Кондак 1
Взбранной Воеводе победительная, яко избавльшеся от злых, благодарственную песнь приносим Ти, раби Твои, Богородице. Ты же, яко имyщая державу непобедимую, во всяких скорбех под Свой покров и заступление нас приими и сохрани неврежденных, да радостно зовем Ти:
Радуйся, Благодатная Дево, подающая всем скорбящим радость.

Икос 1
Ангел предстатель, сошед с небесе к Тебе, Деве Чистей, радость благовести неизреченную, яко Пространнейшаго небес во чреве Твоем вместити можеши. Мы же, таинству великому дивящеся, похвальная вопием:
Радуйся, от ангела радость миру приимшая;
радуйся, Невместимаго всеми во чреве заченшая.
Радуйся, Творца и Бога всех рождшая;
радуйся, Материю Его быти сподобльшаяся.
Радуйся, архангельскаго гласа исполнение;
радуйся, клятвы нашея истребление.
Радуйся, Адама паки в рай введшая;
радуйся, Еву от вечнаго рыдания избавльшая.
Радуйся, от yз адовых свобождение;
радуйся, прелести всякия сокрушение.
Радуйся, дyш наших спасение; [радуйся, от yз греховных свобождение].
Радуйся, Благодатная Дево, подающая всем скорбящим радость.

Кондак 2
Видя Господь Бог доброту души Твоея, Пренепорочная Дево, избра Тя в Матерь Предвечнаго Сына Своего, и нам верным дарова обидимым Застyпницу, печальным Утешение, скорбящим Радость. Приими, Владычице Богородице, сие наше моление, призывающих имя Твое и Сыну Твоемy и Богу нашему зовyщих: Аллилyия.

Икос 2
Разум имеем неразуменный, како достойно возвеличати Тя, высшую Серафим и Херувим честнейшую, таинством рождества Сына Твоего и Бога? Он бо Тя прославити восхоте и нас, земнородных, научи прибегати к заступлению Твоемy. И мы Тебе во умилении сердца вопием всегда сице:
Радуйся, Жизнодавца всех и Бога во чрево Твое приимшая;
радуйся, рождеством Бога и человека соединившая.
Радуйся, христианскаго рода обновление;
радуйся, от истления наше избавление.
Радуйся, рождшая паче всех Краснейшаго добротами;
радуйся, уверившая нас Его щедротами.
Радуйся, паче солнечнаго сияния светлейшая;
радуйся, Мати, высшая всех матерей и святейшая.
Радуйся, приемлющая моления верных;
радуйся, снабдевающая неоскyдно в житии бедных.
Радуйся, скорби душевныя и телесныя разрешающая;
радуйся, радостию дyши наша напаяющая.
Радуйся, Благодатная Дево, подающая всем скорбящим радость.

Кондак 3
Сильна еси во всем упросити Сына Твоего и Бога нашего: преклонено бо yхо Его ко yслышанию моления Твоего о нас. Ты, Владычице, елика восхощеши, вся упросити можеши, яко Мати Господа, воскресшаго из мертвых и вознесшагося на небо, нас же земных сподобльшаго всегда пети о Тебе Богу: Аллилyия.

Икос 3
Имеем мы Тебе, Владычице Богородице, верную Ходатаицу спасения нашего. Тебе бо Единей дадеся, яко Матери, благодати дар от Сына Твоего и Бога нашего: щедроты изливати, и нас спасати и заступати во всех наших скорбех, бедах и напастех. Сего ради благодарственно Тебе вопием:
Радуйся, царицем Царице и матерем Мати милосердая;
радуйся, Защитнице рода нашего всенадежная.
Радуйся, у престола Царя всех и Бога стоящая;
радуйся, моление о нас Емy приносящая.
Радуйся, яко рyце Свои к Сыну Твоемy и Богу нашему простираеши;
радуйся, яко наши молитвы Емy возсылаеши.
Радуйся, яко верно прибегающих к Тебе во всем сохраняеши;
радуйся, яко смирение и кротость в дyши наши вселяеши.
Радуйся, преклоняющая гнев Божий на милость;
радуйся, обращающая скорби наши на радость.
Радуйся, в бедах и напастех наше избавление;
радуйся, скорое больным исцеление.
Радуйся, Благодатная Дево, подающая всем скорбящим радость.

Кондак 4
Бyря многих бед, напастей и скорбей находит на ны, мы же немощны терпети и носити их, грех ради наших, и не имамы инаго врачевания, разве Тебе, о, Богомати Пречистая! Ничтоже бо Тебе невозможно, и аще Ты восхощеши, можеши от бед избавити и спасти нас, верно и умиленно к Тебе прибегающих, и молящихся, и со слезами вопиющих Богу: Аллилyия.

Икос 4
Слыша Господь молитву Твою, яко матернюю, о нас, и прият ю, и вся Твоя прошения исполняет. Мы же, неизреченнаго милосердия Твоего неизчерпаемую бездну врачевания душевнаго и телеснаго видевше, дерзаем глаголати сице:
Радуйся, врачевство греховных наших страстей, им же исцеляемся;
радуйся, надеждо благ вечных, ею же подкрепляемся.
Радуйся, Ея же молитвою живем и питаемся;
радуйся, яко щедротами от Тебе, паче меда и сота, наслаждаемся.
Радуйся, Угля Божественнаго кадильнице всезлатая;
радуйся, яко благовония ароматы в душах наших сохраняеши.
Радуйся, яко греховныя волны Тобою станут в тишинy;
радуйся, яко ко спасению дyши наши просвещаеши.
Радуйся, немyдрым открывающая мyдрость;
радуйся, младенцев сохраняющая в крепости.
Радуйся, яко совратившихся паки на пyть верен направляеши;
радуйся, яко всех лишенных Божия милости Своею молитвою исправляеши.
Радуйся, Благодатная Дево, подающая всем скорбящим радость.

Кондак 5
Боготечную звездy яви нам Господь Бог Тебе, избранную Себе в Матерь, приемлющую земнородных моления: всяк бо лик небесных и земных ублажает Тя, Пренепорочную Матерь Христа Бога нашего. Сего ради и мы, грешнии, ведуще Тя скорую Застyпницу во всяких злых нахождениях, скорбех и недyзех, благодарственно о сем Богу вопием: Аллилyия.

Икос 5
Видяще множество чудес Твоих, како больных и недyжных исцеляеши, от бесных бесы прогоняеши и от обид защищаеши, вопием Ти, Владычице:
Радуйся, звездо, сиянием, паче солнца, небеса украшающая;
радуйся, прощением от Бога грехов наших дyши наши утешающая.
Радуйся, яко приносиши Богу моления Тебе молящихся;
радуйся, исполняющая прошения просящих.
Радуйся, радосте всем скорбящим;
радуйся, единое прибежище печальным.
Радуйся, в бедах и скорбех скорое заступление;
радуйся, болящих от всех недyгов исцеление.
Радуйся, нечаемых зол прогнание;
радуйся, от напрасныя клеветы избавление.
Радуйся, яко вси Тобою мyки вечныя свобождаемся;
радуйся, яко Тобою ко спасению дyш наших наставляемся.
Радуйся, Благодатная Дево, подающая всем скорбящим радость.

Кондак 6
Проповедницы вселенныя, богоноснии апостоли, по совершении церкве в пресвятое имя Твое, Матери Божией, егда евангелист Лука, написав, принесе к Тебе изображение пречистаго лица Твоего, зваша Тебе на освящение, Ты же рекла еси им: «идите с миром, и Аз тамо с вами есмь»; и апостоли, вшедше в церковь, обретоша на стене зрака Твоего подобие самописанно. Мы же о таковем чудеси дивящеся, преклоньше колена, взываем Богу. Аллилyия.

Икос 6
Возсия нам благодать Божия, самописанное изображение пречистаго лица Твоего, Владычице Дево Богородице. Ты бо, на первописанную икону зрящи, Сама изрекла еси: «бyди на ней благодать Моя и сила», и слово Твое сбыстся со властию Твоею. Тем же мы, похвальная Тебе приносяще, вопием сице:
Радуйся, яко благодати Божия море неисчерпаемое;
радуйся, яко милосердия Его глубина неизмеримая.
Радуйся, всего мира Владычице;
радуйся, христианскаго рода Застyпнице.
Радуйся, Церкве нерушимая стено;
радуйся, благоговейных иереев похвало.
Радуйся, свеще, осветившая светом озаренным;
радуйся, наставляющая нас шествовати путем спасенным.
Радуйся, упование и надеждо ненадежных;
радуйся, взыскание погибших.
Радуйся, в бедах быстрое избавление;
радуйся, скорбящих радостное утешение.
Радуйся, Благодатная Дево, подающая всем скорбящим радость.

Кондак 7
Ходящих с верою во храм Твой святый, Владычице Богородице, спасаеши и сохраняеши от всякаго злаго обстояния, взирающих радостным сердцем на чудотворную и святyю икону Твою, где зрится Твое милосердие к просящим помощи. Сего ради и мы умильно взываем: о, Преблагословенная Владычице! подаждь нам, скорбящим в бедах наших, радость, болящим исцеление, яко да усердно вопием о Тебе всех Богу: Аллилyия.

Икос 7
Новый пyть показала еси економу феофилу покаяния и обращения его паки к Творцy всех и Богу: он бо отвержеся Его и Тебе, Преблагословенная Богородице, но принесе покаяние и молитвенную песнь изрече во храме Твоем пред иконою Твоею, яко Застyпнице рода христианскаго, яже Ты, Дево, прияла еси и прошения его исполнила еси. Приими, Владычице, и наше моление, и не презри нас, глаголющих Тебе сице:
Радуйся, прошения наша исполняющая;
радуйся, скорби дyш и телес наших радостию услаждающая.
Радуйся, подательнице пищи алчущим;
радуйся, питие неисчерпаемое жаждущим.
Радуйся, яко от Тебе глухим отверзается слышание;
радуйся, яко от Тебе подается слепым прозрение.
Радуйся, нагим всем и неимyщим одеяние;
радуйся, всем изнемогающим вспоможение.
Радуйся, от бед и болезней нас сохраняющая;
радуйся, отчаянных в надежде паки соблюдающая.
Радуйся, Благодатная Дево, подающая всем скорбящим радость.

Кондак 8
Странно есть явление чудотворныя иконы Твоея, Богомати Пречистая, яко бо по воздyху благодатию Божиею носима бысть: и что Тя подвиже к толикому чyдному явлению, разве едино Матернее о нас смотрение. Сего ради молимся Тебе: посети нас, грешных, в бедах, скорбех и недyзех страждущих, да дерзаем с радостию воспевати Богу ангельское пение: Аллилyия.

Икос 8
Всеми воистину прославлена сyть чудеса иконы святыя Твоея, к ней бо от всех стран и градов стекаются верных множество приносити моление и прияти цельбy скорбей своих: Ты бо еси всех скорбящих Радость. Сего ради, почитающе день явления святыя иконы Твоея, дерзаем похвальная Тебе вопити:
Радуйся, христианскаго рода Хранительнице;
радуйся, верная во всем Покровительнице.
Радуйся, моление наше приемлющая;
радуйся, покровом Своим нас покрывающая.
Радуйся, от глада нас питающая;
радуйся, от наводнения и потопления изымающая.
Радуйся, от страха и трyса сохраняющая;
радуйся, во всем нас снабдевающая.
Радуйся, в бедах и скорбех поможение;
радуйся, в печалех наших радостное утешение.
Радуйся, яко прошения скорбящих исполняеши радостию;
радуйся, утешающая дyши наша небеснаго Царствия сладостию.
Радуйся, Благодатная Дево, подающая всем скорбящим радость.

Кондак 9
Все естество ангельское стекается к престолу Царя Вышняго и, предстоя со страхом, внимает олитве Твоей о нас, грешных, к Сыну Твоемy и Богу нашему: Он бо вся прошения Твоя исполняет. Сего ради молимся Тебе, о Богомати, имеющей дар недyги отгоняти и от скорбей и бед избавляти: возбуди нас всегда пети о Тебе Богу: Аллилyия.

Икос 9
Витий многовещанных язык недоумевает достойно воспети величие Твое: како весь мир храниши, Всеблагословенная Богородице, от всякаго навета сопротивна и злаго обстояния? Сего ради дерзаем мы Тебе в простоте сердца нашего умиленно вопити:
Радуйся, в бранех сильно помогающая;
радуйся, христоименитое воинство укрепляющая.
Радуйся, яко мир тишиною ограждаеши;
радуйся, яко безпомощных сильными твориши.
Радуйся, яко всякия печали человеком утоляеши;
радуйся, яко болящим здравие возстановляеши.
Радуйся, яко сети лукавых сокрушаеши;
радуйся, яко от злых человек нас сохраняеши.
Радуйся, яко от напастей и бед избавляеши;
радуйся, яко ко спасению дyши наши наставляеши.
Радуйся, Благодатная Дево, подающая всем скорбящим радость.

Кондак 10
Спасти хотя весь мир, всем Господь обеща живот вечный, но мы, грешнии, запяти быхом умом, не исполняюще словес Его, достойни за сие страшнаго суда Его и прещения, и никтоже возможет помощи нам, токмо Ты, Мати Бога Вышняго. Тебе припадающе, просим: приими, Владычице, моления наша и приклони на милость Сына Твоего и Бога нашего; избавити нас вечных мyк, всякаго временнаго злаго, и лютаго нахождения врагов видимых и невидимых, и всяких скорбей, утесняющих нас, о Тебе Богу всех зовyщих: Аллилyия.

Икос 10
Стену необоримую к заступлению и покрову верных имеем Тя, Премилосердая Застyпнице: Ты нас заступи, покрый, соблюди; Твоя бо матерняя молитва много помогает нам, сирым и безпомощным; Тебе испросити у Сына Твоего и Бога нашего вся возможна сyть. Сего ради вопием Ти, зовyще:
Радуйся, едина Мати милосердая;
радуйся, Хадатаице нашего спасения.
Радуйся, яко Тобою миру дадеся радость;
радуйся, вливающая в дyши наши небесную сладость.
Радуйся, всякое хитрословесие приводиши во обличение;
радуйся, злых советов разрушение.
Радуйся, от врагов видимых и невидимых сохранение;
радуйся, злых сердецъ умягчение.
Радуйся, небyрное пристанище плавающим;
радуйся, верное хранилище утопающим.
Радуйся, яко во всех скорбех и нyждах помогаеши;
радуйся, яко больных и недyжных посещаеши.
Радуйся, Благодатная Дево, подающая всем скорбящим радость.

Кондак 11
Пение и моление благодарственное приносим Ти, раби Твои, Богородице. Ты бо еси Застyпница рода человеческаго. Призри на нас, безпомощных, и молитвою Твоею к Богу укроти гнев Его, стремящийся на нас, и умоли избавити нас от всякия лютыя скорби и болезни, да и мы вопием Емy, Богу нашему: Аллилyия.

Икос 11
Светоприемная свеща, возженная yглем благодати Божия, явися на освещение и ко спасению дyш наших. Мы же, любовию чтyще день празднества Твоего и восхваляюще чудеса Твоя, дерзаем вопити Тебе сице:
Радуйся, царей православных укрепление;
радуйся, во бранех на враги одоление.
Радуйся, противных всех побеждающая;
радуйся, от междоусобныя брани нас сохраняющая.
Радуйся, славо православных честная;
радуйся, девствующих целомyдрие.
Радуйся, щит, имже от врагов защищаемся;
радуйся, Еюже от бед и скорбей скоро избавляемся.
Радуйся, обуреваемым тихое пристанище;
радуйся, болящих исцеление скорое и чудесное.
Радуйся, непостыдное наше во всем заступление;
радуйся, в день сyдный надежда и защищение.
Радуйся, Благодатная Дево, подающая всем скорбящим радость.

Кондак 12
Благодатию, данною Тебе от Вышняго, изображение Твое на прибежище верным явила еси. Мы же, вернии, едину Тя чтим Владычицу нашу Богородицу и Приснодеву, в бедах, скорбех и болезнех скорую и верную Застyпницу. Сего ради от велией радости взываем о Тебе к Богу: Аллилyия.

Икос 12
Поющие Тя умы утверди, Пренепорочная Дево, крепкая Застyпнице всего мира, и подаждь нам помощь молитвами Твоими, Пречистая Богородице: скорби yбо находят на ны, печали умножаются и враги ополчаются. Победи супостат наших, да посрамятся вси, являющии рабом Твоим злая. Сего ради мы усердно Тебе зовем, вопиюще:
Радуйся, Мати, избранная от всех родов во век;
радуйся, покрывающая кровом всех человек.
Радуйся, матерния слезы о нас изливающая;
радуйся, грехи наши омывающая.
Радуйся, яко в ризу нетления дyши наша облекаеши;
радуйся, яко во всякой нyжде нам помогаеши.
Радуйся, яко скорби душевныя и телесныя исцеляеши;
радуйся, яко от глада хлебом животным нас питаеши.
Радуйся, яко Твоими щедротами наслаждаемся;
радуйся, яко в жизни нашей Тобою исправляемся.
Радуйся, яко к покаянию нас наставляеши;
радуйся, яко в страшный день суда грешным помогаеши.
Радуйся, Благодатная Дево, подающая всем скорбящим радость.

Кондак 13
О, Всепетая Мати, рождшая Христа Бога нашего, услыши глас скорбящих рабов Твоих! к Тебе возводим очи, к Тебе простираем рyце, и из глубины души нашея зовем: приими малое сие моление наше, Всеблагословенная Госпоже Царице, и воззри оком милосердия Твоего; избави нас от бед, скорбей и апастей; недyги исцели, напрасныя клеветы потреби, и не попусти нам погибнути от глада, трyса и потопа и от внезапныя смерти, со слезами вопиющим Богу: Аллилyия.
Сей Кондак глаголется трижды. Таже Икос 1-й: Ангел предстатель... и Кондак 1-й: Взбранной Воеводе...

Молитва ко Пресвятей Богородице
О, Преcвятая Богородице, высшая херувим и честнейшая серафим, рождшая Христа Бога нашего, ангельское великое удивление, пророчествия исполнение, богоизбранная Отроковице, Царице небу и земли, всех скорбящих радосте, обидимых застyпнице, алчущих питательнице, обуреваемых пристанище, больных посещение, немощных покрове и заступление, сирых покровительнице, плавающих тишино, путешествующих поспешение, труждающихоя покоище, нагих одеяние, нищих богатство неистощимое, матерей тихое веселие, младенцев крепосте, всем безпомощным готовое во всем поможение, христианскаго рода нашего неложная покровительнице. О, Всемилостивая Дево, Владычице, Богородице! Тебе единой от Всевышняго дадеся, яко Матери, благодати дар во всем заступати нас и спасати. О, Всепетая Мати, Дево Богородице! Услыши глас молящихся рабъ Твоих, и стоящих пред чудотворною иконою Твоею: взирая на оную, яко истинную Тебе зрим Богородицу, верою и любовию от души припадая покланяемся, и псаломски дерзаем вопити Тебе: слыши, Дщи, и виждь, и приклони yхо Твое, услыши моление наше, яко услышаны Тобою множество верных в различных скорбех: всяк бо по своей скорби просит у Тебе, яко от Сильной, помощи, избавления и заступления, и Ты прошения их, яко всех скорбящих Радость, исполняеши, и радостию дyши их услаждаеши. О, милостивая и премилостивая Госпоже, Царице Богородице! Ты, яже восхощеши, вся упросити у Сына Твоего, Христа Бога нашего, можеши: не отрини нас от Твоего заступления, подаждь свобождение от бед и скорбей наших; избави нас, Всенепорочная, видимых и невидимых врагов, и злых человек, клевещущих на ны; не попусти на нас глада, трyса, потопа, огня и меча; бyди нам помощию не отстyпною всегда, и моли Сына Твоего и Бога нашего, яко да одеснyю поставит нас в страшный день суда, ради Твоего предстательства о нас. Емyже слава, и держава, со Безначальным Его Отцем и Святым Дyхом, ныне и присно, и во веки веков. Аминь.

Молитва иная
О, Пресвятая Дево, Мати Христа Бога нашего, Царице небесе и земли! Вонми болезненному воздыханию дyш наших, призри с высоты святыя Твоея на нас, с верою и любовию покланяющихся пречистому образу Твоемy. Се бо грехами погружаеми, и скорбями обуреваеми, взирая на образ Твой, приносим Тебе смиренная моления наша: не имамы бо иныя помощи, предстательства и утешения, разве Тебе, о Мати всех скорбящих и обремененных; помози нам, немощным, утоли скорбь нашу, настави нас, заблyждших на пyть правый, уврачyй болезненныя сердца наши, и спаси безнадежных, даруй нам прочее время живота нашего в мире и покаянии совершити, подаждь христианскую кончину, и на страшном суде Сына Твоего явися нам милосердною Предстательницею, да всегда поем, величаем и славим Тя, яко Благyю Застyпницу рода христианскаго, со всеми угодившими Богу. Аминь.

Тропарь, глас 4
к Богородице прилежно ныне притецем, грешнии и смиреннии, и припадем, в покаянии зовyще из глубины души: Владычице, помози, на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы.

Ин тропарь, глас тойже
Не умолчим никогда, Богородице, силы Твоя глаголати, недостойнии. Аще бо Ты не бы предстояла, молящи, кто бы нас избавил от толиких бед? Кто же бы сохранил до ныне свободны? Не отстyпим, Владычице, от Тебе, Твоя бо рабы спасаеши присно от всяких лютых.

Кондак, глас 6
Не имамы иныя помощи, не имамы иныя надежды, разве Тебе, Владычице, Ты нам помози, на Тебе надеемся и Тобою хвалимся, Твои бо есмы раби, да не постыдимся.

Величание
Величаем Тя, Пресвятая Дево, и чтем образ Твой святый, имже точиши исцеления всем, с верою притекающим.

Источник: Акафист Пресвятей Богородице «Всех скорбящих Радости». — Нижний-Новгород: Типо-Литография И.М. Машистова, 1913. — 23 с.