Кондак 1
Избранней Богом от рода языческого, преславней невесте Христовой, наставнице, защитнице и небесной покровительнице нашей, благодарственная восписуем ти, молитвенницы твои, святая и всехвальная преподобномученице Евгение. Ты же, яко имуще дерзновение ко Господу, от всяких бед, зол и болезней свобождай нас, с любовию тебе зовущих:
Радуйся, святая Евгение, невесто Христова благословенная!

Икос 1
Ангельски на земли в преподобии и правде поживше, преславная преподобномученице Евгение, многия души ко Христу преведшая, страдания лютыя за имя Его кротце претерпевшая и сего ради небесныя радости причастнице быти сподобилась еси. И ныне, пребыющи во Царствии небеснем вкупе с лики Ангел и всех святых и непрестанно молишися за ны со умилением поющия ти таковая:
Радуйся, дево святая, райскою красотою сияющая!
Радуйся, маслино благоплодная, елей милости Божия обильно нам источающая!
Радуйся, на зов Господень радостно притекшая!
Радуйся, всем желанием Христу последовавшая!
Радуйся, святое целомудрие и девство добре сохранившая!
Радуйся, Христа-Спаса всем сердцем возлюбившая!
Радуйся, вольная страдания за имя Его претерпевшая!
Радуйся, о спасении нашем Спасителя умоляющая!
Радуйся, милость Богородицы к нам приклоняющая!
Радуйся, святая Евгение, невесто Христова благословенная!

Кондак 2
Видяще тя, преславная Евгение, яко крин в тернии прозябший: ты бо аще и в роде языческом рождена еси, обаче закон Божий в сердце твоем написан выну имела еси, и целомудрие, аки зеницу ока, блюла еси; мы, сему радующеся, Богу, Дивному во святых Своих, взываем: Аллилуия!

Икос 2
Разумом твоим вся добре ведуще познала еси, богомудрая Евгение, яко «идоли язык, сребро и зла, дела рук человеческих суть; подобнии им да будут творящии я и вси надеющиися на ня»(пс 113; 12, 16) и отвергше тыя, Бога истинаго, Творца всяческих, познала и возлюбила еси, Мы же, сия похваляюще, таковые славословия приносим ти:
Радуйся, заблуждения язычиския отвергшая!
Радуйся, Бога истиннаго познанием преславно обретшая!
Радуйся, прежде разумения закона Божия по закону совести праведно жившая!
Радуйся, прежде приятия веры христианския, делы христианом подобающея творившая!
Радуйся, кроме Небеснаго, иного жениха знати не восхотевшая!
Радуйся, чтением посланий Павловых назившаяся!
Радуйся, гласу Божественныя благодати прилежно внимавшая!
Радуйся, водительству Духа усердно последовавшая!
Радуйся, святая Евгение, невесто Христова благословенная!

Кондак 3
Сила Вышняго осени тя, святая дево Евгение, егда оставила еси дом родительский, жития в нем суетнаго ради; душею же святою твоею устремилася бо еси к Христу, Жениху твоему небесному, Его возлюбила еси, и Ему же молитвы твоя о родших тя возносила еси, поюще: Аллилуия!

Икос 3
Имея желание начало житию богоудному положити купно с целомудренными слуги твоима, блаженными Иакинфом и Протом притекла еси, святая Евгение, ко святителю Елию, просяще его себе и слуг твоих крещения святаго сподобити и сопричтити вы братии обители честной.Святитель же сотвори по глаголу твоему; мы ныне милость Божию, на тебе явленную воспевая, таковыя похвалы возносим ти:
Радуйся, святое крещение от руки святителя Божия приявшая!
Радуйся, умрети миру и похоти его возжелавшая!
Радуйся, во обитель иноческую со слузи твоима удалившаяся!
Радуйся, во образе мужестем тамо подвизавшаяся!
Радуйся, в добродетельном житии, яко древо многоцветнье, процветшая!
Радуйся, подвиги твоима старцев и подвижников обительских превозшедшая!
Радуйся, сугубыми молитвы твоима Господеви угодившая!
Радуйся, смирением твоим и подвиги ангелов возвеселившая!
Радуйся, святая Евгение, невесто Христова благословенная!

Кондак 4
Бурю скорбей и напастей, злобою мира сего воздвизаемую, постом и молитвою утолила еси до конца, святая мати наша Евгение, ныне же убо, причащаяся славы небесная со всеми святыми, предстоиши Царю Славы, Христу Богу нашему, и купно с ними воспеваеши: Аллилуия!

Икос 4
Слышавше, всехвальная Евгение, глаголы апостольская яко: «умертвите убо уды ваша ,яже на земли: блуд, нечистоту, страсть, похоть злую и лихоимание, еже есть идолослужение» ( Колос.3-5 ). Сему усердно последовала еси. Мы же, сия поминающе, просим тя: укрепи нас в житии благочестивом и добродетельном и приими любовию ти приносимыя величания сия:
Радуйся, в чистоте живущих покровительнице богодарованная!
Радуйся, благочестивых супругов в добродетели утверждающая!
Радуйся, чадом в целомудрии укреплятися помогающая!
Радуйся, дев и юношей от блудной страсти оберегающая!
Радуйся, от похоти противоестественной исцеляющая!
Радуйся, Господеви, а не человеком угождати нас научающая!
Радуйся, к покаянию и исправлению жития взоры духа нашего направляющая!
Радуйся, к предстательству твоему прибегающим благословением небесным воздающая!
Радуйся, святая Евгение, невесто Христова благословенная!

Кондак 5
Боготечной звезде подобно бысть житие твое, святая преподобномученице Евгение, яко Христа Спаса Нашего от всея души возлюбивше, все заповеди Его безпорочно сохранивше, во святем целомудрии твоем и чистоте твоей, аки бесплотна, жительствовала еси и в тишине помыслов твоих Царю и Богу непрестанно возглашала еси: Аллилуйя!

Икос 5
Видевше братия тя во смирении и кротости подвиг иноческий совершающу, прихождаху к тебе и назидахуся, а после же во игумена обители тоя избраша тя. Ты же сия, аки волю Божию, восприяла еси и доброю и мудрой наставницею ко спасению има явилася еси. Мы же, сия поминающе, молим тя, святая мати, озари лучами добродетелей твоих и нас, грешных, да зовем ти:
Радуйся, теплотою Божественной любве души наша согревающая!
Радуйся, омраченныя умы наша просвещающая!
Радуйся, окаменелыя сердца наша оживляющая!
Радуйся, от страстей и бед чтущих тя избавляющая!
Радуйся, в терпении и смирении нас утверждающая!
Радуйся, труды наша на пути спасения облегчающая!
Радуйся, от насилия демонского свобождающая!
Радуйся, от искушений и соблазнов удаляющая!
Радуйся, от напрасныя смерти нас изымающая!
Радуйся, святая Евгение, невесто Христова благословенная!

Кондак 6
Проповедница немолчная и евангельских истин вещательнице была еси во игуменском служении твоем, богоносная мати наша Евгение, наставляя ближних твоих в добродетелех христианских: смирении, кротости, воздержании и чистоте. Мы же ныне молим тя, святая мати, предстательством твоим небесным испроси и нам сия боголюбезныя добродетели, да не поработимся страстем греховным, но благочестно воспоем Спасителю нашему: Аллилуия!

Икос 6
Возсияла еси, аки звезда светозарная, и Божественной благодатию отгнала еси тьму идолобесия, преславная Евгение, просветиши во граде Александрии люди многия, иже видеша правду Христову на судилище неправедном дерзновенно явленную тобою. Мы же, сия ныне поминающе, молим тя, преподобная мати наша, просвети и нас, тьмою греховную омраченных и светом невечерним озари славящих тя и вопиющих ти таковая:
Радуйся, тьму языческую дерзновенно обличившая!
Радуйся, гнева наместника римскаго не убоявшаяся!
Радуйся, злобу и коварство врагов Христовых тому показавшая!
Радуйся, силу Божию перед нечестивыми проповедавшая!
Радуйся, любити Бога и творити волю Его нас научающая!
Радуйся, светом истины сущих во тьме и сени смертней озаряющая!
Радуйся, огнем молитвы твоея стрелы вражия попаляющая!
Радуйся, беды и печали от любящих тя отгоняющая!
Радуйся, святая Евгение, невесто Христова благославенная!

Кондак 7
Хотяще знатный род твой, аки дар драгоценный, Господеви принести, преподобная богоносная Евгение, Христа Распятого ближним сродником твоим проповедала еси, праведники же и мученики има быти поспособствовала еси. Тем же молим тя: помози спасение вечное и нам, многогрешным получити, да выну поем о тебе Господеви: Аллилуия!

Икос 7
Новая радости исполнися сердце твое, преподобная мати Евгение, егда Духом Святым водимая, в страну Римскую вселилась еси, и тамо обитель девичью во славу Божию создала еси, собору же дев и жен, иночествующих учительница богомудрая явилась еси, наставляя тех девство свое хранити и паче всего земного Господа любити. Мы же сия поминающе, таковые похвалы приносим ти:
Радуйся, трудом апостальстим в земли Римстей поревновавшая!
Радуйся, обитель нову во славу Господню создавшая!
Радуйся, дух кротости в сердца наши вселяющая!
Радуйся, уповати на Творца нас наставляющая!
Радуйся, к творению дел благих всех нас подвизающая!
Радуйся, за вся Христа благодарити нас наставляющая!
Радуйся, всех нас к подвигу духовному ныне призывающая!
Радуйся, сострадати страждующим нас научающая!
Радуйся, святая Евгение, невесто Христова благословенная!

Кондак 8
Странно бысть неверным римляном пречудное житие твое, всехвальная Евгение; тои убо почаху пред кесарем своим клеветы на тя воздвигати, браконенавистницей и злою волховательницею тя мняху. Ты же за Творца нашего благодаряще, непрестанно и нелестно воспевала еси Ему: Аллилуия!

Икос 8
Весь тьме идолопоклонства предан бе епарх Никитий, иже повеле ти, достохвальная Евгения, на судилище явитися. Ты же вновь (паки) зловерие языческое обличила еси и волею судий твоих введена была еси в капище богомерзкое на поклонение; и егда же вознесла еси молитву Христу Богу паде Артемида, богиня языческая, и обвалися капище идальское и тако прославися тобою Всемогущий Бог христианский. Мы же, чтуще силу молитвы твоея, во умилении сердец глаголим ти:
Радуйся, лести епарха не внявшая!
Радуйся, в храм Артемиды вошедшая!
Радуйся, трусом земным капище разрушившая!
Радуйся, тобою бо идолопоклоницы посрамившая!
Радуйся, тобою бо научашася поклонятися Богу Единому!
Радуйся, в волховании оклеветанная!
Радуйся, нас от клеветы избавляющая!
Радуйся, от злаго волхования нас сохранющая!
Радуйся, святая Евгение, невесто Христова благословенная!

Кондак 9
Всякие беды, скорби и напасти избавляеши нас, преподобная мати наша Евгение, твоими теплыми к Богу молитвами; сего ради к предстательству прибегаючи, смиренно молим тя: испроси нам вся ко временней и вечней жизни полезная, да сподобимся горнего Иерусалима достигнути и купно с тобою воспевати Богу: Аллилуия!

Икос 9
Вития многовещаныя не возмогут по достоянию восхвалити труды твоя, подвиги твоя и всякую добродетель твою: от юности бо до самой кончины мученической неустанно Господеви работала еси, труды ко трудом прилагая и от силы в силу восходя, да прославится в тебе Христос, Его же ради подвизалася еси, Его же возлюбила еси, Его же Единого вожделе душа твоя, Его же ради страдания многи претерпела еси. Тем же молим тя, святая Евгение, приклони милосердие Божие и к нам, взывающим ти сице:
Радуйся, храм Божий в сердце твоем сотворившая!
Радуйся, благому игу Иисусову любомудро себе покорившая!
Радуйся, вся добродетели в себе совокупившия!
Радуйся, убелившая ризы своя в крови агнчей на земли!
Радуйся, в лике девственниц предстоящая Агнцу Божьему на небеси!
Радуйся, немощных и сирых благодатно укрепляющая!
Радуйся, пламень злобный струями любве твоея угосающая!
Радуйся, мир Божий в сердца наша привносящая!
Радуйся, святая Евгение, невесто Христова благословенная!

Кондак 10
Спасительного подвига твоего зряще течение, восхваляем страдания твоя, преподобномученице Евгение, ты бо ввержена в реку Тибр по воде аки по суше, шествовала еси; после же в пещи огненной пребывая, неопальная явилась еси; биение, осмеяние и иные злострадания кротце претерпела еси; ныне же венцем Царствия Небеснаго венчавшися, со всеми святыми Господеви присно взываеши: Аллилуия!

Икос 10
Стене непоколебимой и адаманту крепчайшему подобная явилась еси, всехвальная Евгение, егда во граде Риме взяша тя злочестивии в темницу ввергоша, гладом и хладом покорити тя желающе. Ты же, угоднице Христова, на Спасителя все упование твое возложила еси и хлеб небесный в пищу себе прияти от Господа сподобилась еси. Мы, Бога, дивнаго во святых своих славяще, тебе, святая страстотерпице, таковые похвалы ныне приносим:
Радуйся, в страданиях, яко злато в горниле , очистившая!
Радуйся, сквозь огнь и воду мучений в покой небесный вшедшая!
Радуйся, огнем земным Христа ради опаленная!
Радуйся, Божестенным огнем сердца наша возжигающая!
Радуйся, заточение темничное радостно претерпевшая!
Радуйся, дево святая, мучителей своих посрамившая!
Радуйся, плоть твою духови совершенне покорившая!
Радуйся, в женстем естестве мужество велие явившая!
Радуйся, святая Евгение, невесто Христова благословенная!

Кондак 11
Пение непрестанное вознося ко Господу, была еси вместилищем силы и славы Божия. Сего ради милости велией и славней сподобилась еси от Господа нашего: Сам Спаситель во узах темничных сущу, посети тя и прорече ти о близь грядущей кончине твоей. Ты же, всю себя Господу придавая вознесла еси Творцу нашему ангельское пение: Аллилуия!

Икос 11
Свет Божественный осия тя, святая мученице Евгение, егда в самый праздник Рождества Спасителя Нашего в темнице римстей во главу усеченная, душу свою предала еси Христу, Жениху Твоему. Тем же мы, благоговейне воспоминающе страдания и подвиги твоя, с любовию зовем ти сице:
Радуйся, в темнице дивнаго видения сподобившая!
Радуйся, на подвиг мученичества свыше укрепленная!
Радуйся, смерти телесныя не устрашившаяся!
Радуйся, веру, надежду и любовь до конца сохранившая!
Радуйся, в день Рождества Христова страстем Христовым приобщившаяся!
Радуйся, кровию своею торжество веры истинныя утвердившая!
Радуйся, радостно за главу Церкви Христа, под меч главу твою преклонившая!
Радуйся, венец славы из рук Господа приявшая!
Радуйся, святая Евгение, невесто Христова благословенная!

Кондак 12
Благодать от Бога получивше, пречудная Евгение, явилась еси в царственнем сиянии славы твоея небесныя праведней матери твоей, о кончине твоей зело скорбящей, и вельми утешила ю еси. Мы же ныне просим тя, заступнице наша, озари скорбное житие наше светом надежды Христовой и сподоби выну купно с тобою Господеви воспевати: Аллилуия!

Икос 12
Поюще пение похвальное усты недостойными, уповаем на милость Божию и твое, всеславная преподобномученице, заступление и ходатайство за нас, многогрешных и просим тя: не престани молитися за нас купно со святыма родители твоима, священномучеником Филиппом и блаженною Клавдиею и святыми страстотерпцы царевною Василлою, Иакинфом и Протом, да помилует и нас Господь вашего предстательства ради. О сем же воздыхающе, таковые похвалы тебе, святая Евгение, приносим:
Радуйся, носителей имени твоего неусыпная хранительнице!
Радуйся, кротких и благих нравов благоискусная насадительнице!
Радуйся, нечестивых и душетленных обычаев неуклонная искоренительнице!
Радуйся, дух любви к ближним в сердцах наших воскрешающая!
Радуйся, друг друга тяготы носити нас подвизающая!
Радуйся, тайно творити добродетели нас научающая!
Радуйся, скорби наша в радость претворяющая!
Радуйся, к небесем умы и сердца наши обращающая!
Радуйся, святая Евгение, невесто Христова благословенная!

Кондак 13
О прехвальная угоднице Божия, преподобномученице Евгение, милостивая и кроткая заступнице наша. Нынешнее наша моление приими и от всяких бед, скорбей душевных и телесных, от враг видимых и невидимых, на нас находящих, избави нас и к Царствию Небесному ходотайством твоих направи всех, со умилением и любовию поющих о тебе Богу: Аллилуия!

Автор сего акафиста Евгений Владимирович Храповицкий