Кондак 1
Избранные Преблагим и Всемудрым Господом и Творцом всего видимаго и невидимаго, прехвальные херувимы, ближние служители Троицы Всесвятыя, вас величаем и славословим ныне мы, людие земнородные, и просим вас, заступницы и наставницы наши, умудрите ны на пути спасения вечнаго и приимите лики сия:
Радуйтеся, велехвальные херувимы, светом разума спасительнаго ны озаряющие!

Икос 1
Ангельский собор и человеческий род в радости духовной пребывая величает и славословит Творца миров, горнего и дольнего; вы же, богоносные херувимы, ближние служители Троицы Живоначальныя, не призрите наших слабых молений и величаний, с верою и упованием ныне возносимых, да вами направляемые и споспешествуемые возможем на небеси с вами купно словословити Господа Преблагаго. Сего же ради вам вопием сице:
Радуйтеся, яко от суеты земныя к правде небесней ум нас воскриляете;
Радуйтеся, яко познавати вечныя истины Божия нам помогаете;
Радуйтеся, яко от безплодных поисков умы наши исцеляете;
Радуйтеся, яко на правый путь присно наставляете;
Радуйтеся, истинным богопознаним разум наш наполняющие;
Радуйтеся, богоугодныя добродетели благоуспешно вкореняющие;
Радуйтеся, от тлетворнаго буйства страстей исцеляющие;
Радуйтеся, велехвальные херувимы, светом разума спасительнаго ны озаряющие!

Кондак 2
Видения всечуднаго сподоби Господь прехвальнаго угодника своего, блаженного Дионисия Ареопагита, иже, вняв неба содроганию, узрел есть горних миров таинства и возвестил еси в писаниях своих о служении высших чинов безплотных Творцу и Владыце Нашему; сие убо воспоминающе, просим вы, достославные херувимы, лепотою богоподобия преобразите души грешные наши, да возможем и мы купно с собором праведников и вами во веки воспевати Отцу Небесному: Аллилуйя.

Икос 2
Разумом, чувствами и всем естеством нашим восхищенные велиею премудростию Творца Нашего, величаем Его, и прославляем Всесвятое Имя Его, по прехвальному промышлению своему в первый день творения создавшему вас, многоочитые херувимы, яко служителей предвечныя мудрости Своея; сего ради мы с надежду взываем вам сице;
Радуйтеся, Божественныя силы и славы благоговейные созерцателие;
Радуйтеся, велений Отца Небеснаго благопоспешливые истолнителие;
Радуйтеся, огнекрылых серафимов и богоносных престолов сослужительные;
Радуйтеся, господств, властей, начал благомощные сомолитвенницы;
Радуйтеся, архангелов и ангелов преблагие споспешницы;
Радуйтеся, нам, земнородным, любвеобильные покровители и наставницы;
Радуйтеся, велехвальные херувимы, светом разума спасительнаго ны озаряющие!

Кондак 3
Силою богодарственнаго разумения вашего постигли есте, светозарные херувимы, яко Бог Сущий есть Альфа и Омега, начало и конец, яко токмо в Нем есть жизнь, и токмо через Него вся стало бысть, иже стало бысть; и сего ради блудословия преокаяннаго десницы отвергли есте и верность Вседержителю и Жизнедавцу явили есте; сице молим вы и нас в уповании безсомненном на милосердную премудрость Троицы Всесвятыя утвердите, да во веки с вами купно пети возможем: Аллилуйя.

Икос 3
Имуще промышление сокровенное Свое о всяческом творении благоволи Всеблагий Наш Господь, егда согрешиша супротив Него прародители наши, поставити на востоке у сада Едемского единого от херувим [Быт. 3:24] с мечем огненным, дабы оберегати путь к древу жизни. Сие же ныне воспоминая, просим вас, благословенные херувимы, удалити ны от дорог, ведущих к смерти и на пути, ведущему к жизни вечной, утвердите стопы наши, да зовем вам сице:
Радуйтеся, от злохитростного обольщения бесовскаго оберегающие;
Радуйтеся, козни диавольския всепобедно разрушающие;
Радуйтеся, любовию к Богу души наша исполняющие;
Радуйтеся, радостию познания благаго умы наши возвеселяющие;
Радуйтеся, яко озарением истины взыскающим одаряете;
Радуйтеся, яко от преткновений и соблазнов ны удаляете;
Радуйтеся, яко любити Бога нас всего земнаго научаете;
Радуйтеся, велехвальные херувимы, светом разума спасительнаго ны озаряющие!

Кондак 4
Бури сомнений и маловерия избавите ны, светоносные херувимы, да вами направляемые и озаряемые, веру крепкую, надежду нерушимую и любы премощную обрящем, в разумении истины Божия и дел спасительных возрастем, в добродетелех христоугодных души наша воспитаем и, ликом небесным подражая, велегласно и радостно воспоим: Аллилуйя.

Икос 4
Слышит Господь ваши о нас на Небеси ходатайства, велемудрые и велечудные херуимы, и исполняет ваша прошения, мы же, грешнии, просим и молим вас, богоблаженные заступники наши:, скоро услышите моления наша и вся наша печали на радость преложите и прошения всех зде молящихся скоро исполните, да радостно всегда поем вам сице:
Радуйтеся, небесным светом сердца наша просвещающие;
Радуйтеся, мир, тишину и благоденствие нам являющие.
Радуйтеся, болящим духовно и телесно здравие подавающие;
Радуйтеся, злыя демоны от людей отгоняющие;
Радуйтеся, беснующимся здравие подавающие.
Радуйтеся, от всяких напастей чудесно свобождающие;
Радуйтеся, велехвальные херувимы, светом разума спасительнаго ны озаряющие!

Кондак 5
Боготечнии пресветлии звезды явилися есте, святии херувимы, небосвод вселенныя украшая и всех светом истины Господней озаряя, образ жития богоугоднаго верным раскрывая, вы бо к мысленному солнцу правды Христу приводите ны, зовущих ныне купно с вами Ему: Аллилуиа.

Икос 5
Видевше христиане благочестивые взором духовным вас, велеславные херувимы, не токмо учителей духовных и к жизни вечней путеводителей, но и целителей от всяких телесных и душевных недугов, хвалу Господу воздаваша. Мы же за многая и неисчетная милости ваша, на ны изливаемая, ублажаем вас, преблагих предстателей, похвалами сими:
Радуйтеся, рыданий и воздыханий наших никогда же отметающие;
Радуйтеся, пламене страстей наших утоляющие;
Радуйтеся, от огня греховнаго соблюдающие;
Радуйтеся, недуги телесные благодатно исцеляющие;
Радуйтеся, отрадою небесною сердца наши исполняющие;
Радуйтеся, даром мудрости земныя и небесныя ны окрыляющие;
Радуйтеся, велехвальные херувимы, светом разума спасительнаго ны озаряющие!

Кондак 6
Проповедует мир христианский милости ваша, святые херувимы, яко по предстательству вашему и мы, суетою многообразною исполненные, научаемся отлагати попечения житейские и сподобляемся верно и благообразно служити носимому ангелы Царю Небесному, Его же милосердие и к нам преклоните, да с вами купно зовем Ему: Аллилуйя.

Икос 6
Возсия свет спасения всем верующим в Господа нашего Иисуса Христа, Той бо распятие и смерть претерпе за человеки, воскресе и победи смерти жало. Сего ради небеса испонишася радости великою. Сие же вспоминая ныне просим вы, херуими многомудрые, в любви и верности утвердите слабые души наша, да и в земном житии возможем мы прославити Спасителя нашего и, вами укреплямы и наставляеми, принесем Ему плод сторичный добродетелей, с надеждою вопия вам сице:
Радуйтеся, моления наша Иисусу Христу присно возносящие;
Радуйтеся, усердно молящихся вам светом благодати озаряющие;
Радуйтеся, сияние райския жизни нам сокровенно источающие;
Радуйтеся, все скорби наша и горькия беды услаждающие;
Радуйтеся, грешников к покаянию приводящие;
Радуйтеся, в любве и уповании возрастати ны научающие;
Радуйтеся, велехвальные херувимы, светом разума спасительнаго ны озаряющие!

Кондак 7
Хотящее верными выну Господеви пребыти змия древляго и человекоубийцы искони волю вселукавую творити не восхотели есте, но избрали есте волю Божию, всеблагую и всесовершенную, ко спасению всех приводящую. Ея же творити и ны научите, да купно с вами воспоим Триипостасному Творцу Нашему: Аллилуиа.

Икос 7
Новую и велию показа милость Человеколюбец Господь, егда благоволи явити сонм святых херуимов яко ходатаев спасения вечнаго. Вы бо, ныне, Небесному Престолу всех Владыки предстояще, неоскудно вспоможение источаете всем с верою прибегающим к вам и зовущим тако:
Радуйтеся, иждившим от недуга ум исцеление подающие;
Радуйтеся, свещи неугасимыя, свет веры воспламеняющие;
Радуйтеся, добродетели путь освещающие;
Радуйтеся, душевредныя учения низлагающие;
Радуйтеся, душеполезныя знания дарующие;
Радуйтеся, омраченные умы просвещающие и к Богу возвышающие;
Радуйтеся, велехвальные херувимы, светом разума спасительнаго ны озаряющие!

Кондак 8
Странники и пришельцы мы есмы на земли, по глаголу Апостолову: беды от врагов, скорби от близких, печали от лжебратии и сродник терпяще, в лишениях многих; не имамы бо зде пребывающаго града. Сице молим вас, заступники наши, в небесный град Иерусалим укажите нам путь, да сподобимся с вами купно во веки воспевати Творцу нашему: Аллилуиа.

Икос 8
Всем верным утешительно есть славити вы, богоноснии херувимы, и молитвы к вам возносити, ибо веруем мы несомненно, яко вы со Христом во царствии небеснем пребываете; отонудуже и нас, треволнением моря житейскаго обуреваемых, молитвами вашими благодатно умирите, да вами наставляеми, леность душевредную от себе отрясем, на подвиги же духовныя вдохновимся, имуще вас к подвижничеству духовному учителей и руководителей. Сего ради благодарственно вам зовем:
Радуйтеся, благия мысли и чувства в недоумении нам сущим внушающии.
Радуйтеся, святыя желания и намерения ко спасению нашему в сердца нам влагающии.
Радуйтеся, добрыми плодами веры, надежды и любви души наша исполняющии.
Радуйтеся, света вашего зарями мрак неведения нашего разгоняющие;
Радуйтеся, души обремененныя заботами житейскими к попечению духовному направляющая.
Радуйтеся, суетная прелести мира сего презирати нас научающие;
Радуйтеся, велехвальные херувимы, светом разума спасительнаго ны озаряющие!

Кондак 9
Вси небеснии силы ублажают собор ваш, многоочитии херувимы, вы же непрестанным гласом величаете Премудраго Творца, дивнаго во святых ангелах Своих, Бога нашего, согласно воспевая Ему купно со всеми праведными: Аллилуиа.

Икос 9
Ветий человеческих уста не возмогут по достоянию воспети хвалу вам, многочитые предобрые херувимы, яко вы благовестников Евангелия Христова присно укрепляете, яко священником и иноком споспешествуете, яко миряном в благочестии и молитве возрастати помогаете, яко в истинном богопознании ум наш утверждаете. Сего ради вопием вам сице:
Радуйтеся, безвестная и тайная премудрости Божия нам открывающии;
Радуйтеся, похвалы наша, аще и недостойнии вас, благосердно приемлющии;
Радуйтеся, воздыхания и скорби наша неотвергающие;
Радуйтеся, недостойныя наша молитвы приемлющие;
Радуйтеся, от междоусобия и распри нас охраняющие;
Радуйтеся, вражду и ненависть миром и любовию утоляющие;
Радуйтеся, скорбь и смущение сердец наших умаляющие;
Радуйтеся, велехвальные херувимы, светом разума спасительнаго ны озаряющие!

Кондак 10
Спасения нашего усерднии ходатаи есте, многоочитии херуимы, сего ради молим: испросите нам у Господа Сил утверждение в вере и благочестии, да, не падше и обленившеся, но бодрствующе и трезвящеся, все время живота нашего потщимся в смирении, целомудрии и братолюбии пребывати и за вся Бога благодарити, взывающе Ему: Аллилуиа.

Икос 10
Стена есте нерушимая и заступление предивное всем прибегающим с верою к вам, богоблаженные херувимы, сице просим вас: заступите, покрыйте и соблюдите ны от искушений, озлоблений и бед, от вражиих козней, скорбей и напастей, Сего ради смятенный наш дух возносим в смиренной мольбе, взывающе:
Радуйтеся, у Престола Божия о нас грешных ходатайствующие;
Радуйтеся, конец жизни непостыден верным дающие;
Радуйтеся, безболезненную и мирную кончину устрояющие;
Радуйтеся, наша сердца от запаления гневом и яростию сохраняющие;
Радуйтеся, от тяжбы и насилия злых людей нас соблюдающие;
Радуйтеся, мир и благоденствие нам ниспосылающие;
Радуйтеся, велехвальные херувимы, светом разума спасительнаго ны озаряющие!

Кондак 11
Пение сие акафистное с надеждою и любовию возносим вам, многоочитые херувимы, и, созерцая духовное величие ваше и славу, имиже надели вы Отец наш Небесный, просим вас: призрите благоутробно на слабость словес наших хвалебных и несовершенство разумения нашего и испросите нам у Вседержителя вся благопотребное, иже мы не можемы у Него испросити, да с вами купно с благодарением на устех и в сердце воспоим Господеви: Аллилуйя.

Икос 11
Светильницы светоприемнии от истиннаго Света озаряемии явистеся, святии херувимы; мы же, земнородные, обремененнии грехами, болезньми и скорбьми многими, обретоша вас заступников небесных, яко подаете бо во вся дни бытия нашего врачевание страстем неисцельным, радостию озарите сердца верных, чтущих вас и воспевающих с любовию таковая:
Радуйтеся, яко научаете ны присно имети разум на доброе.
Радуйтеся, на пути греха нам запинающие.
Радуйтеся, правошествовати ны наставляющие.
Радуйтеся, от лукавства злых человек ограждающие.
Радуйтеся, в злострадании ны благодатно укрепляющие.
Радуйтеся, благодарити Бога за вся научающие.
Радуйтеся, велехвальные херувимы, светом разума спасительнаго ны озаряющие!

Кондак 12
Благодать Господня паче разумения и мечтания дерзновеннаго исцеляет ны и преображает человеческие естество наше, сего ради мы молим вас, прехвальные служители Божие, испросите у Отца Нашего Небеснаго, да уврачует раны наши душевныя, да не внидут в сердца ни гнев, ни тоска, ни иные недузи, да вашего представительства ради, исполнимся все мы радости и веселия о Бозе, обновляющем и укрепляющем, воспевая Творцу мира: Аллилуйя.

Икос 12
Поюще вам, святые херувимы, песни хвалы и благодарения о всех благодеяниях вами нам явленных, просим помощи нам в смутное сие время, оградите ны от врагов видимых и невидимых, да зовем вам усердне:
Радуйтеся, свет тихий и радостный изливающие;
Радуйтеся, заблуждающих на путь истины наставляющие;
Радуйтеся, суетныя басни презирати помогающие;
Радуйтеся, от мира к премирным ум возводящие;
Радуйтеся, в посте и молитве прибывающым присно спребывающие;
Радуйтеся, во благих намерениих приснии споспешники;
Радуйтеся, велехвальные херувимы, светом разума спасительнаго ны озаряющие!

Кондак 13
О преславные и богоносные херувимы! Приимите малое сие моление наше, усердно вам приносимое и испросите у Спасителя нашего Господа Иисуса Христа добродетельное и богоугодное житие, терпение, мир душам нашим, здравие телесное и духовное преуспеяние. Да тако спасаемии в вечней жизни с вами купно воспоим Создателю нашему: Аллилуиа, аллилуиа, аллилуиа.

Автор - Евгений Храповицкий