Кондак 1
Избранный Богом воеводо, святый всехвальный победоносче и великий мучениче Иоанне Воине, настави мя на путь спасения, последовати к незаходимому немерцающему свету, покланятися вечно триипостасному единому Богу всея твари; восписуем Ти раби Твои благодарственная сия пения, и хваления приносим, Ты же, Святе, за Христа страдавый, и яко имеяй дерзновение ко Господу, от всяких нас бед свободи, да с радостию зовем ти: Радуйся страдальче святый, великомучениче Иоанне Воине, и чудотворче.

Икос 1
Ангелом подобнаго, прежде воинствующаго в душевной и телесной чистоте, богоугодно пожившаго, ныне со Ангельскими лики на небеси совокупльшагося, с ними же и воспевати тройческую песнь единому Богу сподобльшагося, молим, сподоби и нас, рабов твоих, о угодниче Господень, святе Иоанне Воине, твоя страдания воспоминати и славити тя на земли похвальными песньми:
Радуйся, яко данныя тебе от Бога заповеди целомудренне соблюл еси.
Радуйся, единаго Бога истиннаго в Троице познал еси.
Радуйся, мужемудренне в вере Христовой непорочне пребыл еси.
Радуйся, целомудренне надежду твою утвердил еси в Бозе.
Радуйся, в сердце твоем о Христе огнем любовь твоя распаляшеся к Богу.
Радуйся, три твои добродетели к Богу представили тя суть.
Радуйся, с верою, надеждою и любовию на небеси торжествуеши.
Радуйся, яко со ангельскими чинами хвалу Богу воспеваеши.
Радуйся, яко с воинством мученическим весело ликуеши и веселишися.
Радуйся, яко мы раби твои земнии хвалим, славим тебе и величаем.
Радуйся, страдальче святый, великомучениче Иоанне Воине и чудотворче.

Кондак 2
Видящи себе, святый великомученик Иоанн Воин блаженный, чином царский стратилат, верою благочестив, любяй и бояйся Бога, обращаяйся всякия неправды, послана от богомерзкаго царя греческаго Иулиана, со иными демоноговейными воины на восточную страну в НумЕры Ифалския, принудити муками вся христианы во идолослужение. Ты же приводимых христиан к тебе на мучение, отпущал еси на свободу, поучая веровати и покланятися истинному Богу единому в Троице, и пети Ему Творцу: Аллилуиа.

Икос 2
Разум неураземенный о единой Святей Троице, святый великомученик Иоанн Воин разумети хотяше, размышляше и разумне глаголаше к себе: утвержден есмь в вере и надежде в Бозе, и несть иного Бога разве Единаго в триех ипостасех, славимаго и покланяемаго. Таковому твоему, святый победоносче, целомудренному разуму дивящеся, глаголем:
Радуйся, разумных превозшел еси учением, паче иных разумнейший.
Радуйся, мудрецов, обучившийся благодати Господни, премудрейший.
Радуйся, ради царствия Божия, верою исповедал еси Бога в Троице единаго.
Радуйся, триипостасному Богу духом и истиною поклонился еси.
Радуйся, яко святый Дух богословити тя научил есть.
Радуйся, яко от юности таковый дар от Бога дан ти бысть.
Радуйся, яко сего ради получил еси благую часть благодати Господни.
Радуйся, яко на камени тверде веры Бог утверди тя.
Радуйся, яко закон Господень сохранивый до конца непорочно.
Радуйся, яко одесную престола Господня предстоиши радуяся.
Радуйся, яко во свете Его пребываши.
Радуйся, яко от лица Божия с праведными веселишися.
Радуйся, страдальче святый, великомучениче Иоанне Воине и чудотворче.

Кондак 3
Сила Вышняго содела святаго великомученика Иоанна Воина благоразумна, зане не мятешеся о сем, егда уведано будет о нем законопрестуным царем Иулианом, яко есть христианин: како свободитися, но точию утверди себе, еже быти ему целомудренну, и пред мучители не убоятися ему зверскаго их свирепства, ниже устрашитися суроваго их прещения, тем мужемудрственно со дерзновением святый возопити тщашеся: в триех ипостасех Бога, всея твари Творца чту, Тому единому верую, весело, согласно покланяюся, и пою Ему: Аллилуиа.

Икос 3
Имущи святый великомученик победоносец Иоанн Воин свыше данную себе благодать, глаголаше к себе: егда царь законнопреступный Иулиан, понудит в демоноговеинство свое, да вопию сице: злочестивый, идолонеистовый царь богомерзкий, злокозненными твоими словесы, не можеши мя ниже прельстити, ниже различными муками устрашити в демоноговеинство твое, ничем же отлучиши мя от любве моея к Творцу и Богу моему, от всея твари славимому и поклоняемому. Мы же за имевшуюся в тебе таковую любовь к Богу приносим ти сице:
Радуйся, яко презрел еси суету и прелесть мира сего.
Радуйся, любовь твою к Богу искренно возжегл еси.
Радуйся, верою простерл еси к Нему все желание твое.
Радуйся, небесному царю Христу Богу угодити потщался еси.
Радуйся, всесильным Царем Небесным врата райския отверзошася тебе.
Радуйся, Иисус Христом в вышний свет введен был еси.
Радуйся, сладчайшаго Иисуса в лице тамо зриши всегда веселяся.
Радуйся, ныне в вышних светоносных чертогах яко солнце сияеши.
Радуйся, в тамошних дворех яко сельный крин процветаеши.
Радуйся, яко вышния жители тебе возрадовашеся.
Радуйся, яко обще с мученики тамо радуешися.
Радуйся, прекраснаго Царствия Небеснаго наслаждаешися.
Радуйся, страдальче святый, великомучениче Иоанне Воине и чудотворче.

Кондак 4
Буря ярости идолопоклоннаго, злобешеннаго и демоноговейнаго царя Иулиана законопреступнаго, дышущаго на вся христианы, аки лютый змий, мучением же и убийством претящаго, возмути всю вселенную, благочестивым же вложи страх и трепет, но ты, святый страдальче Иоанне Воине, со страдавшими с тобою праведными, не убоявшеся, основан бо бе на твердом веры Христовы камени, того бо не возможе поколебати, на нем же неподвижно стояще, укрепляющему тя Богу звал еси: Аллилуиа.

Икос 4
Слышавши о тебе, святый великомучениче, страстотерпче Иоанне Воине, злочестивый царь Иулиан, яко христианин еси, и в НумЕрах Ифалских христианом помогаеши, приводимых на мучение отпущаеши, и в вере святей утверждаеши, и крытися повелеваеши. Того ради проклятый той сосуд демонский, возъярися на тя зело, посла в место твое иного воина, а тебе повеле во всякой нужде привести в Царьград, сам же пустися из того града в Перскую землю с воинством. Но мы тя, страстотерпче святый Иоанне Воине, любезно почитаем, и воспеваем сице:
Радуйся, яко разжегл еси сердце твое о Господе, якоже разжигается в горниле сребро и злато.
Радуйся, яко утвердил еси себе в вере крепце, и возлюбившаго тя Господа, любити Его до конца.
Радуйся, яко Господь крепость даде тебе, и Духом Своим Святым вспомоществова ти во всех делах твоих.
Радуйся, яко правды ради и истиннаго благочестия не обинулся еси мучитися за Христа любезно.
Радуйся, яко злая претерпел еси в пути мучения Христа ради, внятно бо Им бысть услышана молитва твоя.
Радуйся, яко свирепо биен был еси до крове, но вся терпя последовал еси самому Христу Иисусу.
Радуйся, яко вместо мира многоценнаго принесл еси Христу в жертву истекшую святую кровь твою.
Радуйся, яко из капель крови твоея святыя, исткася ти свыше риза преиспещрена.
Радуйся, яко в мученическую крепость яве оболкся еси.
Радуйся, яко многое богатство, честь и славу земную презрел еси, но честию и славою увенчался еси на небесех.
Радуйся, яко возмездие приял еси горе, святый венец нетленный.
Радуйся, мужемудренно лютаго змия победил еси безбожия тму.
Радуйся, яко главу ему славно стерл еси, он же небесным огнем во адский огнь низведеся.
Радуйся, страдальче святый, великомучениче Иоанне Воине и чудотворче.

Кондак 5
Боготечной звезде был еси подобен, святый великомучениче Иоанне Воине, бежащу бо тебе от идолопоклоннаго злобешенства, и демоном говения, мужемудренным разумом, и укрывающу внутрь себе веру благочестия донележе не донесеся царю злочестивому, яко приводимыя к тебе, идоложертвенными воины, христианы на мучение, отпущал еси на свободу, и поучал еси да не служат богом их, демонов не чествуют и не покланяются, и жертвы не приносят идолом, древу и каменю бездушным, да бегают в горы, и в пустыни крыются, дондеже утолится погибельное волнение благочестно, паче же да будут мужественны в муках, и воспел еси с ними Богу: Аллилуиа.

Икос 5
Видевши тя, святый страстотерпче великомучениче Иоанне Воине врученныя тебе в Нумерах Ифалских воины, благочестива суща христианина, и всем христианом защитника и помощника, твердаго же наставника и учителя, да не отпадут от благочестивыя веры Христовы, и не покорятся повелению злочестиваго царя Иулиана; мятяхуся демоноговейнии возвестити о сем царю. Мы же хвалу приносим ти сице:
Радуйся, благий светильниче, яко благодатию Божиею просвещен был еси благочестием.
Радуйся, боголюбче, яко благоверныя люди от тмы заблуждения упасл еси.
Радуйся, гонимым и мучимым христианом благотворил еси.
Радуйся, яко седящих в темницах любезно посещал еси.
Радуйся, яко лежащих в болезнех духовно утешал еси.
Радуйся, от имения твоего требующим милостыню творил еси.
Радуйся, от пищи и пития, от скверных слов до конца воздержался еси.
Радуйся, яко душевную чистоту возлюбил и до конца сохранил еси ю.
Радуйся, яко в жизни твоей целомудрие соблюл еси.
Радуйся, яко уготованное тебе вечных благ сокровище взыскал еси.
Радуйся, теплый наш присномолитвенниче.
Радуйся, скорый наш ходатай к Богу.
Радуйся, страдальче святый, великомучениче Иоанне Воине и чудотворче.

Кондак 6
Проповедником Богоносным, апостолом Христовым поревновал еси, гонителя законопреступнаго царя Иулиана стремление, и нуждную смерть ни вочтоже вменил еси, и благодерзновенно ополчился духом к борению, пред лицем мучителя проповедал еси Христа и истиннаго Бога, и Его ради лютая мучения претерпел еси, святый великомучениче Иоанне Воине, и песнь пел еси: Аллилуиа.

Икос 6
Возсиявшим в сердце твоем просвещением, истиннаго богоразумия, отразил еси святый великомучениче Иоанне Воине славне, законопреступнаго Иулиана всякия советы злокозненныя и богомерзския, угождая присно Царю Небесному и Творцу веков, земное богатство, и славу и похоть вредну возненавидев, нищету и поношение Христово возлюбив, себе самаго в жертву принесл еси, пожершемуся Слову; мы же вернии научихомся пети тебе сицевая:
Радуйся, пред мучители имя Божие исповедал еси.
Радуйся, мужеством твоим победил еси вся мучительская их ухищрения.
Радуйся, яко разрушил еси вся сосуды мучительская.
Радуйся, сущим в мучениях человеколюбно сострадал еси.
Радуйся, победоносною славою увенчался еси.
Радуйся, благочестия поборник и храбрый небесный воин.
Радуйся, яко обитаеши в дому Господни посреди Иерусалима горняго
Радуйся, яко тамо со Христом сладце водворяешися.
Радуйся, яко со всеми святыми блаженне зриши Его.
Радуйся, избранный и честный сосуде Святыя Троицы.
Радуйся, молитвенниче наш, и присный ходатаиче о нас к Богу.
Радуйся, страдальче святый, великомучениче Иоанне Воине и чудотворче.

Кондак 7
Хотяху безумнии мучители, повеление злочестиваго царя Иулиана исполнити, и еще свое желание улучити, от истиннаго Бога тебе святый страдальче Иоанне Воине отвратити в прелестное демоноговеинство: но ты, яко мудр муж вещал еси тем: вся терплю в мире сем, и ничтоже мя соблазнит, скорби и узы мя ждут, и ныне на мне: но веры и дел моих о Царствии Небесном не сотрут; верую в Бога моего, сотворшаго вся, Того единаго исповедую, славлю, хвалю, и пою Ему: Аллилуиа.

Икос 7
Новую показаша безчеловечия ярость, зверообразнии мучители, егда по повелению законопреступнаго Иулиана, демоноговейнии воини приведоша тя, святый великомучениче Иоанне Воине, из Нумеров Ифалских во всякой нужде в Царьград, тогда единомыслители царевы посадиша тебе в темницу, и томяху тя в ней, дондеже из воинства Иулиан возвратится, и якоже хощет мучити тя яко наветника своего; мы же терпение твое благоговейне воспоминающе похвалами блажим тя сими:
Радуйся, яко злобожному царю Иулиану не повинулся еси.
Радуйся, яко прещений мучительских не убоялся еси.
Радуйся, яко честьми и даровании не прелстился еси.
Радуйся, яко демон и его угодники словом от уст твоих прокляты суть.
Радуйся, яко злобожную их ересь всю попрал еси.
Радуйся, яко лестныя глаголы их в прах попрал еси.
Радуйся, языки их изощреннии притупил еси.
Радуйся, яко и сострадавшии тебе прельщению их посмеяшеся вси.
Радуйся, яко вси демоноговейницы тобою поруганы суть.
Радуйся, врагов всех крепкий победителю.
Радуйся, столпе веры и любве Христа Бога истиннаго.
Радуйся, во всех бедах наших скорый помощниче.
Радуйся, страдальче святый, великомучениче Иоанне Воине и чудотворче.

Кондак 8
Странное и страшное, святаго великомученика Иоанна Воина и стратилата, страдание видевше сострадавшии ему и вдавшиеся до смерти на муки, целомудренныя благоверныя люди, священнейшии архиереи и пресвитеры, монахи и монахини, боголюбивии мужи и жены, юноши и девы, удивишася зело, глаголюще: како за Христа мужественно терпит муки и страдания, в темнице окованный крепце, во узах железных зельне томимый; но токмо вопияху с ним Христу Богу: Аллилуиа.

Икос 8
Весь страдальче, сладчайший Иисус сладость, весь желание тебе бысть, святый великомучениче Иоанне Воине, сладце бо его ради, горькия терпел еси муки и страдания, глаголющи: чашу страдания, юже даде ми возлюбленный Бог мой; ибо сам Владыко мой Иисус Христос пострадав плотию, Крест претерпе: не имам ли пити. Темже и сам показался еси чаша сладость чудесных исцелений проливающая, мы же к тебе вопием сицевая:
Радуйся, яко страстьми любезно спутешествовал еси сладчайшему Иисусу.
Радуйся, яко силою духовною мощную крепость твою показал еси.
Радуйся, яко Бога и вышний Иерусалим искренне возлюбил еси.
Радуйся, яко богомудрым смыслом восклонился еси Христу Богу.
Радуйся, яко воплощенна Бога тамо удостоился еси зрети.
Радуйся, яко сам возсиял еси делы твоими проявленно якоже солнце.
Радуйся, Христолюбче, яко от злаго мучителя сохранял еси Христовы мученики.
Радуйся, яко за сие принял еси от Христа Бога небесную жизнь.
Радуйся, яко Христа ради богатство нищим расточил еси.
Радуйся, яко за сие дар богатых чудес от Бога тебе дан есть.
Радуйся, яко всем верным память твоя сладка есть.
Радуйся, яко всей церкви Христовой имя твое честно есть.
Радуйся, страдальче святый, великомучениче Иоанне Воине и чудотворче.

Кондак 9
Все естество ангельское, велиею возрадовася радостию, узревши мужественную крепость твою, непобедимый святый великомучениче Иоанне Воине, видевше же благочестивые людие, яко врага твоего проклятаго идоложерца Иулиана царя, праведным судом Божиим в воинстве во стране Перской, невидимо пришед святый мученик Меркурий, копием окаяннаго прободе видимо, и тако всескверный Иулиан исчезе, и наследова вечное осуждение: славу и хвалу Богу приношаху и вопияху с тобою: Аллилуиа.

Икос 9
Витии многовещанныя, риторскими своими языки, не возмогут изрещи великих твоих болезненных страданий, святый великомучениче Иоанне Воине, кто бо скажет болезнь твою, кии быша страдания и мучения; кии бо томления о благочестии; мы же точию воспомянувше терпение твое, ужасаемся, и с умилением глаголем ти сице:
Радуйся, яко воин избран Иисус Христом, стал еси на правоте.
Радуйся, веру Иисусову в боголюбивом сердце содержал еси крепце.
Радуйся, яко древо водами закона Господня напоенное, возрасл еси.
Радуйся, плоды милости благоверным людям премного сотворил еси.
Радуйся, в гонении за благочестие от злобожнаго царя, добре верным пособствовал еси.
Радуйся, яко великая скорбным людем радость в бедах обретаешися.
Радуйся, яко живый на земли всеми небесными добродетельми обогатился еси.
Радуйся, яко даже до смерти духом и плотию смирил еси себе.
Радуйся, святую душу твою в руце Господу Богу предал еси.
Радуйся, яко святыя мощи твоя к погребению в доме странных быша положени.
Радуйся, чудесне некоей благочестивой жене Бог тя прослави.
Радуйся, страдальче святый, великомучениче Иоанне Воине и чудотворче.

Кондак 10
Спасти хотя душу свою, о теле твоем всячески нерадил еси святый великомучениче Иоанне Воине, егда бо сидел еси во узилище, прелестнии идолослужители единомыслители Иулиана законопреступнаго, не ведяху бо погибели Иулиановой, ждаху его возвращения из воинства из земли Персидския, уготовляющи тя, и со страдавшими с тобою праведными к народному мучению: но ты святе Иоанне, за Христа мучитися готовяшеся с радостию, и укрепляющему тя Богу воспевал еси: Аллилуиа.

Икос 10
Стены каменныя твердее, окамененный сердцем бысть в жизни своей законопреступный Иулиан, с единомысленниками его, по извержении же души его треклятой, злобожнии мучетели, советники его, в неправедных своих начинаниях суетни показахуся, о еже бы мучити тя святе Иоанне, и страдавших с тобою праведных усоветовавшие: но молитвами святых омерзеша идоли всем людем, и преста лесть идольская, и паки наста благочестие: во благочестии же пребывающих, приими от нас святый страдальче похвалу сицевую:
Радуйся, яко Иулианово зверство и его демоноговеинство умре, а благочестие воскресе.
Радуйся, страдальче, яко безбожный Иулиан копием смертне прободен, а благоверный Иовиан царем избран.
Радуйся, страдальче, яко скверное Иулианово злочестие победися, а православная Восточная церковь возобновися.
Радуйся, страдальче, и мы умильно тя молим, еже и нам радоватися с тобою, якоже тебе темничныя двери отверзошася.
Радуйся, страдальче, и нас молитвенников твоих присвой радоватися с тобою, якоже о тебе и страдавших праведных узы отрешишася.
Радуйся, страдальче, темже и мы срадуемся тебе, яко страдавшия с тобою праведныя из горести темничныя вси изведошася.
Радуйся, яко вси благочествии за сие приносят тебе благодарение.
Радуйся, тебе вопием, восхваляем и прославляем имя твое во веки.
Радуйся, страдальче, яко велий Господь, и велию милость с нами сотвори.
Радуйся, страдальче, Господь страшен, крепок и силен в брани, и милостив, единым словом злочестие сокруши.
Радуйся, страдальче, яко чуден Господь, и зело чудны дела Его сотворшаяся, яко благоволи нам пребыти в них.
Радуйся, страдальче, якоже ты творил волю Источника Живота, такоже сподоби и нас творити волю Его, да узрим и мы свет света.
Радуйся, страдальче, утверди и нас хвалити в вышних Бога, благословити, кланятися, славословити, благодарити, великия ради милости Его к нам.
Радуйся, страдальче святый, великомучениче Иоанне Воине и чудотворче.

Кондак 11
Пение наше похвальное, аще бы и тмочисленное, вемы, яко несть довольно по достоянию восхвалити тя, святый великомучениче Иоанне Воине; обаче мы Божиих тобою нам обильно подаваемых дарований благодарни суще, Богу в тебе своими благодеянии прославляемому, благодарственными усты поем: Аллилуиа.

Икос 11
Светоносную свещу на небесном свещнице, пред престолом Святыя Троицы поставлену, зрим умными очима, тебе святый великомучениче Иоанне Воине: отонудуже егда невидимо помоществуеши нам во всякое время, крадения бо объявляеши, и бежание злое, в каковую кому напасть, впасти удержаваеши; наветы и плотская скверныя пожелания отдаеши, и воздержными твориши. За сие воистинну достоин еси почитаем быти сим:
Радуйся, яко кто подвиги твоя в страдании ради веры в Господа Иисуса изрещи возможет.
Радуйся, яко Его ради всякая плотская вожделения оставил еси.
Радуйся, поработив духу тело твое, томя его постом, воздержался еси.
Радуйся, приближивыйся ко Господу в соединении кроткаго и молчаливаго духа.
Радуйся, сам ся в жертву всех Творцу возложив и вся добродетели исправил еси.
Радуйся, яко Владыки Христа Господа благословенное звание получил еси.
Радуйся, яко наследник был от сложения мира царства небеснаго.
Радуйся, утеши тя Бог блаженствы вечными.
Радуйся, яко блажен еси предстояй престолу Святыя Троицы.
Радуйся, верно служив Богу ныне хвалиши его в вышних.
Радуйся, яко прослави тя Бог ради добродетельнаго жития твоего.
Радуйся, память твою пречестную светло совершабщи, ублажаем тя.
Радуйся, страдальче святый, великомучениче Иоанне Воине и чудотворче.

Кондак 12
Благодать от Бога дана ти есть, злых рабов бежащих от господей своих возвращати, и окрадающих благочестивых людей, разбойников являти, и повелевати им отдавати украденная вспять господем своим: за сию милость Господню, чрез тебе святе великомучениче Иоанне Воине являемую, радостно благодаряще Его, поем Ему: Аллилуиа.

Икос 12
Поем твоя крепкия подвиги, почитаем страдания, хвалим долготерпение, ублажаем святую твою кончину, славим твое в немощном теле показавшееся непобедимое мужество, имже на земли и на небеси прославился еси, святый и добропобедный великомучениче Иоанне Воине, и в честь твоих победоносных подвигов и страданий, похвальная восписуем ти сия:
Радуйся, яко уподобился еси распеншемуся на древе Христу Богу нашему.
Радуйся, яко сраспялся Ему воздержанием, молитвою, милостынею, и всеми добродетельми твоими.
Радуйся, яко добродеянии неусыпно прилагал еси.
Радуйся, яко целомудрием, и всем добротворением вооружився, вся козни душетлителя врага попрал еси.
Радуйся, мужественнаго стояния в законе Господни, истиннаго благочестия похвалами венчаем тя.
Радуйся, яко видев Бог твое усердие к Нему, прослави тя, отблагодарствовав чудесы, и славою вечною.
Радуйся, сладкое и радостное торжество твое ныне нас, людей твоих облиста воображением твоим.
Радуйся, яко некая жена благочестивая приемши святыя твоя мощи, предложи святей Церкви, яко смирну благоухания.
Радуйся, скорый в бедах моих предстатель, яко верою и любовию радующеся тя почитаю.
Радуйся, душевных и телесных недугов и болезней моих добрый врачу и целителю.
Радуйся, яко от нечаянныя и вечныя смерти тобою сохранен аз быти уповаю.
Радуйся, яко тобою вечную жизнь получити надеюся.
Радуйся, страдальче святый, великомучениче Иоанне Воине и чудотворче.

Кондак 13
О многострадальный победоносче, и всехвальный великомучениче, страстотерпче, и страдальче Христов, святый Иоанне Воине, нынешнее наше приими моление, и от всякия болезни душевныя и телесныя здравы сотвори нас, и Богоприятным ходатайством твоим от вечнаго мучения избави, да с тобою во веки поем Богу: Аллилуиа.
Сей кондак глаголи трижды, и паки Икос первый, и Кондак первый.

Молитва

Святому Великомученику и Чудотворцу Иоанну Воину
О великомучениче, страдальче Христов, Иоанне Воине, храбрый еси в ратех врагов прогонитель, и обидимых заступник, всем православным христианом. О великий заступниче и угодниче Христов, Иоанне Воине, молитвами твоими ко Господу Богу, помилуй нас грешных и недостойных рабов твоих, в бедах и скорбех, в печалех и во всякой злой напасти, о от всякаго злаго и обидящаго человека, ибо дана тебе бысть таковая благодать от Бога молитися за ны грешныя, буди заступник в бедах и напастех, зле страждущих, избави нас от обидящих и ненавидящих, буди нам поборник на вся видимыя и невидимыя враги наша.
Благочестивейшему Самодержавнейшему Великому Государю нашему императору Александру Николаевичу все России, на враги победу даруй, и воинство Его во брани укрепи, яко да твоею помощию и крепким поборством, посрамятся вси являющии рабом твоим злая.
О великий поборниче Иоанне Воине не забуди нас грешных рабов твоих, всегда молящихся тебе, и просящих помощи у тебе, и неоскудныя милости твоея, и сподоби нас грешных и недостойных рабов твоих, молитвами твоими, получити от Бога неизреченныя благая, яже уготова Бог любящим Его: яко Ему подобает всякая слава, честь и поклонение, Отцу, и Сыну, и Святому Духу, ныне и присно, и во веки веков, аминь.
О великий всемилостивый страдальче, дивный Иоанне, воине страшный небеснаго царя, приими сие акафистово моление наше, от недостойных раб твоих, молися Христу Богу, да от бед и скробей и злаго мучения избавит нас, и сподобит Царствия Небеснаго, верно вопиющих всегда Ему: Аллилуиа.

1867 год.
Служба и акафист св. Иоанну Воину
Библиотека Свято-Троицкой Лавры
Опись 1906 г.
Отд. 1
№ 312