Акафист святой преподобной Екатерине Леснинской Акафист святой преподобной матери нашей Екатерине Леснинской (графине Ефимовской)

Кондак 1
Избранная чудотворице и невесто Христова, преподобная мати наша Екатерино, верная ученице богоноснаго Амвросия и сотаинице царя святаго Николая, обители Леснинская устроительнице, скорая недугов душевных же и телесных целительнице, приими от нас с любовию приносимое тебе хвалебное пение, и, яко имущая дерзновение ко Господу Иисусу, молитвами твоими от всяких нас бед и скорбей свободи зовущих:
Радуйся, благословенная мати наша Екатерино, светом истины Христовой нас преображающая.

Икос 1
Ангелов Творец и всея твари Содетель в Троице Един сый, призва тя, богоносная мати наша Екатерина, от чреды сродник и служителей царя земнаго, да послужиши Иисусу Сладчайшему подвиги твоими, молитвами, обителей устроением, милосердием, яко преходящую земную славу употребиши для славы Предвечнаго Царя. Ты же от младых бо лет чистоту души и тела соблюла еси, Христу любовию усердно последовала еси и достигла еси совершенства духовнаго. Сего ради слышиши от нас сия достодолжныя похвалы:
Радуйся, пречудная избраннице Промысла Божественнаго;
Радуйся, звездо прекрасная небосвода церковнаго;
Радуйся, народов славянских пречудное украшение;
Радуйся, не взирая на угрозы врагов Божьих веру распространявшая;
Радуйся, деяниями твоими в вере и благочестии утверждающая;
Радуйся, Соломоновой премудрости благодатная сонаследнице;
Радуйся, праведнице Божия, еяже правда сияет непомеркаемо во веки;
Радуйся, невесто Спасова, прославленная на небеси и на земли;
Радуйся, благословенная мати наша Екатерино, светом истины Христовой нас преображающая.

Кондак 2
Видящи, преподобная Екатерино, в доме отчем заповедей Божиих усердное хранение и в благочестии преспеяние, от юности навыче о спасении душевнем паче всего ревновати, и в теплых к Богу молитвах Ему воспевати: Аллилуиа.

Икос 2
Разум Христов восприяла еси, богоносная мати наша Екатерино, яко тщалася еси угождати Господу Иисусу трудом, верою и молитвою от дней отрочества твоего, благочестивым и святым предком твоим в подвигах богоугодных последуя, родители твоими благонравными в вере наставляема была еси. Мы же, видяще знамение благословения Божия на трудех твоих, иже на заре земнаго жития твоего, гласы хвалебными взываем ти сице:
Радуйся, корене царственнаго отрасле благая;
Радуйся, графского рода прозябение честное;
Радуйся, терпению и мудрости царице Екатерине последовавшая;
Радуйся, щедроты и милосердием кроткия Елизаветы вдохновленная;
Радуйся, материю в любви к Богу, святым и ближним умудренная;
Радуйся, отцем твоим в уповании на Христа утвержденная;
Радуйся, Нектарии преподобной добродетели унаследовавшая;
Радуйся, благочестию ея и молитвенности подражавшая;
Радуйся, благословенная мати наша Екатерино, светом истины Христовой нас преображающая.

Кондак 3
Силу благодати Божия познала еси, пречудная мати, во дни юности твоея, егда, во имениех отца твоего, душою твоею возносилася к миру горнему, ты бо земнаго обручника не познала еси, все упование твое на Жениха Небеснаго возложивше. Людем многим милость сотворила еси, чад просвещению усердно содействовала, да возмогут все Господа верно славити и царю земному правдою служити. Тако начало великих подвигов твоих положила еси, Господеви же выну тя укреплявшему и воодушевлявшему воспевая: Аллилуйя.

Икос 3
Имущи ревность многую о Господе, облачения придворные на ризы иноческия пременила еси, угоднице Христова, но и в обителех суще, служения государю и брату твоему не оставила еси, яко верною наперсницею и боговдохновенною сотаиницею была императору Николаю Второму. Мы же, зряще духовное восхождение твое от силы в силу, со благоговением тебе взываем:
Радуйся, от юности твоея чтение слова Божия возлюбившая;
Радуйся, молитвами и преобильным благотворением Богу угождавшая;
Радуйся, целомудрием и воздержанием себе украшавшая;
Радуйся, благородная дево, подвигам святой Евгении последовавашая;
Радуйся, инокине премудрая, дерзновению святой Екатерины поревновашая;
Радуйся, истины Христоей дерзновеная поборнице;
Радуйся, Помазанику Божьему верою и правдою послужившая;
Радуйся, Царя Небесного всем житием твоим возвеселившая;
Радуйся, благословенная мати наша Екатерино, светом истины Христовой нас преображающая.

Кондак 4
Бурю сомнений преодолела еси, мати честная, егда прибыла еси в пустынь Оптинскую, и от старца Амвросия благословение прияла еси на создание обители новыя, идеже служение Марфы и Марии воплотила еси в делех твоих, молитву и попечение о ближнем, просвещение духовное и чад воспитание, дела милосердия и красоты сотворение умело сопрягая. Во славу Христову многие подвиги поднимая, неустанно воспевала еси Господеви: Аллилуйя.

Икос 4
Слышавше, яко к подвигом богоугодным боголюбезныя жены привела еси, святая мати, устроив обитель милосердия в восточных пределах страны Польския, научала их в житии мирском творити дела благия и во благочестии, любве к Христу и ближнему возрастати, в добродетелех утверждатися, многия прихождажу к тебе и поучахуся, ты же собор чад твоих духовных к соработничеству тебе привекла еси, образ любве Божественней явила еси, благословенная мати Екатерино. Сице молим тя: приклони и к нам милосердие Божие и прими благоговейно приносимыя ти величания сия:
Радуйся, благословением святаго старца Амвросия осенненная;
Радуйся, самим Господом к святому содружеству сему приведенная;
Радуйся, от рук преподобнических ярем Господень иноческаго жития любезне приявшая;
Радуйся, умнаго трезвения неусыпная хранительнице;
Радуйся, лествицею добродетелей к небесным обителем возшедшая;
Радуйся, неведующих Бога и окамененных сердцем к покаянию пробуждающая;
Радуйся, яко твоими молитвами кающиися плена греховнаго свобождаются.
Радуйся, яко по молитвам твоим Врата Небесная верным отверзаются;
Радуйся, благословенная мати наша Екатерино, светом истины Христовой нас преображающая.

Кондак 5
Боготечная пресветлая звезда явился еси, святая мати Екатерино, небо церковное украшающая и всех блудящих по морю страстнаго жития сего данною тебе от Солнца Правды Христа Иисуса, истиннаго Бога, благодатию озаряющая, мрак печалей и мглу всяких недуг и скорбей прогоняющая, ты бо наставляеши всех к тебе с верою притекающих на путь спасенный, к вечному Небесному Отечествию ведущий, поющих Богу: Аллилуйя.

Икос 5
Видевше богоугодное житие, премногую любы к Богу и ревностное благочестие иноческое, преподобная мати, многие ближние и дальние приходжаху во обитель твою, яко прославила еси ю мнозими чудесы и исцелении, такожде. Сие же убо вспоминающе простим тя, наставнице наша небесная, возведи в сердцах нас обители Духа Всесвятаго, да тобою просвещаемы сподобимся жизни вечныя. Сего ради умиленно зовем ти сице:
Радуйся, светлостию жития твоего возсиявшая.
Радуйся, покаяния рачительный проповеднице
Радуйся, любовь нелицемерную в нас воспламеняющая;
Радуйся, кротость и смирение в себе нам показующая;
Радуйся, в вере Божественной нас укрепляющая;
Радуйся, надежду спасения верным утверждающая;
Радуйся, любовию Божиею нас согревающая;
Радуйся, душ наших к Царствию Небесному возведение;
Радуйся, благословенная мати наша Екатерино, светом истины Христовой нас преображающая.

Кондак 6
Проведнице любве милосердныя и ревнительнице жития преподническаго, благословенная Екатерино, воистину явилася еси, яко девства чистый сосуд елеем молитвы и любви наполнивше, неугасимый светильник в сердце своем возжгла еси, с нимже бодренно в сретение Небесного Жениха изшедше, в чертог Его пресветлый возшла еси. В женстем бо естестве мужески победила еси невидимаго врага, преукрашена бывши добродетельми, яко цветы благоуханными. Зряще сия и на молитвы твоя за ны уповая, Утешителю Всеблагому поим: Аллилуйя.

Икос 6
Воссияла еси святостию подвигов твоих, мати досточудная: огнь бо веры крепкия, надежду несумненную и любовь нелицемерную в сердце своем сокрыла еси. Сице молим тя: огради нас от всякаго зла, от скорбей и болезней избави ны и не посрами убо упования нашего, вемы бо, яко много может молитва твоя у Царя Небеснаго, предстоиши бо пред престолом Всевышняго и предстательствуеши о всех, вопиющих ти:
Радуйся, покаянием души наша обновляти научающая.
Радуйся, от уныния и скорби всех нас исцеляющая.
Радуйся, от ропота и неверия свобождение.
Радуйся, милосердия Божия к нам приклонение.
Радуйся, путешествующим благополучное к дому возвращение.
Радуйся, заблудших в пути к жилищу приведение.
Радуйся, сердца злых людей, враждующих противу нас, смягчающая.
Радуйся, братолюбием и ревностию о спасении ближнего ущедряющая;
Радуйся, благословенная мати наша Екатерино, светом истины Христовой нас преображающая.

Кондак 7
Хотя благочиние и святость в обители Леснинской утверждати, настоятельство честное высоко пронесла еси, святая исповеднице, иноческаго духа не угашая. Чисту и непорочну яви тя Господь во утешение чадам твоим. Мы же, благодаряще Бога, воспеваем Ему о тебе: Аллилуия.

Икос 7
Новое испытание посла Господь всему миру христианскому, егда войнами и восстаниями колеблемы бе страны многия. Ты же, святая Екатерино, в во время нашествия безбожников в стране российской верность Христу сохраняти поучала еси люди, окрест тя сущия, призывающи всех твердо во истине Христовой стояти, в нейже и нас непоколебимы пребывати настави и прими лики сия:
Радуйся, всех с верою приходящих к тебе благодатно освящающая;
Радуйся, усердно призывающим тя помогающая;
Радуйся, возлагающим по Бозе упование на тя пособствующая;
Радуйся, крепкая защитнице наша от врагов видимых и невидимых;
Радуйся, ропщущих на промысл Божий с тяготами жизни примирение.
Радуйся, неимущим работы и крова скорое и преславное поможение.
Радуйся, доверие и любовь к Богу воспламеняющая;
Радуйся, сердца злых людей, враждующих против нас, смягчающая;
Радуйся, благословенная мати наша Екатерино, светом истины Христовой нас преображающая.

Кондак 8
Страшное известие об убиении императора Николая и венценосных сродник твоих принесе душе твоей благородной, святая Екатерино, скорбь тяжкую и муки велия; яко слезами орошала еси моления об упокоении Помазанника Божьего. Но уповая на Иисуса Воскресшего утешение стяжала еси; ныне же купно со царственными страстотерпцы предстоиши престолу Богочеловека, Его милосердие приклоняеши к нам, милости Христовой чающим и поющим о тебе Агнцу Божию: Аллилуйя!

Икос 8
Всем вся была еси, богомудрая мати наша Екатерино, во дни великия войны и брани братоубийственныя, егда от буйных и своевольных людий многия скорби и тяготы претерпела еси кротце, людем же твоим утешение и вспоможение даровала еси обильно. Во Спасителе токмо силы и отраду непрестанно обретала еси. Мы ныне дивимся кротости и терпению твоему, и яко верной подражательнице Христовой, исповедником равнославной, ревность твою о духовнем и мирском благе ближних твоих восхаляя, умиленно зовем ти:
Радуйся, кротости правило, за изгнавшия тя молившаяся, яко за благотворцев:
Радуйся, во изгнании твоем неправеднем выну Бога славившая;
Радуйся, временными скорбьми блаженства вечнаго достигшая;
Радуйся, на высоту совершенства духовнаго возшедшая;
Радуйся, блаженство изгнанных правды ради достойно получившая;
Радуйся, в путь изгнания кротко и незлобиво изшедшая.
Радуйся, многих людей от погибели временныя и вечная спасшая;
Радуйся, в стране сербстей новую отчизну и радость велию обретшая;
Радуйся, благословенная мати наша Екатерино, светом истины Христовой нас преображающая.

Кондак 9
Вся помыслы своя к Богу возвела еси, святая Екатерино, странницею и пришельцею в жизни сей себя помышляя, купно с сестры обители твоея оставила еси пределы Польския и в страну Румынскую пресилася еси, праведному Аврааму, правды Божия взыскующему, преусердно последуя, обитель новую себе на Небесех сотворила еси, и ныне тамо победную песнь Христу-Жизнедавцу со ангелы купно всерадостно воспеваеши: Аллилуйя.

Икос 9
Витийствующий язык не возможет достойне и справедливе изрещи и воспети всю полноту богоугоднаго жития твоего, всехвальная мати Екатерино, ты бо зову Господню внимая, плоды сладкоуханными Церковь обвеселила еси, и ныне жаждущая сердца, росою орошаеши духовною. Сего же ради просим тя: озари души наши благодатию Христовой и утверди сердца наши по Бозе горети и приими величания сия:
Радуйся, алкавшая и жаждавшая правды, яко ныне насыщаешися;
Радуйся, благ преподобных от века уготованных наследия удостоенная;
Радуйся, со всеми святыми Богу угодившими участие обретшая;
Радуйся, любовию твоею Богу Сыну подражавшая;
Радуйся, чистоту твою Богу Духу Святому сохранившая;
Радуйся, во славе царственней Богу-Отцу ныне предстоящая;
Радуйся, мудрая страннице Отечествия горняго искавшая;
Радуйся, нозе твои в путь спасительный для многих направившая;
Радуйся, благословенная мати наша Екатерино, светом истины Христовой нас преображающая.

Кондак 10
Спастися хотяще вернии от бед и скорбей ко образу твоему священному молебно притекаем. Ты же, о чудотворице святая, помози нам, немощным, утоли скорбь нашу и на путь правый заблуждающих настави нас, да не довольно есть к прославлению многих и предивных чудотворений твоих, святая исповеднице, обаче, яко благая и милостивая Христова подражательнице, благосердием твоим на нас грешных воззри, и святыми и благомощными твоими молитвами ко Господу мир душевный нам испроси, во еже взывати выну Ему: Аллилуиа.

Икос 10
Царственным величием просияла еси, богомудрая и кроткая мати, егда предстала еси королю сербскому Александру с просьбою беженцев русских благоустроити в державе его; государь же благочестивый с любовию срете тя, милость сотвори тебе и дружбою своею почти тя. Ты же, святая Екатерино, за вся Царя Христа благодарила еси, яко чаяния и надежды твоя не были тщетными. Сице молим тя: утверди и наша слабыя сердца в уповании на Милосердие и Всемогущество Божие, да возможем и мы верою превозмогати невзгоды мира сего. Тебе, милостивой заступнице нашей таковыя похвалы с надеждою вознесем:
Радуйся, христианских правителей в милосердии утверджающая;
Радуйся, бедствующих благонадежное избавление;
Радуйся, колеблющихся в вере твердое ограждение;
Радуйся, погибающих надеждо и исправление;
Радуйся, нас от клеветы и злословия сохраняющая;
Радуйся, сомнения наша, яко прах развевающая;
Радуйся, во уныние падших нас ободряющая;
Радуйся, нас к Вечной радости Небесной ведущая;
Радуйся, благословенная мати наша Екатерино, светом истины Христовой нас преображающая.

Кондак 11
Пение молитвенное преусердно возносила еси, всехвальная мати, в пределех сербских, и королем благоверным вдохновляемая, вдов и дев народа того к житию иноческому привлекла еси, и явилася еси благою наставницею има и русским инокиням, с тобою новую отчизну у южных славян обретших. Святителем Антонием благословенная, святая Екатерино, паки начало женскому монашеству в Сербии положила еси. Мы же, вере и любве твоея последовати желая Господеви поим: Аллилуйя.

Икос 11
Свет нетварный и неугасимый сподбилася еси узрети на смертнем одре твоем, всеблаженная мати, егда видение Иерусалима Небеснаго ниспосла тебе Иисус Сладчайший, в Его руки с радостию предала еси дух твой. Обаче странствие земное совершивше, от дел благотворения не почила еси, преподобная Екатерино, но приявше от Христа велию благодать чудотворения, всем с верою к тебе притекающим дары благодатная всещедро подаеши. Сего ради вопием ти сице:
Радуйся, всех тебя почитающих под твою опеку принимающая;
Радуйся, в безысходных обстояниях руку помощи нам простирающая;
Радуйся, об обращении ко Христу всех заблудших умоляющая;
Радуйся, благую христианскую кончину нам посылающая.
Радуйся, благодатное помилование у Господа Иисуса испрошающая;
Радуйся, от тяжких грехов и пристрастий к ним избавляющая;
Радуйся, от нас подспудныя искушения пречудно удаляющая;
Радуйся, всех верных в истинней вере Христовой сохраняющая;
Радуйся, благословенная мати наша Екатерино, светом истины Христовой нас преображающая.

Кондак 12
Благодать велия дадеся ти, преподобная мати наша Екатерино, сподобилася бо еси пред Престолом Вседержителя стояти, идеже свободь от печали и воздыхания; веруем несомненно, яко молишися за ны купно с святыми прародители твоима, старцем Амвросием и святителем Тихоном, радостно взывая Царю Славы Христу: Аллилуия.

Икос 12
Воспевая помощь твою благодатную, мати богоносная, яко часто сами прошения исполнением предваряеши, славословя твоя чудеса, богоблаженная мати, и почитaюще труды и человеколюбие твое, почитaем дивнаго во святых своих Христа Бога, иже вчера, и днeсь, и во веки Тойже, Иже и укрепи тя на подвиги твоя, и нaм немощным силен есть крепость подaти, с верою тя призывaющым:
Радуйся, езеро кротости невозмутимое;
Радуйся, дерзновения горо несокрушимая;
Радуйся, воздыханий святых волно небурная ;
Радуйся, Божественных поучений реко чистая;
Радуйся, Христова милосердия бездонная глубино;
Радуйся, подражательнице человеколюбия Божия;
Радуйся, яко тобою тихомирствуем с ближними;
Радуйся, яко тобою враждующии примиряются;
Радуйся, благословенная мати наша Екатерино, светом истины Христовой нас преображающая.

Кондак 13
О, святая преподобная мати наша Екатерино! Вонми молитве нашей смиренней и не презри малаго сего хвалебнаго пения, от усердия нашего тебе приносимаго с верою и любовию, и умоли Господа Бога, о еже сподобитися блаженства святых, да поем Ему купно с тобою во веки: Аллилуиа.
Сей Кондак глаголется трижды, поем Икос 1-й и Кондак 1-й