Акафист святому (имя рек) егоже имя дается христианину (христианке) при крещении и в постризе его (ея) во иноки (инокини), емуже акафиста несть написано.

 

Кондак 1

Возбранный от Царя сил Господа Иисуса, данный мне воеводо и чудотворче предивный, святый (имя рек)! Прославляю днесь прославльшаго тя славы Господа, благодарственное пение воспеваю ти, да молитвами твоими всякия сети вражия избегну и души моея спасения достигну, да пою ти: Радуйся, святый ( имя рек), хранителю мой, молитву свою о мне к Богу пролей, радуйся, святый ( имя рек), хранителю мой, моли Бога о мне.

Икос 1

Архангели и Ангели с любовию зряху равноангельное житие твое, святый (имя рек), ты бо, пекийся, како угодити Господеви, сохранил душу свою неврежденну, постом, молитвою и страданиями умерщвляя плоть свою. Таковому житию твоему дивящеся, со умилением взываю ти сице:

Радуйся, святый (имя рек), хранителю мой, в земной юдоли не остави мя, радуйся, святый (имя рек), хранителю мой, в ней не забуди мя. Радуйся, святый (имя рек), хранителю мой, сердце мое от страстей свободи, радуйся святый (имя рек), хранителю мой, добродетелями его украси. Радуйся, святый (имя рек), хранителю мой, Бога узрети даждь ми, радуйся, святый (имя рек), хранителю мой, Христа вечно славити даруй ми. Радуйся, святый (имя рек), хранителю мой, молитвою своею душу мою исправляяй, радуйся, святый (имя рек), хранителю мой, молитвою сею душу мою в добродетели укрепляяй. Радуйся, святый (имя рек), хранителю мой, предстательством твоим к Богу путь мой устрояяй, радуйся, святый ( имя рек), хранителю мой, в Царство Божие стопы моя направляяй. Радуйся, святый (имя рек), хранителю мой, молитву свою о мне к Богу пролей, радуйся, святый (имя рек), хранителю мой, моли Бога о мне.

Кондак 2

Дивящееся обильной реце чудес, от мощей твоих и святаго имени твоего истекающую, благодарения и радости исполнився, хвалу воссылаю Богу, прославльшему тя, Емуже пою: Аллилуйя.

Икос 2

Разум чист от страстей испроси ми у Бога, святый (имя рек), да, вознесся от земных к Небесным, воспою Святую Троицу и помолюся ти сице:

Радуйся святый (имя рек), хранителю мой, к истиному Богу возведи мя, радуйся, святый (имя рек) хранителю мой, вышних сил Содетелю представи мя. Радуйся, святый (имя рек) хранителю мой, Троицу сугубо славимую сподоби познати ми, радуйся, святый (имя рек) хранителю мой, путь к престолу Владычню соделай ми. Радуйся, святый (имя рек), хранителю мой, истиной Неба вразуми мя, радуйся святый (имя рек), хранителю мой, истинным ведением Бога просвети мя. Радуйся, святый (имя рек), хранителю мой, трисветлое Богоначалие яви ми, радуйся святый (имя рек), хранителю мой, Вседержителя даруй узрети ми. Радуйся святый (имя рек), хранителю мой, пламень страстей моих угаси, радуйся, святый (имя рек) хранителю мой, к Престолу Владыки молитвы моя вознеси. Радуйся, святый (имя рек), хранителю мой, молитву свою о мне к Богу пролей, радуйся, святый ( имя рек), хранителю мой, моли Бога о мне.

Кондак 3

Силою благодати Божией своей приял еси власть, недуги исцеляти и бесы изгоняти, святый (имя рек), и по кончине прослави тя всемогущий Бог многими чудотворении, да вси, взирая на сие, усердно притекают для исцеления тобою от недугов телесных, паче же душевных, Богу же присно вопиют: Аллилуиа.

Икос 3

Имеяй всегда пред очима своима Господа, святе (имя рек), добре Ему потрудился еси, и вся яже творил еси, творил во славу Иисуса Христа, Ему угодил еси и Святей Троице ныне предстоиши, и молися о мне, с надеждою к тебе вопиющем:

Радуйся, святый (имя рек), хранителю мой, грешнаго вразуми мя, радуйся, святый (имя рек), хранителю мой, неразумнаго исправи мя. Радуйся святый (имя рек), хранителю мой от скверны очисти мя, радуйся, святый ( имя рек), хранителю мой, в добродетелях настави мя. Радуйся святый (имя рек), хранителю мой, от мытарств воздушных князей избави мя, радуйся, святый (имя рек), хранителю мой, супостатов бесовских в той час отжени от меня. Радуйся, святый (имя рек), хранителю мой, в той день молитвою твоею покрый мя, радуйся, святый (имя рек), хранителю мой, в миг той Святую Троицу умоли за мя. Радуйся, святый (имя рек), хранителю мой, бурю страстей моих укроти, радуйся, святый (имя рек), хранителю мой, пламень их угаси. Радуйся, святый (имя рек), хранителю мой, молитву свою о мне к Богу пролей, радуйся, святый (имя рек), хранителю мой, моли Бога о мне.

Кондак 4

Буря моря житейскаго сокрушает корабль мой духовный мирских попечений волнами, страх и трепет смерти объят мя, и где обрящу тихое пристанище спасения? Токмо на тя по Бозе возлагаю надежду, святый (имя рек), яко от Бога премудраго тя кормчаго жизни моей стяжав, благодарственно пою Богу моему: Аллилуиа.

Икос 4

Видяще тя, святый (имя рек), крепкагo моего блюстителя, злобнии дуси не смеют приближитися к моей душе, дабы погубити ю. Ныне смиренно молю тя, не отступи от мене за невоздержание мое, но присно от ловления и козней лукаваго соблюдай мя, со умилением глаголюща ти:

Радуйся, святый (имя рек), хранителю мой, очи мои отверзаяй, радуйся, святый (имя рек), хранителю мой, слепоту души моея исцеляяй. Радуйся, святый (имя рек), хранителю мой, душу мою укрепи, радуйся святый (имя рек), хранителю мой, в Бозе ю соверши. Радуйся, святый (имя рек), хранителю мой, из ада греховнаго мя исхити, радуйся святый (имя рек), хранителю мой, во обители райския мя возведи. Радуйся, святый ( имя рек), хранителю мой, сердце мое возвесели, радуйся святый (имя рек), хранителю мой, тело мое освяти. Радуйся, святый ( имя рек), хранителю мой, от муки вечныя мя огради, радуйся святый (имя рек), хранителю мой, пламень ада не даждь узрети ми. Радуйся, святый ( имя рек), хранителю мой, молитву свою о мне к Богу пролей, радуйся, святый ( имя рек), хранителю мой, моли Бога о мне.

Кондак 5

Боготечной звезде на тверди небесней подобен был еси святый (имя рек), лучами жития своего тьму неведения разгоняя и подвигом своим многих на путь истины наставляя; примером же благим назидая, научи нас благоприятно пети Богу: Аллилуйя.

Икос 5

Видевше ангельстии чинове еще во временной жизни великия твоя подвиги святый (имя рек), дивляхуся зело, прославляюще человеколюбца Бога, давшаго ти таковую силу на враги, азже тя, усердно любовию почитая, взываю ти сице:

Радуйся святый (имя рек) хранителю мой, жизнь по Бозе мою утверди, радуйся святый (имя рек) хранителю мой, Святым Духом меня украси. Радуйся святый (имя рек) хранителю мой, разум ветхий мой обнови, радуйся святый (имя рек) хранителю мой, выше перси земной его вознеси. Радуйся святый (имя рек) хранителю мой, плоды послушания вкусити даждь ми, радуйся святый (имя рек) хранителю мой, грехи моя упраздни. Радуйся святый (имя рек) хранителю мой, древо жизни в раи ми укажи, радуйся святый (имя рек) хранителю мой, сластьми рая мя напои. Радуйся святый (имя рек) хранителю мой, в сад Эдемский мя возведи, радуйся святый (имя рек) хранителю мой, в вечный огнь мене не введи. Радуйся, святый (имя рек), хранителю мой, молитву свою о мне к Богу пролей, радуйся, святый (имя рек), хранителю мой, моли Бога о мне.

Кондак 6

Исповедуем святость жития твоего, святый (имя рек), да вси молитвами твоими избавимся от многоразличных болезней, бед и скорбей, богатии и убозии, старцы и юныя да восхвалим богоугодное твое житие, Богу поюще: Аллилуиа.

Икос 6

Возсия миру всему православному благотворный свет великих добродетелей твоих, святый (имя рек), о нихже благодаря Отца Небеснаго, к тебе, яко к присному о мне молитвеннику, взываю сице:

Радуйся святый (имя рек) хранителю мой, от греха сохрани душу мою, радуйся святый (имя рек) хранителю мой, от стрел бесовских молитвами своими покрый ю. Радуйся святый (имя рек) хранителю мой, очисти мя от греха, радуйся святый (имя рек) хранителю мой, от бури страстей спаси мя. Радуйся святый (имя рек) хранителю мой, от греха огради мя, радуйся святый (имя рек) хранителю мой, в трудный час укрепи мя. Радуйся святый (имя рек) хранителю мой, к Престолу Вышнему мя возведи, радуйся святый (имя рек) хранителю мой, там меня помяни. Радуйся святый (имя рек) хранителю мой, на смертном одре не остави мя, радуйся святый (имя рек) хранителю мой своею молитвою укрепи мя. Радуйся, святый (имя рек), хранителю мой, молитву свою о мне к Богу пролей, радуйся, святый (имя рек), хранителю мой, моли Бога о мне.

Кондак 7

Ходатай пред Господем за всех ты еси, святый (имя рек). Сего ради прибегаею под кров твой, иский спасения, ибо помощника тебе имам во всех нуждах, бедах и искушениях; да почитая пресветлую память твою, благодарственно вопию Богу: Аллилуиа.

Икос 7

Новую показа милость рабом Своим Человеколюбец Господь, егда благоволи прославити тя, святый (имя рек), источаеши бо ныне множество чудес. Таковому промышлению Божию радуюся, благодарне вопию ти:

Радуйся святый (имя рек) хранителю мой, неможение души моея упраздни, радуйся святый (имя рек) хранителю мой, худородность мою помяни. Радуйся святый (имя рек) хранителю мой, крепость духа даждь ми, радуйся святый (имя рек) хранителю мой, темныя силы от мене отжени. Радуйся святый (имя рек) хранителю мой, сонм святых ми покажи, радуйся святый (имя рек) хранителю мой, в лицы их мя возведи. Радуйся святый (имя рек) хранителю мой, путь в чертоги небесныя ми укажи, радуйся святый (имя рек) хранителю мой, мрак бесовский от мене отжени. Радуйся святый (имя рек) хранителю мой, в напастях житейских защити мя, радуйся святый (имя рек) хранителю мой, на пути ко спасению укрепи мя. Радуйся, святый (имя рек), хранителю мой, молитву свою о мне к Богу пролей, радуйся, святый (имя рек), хранителю мой, моли Бога о мне.

Кондак 8

Странное чудо житие твое является притекающим ко всечестней твоей памяти святый (имя рек), малое моление тебе приносящим велия благодать им от Бога подается, юже приемлюще, Богу поем: Аллилуиа.

Икос 8

Всею душею послужив Господу и всем житием своим благоугодив Ему, прославился еси чудесами многими, святый (имя рек), Спаса душ наших ради и чудотворец явился еси: поминая убо богоугодное твое житие, вопию ти сице:

Радуйся святый (имя рек) хранителю мой, молитися Богу мя научи, радуйся святый (имя рек) хранителю мой, в сем благом деле мя укрепи. Радуйся святый (имя рек) хранителю мой, от страстей душу мою сохрани, радуйся святый (имя рек) хранителю мой, лепотою молитвы ея украси. Радуйся святый (имя рек) хранителю мой от сопротивных врагов защити мя, радуйся святый (имя рек) хранителю мой победою над ними увенчай мя. Радуйся святый (имя рек) хранителю мой, сокруши гордость мою, радуйся святый (имя рек) хранителю мой, целу во мне не остави ю. Радуйся святый (имя рек) хранителю мой, молитвою своею душу мою укрепи, радуйся святый (имя рек) хранителю мой, семя добра в ню зарони. Радуйся, святый ( имя рек), хранителю мой, молитву свою о мне к Богу пролей, радуйся, святый (имя рек), хранителю мой, моли Бога о мне.

Кондак 9

Всякия беды, скорби и напасти избавляяй мя, святе (имя рек), твоими к Богу теплыми молитвами, потщися в претрудном земном житии спасения души мне достигнути, да с тобою купно в селении праведных воспою Богу: Аллилуиа.

Икос 9

Витийство человеческое не возможет изрещи чудодейственную благодать Божию, излиянную на тебе, святе (имя рек); но любовию к тебе побеждаемый, о помощи дерзаю взывати к тебе тако:

Радуйся святый (имя рек) хранителю мой, в лоне Церкви Христовой соблюди мя, радуйся святый (имя рек) хранителю мой, в ограде ея упаси мя. Радуйся святый (имя рек) хранителю мой, в Новый Иерусалим водвори мя, радуйся святый (имя рек) хранителю мой, в Граде сем упокой мя. Радуйся святый (имя рек) хранителю мой, в день успения моего не остави мя, святый (имя рек) хранителю мой, молитвою своею в той час защити мя. Радуйся святый (имя рек) хранителю мой, на Страшнем Суде укрепи мя, радуйся святый (имя рек) хранителю мой, там Владыку всех умоли за мя. Радуйся святый (имя рек) хранителю мой, вечных мучений молитвою своею избави мя, радуйся святый (имя рек) хранителю мой, Святую Троицу умоли за мя. Радуйся святый (имя рек) хранителю мой, молитву свою о мне к Богу пролей, радуйся святый (имя рек) хранителю мой, моли Бога о мне.

Кондак 10

Спасти хотя душу, о плоти своей нерадел еси, святе (имя рек), но постом, бдением, молитвою и непрестанным трудом плоть свою усмирил еси, Богу на земли добре послужил еси, ныне же на небеси предстоиши у Престола Владычня, тамо Ему вопия: Аллилуиа.

Икос 10

Стена твердая и прибежище необоримое являешися всем с верою к тебе притекающим, святый (имя рек). Темже заступай мя молитвами твоими от враг видимых и невидимых, да зову ти:

Радуйся святый (имя рек) хранителю мой, в райския чертоги молитвою твоею введи мя, радуйся святый (имя рек) хранителю мой, тамо на веки вечныя упокой мя. Радуйся святый (имя рек) хранителю мой, тамо собор пророков покажи ми, святый (имя рек) хранителю мой, тамо полки мучеников укажи ми. Радуйся святый (имя рек) хранителю мой, тамо в воинство преподобных проводи мя, радуйся святый (имя рек) хранителю мой, тамо во множество пустыниц введи мя. Радуйся святый (имя рек) хранителю мой, тамо в лики святителей предустави мя, радуйся святый (имя рек) хранителю мой, тамо в сонм жен святых отпусти мя. Радуйся святый (имя рек) хранителю мой, тамо тмами исповедников обрадуй мя, радуйся святый (имя рек) хранителю мой, тамо дружиною монашескою утеши мя. Радуйся святый (имя рек) хранителю мой, молитву свою о мне к Богу пролей, радуйся святый (имя рек) хранителю мой, моли Бога о мне.

Кондак 11

Пение похвальное приношу ти, святый (имя рек), моли Господа мне избавитися от всяких печалей и бед, наипаче же в час кончины моея своим явлением предвари, да не умру без покаяния, да сподоблюся в небесных селениих жити вечно и с тобою тамо воспевати Богу: Аллилуиа.

Икос 11

Светоприемный проповедник истиннаго света являешися, святый (имя рек), просвещаеши сердца верных и к разуму Божественному вся наставляеши, поучая и мя светло, радостно взывати тебе сице:

Радуйся, святый (имя рек) хранителю мой, сердце чисто созижди во мне, радуйся святый (имя рек), хранителю мой, дух прав обнови во утробе моей. Радуйся, святый (имя рек) хранителю мой, покаянную молитву даждь ми, радуйся святый (имя рек) хранителю мой, покаянныя слезы в молитве сей даруй ми. Радуйся, святый (имя рек), хранителю мой, мир в душе моей сотвори, радуйся святый (имя рек) хранителю мой, сокрушение духа по Бозе низпосли ми. Радуйся, святый (имя рек), хранителю мой, греховныя страсти моя вся упраздни, радуйся святый (имя рек), хранителю мой, кротость сердца ко врагом моим даруй ми. Радуйся, святый (имя рек), хранителю мой, милующим христианином соделай мя, радуйся святый (имя рек), хранителю мой, светом Евангельских заповедей просвети мя. Радуйся святый (имя рек) хранителю мой, молитву свою о мне к Богу пролей, радуйся святый (имя рек) хранителю мой, моли Бога о мне.

Кондак 12

Благодать, данную ти от Бога, сведый, светлую память твою праздную, святый (имя рек) и с усердным молением к тебе притекая твоею всесильною ко Господу молитвою, яко необоримою стеною, ограждаюся. Сего ради восхваляя тя, усердно зову Богу: Аллилуиа.

Икос 12

Славную кончину твою поюще, еюже возвеличился еси, добрый воин Христов, молю тя, святый (имя рек), буди ми во всяких бедах и скорбех скорый помошник, услыши мя, усердно взывающаго ти:

Радуйся, святый (имя рек) хранителю мой, райских обителей сподоби мя, радуйся святый (имя рек), хранителю мой, от ада избави мя. Радуйся, святый ( имя рек) хранителю мой, в новый Иерусалим введи мя, радуйся святый (имя рек), хранителю мой, от тартара избави мя. Радуйся, святый (имя рек) хранителю мой, Пресвятую Богородицу умоли за мя, радуйся святый (имя рек) хранителю мой, от князя бесовскаго защити мя. Радуйся, святый (имя рек), хранителю мой, нектаром любве ко Господу мя напои, радуйся, святый (имя рек) хранителю мой, горечь грехов моих от мене отжени. Радуйся, святый ( имя рек) хранителю мой, двери райскаго сада отверзи для мя, радуйся святый (имя рек), хранителю мой, во врата ада не введи мя. Радуйся, святый (имя рек) хранителю мой, молитву свою пролей, радуйся святый (имя рек) хранителю мой, моли Бога о мне.

Кондак 13

О всеблаженный и богоносный отче, святый (имя рек), приими сие мое хвалебное пение и избави мя от всякаго зла твоим теплым к Богу ходатайством, да с тобою воспеваю Богу: Аллилуиа.

Этот кондак читается трижды

1-й икос «Архангели и Ангели...» и 1-й «Возбранный от Царя...»,

Молитва

О, блаженный рабе Христов, святый (имя рек): Хранителю души и тела моего, к тебе припадая зову: спаси мою душу от тьмы грехов моих. В жизни сей многотрудной и в смерти моей не остави мя. Аще бы не ты, предстательство имущий, молился у Престола Владычня, безвременне убо погибла бы душа моя. Тяжесть грехов влечет мой дух к земле, ты же молитвою своею ведеши его к горним чертогам. Молюти ся, святый (имя рек), хранителю мой, умилосердися о мне, рабе твоем (имя рек) и в смертный час стани одесную мене, не остави тогда душу мою обнаженною от всякого благотворения. Ныне же буди ми во всем благом помошник и заступник, да святыми твоими молитвами в Царствие Божие вниду, на Страшнем Суде шуия части избавлюся, десныя страны общник буду, да с тобою в райския обители вниду и сподоблюся тамо со всеми праведными вечно славити и воспевати великолепое имя Отца и Сына и Святаго Духа ныне и присно и во веки веков. Аминь.

12 июля 2001 г. - 12 июня 2003 г.

Сайт создан в системе uCoz