Акафист святителю Иоанну, митрополиту Санкт-Петербургскому и Ладожскому
† 20 октября 1995 г.
Сей Акафист составлен почитателями приснопамятного святителя и предназначен только для келейного употребления
Опубликован в газете «Русь Православная», №11(41), 2000 г.

Тропарь, глас 1
Апостолу Иоанну Богослову тезоимените, апостольских преданий ревнитель явился еси, Церкви Русския похвала, и граду святаго Петра 
заступление, миродержителей века сего об-личителю и еретических учений посрамителю, правды и истины Божия утверждение, веры 
Православныя проповедниче, и о чадех твоих неусыпный к Богу молитвенниче, святителю отче Иоанне, моли Христа Бога мир Церкви 
Православней низпослати и душам нашим ве-лию милость.

Ин тропарь, глас 4
Правило веры и благочестия, воздержания добрый наставниче, Православнаго Отечества ревнителю, защитителю народа Русскаго, богомудре святителю Иоанне, моли Христа Бога помиловатися душам нашим.

Кондак, глас 2
Петербургскаго святителя память празднующе, воспоим, вернии, и поклонимся, яко старцу богомудрому, архипастырю доброму, дерзновение ко Христу стяжавшему молитися непре-станно о всех нас.

АКАФИСТ

Кондак 1
Возбранный воеводо земли Русския, под знаменем Креста на враги видимыя и невидимыя воинствующий, яко избавльшеся от зол неведения твоими учении, похвальная восписуем ти, чада твоя, святителю Иоанне: но яко имеяй дерзновение ко Владыце, от всяких нас бед свободи, да зовем ти: Радуйся, святителю Иоанне, пастырю добрый и Руси Святыя поборниче.

Икос 1
Ангела предстателя Церкве Петербургския, от Бога посланна, вемы тя, святителю, и твоим равноангельным гласом в вере истинней 
наставлени и утверждени, любовию зовем ти таковая:
Радуйся, тобою бо граду святаго Петра радость возсия;
радуйся, тобою бо мрак ересей разсеяся.
Радуйся, падших воззвание;
радуйся, плачущих утешение.
Радуйся, на высоту Небесную восхождение;
радуйся, архиерейскаго седалища украшение.
Радуйся, святителю Иоанне, пастырю добрый и Руси Святыя поборниче.

Кондак 2
Видяще тя, яко мертва родившася, яко ни дыхания, ниже гласа имел еси, отче Иоанне, дондеже глас рождшия тя к животу воззвал есть, 
разумеем, яко прознаменоваше сие имущее быти твое в мертвость Христову облечение, егда глас Матери Божия тя к сему подвиже, и 
благодарственне Богу, сице благоизволившему, приношаем песнь: Аллилуиа.

Икос 2
Разумел еси, отче Иоанне, яко вся тленна суть в мире сем, егда отроком узрел еси младенца некоего, на погребение несома; зрел еси убо и 
вечная нетленная благая во благолепии храмов Божиих являемыя, слагал еси сия в сердце твоем; мы же зряще тя сосуд Благодати от 
юности Богом избранный, вопием ти:
Радуйся, во младенчестве от злых Богом хранимый;
радуйся чудныя явления милости Божия приявый.
Радуйся, скорби и нужды многия претерпевый;
радуйся, теми яко злато в горниле очистивыйся.
Радуйся, века сего суету уразумевый;
радуйся, сам искушен быв, можеши и искушаемым помощи.
Радуйся, святителю Иоанне, пастырю добрый и Руси Святыя поборниче. 

Кондак 3
Силы свыше явлены ти быша, отче Иоанне, егда дивное видение узрел еси: вместо людей нецеломудренно гобзующих, мерзкия бесы зле 
корчащияся. Темже Господу, от злых мира спасающему, воспел еси: Аллилуиа.

Икос 3
Имея желание в душе твоей, отче, светом Христова Евангелия просветитися, зачал еси усердно чести оное; искушение же от врага спасения человеческаго, воспящающа ти сие, мужественне презрел еси. Темже о таковой души твоея твердости радуяся, вопием ти:
Радуйся, словесем Христовым научивыйся;
радуйся, бесовския искушения препобедивый.
Радуйся, бисер многоценный обретый;
радуйся, всем, елика имел еси, той купивый.
Радуйся, море житейское на корабли крепцем — Церкви безбедне преплывый;
радуйся, земле благая, семя слова Божия восприявшая.
Радуйся, святителю Иоанне, пастырю добрый и Руси Святыя поборниче.

Кондак 4
Бурю внутрь помыслов сумнительных изведал еси, отче Иоанне, егда забывши помолитися, сну предался еси, во утомлении мнозе, чрез оное же сладость молитвы и горечь богооставле-ния изведав, молитвенно Господеви взывал еси: Аллилуиа.

Икос 4
Слышати словеса жизни вечныя сподобился еси, отче Иоанне, от посланныя ти Богом наставницы духовныя — старицы Февронии, от неяже благочестно смирению научился еси, темже и блаженная Параскева изрекла ти проречение сие:
Радуйся, яко имаши отчизне в чине воинстем послужити;
радуйся, яко скончание брани в день великомученика Георгия узриши.
Радуйся, яко победу воинству нашему от Бога данную увидиши;
радуйся, яко Господеви в сане духовнем послужиши.
Радуйся, яко благодати архиерейства сподобишися;
радуйся, яко многия во истине наставиши.
Радуйся, святителю Иоанне, пастырю добрый и Руси Святыя поборниче.

Кондак 5
Боготочною Кровию выну желая напитатися, усердно потщался еси к достойному причаще-нию Святых Таин Христовых, того ради чудесно сподобися Оных от святыя великомучени-цы Варвары, юже до конца жизни благочестне почитал еси, благ вечных Подателю воспевая: Аллилуиа.

Икос 5
Видения дивнаго сподобился еси, отче Иоанне, во дни служения твоего в подвизе воинстем; зрел бо еси Матерь Божию со старицею 
Феврониею, слышал же еси глас Пречистыя, повелевающий начальником твоим отпустити тя Той на служение; сего ради, яко избраннику 
Божия Матери вопием ти:
Радуйся, яко от Господа семя словес Евангельских в руку приемый;
радуйся, яко поле пажити духовныя тем засеявый.
Радуйся, яко плоды сеяния твоего узревый;
радуйся яко крест Господень на раменах твоих понесый.
Радуйся, яко сквозе огнь и воду прошедый;
радуйся, яко свет Христов в сердце твоем возсия.
Радуйся, святителю Иоанне, пастырю добрый и Руси Святыя поборниче.

Кондак 6
Проповедник Слова Божия явился еси, отче Иоанне, егда Промыслом Божиим сподобился еси быти келейником богомудраго святителя 
Мануила; людем Божиим жития святых и сло-веса Христовы толковал еси, воспевая Тому: Аллилуиа.

Икос 6
Возсиял есть Тихий Свет святыя Славы Божия, егда рукоположену ти во диакона и святую Литургию со иереем Божиим служа, зрел еси 
видимым образом Духа Святаго во образе огненне на предложенныя Дары сошествие; мы же тя яко благодатнаго тайнозрителя судеб Божиих познавше, вопием:
Радуйся, просвещенный благодатию Духа Божия;
радуйся, яко тысящи вокруг тебе спасошася.
Радуйся, на земли во плоти ангельски поживый;
радуйся, в мире сем пребывый премирно.
Радуйся, благодати диаконства во образ ангельский сподобивыйся;
радуйся, сан пресвитера от святителя Мануила во образ Христов приемый.
Радуйся, святителю Иоанне, пастырю добрый и Руси Святыя поборниче.

Кондак 7
Хотя тайну вечнаго спасения людем поведати, потщался еси первое премудрому учению бо-гословскому навыкнути, темже прилежно науки во академии духовней извыче, Христу Пре-мудрости Божией воспевая: Аллилуиа.

Икос 7
Новаго тя о нас молитвенника, целителя душ и телес наших и предстателя тя пред Господом прияхом, егда сподобился еси, отче Иоанне, 
благодати сана архиерейскаго, темже люди паствы твоея благословение твое приемше, возопиша ти:
Радуйся, правило веры и образе кротости;
радуйся, воздержания и молитвы учителю.
Радуйся, благий делателю винограда Иисусова;
Радуйся, дарованный тебе талант преумноживый;
радуйся, яко сподобился еси от Господа благодати исцелений.
Радуйся, святителю Иоанне, пастырю добрый и Руси Святыя поборниче.

Кондак 8
Странно житие явил еси, святителю, в годину лютых гонений от власти безбожней, добре пас еси стадо словесных овец, научая тех скорби со смирением и терпением преносити, Богу благодарственно взывая: Аллилуиа.

Икос 8
Весь бе от Бога освящен, всем страждущим послужил еси, святителю Иоанне, алчущия питая, жаждущия напояя, милостыни же твоя в тайне творя, обаче Господу тя прославившу, паства твоя вопиет ти:
Радуйся, пастырю добрый, о заблуждших овцах пекийся;
радуйся, апостолов преемниче, в служении тем поревновавый.
Радуйся, архиереев Русских деяния описати потщавыйся;
радуйся, высоких степеней ученых сподобивыйся.
Радуйся, паствы твоея любовь велию стяжавый;
радуйся, врагом веры и Церкве Христовы страшен явивыйся.
Радуйся, святителю Иоанне, пастырю добрый и Руси Святыя поборниче.

Кондак 9
Во всю землю Русскую изыде слово твое, егда назначену ти на митрополию града святаго Петра, учение чудно возгласил еси, иже изрече 
прежде праведный Иоанн Кронштадтский, яко Русь Святая суть подножие Престола Божия, темже вся концы вопиют Богу о тебе: Аллилуия.

Икос 9
Ветия многовещанныя безгласны о тебе явишася. не возмогоша бо вопреки глаголати, возвещающу ти словеса правды Божия, мы же тобою наученнии, сице взываем:
Радуйся, святости, праведности и чистоты наставниче;
радуйся, стоянию в вере Православней учителю.
Радуйся, Русскаго порядка — державности и чистоты проповедниче;
радуйся, любви ко Отечеству, яко долга христианскаго возвестителю.
Радуйся, Церкве Христовы, соборныя совести народныя исповедниче;
радуйся, воев духовных Земли Русския предводителю.
Радуйся, святителю Иоанне, пастырю добрый и Руси Святыя поборниче.

Кондак 10
Спасти хотя мир, Иже всех Спаситель новаго тя чудотворца святаго воздвиже, нас тем чрез него из темных глубин греха воззвал есть, сего 
ради слыщаще тя, святителю Иоанне, к покаянию взывающа, мы в добродетели убозии, взываем сице к Богу: Аллилуи

Икос 10
Стена еси всем прибегающим к твоему небесному заступлению, святителю Иоанне, верныя от демонскаго ополчения ограждаяй явился еси, монашествующим старец богомудрый, неверующим же ко Христу приведение, сего ради вопием ти:
Радуйся, заповеди Евангельския сотворивый и научивый;
радуйся, велий во Царствии Небесном нареченный.
Радуйся, храмы Божий мнози от поругания возставивый;
радуйся, мощи святых паки обретый.
Радуйся, просвещения духовнаго насадителю;
радуйся, ересей злых, наипаче же екуменическия, отсекателю.
Радуйся, святителю Иоанне, пастырю добрый и Руси Святыя поборниче.

Кондак 11
Пение надгробное слезами раствореное людие ти принесоша, егда преставился еси от земных к Небесным, обаче и радости исполнено явися, яко обретохом в тебе новаго небеснаго града святаго Петра покровителя и заступника, Богови вопиюще: Аллилуиа.

Икос 11
Светоподательный светильник, древним святым подобный явился еси, святителю Иоанне, яко беды от врагов Христовых и лжебратии кротко претерпел еси, и благодать Божию велию восприял еси, недуги душевныя и телесныя целити, темже приими от нас хвалы сицевыя:
Радуйся, яко Никита Переяславский в видении мерзость греха познавый;
радуйся, яко Кирилл Белоезерский на подвиг духовный Богородицею призванный.
Радуйся, яко Димитрий Ростовский явления великомученицы Варвары сподобивыйся;
радуйся, яко Сергий Радонежский посещения Богоматере удостоенный.
Радуйся, яко мощи святых Иоасафа Белгородскаго и Серафима Саровскаго обретенныя приявый; 
радуйся, темже преподобным Серафимом во обителех Небесных сретенный.
Радуйся, святителю Иоанне, пастырю добрый и Руси Святыя поборниче.

Кондак 12
Благодать неистощимую яви нам Христос Бог от гроба твоего святаго, святителю Иоанне, сего ради притекают к тебе людие мнози, помощи, заступлепия и исцеления от тебе просяще, Богови о тебе вопиюще: Аллилуиа.

Икос 12
Поют ти велия похвалы вси вернии, о великий иерарше Иоанне, вельми бо на земли во славу Православия потрудився, в Небесная Святая 
Святых вшел еси и Святей Троице предстал еси, идеже о нас выну молися, преблагий отче, чадех твоих, с любовию зовущих ти сице:
Радуйся, новый Крестителю всех к молитве и покаянию призывали;
радуйся, новый Павле, тяготы проповеди Евангельския понесый.
Радуйся, новый Ионо, о гибели от греха пророчествуя;
радуйся, новый Сергие, воем духовным за Веру, Царя и Отечество ратующим предводительствуяй.
Радуйся, новый Марко, ересь екуменическую посрамивый;
радуйся новый Тихоне, властители беззаконныя обличивый. 
Радуйся, святителю Иоанне, пастырю добрый и Руси Святыя поборниче.

Кондак 13
О пастырю наш предобрый, святителю отче Иоанне, приими сие малое тебе хваление и умо-ли Христа Бога, да страждущее отечество наше от лютых безбожник и власти их свободит, и возставит престол Православных Царей, да дарует познати Себе Духом Святым множеству соотечественник наших, вере ненаученных, и от веры отвращенных, да едиными усты и еди-ным сердцем сподобимся в Царствии Небесном с тобою и со всеми святыми воспевати Ему: Аллилуиа.
Сей кондак глаголи трижды. Посем Икос 1 и Кондак 1.

Сайт создан в системе uCoz