Кондак 1
Избранный Церкви Зиждителя крестоносителю верный, страдания за Христа мужествене претерпевый, любовь искреннюю паствы стяжал еси, верою и любовию Владыке небесному до конца послужил еси, зрелым класом в житницы Небесныя положен еси. Мы же, творяще память твою, любовию восписуем ти:
Радуйся, Евмение, лика святительскаго достойное украшение!

Икос 1
Ангелов Творец, Господь Вседержитель, благодатиею Своею, возвышая человека в первое достоинство на Небеси, избра тя, отче Евмение, да служиши Ему в ангельском чину.
Ты же, крилами Богоданными, ангельски над миром мятежным, к высоте Небесней возшел еси, прославляя Того глаголом вдохновенным.
Мы же, восклицая в радости: «Таков бо нам подобаше архиерей», умиленным сердцем поем ти:
Радуйся, свеща, святою рукою Небесною зажженная;
Радуйся, путем узким неуклонно шествовый до града Вышняго;
Радуйся, архипастырю Божий, душею и телом воистину Преосвященный;
Радуйся, светильниче новоявленный земли Русския.
Радуйся, Евмение, лика святительскаго достойное украшение!

Кондак 2
Бурею искушений волнуемое и соблазнов море жития мирскаго не прельстиша тя, отче Евмение. Оставив бо ризы кожаные тли века сего, во град Божий Киев - вторый Иерусалим стопы направил еси. Во обители Свято-Троицкой в трудех неустанно подвизался еси. Мы же, Творцу веков, огнь любви Божественней, в сердце твоем возжегшему, воспоим: Аллилуиа.

Икос 2
Видя тщету мирских попечений и множество людей, себя в подданство князя мира сего отдавших, молился ко Господу: «Скажи мне Господи путь, в оньже пойду, яко к Тебе взях душу мою». Взывал к Царю царей, дающему спасение всем Горняго Отечества со тщанием взыскующим, да впишет тя в Книгу живых.
О таковем благонравии сердца твоего возносим:
Радуйся, любве ради Христовой земная оставил еси;
Радуйся, еяже ради, вся красная мира ни во чтоже вменил еси;
Радуйся, на рало Господне руце твои возложивый;
Радуйся, истинныя радости причастником быти возжелавый.
Радуйся, Евмение, лика святительскаго достойное украшение!

Кондак 3
Егда же, ветры адовы поднимашеся, Русь Святую опустошити, ты, отче Евмение, имея ревность о страждущей земле Русской, на брань всемирную, яко ратоборец, под скипетром Царя Православнаго пошел еси.
Мы же, ти, в подвизех воинских, за Святое Отечество крепко стоявшему, песнь достохвальную приносим: Аллилуиа.

Икос 3
Господь Всемилостивый, все течение жизни человечестей ко спасению направляющий, по грехом нашим, нашествие иноплеменных, братоубийство, лютование безбожных попусти и земля Русская кровию обагрися. Ты же, отче Евмение, во дни испытания веры, крепкое в ней стояние свидетельствуеши. Единому Богу работати возжелев, путь спасения иноческий избрав.
О сем ти достохвально возносим:
Радуйся, яко тебе не устраши путь лишения многотрудный;
Радуйся, блаженство нищеты духовной облобызавый;
Радуйся, отче, правых путей любителю;
Радуйся, яко премудрость Божию познаша, возжада душа твоя источника приснотекущаго.
Радуйся, Евмение, лика святительскаго достойное украшение!

Кондак 4
Управи стезю твою, отче всеблажене, Владыка Вседержитель, в монастырь свято – чудотворный. Где воины Христовы святии, с холмов Печерских, телеса коих Господь в нетлении соблюл, под покровом Девы Преблагословенной пребывают.
Жители подземнии пустыни Божией, из сада святых пещер, коих главы благословенные, елей источают щедро и благодать, юже вкусили в Мире Горнем.
Мы же, Богу, премудро благодати сей, причастника тебя соделавшему, от сердец наших воспоим: Аллилуиа.

Икос 4
Равноангельнаго жития взыскующе, в одежду светлую монашескаго чина облеклся еси. Ведал ты, отче Евмение, яко вода, истекающая от источника сердечнаго, нечистоты духовныя отбеливает и Небесныя обители сподобляет.
Орошал ланиты свои слезами покаянными, ко Творцу взывая о наставлении и укреплении тя на пути спасения тернистем.
О сем, похвальная ти восписуем:
Радуйся, в пострижении Евмением нареченный;
Радуйся, яко на поле покаяния сердечнаго безценный бисер Христа приобрел еси;
Радуйся, яко труба часа смертнаго и Суда Страшнаго, выну во ушесах твоих звучала еси;
Радуйся, яко чрез скорби к Отчизне Горней устремился еси.
Радуйся, Евмение, лика святительскаго достойное украшение!

Кондак 5
Ведал ты, отче святче, яко Царь Славы, боле благодати дает тому, кто для Него труда и живота своего не жалеет.
Во мнозех подвизех, разум духовный стяжал еси, ум свой в Небесная вперил еси, чувствия своя, аки некою стеною оградив. Кротостию и незлобием многия удивил еси, в орудие Духа Святаго себя уготовляя.
О сем, просвещающаму тя Господу вознесем: Аллилуиа.

Икос 5
Спасу Христу, Боготочною кровию, род человеческий обновившему, последовал еси, отче, ярем Его с терпением носивый.
Следы человеческой греховности выметая и жилище совести своея украшая, милое Небо трудом приклонял еси.
Ведуще ревность твою о спасении, приносим ти:
Радуйся, плоть свою духови покоривый;
Радуйся, терпением врагов видимых и невидимых победивый;
Радуйся, Богослужения церковныя возлюбивый;
Радуйся, возлюбленнаго тобою Иисуса в сердце носивый.
Радуйся, Евмение, лика святительскаго достойное украшение!

Кондак 6
Воздвигоша бурю злых, враг спасения нашего, во еже гнати веру Христову в годину лихолетия и мучити верныя люди Церкви Православныя.
Слуги же, преисподней, врагом наущении, ереси богоборческия обновленческия, хитросплетенныя, яко жало змеиное, тело Церкви Христовой вонзили еси, дабы люди многия прельстити.
Ты же, отче Евмение, скорби тяжцы, претерпевал еси, веру святую неустрашимо, даже до уз темничных, исповедал еси.
О сем, Владыке всяческих, благодатиею своею укреплявшему тебя на подвиги страдальческия, воззовем: Аллилуиа.

Икос 6
Русь же, державная, древле храм живый, новому Вавилону в плен предадеся.
Господь Милостивый, испытания попусти, на народ наш. Да вразумившись, людие к Богу возвратятся.
Ведал ты, угодниче Христов, тайну велию Божию, яко чрез страдания временная за Христа, ликование готовится верным вечная.
Мы же, ти, с радостию велиею, совершающе волю святую Божию, приносим:
Радуйся, яко не убоялся тело убивающих, ниже смутился страха их ради;
Радуйся, яко жребий исповедничества облобызавый;
Радуйся, яко хладом темничным, вера твоя не охладися;
Радуйся, яко узы темничныя за Христа, радостно претерпевый.
Радуйся, Евмение, лика святительскаго достойное украшение!

Кондак 7
По заточении же тяжцем, идеже болезни посох железный, коснуся тя, воине Христов, до конца дней твоих, ты отче Евмение, в миру пребывал еси.
Не отчаивался ты, егда гонения лютовали и храмы разрушалися. Ведал бо, яко храм Божий мы есьмы, в нем бо Русь Православная торжествует.
Мы же, радуяся о сем, поклон отдавая низкий Мудрости Превечней, воспоем: Аллилуиа.

Икос 7
Засевалась грехом земля святая Русская, дабы благодать Духа Святаго отгонялась. Зубы своима скрежета племя богоборное, остатки святости топча.
В час сей, ты Владыко, тайно к светильникам Христовым, сиявшим в горах и пропастех Кавказских, устремился еси. В местах горних потаенных, яко овча на пажити духовней, пасохся, меч молитвы пламенной оттачивая.
Мы же ти, с ревностию велиею, совершающему волю святую Божию, приносим:
Радуйся, благочестие и веру соблюдый нескверно;
Радуйся, наследие подвига святотеческаго вкусивый;
Радуйся, иноческаго жития истинный любителю;
Радуйся, в подвизех скрытых, славословие Богу возносивый.
Радуйся, Евмение, лика святительскаго достойное украшение!

Кондак 8
Промыслом Божиим, отче Евмение, в честный град Киев возвратился еси. Во обители Печерстей бремя служения церковнаго подъял еси, чин церковный благолепно исполняя.
Уста твоя, яко сладкозвучная цевница, на службах Божественных звучали.
Там же, равноангельнаго пострига в схиму сподобился еси, Ефремом нареченный.
Саном священства почтен был еси, с велим благоговением и страхом безкровную жертву приносил еси.
О сем, похвалу достойную возносим ти: Аллилуиа.

Икос 8
В соннем видении дивнем, митрополиту Киевскому, Царица Небесная, повелеша на главу твою, отче святче, митру святительскую возложити.
Ты же, в болезни смертней пребывал еси. Со отцами и братиею простившись, ко исходу души приуготовался еси.
Вскоре же, Лавру посещая, узрел тя, отче, митрополит во вратех обители, его встречающа. Уразумел он, яко воистину Дева Преблагословенная, жребий святительский указала тебе.
Мы же, яко избраннику Божию, тебе воспоим:
Радуйся, яко обильно в хиротонии епископстей, благословение небесное стяжал еси;
Радуйся, велений Божиих благоговейный исполнителю;
Радуйся, рукою крепкою, кормило от Господа приемый;
Радуйся, Взбранной воеводы верный служителю.
Радуйся, Евмение, лика святительскаго достойное украшение!

Кондак 9
Да не скрыт будет светильник под спудом, но да светит всем. Тако изведе тя, Человеколюбец Господь, из обители славней, на служение архипастырское многотрудное. Дабы душу свою за овцы полагая, множество людей окрест тебя, на узкий путь спасения наставляя, ко Христу приводил.
Людие же, мнозии, стопам твоим последоваша, взывая к Богу: Аллилуиа.

Икос 9
Пение всеумиленное и молитвы горячие вознося ко Спасу нашему о пастве твоей, небрегоша о болезни телесней.
Людие православнии, на службах твоих, со слезами молишася.
В молитве уединенней пребывая, отче праведный, видел, яко Матерь Божия на воздусе возносилась, покидая храм, Успению ея посвященный. Уразумел, яко скорби вящие грядут. Вскоре же, властию богоборною, храм сей в хранилище предан бысть.
Духом грядущая прозревая, угодницу Божию схимонахиню Рафаилу, издетска под крыло молитвы своея взял еси. О сем, откровение ей бысть, видя яко Владыка, мантиею своею ея покрывал.
Мы же, ти, угодниче Христов, велие дерзновение пред Господем стяжавшему, восклицаем:
Радуйся, словесы спасительными многих ко Христу приводивый;
Радуйся, уставов церковных преизрядный рачителю;
Радуйся, всем сердцем твоим о пастве твоей болезновавый;
Радуйся, чистых дев и вдовиц праведный хранителю.
Радуйся, Евмение, лика святительскаго достойное украшение!

Кондак 10
Силе духовней от тебе исходящей, людие дивляхуся. Владыку добраго и милосердаго утешителя тя обретше. Чада твоя испыташа, яко благословение твое, неземной мирной благодатиею, на дни многия душу наполняло.
Людие же, неции, зряща тя во алтаре храма соборнаго на литургии стояща, удивляхуся, егда по отпусте службы узнавша, яко Владыки во храме сем, в день сей не быша.
О сем, Царю веков, тя в сосуд благодатных даров преисполненный соделавша, воспоим: Аллилуиа.

Икос 10
Странническое жите проходил еси зде на земли, не имея покоя в трудах святительских, но вечнаго и непреходящаго Небеснаго града Иерусалима взыскуя. Труды к трудам прилагал еси. Сокрыты от мира высоты добродетелей твоих и глубины Божественныя любви твоея.
Патриарх, же Московский, воздая за труды твоя, митру свою, диамантами украшенную и облачение даровал ти еси. Ты же, отче, яко монах истинный, единожды в сем облачении благолепнем отслужив, благословил вручити его архиерею новорукоположенному.
Мы же, ти, вразумляющему нас к вещем скорогибнущим земным сердцем не прилеплятися, а паче о Горних помышляти, принесем таковая:
Радуйся, Архиерея вечнаго служителю всеусердный;
Радуйся, яко на земли жил по законам Небесным;
Радуйся, яко тихий свет любви обильно на всех изливавший;
Радуйся, яко в тайны Божественныя посвященный.
Радуйся, Евмение, лика святительскаго достойное украшение!

Кондак 11
Егда же, болезнь тяжкая усугубишася, ты Владыко, ведая о кончине твоей, призвал к себе из Лавры Печерския, отцев, сомолитвенников давних твоих.
Воистину преподобническою кончина твоя бысть. Сам елеем благовонным тело свое умастил, свещу затеплив – помолился, на одре возлег. Читать канон на исход души отцам повелел.
Слыша глас Домовладыки Небеснаго: «Рабе благий и верный, вниди в радость Господа твоего», отвещал: «Дух мой, предаю в руце Твои Господи», мирно отшел еси.
Людие же, слышавшее о чуднем твоем к Богу отшествии, с плачем умиленным взывали ко Творцу: Аллилуиа.

Икос 11
Православный люд же, на Успение Пресвятой Богородицы, с плачем и воздыханием велим, песнопеньми церковными, чрез град весь шествуя, тя Владыко, провождаху на кладбище Русское.
Во времена зим лютых, Богослужения долгие, без злой докуки мраза сильнаго, во храме кладбищенском, апостолу Иакову, брату Господню посвященному, Владыка здравием ослабленный, совершал еси.
Ныне же, тело Владычне, под алтарем храма сего, упокоено бысть.
Мы же, тебе, сподобльшемуся во славе со Христом пребывати, воспеваем:
Радуйся, безпреткновенно во обители горния душею возлетевый;
Радуйся, венцем неувядаемым увенчанный на Небеси;
Радуйся, граду древнему Житомиру, похвала и украшение;
Радуйся, помощник усердный, земнаго нашего крестоношения
Радуйся, Евмение, лика святительскаго достойное украшение!

Кондак 12
Светильник Православия, отец Кукша преподобный, с коим ты, Владыко, многая лета знаем был еси, возвестил ти, яко по смерти твоей мучим будеши.
По триех же, летех успения твоего, враг рода человеческаго, святости не терпя, рукама людей безбожных, на столетие рождения сатаниста всемирнаго, поругание страшное над мощами твоима соверши. Из под спуда церковнаго извергоша их.
Обаче же, Промыслом Божиим, чрез сие поругание - явлено мощей Владычних нетление.
О чуде сем, явленном, людие верни, воспевают Богу: Аллилуиа.

Икос 12
Благодать данную ти от Господа ведуще , прилежно просим тя, Владыко, пролей ныне теплую твою молитву о нас. Ты бо, рекл еси: «Кто будет за меня молиться, того у Престола помяну».
Вемы, яко явлением мощей нетленных твоих, миру воскресение грядущее проповедуется, нам же, залог многоценный заступления твоего.
Мы же ти, житием своим научавшему тесным путем заповедей Божиих ходити восписуем:
Радуйся, кивоте честный, дарованьми духовными преукрашенный;
Радуйся, соседателю в вышних святителем всем;
Радуйся, по кончине, паствы твоея не оставивый;
Радуйся, предстательством Твоим у Христа Бога, спасение вечное испрашиваем.
Радуйся, Евмение, лика святительскаго достойное украшение!

Кондак 13
Поюще праведное житие твое, Владыко Евмение, славяще труды твоя, зрим и исповедуем, яко кончина твоя – рождение бысть в жизнь приснотекущую, темже струями благодатными и нас земных окропляеши.
Сподоби же, и нам, предстательством твоим, в Православии незыблемо пребывати до конца живота нашего и в Небесныя обители вселитися.
О сем, поем дивному во святых Своих Богу: Аллилуиа.

Молитва
Святче Божий, Святителю Христов Евмение, достойнаго тя преемника Апостолом яви Господь. Дивящеся благодати, обитающей в тебе, величаем тя, стада словеснаго неусыпнаго к Богу молитвенника, ныне с Господом в Горних обителях пребывающаго. Призри на нас с высоты Небесныя и приклони к нам Вышнее Милосердие. Зриши бо, угодниче Христов тугу нашу и боль сердечную от раздоров и лишения братской любви пребывающих. Испроси нам у Христа Спаса, коемуждо по благодати: смирения, познания своея греховности, крепкаго стояния в вере истенней, радости во страданиях о Христе обрести.
Да соединившеся в веце будущем, с тобою архипастырю наш и со всеми святыми, прославим в Троице славимаго Бога: Отца, и Сына, и Святаго Духа. Аминь.

Акафист составлен и издан по духовному благословению, тщанием почитателей памяти владыки

Житомир 2014 год

Краткая биография
Архиепископ Житомирский и Овручский Евмений (Хорольский Евгений Николаевич) родился 26 декабря 1886 года в с. Богорождественка, Херсонской губернии.
Окончил Демидовскую учительскую школу.
1906 г. – поступил послушником в Свято – Троицкий монастырь Киева;
1907-12 г.г. – служба в Царской армии;
1912 г. – личный секретарь епископа Саратовскаго Дионисия;
1914г. – мобилизован в армию, дослужился до чина поручика;
1918 г. – поступил в Киево- Михайловский монастырь;
1919 г. – принял монашеский постриг с именем Евмений, рукоположен во иеродиакона;
1923 г. – в связи с переходом Михайловскаго монастыря к обновленцам, перешел в Киево – Печерскую Лавру;
1924 г. – назначен в Ленинград, на Лаврское подворье;
1930 г. – арест, осужден в концлагерь на три года (Беломорлаг);
1933- 1946 г. – Кавказ (Боржоми, Северная Осетия) – работа на разных предприятиях;
1946 г. – член Духовнаго Собора Киево – Печерской Лавры, эконом;
1950 г. – рукоположен во иеромонаха, благочинный Лавры;
Постриг в схиму с именем Ефрем;
1954 г. – возведен в сан архимандрита, хиротонисан во епископа Черновицкаго и Буковинскаго;
1958 г. – возведен в сан архиепископа и назначен архиепископом Житомирским и Овручским;
Скончался 25 августа 1967 года. Похоронен под алтарем Свято – Иаковлевскаго храма г. Житомира.