Кондак 1
Избранному пастырю овец Христовых, ревностному прогонителю мысленных волков, богомудрому старцу Оптинскому, похвальная принесем пения. Ты же, отче, избави стадо твое от грехопадений лютых, и на пажити благодати воспитай тебе зовущия:
Радуйся, Иларионе, пастырей изрядное украшение.
Икос 1
Ликования пасхальнаго исполнил еси матерь твою, отче Иларионе, егда родился еси от нея в нощь светозарнаго Воскресения. Темже знамением сим Господь откры яко душа твоя не имать вкусити смерти во веки. Мы же в сени смертней живущии сице тебе вопием:
Радуйся, плоде пасхальныя радости.
Радуйся, чадо светозарнаго дне.
Радуйся, родителем твоим блаженства ходатаю.
Радуйся, присным твоим верный предстателю.
Радуйся, прежде смерти мертвым вменился еси.
Радуйся, прежде воскресения со святыми вселился еси.
Радуйся, нечувствие яко камень гробный от сердца твоего отваливый.
Радуйся, светлоангельским гласом совести душу твою просветивый.
Радуйся, страстей умерщвление.
Радуйся, добродетелей возрождение.
Радуйся, Иларионе, пастырей изрядное украшение.
Кондак 2
Апостольски поревновал еси о вере православной, отче преподобне, егда в саратовский край вселился еси, идеже раскольников множество бяху, ты же тьму лжеучения их православными догматы просветил еси, Богу в Троице славимому непрестанно взываяй: Аллилуия.
Икос 2
Ревностию Ильиною разжеглся еси, отче Иларионе, и чистоту правыя веры уяснил еси, студных же лжеучителей предал еси праведному суду. Мы же чудящеся о таковей любви твоей к чистоте учения Церкве Христовы сице тебе вопием:
Радуйся, пламеню ревности Божественныя.
Радуйся, источниче отеческаго учения.
Радуйся, столпе непоколебимый еретическими ветрами.
Радуйся, ловитво искусная на раскольническое собрание.
Радуйся, лжеименное знание разсекаяй яко паучину.
Радуйся, православное учение источаяй яко пучину.
Радуйся, мечу обоюдоострый Божия Слова.
Радуйся, стрело огненосная Церковнаго глагола.
Радуйся, правомыслящих утверждение.
Радуйся, лжемудрствующих посрамление.
Радуйся, Иларионе, пастырей изрядное украшение.
Кондак 3
Иноческому житию восхотел еси подражати, отче Иларионе, темже в Оптину пустынь к богомудрым старцам притекл еси, иже видяще тя благочестием светло украшенна, Богу благодарне воспеша: Аллилуия.
Икос 3
Оставль все земное попечение, Ангельскаго звания сподобился еси прияти от ангелоподобных старцев святых, от нихже и ангельскому деланию научился еси, како Богу подобает работати. Мы же вящему твоему преуспеянию чудящеся сице тебе вопием:
Радуйся, житию Ангельскому подражателю.
Радуйся, вышния светлости взыскателю.
Радуйся, страстей земных отсечение.
Радуйся, заповедей святых хранение.
Радуйся, быстрокрылый послушниче Льва и Макария.
Радуйся, скорбям Амвросиевым благосострадание.
Радуйся, ликостоянию Ангельскому причастниче.
Радуйся, иноческих борений подвижниче.
Радуйся, ангеломонашеский воине.
Радуйся, небомудренный человече.
Радуйся, Иларионе, пастырей изрядное украшение.
Кондак 4
Наставники себе избрал еси богомудрых старцев оптинских, иже молитвами своима и богоподражательным житием вдохнувша в тя дарования многия. Ты же яко богоприятный сосуд явился еси отче Иларионе, благодарными гласы поя Христу: Аллилуия.
Икос 4
Старчества чреду приял еси, отче Иларионе, от богоумудренных старцев оптинских Льва и Макария, имже со Амвросием верно послужил еси и дара благодати сыноположения сподобился еси, сего ради вопием ти:
Радуйся, сосуде благодати неизреченныя.
Радуйся, сынолепная чреда старческаго служения.
Радуйся от силы восходяй в силу.
Радуйся, многими дарами душу украсивый.
Радуйся, сотрудниче Амвросию на ниве духовней.
Радуйся, Льва и Макария отрасль благоплодная.
Радуйся, незабвенное памятование отеческих наставлений.
Радуйся, светоносная свеще старческих изречений.
Радуйся, яко колесница восшел еси от земли на небо.
Радуйся, яко милоть Ильину приял еси старческое служение.
Радуйся, Иларионе, пастырей изрядное украшение.
Кондак 5
Тьму разсеял еси греховную отче Иларионе, совести светильник вжег внутрь души твоея, юже уяснила есть благодать Всесвятаго Духа. Сего ради откровенным лицем на славу Божию взираяй, Богу просветившему тя благодарне воспел еси: Аллилуия.
Икос 5
Адаманта твердейши вера твоя явися отче Иларионе, еюже мудрования раскольническия яко идолы сокрушил еси, и честнейши злата бысть душевная твоя доброта, яко многи таланты от Бога приял еси. Сего ради яко евангельскаго купца тя похваляем сице:
Радуйся, возделывателю Христова винограда.
Радуйся, надежде преисполненная отрады.
Радуйся, тружениче понесый зной и дневный вар.
Радуйся, усугубивый от Бога данный ти дар.
Радуйся, точило евангельскаго слова.
Радуйся, вино утешения Христова.
Радуйся, премудрый купче стяжавый духовный бисер.
Радуйся, добрый торжниче умноживый сребро господина.
Радуйся, егоже ради обнища сокровища ада.
Радуйся, егоже ради исполнися житница слова.
Радуйся, Иларионе, пастырей изрядное украшение.
Кондак 6
Рачитель был еси преданий отеческих и монашеских уставов верный последователь явился еси, сего ради якоже точное мерило весов житие твое показал еси отче Иларионе, неуклоняяся ни на десно ни на шуя от преданий отеческих, Богу отцев твоих благодарно поя: Аллилуия.
Икос 6
Евангельское отче любомудрие стяжал еси и око ума твоего соблюл еси чисто по слову Христову, сего ради от греховныя тьмы избавил еси ослепленных душевныма очима, иже воспеша тебе похвалы сицевыя:
Радуйся, невидимых вещей видение.
Радуйся, забытых грехов обнаружение.
Радуйся, светильниче душевную тьму просвещаяй.
Радуйся, от прелести вражия нас избавляяй.
Радуйся, непорочныя совести гласе.
Радуйся, осенение мудрости в Божием страсе.
Радуйся, чистое зрение глубины душевныя.
Радуйся, познание ясное ея устроения.
Радуйся, имже свободу от грехов улучаем.
Радуйся, имже души Христу обручаем.
Радуйся, Иларионе, пастырей изрядное украшение.
Кондак 7
Целомудрие душа твоя стяжа отче Иларионе яко одежду ангельскую, и многими добродетельми душу твою окрылил еси. Сего ради ангелоподобную жизнь показал еси учеником твоим преподобне, ангельски Христа славословя: Аллилуия.
Икос 7
Постом очищся преподобне, и веры щитом вооружил еси себе, молитву непрестанную яко меч обоюдоострый восприим, враги невидимыя силою Божиею победил еси. Сего ради победныя венцы приносим и сице тебе поем:
Радуйся, правды поборниче.
Радуйся, лжи искоренителю.
Радуйся, крепость пороков разрушаяй.
Радуйся, дом добродетели созидаяй.
Радуйся, монашеских чинов славо добропобедная.
Радуйся, инокующим в бранех скорое вспоможение.
Радуйся, ратниче Христов диавола побеждаяй.
Радуйся, Ангелов в помощь нам призываяй.
Радуйся, яко тобою венец победы улучаем.
Радуйся, яко тобою отдохновение от браней приемлем.
Радуйся, Иларионе, пастырей изрядное украшение.
Кондак 8
Очистив сердце от страстей, евангельский нрав стяжал еси, отче Иларионе. Сего ради благодати сосуд избранный явился еси Всесвятаго Духа, Егоже действом светло украсил молитву твою, неизглаголанно взываяй ко Христу: Аллилуия.
Икос 8
Елеем доброделания отче богомудре светильник неугашен соблюл еси души твоея, во тьме греховней выну святяй и паству твою к Свету невечернему привлекаяй сказанием светлых твоих поучений, в нихже наставленнии возопиша тебе сице:
Радуйся, богогласная пастушеская свиреле.
Радуйся, богомудрое в добродетелех наставление.
Радуйся, прогнание мысленных татей.
Радуйся, ограждение от соблазнов братии.
Радуйся, цевнице движимая духоносными реченьми.
Радуйся, псалтире гласяй божественныя откровения.
Радуйся, лиро отеческих преданий.
Радуйся, кимвале раскольники устрашаяй.
Радуйся, языче медоречивый.
Радуйся, уста сладкоглаголивыя.
Радуйся, Иларионе, пастырей изрядное украшение.
Кондак 9
Труд подъял еси непрестанного о Господе трезвения и чистоты ума твоего от помышлений суетных охранение. Сего ради молитвою умною взыскал еси Господа Иисуса в клети сердечней, непрестанно взывая к Нему: Аллилуия.
Икос 9
Сладким именем Иисусовым распалил еси душевную твою доброту, яже пламенем любве Божественныя возгореся в твоем сердце. Сего ради любвеобильне приимал еси приходящих к тебе отче Иларионе, темже утешеннии и наставленнии в вере возопиша к тебе глаголюще:
Радуйся, пламеню веры апостольския.
Радуйся, теплото любве Иисусовыя.
Радуйся, оледеневшая сердца воспламеняяй.
Радуйся, пламень страстей остужаяй.
Радуйся, чистых созерцаний молние.
Радуйся, сердца сокрушаяй громе.
Радуйся, яко твердь сердечную просветил еси трезвением.
Радуйся, яко тучи помыслов прогоняеши молитвою.
Радуйся, егоже ради имя Иисусово призываем.
Радуйся, егоже ради Ангельскому деланию подражаем.
Радуйся, Иларионе, пастырей изрядное украшение.
Кондак 10
Яко от источника приснотекущаго, дарования твоя источаются отче предивне: овех убо от лампады помазанием исцелял еси, овех на источник посылал еси очиститися, овем грехи забытыя яко корень болезни открывал еси прозорливыма твоима очима. Темже вси от целебных твоих струй насладившиися благодарно поют Христу: Аллилуия.
Икос 10
Веры чистоту соблюл еси отче Иларионе и глубину догматов ясно познал еси, сего ради яко студенец чистыя воды явися житие твое жажду верных утоляющее. Мы же в пустыне страстей зноем соблазнов палимии, притекающе к тебе вопием:
Радуйся, кладезю отеческаго предания.
Радуйся, целебных струй излияние.
Радуйся, водоносец исполнь божественнаго утешения.
Радуйся, алавастр мирра непритворнаго смирения.
Радуйся, яко пучиною слез грехи наша потопляеши.
Радуйся, яко радостотворным плачем души наша оживляеши.
Радуйся, источниче приснотекущего веселия.
Радуйся, совести нашей с Богом примирение.
Радуйся, корень злобы изсушаяй.
Радуйся, свет веры источаяй.
Радуйся, Иларионе, пастырей изрядное украшение.
Кондак 11
Елеем милости твоея помажи нас отче Иларионе воспевающих твоя славныя и добропобедныя подвиги, имиже украсися обитель твоя, и подаждь нам победы над страстьми и грехми благодатию Божиею, яко да возвеличим Христа просветившего тя, вопиюще Ему: Аллилуия.
Икос 11
Разлучение души от тела приял еси добльственне отче Иларионе, подъемшу тебе подвиг болезни и поста, тридесят и три дни ничтоже вкушал еси токмо нетленную пищу — Тело Христово Имже освятился еси и в руце Божии дух твой предал, нам же оставил еси тело твое яко источник священия, к немуже притекающе сице тебе вопием:
Радуйся, кивоте содержаяй святыню.
Радуйся, сокровище духовныя благостыни.
Радуйся, обителище Духа Всеосвящающаго.
Радуйся, дароносице Святыя Тайны содержащая.
Радуйся, врачевателю смертных болезней.
Радуйся, искоренителю страха смерти.
Радуйся, яко в нетления красоту облеклся еси.
Радуйся, яко чудесами раку твою украсил еси.
Радуйся, имже от смертных грехов свобождаемся.
Радуйся, имже к вечной жизни привлекаемся.
Радуйся, Иларионе, пастырей изрядное украшение.
Кондак 12
На небеси обрел еси себе воздаяние отче Иларионе, от Христа Бога венец безсмертия приимь, зриши тамо красоты райския и лицезрения Самаго Господа Иисуса наслаждаешися. Темже помяни ны на земли тебе пения приносящия, да избавльшеся от всех зол твоим предстательством благодарно Христу возовем: Аллилуия.
Икос 12
Оптинскаго старчества явился еси поборниче отче Иларионе, на земли путь отцев соблюл еси и предание сохранил еси яко зеницу ока, отонудуже и светиши нам сущим в греховней нощи. Мы же яко путеводную звезду тя стяжахом, благодарно тебе вопием:
Радуйся, имже тьма раскола прогнася.
Радуйся, имже свет православия сияет.
Радуйся, догматов веры солнцезрачное блистание.
Радуйся, добродетелей духа небо многозвездное.
Радуйся, вес и мерило точнейшего разсуждения.
Радуйся, кристалловидная чистото сердечнаго трезвения.
Радуйся, союзе совести и Духа Всесвятаго.
Радуйся, непримиримая враждо на еретическое собрание.
Радуйся, яко тобою забытая грехи наша напоминаются.
Радуйся, яко тобою тайная сердца нашего очищается.
Радуйся, Иларионе, пастырей изрядное украшение.
Кондак 13
О, богомудре отче наш Иларионе, совести светлейший светильниче, помраченная наша сердца просвети светом богопознания, да узревше в нас живущий грех, яко покрывало тьмы, возопиим сущему в нас пребывающему Христу: Светодавче Боже, просвети тебе поющия: Аллилуия.
Сей Кондак глаголи трижды и абие 1 Икос и 1 Кондак
Молитва ко преподобному отцу нашему Илариону
О, Богомудре отче наш Иларионе, веры православныя истинный поборниче и крепкий молитвенниче о душах наших пред престолом Святыя Троицы! Ты ревностию зельною о вере православней распалився еще от юности твоея, явился еси яко страж неусыпный Церкви нашей, от расколоучителей храня паству ея. Ты якоже Илия древле, ревнуя поревновал еси о Бозе твоем, и студных лжеучителей предал еси праведному суду. Ты многия души спасл еси от погибельнаго заблуждения, и прельщенныя к разумению истины привел еси. Темже за правоту сердца твоего даровася ти от Бога благодать обильная исцелений и врачеваний, яко и дуси нечистиии не можаху терпети тя, и от страждущих удаляхуся. Ты и ныне, отче, яко жив сый, призри на паству твою и посети ю, и лукавыя наветы духов разори твоим предстательством. И разумы наша просвети, еже не внимати нам духовом обольстительным, выну всевающим в нас вражду, и нестроение, и разногласия, имиже разоряется Церковный мир и единодушие братии. Ей, отче, подаждь нам здравие душевное и телесное, совесть чисту и жительство незазорное. Испроси у Господа мир и благоденствие стране нашей и людем ея, веры правыя утверждение, и еретичествующих низложение, да укрепит святую Церковь русскую и обители твоей духовное возрождение дарует, во еже пети и прославляти великолепое и достопокланяемое Имя единосущныя и нераздельныя Троицы, Отца, и Сына и Святаго Духа, во век и в век века. Аминь.
Ина молитва ко преподобному отцу нашему Илариону, в граде Саратове составленная
О, священная главо, преподобне и богоносне отче наш Иларионе, Оптинския обители украшение и саратовския земли похвало! Ты во дни земнаго жития своего никаго же приходящего к тебе отреяваяй, всем бо во благо бысть видение лица твоего и общение с тобою: страждущим явился еси помощник, скорбящим утешитель, ищущим Истины во всем учителю преизрядный. К сим же и дар во всяких недоуменных обстоятельствах вразумления, во всем благаго научения и телесных и душевных недугов врачевателя обильно в тебе явися. Ныне, на небесех Владыке всех предстоя и в почтенном Соборе всех оптинских старцев светло торжествуя, душа твоя светло веселится. Обаче, аще светлая душа твоя ныне на небесех престоит, рака же мощей твоих ныне с нами пребывает, яко источник благодати многотекущий. К сим же и молитвами твоими, святый отче, в славной обители Оптиной ныне пребываеши, в ней же преславно в житии своем подвизался еси. Сего ради молим тя: отче святый! Не остави нас, грешных, своим славным ходатайством у Христа Бога нашего. Буди каждому во всяком деле благом помощник преизрядный и во всяком добром начинании молитвами твоими споспешник. Сохрани нас от лукавых соблазнов суетного века сего, иже тщатся православную веру в стране нашей истребити и духом льстивых учений народ наш от Истины отвратити. Буди нам воистину пастырь добрый и учитель преизрядный, наставляя нас в Истине Православия непреткновенно ходити и верныя чада Православныя Церкве быти. Сохрани страну нашу и народ наш от всякого злаго обстояния, враги Церкве Христовой воздвизаемаго. Како и во дни земнаго жития твоего, буди всем вся: падающих воздвизаяй, малодушных утешаяй, немощных укрепляяй, неразумных и увлекшихся лживыми учениями века сего от лжи отвращаяй и на путь Истины наставляяй. Наипаче же в час кончины нашея споспешествуй нам на горьких мытарствах наших, да беспреткновенно прейдем от земли на небо и тамо со всеми святыми прославим Творца и Бога нашего Господа Иисуса Христа с Пречистою Его Материю и со всеми святыми во веки веков. Аминь.
Взято с http://www.optina.ru