
Покров Твой Святый распростри и ныне, Пресвятая, над Обителию сею, всецело посвященною крестней славе Твоей, и покрый ю всегда матерним милосердием, верно бо взывает Сыну Твоему: Аллилуия!

Икос 10
Скинию Израилеву светлый облак покрываше, древле образуяй славу Твою, Богомати, ныне же Церковь Русскую, кровьми новомучеников и слезами подвижников преиспещрену златозарный Твой Покров осеняет тайно, юже в мире и любви Христовой утверди, всяку ересь и вражду разоряющи и всяко разделение и нестроение утоляющи, да едиными усты и единем сердцем православно величаем Тя:
Радуйся, белый Покрове, утоляяй скорби Земли,
Радуйся, теплый луче надежды в нощи печали,
Радуйся, милости Божия священное проповедание.
Радуйся, пространное, крестообразное объятие,
Радуйся, чрево излиявшее в мир милосердия реки,
Радуйся, радуго испещренная божественными лепотами,
Радуйся, кротость и смирение Христово облистающая,
Радуйся, на взыскание Лица Божия нас вдохновляющая.
Радуйся, чертоже украшенный, воньже желает душа моя.
Радуйся, ковчеже позлащенный, пред нимже ликует она.
Радуйся, Еюже Дух неизглаголанно ходатайтсвует о мире.
Радуйся, Еюже взываем Богу Небесному: «Авва Отче!»
Радуйся, Марие Дево чистая, обители Твоей светлый покрове.

Кондак 11
Пение богодухновенное, Дево, всеблагоговейно припеваем пречистому Образу Твоему и светло проповедуем многая того дарования и благодеяния, яже о нас бывшая. Ты бо еси утешительница наша и со всею тварию о Тебе радующеся, поем Христу, тако благоволившему: Аллилуия!

Икос 11
Тайный еси Ковчег, Богородице, Духом позлащенный и херувимы славы осененный, имаши бо скрижали Новаго Завета и манною Плоти и Крове Христа Бога питаеши нас на всяк день, Чаше спасения. Да не погаснет убо светильник любве нашея от ветров неверия и беззакония, но да исправится молитва наша пред Тобою яко кадило непорочное о многострадальней России нашей и о всем мире возносимое тако:
Радуйся, скорбящих нетленная Радосте,
Радуйся, злостраждущих святая сладосте,
Радуйся, многозвездное небо, возвещающее милосердие Божие,
Радуйся, утро трепещущее Воскресения дне,
Радуйся, Дево, паче всякия красоты прекрасная.
Радуйся, Жено, паче светлостей солнечных светлейшая,
Радуйся, Водо, яко горный ручей светловиднейшая,
Радуйся, в слезных нощех над вселенною бдящая,
Радуйся, крилома Твоея благости Обитель Твою стрегущая,
Радуйся, стезе покаяния, ведущая нас в объятия Отча,
Радуйся, Еюже девственность души паки обретаем,
Радуйся, Еюже боготканным облецемся паки одеянием.
Радуйся, Марие Дево чистая, обители Твоей светлый покрове.

Кондак 12
Благодать и вечное спасение всем щедро дает светозарный Твой Образ, Чистая, изрядно же Обитель сию дивное и благовонное Имя Твое превозносящую покрывает и хранит всегда, Богородице, темже исправи наш путь, утверди наша стопы, да сладчайшим Светом Лика Твоего наставляеми достигнем славы сынов воскресения, поюще Христу благодарно: Аллилуия!

Икос 12
Поюще бесчисленная Твоего Образа чудеса, яже о нас бываемая, Богородице Марие, не умолчим никогда воспевати Тя любовию. Очисти нас убо чистотою Твоею, Дево, просвети нас светлостию Твоею, освяти нас святынею Твоею, возлюби нас, О благая Мати, аще и недостойни есмы небесе и земли, якоже возлюбила еси отцы наша, Сергия великаго, Серафима кроткаго и Силуана сладчайшаго, яко да с ними и мы наследие имамы в неизследимей тайне любве Божия и забудем землю и вся скорби ея, внегда пети Тебе:
Радуйся, сирых Твоих покровительнице,
Радуйся, Обители Твоей хранительнице.
Радуйся, яко близ еси сокрушенных сердцем.
Радуйся, яко имя Твое точит росу исцеления всем,
Радуйся, падших скорое востание,
Радуйся, расслабленных рук укрепление,
Радуйся, добрая в женах, желаний краю,
Радуйся, светозарных цветов словесный раю,
Радуйся, Еюже возгоримся огнем любве Божия,
Радуйся, Еюже текут слезы умиления,
Радуйся, детем Земли матерний Покрове,
Радуйся, всего мироздания девственное сердце.
Радуйся, Марие Дево чистая, обители Твоей светлый покрове.

Кондак 13
О пречистый Образе Матере и Девы, милосердием покрывающия мир, от всякия скорби и печали покрый, сохрани и спаси вся люди Земли Русския, всяк возраст и сословие, младенцы и отроки, нищия же и убогия, болящия, заблудшия и во гресех погибаюшия, всех от конец России богохранимыя во обитель Твою Валаамскую любовию притекающих, и под милость Твою верою прибегающих, яко да избавльшеся Тобою от всякия смерти воспоим Троице Святей победную песнь Жизни вечныя: Аллилуия, Аллилуия, Аллилуия!
Сей Кондак глаголи трижды

Икос 1
Ангели на небеси немолчно воспевают тайну любве Твоея, Владычице, и нас на земли сподоби чистым сердцем узрети Свет сострадания Твоего, Мати, души присно наставляющий ко Спасу Всемилостивому, яко да исполнившеся вдохновения нетленнаго зовем Ти таковая:
Радуйся, Еюже Бог вочеловечися,
Радуйся, Еюже Адам обожися.
Радуйся, лучы Голгофския славы облиставаемая луно.
Радуйся, Плача Гефсиманскаго неприступная глубино ,
Радуйся, Покрове многосветлый, покрываяй всю Землю,
Радуйся, Источниче многотекущй, напаяяй всяку душу.
Радуйся, яко возсияваеши новую надежду.
Радуйся, яко точиши сладость живоносную.
Радуйся, благоволения Божия прекрасное знамение,
Радуйся, Духа Святаго предивный храме,
Радуйся, Еюже Земля Русская благолепием украшается,
Радуйся, Еюже сынове Ея на высоту богоразумия возвышаются.
Радуйся, Марие Дево чистая, обители Твоей светлый покрове.

Кондак 1 – Глас 8
Приидите, вернии, Богородицу Чистую любовию прославим, яко радугу прекрасную между небом и землею мир Христов всем возвещающую, и Землю Русскую светлым облаком покрывающую. Осеняет бо и хранит и северный Свой удел, Гору Святую Валаамскую, Лика Своего зарею монашеския соборы на подвиг крестный укрепляющи, присно поющия Ей:
Радуйся, Марие Дево чистая, обители Твоей светлый покрове.

Молитва
О тихое пристанище заблуждшему стаду Твоему Ты еси, Мати Небесная, Богородице Дево Марие, кое принесем Ти благодарение о всех Твоих предивных благодеяниих? Се бо пречистым Образом Твоим благоизволила еси почивати в недрех смиренныя обители Твоея. О Цвете райский, миром небесным благоухаяй в печальней пустныни жизни нашея, светозарный Покрове всем скорбящим и отчаянным, Ты озаряеши место сие лучами крестныя любве, и собираеши вся слезы и стоны Земли яко многоценный сосуд Христова сострадания. Темже, вечер и заутра и полудне к Тебе притекаем в напастех и скорбех и болезнех, и коленопреклоненно молим Богоматернюю Твою благость; озари нощь печали нашея пречистым и всекротким Ликом Твоим, Владычице, Покровом Твоим покрый, сохрани и украси место сие, служение наше бедствующему народу твоему соблюдающи святым и непорочным пред Лицем Бога Живаго, сердца наша уязви девственною любовию Твоею да забудем Землю и вся, яже на ней. Исполни нас непрестанно творческаго и мученическаго вдохновения на путь крестный и Голгофское восхождение, да зовем Ти даже до последняго нашего издыхания:
Радуйся, всея твари Радосте,
Радуйся, Обители нашей похвало и вечное утверждение. АМИНЬ.

Конец и Богу Слава!
Акафист сей написан бысть схиигуменом Серафимом (Бараделем) на острове Ольхон в Иркутской Епархии, 5, 6, 7 февраля 2008 года.

Взято с http://soulibre.ru