Акафист Знамению Богоматери (в Новгороде)

Кондак 1
Избранной от всех родов Божией Матери, Царице, восходящей заступить великий Нов-Град, вынесением на забрало Крепости руками Святителя Иоанна, яко имущая победу, на супостаты враги наша от стрел смертоносных свободи, заступи, да зовем ти:
Радуйся, обрадованная, знамением нас не оставляющая!

Икос 1
Святителю Иоанну, при келии своей в стене образу Спасителю Христу Богу, молящуся со слезами о избавлении Нова-Града от супостата, от образа глас бысть взяти Тя Богоматерь из Церкви Преображения и нести на супротив супостаты враги наша и глаголати к ней таковая:
Радуйся, Небесная Царице, Мати Бога Господа Небесе и земли.
Радуйся, предпочтенная от всех родов, Богом избранная.
Радуйся, святое вместилище славы Божия.
Радуйся, царем удобрение и державо, святителем украшение и священником доброто.
Радуйся, Богомудрых иноков возведение к горнему Царствию.
Радуйся, отверзающая райския двери Христианскому роду, присно Тя блажащему.
Радуйся, обрадованная, Знамением нас не оставляющая!

Кондак 2
Видящи Святитель Иоанн, посланным от него протодиаконом с клиром принести Богоматере икону, но невозможе с места двигнути, ужасошася и глаголюще Оной таковая: Аллилуиа.

Икос 2
Великаго Новаграда народи живущие и дальния стекающияся на моления и Заступление Твое глаголаше таковая: Заступи Владычице Богородице от врагов томительства злаго. Видяще народи подвижиму, Архиерейскими руками держиму, и возрадовася и рече:
Радуйся, о всем мире Христианском Ходатаице.
Радуйся, благ всяких всеблагая Подательнице.
Радуйся, обрадованная, Знамением нас не оставляющая!

Кондак 3
Видя Святитель Иоанн придержащую икону руками своими, взирая на народ Суздальский поганый, и напряженными луками стреляюще Христианы, и удари стрелою в Солнцезрачное лице иконы Богоматери, обратися лицем на град, и из очию Ее капаше слезы Святителю на фелонь, мы же чудящеся поем: Аллилуиа.

Икос 3
Имея в себе житилие Новаграда отчаяние, что разорят град, благочестие исказят, нечестивых союз семидесяти двух князей совещашася разорити до основания, мы же недостойнии имеем сердцем своим на Знамение Божия Матери упование, вопияше к ней:
Радуйся, предстательство наше крепкое заступление.
Радуйся, грешником Споручница во спасение.
Радуйся, христианом Царице и по Бозе надежда Небеснаго Царствия.
Радуйся, Мати живота и по Господе упование жизни вечныя
Радуйся, обрадованная, Знамением нас не оставляющая!

Кондак 4
Буря внутрь имея помышление неверных разорителей, зряше во время дня шестаго часа темноты нашедшей, и ослепи врагов очеса, верою Матерь Божию исповедаша, вопия Богу: Аллилуиа.

Икос 4
Зряше Архиепископ Иоанн, и народ града от врагов стрел испущенных яко дождь обратишася стрелы во ослепшия их очеса и побиша сами себя и погибоша, нас обрадованных сотвориша Заступлением Богоматери, и рече Ей:
Радуйся, спасающая, верою имя Твое призывающих.
Радуйся, злую дерзость многих князей союз погубившая.
Радуйся, обрадованная, Знамением нас не оставляющая!

Кондак 5
Яко ветреная буря князей нечестивых нашедшая на нов наш град во время малочастных дней больше ночной темноты, в победу врагов празднуем Знамению Богоматери, возжигаем по улицам горнилы пылающия высоко, для света приходящих жителей града горящими сердцами и служащим олтарю кадилом благоуханным вопиющим Богу: Аллилуиа.

Икос 5
Видяще Господа Владыку Заступающи Новаграда Христианы повелеваше Святителю Иоанну из церкви взяти Богоматерь Свою, и несена бысть, Господи Тоя разумеша, песньми святыми Ей воспевающе:
Радуйся, Царице, над всеми царствующаго носившая.
Радуйся, скипетре царский в христовой деснице.
Радуйся, в руце нося ветвь голубицы.
Радуйся, жезл Ааронов прозябший нетления.
Радуйся, одушевленный Святыни Гсоподней кивоте.
Радуйся, в покой Господень воскресший нам животе.
Радуйся, Святая Святых от Серафимов глаголемая.
Радуйся, обрадованная, Знамением нас не оставляющая!

Кондак 6
Зряше народи, Архиерей и весь Духовный лик, все живущии власти града, что неизреченная на враги победа, сердцам их отрада, совещашася особенно воздвигнути храм во имя Ея и радостно к Богу вопияше: Аллилуиа.

Икос 6
Возсия нам солнце правды Христос Бог, Тя Богоматерь от рода в род прославивший, храм воздвигнуша во имя победы нечестивых Знамения Богоматери, теплотою сердцам веры поспешно единолетно устроиша, ублажающе и вопиюще сице:
Радуйся, Богоблаженная от всех родов во веки.
Радуйся, благоутробная, милостивая на человеки.
Радуйся, начало человеческаго спасения.
Радуйся, исполнение всех благих желания.
Радуйся, по Бозе, Царе Царствующих Богородице Царице.
Радуйся, по Господе Господствующих наша Госпоже Владычице.
Радуйся, обрадованная, Знамением нас не оставляющая!

Кондак 7
Хотящих всех с верою входити в храм Твой Святый Богородице, присно спасаеши славящих Тя от всяких напастей и бед свобождаеши, темже Благоверному Императору нашему присно Тя ублажающему, победы на сопротивных даруй о сем молящимся Тебе и поющим: Аллилуиа.

Икос 7
Новую показа тварь, явлейся нам гласом Святителю Иоанну всех Творец Господь Тобою Богородице, Ты же сродная промышления Заступнице усердная на Нов-Град в годину нашествия бедствия быша, честне почитающих Твое Знамение, приими сицевая Тебе вопиющих:
Радуйся, Мати Богу избранная от земных.
Радуйся, превышшая земных и небесных.
Радуйся, Херувимов и Серафимов превозшедшая.
Радуйся, красотою всех добродетелей украшенная.
Радуйся, древо живота насажденное посреде рая превышняго.
Радуйся, Ковчеже мысленный, возвышенный в горния от потопа смертнаго.
Радуйся, обрадованная, Знамением нас не оставляющая!

Кондак 8
Странное чудо, нечестивых оружных тьмочисленных безоружнии победиша Тобою Заступнице Богородице, яко нерушимое забрало стенам бысть, вопиюще Господу: Аллилуиа.

Икос 8
Образ Твой Богомати по НовуГраду, яко солнце восходя ношашеся в домы иереями, служаше Ей многия чудеса творяшеся, радостно и трепетно бываху больныя многия исцелевахуся, вопиюще Богородице всегда:
Радуйся, паче всех невещественных умов почтенная.
Радуйся, приносящая Сыну Своему и Богу моления верных.
Радуйся, предстательнице к Богу мир спасающая.
Радуйся, Заступнице роду Христианскому от Бога дарованная.
Радуйся, обрадованная, Знамением нас не оставляющая!

Кондак 9
Всякое естество Ангельское превозносит Тя Богородице, человечестии же роды вси Матерь Тя Божию славим и почитаем пречестное заступление Знамения Царице Тебе земнии с небесным совокупляются, согласно поюще Богу: Аллилуиа.

Икос 9
Глас Боговещанный Святителю Иоанну ныне зрим от Тебе сбывшийся Богородице, яко воистину Бога плотию родши нам, тем же таинству словесе Божия сице вопием:
Радуйся, неопалимая Купино Законоположником предузримая.
Радуйся, Горо святая мужами желаний усмотренная.
Радуйся, Лествице Небесная Иаковом предвиденная.
Радуйся, дверь непроходимая Иезекиилем предузренная.
Радуйся, пророческих глагол всех предреченных о Тебе конец принесшая.
Радуйся, Вышняго смотрения вся на спасение мира совершившая.
Радуйся, обрадованная, Знамением нас не оставляющая!

Кондак 10
Спасти хотя мир всех Господь, от земнаго рода, Тя избра в Матерь себе, нас ради быв человек, дарова нам необоримую стену граду и надежду упования конца неимущую, тем же яко Богу зовем: Аллилуиа.

Икос 10
Стена еси Нову Граду Богородице Дево и заступление всех, к Тебе прибегающих, ибо небесе и земли Творец от Тебе плотию изшед пречистая, духом и телом в небеныя Тя пресели к ублажающему предстательству о всех, иже приглашати Тя научишася:
Радуйся, стено и покрове омофором некрыющая от нас притекания.
Радуйся, верным царем на враги пособствующая.
Радуйся, нашедшия на град победившая.
Радуйся, веры благочестивыя неподвижимое сохранение.
Радуйся, еретичествующих полков разорение.
Радуйся, преподобных трудом Ходатаице блаженнаго упования.
Радуйся, монахом благоскорбящим подательнице вечнаго радования.
Радуйся, обрадованная, Знамением нас не оставляющая!

Кондак 11
Пение всякое Богодухновенных песней недовлеет от нас к похвале всечестнаго Знамения Твоего, чудес всех сильная Владычице, Царице Богородице, но усердно приносим, яко Мати всех смиренное моление наше, Единому Тя прославляющему Богу: Аллилуиа.

Икос 11
Светоприемная свеще истиннаго Солнца нам на град явлшися, души просвещаеши чтущих Твое Заступление Знамением, к разуму Божественному наставляющи градоначальнаго общества елей и свещи величайшия возжигати, да поем Ти сицевая:
Радуйся, свеще неугашаемая огня невещественнаго.
Радуйся, заря незаходимаго света невечерняго.
Радуйся, луно, от солнца правды облиставаемая.
Радуйся, светлостьми и во тме светящая.
Радуйся, Мати Света умнаго благочестивых души просвещающаго.
Радуйся, Мати всех Господа озлобленных души утешающих.
Радуйся, обрадованная, Знамением нас не оставляющая!

Кондак 12
Нову Граду благодать Заступнице высокопреисполненная славы на небесех дарованную Богоматерь, Знамение видяще дольняя и горняя, умы, Святителие, Херувимы, Серафимы, и Господства со Архангелы и Ангелы вопием: Аллилуиа.

Икос 12
Восхваляюще всечестное Твое Знамение, восхваляем достойно чудесное несение Святителем Иоанном восшествие Твое на забрало града Богомати, тойже освяти, заступи, прослави и спаси всех любовию поющих Тебе:
Радуйся, облеченная в солнце, сияющаю благодатию и славою всей вселенной.
Радуйся, обещавшая сохранити и спасти призывающих Тя всех в поднебесной.
Радуйся, от Христианских родов Мати Божия почитаемая и Богородицею именуемая.
Радуйся, от восток солнца до запад православно от всех благочестивых славимая.
Радуйся, обрадованная, Знамением нас не оставляющая!

Кондак 13
О всепетая Мати Христа Бога нашего, всех Святых Святейшая, заступившая Нов-Град от разорения, и от всяких напастей и бед и муки избави, и Небеснаго Царствия нас Царице сподоби, Тебе вопиющим: Аллилуиа.
Трижды, потом Икос 1 и Кондак 1

Молитва Пресвятой Богородице перед Ея иконой, именуемой «Знамение» (Новгородская)
О Пресвятая и Преблагословенная Мати Сладчайшаго Господа нашего Иисуса Христа! Припадаем и покланяемся Тебе пред святою чудотворною иконою Твоею, воспоминающе дивное знамение Твоего заступления, Великому Новуграду от нея явленное во дни ратнаго на сей град нашествия. Смиренно молим Тя, всесильная рода нашего Заступнице: якоже древле отцем нашим на помощь ускорила еси, тако и ныне нас, немощных и грешных, сподоби Твоего матерняго заступления и благопопечения. Спаси и сохрани, Владычице, под кровом милости Твоея Церковь Святую, град Твой, всю страну нашу православную и всех нас, припадающих к Тебе с верою и любовию умиленно просящих со слезами Твоего заступления. Ей, Госпоже Всемилостивая! Умилосердися на ны, обуреваемыя грехи многими, простри ко Христу Господу Богоприемныя руце Твои и предстательствуй за нас пред благостию Его, просящи нам прощения прегрешений наших, благочестнаго мирнаго жития, благая христианския кончины и добраго ответа на Страшнем суде Его, да, спасаеми всесильными Твоими к Нему молитвами, блаженство райское унаследуем и со всеми святыми воспоем пречестное и великолепое имя Достопокланяемыя Троицы, Отца и Сына и Святаго Духа, и Твое велие к нам милосердие во веки веков. Аминь.

Тропарь Пресвятой Богородице перед Ея иконой, именуемой «Знамение» (Новгородская), глас 4:
Яко необоримую стену и источник чудес стяжавше Тя раби Твои, Богородице Пречистая, сопротивных ополчения низлагаем; темже молим Тя: мир граду Твоему даруй и душам нашим велию милость.

Кондак, глас 4
Честнаго образа Твоего знамение празднующе людие Твои, Богородительнице, имже дивную победу на сопротивных граду Твоему даровала еси; темже Тебе верою взываем:
Радуйся, Дево, христиан похвало.

Величание
Величаем Тя, Пресвятая Дево, Богоизбранная Отроковице, и чтим образ Твой святый, имже дивную победу на сопротивныя граду Твоему даровала еси.

Ино величание
Достойно есть блажити Тя, Богородице Дево, честнейшую Херувим и славнейшую без сравнения Серафим.
Или: Песнь всяку духовную принесем Богородице.

Ино величание
Величаем Тя, Пресвятая Дево, Богоизбранная Отроковице, и чтим образ Твой святый, имже дивную победу на сопротивныя граду Твоему даровала еси.

Ино величание
Величаем Тя, Пресвятая Дево, и чтим образ Твой честный, имже показала еси преславное знамение.

Ино величание, иже в Великом Новеграде
Величаем Тя, Пресвятая Дево, и чтим образ Твой честный, имже победу на враги дарова граду нашему.

Празднование 27 ноября/10 декабря

Взято с: http://www.stsl.ru/manuscripts/medium.php?col=2&manuscript=267&pagefile=267-0267
№ 267. Акафисты. Часть I.
1867–1869 гг. Скоропись новая, двух почерков, большая часть писана рукою Феодора из г. Дмитрова. 570 л. (IV + 566) 21,0 x 16,5.
Переплет – картон, в зеленой коже, с золотым тиснением, по корешку вытиснено: «Акафисты. I». В конце каждой статьи записиписца – «грешного раба Федора», писавшего в г. Дмитрове в 1867–1869 гг., при этом указывается, с рукописного или с печатного текста списан данный. На об. передн. защитного листа – прежний шифр
№ 220. На л. 1 штамп биб-ки лавры.
Среди статей:
4) л. 260–270 об. Акафист Знамению иконы богородицы в Новгороде. «Сей акафист доставлен в рукописи Московского Данилова монастыря архимандритом Иаковом». В конце приписка писца: «Сей акафист писал со скорописного грешный раб Феодор. 1869-го года... в городе Дмитрове...».

Сайт создан в системе uCoz