Икос 1
Ангел Божий внезапу коснуся сердца Твоего, честнейшая Княгиня и новая Мученица, егда народу ужасом объяту бывшу при убиении супруга Твоего, светлейшаго Князя Сергия, разорвася Твое плотяное сердце, и якоже Серафим Исайе, влия Тебе Бог велий свет, облиставший внутренняя Твоя, скорбь непостижимую в некое свечение Божие претворяя, да зовем Тебе:
Радуйся, красоты на земле ангельския исполненная;
Радуйся, сию лепоту евангельски запечатлевшая.
Радуйся, Царскаго величия рождение;
Радуйся, о всех страждущих жертвенное служение.
Радуйся, Образ Спасителя мира от рук Царя-Миротворца приявшая;
Радуйся, кротостию, терпением и любовию всех напоившая.
Радуйся, святыя земли, града Иерусалима пророческое посещение;
Радуйся, ея таинственное освящение.
Радуйся, мати наша, Великая Княгиня Елизавето, землю Русскую освятившая.

Кондак 2
Слыша Господь благое намерение сердца Твоего, управи путь Твой ко спасению в землю Русскую, яко от Господа стопы человеку исправляются, да зовем Ему: Аллилуиа.

Икос 2
Дивное сочетание яви Господь в тебе двум родом языков, от них же первый Бога возлюби паче всякия тщеты земныя, сиречь народ русский, и вторый мудростию земнаго преуспеяния усердно исполненный, сиречь немецкий, да якоже Мария и Марфа послужиши Христу делом и словом на конец времен, притекла еси на брак Свой с князем Российским Сергием, мы же дивящееся сицевому о Тебе Промыслу Божию, зовем Тебе таковая:
Радуйся, к земле Святыя Руси особливое призвание;
Радуйся, чистоты ея Божественныя взыскание.
Радуйся, святости русския обретение;
Радуйся, истинныя веры познание.
Радуйся, праведныя Елизаветы, таинственное удочерение;
Радуйся, подвигов преподобного Сергия усвоение.
Радуйся, храмов святых каждодневное посещение;
Радуйся, веры нашея тайновидное причащение.
Радуйся, мати наша, Великая Княгиня Елизавето, землю Русскую освятившая.

Кондак 3
Силою свыше осени Тя луч пребожественный в Земле Святей, егда бысть Тебе в ней на освящении храма равноапостольныя Марии Магдалины и по слову Апостола - яко корень свят, мы же рождие, - возжелала быти насажденней в дому Божии и тамо умрети, припав ко Гробу Господню, якоже оная Мария, вопия в дыхании сердца Твоего: Аллилуиа.

Икос 3
И егда рождие сие проразумев житием святым и верою истинною улучи Ти Господь ни образ жития райского на земле, но путю Голгофскому скорбей и терпения, да зовем Ти:
Радуйся, браком святым чистоту целомудрия запечатлевшая;
Радуйся, яко умножися и обновися яко орля юность Твоя.
Радуйся, сокровенное со Христом внутрь пребывание;
Радуйся, яко монашество исполнися в Тебе.
Радуйся, в убиении Супруга Твоего скорби Матери мира, аки у Креста Господня постигшая;
Радуйся, якоже у Креста Супруга Твоего стоящая.
Радуйся, скорби якоже мед и млеко пиющая;
Радуйся, яко супруга Твоего небесные персты.
Радуйся, мати наша, Великая Княгиня Елизавето, землю Русскую освятившая.

Кондак 4
Вся возможна верующему в любовь Христову - помыслила, - егда к убийце супруга Твоего в темницу вошла еси без рассуждения, не помыслив зла, а токмо к милости покаяния призывая, но не приспе час народа русскаго во зле заматоревшаго, достойное вознести Богу: Аллилуиа.

Икос 4
Возжада душа твоя милосердия, благая Христоносица, егда нося печать памяти скорбной, умножися многая дела твоя, да вся во благое послужити ближним положиша, мня милосердия обитель устроити в подножии Святаго Кремля, и принося дар Христу, яко волхвы, молитвы своя и народу тщася послужити, мы же хвалу Тебе воздаем:
Радуйся, Великою Матушкою нареченная;
Радуйся, Сама же суть во обители Твоей высокая свеча.
Радуйся, трудов и молитв легкокрылое единение;
Радуйся, с духом всякия сестры, и страждущим аки Господь со Крестом непреложное слияние.
Радуйся, великое служение народу Божьему начало;
Радуйся, о всякой душе печалуяйся.
Радуйся, безбоязненное отчаявшимся и бездомным служение;
Радуйся, Царския Семьи всежертвенное освящение.
Радуйся, мати наша, Великая Княгиня Елизавето, землю Русскую освятившая.

Кондак 5
Силу зла и жало змия внезапу познала еси, егда мученическия кончины супруга Твоего приспе час, тогда разверзлися пропасти адовы, но не поглотиша Тебе, возлюбившую народ сей, опъянением и помрачением противу заповедей Божиих и Самодержавия от Бога предуставленным объятым, но силою укрепляющаго Тя Господа, возопи к Нему: Аллилуиа.

Икос 5
Яко не убояся убийцы достоинства велико-княжескаго мужа Твоего и тело его на части раздраша, злобою сатаниною дышуще, назнаменуя час и время русскаго Самодержавия по грехам нашим, Ты же, убояся Суда Божия на всякаго немилосердаго, простила еси убийц сих Распятием Христовым, и яко будущую Россию окровавленныя части супруга Своего кротко собрала еси, мы же ведуще скорбь Твою, яко начало великих скорбей на Руси, и зовем Ти:
Радуйся, в путь всея земли супруга Твоего, Перваго Царскаго Мученика препровождение;
Радуйся, креста Своего на рамена нелегкое подъятие.
Радуйся, якоже снятию с древа тела Иисусова женам-мироносицам подражавшая;
Радуйся, с Марией Магдалиной таинственно ночь Воскресения проведшая .
Радуйся, рождение обители после скорби дней тех – воскресение души Твоея;
Радуйся, сие знамение и начало Воскресения Руси.
Радуйся, образом Ангельским запечатленная;
Радуйся, собеседнице великих и святых мужей.
Радуйся, мати наша, Великая Княгиня Елизавето, землю Русскую освятившая.

Кондак 6
Яко утроишася силы Твоя на творение добрых дел, благая княгиня, и устрашишася до времени силы адские, видя крепость души Твоея, егда нощию молясь и труждаясь, днем же паки преуспевая в благочестии, образ бысть всем труждающимся о Христе Иисусе и яко узнаша о делех Твоих Москва и вся Русь возопиша: Аллилуиа.

Икос 6
Храм Покрова Пресвятыя Владычицы нашея Богородицы устроила еси, яко все упование на Пречистую возложиша в служении Своем с сестры Своими, видя оскудение духа монастырскаго в земле нашей, оскудение же и духа мирскаго христианскаго яко же и любви и трудолюбия прежнего уже не бысть, зачала с добродетелей Марфы и Марии воздымать Святую Русь и златошвенным письмом исписала на Образех сих жен Святых: Учитель уже здесь – и зовет тебя, да зовем Ти:
Радуйся, княгине Полоцкой Евфросинии уподобившаяся;
Радуйся, образу княгини Московския Евдокии сопричтенная.
Радуйся, взором милосердия аки лучем солнечным озарила ожидавших смертнаго конца;
Радуйся, пленившая чистотою и святостию огрубевшие сердца.
Радуйся, яко светильник горящий в сердце Третьего Рима – Москвы;
Радуйся, да познает добродетель Твою всякая земля и всяк язык.
Радуйся, делателем жатвы Христовы усердно явившаяся;
Радуйся, святое ограждение Руси.
Радуйся, мати наша, Великая Княгиня Елизавето, землю Русскую освятившая.

Кондак 7
Егда приспе время испытания на Руси, возрадовашася душа Твоя о Господе, яко возможно и ныне пострадать за Христа, всех подвизая к подвигу веры в грядущее гонение, прорекла еси: погибла Великая Россия, но не погибла Святая Русь, предзря в мученичестве семя веры и возрождения, в глубине сердечной поя: Аллилуиа.

Икос 7
Токмо святое терпение удержаста стопы Твоя от уз заключения, егда слуги сатанины осмотрение обители устроиша, ища противу себе крамолу, страхом Божия возмездия о делех своих пленившися – Ты же ни единаго слова противу речения их даяше, токмо исходящим сим восклицаше сестрам Своим – «Еще коснит Господь нам венцы мученическими», - да зовем Ти:
Радуйся, яко едина от полка русских святых;
Радуйся, посреде смятения твердое упование на Бога возложившая.
Радуйся, жаждущая пострадать за Христа Своего;
Радуйся, алчущая пролить кровь Свою за Святую Русь.
Радуйся, яко мзда Твоя многа на небесех;
Радуйся, яко звезда святая сияеши во всех концах.
Радуйся, смирению Твоему изумишася Ангелы и человеки;
Радуйся, запечатленная Духом Святым.
Радуйся, мати наша, Великая Княгиня Елизавето, землю Русскую освятившая.

Кондак 8
Страшное и преславное знамение совершишася о Тебе, Святая княгиня, егда на Святой Седмице узы и заточение восприяла еси и жажда Твоя утешися до зела – исчитался бо час подвига Твоего, яко отдохновение от дел праведных и подвигов преподобнических, и восходя на Голгофу Свою мужечестно, воздохнула еси: Аллилуиа.

Икос 8
Новую школу жития Твоего в узах, в алапаевском заточении предпосла Тебе Господь страждущих, в нейже надмирные, «горе имуще сердца», воспевала песнопения с князем-диаконом Иоанном и другими мученики рода Царскаго и келейницею святою Варварою, прославляя Спасителя мира, да и мы поем Тебе:
Радуйся, подвигом веры святости исполненная;
Радуйся, рати святых мучеников удостоенная.
Радуйся, всякое дыхание Твое в узах славящее Господа;
Радуйся, желание Твое – быть неразлучно со Христом.
Радуйся, врагом Своим николиже противящаяся;
Радуйся, дивное смирение и величие Царское убийцам явившая.
Радуйся, Русь святую вместившая;
Радуйся, Ею и просиявшая.
Радуйся, мати наша, Великая Княгиня Елизавето, землю Русскую освятившая.

Кондак 9
Тьма покрыша земную Русь, ископаша глубокий ров сатана, идеже место ему Вседержитель уготова, но оный противник Божий, всю силу свою адову испусти, да низвержет на дно шахты сию Царственную голубицу, но Господь яко некую лествицу в райские обители сие место уготова, и яко некогда сей сад райский по грехопадении Адамовом внезапу от земли отъят бысть, тако душа Твоя вознеслась к Жениху Христу со всеми райскими небожителями, поя Ему: Аллилуиа.

Икос 9
Многия страхования наведе зверь – противобог на узники Христовы в Алапаевске во время определенное ему, но навыкшая противостояти диаволу, да отбежит, Великая Княгиня доблемужественне восприяла еси конец сей великомученический, да зовем Ей:
Радуйся, мужеством мучеников святых запечатленная;
Радуйся, мужеству многих предпочтенная.
Радуйся, соль земли и свет миру бысть российскому;
Радуйся, всея Церкви православныя исповедание.
Радуйся, земли уральския невольное приношение;
Радуйся же, щедрое ея угобзение.
Радуйся, раздвинувшихся небес чудесное восприятие;
Радуйся, восхождение души Твоея небошественное явление.
Радуйся, мати наша, Великая Княгиня Елизавето, землю Русскую освятившая.

Кондак 10
Нечто славное и дивное в земле уральской открышася – како на глубину многих сажень живыми людей царственных сбросиша, но от глубин сих адовых райские песни восхождаху сюду и сюду – таможе святая Мученица Великая Княгиня Елизавета с князем Иоанном песнь новую Христу поют: «Иже херувимы тайно образующе и Животворящей Троице трисвятую песнь припевающе», – тако бысть святой Руси в подземелии дней сих, образ нам новыя катакомбы рисуя, неизменно творя: Аллилуиа.

Икос 10
Такоже вернии услышаша Божественную песнь сию из глубины земли возносимую, не забыша сего дивнаго богослужения, в память Ея сие совершающи на всяк день, и тако песнопоя Ей:
Радуйся, Великая Княгиня Российская;
Радуйся, святым званием оправданная.
Радуйся, о Тебе - и моя душа поет;
Радуйся, о Тебе всяк православный зовет.
Радуйся, народа русскаго воскликновение;
Радуйся, его нечаемое восхищение.
Радуйся, Лилия Небесная и Голубица высокая;
Радуйся, душа наша в памяти твоей святой живет.
Радуйся, мати наша, Великая Княгиня Елизавето, землю Русскую освятившая.

Кондак 11
Воспомянем и славного инока Серафима славе Твоей послужившаго и святыя мощи Твоя и всех мучеников алапаевских препроводившаго, да достизают оныя Святой Земли, в ней же и место Тебе Господь уготова изначала, како же и возжелала еси, и тамо почиваеши ныне. Мы же дивясь таковому о Тебе промышлению, воспоем: Аллилуиа.

Икос 11
Многим чудесем Твоим сотаинник был блаженный оный Серафим, егда мощи Твоя во град Иерусалимский с великим тщанием и страхом Божиим препровождаше, и бысть ему первому быти восхвалити Тя по достоянию, якоже и мы кораблем Церкви спасаемии, вопием с ним:
Радуйся, во дни кончины мира подвигом добрым просиявшая;
Радуйся, земли нашея благоухание.
Радуйся, многих чудес и видений явление;
Радуйся, дел добрых ко благу церкви и Отечества возрождение.
Радуйся, Свете тихий святыя славы Господа сил;
Радуйся, Мученица святая, Еюже Господь многим грехи простил.
Радуйся, не токмо женский пол, но и мужеский обители Тебе посвятившия;
Радуйся, благословение и укрепление уповающих на Тя.
Радуйся, мати наша, Великая Княгиня Елизавето, землю Русскую освятившая.

Кондак 12
Вся привожду в похвалу Тебе, Преподобная и препрославленная Мученица Княгиня Елизавето, но не может язык мой изрещи по достоянию, токмо Единый Бог, неизреченными глаголы восприя душу Твою, слыша от ангельских лик: Аллилуиа.

Икос 12
Поюще дивную во святых своих Матерь нашу святую Преподобномученицу Елизавету, радуемся радостию неизреченною, како Господь прославляет предавших себе до конца в жертву Ему Единому присных Своих, от Них же Святая Княгиня чудесно предстоит во славе Отца Небеснаго, да послушает нас:
Радуйся, дивное земли нашея прозябение;
Радуйся, на небеса чудоточное Восхождение.
Радуйся, смотрительнице благая на земле дел Божиих;
Радуйся, молитвеннице неизреченная ко Христу.
Радуйся, непрестанное величание;
Радуйся, святых ликов безконечное лобзание.
Радуйся, небесное увенчание;
Радуйся, наше земное похваление.
Радуйся, мати наша, Великая Княгиня Елизавето, землю Русскую освятившая.

Кондак 13
О предивная и чудная Великая Княгиня Елисавета! Вопль святый исторгаша уста Твоя, егда видя, како Господь уготова Тебе крест Свой святый, егоже ношаше на сердце Своем, присно воспевая в Себе: Аллилуиа.

Молитва
О Святая Страстотерпица Христова, Великая Княгиня Елисавето!
Аще и попусти Господь земле нашей опустошитися и несть в ней ни веры высокия, ни постояния, яковые явила еси во дни трудов и подвигов Твоих, но Святым Крещением и подвигом Твоим и Царских Мучеников и всех новомучеников, запечатленные - не токмо образ порока и греха, яко дети отступников сущи есмы, но имамы в сердцах своих некия кристаллы начатков добра через принятие Святых Христовых Таин усвоенныя и почитатели Твои искреннии суть; - приими молитву нашу, яко некое запоздалое цветение, и урви сей крин благодарных Тебе сердец, да засвидетельствуеши у престола Святые Троицы и Вечнаго Жениха Христа, немощное воздыхание наше,но да предстательством Твоим уплодоносит Господь гибнующую землю нашу урожаем святости и благочестия, и не даст ей заматореть в невежестве и безверии своем, но украсит ю благомыслием и первозданностью призвания Своего, наипаче же покаянием и да не тщетны будут упования наши, зрящих Твою доброту неизреченную во всяких начинаниях благих, да будем укрепляемы всегда Твоим Небесным попечением о нас, да простит Господь грехи наша и отцов наших, да будем с Богом и с Тобою - всегда, ныне и присно и во веки веков. Аминь.

Тропарь, глас 7
Красотой небесной насыщаяся / веру истинную от Бога восприяла еси, / и якоже снемлющим со Креста Иисуса мироносицам уподобляяся, / всем страждущим с любовию послужила еси, / и в песне Херувимской вознесшаяся / святая Царственная преподобномученица Елисавето, / моли Милостиваго Бога / в жертву якоже и ты Христу принести себе // и Ему до конца послужити.

Кондак 1
Избраннице рода христианского и собору Ангелов Божиих причастнице благой / нынешнюю похвалу юще о подвигах Твоих приносяще / и со дерзновением, яко имущей велие услышание у престола Святей Троицы, вопием: / приими от нас недостойных духовный крин сердец восторгающихся - от любви Твоея ко Господу да зовем Ти: /
Радуйся, мати наша, Великая Княгиня Елизавето, землю Русскую освятившая.

Взято с http://newmartyros.ru