Кондак 1
Избранная угоднице Христова Досифее, достославная затворнице, богоблаженная старице и чудотворице богодарованная, величающе прославльшаго тя Господа, умиленное сие пение тебе приносим, ублажая подвиги и труды твоя, любве ради Господа тобою подъятыя, восхваляем дивнаго во святых Своих Бога нашего, давшаго тебе благодать величия Своего и научившаго нас любовию пети тебе:
Радуйся, преподобная и богоносная мати наша Досифее, о спасении нашем Царя царей умоляющая!

Икос 1
Ангелов Творец и всея твари Содетель и Промыслитель всех судеб человеческих от рода благоверных Государей российстих избра тя, преподобная и всехвальная мати наша Досифее, и дары духовными украси тя, угоднице Христова, ими же ты ближним во спасение послужила еси. Мы же, величая ныне многотрудное житие твое и на всеблагомощное предстательство твое пред престолом Царя царствующих уповая, таковыя похвалы с надеждою и любовию приносим ти:
Радуйся, яко свято и праведно на земли пожила еси.
Радуйся, яко сего ради многи скорби и труды подъяла еси;
Радуйся, яко вся, ради Возлюбившаго тя, претерпела еси.
Радуйся, обители твоея утверждение и похвало.
Радуйся, иночествующих ликов пречудная красото.
Радуйся, христианскому роду присное утешение.
Радуйся, унывающих благодатное ободрение.
Радуйся, любящым и чтущым тя ходатаице спасения.
Радуйся, преподобная и богоносная мати наша Досифее, о спасении нашем Царя царей умоляющая!

Кондак 2
Видя Всеблагий Спаситель любы и согласие боговенчанных родителей твоими родителей твоих, благоверныя императрицы Елизаветы и графа Алексия, благоволи им, аки утешение и отраду тя, святая мати, даровати. Ты бо, доброму житию и вере их подражая, от младых ногтей твоих почала еси умиленно Господеви воспевати: Аллилуйя!

Икос 2
Разумом богопросвещенным от дней детства твоего озаренная, царевно благоверная, все упование и вся надежды твоя на Иисуса Сладчайшего, венчающаго царей земных и путие спасения верных чад Своих промышляющего, по примеру матери твоея, навыкла еси возлагати. И в таковом добромыслии возрастая, начаток дел всех твоих благих и смирения велиего твоего твоего положила еси. Мы же вся сия, убо поминаюше, просим тя, наставнице наша небесная, веру нашу слабую укрепи, надежду обнови, любы угасающую в нас преобрази молитвы твоима, да зовем ти сице:
Радуйся, хвалити и превозности имя Господне ны научающая;
Радуйся, детское доверие ко Вседержителю в сердцех наших пробуждающая;
Радуйся, от сомнений и маловерия теплохладныя души наша исцеляющая;
Радуйся, от суеты мирския помыслы наша исцеляющая;
Радуйся, от пагубнаго уныния чтущих тя избавляющая;
Радуйся, мрак треволнений и скорбей небесною отрадою разгоняющая;
Радуйся, к благодарственным молитвам всех нас призывающая;
Радуйся, тихою радостию духовною нас всех наполняющая;
Радуйся, преподобная и богоносная мати наша Досифее, о спасении нашем Царя царей умоляющая!

Кондак 3
Силою и благодатию Всесвятаго Утешителя Духа хранимая, угодница Божия, не прилепила еси сердца твоего к скоропреходящим благам мира сего, лепоте чертогов императорских и властительству самодержавному, обаче о вечных сокровищах небесных помышляла еси; Господеви же, тако тя умудрившему возносила еси ангельское пение: Аллилуйя!

Икос 3
Имуще попечение непрестанное о блазе державы российския, императрица Екатерина Великая повеле доставити тя, принцессо Августо, из стран дальних в стольный град Петров, дабы не возмогли бы нечестивыя людие смуты во отечестве нашем учинити. Ты же, внимая словесам царским, ближних и дальних твоих ради блага согласилася еси оставити мир и во обители Проповедника покаяния в затворе пребывати. Сего ради глаголем ти сице:
Радуйся, волею твердою воли своея совлекшаяся и всего себе воле Божией предавшая;
Радуйся, совершенным послушанием росою Святаго Духа пламень страстей угасившая;
Радуйся, чистотою сердца твоего Сладчайшаго Господа Иисуса созерцавшая;
Радуйся, внутреннею красотою Креста Христова душу твою озарившая;
Радуйся, на путь многотруднаго жития преподобническаго в часы скорби вступившая;
Радуйся, величие подвига самоотречения христианского явившая;
Радуйся, в затворе сущее Богу Предвечнему преславно послужившая;
Радуйся, подвигом древних амм- пустынниц подражавшая;
Радуйся, преподобная и богоносная мати наша Досифее, о спасении нашем Царя царей умоляющая!

Кондак 4
Буря испытаний не поколеба упования твоего на премудрый Промысл Божий, егда воле государыни Екатерины следуя, удалилася еси в богоспасаемую обитель, иже во граде Москве, тамо бо в руце Милосерднаго Спасителя ся предавая, воспела еси с надеждою Укрелявшему тя в час скорби душевныя Господу: Аллилуиа.

Икос 4
Слыша о великих подвигах веры и благочестия преподобных жен, усердно ради Жениха Небеснаго подвизавшихся, благоверная княжно, вся красная мира сего презревше, на служение Христово уготовала еси душу твою, яко храм Духа Святаго освященный. Сице молим тя: поспеши в помощь нам, в слабости естества нашего и искушениех изнемогаюшим и елей сострадания твоего и нам подаждь вопиющим ти сице:
Радуйся, богомудрым наставлениям святителя Платона внимавшая;
Радуйся, тленная мира сего ни во что же вменившая;
Радуйся, душу твою в горняя обители устремившая;
Радуйся, в Бозе токмо отраду и утешение обретавшая;
Радуйся, равноангельное житие на земли сущее стяжавшая;
Радуйся, истиннаго монашескаго делания ревнительнице;
Радуйся, подвигов угодников Божиих подражательнице;
Радуйся, чистоты сердечныя изрядная хранительнице;
Радуйся, преподобная и богоносная мати наша Досифее, о спасении нашем Царя царей умоляющая!

Кондак 5
Боготканную одежду в святом пострижении в московской обители святаго Иоанна Предтечи прияла еси, дщи царицы земныя, горячую молитву излияла еси ко Царю Небесному, да укрепит тя в монашеском делании, со всеми иночествующими радостно воспевая Господеви: Аллилуиа.

Икос 5
Видя Господь наш Иисус Христос веру твою и усердие преизрядное твое, яко добродетелей древних пустынножительных жен и благоверных прародителей твоих всехвальную и предостойною преемницею явилася еси, с нимиже ныне ликовствуеши вкупе во обителех райских, прославляя пресвятую Троицу Пресущественную и Пребожественную. Ейже ныне предстоя в веселии со святыми Ангельскими лики, святая мати Досифее, сотвори молитвы о нас, с любвию светлую память твою на земли чтущих. Сего ради величаем тя сице:
Радуйся, верою пламенною твоею патриарху Филарету последовавшая;
Радуйся, упованию на Предвечнаго Бога царю Михаилу подражавшая;
Радуйся, тихому нраву боговенчаннаго царя Алексия поревновшая;
Радуйся, благочестие и кротость царицы Наталии восприявшая;
Радуйся, твердую волю Петра Великаго унаследовавшая;
Радуйся, терпению и смирению Екатерины Первыя прилежавшая;
Радуйся, благому нраву венценосныя матери твоея уподобившаяся;
Радуйся, аки отец твой, добротою и человеколюбием просиявшая;
Радуйся, преподобная и богоносная мати наша Досифее, о спасении нашем Царя царей умоляющая!

Кондак 6
Проповедница богоблагодатная и ревнительнице жития иноческаго воистину явилася еси еси, благословенная мати наша Досифее, ясно показуя стезю, ведущую к Горнему Царствию, всем желающим наследники быти онаго, отверзая в себе образ истиннаго монашества, делы и словесы научая убегати суетных сплетений и воздвизая присно воспевати Божественную песнь: Аллилуиа.

Икос 6
Возсияла еси, преподобная мати Досифее, дарами Всесвятаго Утешителя Духа, яже стяжала еси всеусердныма подвизи твоима в затворе подъятыма, зане утратила еси ни веры в Милосердие Бога Вышняго, ни надежды на всеблагий Промысел Его, ни любве к ко Спасителю и ближним твоим. Сего ради любви неизреченныя ко Творцу и всем грешным чадом исполнися сердце твое. Мы же, имуща тя молитвеницу и предстательницу нашу пред Богом неусыпную, с умилением таковыя похвалы приносим ти:
Радуйся, Всемилосердному Богу житием твоим угодившая;
Радуйся, сего ради от Него прославление приявшая;
Радуйся, тщету и прелесть мира сего презревшая;
Радуйся, яко тобою красоту благочестия познахом;
Радуйся, яко тобою суету мирскую в себе попрахом;
Радуйся, постигати премудрость вечную научающая;
Радуйся, крест наш терпеливо носити нам пособствующая;
Радуйся, молящихся тебе дарами Духа Святаго обогащающая;
Радуйся, преподобная и богоносная мати наша Досифее, о спасении нашем Царя царей умоляющая!

Кондак 7
Хотяще Всемудрый и Премилосердный Спаситель наш возжечь новый маяк спасения для верных чад Своих, дарова тя, богоблаженная мати, благочестивым людем всего мира христианского в помощь, покров и защиту, да добродетелем твоим подражая, сподобимся купно с тобою вовеки Господеви воспевати : Аллилуйя!

Икос 7
Новую показа милость правоверным христианом Человеколюбец Господь, яко благоволи прославити тя и явити в тебе благодать Свою чудотворящую, егда доброю волею благовернаго императора Павла вышла еси, богоносная мати, из затвора твоего и богомудрою наставницею всем к тебе грядущим явилася еси. Ты же, никого от пришедших не отринув, к пользе ближних твоих всеусердно послужила еси. Мы же, веруя, яко ты ныне во благодати Господней еси, сугубо внемлеши мольбам нашим с надеждою, отрадою и умилением воспеваем ти сице:
Радуйся, милосердия Святыя и Живоначальныя Троицы к нам всеславная ходатаице;
Радуйся, ныне пред Престолом Божиим на небеси о церкви предстательнице;
Радуйся, слепотствующих в законе Господнем пречудная руководительнице;
Радуйся, вручающим себе твоему ходатайству в час смерти добрый утешительнице;
Радуйся, слабости и тревоги наша в силу духовную и мужество претворяющая;
Радуйся, тихим светом надежды ны благодатно озаряющая;
Радуйся, скорби и болезни безропотно нести научающая;
Радуйся, в богомыслии разум нас утверждающая;
Радуйся, преподобная и богоносная мати наша Досифее, о спасении нашем Царя царей умоляющая!

Кондак 8
Странное и преславное чудо видяще, Тобою совершаемое, святая мати наша Досифее, усердно просим тя: моли тобою чудодействующаго Бога, да и мы устранимся мира суетнаго, возможем безбедно житейскую преплыти пучину и в тихое пристанище спасения достигнути ходатайством твоим, во веки благодарственно воспевающе: Аллилуия.

Икос 8
Вся была еси в Бозе, прехвальная мати Досифее, аще на земли пребывала еси в непрестаннем бдении и пощении, дар прозорливости и предведения от Духа Святаго прияла еси, и в юношех, совета духовнаго к тебе ради пришедших, прозрела еси будущих старцев богоносных Моисея Оптинскаго и Исайю Саровскаго, и на путь монашеский их благословила еси. Ныне же духом Престолу Божию купно с ними предстоя, всем чтущим вас подаеши цельбы. Сице просим тя: не забуди и нас, к твоему заступлению притекающих и вопиющих ти:
Радуйся, со Христом вечно соцарствуюшая и о нас Его умоляющая;
Радуйся, от горних высот к земнородным милостиво приникающая;
Радуйся, чудес пучино, всех нас неоскудно напояющая;
Радуйся, и неверным дары целебныя милостиво подавающая;
Радуйся, звездо Божия благодати, еюже мрак в нас прогоняется;
Радуйся, яко тобою лицеприятие и человекоугодие посрамляется;
Радуйся, кающимся благодатное с небес снисхождение;
Радуйся, подвизающимся благое наставление и укрепление;
Радуйся, преподобная и богоносная мати наша Досифее, о спасении нашем Царя царей умоляющая!

Кондак 9
Всем приходящим к тебе, угоднице Христова, была еси яко мати любезная: алчущих напитавше, жаждущих напоивше, душевную скорбь и тесноту ижденувше и помазующе всех елеем радования духовнаго. Мы же ныне молим тя, богоблаженная Досифее, вознеси молитвы твоея о нас ко Всеблагому Утешителю, да сподобимся купно с тобою во веки веков Святей Троице воспевати: Аллилуйя!

Икос 9
Ветии многовещанныя недоумевают, како ублажити тя, преподобная мати Досифее, от премудрости Божия разум духовный воспиявшую и мнозих на пути спасительном утвердившую; ты бо красоты мира суетнаго пренебрегше, на тесный путь стопы своя направивше в постех и плаче житие претрудное, яко древнии подвижницы, провела еси, темже ныне утешение от Подвигположника Христа сподобилася еси прияти. Мы же с надеждою несомненною на предстательство твое таковыя похвалы приносим ти:
Радуйся, Бога Отца Безначальнаго служительнице благоговейная;
Радуйся, Христова Невесто прекрасная и преблагословенная;
Радуйся, Бога Духа Всесвятаго избранное жилище.
Радуйся, к Богородице наша теплая молитвеннице;
Радуйся, сердца наша от скверн греховных очищающая;
Радуйся, суетою помраченный наш ум просвещающая;
Радуйся, телесных недугов пречудная свободительнице;
Радуйся, душевных болезней благодатная исцелительнице;
Радуйся, преподобная и богоносная мати наша Досифее, о спасении нашем Царя царей умоляющая!

Кондак 10
Спасения вечнаго ходатаице всеблагомощная нам являешися, мати святая Досифее, яко присно во обителех райских, в селениях праведников пребываеши, но и нас, тебе тепле почитающия, не оставляеши, наставляя к разуму Божественному и деланию усердному заповедей Христовых и всякая благополезная прошения наша исполняеши, подвизая и нас пети с тобою купно хвалебную песнь Богу: Аллилуиа.

Икос 10
Стена твердая и прибежище благоутишное всем с молитвою теплою и верою несомненною к заступлению твоему притекающим явилася еси, ищущим спасения токи благодати Божия источая еще во дни земнаго жития твоего, прехвальная мати Досифее, приобщилася еси радостей Царствия Небеснаго, иже приготови Господь для всех любящих Его и волю Его творящих; ныне же во славе предстоиши купно со всеми святыма, в стране Российстей просиявшима пред Престолом Единосущныя и Нераздельныя Троицы и молишися о всех паки и паки с надеждою о всех, взывающих ти сице:
Радуйся, в терпении и кротости стяжати венцы нетленныя нас научающая;
Радуйся, в суете и нерадении жительствующих благодатно вразумляющая;
Радуйся, предстательством твоим глубинныя раны сердец людских исцеляющая;
Радуйся, отчаявшихся и унылых в надеющихся на Господа преображающая;
Радуйся, в земных испытаниих путь спасения нам озаряющая;
Радуйся, уста наша благодарением Господу за все исполняющая;
Радуйся, в благости Отца нашего Небеснаго николиже сомневатися нас научающая;
Радуйся, трезвению духовному и молитве сердечней на всякое время нас научающая;
Радуйся, преподобная и богоносная мати наша Досифее, о спасении нашем Царя царей умоляющая!

Кондак 11
Пение хвалебное воспеваем тебе, благословенная мати Досифее, и с любовию припадаем к святому образу твоему, прославляюще терпеливое житие твое, безмолвие твое высокое, смирение нелицемерное, молитву непрестанную, воздержание совершенное, и чистоту боголюбезную души и тела; ты же, святая покровительнице наша, помози и нам подражати твоим добродетелем, да возможем богоугодно пети Создателю нашему: Аллилуиа.

Икос 11
Свет нетварный купно с сонмом преподобных созерцаеши ныне, богоблаженная мати Досифее, ибо предстоиши со святыма сродниками твоима, великима княгинями Елисаветою Алапаевскою и Анастасиею Киевскою, святыма Царственныма страстотерпцы пред престолом Всесвятыя и Единосущныя Троицы и молишися о спасении и благоденствии всех христиан. Сего ради умиленно просим тя: подаждь нам от елеа твоего, ибо светильницы наша угасают, да не постигнет нас тьма кромешняя, но да внидем на брак нетленный, предстательством твоим снабдеваемы, верою и любовию восхваляем тя, зовуще:
Радуйся, нищетою духовною царство Божие стяжавшая;
Радуйся, кротости ради богоблаженную землю обетования унаследовавшая;
Радуйся, страданиями в кратковременном житии славу вечную восприявшая;
Радуйся, яко исповеда Тя Христос пред Отцем Своим Небесным;
Радуйся, яко и пред ангелы Своими Господь сил прослави тя;
Радуйся, душетленных навыков и злых обычаев удалятися нас научающая;
Радуйся, в соблазнех и прельщении сущих помощь небесную посылающая;
Радуйся, в милосердии к себе и ближним наших возрастати нам помогающая;
Радуйся, преподобная и богоносная мати наша Досифее, о спасении нашем Царя царей умоляющая!

Кондак 12
Благодать Господню в тебе, богоносная мати, почивающую, мы ясно зрим, и усердно благодарим Господа за таковую милость граду Москве и всему нашему отечеству. Ты же, святая заступнице наша, приими от нас недостойных похвалы сия и испроси нам у Господа сил вся полезная для жизни временныя и вечныя и молитвы твоима сподоби от всего сердца воспевати нашему Спасителю небесную песнь: Аллилуиа.

Икос 12
Поюще святое и праведное житие твое, преподобная мати наша Досифее, величаем тя, Христову Церковь возвеличившую житием твоим, яко ты еси дивная наставнице всем, подвизающимся в делании иноческом и утешительнице и помощнице всех, на предстательство твое упование возлагающих. Сего ради мы с надеждою и верою несомненною таковыя похвалы приносим ти:
Радуйся, молитвы родителей о чадех во благо исполняющая;
Радуйся, доброе попечение чад о родителех и старцех освящающая;
Радуйся, в вере спасительной, любве и милосердии нас укрепляющая;
Радуйся, надежду отрады вечныя верным христианом утверждающая;
Радуйся, заблуждшим путь истины Господней указующая;
Радуйся, во уныние падших нас благодатно ободряющая;
Радуйся, любовию Божиею нас согревающая;
Радуйся, сомнения наша, яко прах, развевающая;
Радуйся, преподобная и богоносная мати наша Досифее, о спасении нашем Царя царей умоляющая!

Кондак 13
О, преподобная и богоносная мати наша Досифее, заступнице, утешительнице наша и добрая покровительнице, от бед и скорбей скорая избавительнице! Приими нынешнее наше молитвенное приношение и ходатайством твоим сподоби нас стати одесную Престола Божия, идеже предстоят праведных лики и славословят Творца всех песнию: Аллилуиа, Аллилуиа, Аллилуиа.

Автор акафиста Евгений Владимирович Храповицкий