Кондак 1
Всемилостивейший Владыко и Жизни Подателю, страстьми Своими нас от грехов избавивый и живот вечный воскресением Твоим даровавый, милости Твоя ниспосли всем в радости поющим:
Господи Иисусе, Хлебе Животный, сподоби нас присно сладости Твоея причастники быти.

Икос 1
Ангельская пения приемляй, приими моления наша и ко спасению вся потребная подаждь нам, да во умилении непрестанно зовем Ти:
Господи Превечный, небесных сил ликование;
Господи Всепремудре, всея твари веселие;
Господи Всесильне, небеса и землю Словом единым сотворивый;
Господи Всемогущий, всю тварь от небытия к бытию приведый;
Господи Иисусе, Хлебе Животный, сподоби нас присно сладости Твоея причастники быти.

Кондак 2
Брение, Творче, живосоздав, призвал еси человека к нетленной жизни и уста человеческая исполнил еси Духа благодатию, да со ангелы поем непрестанно: Аллилуиа.

Икос 2
Великаго Совета Ангел, Премудросте Божия превечная, образе Ипостаси Отчия непреложный, Адама праотца зря грехом во тление падшаго, на земли явился еси, да сего воздвигнеши от ада во еже воспевати Тя:
Господи, Животе нетления,
Господи, Источниче нашего освящения,
Господи, Небесныя славы не отлучивыйся,
Господи, человеческому естеству приобщивыйся,
Господи Иисусе, Хлебе Животный, сподоби нас присно сладости Твоея причастники быти.

Кондак 3
Горе возводяще умы и сердца, в радости воспеваем Подателя всякия благостыни и сокрушенным духом вопием песнь великую, в вышних песнословимую: Аллилуиа.

Икос 3
Древле разстоящаяся естества соединил еси, Господи, во единей Ипостаси Бога Слова и человеческое существо всецело восприим, обожение нам даровал еси, воспевающим Ти сице:
Господи, Славы присносущныя сияние,
Господи, Ипостаси Отчия нетленное начертание ,
Господи, Адама первороднаго от истления воззвавый,
Господи, Еву праматерь древния клятвы свободивый,
Господи Иисусе, Хлебе Животный, сподоби нас присно сладости Твоея причастники быти.

Кондак 4
Естество человеческое к небеси возвел еси, во Своей ипостаси Божеству непреложно и неразлучно сочетав во единство двусоставное, и яко новый Адам явился еси начальник спасаемым избранным людем, непрестанно во умилении вопиющим Ти: Аллилуиа.

Икос 4
Жертва живая, Агнче Божий, вземляй грехи мира, Пасха новая и таинственная, от всякия скверны очисти души наша, яко да причастники милости Твоея явитися возможем и во умилении воззовем:
Господи, страстию бесстрастною ад пленивый,
Господи, смертию своею смерть умертвивый,
Господи, от века умершия возбудивый,
Господи, Своею Кровию всю тварь освятивый,
Господи Иисусе, Хлебе Животный, сподоби нас присно сладости Твоея причастники быти.

Кондак 5
Заклание приемлеши за человека, Господи Всесильне, и от греха вся избавляеши Кровию Твоею, сего ради вси вкушаем Хлеб Небесный и Чашу Жизни со благодарением пием, возглашающе боголепно: Аллилуиа.

Икос 5
Красен во одежди Своей, востаеши Господи и глаголеши во крепости: Истоптах точило страстей богомужных един Аз, сего ради приидите, людие Мои, пийте Чашу нетления, юже растворих вам милостию Моею, и причастники явитеся жизни вечныя, глаголюще:
Господи, за грехи наша уязвленный,
Господи, за беззакония наша умученный,
Господи, от прелести древния нас свободивый,
Господи, язвою Своею пречистою ны исцеливый,
Господи Иисусе, Хлебе Животный, сподоби нас присно сладости Твоея причастники быти.

Кондак 6
Любве ради ко Адаму первозданному Вторый Адам, иже в Вышних живый, даже до ада преисподняго сниде, да возведет от истления всех, в радости вопиющих: Аллилуиа.

Икос 6
Милосердие Твое, Господи, недомыслимо и человеколюбие неизглаголанно языками человеческими и ангельскими, како Бог Сый человек бываеши и человека, грехами умерщвленнаго, смертию Своею животвориши и питаеши присно Пречистыма Телом и Кровию Своима, яже благоговейно приемше, со страхом глаголем:
Господи, Вечери Твоея тайныя причастники нас приими,
Господи, страннолюбия Твоего насладитися сподоби,
Господи, страстию Твоею страсти наша уврачуй,
Господи, милости Твоя людем Твоим даруй,
Господи Иисусе, Хлебе Животный, сподоби нас присно сладости Твоея причастники быти.

Кондак 7
Неизреченное и Пребожественное Таинство даровал нам еси,
Господи, в немже Кровию и Плотию обожаеши нас, Огнь Сый Пренебесный, и незримо пребываеши в нас, со трепетом и радостию вопиющих: Аллилуиа.

Икос 7
Отчее Слово Единородное, Господи Иисусе Христе Боже наш, зрак рабий приемый, да нас сообразны сотвориши образу славы Отчия, избави всякаго зла, вражды и скверны люди Твоя, ихже Честною Твоею Кровию искупил еси, во еже звати Ти:
Господи, во плоти Своей грех осудивый,
Господи, осуждения праотча нас свободивый,
Господи, яко язык свят и царское священие нас стяжавый,
Господи, Водою, Кровию и Духом нас освятивый,
Господи Иисусе, Хлебе Животный, сподоби нас присно сладости Твоя причастники быти.

Кондак 8
Приимите, ядите, Сие есть Тело, мое, глаголал еси,
Господи, учеником Своим на вечери, пийте Чашу Завета вечнаго, Кровию страстей растворенную и до скончания века сие в Мое воспоминание творите. Темже,
Господи, поминающе спасительную сию заповедь и вся, яже о нас бывшая, Твоя от Твоих со благодарением Ти приносим и со страхом поем вси: Аллилуиа.

Икос 8
Ребра Твоя живоносная чашу пакибытия и нетления источник обретши, Церковь веселится и радуется о Бозе Спасе Своем, со благодарением возглашающе:
Господи, Агнче непорочный, нас ради закалаемый,
Господи, Архиерею великий, Самаго Себе приносяй,
Господи, Боже всеистеннейший, Жертву живожертвенную со Отцем и Духом приемляй,
Господи, нас всех, от единаго Хлеба и Чаши причащающихся, во едино Тело церковное с Собою совокупляяй,
Господи Иисусе, Хлебе Животный, сподоби нас присно сладости Твоя причастники быти.

Кондак 9
Страннолюбия Владычня и безсмертныя трапезы Твоея,
Господи Боже наш, на горнем месте наслаждаемся присно, и, ум горе возносяще, небесныя Дары со благоговением от руки Твоея приемлем, во умилении вопиюще: Аллилуиа.

Икос 9
Таинство страшное зрим и преславное – от земли плоды вземлемыя в Небесный хлеб прелагаются и уста земнородных преестественный огнь приемлют и от персти вземлемое естество наше горе возводится, темже со упованием и страхом песнь вопием:
Господи, Пище неснедаемая алчущих правды,
Господи, Питие безсмертия жаждущих жизни,
Господи, страстьми Своими нас от страстей избавивый,
Господи, небесными Тайнами нам обожение даровавый,
Господи Иисусе, Хлебе Животный, сподоби нас присно сладости Твоя причастники быти.

Кондак 10
Угль небесный прием во уста Исаия очищение прият, мы же всецело Тя, Господи, огня преестественнаго, Бога купно и Человека, внутрь приемлем, освящение просяще душам и телесем нашим и серафимски вопиюще: Аллилуиа.

Икос 10
Фома иногда дерзновенно простре десницу, во еже ребра Твоя, Спасе, осязати, и со страхом и верою Бога Тя и Господа исповеда. Мы же, Плоть и Кровь твою приемлюще, с верою и любовию приступаем и во умилении глаголем:
Господи, ребром Твоим пречистым пр

Икоснутися не возбранивый,
Господи, осязанием близнечим веру апостольскую утвердивый,
Господи, от ребр Твоих спасение всему миру источивый,
Господи, питие безсмертия Крестом нам растворивый,
Господи Иисусе, Хлебе Животный, сподоби нас присно сладости Твоя причастники быти.

Кондак 11
Херувимом многоочитым и серафимом огнезрачным служити и приближатися Ти велико и страшно есть, мы же земнороднии, неизреченного и безмернаго Твоего человеколюбия ради приближаемся Святому жертвеннику Твоему и, предложше вместообразная Святаго Тела и Крове Твоея, жертву хваления и благодарения Ти возсылаем: Аллилуиа.

Икос 11
Царю и Господи, освящаяй и просвещаяй всякаго человека, грядущего в мир, образом Твоим всечудным освети сердца наша и Пречистыми Твоими Тайнами от всякия скверны очисти, да воззвати Ти со дерзновением возможем:
Господи, Тело Свое апостолом на вечери предавый,
Господи, Кровию Твоею Завет Новый любви и милости учеником явивый,
Господи, в воспоминание Твое сие творити нам повелевый,
Господи, яко залог небесный Таинство Тела и Крови Твоея Церкви оставивый,
Господи Иисусе, Хлебе Животный, сподоби нас присно сладости Твоя причастники быти.

Кондак 12
Человеколюбие Твое воспеваем, милости Твоя прославляем и славу твою исповедуем,
Господи Боже наш, яко на земли явился еси, наше естество восприим, и в Ипостаси Своей освятил еси, нам же яко залог вечнаго спасения Тело и Кровь даровал еси, два сих причащающеся, песнь со ангелы воспоим: Аллилуиа.

Икос 12
Щедротами Твоими всю тварь посещаяй, Господи Иисусе Христе Спасе наш, вонми ныне от престола славы Твоея и прииди во еже освятити нас и преподати нам державною Твоею рукою Пречестное Тело Твое и Честную Кровь Твою, яко да воспоим милости Твоя, глаголюще:
Господи, горе на Престоле со Отцем и Духом седяй,
Господи, в Церкви Твоей неотлучно пребываяй,
Господи, державною десницею Дары небесныя нам подаваяй,
Господи, Телом и Кровию Твоею всю тварь освящаяй
Господи Иисусе, Хлебе Животный, сподоби нас присно сладости Твоя причастники быти.

Кондак 13
О, Пасха Новая и Жертва живожертвенная, Христе Иисусе, о Мудросте и Слове Божий и Сило, благодарение наше немощное приими и сподоби нас милостию Твоею истее и совершенне Тебе причащатися, Спаса и Владыки, в невечернем дни Царствия Твоего и со ангелы и всеми святыми воспевати: Аллилуиа.

Составил Протоиерей Андрей Николаиди