Кондак 1
Избраннаго раба Божия, добраго воина Евгения прославим и похвальныя песни воспоем ему, яко веры отеческой защитителю и святаго православия укрепителю, предстоящаго ныне во обителех святых Престолу Пресвятыя Троицы, молитвами своими сохраняя нас от бед и напастей агарянских, с верою и любовью зовущих ти:
Радуйся святый мучениче воине Евгение, земли российской украшение и матери родимей утешение.

Икос 1
Архангелы и ангелы возликоваху в день святаго Вознесения Господа нашего Иисуса Христа, славя крепость веры твоея, тело отдавшаго на терзание злобным агарянам, души же своея не повредиша, крест честный в подтверждении сего сохраниша на персех своих. Мы же таковому мужеству дивящеся со умилением взываем сице:
Радуйся, во отрочестве своем крестом душу свою украшавый;
Радуйся, на поношения и насмешки людския внимания не обращавый;
Радуйся, стойкость и непреклонную веру Господу делами доказавый;
Радуйся, душу свою Христа ради и Евангелия погубивый;
Радуйся, присяге воинской и братству солдатскому верность сохранивый;
Радуйся, матери телесней и Церкви Божией честь и покой не порушивый;
Радуйся, святый мучениче воине Евгение, земли российской украшение и матери родимей утешение.

Кондак 2
От юности своея приняв заботу о матери своей, под обстояния житейския рамена младыя подставивый, не убоялся работы многия, пример добрый юношам и девам подавая, укрепляясь в вере дабы сподобиться воспевати ныне в Небесных чертозех Христу Богу: Аллилуйя.

Икос 2
Любознательность к миру окружающему имея, сожаление и милость о природе тварной Богом устроенной для блага человеческаго проявляя, удостоился еси восхождения ко Горним обителям в дни расцвета весенняго. Буйством трав и дерев цветущих, ручьев и арыков звонкоголосых о подвиге твоем повествовавших, крестом спасения жизнь юную венчая, злодеев мучивших тя удививший и нам пример благий для подражания подавая бессмертней кончиною своея, таковому дерзновению о Христе дивяшеся глаголем сице:
Радуйся, Господа до крови и дня вознесения души твоея исповедавый;
Радуйся, идольскую прелесть и надежду сломить тя сокрушивый;
Радуйся, претерпением побоев и издевательств мучителей удививый;
Радуйся, место себе во Царствии Божием со святыми избравый;
Радуйся, неосуждением злохитрых врагов веру сотоварищей по мукам укрепивый;
Радуйся, в земных воинех добрым воином Царя Небеснаго себя показавый;
Радуйся, святый мучениче воине Евгение, земли российской украшение и матери родимей утешение.

Кондак 3
Твердость поступи ног твоих ощутил ты, егда коснулась тя благодать Святаго крещения во еже ходити стопами заповедей Его. И по жизни шел ты, мучениче, силою благодати Божией препоясанный о чреслех твоих, дабы сокрушити главу змия древняго и падших ангелов его, темже в радости духовней прославляем тя и воспеваем Богу: Аллилуйя.

Икос 3
Не зная наперед судьбы своей, живя в миру, яко многия: дружбой дорожа, тело закаляя, словно скорби многия предвкушая, не связал себя любовью телесной едино возлюбив Господа и верно послужа Ему похвальныя словеса наша приими да блажим тя сице:
Радуйся, яко адаманте веры Христовой светло блиставый;
Радуйся, не о себе, но о матери в письменах и молитвах попечения не оставлявый;
Радуйся, душу свою за Отечество православное без раздумий полагавый;
Радуйся, оружием креста богомерзских противников низлагавый;
Радуйся, диавола и слуг его звероподобных и богохульных посрамлявый;
Радуйся, язвы телесныя на теле своем Христа ради возымевый;
Радуйся, святый мучениче воине Евгение, земли российской украшение и матери родимей утешение.

Кондак 4
Ничтоже сумняшеся во дни смутныя возгорения пламени огня войны во Отечестве твоем, егда кровь и слезы людския, яко вода землю, нескончаемо орошать стали, не уклонился ты повинности воинской, избрав Божие прежде корысти собственной, встал в строй воинов Христовых, смерти лютей не страшася, страхом Божиим водим, веру в сердце своем сохранил даже до уз темничных, вопия Христу: Аллилуйя.

Икос 4
Границу в нерушимости соблюсти призванный, в сердце своем сохранил границы дозволеннаго мирскаго утешения, дабы не пресыщая себя утехами мира сего, вышел на брань духовную с князем тьмы и сослужащими ему, ужасы плена жестокаго, пыток изощренных претерпевая, собратьев по оружию доблестью укрепляя, вселяешь и в нас немощных силу величати тя многажды сице:
Радуйся, страдания с мужеством велиим перенося Христа никакоже не отступивый;
Радуйся, исповедниче истиннаго Бога несокрушимый;
Радуйся, искушения предательства, яко рифы житейския, миновавый;
Радуйся, присяге Родине, яко отцы и деды твоя, не изменивый;
Радуйся, стрелы лукаваго в праведное сердце твое отразивый;
Радуйся, род, с тобою отошедший в вечность, навсегда прославивый;
Радуйся, святый мучениче воине Евгение, земли российской украшение и матери родимей утешение.

Кондак 5
В честности и долге матерью своею наставленный возрастал еси, места славы мемориальной посещая, благодаря всех «душу свою за други своя положивших», втайне желал продолжить святое дело сие видим тя во спокойствии славящем Христа Жизнодавца: Аллилуйя.

Икос 5
Делу ратному преданно служа, в послушании начальствующим пребывая, сохранил ты, страстотерпче, клятву на верность данную, не устрашась волков хищных под покровом ночи на вас, воинов, напавших и в неравной борьбе одолевших, но не сломивших волю крепкую и тела юныя. Таковое попечение о доблести солдатской восхваляем сице:
Радуйся, в схватке с нечестивыми кровию своею снег обагривый;
Радуйся, неправедное осуждение подвигом славным искупивый;
Радуйся, надежду на вызволение из плена безбожных не оставлявый;
Радуйся, подлости и лести благородство воина Христова предпочитавый;
Радуйся, веления мучителей ненавистных не исполнявый;
Радуйся, всех во узах и темницех сущих ныне укреплявый;
Радуйся, святый мучениче воине Евгение, земли российской украшение и матери родимей утешение

Кондак 6
Поношения и побои несносныя, глад и хлад подвальный снося, не о себе попечение имея, токмо о матери моляся непрестанно, отказался ты еси, святе, выкупа безчестнаго за свободу свою предложити и тем во славе Божией просиял еси, единство с матерью своей, яко Господь с Богородицей подтверждая ныне предстоиши среди святых Божиих, воспевая песнь Домовладыке: Аллилуйя.

Икос 6
Возсиявши, яко светило на Тверди Небесней, воинство православное в делании ратном научая, юношей и дев подвигом верности Христу Царю укрепляя, кровию праведною грехи многих искупляя, яко водою и нас окропи тя славящих верно:
Радуйся, любвеобильным житием твоим Богу угодивый;
Радуйся, вереи вечныя мира сего разрушивый;
Радуйся, выбор в пользу добра в битве духовней соделавый;
Радуйся, благодать обильную от Господа принявый;
Радуйся, спасение за стойкость в плену стодневном получивый;
Радуйся, уста своя гневом и словами непристойными не осквернивый;
Радуйся, святый мучениче воине Евгение, земли российской украшение и матери родимей утешение.

Кондак 7
В малом верен быв над многими поставлен ныне Господом, тело твое близ Бамута казненнаго в нетлении сохранившим, дабы христианския кончины и погребения всечестнаго удостоин был еси, место твоего блаженнаго упокоения под сению дерев и благовестом храма Вознесенскаго стало юдолию паломничества благочестивых, чтущих тя и воспевающих Христу Человеколюбцу: Аллилуйя.

Икос 7
Милость безмерную мужеству твоему и сострадание матерям скорбящим изволив, не оставил еси Милосердный Господь в безызвестности тела соузников Александра, Андрея и Игоря от рук палачей павших и усеченную главу твою, на траву скатившуюся и кровию юною землю обильно обагрившую, указал место временнаго упокоения вашего, возжелая вам вечных благ небесных. Таковому помышлению о тебе Божию взываем сице:
Радуйся, утробу ненасытную врагов богохульных не насытивый;
Радуйся, всех просящих помощи твоей в молитве не оставивый;
Радуйся, совращающихся на путь погибельный наставлявый;
Радуйся, крестик, яко дар бесценный Бога крепко дланию своею прижимавый;
Радуйся, уважение мучителей непримиримых втайне получивый;
Радуйся, смертию своею всечестною в жизнь вечную входивый;
Радуйся, святый мучениче воине Евгение, земли подольской украшение и матери родимей утешение

Кондак 8
Не токмо Господом, но и Матерью Божией призреваемый в день святаго Рождества Приснодевы об участи своей известие в мир принося, надежду о возвращении тела твоего и иже с тобою убиенных в пенаты родныя подавая, под сень берез и задумчивость пруда, друга детских забав твоих, упокоен будеши. Возблагодаря заступничество Пресвятыя Богородицы, воспоем Всецарицу и Господа: Аллилуйя.

Икос 8
Яко звезда Вифлеемская путь ко Младенцу Христу волхвам указующая, тако крест твой, цена спасения твоего, стал во мгле ночной и холоде могильном яркой звездочкой тя указавшей и сомнения в подвиге честном разрушившим всех верно чтущих тя сицевая:
Радуйся, сосуде Божий славою нетленною благоуханный;
Радуйся, пример благочестивый на потребу миру данный;
Радуйся, на стропотном пути спасения Господом оправданный;
Радуйся, правдою Искупителя мира о чреслех своих препоясанный;
Радуйся, в числе званых на Вечерю брачную избранный;
Радуйся, святый мучениче воине Евгение, земли российской украшение и матери родимей утешение.

Кондак 9
В памяти человеков прославленный, во иконах святых предстоиши ты ныне, образ воина христолюбиваго показуя, миром благословенным слабых в вере ободряя, на служение Отечеству идущих укрепляя, будучи воином земным стал воином Небесным во святых поставленным от Господа, темже мы трепещущею душею радостно восплещим и возопиим благодеющему Богу: Аллилуйя.

Икос 9
Произшедшее с тобою темниц души нашей коснулось и в волнение слезное нас привело; на Алтай, во Акташ, идеже храм во славу и память твою сооруженный, переносимся ныне ко всем с честию службу пограничную несущих, сердца наполнив благочестивыми движениями душ наших дабы воспевати тебе сицевая:
Радуйся, отвращение от лжи и зла и побуждение к правде и чести избравший;
Радуйся, верность Богу и матери своей неотступно утверждавший;
Радуйся, сквозь безбожие и разврат мира сего в чистоту шагнувший;
Радуйся, безверие людское, яко прах, с ног своих отряхнувший;
Радуйся, рука об руку с мучениками века кроваваго вставший;
Радуйся, Света Невечерняго в блистаниях губительных не утерявший;
Радуйся, святый мучениче воине Евгение, земли российской украшение и матери родимей утешение.

Кондак 10
Три месяца в муках нестерпимых пребывая, не озлобился, не оскорбил ропотом Троицу Пресвятую испытания тебе попустившую, но яко Иов Многострадальный принимал лишения Богом уготованныя для будущей славы твоея, при сем не оставляя попыток бежать плена идольскаго, дважды возвращаем был и бит нещадно помраченными изуверами, но яко камень тверд и непреклонен был еси, воспевая Богу: Аллилуйя.

Икос 10
Биением не добившись, лестию искушаем был еси во уши твоя вползающей, яко аспид пропастей земных, торг о жизни своей в обмен на крест Христов, перси твоя украшающем отринул, храня верность традициям дедовым. Тем же восхищенно взирающия на тя возглаголем сице:
Радуйся, выбор между жизнью и смертию отринувший;
Радуйся, зверствам нелюдей окаянных не покорившийся;
Радуйся, со крестом нательным воедино слившийся;
Радуйся, на землю павший и навеки с ней соединившийся;
Радуйся, чашу смертную до дна без остатка испивший;
Радуйся, к Богу Предвечному последнюю молитву обративший;
Радуйся, святый мучениче воине Евгение, земли российской украшение и матери родимей утешение.

Кондак 11
Немногословным будучи, крепко держался ты слова сказаннаго и обета даннаго, сдержал еси слово матери сказанное о возвращении в дом родной ранее срока службы установленнаго, вернулся в молчании уст и немеркнущей славе твоей, незримо славя Воскресшаго Христа: Аллилуйя.

Икос 11
Образцом для воинов был еси во дни тяжкия на поле брани, чтением Евангельским себя укрепляя, дорожа Словом спасения и храня Его в сердце своем, подвигая ны воспевати ти неотступно:
Радуйся, бесчестия и позора с помощью Божией избежавый;
Радуйся, обессиленных мучити тя посрамивый;
Радуйся, евангельским чтением денно и нощно вразумляемый;
Радуйся, Десницею Божией в испытаниях наставляемый;
Радуйся, ангельской любовию бесплотных чинов утешаемый;
Радуйся, в памяти людской стран и народов воскрешаемый;
Радуйся, святый мучениче воине Евгение, земли российской украшение и матери родимей утешение.

Кондак 12
Время залечит многия раны, но не печаль матери твоей, воине достославне, боли ран телесных и скорби душевной предпочтившей дело служения Отечеству православному, службу несущим и во врачебницах врачующихся и вознесутся к тебе молитвы многия, и выдохнет грудь православных слова до боли знакомыя «святый воине Евгение моли Бога за нас», и возопиет душа, воспаряясь крылами Христу Богу: Аллилуйя.

Икос 12
Весть о праведной кончине твоей, яко птица грады и веси Божий облетела, тучей темною спустилась и окутала сердца родителей твоих в горе неутешном навеки соединившихся, болию потери убила отца твоего, павшего на могиле твоей на землю снегом занесенную чувств лишишася. И распахнутся врата погоста церковнаго, принимая паломников православных и иноверцев, подвигом веры твоея восхищенных, и встанут все пред крестом в честь и память солдатскую сооруженному, и возопиют во славе Божией благодарно:
Радуйся, под Бамутом казненный и от Христа не отвергшийся;
Радуйся, в Небо отверзтое для души твоея вознесыйся;
Радуйся, во иконах святых с нами ныне молящийся;
Радуйся, душу своя из плена безбожия и развращения выводящий;
Радуйся, смертию праведной во Царствие Божие дверь открывающий;
Радуйся, от земли на Небо обетованное устремивыйся;
Радуйся, святый мучениче воине Евгение, земли российской украшение и матери родимей утешение.

Кондак 13
О святый мучениче воине Евгение! Приими сие малое приношение наших немощных сердец, восхищенных подвигом веры твоея и припадающих ко кресту твоему, кровию юною обагренному и грехи наша непомерныя искупившаго, вознеси ко Господу Богу теплыя молитвы твоя за ны, недостойныя: слабыя духом укрепи и всех за Отечество православное восставшим даруй крепость и служение нелицемерное да выну благодарно поем о тебе: Аллилуйя, аллилуйя, аллилуйя.
Трижды, затем Икос 1 и Кондак 1

Молитва святому мученику воину Евгению
О всеблагий и достохвальный мучениче воине Евгение! Имея пред собою образ подвигоположника Христа укрепился и ты, святе, на совершение подвига во спасение души твоея и во славу и честь церкви Божией, пример добрый юношам и девам показуя и своею юною кровию грехи многия искупая.
Не остави и нас во умилении к тебе прибегающих и с надеждою просящих крепости и утверждения во Святем Православии. Даруй нам осознание долга гражданскаго и совести нелицемерной, укрепи естество наше в преодолении обстояний житейских от Бога во вразумление нам ниспосланных для очищения от зловредной пагубы греха, душу нетленную растлевающую и во ад низводящую.
Научи нас любви к родителям нашим, дабы исполнилось обетование Божие и даровал Милосердный Господь нам благо и долголетие на земли. Отврати нас от прелестей земных и всего развращающаго и на погибель ведущаго. Во дни расколов губительных вдохни в нас силу противустати ересям и прельщениям мира сего. Да к тебе всегда взирающе и тобою наставляеми прославим Пресвятую Троицу Отца и Сына и Святаго Духа. Аминь. Метки: кратные акафисты, текст акафиста

Акафист составил священник Георгий Ханов, клирик Днепропетровской епархии УПЦ МП

Взято с http://akathistos.livejournal.com