Акафист Пресвятей Владычице нашей Деве Богородице в честь и память честныя иконы Ея, нарицаемыя «Взыскание погибших»

Кондак 1
Избранней от Бога грешных Заступнице, / благоизволившей взыскати овцы заблуждшия, / мы, недостойнии, соборное пение ныне принесем: / умоли, Богомати, Сына Твоего / неправды наша милосердием покрыти / и расточенныя вкупе собрати, / союзом крепким мира и любве соединивши, / да будет едино стадо и един Пастырь, / вси же благодатию спасеннии, да зовут Ти: //
Радуйся, Благодатная Богородице Дево, Взыскание погибших.

Икос 1
Ангелов Творец в Совете Превечнем Святыя Троицы благоизволил послати Сына Своего на спасение мира смертию Единороднаго, по исполнении же времен послан бысть Архангел благовестити Тебе, Благодатней, о преславнем зачатии Твоем. Ты же рекла еси: «Се, раба Господня, буди ми по глаголу Твоему», и Слово Отчее плоть бысть и вселися в Тя. Темже, обрадованная, востекла еси ко Елисавете, и ею Духом Святым Материю Господа нареченная, песнь Всевышнему принесла еси, и нас научи пети Тя, яко Богородицу и Приснодеву:
Радуйся, Дево, от веков Богоизбранная;
Радуйся, Матерь Божия явльшаяся.
Радуйся, Свободителя мира рождшая;
Радуйся, начало спасения нашего.
Радуйся, благодати живоносный источниче;
Радуйся, пламень молитвы неугасающий.
Радуйся, Храм Бога Живаго, нас освящающий;
Радуйся, образ дивный на утешение нам явившая.
Радуйся, Благодатная Богородице Дево, Взыскание погибших.

Кондак 2
Взирающе на образ «Взыскание погибших», зрим, како Отроча младо, Превечный Бог, открывает Тебе, Мати, волю Отца Небеснаго, Иже не хощет смерти грешника. Ты же, радуяся о таковей благости, просиши Сына Твоего, да ниспослет нам силу благодати зло в себе побеждати и творити благое, поющим Ему: Аллилуиа.

Икос 2
Разум человеческий недоумеет, како Дева вниде во Святая Святых, уготовляя Себе в чертог Небесному Царю, храм убо Божий есть истинное Твое, Богородице, жилище, Твое на земли небо, идеже с Сыном пребываеши и с верою молящихся спасительным Таинствам приобщаеши. Простри же покров Твой на нас и на чад наших, и в единомыслии всех соблюди, да единодушно славим Тя:
Радуйся, трапеза Церкви Христовой;
Радуйся, Агнца Божия Мати.
Радуйся, союзом любве супругов соединяющая;
Радуйся, чадородием родителей веселящая.
Радуйся, от купели Крещения благая Восприемнице;
Радуйся, бедствия сиротства скорое избавление.
Радуйся, скорби матерей утоляющая;
Радуйся, Всепетая, мирное житие устрояющая.
Радуйся, Благодатная Богородице Дево, Взыскание погибших.

Кондак 3
Силу и славу Божества премудро сокры воплощенное Слово Отчее: Сын Божий наречеся Сын Человеческий, сниде на землю, яко Пастырь добрый, душу Свою за овцы полагающий; в дебрях греха заблуждших ища, всех глашая по имени и смывая скверну в источнике покаяния. Насладившеся же пажитию приятною, яко овцы словесныя благодарственно воззовем Ему: Аллилуиа.

Икос 3
Имущи попечение о спасении грешников, всяк день, Божия милосердия светильник возжегши, ищеши прилежно, Владычице, яко жена евангельская, драхму утерянную, сиречь душу, образ Божий утратившую и страстьми помраченную. Тую обретши, радуешися и в горнило раскаяния ввергаеши ю, да обновится житием, воспевая Ти сице:
Радуйся, добраго Пастыря Мати;
Радуйся, грешников к небу воззвание.
Радуйся, спящей совести пробуждение;
Радуйся, слезному покаянию научающая.
Радуйся, наша пред Богом Споручнице;
Радуйся, праведнаго Божия гнева смягчение.
Радуйся, кающихся исправление благодатное;
Радуйся, исполняти заповеди силу подающая.
Радуйся, Благодатная Богородице Дево, Взыскание погибших.

Кондак 4
Бурю блуднаго сына страстей укротив, объятия Твоя отверзл еси ему, Господи. И жене грешнице, слезами нозе Твои омывшей, рекл еси: «Прощаются ти греси твои». Не судити бо мир посла Отец Сына Своего, но дати спасение, посему радость велия бывает на небеси о грешницех кающихся, Ангелом поющим: Аллилуиа.

Икос 4
Не слушают гласа добраго Пастыря грешницы, во глубину зол впадшии, презревшии страх Божий и сладостию греха прельщеннии. Кто же упасет сих, идущих по пути к погибели, аще не Ты, Мати Милосердия? Возносиши бо к Сыну Твоему глас плачевный матерей сих несчастных, силою состраждущей любве облегчаеши их борения, да обретши благодатную помощь и надежду спасения, благодарят Тя сице:
Радуйся, руку милосердия погибающим простирающая;
Радуйся, во вражде сущих примиряющая.
Радуйся, падших благое взыскание;
Радуйся, тайных пороков врачевание.
Радуйся, Еюже клевета и коварство обличается;
Радуйся, Еюже пламень сластолюбия угашается.
Радуйся, отчаянных надеждо последняя;
Радуйся, к жизни добрей возвращение.
Радуйся, Благодатная Богородице Дево, Взыскание погибших.

Кондак 5
Божественным светом любве осияв души озлобленнии Христос Бог, сколь многим страждущим благотвори: слепцы просвети, прокаженныя очисти, хромыя и разслабленныя исцели, алчущия хлебом напита. Верою же исцеление приявшии, всех болящих увещевают предатися милосердию и всемогущей силе Врача Небеснаго, поюще Ему: Аллилуиа.

Икос 5
Видим, како изливается источник цельбоносный благодатнаго утешения молящимся пред иконою Твоею, Владычице: недугующии силою веры воздвизаются, унывающии ободрение получают, печаль в радость претворяется. Самые страдания многим обращаеши на пользу ко врачеванию язв душевных, ихже свободишеся, благодарственно зовем Ти:
Радуйся, Мати Врача Небеснаго;
Радуйся, Твоими молитвами исцеляющая.
Радуйся, Причастия Святых Таин сподобляющая;
Радуйся, тяжкоболящих благое посещение.
Радуйся, в немощи помощь всесильная;
Радуйся, разслабленных членов укрепление.
Радуйся, слепых прозрение, хромых хождение;
Радуйся, умом обиженных защито и утешение.
Радуйся, Благодатная Богородице Дево, Взыскание погибших.

Кондак 6
Предуказанную Богом Отцем чашу страданий за грехи рода нашего испити готовяся, Христе Боже наш, в вертограде Гефсиманстем трикраты молился еси: «Аще возможно есть, да мимоидет от Мене чаша сия: обаче не Моя воля, но Твоя да будет». Егда же воззовет нас Господь на подвиг или скорбныя обстояния постигнут нас, сию молитву вложим в уста наша, да бодрствуем и поем во вся дни: Аллилуиа.

Икос 6
Воззрев милостиво на грешную Марию, возопившую Тебе, Богородице: «Ныне буди ми ко спасению, Наставнице», направи ю в пустыню Иорданскую. Тамо укрепила еси ю в подвиге покаяния, яко достигшую равноангельнаго жития, в чертог Сына Своего ввела еси. Такожде и нас, Благодатная, научи восходити по пути покаяния, да вкупе с угодившими Богу поем Ти:
Радуйся, веры и благочестия Наставнице;
Радуйся, в подвизех Помощнице неизменная.
Радуйся, воздержания богоугоднаго оправдание;
Радуйся, молитвы Споспешнице усердная.
Радуйся, страха Божия насаждение;
Радуйся, целомудрия Блюстительнице неотступная.
Радуйся, любве и милосердия источниче;
Радуйся, смирением в горняя приводящая.
Радуйся, Благодатная Богородице Дево, Взыскание погибших.

Кондак 7
Яко знамение вольнаго истощания Твоего, Господи, Крест Твой на рамо взял еси и к месту лобному пошел еси. Ты же, о Богомати, востекла еси вслед Сына Твоего, утробою болезнуя и ничтоже вопреки глаголя, нас же научая пети Ему: Аллилуиа.

Икос 7
Новая свеща любве возгореся во тьме мира сего, егда Агнец Божий вознесе грехи наша на Древо. Се, Матерь Божия у Креста Сына Своего усыновляет Себе род человеческий и, бремя грехов разделяя, восприемлет и мира наказание, о Всенепорочная Дево, скорбь крестную в послушании воле Отца растворившая! Укрепи сердце наше в дни бедствий, да сице песнословим величие Твое:
Радуйся, Агнице, Агнца на заклание приведшая;
Радуйся, крестный путь Сына Твоего слезами оросившая.
Радуйся, муки Его сердцем разделившая;
Радуйся, крест яко орудие взыскания грешных вземшая.
Радуйся, от благовещения и до гроба Сыну послужившая;
Радуйся, Раба Господня, волю Отца тем исполнившая.
Радуйся, сердца скорбнаго отрадо;
Радуйся, идущих тесным путем небесная наградо.
Радуйся, Благодатная Богородице Дево, Взыскание погибших.

Кондак 8
Странных сомнений волны потопляют нас в море житейском, и в страхе вопием Ти: «Господи, спаси ны, погибаем». И слышим глас вездесущаго Слова, не токмо Петру, но всем глаголющий: «Почто усомнился еси?». Устыдимся же, малодушнии, силою благодати укрепляеми, ум свой с верою устремим к Богу Крепкому, Живому, взывающе: Аллилуиа.

Икос 8
Всякую душу из тьмы заблуждения хотя избавити, Богомати, девице Екатерине в сонном видении Младенца Христа показа, и ко Крещению привела еси. Христос же Господь мудрую деву обручи в невесты Себе, и яко исповедницу веры прослави, мученическим венцем же украси ю, и Царствия Небеснаго сподоби. Мы же премудрости Божией удивляющеся, Наставницу заблуждших сице восхвалим:
Радуйся, Света Истиннаго Мати;
Радуйся, души омраченныя просвещение.
Радуйся, бури смущений разсеяние;
Радуйся, мира и тишины водворение.
Радуйся, веры истинныя утверждение;
Радуйся, волны сомнения о камень веры разбивающая.
Радуйся, православия тихий свет сохраняющая;
Радуйся, стадо Христово во едино собирающая.
Радуйся, Благодатная Богородице Дево, Взыскание погибших.

Кондак 9
Всякое существо человеческое, любовию Божественною согретое, к Богу в Троице славимому возносится, Виновнику жизни и безсмертия. Душа же наша, познавши, яко любовь есть блаженство общения, вопиет Ему: «Благодетелю мой, даждь ми, да весь пребуду в Тебе, Ты же во мне», да еси едино будем и согласно воспоем: Аллилуиа.

Икос 9
Весь мир во зле лежит, от разжжения злобы раждаются кровопролитныя брани, Мати мира, человеки с Богом примирившая, водвори мир и тишину во вселенной! Избави Отечество наше от нашествия вражия, мирный же труд наш на пользу душевную благослови, да вси тако восхвалим присное заступление Твое:
Радуйся, Благословенная, вражды разрушение;
Радуйся, благодати море неисчерпаемое.
Радуйся, злая сердца умягчающая;
Радуйся, ненависть силою любве истребляющая.
Радуйся, противу врагов помоще победоносная;
Радуйся, града Москвы охрана неусыпающая.
Радуйся, Отечества нашего крепкое миром ограждение;
Радуйся, мира всея вселенныя утверждение.
Радуйся, Благодатная Богородице Дево, Взыскание погибших.

Кондак 10
Спасаяй мир излиянием пречистой крови Твоей, прорекл еси, Христе Царю: «Аще Аз вознесен буду от земли, вся привлеку к Себе». Тогда же показал еси страданий Твоих силу животворную: разбойнику рай отверзается, сотник Сыном Божиим Тя исповедует, мы же язвами Твоими от древния клятвы свободившеся, из глубины сердца взываем: Аллилуиа.

Икос 10
Стена еси нерушимая, Благая Мати, от нападений врагов невидимых, ищущих, кого поглотити или разбити о камень злоключений и бед. Око недремлющее, зриши врага приближение и надеющихся на Тя от всяких обстояний спасаеши, да вси познают предивное Твое Промышление, сице взывающе:
Радуйся, Державная, духа злобы отгнание;
Радуйся, внезапныя смерти свобождение.
Радуйся, огненнаго запаления избавляющая;
Радуйся, сущих во мразех согревающая.
Радуйся, утопающих дивное спасение;
Радуйся, без вести пропавших обретение.
Радуйся, губительных болезней прекращение;
Радуйся, Милостивая, от напастей злых исхищающая.
Радуйся, Благодатная Богородице Дево, Взыскание погибших.

Кондак 11
Пение надгробное и плач Богородицы, и повитие Плащаницею от Иосифа с Никодимом благоволил еси приняти, Жизнодавче Христе, егда прешел еси врата смерти, яко Богочеловек, плотию уснув. Сын Человеческий душу Свою положи за грешники, явив тем любовь Свою к роду человеческому, ад же облиста силою Божества, да вся преисподняя трепещет, слышавши ангельскую песнь: Аллилуиа.

Икос 11
Света невечерняго Мати, едина падших исправление! Просвети, очисти, обнови лукавое житие наше, да не приидем ко гробу нашему, токмо бремя грехов носяще. Ты бо милостиво приемлеши последнее воздыхание кающихся и силою благодати от неистовых истязателей души верных свобождаеши. Буди нам Путеводительница во обители вечныя, идеже вси праведнии пребывают: ныне же немолчно глаголем Ти:
Радуйся, Победителя смерти рождшая;
Радуйся, подвижников сила неоскудевающая.
Радуйся, памяти смертной дарование;
Радуйся, тяжких грехов нечаемое разрешение.
Радуйся, престарелых упокоение желанное;
Радуйся, умирающих о Господе сретение.
Радуйся, надеждо вечнаго спасения;
Радуйся, о нераскаянных даже до Страшнаго Суда Ходатаице.
Радуйся, Благодатная Богородице Дево, Взыскание погибших.

Кондак 12
Благодати источник приснотекущий открыл еси миру, Христе Спасе, Воскресением Твоим: умертвися смерть, пленен бысть ад, небо и рай верным отверзошася. Сыне Божий! Соделай нас верою сынами света, да внидем, молитвами Богородицы, в чертог славы Твоея с песнию: Аллилуиа.

Икос 12
Воспевающе благодеяния Твоя, Богородице, роду христианскому, славословим Твое к грешным милосердие, величаем о заблуждших промышление, песнословим теплое о мире предстательство. Сокровищнице даров Духа Святаго! Изливай обильно благодать и милость всем унывающим и бедствующим, благодарным сердцем приносящим Ти похвальныя:
Радуйся, тайны искупления Провозвестнице;
Радуйся, Мати Сына Божия, главу змия стершаго.
Радуйся, Благодатная, яко сотвори Ти величие Сильный;
Радуйся, яко величие сие почитанием иконы Твоея возвещается.
Радуйся, теплыя слезы о мире проливающая;
Радуйся, и во Успении Твоем нас не оставляющая.
Радуйся, Церкви Христовой покров и радование;
Радуйся, Благая Вратарнице, двери райския верным отверзающая.
Радуйся, Благодатная Богородице Дево, Взыскание погибших.

Кондак 13
О Богоизбранная Дево, Взыскание погибших и Наставнице заблуждших! Пролей теплыя о нас слезы, просвети души, во мраце отчаяния сущия, и на путь заповедей настави, да не будем овцы погибшия, но к Сыну Твоему и Богу нашему всех приведи, Иже спасает Тобою души наша, да радостно вопием Ему: Аллилуиа.
Этот Кондак читается трижды, затем Икос 1 и Кондак 1.

Молитва 1
О Богоизбранная Заступнице грешных, Взыскание погибших и Наставнице заблуждших! Ты не презираешь удалившейся своеволием от пажити Сына Твоего блуждающей в дебрех греха бедныя словесныя овцы, но шед, ищешь заблуждшую. Кто изследит пути милосердия Твоего? Будь милостива ко всем: погибающих извлеки из бездны погибели, заблуждших обрящи и настави, удаленных обрати и привлеки, обращающихся к Тебе и приближающихся приими и спаси. Всех же кающихся к Сыну Твоему, доброму Пастырю и Богу нашему, приведи, да молитвами Твоими не будет ни единыя овцы, без вести пропавшия, но да будет едино стадо и един Пастырь, Иже упасет души наша и открыет ходатайством Твоим двери во обители вечныя. Аминь.

Молитва 2
О Пресвятая Владычице Богородице, Взыскание погибших! Призри милостивым Твоим оком на молящихся пред честною иконою Твоею. Воздвигни нас из глубины греховныя: просвети ум наш, омраченный страстьми, уврачуй язвы душ и телес наших. Ты веси непрестающия скорби и вся немощи наша: подай нам руку помощи, облегчи страдания. Буди нам милосердия и мира источник, утешение в бедах и крепкое прибежище грешником кающимся. Даруй нам исправление греховныя жизни нашея: заблуждших на путь правый настави, падших и погибающих силою благодати спаси. От внезапныя смерти избави, с Сыном Твоим и Судиею Праведным нас примири и вечныя муки свободи. Милосердным же предстательством Твоим сподоби нас вселитися во обителех небесных, идеже непрестанный глас празднующих радостно славит Пресвятую Троицу, Отца и Сына и Святаго Духа, ныне и присно и во веки веков. Аминь.

Акафист пред иконой Божией Матери «Взыскание погибших» составлен протоиереем Николаем Александровичем Голубцовым (†1963).

Взято с http://ustavschik.livejournal.com/67627.html

Сайт создан в системе uCoz