Кондак 1
Изрядный воеводо за веру, царя и отечество, великий игумене земли нашея во дни смуты и озлобления греховнаго, теплый утешителю всех напаствуемых и обремененных скорбьми многими, православный хранителю отеческих преданий, ихже ради положил еси душу свою за други своя и нас свободил еси от рабства иноземнаго и поругания латинства сквернаго и ныне от Господа прославлен еси явлением чудес твоих, ими же собрал еси нас к раце мощей твоих, со умилением любви поющих ти:
Радуйся, святителю Ермогене, пастырю добрый Руси православныя.

Икос 1
Ангела-хранителя, спутьствующа и спасительная предлагающа, яви тя Руси милосердый Христос во дни нестроения, да спасет ю от блуждания греховнаго. И ныне яви тя молитвенника и чудотворца, яко знамение времени: да и ныне грядут по тебе вси блуждающии, яко овцы не имущия пастыря, и обретше тобою спасение, да поют тебе сице:
Радуйся, Церкви нашея премудрое возглавление;
радуйся, о чадех Церкве теплое промышление.
Радуйся, царства нашего церковное утверждение;
радуйся, сынов царства православное озарение.
Радуйся, епископом и миряном доброе поучение;
радуйся, царем нашим совете и утешение.
Радуйся, Церкве и царства Христово кормило;
радуйся, земли Русския православное светило.
Радуйся, святителю Ермогене, пастырю добрый Руси православныя.

Кондак 2
Видя Русь, яко вдовицу, зельне плачущу о запустении дома своего, умилосердився, на рамена своя подъял еси скорби ея и даже до смерти понесл еси я. Блажен еси, состраждущий и плачущий пред Богом, сего бо ради ныне вечно радуешися на небесех, поя Богу: Аллилуия.

Икос 2
Разумом любве, наказующия и милующия, управлял еси, святителю, народом православным, яко кораблем, в пучине зол потопляемым, и привел еси его к тихой пристани православнаго самодержавия, окормляемаго спасительными преданьми святыя Церкве, темже благодарственно поем ти:
Радуйся, мудрости мира сего отрекийся;
радуйся, в безумие Христа ради облекийся.
Радуйся, ума Христова вместилище;
радуйся, разума Церкве хранилище.
Радуйся, главо, свет истины излучающая;
радуйся, премудросте, немудрыя просвещающая.
Радуйся, благовестниче православныя правды;
радуйся, обличителю человеческия неправды.
Радуйся, святителю Ермогене, пастырю добрый Руси православныя.

Кондак 3
Силою веры вся превозмогл еси, святителю, и всеоружием Божией благодати вся победил еси, вся бо может о укрепляющем Иисусе работающий Ему со страхом и радующийся Ему с трепетом, поя Ему: Аллилуия.

Икос 3
Имея благодать священства, добре носиму в благоухающем сосуде души твоея, был еси, святителю, источник силы, Русь оскудевающу восполняющий, тою бо спасенна, благодарственная поет ти:
Радуйся, иерею, Богом избранный;
радуйся, священниче, благодатию облагоуханный.
Радуйся, епископе, зерцало совести нелицеприятныя;
радуйся, святителю, кадило молитвы благоприятныя.
Радуйся, пастырю святыя Церкве, со властию Духа управляяй;
радуйся, митрополите, о славе Церкве неусыпно промышляяй.
Радуйся, патриарше, имже Русь изыде на пажить веселия;
радуйся, патриарше, имже Русь обрете радость спасения.
Радуйся, святителю Ермогене, пастырю добрый Руси православныя.

Кондак 4
Бурею помышлений сумнительных и стремлений мятежных волнуема, хищники и искатели царския власти наводняема и в пучину инославнаго суемудрия погружаема, Русь утопаше: узрев же тя, яко Христа, единаго непотопляемаго и бурею смуты неколеблемаго, возрадовася надеждею и, руку спасения получив, поет Богу: Аллилуия.

Икос 4
Слышавше татие Церкве и разбойницы царства глас твой, святителю, яко власть имущаго, благодатию истины исполненный, скрежетаху зубы своими и трепетаху яко беси, иже и ныне трепещут силы твоея у раки мощей твоих. Мы же, почитая сию силу, яко Божию, во утверждение православнаго царства на камени церковнем источаему, поем ти сильному о Господе:
Радуйся, крепкий поборниче противу самозванных повелителей;
радуйся, обличителю непризванных спасителей.
Радуйся, суемудраго инославия праведное поругание;
радуйся, спасительнаго Православия немолчное назидание.
Радуйся, церковь и царство союзом нераздельныя любве соединивый;
радуйся, царя и царство в послушание Православия пленивый.
Радуйся, православныя державы незыблемое утверждение;
радуйся, царю нашему скорая помоще и наставление.
Радуйся, святителю Ермогене, пастырю добрый Руси православныя.

Кондак 5
Нову звезду показа тя на небесех славы в сонме священномучеников Господь Вседержитель, зане и на земли был еси звезда светлая, осиявающа царя и царство светом Православия и путеводствующа ко угождению Единому Богу, поя Ему: Аллилуия.

Икос 5
Видеша тя православнии, яко светило церковное, безоблачно сияющее в просвещение омраченных страстьми, устремишася к тебе из мрака обольщения лестию и страхом человеческим и восприяша от тебе спасительное дерзновение, еже даруй и нам, грешным, поучающимся у раки мощей твоих сим пением:
Радуйся, почитаяй царя, яко Божие дарование;
радуйся, мняй быти ему всем развращенным в наказание.
Радуйся, царя Феодора к ограждению немощных верою склонивый;
радуйся, быти ему отцем любящим и вечное спасение их умоливый.
Радуйся, царя Василия твердости учивый;
радуйся, в радости и в горе друг ему бывый.
Радуйся, царя нашего пребывающее благословение;
радуйся, во всех делех небесное ему поможение.
Радуйся, святителю Ермогене, пастырю добрый Руси православныя.

Кондак 6
Проповедник велия благодати, ниспосылаемыя православным людем неусыпающими молитвами Богоматере был еси, святителю Ермогене. Сего ради удостоился еси от Пречистыя взяти от земли святую икону Ея, во граде Казани явленную, и прославити ю по достоянию, яко щит и заступление Руси, поя Честнейшей горних воинств: Аллилуия.

Икос 6
Возсиявшу свету истины Христовой, во свете Православия ходим и бежим всякия лжи, да достойни будем небеснаго патриарха всея Руси, святителя Ермогена, емуже поем со воскликновением:
Радуйся, чудотворныя иконы Казанския первое прославление;
радуйся, теплыя любве Богоматере умиленное песнопение.
Радуйся, веруяй молитвам Владычицы, яко всесильному ограждению;
радуйся, вверивый православное воинство Ея матернему заступлению.
Радуйся, Божию Матерь всем сердцем своим возлюбивый;
радуйся, на молитву пред Нею Русь страждущу приклонивый.
Радуйся, дом Пречистыя, яко хоругвь православнаго царства почитаяй;
радуйся, о утверждении сего царства пред Пречистою рыдаяй.
Радуйся, святителю Ермогене, пастырю добрый Руси православныя.

Кондак 7
Хотя быти пастырь добрый, ему же суть овцы своя, видев волка грядуща, не оставлял еси овцы и не бегал еси, но пред ними ходил еси во всеоружии силы и истины, поя Богу: Аллилуия.

Икос 7
Новаго человека по образу Создавшаго его, а не новаго царства инославнаго измышления, возжелел еси, святителю Ермогене. Сего ради ополчился еси за царство древлеправославное, еже тщится во всех людех и во всем житии их вообразити Христа Господа. Поем и славим сие православное ратоборство и, радуяся, вопием ти:
Радуйся, волков хищных нещадное изгнание;
радуйся, коварства их мудрое распознание.
Радуйся, царства православнаго верное спасение;
радуйся, стада Христова церковное ограждение.
Радуйся, яко кокош птенцы своя созываяй;
радуйся, яко орел, птенцы своя покрываяй.
Радуйся, Православия великий ревнителю;
радуйся, царем и царству церковный учителю.
Радуйся, святителю Ермогене, пастырю добрый Руси православныя.

Кондак 8
Странно миролюбцем зрети, како святитель Ермоген, во плоти сый, не себе угождает, како славу, честь и вся мирская, яко прах, попирает и горняя мудрствует, ищущи славы у Единаго, на небесех Живущаго, поя Ему: Аллилуия.

Икос 8
Весь бе ревнующь ревностию Илии пророка, святителю Ермогене, егда узрел еси запустение царства и поругание святынь Православия, и огнем сея ревности воспламенил еси сердца всех православных во спасение Руси, поющия ти ныне с любовию:
Радуйся, Духа Божия не угашаяй;
радуйся, дарование благодати возгреваяй.
Радуйся, Духом Божиим пламенеющий;
радуйся, яко орел над миром сим парящий.
Радуйся, созерцаяй горняя;
радуйся, одухотворяяй дольняя.
Радуйся, сею ревностию о царстве ревновавый;
радуйся, царству нашему путь православнаго строительства указавый.
Радуйся, святителю Ермогене, пастырю добрый Руси православныя.

Кондак 9
Все естество ангельское, видяще православныя люди во храме Пречистыя Богородицы со умилением, ко Господу припадающия и во гресех своих с сокрушением кающияся, да отвратит Господь гнев свой, праведно на землю Русскую движимый, зело радовася, поя Богу: Аллилуия.

Икос 9
Витии безмолвствуют, сладкозвучнии же благодатию святителие Ермоген и Иов проповедуют покаяние во отпущение грехов, ихже ради гнев Божий потрясает царства, и исторгают слезы покаяния и вопли рыдания, ими же согрешившая Русь омылася есть, освятилася, оправдалася и ныне поет своему по Бозе помощнику православно:
Радуйся, грешныя отечески наказуяй;
радуйся, покаяние, яко спасение от всех зол, благовествуяй.
Радуйся, властию от Бога грехи царства разрешаяй;
радуйся, от всякия скверны плоти и духа православныя очищаяй.
Радуйся, слезными теченьми землю нашу оросивый;
радуйся, плоды послушания святей Церкви на ней возрастивый.
Радуйся, рыданьми покаяния лице царства обновивый;
радуйся, милость Божию к нам, грешным, обративый.
Радуйся, святителю Ермогене, пастырю добрый Руси православныя.

Кондак 10
Спасти хотя Русь от безначалия грехолюбиваго не к темному Западу, но к богобоязненному дому Романовых обратил еси очи свои, святителю Ермогене, да будет он властию от Бога во утверждение Христова Закона и да поют царие и людие единеми усты и единем сердцем Спасителю Богу: Аллилуия.

Икос 10
Стена необоримая Церкве был еси, святителю, еюже царство Русское оградися, в православии утвердися и от врагов спасеся, и ныне поет ти благодарственно:
Радуйся, мудрование Запада отвергаяй;
радуйся, православное житие благословляяй.
Радуйся, святых преданий хранителю;
радуйся, уставов церковных ревнителю.
Радуйся, молитву и пост, яко сокровище спасения, лобызаяй;
радуйся, святыя иконы и мощи святых со благоговением почитаяй.
Радуйся, дому Романовых радость благовествуяй;
радуйся, в нем Божиею милостию царя всея Руси указуяй.
Радуйся, святителю Ермогене, пастырю добрый Руси православныя.

Кондак 11
Пение исходное и рыдание надгробное творит святая Русь у гроба святителя Ермогена, положившаго душу свою за други своя. Не плачите, православнии, но паче дерзайте верою: праведник бо и по смерти будет жити во веки, поя Богу: Аллилуия.

Икос 11
Светильник Христов, на верху горы стояй и всей Руси светяй был еси, святителю Ермогене. И се, полагаешися под спудом могильным плотию, да возсияеши духом, яко солнце, во Царствии Отца Небеснаго, нас же да научиши сице пети болезни и труды твоя:
Радуйся, с престола патриаршаго беззаконно сверженный;
радуйся, в темное подземелие, яко во гроб вверженный.
Радуйся, и зде овцы своя волком хищным не предавый;
радуйся, и зде спасение Руси благовествовавый.
Радуйся, правды ради многими скорбьми терзаемый;
радуйся, гладом и мученьми даже до смерти изнуряемый.
Радуйся, мучениче, за православие царства пострадавый;
радуйся, страстотерпче, в руце Господу дух свой предавый.
Радуйся, святителю Ермогене, пастырю добрый Руси православныя.

Кондак 12
Благодати Божией сокровище явися святая и всечестная рака твоя, святителю отче Ермогене, и источник приснотекущия силы, еюже беси изгоняются, недужнии исцеляются, хромии ходят, глусии слышат, слепии прозревают, озлобленнии смиряются, скорбящии утешаются и вси ликуют о Господе и прославляют Бога, дивнаго во святых Своих, поюще Ему: Аллилуия.

Икос 12
Поюще твое прославление, святителю Ермогене, сия песни приносим ти, чудотворче святый, яко благоухание христианския радости: зрим бо Божию силу не токмо в немощех, но и в останках твоих совершаему. И ныне озаряеши нас светом твоея благодати, обвеселяя сердца наша пети ти со умилением:
Радуйся, ты бо Сладчайшаго присно созерцаеши;
радуйся, ты бо лицем к лицу Христа воспеваеши.
Радуйся, ты бо от лица Его озаряешися божественным светоизлиянием;
радуйся, ты бо во свете лица Божия награждаешися небесным сиянием.
Радуйся, ты бо божественною силою преображаешися от славы в славу;
радуйся, ты бо, яко солнце новое, украшаеши Его державу.
Радуйся, ибо твоим сиянием и мы незримо просвещаемся;
радуйся, ибо твоею силою и мы оживотворяемся.
Радуйся, святителю Ермогене, пастырю добрый Руси православныя.

Кондак 13
О, преславный угодниче Божий, добрый пастырю Руси, святителю отче наш Ермогене! Приими наше твоей славе сорадование, яко воздыхание души: жаждет бо неотемлемыя радости, и умоли Пастыреначальника Христа даровати и нам пребывающую благодать утешения и радования, да веселится пред лицем Его Русь и да поет Ему выну: Аллилуия.
Сей Кондак глаголи трижды. И паки чтется 1-й Икос: Ангела-хранителя... И паки 1-й Кондак: Изрядный воеводо...

Молитва святителю и чудотворцу Ермогену [1]
О, великий угодниче Христов, святителю отче нашъ Ермогене! К тебе, молитвеннику теплому и предстателю пред Богом непостыдному, усердно притекаем, в нуждах и скорбех наших утешения и помощи просяще. В древнюю годину искушений, внегда обышедше обыдоша страну нашу нечестивии врази, Господь яви тя Церкви Своей столпа непоколебима и людем российским пастыря добра, душу свою за овцы положивша и лютыя волки далече отгнавша. Ныне убо призри и на ны, недостойныя чада твоя, умиленною душею и сокрушенным сердцем тебе призывающия. Крепость бо наша в нас оскуде и вражия ловления и сети обыдоша нас. Помози нам, заступниче наш! Утверди нас в вере святей, научи нас всегда творити заповеди Божия и вся предания церковная, от отец нам заповеданная. Укрепи Благовернаго Царя нашего, Богом нам даннаго, и научи нас любити Его нелицемерно. Пастырем нашим буди архипастырь, воином вождь духовный, болящим врачь, печальным утешитель, гонимым заступник, юным наставник, всем же благосердый отец и за вся теплый молитвенник; яко да молитвами твоими ограждаеми, непрестанно воспоем и прославим всесвятое имя Живоначальныя Троицы, Отца и Сына и Святаго Духа, во веки веков. Аминь.

Тропарь на преставление [17-го Февруария], глас 4
Российския земли первопрестольниче и неусыпный о ней к Богу молитвенниче! за веру Христову и паству твою душу свою положив, державу царей наших утвердил еси и страну нашу от нечестия избавил еси, темже вопием ти: спасай нас молитвами твоими, священномучениче Ермогене, отче наш.

Ин тропарь на прославление [12-го Маия], глас 4
Приспе день светлаго торжества, град Москва радуется, и с ним Русь Православная ликоствует песньми и пеньми духовными: днесь бо священное торжество в явлении честных и многоцелебных мощей святителя и чудотворца Ермогена, якоже солнце незаходимое возсия светозарными лучами, разгоняя тму искушений же и бедъ от вопиющих верно: спасай нас, яко предстатель нашъ, великий Ермогене.

Слава, и ныне, богородичен
Еже от века утаенное, и ангелом несведомое таинство: Тобою, Богородице, сущим на земли явися, Бог в неслитном соединении воплощаемь, и Крест волею нас ради восприим, имже воскресив первозданнаго, спасе от смерти души наша.

Кондак, глас 6
Темницею и гладом изнуряемь, даже до смерти верен пребыл еси, блаженне Ермогене, малодушие от сердец людей твоих изгоняя и на общий подвиг вся призывая. Темже и нечестивых мятеж низложил еси и скиптры царства утвердил еси, да вси зовем ти: радуйся, заступниче Российския земли.

Величание
Величаем тя, священномучениче Ермогене, и чтем святую память твою, ты бо молиши за нас Христа Бога нашего.

Примечание
[1] Молитва святителю Ермогену печатается по изданию: «Акафист святителю и чудотворцу Ермогену. [Память святителя Ермогена празднуется Месяца Феѵруария в 17-й день. Переложение и открытие святых мощей — Месяца Маия в 12-й день.] — Издание Московскаго Большаго Успенскаго Собора. — М.: Синодальная Типография, 1917. — Л. 15-16».

Источник: Служба и акафист святителю Ермогену, патриарху всея Руси. // «Богословский Вестник», издаваемый Императорскою Московскою Духовною Академиею. — Сергиев Посад: Типография Св.-Тр. Сергиевой Лавры, 1916. — Том III. (Сентябрь). — С. 14-22.

Взято с http://osanna.russportal.ru