Послушания ради открыся источник
благодати в немощном моем духе и Богу
принесеся чистое приношение сердца
Кондак 1
Избавителя нашего, во Иордане крещающегося, зряще, ужасашеся вся тварь. Глас же с небесе принесеся от Отца: «Сей есть Сын Мой Возлюбленный, о Немже благоволих». Сего ради радуяся вопием: Человеколюбче, слава Тебе!
Икос 1
Иорданския струи Источника жизни трепетно прияша. Трепеща душею, вси вопием: Иисусе, Единый и Верный. Иисусе Нетленный. Иисусе Милосердный. Иисусе, Светильниче Вселенной. Человеколюбче, слава Тебе!
Кондак 2
Спасти хотя заблудшаго человека, в рабий зрак облеклся еси, Христе Боже, Тебе бо крещщуся плотию, Избавителю нашему поем: Аллилуиа!
Икос 2
Видя Предтеча, креститися пришедша Иисуса, радуется душею и трепеща, глаголет: Иисусе Безгрешный. Иисусе Предвечный. Иисусе Превознесенный. Иисусе благословенный. Человеколюбче, слава Тебе!
Кондак 3
Ко гласу вопиющего в пустыни притецем, приготовим путь Господу и радостно воспоем: Аллилуиа!
Икос 5
По земли ходит певаемый от Серафим, Сей Бог наш! Вемы Его Бога Предвечнаго, сего ради зовем: Иисусе Непостижимый. Иисусе, Свете Незаходимый. Иисусе Неизреченный. Иисусе Благословенный. Человеколюбче, слава Тебе!
Кондак 4
Утру явльшуся человеком светоносну, Солнце Правды к водам Иорданским приходит, мрак грехов разгоняя от вопиющих: Аллилуиа!
Икос 4
Неплодная древле, днесь веселится Христова Церковь: водою бо и Духом чада Богу родишася, верою взывающе: Иисусе Пресветлый. Иисусе Пречудне. Иисусе Преславне. Иисусе Прекрасне. Человеколюбче, слава Тебе!
Кондак 5
Истлевшаго человека обновляет Христос струями Иорданскими, иже поет ныне песнь: Аллилуиа!
Икос 5
Сошедшимся без числа людем от Иоанна креститися, Сам Господь посреде ста. Ему возгласим: Иисусе, миру предстояй. Иисусе, рукою вся содержай. Иисусе, скверну нашу очищай. Иисусе, помышление омраченное отгоняй. Человеколюбче, слава Тебе!
Кондак 6
Якоже на небеси, с трепетом пред чудом предстоим: Троицу зря Единосущную, Ей же вси поем: Аллилуиа!
Икос 7
Облак древле и море божественное проображаху крещение, в них же древнии крестишася, исходяще людие, море бе образ воды и облак — Духа, мы же созерцающе, зовем: Иисусе, воды освятивый. Иисусе, Таинство установивый. Иисусе, Духом укрепивый. Иисусе, люди Отцу Небесному усыновивый. Человеколюбче, слава Тебе!
Кондак 7
Убелим земное естество от падения, на небо возводими с пением: Аллилуиа!
Икос 7
Первее всепагубный потоп в тление привел, ныне же потопше, Христе, грех ради человеческаго спасения: Ему Премудрому Человеколюбцу зовем: Иисусе, Человеком спасение. Иисусе, пути Божия уяснение. Иисусе, нечестия погубление. Иисусе, великое Милосердие. Человеколюбче, слава Тебе!
Кондак 8
Свет от Света возсия мирови Христос Спас наш, Бог явлейся, Сему воспоем: Аллилуиа!
Икос 8
Како Тя, Христе, достойно почтим, яко в водах всех нас обновил еси, Великое Таинство Твоего явления, обаче приими недостойное пение: Иисусе, душам очищение. Иисусе, наше освящение. Иисусе, всего мира просвещение. Иисусе, человеков спасение. Человеколюбче, слава Тебе!
Кондак 9
Одеяйся Светом, яко ризою, иорданскими струями одеялся еси Спасе, да спасеши вопиющих: Аллилуиа!
Икос 9
Явися Свет Неприступный сущим во тьме и сени смертней седящим, сего ради радостно глаголем: Иисусе, Свете истинный. Иисусе, Свете невечерний. Иисусе, Свете присносущный. Иисусе, Свете превысший всех светлостей. Человеколюбче, слава Тебе!
Кондак 10
Да речет убо дом Господень: «Яко благ, яко в век милость Его!», да рекут боящиеся Господа: Аллилуиа!
Икос 10
Приклони, Христе, ухо ко мне, да во дни моя призову: Иисусе слава моя. Иисусе правда моя. Иисусе жизнь моя. Иисусе крепосте моя. Человеколюбче, слава Тебе!
Кондак 11
Раздельшуся Иордану древле по суху преходят людие. Стезю ныне в водах написует Господь нетленную и полезную, еюже проходим земное поприще поя: Аллилуиа!
Икос 11
Приидите ныне, крещением просвещеннии, приступите к Богу с верою глаголя: Иисусе, очистивый мя в купели крещения. Иисусе, избавивый мя осуждения. Иисусе, пославый ми освящение. Иисусе, даровавый благословение. Человеколюбче, слава Тебе!
Кондак 12
Когда явлением Твоим просветил всяческая, тогда море от Тебе побеже, Иордан доле текий возвратися, к небеси возводя поющих: Аллилуиа!
Икос 12
От Девы Солнце, от Неплодной Светильник, во Иордане Троическое явление увидевше, возвестим всему миру хвалу Божию глаголюще: Иисусе, новую жизнь являющий. Иисусе, смиренного человека прославляющий. Иисусе, любовь и милость открывающий. Иисусе, спасение наше устрояющий. Человеколюбче, слава Тебе!
Кондак 13
О, благословенный всеми родами и племенами земными, небесными силами воспеваемый, вся содержащий, преклонивый небеса, облекшийся плотию и вся совершивый для спасения человеков — славим, хвалим, поем и благодарим Тебе, нашего Искупителя и Спасителя и непрестанно глаголем: Аллилуиа, Аллилуиа, Аллилуиа!