Тропари, глас 8
Беззакония моя презри, Господи, от Девы рождейся, и сердце мое очисти, храм то творя Пречистому Твоему Телу и Крови, ниже отрини мене от Твоего лица, без числа имеяй велию милость.
Слава: Во причастие святынь Твоих како дерзну [вниду] недостойный? Аще бо дерзну к Тебе приступити с достойными, хитон мя обличает, яко несть вечерний, и осуждение исходатайствую многогрешной души моей. Очисти, Господи, скверну души моея, и спаси мя, яко Человеколюбец.
И ныне: Многая множества моих, Богородице, прегрешений, к Тебе прибегох, Чистая, спасения требуя: посети немощствующую мою душу, и моли Сына Твоего и Бога нашего, дати ми оставление, яже содеях лютых, Едина благословенная.
Кондак 1
Избранный Воеводо и Господи, Боже сердца моего, и часте моя, Боже, во веки, яко избавльшася от вечныя работы вражия, сподоби мя, освященна в Твое служение, похвальная принести Тебе; но яко имеяй непостижимую силу, от всякия мя избави немощи, да зову Ти:
Иисусе, крепосте моя, осени мя.
Икос 1
Творяй Ангелы Своя духи, плотяна человека Ангелом звати Пророку повелел еси, глаголя: «Устне иереовы сохранят разум, и закона взыщут от уст его, яко Ангел Господа Вседержителя есть». Сему чину Ангельскому понеже и мене милостию Твоею приобщил еси, вразуми мя сохранити закон Твой и отверзи мне устне мои пети Тебе сицевая:
Иисусе, Освятителю мой, человека в Ангела претворивый.
Иисусе, Пременителю мой, духом мне ходити повелевый.
Иисусе, Благодателю мой, обручение Духа мне даяй.
Иисусе, Жизнодавче, жизнь духовную даруй ми.
Иисусе Нетленный, мене тленнаго внутрь обнови.
Иисусе, Слове Божий, положи во мне слово примирения.
Иисусе, Пестуне мой, положи покрывало на сердце моем от всякия злобы.
Иисусе, надеждо моя, откровенным лицем узрети Тя даруй ми.
Иисусе Щедрый, благодать и общее служение подаждь ми.
Иисусе, упование мое, не вотще благодать Твою во мне вкорени.
Иисусе, очищение мое, непорочно служение мое соблюди.
Иисусе, благосте моя, во время приятно послушай мене.
Иисусе, крепосте моя, осени мя.
Кондак 2
Виде Тебе мир весь на Кресте Архиерея Великаго, яко орла, всех крылома благости покрывающа, виде пречистых рук Твоих воздеяние, Жертву благоугодную Богу Отцу, юже и аз, недостойный служитель Твой, о гресех моих и о людских невежествиих хощу Твоею помощию принести, зовый: Аллилуиа.
Икос 2
Разумеша Апостоли Твою архиерейскую власть, о нихже рекл еси Отцу: «За них Аз свящу Себе, да и тии священны будут во истине, да любы, еюже Мя еси возлюбил, в них будет, и Аз в них»; увидеша крайнюю любовь, яко не оставил еси их, идый к Отцу, но в Пречистых Тайнах Себе истиннаго Бога и Человека научил еси призывати:
Иисусе, Архиерею грядущих благ.
Иисусе, Новаго Завета Ходатаю.
Иисусе, Преподобнейший Первосвященниче.
Иисусе, научи мя служити Тебе в преподобии.
Иисусе, незлобия первый Наставниче.
Иисусе, даждь ми в незлобии строити дом Твой.
Иисусе, Искоренителю всякия скверны.
Иисусе, яви мя скверны непричастна.
Иисусе, отлучи мя от делающих беззаконие.
Иисусе, очисти совесть мою от мерзких дел.
Иисусе, освящение мое неотъемлемое.
Иисусе, не отрини мене от руки Твоея освящающия.
Иисусе, крепосте моя, осени мя.
Кондак 3
Силою Твоею Божественною, якоже вдунул еси в лице перваго человека дыхание жизни, и бысть человек в душу живу, сице и в Апостолы дунул еси, глаголя: «Приимите Дух Свят». И ныне пр
Икоснися устом моим, и по изречении словес Твоих, призыванием и действием Святаго Духа, и знамением крестным, вдохни в хлеб и вино дыхание вечныя жизни, да всеми моими внутренними поразумею живоподательную Твою пищу и питие, зовый: Аллилуиа.
Икос 3
Имея Престол Небо, и землю подножие ногам, тако смирился еси, яко аще и Сын еси Божий, навык послушанию, гласа служебников Твоих, Господь сый, послушаеши, и под видами хлеба и вина, всего Себе невидима вместити изволил еси, ко грешному мне, яко к Закхею приходиши, да прииму Тя радостию, зовый сице:
Иисусе, поставивый Херувимы осеняющия олтарь.
Иисусе, Главо Церкве златая.
Иисусе, возносяй венцем главу архиереев.
Иисусе, всякаго псалтира и гуслей любезнейший.
Иисусе, всякаго пения иереем приятнейший.
Иисусе, жезле пастырей крепчайший.
Иисусе, сило труждающихся иереев.
Иисусе, дражайшее одеяние архиереев.
Иисусе, покрове твердый священнодействующих.
Иисусе, славо рабом Твоим.
Иисусе, яко глас имеяй Своя служители.
Иисусе, Предводителю подвизающимся.
Иисусе, крепосте моя, осени мя.
Кондак 4
Бурю неукротимую всех моих грехов утолил еси, егда даруя Себе Жертву живу Богу Отцу, молитвы к могущему спасти мя от смерти, с воплем крепким и со слезами принесл еси и услышан быв от благоговеинства, услыши и мене, служити Тебе дерзающа, да Безкровную принося Жертву, пролию пред Тобою молитву мою, зовый: Аллилуиа.
Икос 4
Слышах Тебе глаголюща к Моисею: «Всяк, емуже аще будет порок на нем, да не приходит приносити дар Богу своему, и к олтарю да не приближается: порок бо имать». Ты един пороку непричастен, Тебе, за вся моя пороки и безчисленная согрешения, Безгрешному, многи раны даша. Ты един Свят Господь Бог наш, освящаяй Сам Дары сия, приими от мене сицевая:
Иисусе, царское священие мне даровавый.
Иисусе, дарование всяку цену превосходящее.
Иисусе, Превысочайший Властителю нас, рабов Твоих.
Иисусе, яко купец куплю деяй.
Иисусе, обретый душу мою яко бисер.
Иисусе, Сам Себе яко свещу на Кресте возжегий.
Иисусе, искупивый мене Кровию Твоею.
Иисусе, иский мене яко драхму погибшую.
Иисусе, обрящь мене, утешивыйся.
Иисусе, вышша другов Твоих мене поставивый.
Иисусе, над всем имением мене избравый.
Иисусе, сокровище Твое мне вручивый.
Иисусе, крепосте моя, осени мя.
Кондак 5
Божий служитель Моисей, научаяй иногда люди, глаголаше: «Лицем к лицу глагола Господь к вам на горе из среды огня. Аз же стоях между Господем и вами, во время оно, известити вам глагол Господень». Ныне, Господи мой, огнь сый, не опаляеши мене, служителя Твоего, стояща между Тобою и людьми Твоими, но терпиши всем звати со мною: Аллилуиа.
Икос 5
Ведя Тебе Бога моего одесную Бога Отца всегда на Престоле славы, в последняя же лета, на руках Приснодевы Марии Матере Твоея седяща, ныне же в руце мои приходяща, которыма очима воззрю на Тя, грехолюбив сый? Коима дланьма прикоснуся Тебе? Что же реку, безответен раб Твой? Обаче дерзаю Тебе глаголати сия:
Иисусе, Агнче и Пастырю мой.
Иисусе, положивый душу Твою за мене.
Иисусе, свете, в мир пришедый.
Иисусе, мглу грехов моих разгоняяй.
Иисусе, образе последняго смирения.
Иисусе, к ногам Иуды пришедый.
Иисусе, руце мои Собою освящаяй.
Иисусе, десницу мою просвещаяй.
Иисусе, длани моя укрепляяй.
Иисусе, осязанием Твоим мене уцеломудряяй.
Иисусе, воззрением Твоим мене в служение призываяй.
Иисусе, мною люди Твоя благословляяй.
Иисусе, крепосте моя, осени мя.
Кондак 6
Проповедник Твой Иоанн Богослов виде двадесять четыри старцы, падающия пред Агнцем и поющия песнь нову, яко заколен был еси, и искупил еси нас Кровию Твоею, сотворил же еси нас Богови нашему цари и иереи. Темже и мы припадаем пред Тобою и просим: вложи в уста наша песнь нову, пение Богу нашему, во еже звати Тебе: Аллилуиа.
Икос 6
Возсия в уме моем слово пророка Твоего: «Пожри Богови жертву хвалы; волею пожру Тебе и исповемся имени Твоему». Аще бо и молитва моя немощна есть, и жестота моя мерзка, но вем, яко сия жертва хвалы прославит Тя, и ту путь, имже явиши спасение зовущу:
Иисусе, истинная Жертво правды.
Иисусе, помяни вся жертвы моя.
Иисусе, сею Жертвою оправди мя.
Иисусе, Жертво вони благовонныя Богу Отцу.
Иисусе, в деснице моей вечносте моя.
Иисусе, в шуице моей богатство и слава.
Иисусе, о сей Жертве не обличи мене.
Иисусе, приносе мой, о мне приносимый.
Иисусе, приносе мой, мене очищающий.
Иисусе, приносе мой, службу мою приемлющий.
Иисусе, заколенный Агнче, мене оживляющий.
Иисусе, приношение совершенное о гресех.
Иисусе, крепосте моя, осени мя.
Кондак 7
Хотя чисту и непорочну жертву от рук наших прияти, заповедал еси заповеди Твоя: «Святи будите, якоже Аз Свят есмь, Господь Бог ваш». Но кто чист будет от скверны, аще и един день жития его на земли? Ты Сам, Дары Твоя приносяй и Приносимый, нечестия наша очистиши, да зовем Ти: Аллилуиа.
Икос 7
Дивное Твое на мне милосердие, како Озу простерша руку придержати Кивот поразил еси, мене же много пред Тобою, Богом моим, согрешающаго не погубляеши, но еще Сам простираеши и держиши десницу мою на приятие Тебе, Бога моего, да умилився вопию Ти:
Иисусе, Слово Божие, огнь сый, не опали мене.
Иисусе, отжени хлад уныния моего.
Иисусе, исцели мое недостоинство Твоим величеством.
Иисусе, покрый мое окаянство Твоими щедротами.
Иисусе, соблюдаяй мене от бед Твоею благостию.
Иисусе, защищаяй мою нищету Твоим богатством.
Иисусе, светильниче, сердце мое просвещаяй.
Иисусе, слепоту мою душевную врачуяй.
Иисусе, наготу мою Тобою Самем одеваяй.
Иисусе, научаяй руце мои на твое приятие.
Иисусе, ополчаяй персты моя на враги моя.
Иисусе, положивый на мне, слузе Твоем, руку Твою.
Иисусе, крепосте моя, осени мя.
Кондак 8
Странное и великое сие видение: како Мария возлия миро на главу Твою - Ты же водою омываеши нозе учеником; она Божеству Твоему честь творяше - Ты же, да смирения научиши, к ногам преклонился еси учеником. Укрепи мене, служителя Твоего, Христе Иисусе, Тебе яко Богу кланятися и смиренно звати: Аллилуиа.
Икос 8
Возлиял еси воду на умовение ног ученических, но на землю Кровь излиял еси на измовение грехов наших; востав с вечери, положил еси ризы Твоя, да мене, служителя Твоего, в ризу безсмертия облечеши; препоясался еси лентием, да мене препояшеши оружием истины, зовуща:
Иисусе, в ризу веселия облецы мя.
Иисусе, одежду правды даруй ми.
Иисусе, совлецы мя ветхаго человека.
Иисусе, новою благодатию возвесели мене.
Иисусе, препояши мя силою истины.
Иисусе, в ризу светлую царствия одей мя.
Иисусе, избави мя от одеяния студна.
Иисусе, украси мя, краснейший сый паче всех.
Иисусе, омый нозе Твои слезами моими.
Иисусе, омый главу мою от высокоумия.
Иисусе, возложение благоприятнейшее Богови.
Иисусе, положи слезы моя пред Тобою.
Иисусе, крепосте моя, осени мя.
Кондак 9
Всякое естество ужасается, како не Ангельский чин, ни слуги Своя огнь палящь, но человека плотяна, яко цвет увядающа, на служение сие страшное избрал еси. Пара убо жизнь наша; Ты же, безконечныя ради Твоея милости, по кратком служении, некончаемое общение Трапезы Твоея в невечернем дни Царствия Твоего священнодействующим обещаеши, зовущим: Аллилуиа.
Икос 9
Ветийствующий язык достойнаго благодарения не может принести Тебе, како человека не умалил еси в сем служении, но вышша сотворил еси от Ангел, да с ними непрестанно сие Твое благодеяние славословит, зовый сицевая:
Иисусе, Победителю смерти, оживи мя.
Иисусе, Потребителю ада, от ада избави мя.
Иисусе, Низложителю греха, безгрешна мя сохрани.
Иисусе, Истребителю всякия вражды.
Иисусе, престол Тебе руку мою утвердивый.
Иисусе, Херувима образ мне дал еси.
Иисусе, победную песнь Тебе поют Ангели.
Иисусе, новое пение Тебе вопиют Архангели.
Иисусе, вся Начала не престают хвалити Тя.
Иисусе, вся Власти Тебе единаго Властителя величают.
Иисусе, вся Господствия Тебе Бога своего исповедуют.
Иисусе, Воинства Небесная пред Тобою трепещут.
Иисусе, крепосте моя, осени мя.
Кондак 10
Спасти хотя люди Своя, избрал еси человека, яко Серафима некоего, поставляя его, да, яко угль горящь, потребляющь беззаконие, Тело Твое Пресвятое и Кровь Пречистую подаст алчущим и жаждущим вечныя жизни, да верно зовут: Аллилуиа.
Икос 10
Царю Превечный Иисусе Христе, восхотев человека человеком исправити, дал еси освященным рабом Твоим словеса Твоя в уста их и поставил еси их над языки и вся царства, еже падших возставляти, грехи очищати, немощных укрепляти, да велегласно давшему Тебе на сие крепость зовут:
Иисусе, основание всех благ.
Иисусе, насади добрая дела в сердце нашем.
Иисусе, Разорителю нечестия.
Иисусе, созижди в нас сердце сокрушенно.
Иисусе, разрушивый Крестом смерть, разруши вся беззакония наша.
Иисусе, исторгни во мне гнездящияся похоти.
Иисусе, близ мене буди, да не подвижуся.
Иисусе, укрепи мя всех к Тебе приближати.
Иисусе, добрый ответ о всех мне подаждь.
Иисусе, едина доброто, никогоже посрамивый.
Иисусе, достойных Себе всех нас яви.
Иисусе, крепосте моя, осени мя.
Кондак 11
Пение умиленное даруй мне ныне принести Тебе, да якоже Давид бияше в гусли, устроены пред Тобою, с воплем и гласом трубным, сице и мне, хотящу принести Тебе Твоя от Твоих о себе и о людех, устрой орган сердечный, вознеси глас мой плачевный, да всею душею и телом зову: Аллилуиа.
Икос 11
Света истиннаго и Бога, видя Тя Иоанн Предтеча, аще и свидетельствован от Тебе, яко больший его не воста, Ангелом и светильником Тобою наречен, узрев Тя к себе грядуща, трепетен глаголаше: «Не смею коснутися верху Твоему: Ты мя освяти». Что же аз сотворю, что возглаголю Тебе Богу моему, ко мне приходящу, прах сый и пепел? Но в служение сие велие Божественною благодатию Твоею избран, дерзну пети Тебе таковая:
Иисусе Преблагий, возсияй мне свет помраченному.
Иисусе, утеши мя ныне, в день утешения Твоего.
Иисусе, воздвигни мя возносити величия Твоя.
Иисусе, укрепи мя проповедати долготерпение Твое.
Иисусе, устрой мя возвеличити милость Твою.
Иисусе, научи мя поклонитися милосердию Твоему.
Иисусе, даруй ми хвалити благодать Твою.
Иисусе, всего мене освяти, яко храм Тебе, Бога Живаго.
Иисусе, сохрани от растления мене - дом Твой.
Иисусе, вся кости моя двигни на Твою похвалу.
Иисусе, непрестанное благодарение вложи в душу мою.
Иисусе, яви мя истиннаго поклонника Твоего.
Иисусе, крепосте моя, осени мя.
Кондак 12
Благодать Твою с небесе посли мне, Господи, благослови мя якоже Богоприимца Симеона руце благословил еси. Благослови люди Твоя о имени Твоем, сподоби доброе положити начало, и совершити служение сие ужасное, и приими от мене Жертву сию о всех живых и умерших, требующих Твоея милости, зовущих: Аллилуиа.
Икос 12
Поюще Твою неисповедимую любовь, покланяемся вси, окружившии олтарь Твой, схождению Твоему к сим Тайнам, воплощению и страданию; веруем с высоты на землю Тебе пришедша, да нас возведеши на Небо; имамы надежду, яко не постыдиши нас, служащих Тебе и верно зовущих:
Иисусе, разума Подателю.
Иисусе, даждь ми разумети любление Твое.
Иисусе, возми от мене злую всю мою волю.
Иисусе, вшедый ко мне, твори Сам еже хощеши благое.
Иисусе, даруй ми память щедрот Твоих.
Иисусе, отжени от мене память злаго обычая.
Иисусе, видение мое к Тебе привлецы.
Иисусе, слух мой к Тебе обрати.
Иисусе, обоняние мое к Тебе возведи.
Иисусе, осязание мое к Тебе устрой.
Иисусе, вкус мой Тобою услади.
Иисусе, вся моя чувства служити Тебе принуди.
Иисусе, крепосте моя, осени мя.
Кондак 13
О Господи, Спасителю! Даруй ми еще Тебе благоугодно пожити. Ты мне и хотети доброе, и действовати ныне священная Твоя устрой: истреби живущий во мне грех, живи же во мне, Безсмертный Господи, да мене, яко вернаго служителя Твоего, ни живот, ни смерть не разлучит от Тебе. Сам мне буди праведным воздаянием, да во веки зову: Аллилуиа.
Этот Кондак читается трижды, затем Икос 1 и Кондак 1.
Молитва пред Литургиею
Владыко Вседержителю, Господи Иисусе Христе Боже наш, не хотяй смерти грешником, но обращение давый благодатию Своею и показавый нам путь нов, свят, и образ прописавый древним блудником, древним мытоимцем, подав блуднице источники слез, молю: сподоби и мене ревновати их обращению и покаянию, и не поминай моих неисчетных соблазн, но мимоведи моя безчисленная прегрешения, Иже един еси безгрешный и милостивый, и каяйся о злобах человеческих, приемляй покаяние от всея твари, хвалимый непрестанно Небесными Силами, страшен сый Херувимом и Серафимом, от тех службу неизреченную приемляй, Собою же на земли Отцу Жертву вознес, заколение прием яко агня незлобиво, и Твоею Кровию освящь весь мир, повелел еси и нам, недостойным, Твоя от Твоих Тебе приносити. Ты и ныне, Владыко Пресвятый, презри моя безчисленная согрешения, и исполни мя Твоего хваления, сердце чисто созижди во мне, Боже, и дух прав обнови во утробе моей, и приими мя дерзающа входити во святилище Твое и вознести Тебе Твоя от Твоих, якоже предал еси святым Твоим учеником и Апостолом: и мы от тех приемше, страшней сей Тайне причастницы бываем, не по нашему достоинству, но Твоего ради милосердия. Омый убо, Владыко Христе Боже наш, порок от души моея, и всего мя отнюдь очисти силою Твоею невидимою и духовною десницею: несть бо вещи утаевающияся от Тебе, но вся обличена и нага, и явленна пред очима Твоима суть. Вем, Владыко Человеколюбче, яко несоделанная моя зрита очи Твои, и в книгах Твоих вся написана суть. Темже не омерзи моего недостоинства и лица Твоего не отврати от мене, да не возвращуся, смиренный, посрамлен и постыжден от Тебе, но сподоби мя неосужденно поработати святым Твоим Тайнам. Яко подобает Тебе всякая слава, честь и поклонение, со Безначальным Твоим Отцем и с Пресвятым и Животворящим Твоим Духом, ныне и присно, и во веки веков. Аминь.
По благословению Архиепископа Херсонского и Таврического Иоанна