Кондак 1
Избранной от страны чуждыя во светильник земли российския, от языка же, православию чуждаго, во Отечествие небесное, молитвеннице и утешительнице нашей Елисавете благодарственное приносим пение. Ты же, яко подвигом мученическим дерзновение велие ко Господу стяжавшая, от всяких нас бед свободи, да зовем ти: радуйся, преподбномученице великая княгине Елисавето, в скорбех нам скорая помощнице.

Икос 1
Ангельстей чистоте издетска поревновала еси, мати наша Елисавето, и сицевою ревностию на высоту равноангельнаго жития взошла еси: сие предуведев всеблагий Господь сохрани тя и во страну православную пресели тя пречудно: мы же, дивящеся всеблагому о тебе промышлению Божию и недоведомым судьбам Его, со умилением вопием ти:
Радуйся, яко на нелицемерное усердие твое призре Господь:
радуйся, яко молитвы и милостыни твоя якоже некогда корнилиевы, воспомянушася пред Богом.
Радуйся, яко промышление Божие о неведущих истины житием твоим свидетельствуеши:
радуйся, яко обличение теплохладному жительству нашему являеши.
Радуйся, издетска в добрых нравах воспитанная:
радуйся, доброты лучшия, премирныя взыскавшая.
Радуйся, благоговейному жительству своего супруга подражавшая:
радуйся, научению истине со смирением внимавшая.
Радуйся, святыни российския усердно посещавшая:
радуйся, честным иконам и мощем угодник православных поклонившаяся.
Радуйся, премирною красотою Православия уязвленная:
радуйся, восприявшая свет разума.
Радуйся, преподбномученице великая княгине Елисавето, в скорбех нам скорая помощнице.

Кондак 2
Видя ревность твою по истине, просвети тя светом богоразумия Господь и стаду избранных Своих сопричте, мы же обретше в тебе теплую молитвенницу, просвещаемся душами и телесы, верно вопиюще Богу: Аллилуиа.

Икос 2
Разум неуразуменный о истинней вере имуще, смущахуся сердцем сродницы твои, слышаще обращение твое ко святому Православию, ты же послушала еси Господа, глаголюща: иже любит отца или матерь паче мене, несть мене достоин: сего ради вопиемъ ти:
Радуйся, любовь крепкую ко сродником с твердою ненавистию к мирским соблазном соединившая:
радуйся, любовь ко Христу крепчайшую явившая.
Радуйся, со скорбию сердца укорение отца кротце претерпевшая:
радуйся, ни гневом, ни посмеянием не поколебавшаяся.
Радуйся, незримо для мира подвигу исповедническому начало положившая:
радуйся, малодушие вкупе с пристрастием к миру презревшая.
Радуйся, страдати бо с людьми Божии, аки Моисей, предпочла еси:
радуйся, яко драгоценнаго ради бисера Православия вся красная мира сего уметы быти вменила еси.
Радуйся, мира и яже в мире, по слову апостола, не возлюбльшая:
радуйся, спасения ради души своея, в мире сем даже до смерти противу греха подвизавшаяся.
Радуйся, душа бо твоя, яко птица, от сети ловящих избавися:
радуйся, яко врага исконнаго благодтию Божию победила еси.
Радуйся, преподбномученице великая княгине Елисавето, в скорбех нам скорая помощнице.

Кондак 3
Силою свыше облеченная, всякий мрак зловерия вкупе с малодушием отрясла еси: и тако начало восхождению в сердце своем положивши, степень за степенем прешла еси, дондеже достигла еси горы святыя, Иеруслима небеснаго, выну взывающи Богу: Аллилуиа.

Икос 3
Имущи воистинну вся силы души твоея обновлены благодатию Божиею во святей церкви, многоплодна в делех благих явилася еси, новое же отечество твое дщерь верную, сострадалицу и молитвенницу в тебе обретше, вопиет ти сице:
Радуйся, яко тебе государем российским нерукотворенный образ Спасов дарован бысть:
радуйся, яко сей образ в знамение и залог православнаго жительства прияла еси.
Радуйся, образ сей даже до мученическия своея кончины соблюдшая:
радуйся, яко и в земли лежащи, на персех своих его имевшая.
Радуйся, мати, яко в тебе известно спасеся еже по образу:
радуйся, яко благодатию на образе начертаннаго и тело твое чудесно сохранися.
Радуйся, яко устремившееся на тя коварство врагов веры силою Божиею сокрушися:
радуйся, яко чудо велие и в смерти твоей явися.
Радуйся, добродетелей дивное вместилище:
радуйся, Духа Святаго светлое и честное жилище.
Радуйся, яко тобою от уз греха свобождаемся:
радуйся, яко тобою в скорбех жития утешаемся.
Радуйся, преподбномученице великая княгине Елисавето, в скорбех нам скорая помощнице.

Кондак 4
Буря крамолы и безбожия воздвижеся на страну нашу православную, и паде от руки убийцы беззаконнаго возлюбленный супруг твой. Мы же безкровному мученичеству твоему дивящеся, вопием дивному во святых своих Богу: Аллилуиа.

Икос 4
Слышащи Господа, заповедавшаго любити враги Своя, сию заповедь твердо во уме и сердце напечатлела еси: сего ради, аще и своима рукама останки кровавыя супруга своего собирала еси, но душею не поколебалася еси: мы же дивящеся силе Божией, в немощи твоей явившейся, вопием ти таковая:
Радуйся, от вернаго слуги умирающаго кончину господина его мужески сокрывшая:
радуйся, терпением иовлим сердце от ропота оградившая.
Радуйся, всякое веселие плотское оставившая:
радуйся, утешения в мире сем не взыскавшая.
Радуйся, убийцу в темнице посещавшая:
радуйся, о покаянии и исправлении того всячески радевшая.
Радуйся, молитву о прощении врагов на кресте в память супруга начертавшая:
радуйся, с сею же молитвою мученическую смерть приявшая.
Радуйся, отпусти им, яко не ведят, что творят, в молитве ко Господу взывавшая:
радуйся, аки первомученик Стефан о убивавших тя молившаяся.
Радуйся, кроткая агнице, от лютых вепрей терзаемая:
радуйся, подвигоположнику Христу подражавшая.
Радуйся, преподбномученице великая княгине Елисавето, в скорбех нам скорая помощнице.

Кондак 5
Боготечная звезда явилася еси, великая княгине Елисавето, стране нашей, сияющи делами любве и милосердия: людие же московстии, взирающе на обитель, тобою воздвигнутую, и велию помощь в тебе обретше, взываху благих подателю Богу: Аллилуиа.

Икос 5
Видевше твое радение о создании обители милосердия, старцы российстии помогаху ти советом и молитвою, мы же, дивящеся подвигу жития твоего, вопием ти:
Радуйся, по словеси Господню, все имение свое раздавшая:
радуйся, жестокое житие восприявшая.
Радуйся, юродою у чад века сего прослывшая:
радуйся, верных сердца светом добрых дел твоих озарившая.
Радуйся, во обитель, тобою воздвигнутую, многия девы и вдовицы собравшая:
радуйся, вере, делами поспешествуемей и совершаемей, их научившая.
Радуйся, сиротам многим оградо и воспитание:
радуйся, тяжко недугующым пречудное поможение.
Радуйся, дневныя труды твоя с нощными молитвами сочетавшая:
радуйся, и нощию люте страждущих не оставлявшая.
Радуйся, безнадежным больным исцеление:
радуйся, скорбию снедаемым предивное избавление.
Радуйся, преподбномученице великая княгине Елисавето, в скорбех нам скорая помощнице.

Кондак 6
Проповедует тя страна Российская, блаженная Елисавето, скорую всем в бедах помощницу, ты бо и в земли Сибирстей заключена бывши, дел милосердия не оставила еси, ранами же смертными люте уязвленная, до последняго издыхания служения своего страждущым не отступила еси, и ныне всякаго звания людие русстии взывают о тебе Творцу и Избавителю всех: Аллилуиа.

Икос 6
Возсияла еси яко светильник немеркнущий во тьме сквернаго жития погибающым: светлость же лица и кротость словес твоих многия обрати ко спасению, с нимиже купно и мы благодарственно вопием ти:
Радуйся, убогия жилища посещавшая:
радуйся, погибшыя драхмы прилежно взыскавшая.
Радуйся, язв греховных не возгнушавшаяся:
радуйся, злобы зверообразныя не устрашившаяся.
Радуйся, многим девам от падения греховнаго спасение нечаянное:
радуйся, богатство, бедне живущым на земли воистинну Богомъ данное.
Радуйся, чистотою душевною подобна ангелом явившаяся:
радуйся, греховных скверн очищение и телесных ран предивная целительнице.
Радуйся, яко злоба мира о камень веры твоея разбивашеся:
радуйся, яко в тебе воин Христов в женстем телеси явися.
Радуйся, яко от полноты дарований твоих мнози утешахуся:
радуйся, и нам, в добродетели убогим, скорое в скорбех утешение.
Радуйся, преподбномученице великая княгине Елисавето, в скорбех нам скорая помощнице.

Кондак 7
Хотя человеколюбец Господь в годину испытаний огненных помощь скорую людем Своим подати, дарова среди иных святых российских и тебе, мати наша Елисавето, благоухающую миром добродетелей, покаяния наставницу, да отженется от сердец мерзкое греховное злосмрадие, да благоприятно людие вопиют Ему: Аллилуиа.

Икос 7
Новое чудо явися нам, егда немощию разума человеческаго смущеннеи, разногласием разделене бысте вы, о сестре благочестивеи, Александро и Елисавето, обаче же скорбь недоумения носяще и совета благаго взыскующе, во обители святыя потекосте, идеже утешение и вразумление восприясте, и тако любовь друг ко другу сохраньше, в мире и единомысленней вере пребысте, да единому Господу житием и смертию своею послужите, сего ради вопиемъ:
Радуйся, блаженная Елисавето, сестре своей Александре издетска помощнице и воспитательнице:
радуйся, яко и та общий с тобою путь православныя веры избра.
Радуйтеся, яко козней вражиих, разделити вас тщившихся, превышше явилися есте:
радуйтеся, яко мученическою кончиною совершенно на веки соединилися есте.
Радуйтеся, славныя сестры, яко благочестия ради всякую скорбь претерпели есте:
радуйтеся, яко друг другу в подвизе поревновали есте.
Радуйтеся, яко подобно Марфе и Марии единому Господу послужисте:
радуйтеся, яко о едином на потребу всегда попечение иместе.
Радуйтеся, яко из единаго источника Божия благодати вся яже ко спасению потребная почерпали есте:
радуйтеся, яко единою скорбию и молитвою о людех российских пламенели есте.
Радуйся, мати наша Елисавето, яко сию скорбь и болезнь чрез все житие твое пронесла еси:
радуйся, яко всякое мудрование плотское верою из сердца исторгла еси.
Радуйся, преподбномученице великая княгине Елисавето, в скорбех нам скорая помощнице.

Кондак 8
Дивно ангелом и человеком житие твое явися, пречудная подвижнице: душу бо твою в скорби, яко сребро в горнило очищения предала еси, на искушения уготовавши сердце свое, ум же Евангелию покоривши, сего ради согласно Господеви поем: Аллилуиа. Икос 8
Весь ум свой всегда горе имела еси, в молитвах Господа тепле призывающи, но и низу людей страждущих и заблудших не оставляла еси, в трудех и попечениих о них пребывающи: не забуди и ныне нас, святая Елисавето, утешение наше, приглашающих тебе усердно:
Радуйся, заре светлая, сияющая во тьме греховней:
радуйся, молитвы непрестанныя наставнице.
Радуйся, среди суеты мира сущих, в горняя насъ восперяющая:
радуйся, преклонитися под иго Христово всячески нас укрепляющая.
Радуйся, в знои трудов сущым росо и прохладо:
радуйся, по морю житейскому носимым звездо непрелестная.
Радуйся, обитель свою яко прибежище скорбящым создавшая:
радуйся, из сея обители многим в вечныя кровы путь указавшая.
Радуйся, из сердец ожесточенных покаянныя слезы исторгшая:
радуйся, и наших окамененных сердец предивное сокрушение.
Радуйся, страны Российския изрядное украшение:
радуйся, верных людей наших любы и радование.
Радуйся, преподбномученице великая княгине Елисавето, в скорбех нам скорая помощнице.

Кондак 9
В лице святых земли Российския ныне торжествуеши, святая преподбномученице Елисавето, лицу Господню предстоящи: веруем, яко любы твоя к нам николиже отпадает, и сего ради надеемся твоими молитвами от Господа благодать и помощь получити, и в радости о заступлении твоем о нас воспеваемъ Спасу душ наших: Аллилуиа.

Икос 9
Ветии суемудреннии, лжею всяческою имена новомученик российских оплетшии, не возмогоша утаити подвиги и чудеса их, се бо ныне Господь новыя святыя своя дивно прослави, темже и сию угодницу Божию Елисавету ублажаем, поюще:
Радуйся, яко во дни мятежа обители своея не оставившая:
радуйся, вверенныя ти люди усердно хранившая.
Радуйся, помощи от врагов православнаго Отечества нашего не приявшая:
радуйся, прежде смерти миру умершая.
Радуйся, злобу человек неблагодарных кротце претерпевшая:
радуйся, о впадших в ров соблазна безумнаго милостивно скорбевшая.
Радуйся, мужеством с кротостию предивно вооружившаяся:
радуйся, душу свою погубившая в мире сем, в живот же вечный сохранившая ю.
Радуйся, пути промысла Божия чистым сердцем прозревшая:
радуйся, мученичество царственных сродник своих дерзновенно прорекшая.
Радуйся, со смирением недостойну себе быти таковаго венца исповедавшая:
радуйся, с терпением часа смертнаго страдания своего ожидавшая.
Радуйся, преподбномученице великая княгине Елисавето, в скорбех нам скорая помощнице.

Кондак 10
Спасти хотящи душу, плоть твою духови покорила еси воистинну, мати наша Елисавето: терпением бо скорбей безмолвие ума и тишину сердца стяжала еси, благоухание же милосердия приложила еси, и сими горницу души своея Господеви уготовала еси: странствию же владычню приобщившися, жилище Пресвятыя Троицы явилася еси, всегда вопиющи: Аллилуиа.

Икос 10
Стена была еси во испытаниих и столп крепок противу лица вражия всем, попечению твоему промыслом Божиим вверенным: сего ради всяк человек, иже близ тебе обреташеся, помощь и укрепление дивное от тебе получаше, и мы зряще любовь твою, прославляем тя звании сими:
Радуйся, молитвою непрестанною питающаяся:
радуйся, воздержанием препоясанная.
Радуйся, судиями беззаконными осужденная:
радуйся, судиею вечным оправданная.
Радуйся, посреде скорбей осуждение смерти в себе выну имевшая:
радуйся, вседушно уповавшая на Воскрешающаго мертвых.
Радуйся, присно в смерть себе предававшая Иисуса Господа ради:
радуйся, яко в тебе и живот Иисусов воистинну явися.
Радуйся, на земли всячески обнищавшая:
радуйся, и доныне многих богатящая.
Радуйся, живота вечнаго причастнице:
радуйся, яко твоими молитвами и мы спастися уповаем.
Радуйся, преподбномученице великая княгине Елисавето, в скорбех нам скорая помощнице.

Кондак 11
Пение всеумиленное приносим ти, агнице Божия, воспоминающе крестный путь твой, егоже с сострадальцы твоими терпела еси: биение немилосердное и во глубину земли падение, тако бо страданьми ризы души твоея убелила еси и воспела еси Богу: Аллилуиа.

Икос 11
Светоприемную свещу, от Алапаевска града до востока дальняго возсиявшую и в землю святую прешедшую, тамо же яко на свещнице высоце всему миру поставленную, зрим тя, всеблаженная мученице: издалече же нетленным мощем твоим покланяющеся, вопием ти таковая:
Радуйся, чистотою души твоея, яко крин, посреде мира лукаваго процветшая:
радуйся, Господеви своему и в пропастех земных песнь воспевшая.
Радуйся, яко смертельное оружие противу тебе безсильно явися:
радуйся, яко и вся хитрость духов злобы поднебесных победити тебе не возможе.
Радуйся, мудрая дево, светильник веры горящим сохраншая:
радуйся, елеемъ благодатных дел его наполнившая.
Радуйся, глас жениха Христа в полунощи мирскаго жития услышавшая:
радуйся, яко бдящая и готовая вошла еси в чертог небесный.
Радуйся, еще в житии твоем место погребения твоего возлюбльшая:
радуйся, в подвизех путь свой к нему совершившая.
Радуйся, яко шествующи тесным и прискорбным путем, Небеснаго Царствия достигла еси:
радуйся, яко и нас выну зрети горе укрепляеши.
Радуйся, преподбномученице великая княгине Елисавето, в скорбех нам скорая помощнице.

Кондак 12
Благодать, тебе от Бога данную зряще, к твоему заступлению вседушно притекаем: ведуще же, яко духовное духовным востязуется, трепещем, да не празднословцы дерзостнии явимся: обаче же любовию и изумлением понуждаемии, со страхом и трепетом зовем Богу: Аллилуиа.

Икос 12
Поюще твое, с верною сподвижницею и сострадалицею твоею Варварою, прославление в стране Российстей, сице уповаем обрести начало нашего востания от сна греховнаго: ты бо предстоиши ныне престолу Божию в лице новомученик российских, к ихже молитвам притекающе, никакоже отпадем тщи. И ныне, память сих заступник наших празднующе по долгу, тебе, о всеблаженная мати, молимся: премени нам скорбь на радость, вопиющым:
Радуйся, издалече во страну Российскую пришедшая:
радуйся, православную веру во Отечестве новом обретшая.
Радуйся, и ныне сию веру повсюду утверждающая:
радуйся, далече разсеянныя люди русския любовию соединяющая.
Радуйся, людем верным дивное веселие:
радуйся, церкве Российския похвало и радование.
Радуйся, яко чада ея хранити единство веры в союзе мира призывающая:
радуйся, истины взыскующым сию явственне являющая.
Радуйся, крине сельный чистоты и целомудрия:
радуйся, отрасле райская преизящныя добродетели.
Радуйся, яко в телесней лепоте твоей светлость душевная явися:
радуйся, яко во зраце лица твоего горняя доброта нам открыся.
Радуйся, преподбномученице великая княгине Елисавето, в скорбех нам скорая помощнице.

Кондак 13
О, пречудная о Христе мати наша, преподбномученице великая княгине Елисавето, приими ныне убогое сие моление наше и умоли всеблагаго Бога даровати нам покаяние нелицемерное и исправление жития нашего, да избавимся належащаго гнева Божия и всякия муки временныя и вечныя, и всегда с тобою благодеющему нам Богу зовем: Аллилуиа.
Сей Кондак глаголи трижды и паки чтется Икос 1 и Кондак 1.

Молитва ко святей преподбномученице великой княгине Елисавете Алапаевской О, пречудная и теплая молитвеннице наша, святая преподбномученице великая княгине Елисавето! Ты подвигом добрымъ подвизавшися, течение жития своего мученически скончала еси, веру же непорочну соблюла еси: сего ради уготовася тебе от Господа венец правды: дарова бо тебе Спаситель наш не точию еже в Него православно веровати, но и еже по нем благочестно пострадати: по смерти же сподоби тя предивным промышлением своим телом нетленным во святей земли погребенною быти, идеже Сам Подвигоположник твой во плоти пречистей пострадати изволи. Тамо же яви нам тебе пречудно, во одеяние иноческое, яко в броню правды облеченную, во свидетельство преподобия твоего, егоже злостраданием произвольным, терпением и любовию стяжала еси, обновивши в себе неописанный образ Божий и украсивши его благоуханием чистоты и всякия добродетели, яко еще и в привременнем странствии твоем многим удивлятися, зрящым телесную лепоту лица твоего, светом незримым благодати Божия преображенную. Сего же несозданнаго Троическаго Света просвещения, достигнути сподоби молитвами твоими и нас, святая преподбномученице Елисавето, да оскверненныя грехи нашими ризы крещения покаяниемъ паки убелятся нам, да не извержени будем чертога небеснаго повелениемъ Судии Праведнаго. Многими даровании украшенная и многоплодна в делех благих явившаяся, укрепи и нас незримым твоим предстательством, дела света делати, дондеже свет долготерпения Божия светит нам, да не яко злии раби и лукавии, скрывшии талант свой в земли нерадения, правдою Божиею осудимся. Веру православную во стране Российстей обретшая и вся уставы святыя церкве облобызавшая, исповедания же своего не постыдевшаяся, аще и многою лжею, злобою и руганием испытание прияла еси: даруй и нам, да не постыдимся в роде сем прелюбодейнем и грешнем словесБожиих , хранимых безпорочно единою святою соборною и апостольскою церковию православною, да не постыдится и нас Господь, егда приидетъ во славе Своей судити миру всему. Страждущым и скорбящым радость и утешение в житии твоем бывшая, терпением и кротостию дарование исцелений приявшая, молимся тебе: елеем молитв твоих раны нашя душевныя и телесныя исцели, паче же умягчи сердца ожесточенная, да научимся немощи друг друга носити и обиды повинным прощати, чающе от Спасителя нашего улучити и наших многих согрешений прощение. Новое отечество Россию обретшая и постигшыя сию страну скорби даже до конца понесшая, о людех же российских, якоже о новом сродстве своем, прилежно радевшая, и ныне молися пред престолом Отца небеснаго, да не угаснет в стране нашей светильник веры православныя, да не покрыет нас до конца тьма безбожия и нестроения, да не будем умалени и расточени праведным гневом Божиим, но паче да возсияет на последок дний сих святая Русь православная, не под спудомъ зловерия, но на свещнице высоце благочестиваго жития поставленная, да светит всей вселенней, собирающи во едино стадо чад Божиих, малых же сих от сетей соблазна и обольщения погибельнаго избавляющи: да сеяние кровей мученических не безплодно обрящется земли нашей, но да явит миру зде источник реки спасительныя, текущия в живот некончаемый, идеже и ты с лики святых воспеваеши и молишися со Пресвятою и премилостивою Владычицею нашею Богородицею, прославяющи имя Божие, на Негоже в житии твоем уповала еси, Отца и Сына и Святаго Духа, ныне и присно и во веки вековъ. Аминь.

Взято с сайта: http://ustavschиk.lиvejournal.com/4433.html