Кондак 1
Возбранный в бедах и скорбех, заступниче, благоутробия неистощимое сокровище, святителю отче Иннокентие! Великаго тя пред Господом ходатая, и чудес множеством свидетельствованна помощника имущии, к тебе во обстоянии от всяких нужд и зол с верою и любовию притекаем, и тако ти во уповании зовем:
Радуйся, Иннокентие, великий в скорбех помощниче.

Икос 1
Ангелом уподобился еси непорочным твоим на земли житием, соименный невинности [1], святителю отче Иннокентие, и сего ради ангелов сопричастия сподобился еси на небеси, в немолчном их славословии Господа Славы. Вонми убо и от наших благодарных устен приносимое тебе приветствии сими хваление:
Радуйся, непорочностию сердца, Непорочнаго, Исаием пронареченнаго, Агнца в себе образ явивый.
Радуйся, невинности, во всем житии твоем сохранением, греха непричастному, ангелов житию подражатель бывый.
Радуйся, Архиерея, выше небес бывшаго, достойный в преподобии и незлобии наместниче.
Радуйся, Церкви, невесты Христовы непорочныя, драгое украшение.
Радуйся, святости жития и непорочности нравов, соименный невинности, учителю.
Радуйся, чистоты и целомудрия ревностный, в твоих чадех духовных, хранителю.
Радуйся, Иннокентие, великий в скорбех помощниче.

Кондак 2
Видя Господь Бог благопотребен тя быти сосуд ко приятию многоразличных даров благодати, со обилием от щедрот Своих, излия в твое сердце духа премудрости и разума, во еже просвещати языки, во тьме и сени смертней седящия; духа совета и крепости, во еже превозмогати над враги спасения, видимыми и невидимыми; духа ведения и благочестия, во еже Христово стадо пасти учением и житием. Мы же, тя на спасение людей тако приуготованна уразумевше, со умилением Подателю всех благ Богу зовем: Аллилуия.

Икос 2
Разум благопотребен к деланию приятых тобою от Бога талантов стяжати хотяй, еще юн сый, водворился еси в вертограде духовныя мудрости преславнаго града Киева; совершен же в житии хотяй, по заповеди Христа Спасителя, быти, сожительство восприял еси в лике иноков Свято-Печерския Лавры, оболчен во вся оружия Божия; идеже преобразуяся от славы в славу якоже от Господня Духа, достигл еси в мужа совершенна, в меру возраста исполнения Христова. Мы же, твое звание и избрание на служение языком отдаленным разсмотряюще, со удивлением зовем ти:
Радуйся, сада божественнаго розго винограда, плодами Духа, в Малой России, приумноженная, да их обилием обширныя страны Сибири насладиши.
Радуйся, сладкоуханный крине Господень, во благорастворенном юге неувядаемою невинностию процветший, да тою страны севера среди снегов и мраза облагоухаеши и украсиши.
Радуйся, в земном училище небесной мудрости, от Самаго, Христом обетованнаго Наставника навыкший, да ею языки, Бога неведущия, на путь истины и спасения наставиши.
Радуйся, примером жития святых чудотворцев Печерских на высоту добродетелей поставленный, да на сей, яко на свещнице светильник, мглу неподобнаго жития во изгнании сущих разгониши.
Радуйся, верный учениче Спаса нашего, неотступный стопам Его последователю, во апостола языков предъизбранный.
Радуйся, чадо послушливое матери Церкви Православныя, во отца и первосвятителя иркутския паствы пронареченный.
Радуйся, Иннокентие, великий в скорбех помощниче.

Кондак 3
Силою свыше тя облеченна уразумевше Благоверный Царь и святый Собор, избраша тя во апостольское служение, проповедати Евангелие Царства Христова в земле языков чуждых, неведущих пети во Святей Троице единому Богу: Аллилуия.

Икос 3
Имея ревность апостольскую о спасении душъ человеческих, подвиглся еси красными ногами твоими на вся труды и беды путнаго шествия в дальния страны царства хинов; к егоже пределом, чрез горы же и реки, дебри и пустыни, мало не летнему совершившуся кругу, достиг, в Селенгинске препокоение обрел еси; идеже тя, от трудов странствия апостольскаго, малое стадо присных ти по вере приветствии сретиша сими:
Радуйся, новый апостоле языков, со Евангелием Христовым, на просвещение языков, во стране и сени смертней седящих, необозримыя страны претекший.
Радуйся, в шествиих путных, якоже и Павел, языков апостол, беды в реках, беды в пустыни, беды от язык, беды от лжебратии, вся Христа ради и Евангелия бодре сретивый.
Радуйся, лучезарное Церкви Христовы светило, не от восток, но на просвещение, неозареннаго светом Христовым, востока возшедшее.
Радуйся, божественнаго огня многовместимое носило, теплоту любве Христовы во страны стужи и мраза в себе принесшее.
Радуйся, духом ревности апостольския движимый, препокоение всячески отринув, на труды апостольския, к языком монгольским поспешивый.
Радуйся, во изгнании страждущим и тяжкими работами обремененным покой душам во благом иге Христовом указавый.
Радуйся, Иннокентие, великий в скорбех помощниче.

Кондак 4
Бурю зависти древний человеческих душъ прельститель воздвиже в мирных к нам издревле сердцах хинов сопротив тебя, во страну их грядущаго, благовестника мира Христова; и возстави на тя, якоже древле на Павла, языков апостола, лжебратию, во еже в пределы хинов твое возбранити вхождение, да не навыкнут хинове, якоже и православнии, изведшему ны из тьмы во свет Свой чудный Христу Богу пети: Аллилуия.

Икос 4
Услышав ухищренныя хинов глаголы, яко не подобает ти, иерарху великому Господа, быти прияту в их царство, да не посрамится тобою великий их, бесов служитель, Хутухта, обратился еси паки со Евангелием ко языком своего царства монгольским, еже видяще, глаголами живота тобою дотоле насыщаемии, с велиею радостию тя, яко своего апостола, приявше, возопиша ти таковая:
Радуйся, хинами, якоже и Христос древле гадарянцами, по коварству единаго и тогожде спасения врага в их царство не приятый, ко приятию же самими ангелы в небесное Царство достойный.
Радуйся, не роду чуждому хинов, но своего царства языком монгольским, по премудрому строению свыше, во апостола уготованный.
Радуйся, яко возбранением тебе благовестия в пределах языков чуждых, велие благо языком роднаго нам царства устроися.
Радуйся, яко проповедию Евангелия, тобою к языком монгольским принесенною, злоухищрение [врага] душ человеческих жестоко посрамися.
Радуйся, яко твоего ради среди нас вселения, неведущии Бога в познание истины приведутся, противляющиися же истине обличатся.
Радуйся, яко на образ святаго жития твоего взирающе, грешнии покаются, беззаконнии же уцеломудрятся.
Радуйся, Иннокентие, великий в скорбех помощниче.

Кондак 5
Боготочный премудрости источник от обилия присущей ти благодати проторжеся в пустыни монгольски, егда неразумнии хинове, хитросплетенными своими оплоты заградиша токи ея в пределы их омраченнаго царства: ревностию бо апостольскою движимь и во служении пастырском труждаяся, ово просвещал еси светом Евангелия Христова неверующия языки могольски, ово утверждал еси верующия в послушании Православныя Церкве уставам; и тако научал еси и неверные и верные вкупе воспевати Единому всех человеков Спасителю Богу: Аллилуия.

Икос 5
Видевше поставленнии в пределах языков ангели, царства же Хинскаго и языка Монгольскаго, обличенна тя силою свыше, стояша противу друг-друга, якоже древле ангели царства Персскаго и языка иудейскаго, да тя испросят у Вышняго на просвещение: ов убо царства Хинскаго, ов же языка Монгольскаго. И молитвами сего дарова тя Вышний в первосвятителя Иркутския Церкве и учителя языков восточнаго царства Сибири; еже мы ныне, чада твои духовнии, радостно воспоминающе, сице зовем ти:
Радуйся, первоангеле Иркутския Церкве, благовестием Христова Евангелия, последние Русскаго царства пределы огласивый.
Радуйся, святое начало святителей Иркутския паствы, прочим, ово скончанием зде живота, ово на другия паствы преведением, пременяемым, единый ея несменный блюстителю.
Радуйся, отче, святых отецъ в насаждении древняго благочестия и искоренении душевреднаго нечестия подражателю.
Радуйся, в насажденном тобою вертограде пастырскому служению уготовляемых трудолюбивый учителю.
Радуйся, пастырю добрый, изнемогшее подъявый, болящее уврачевавый, сокрушенное обязавый, заблудшее обративый, погибшее взыскавый, готовый и душу твою положити за овцы твоя.
Радуйся, неусыпный страже, вверенныя ти души, Кровию Христовою искупленныя, бденным молением и путным, человеческия силы превосходящим обхождением, добре я сохранивый.
Радуйся, Иннокентие, великий в скорбех помощниче.

Кондак 6
Богопроповедников Христовых апостолов труды на ся подем, оных наследовал еси не точию подвиги и лишения, но и скорби и озлобления: ово прекословием и враждованием препинаем, ово коварством и клеветами озлобляем; но вся, ради Христа и Евангелия, доблественно понесл еси, и вся ны, не точию благодушствующия, но и скорбящия, научил еси пети Богу: Аллилуия.

Икос 6
Возсияла есть паче солнца, во огни искушений и скорбей очищенная, душа твоя, доблественный подвижниче Христов: аще бо в немощех и болезнех претруждено бяше тело твое, но духом присно сый бодр, всегда побеждал еси враги Христовы Церкви. Сего ради и мы, тобою в скорбех утешаеми, победная ти сице вопием:
Радуйся, воине Христов, во всеоружии Божии противу начал и властей и миродержителей тьмы века сего, духов злобы поднебесных, твердыми стопами ставый.
Радуйся, истиною аки поясом по чреслех препоясанный, злочестивыя языков шатания стягнувый.
Радуйся, правдою аки в броня оболченный, вся суетная наветник клеветы недейственны сотворивый.
Радуйся, нозе во благовествование мира обувенны имевый, главу, тя уязвлявшаго в пяту, древняго змия поправый.
Радуйся, верою аки щитом покровенный, вся разжженныя лукаваго стрелы угасивый.
Радуйся, шлем спасения и мечь духовный, иже есть глагол Божий, восприявый, и вся враги три — плоть, мира и диавола, аки воевода возбранный, победительно низложивый.
Радуйся, Иннокентие, великий в скорбех помощниче.

Кондак 7
Хотяй милосердый Господь не точию пастве Иркутстей, но и всякому ближнему же и дальнему тя даровати в скорбех утешителя, в бедах скораго помощника и от болезней целителя, ускори тя разрешити, не у совершившимся пяти летом твоего служения, от уз сея бренныя плоти, да свободен быв от нея, по всем градом и весем чудесы и исцеленьми Бога прославиши и вся Ему воздвигнеши пети: Аллилуия.

Икос 7
к новому и нестареющемуся на небесех жительству уготовляя твой восход, писанием со одра болезни всесмиренно просил еси вся иереи града Иркутска со христианы православными, да воспоют во храмех Богородице параклисис; чада же твоя духовная, скорбя о твоем от них разлучении, притекше ко одру твоему, тебе сице со слезами и во уповании воззваша:
Радуйся, ратоборче Христов неутомимый, подвигом добрым противу врагов Церкве Христовы подвизавыйся.
Радуйся, быстротекущий орле, течение твое к превыспренним селениям, быстротою, вся упреждающею, скончавый.
Радуйся, воине Царя Небеснаго, вся обеты Христу Царю и Богу нашему, от крещения до положения живота твоего, верно соблюдый.
Радуйся, яко прочее уже венец правды в руках ангелов, присных твоего подвига свидетелей, тебе соблюдается.
Радуйся, воззываемый к горнему иерусалиму во обители Отца Небеснаго, ко упокоению, не оставляй посещати наш град и обитель сию и по вселении твоем в горния обители.
Радуйся, теплый о нас присно у престола Божия молитвенниче, не оскудевай о нас и тамо, у самаго престола Царя Небеснаго ходатайствовати.
Радуйся, Иннокентие, великий в скорбех помощниче.

Кондак 8
Странное всем чудо показася, [егда] древянная церковь, в нейже ты, святче Божий, приносил еси о людех твоих безкровную жертву, и под еяже олтарем почивал еси от трудов сего временнаго жития, среди бо всея обители запаления, яко древняя купина, огнем опаляема, не сгараше. Чтущии же память твою, яве уразумевше, яко твоих ради, хранимых под спудом ея святых мощей, совершается сие чудо, со страхом и радостию, хранящему ю Богу, множицею взываху: Аллилуия.

Икос 8
Вси людие, притекшии во обитель твою и церковь, в нейже почиваху мощи твоя, огнем опаляему видяще, приступивше ко архипастырю, ту бывшему, тепле его моляху, да изнесут из нея раку святых мощей твоих; он же, духом веры исполнь, не точию мощей огню не прикосновением, но ради мощей и всея церкви сохранением всех ободряше. Людие же, сбытие словес архипастыря абие узревше, благодарными ти гласы, чудотворче, воззваша:
Радуйся, светильниче Церкве неугасимый, из-под спуда, чудесы, паче блистания огненнаго, возсиявый.
Радуйся, несгаранием, огнем опаляемаго хранилища мощей твоих, о нетлении их преславно провозвестивый.
Радуйся, таковым среди нас знамением о твоем, и по отшествии в премирныя селения, с нами сопребывании, удостоверивый.
Радуйся, единыя токмо церкви, в нейже почиваху мощи твоя, от запаления огненнаго сохранением, единаго тя нам, паче всех, от бед заступника, открывый.
Радуйся, и града нашего, среди бываемых в нем запалений огненных, многажды удоборазумеваемый хранителю.
Радуйся, наипаче о избавлении нас от огня геенскаго присный наш пред Господем ходатаю.
Радуйся, Иннокентие, великий в скорбех помощниче.

Кондак 9
Вся лики ангелов даша славу, честь и благодарение Седящему на Престоле, Живущему во веки веков Богу и Агнцу, егда, убеленная светлостию непорочности, душа твоя, соименный невинности, святителю Христов Иннокентие, вознесена бысть ангелами на небо, в сожительство ангелов. Мы же, прославления на земле святых мощей твоих о твоей на небесех славе уразумевше, с веселием прославльшему тя Богу присно взываем песнь: Аллилуия.

Икос 9
Ветиям любомудрым на сердце не взыде, яже ти, Христов угодниче, преблагий и прещедрый Господь уготова во обителех небесных. Мы же, празднующе твое на небеси предивное прославление, сице тя на земли ублажающе, зовем:
Радуйся, многую на небесех, ради многообразнаго твоего на земле служения, мзду восприемый.
Радуйся, невинности соименный девственниче, без порока пред престолом Божиим представый, и сего ради в первенцы Богу и Агнцу вписанный.
Радуйся, страдальче, от скорби велия возшедый на небо, и тамо в ризах белых, со увенчанными старцы, пред престолом спасение и славу поющий.
Радуйся, апостоле языков, престолом апоcтольским, со двеманадесятию и седмидесятию апостолами на небеси почтенный.
Радуйся, пастырю научивый и сотворивый, и сего ради велиим во Царствии небеснем от Самаго Пастыреначальника Христа нареченный.
Радуйся, воеводо возбранный, врагом спасения победительный, соседения Победителю ада и смерти на престоле Его удостоенный.
Радуйся, Иннокентие, великий в скорбех помощниче.

Кондак 10
Спасения посреде земли соделавый, Человеколюбец Господь посети и сию страну далекую, изгнанных сущу население, Своею милостию и щедротами: в раке бо мощей твоих, великий угодниче Христов, открыл есть нам источник неоскудный утешения; еже, яко знамение известное твоего теплаго о нас на небеси ходатайства приимши, вся страна Сибирская, единеми устами и сердцем поет Богу: Аллилуия.

Икос 10
Стена еси необоримая, заступниче наш, граду сему и стране сей от нахождений всяких зол и скорбей: явлением бо непрестанных чудес твоих уверихомся, яко велие стяжал еси дерзновение у Господа. Сего ради, верою утверждаеми о твоем о нас заступлении, сице зовем ти:
Радуйся, ангеле страны Сибирския, выну видяй на небеси лице Отца небеснаго, и наш богодарованный хранителю и заступниче, ходатаю и помощниче.
Радуйся, яко ангел, во вся веси и грады от Бога посылаемый в служение за хотящих наследовати спасение, и всем страждущим и во озлоблении сущим неоскудное сый утешение.
Радуйся, благодатию богатый, отче наш, драгоценное нам, чадам твоим, в раке мощей твоих наследие, по скончании твоем, оставивый.
Радуйся, благопопечительный дому владыка, в доме твоем, егоже яве сам во обители Вознесенстей указал еси, всех притекающих к тебе сретаяй с любовию.
Радуйся, и на всяком месте, на мори и на суши, в горах же и дебрях, тя с верою призывающим, яко скорый помощник являяйся.
Радуйся, и не ищущим тя, и неведущим, в сониях и видениях, яко добрый наставник, врачь же и покровитель многажды познаваемый.
Радуйся, Иннокентие, великий в скорбех помощниче.

Кондак 11
Пение всякое не довлеет от нас к прославлению чудес твоих, чудотворче предивный, имиже не точию верныя, но и неверныя преславно удивляеши; веруем же и надеемся, яко твоими молитвами и во мраце идолослужения сущии из тьмы и сени смертныя изыдут и с нами купно прославльшему тя Богу воззовут: Аллилуия.

Икос 11
Светильник не поставляется под спудом, но на свещник возлагают, да входящии видят свет его: сего ради и твоя святыя мощи, аще и чрез седьмдесят и три лета скрываемывя, рукою крепкою чудес изведе из-под спуда Господь, яко да входящии во обитель твою, от сего чуднаго света, не токмо верою просвещаются, но и молитвами твоими согреваются, и исцеленьми от тебе оживляются; и тако сими молитвенно тебе воззовут:
Радуйся, наставниче премудрый, мысли благи и хотения свята на сердце полагаяй.
Радуйся, вождю благонадежный, от стропотнаго пути греха на путь спасения направляяй.
Радуйся, дерзновенный у Господа предстателю о спасении душъ наших ходатайствуяй.
Радуйся, скорый о Бозе помощниче, от нахождения зол и скорбей сохраняяй.
Радуйся, врачу сострадательный, от болезней душевных же и телесных всецело свобождаяй.
Радуйся, оставленных врачами и к твоей помощи с верою притекающих от одра смерти скоро воздвигаяй.
Радуйся, Иннокентие, великий в скорбех помощниче.

Кондак 12
Благодатию Божиею исполнен тя сосуд познавше не точию близ сущии, но и во странах дальних обитающии, с верою притекают к цельбоносней раце мощей твоих; ты же, святителю Христов, внемля их молениям, не оскудевай напутствовати всех дарами исцелений и чудес твоих, да от восток солнца до запад вси воспоют чудодействующему тобою Богу: Аллилуия.

Икос 12
Поюще чудеса твоя, имиже по преставлении, паче же по обретении святых мощей твоих, Бога прославил еси, благодарно тебе сице зовем:
Радуйся, жилами разслабленныя и недугами одержимыя со одра болезни возставивый.
Радуйся, сокрушением ног и рук болезненно страждущия, аки николиже страдавшия устроивый.
Радуйся, струпами, аки проказою, покрытыя и ранами неисцельными уязвленныя, целы и здравы соделавый.
Радуйся, зрение слепым возвративый и изумленныя на здравый смысл наставивый.
Радуйся, во отчаянии живота от долгаго страдания сущия и к смерти уже уготовляемыя к жизни паки возвративый.
Радуйся, ни единей же болезни ко исцелению тебе быти неудобней, чудес множеством засвидетельствовавый.
Радуйся, Иннокентие, великий в скорбех помощниче.

Кондак 13
О, великий Христов угодниче, милостивый нашъ наставниче, благоутробия сокровище, правоверия учителю, архиереев похвало, безпомощных заступниче, отче наш иерарше Иннокентие! Моли Христа Бога, да не разлучит нас от тебе, к тебе с верою притекающия, наш Праведный Судия, егда со ангелы Своими во славе приидет, и, яко Пастырь, разлучити имать Своя овцы от козлищь на Страшном Своем суде, но да с тобою купно, яко отцем нашим, сподобимся Ему пети во веки веков: Аллилуия.
Сей Кондак глаголи трижды. И паки чтется 1-й икос: Ангелом уподобился еси... и Кондак 1-й: Возбранный в бедах и скорбех, заступниче.

Тропарь святителю Иннокентию, глас 3
Светильниче Церкве пресветлый, озаривый лучами доброт твоих страну сию, и исцеленьми многими притекающих к раце твоей с верою Бога прославивый, молим тя, святителю отче Иннокентие, ограждай молитвами твоими град сей от всех бед и печали.

Кондак глас 4
Непорочности соименнаго пастыря, проповедника веры в языцех монгольских, славу и украшение Иркутския паствы, любовию восхвалим вси вернии: той бо есть хранитель страны сея, и молитвенник о душах наших.

Величание
Величаем тя, святителю отче Иннокентие, и чтем святую память твою, ты бо молиши за нас Христа Бога нашего. Примечание: [1] Иннокентий — с латинск. значит невинный. Источник: Память праведнаго (Иннокентия) с похвалами. [Акафист святителю Иннокентию, Иркутскому чудотворцу] // Прибавления к Иркутским Епархиальным ведомостям. № 6. — 8 Февраля 1864 года. — Иркутск: в типографии Штаба войск, 1864. — С. 91-106.

Свт. Иннокентий, еп. Иркутский († 1731 г.)
Святитель Иннокентий, епископ Иркутский, чудотворец, родом из дворян Кульчицких, переселившихся с Волыни в Черниговскую губернию, в мире иоанн, он получил образование в Киевском Братском училище. В Киеве же, в Печерской лавре, он принял (в 1708 г.) иночество и сан священства. с 1710 г. он подвизался на педагогическом поприще в Московской Славяно-Греко-Латинской Академии, преподавая там словесность, а потом философию, метафизику и нравственное богословие, состоя в то же время префектом и имея надзор за порядком жизни учащихся. с конца 1720 г. он был наместником Александро-Невской лавры, а 5 мар. 1721 г. он был поставлен во епископа Переславскаго и назначен в русскую Пекинскую миссию; но, по проискам иезуитов, не был принят Китайским правительством и почти 5 лет провел в Селенгинске, трудясь в проповедании слова Божия инородцам, подвизаясь в молитве и занимаясь иконописанием. в 1727 г. (15 янв.) он был назначен епископом Иркутским и много потрудился над обращением в христианство и просвещением язычников бурят и тунгусов и обучением новообращенных Закону Божию и русскому языку.

Взято с http://osanna.russportal.ru