Вместо первого кондака поется тропарь праздника, глас 4:
Днесь благоволения Божия предображение и человеков спасения проповедание, в храме Божии ясно Дева является и Христа всем предвозвещает, Той и мы велегласно возопиим:
Радуйся, смотрения Зиждителева исполнение.

Икос 1
Ангели вхождение Твое, Пречистая Дева, во Святая Святых зряще, удивишася, мы же, земнороднии, радости исполнени, восхваляем Тя:
Радуйся, одушевленная скиния.
Радуйся, сокровище славы Божией.
Радуйся, пророками пронареченная.
Радуйся, Ангелами чтимая.
Радуйся, богоизбранная Отроковице Марие, Владычице наша всеблагая!

Кондак 2
Неизреченных Божественных таин зря в Тебе благодать являемую, вопием смиренно Богу: Аллилуиа!

Икос 2
Слыши, Дево, и приклони ухо твое к песнопениям, с любовию Тебе приносимым:
Радуйся, Святая Святых большая.
Радуйся, кадильнице всезлатая.
Радуйся, свещнице, свет миру явившая.
Радуйся, Богоизбранная Отроковице Марие, Владычице наша всеблагая!

Кондак 3
Сила Всевышняго укрепи Тя, егда праведнии родители Твои Иоаким и Анна приведоша Тя в храм Господень. Ты бо, младенствующая Юннице, взошла, еси ни ким же держима до самого входа и мы, Тобою укрепляемии, вопием Богу: Аллилуиа!

Икос 3
Имуще Тя, яко Всесветлое солнце, радости исполняемся и вопием:
Радуйся, Предстательница наша пред Богом и Сыном Твоим.
Радуйся, благоуханный фимиаме.
Радуйся, печалей наших избавление.
Радуйся, душ наших увеселение.
Радуйся, Богоизбранная Отроковице Марие, Владычице наша всеблагая!

Кондак 4
Благоприятная Богу жертва приносится днесь, великий архиерей Захария руками своими приемлет Ю. Мы же Свещеносицу достойно ублажим, воспевая: Аллилуиа!

Икос 4
Слышаша древнии людие девственнии лицы, псалмы и песньми Деву Отроковицу в храм Господень провождающих, благоговейно вопрошаху: «Что сие радостное происхождение? Кто сия Юнница, аки заря солнечная сияющая?» Мы же на сем пути стекшеся, велегласно вопием:
Радуйся, благодати источниче.
Радуйся, храме и палато Царя и Бога нашего.
Радуйся, входящая во храм, да Сама храмом соделаешися.
Радуйся, чудо всемирное.
Радуйся, Богоизбранная Отроковице Марие, Владычице наша всеблагая!

Кондак 5
Боготечная звездо, нам путь во храм указующая! Ей же мы последствующе, поим Богу: Аллилуиа!

Икос 5
Видяще Тя девы, сверстницы Твои, Дево, радостно во храм текущую, светильницы возжигающе, песньми провождаху Тя, глаголюще:
Радуйся, со Ангелы беседующая.
Радуйся, голубице чистая.
Радуйся, солнца светлейшая.
Радуйся, от всех родов предизбранная.
Радуйся, Богоизбранная Отроковице Марие, Владычице наша всеблагая!

Кондак 6
Проповедник Твоего вхождения, Дево, бысть святый Давид псалмопевец, рече бо: «Приведутся Царю Девы вслед Ея, приведутся искреннии Тебе, приведутся во храм». Зряще сбытие пророчества сего, поем: Аллилуиа!

Икос 6
Воссия днесь, празднолюбцы, светлейшее торжество, да сошедшеся во святем празднике сем, играюще, вопием:
Радуйся, Дева Всепетая.
Радуйся, Ангелы дориносимая.
Радуйся, верными ублажаемая.
Радуйся, яко слава Твоя несказанная.
Радуйся, Богоизбранная Отроковице Марие, Владычице наша всеблагая!

Кондак 7
Хотяще исполнити обещание свое, праотцы святии Иоаким и Анна рекоша к Преблагословенней: «Гряди чадо, в церковь Господню и буди плод благословенный Господу». Мы же торжествуя смотрения Зиждителева исполнение, вопием Богу: Аллилуиа!

Икос 7
Новую показа Господь благодать людем Своим, егда чертог славы Своей яви ясно в храме Господнем Деву Богородицу, да чудо видяще, вси вопием:
Радуйся, Божие к людем благоволение.
Радуйся, Ходатаице нашего спасения.
Радуйся, благочестия утверждение.
Радуйся, послужившая тайне воплощения.
Радуйся, Богоизбранная Отроковице Марие, Владычице наша всеблагая!

Кондак 8
Странное зряще видение, устранимся суетного попечения и ум на Божественная возложим, вопия Богу: Аллилуиа!

Икос 8
Вся горе устремлена бывшая и духом пламеневшая, нас не остави, Дево Всенепорочная, тем же приими пение сие:
Радуйся, Ангелы питаемая.
Радуйся, светом небесным облиставаемая.
Радуйся, благодатию Божиею снабдеваемая.
Радуйся, сиянием невечерним озаряемая.
Радуйся, Богоизбранная Отроковице Марие, Владычице наша всеблагая!

Кондак 9
Всякое естество Ангельское удивися неизреченному Божественному смотрению, како Дева уготовляется служению спасения рода человеческого, мы же вопием: Аллилуиа!

Икос 9
Витии многовещаннии недоумеют, како по достоянию восхвалити всечестный праздник Твой, Дево Богородице, и, дивящеся, вопиют:
Радуйся, Весно радостная, благодатно ум просвещающая.
Радуйся, в прообразех уразумеваемая.
Радуйся, в псалмех и гуслех певаемая.
Радуйся, Луче светозарная.
Радуйся, Богоизбранная Отроковице Марие, Владычице наша всеблагая!

Кондак 10
Спасти хотя мир, Промыслитель Господь устрои Тя, Пречистая, в храм Свой, Богородице, идеже и мы спасение обретающе, вопием: Аллилуиа!

Икос 10
Стена еси Дево, всем к Тебе притекающим:
Радуйся, небес превысшая.
Радуйся, всех радосте.
Радуйся, небесное селение.
Радуйся, сердца умиление.
Радуйся, Богоизбранная Отроковице Марие, Владычице наша всеблагая!

Кондак 11
Пение всякое недостаточно к восхвалению Тя, Дево Богородице, но, любовию побуждаеми, не умолчим пети: Аллилуиа!

Икос 11
Светоносную палату, Солнцем правды освещаемую, зрим Деву Всесвятую и вся приглашаем воспети:
Радуйся, Доме благодати.
Радуйся, Мати Истинныя Жизни.
Радуйся, вся пророчества на Себе исполнившая.
Радуйся, родившая Предвечно рожденного.
Радуйся, Богоизбранная Отроковице Марие, Владычице наша всеблагая!

Кондак 12
Благодать дати восхотев роду человеческому, избра Тя Господь Деву Чистую, да будеши всем в радость вечную, вопиющим Аллилуиа!

Икос 12
Поюще радостно Твое вхождение в храм Божий, Богоизбранная Отроковице Марие, с веселием вопием:
Радуйся, нас защищающая.
Радуйся, любовию вся покрывающая.
Радуйся, верных охраняющая.
Радуйся, к Богу приводящая.
Радуйся, Богоизбранная Отроковице Марие, Владычице наша всеблагая!

Вместо заключительного кондака поется кондак праздника, глас 4:
Пречистый храм Спасов, многоценный чертог и Дева, священное сокровище славы Божия днесь вводится в дом Господень, благодать совводящи, яже в Дусе Божественнем, юже воспевают Ангели Божии: Сия есть селение небесное.

Взято с сайта http://ierokirik.livejournal.com/15718.html

Величание
Величаем Тя, Пресвятая Дево, Богоизбранная Отроковице, и чтем еже в храм Господень вхождение Твое.

Задостойник, глас 4
Ангели, вхождение Всечистыя зряще, удивишася: како со славою вниде во святая святых? Яко одушевленному Божию кивоту, да никакоже коснется рука скверных, устне же верных Богородице немолчно, глас Ангела воспевающе, с радостию да вопиют: истинно вышши всех еси, Дево Чистая.